ᤜᤥᤛᤣ 7 - LIFOTNT

ᤀᤡᤛᤪᤠᤀᤡᤗᤖᤧ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠ ᤁᤢᤛᤡᤖᤠ᤹ᤌᤠᤱ

¹ “ᤀᤠᤱᤃᤠ᤹ ᤀᤡᤛᤪᤠᤀᤡᤗᤖᤧ ᤁᤢᤕᤠᤱᤄᤣ᤺ᤰᤁᤡᤴ ᤘᤣ᤺ᤴᤍᤢᤱᤅᤡᤸᤗᤧ. ᤀᤣᤑᤪᤠᤀᤡᤔᤖᤧ ᤁᤢᤗᤠᤕᤥᤜᤠ᤹ ᤀᤥᤛᤣ᤺ᤴᤎᤠᤱ ᤐᤥᤱᤗᤥ ᤜᤧᤰᤁᤩᤠᤱ ᤛᤠᤔᤖᤡᤕᤠ᤺ᤸᤗᤧ ᤁᤢᤓᤧᤴᤕᤠ᤺ᤶᤒᤰᤜᤠ᤹ ᤏᤡᤎᤠ᤺ᤵᤗᤥ॥ ᤂᤧᤱᤜᤠ᤹ ᤀᤡᤱᤗᤧᤰᤛᤫᤠᤒᤠ ᤕᤠ᤺ᤶᤒᤰ ᤔᤧᤈᤥᤰᤗᤥ ᤁᤧᤄᤢ᤺ᤵᤐᤠᤜᤠ᤹ ᤜᤡᤶᤜᤠ᤹ᤀᤥ ᤔᤧᤗᤠ᤺ᤳᤗᤥ. ᤑᤠ᤺ᤴᤍᤠᤜᤠ᤹ᤖᤧ ᤔᤠᤖᤠᤶᤜᤠ᤹ᤀᤥ ᤔᤏᤠᤜᤠ᤹ ᤔᤧᤏᤠᤵᤋᤢᤛᤡᤖᤥ॥

² ᤁᤖ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤑᤧᤴᤕᤠ᤺ᤶᤒᤰᤜᤠ᤹ ᤀᤡ᤺ᤳᤋᤢᤱ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤴᤀᤡ᤺ᤳᤋᤢᤴᤗᤥ॥ ᤂᤢᤴᤇᤡ᤹ ᤀᤠᤵᤑᤣᤰ ᤗᤠᤕᤥᤜᤠ᤹ᤖᤧ ᤂᤧᤱᤜᤠ᤹ ᤛᤢ᤺ᤵᤋᤢᤛᤡᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤂᤧᤴ ᤗᤠᤕᤥᤜᤠ᤹ ᤀᤠᤱᤃᤠ᤹ ᤀᤠᤍᤃᤡ ᤘᤠ᤹ᤖᤥ॥”

ᤜᤠᤱᤜᤡᤶᤔᤥ ᤆᤧᤶᤓᤴ

³ “ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤜᤠᤱᤅᤡᤴ ᤁᤢᤏᤡᤱᤘᤠ᤹ ᤔᤧᤍᤠᤛᤢᤖᤥ ᤂᤢᤴᤇᤡ᤹ ᤀᤡᤱᤗᤧᤰᤁᤡᤸᤗᤧ ᤗᤠᤶᤗᤥᤒᤠᤜᤠ᤹ ᤏᤡᤱᤘᤠ᤹ ᤋᤠᤛᤢ ᤐᤡᤖᤢᤛᤡᤖᤥ॥

⁴ ᤂᤧᤱᤜᤠ᤹ ᤁᤧᤖᤧᤰ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤛᤡᤖᤥ. ᤂᤧᤱᤜᤠ᤹ ᤂᤖᤧ᤺ᤱ ᤗᤧ᤺ᤱᤔᤠ ᤔᤡᤍ᤺ᤳ ᤜᤧᤰᤋᤱᤒᤠ ᤔᤧᤈᤥᤰᤗᤥ. ᤂᤖᤧ᤺ᤱ ᤁᤧᤗᤧ᤺ᤱᤒᤧᤸᤗᤧ ᤑᤣ᤹ᤖᤢᤶ ᤛ᤹ᤖᤢᤸᤗᤧ ᤂᤧᤴ ᤔᤡᤍ᤺ᤳᤋᤧᤴ ᤁᤧᤕᤧᤶᤒᤠ ᤆᤥ᤺ᤰᤔᤠ ᤔᤣ᤺ᤴᤇᤠᤱ ᤐᤥᤱᤗᤥ॥

⁵ ᤀᤠᤏᤡ᤹ ᤜᤠᤱᤅᤡᤸᤗᤧ ᤁᤢᤛᤛᤠᤱᤛᤪᤥᤳ ᤆᤥ᤺ᤰᤔᤠ ᤕᤧᤴᤏᤥ ᤛᤢᤜᤠᤱᤕᤢᤰᤐᤠᤜᤠ᤹ ᤛᤣᤈᤱᤘᤠ᤺ᤸᤗᤧ ᤛᤠ᤹ᤖᤡᤰ ᤔᤕᤢᤛᤡᤖᤥ. ᤂᤧᤒᤩᤠᤱ ᤜᤠᤱᤅᤡᤸᤗᤧ ᤁᤢᤏᤠᤔᤧᤴᤇᤠ᤹ ᤁᤧᤈᤥ᤺ᤰᤐᤠᤜᤠ᤹ᤏᤢ ᤜᤢᤰ ᤋᤱᤄᤢᤖᤥ॥

⁶ ᤂᤧᤱᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤐᤠᤴ ᤔᤧᤀᤡ᤺ᤳᤋᤢᤀᤠᤱ ᤜᤠᤱᤅᤧᤀᤥ ᤔᤧᤒᤣ᤺ᤰᤗᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤔᤡᤍ᤺ᤳ ᤜᤧᤰᤋᤱᤒᤠ ᤆᤥᤰᤗᤥ॥ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤂᤢᤴᤇᤡ᤹ ᤛᤠᤰᤁᤧᤴᤏᤡᤸᤗᤧ ᤀᤥ᤹ᤖᤢᤛᤡᤖᤥ ᤜᤧᤰᤁᤩᤠᤱ ᤋᤠᤏᤠᤶ ᤔᤡ ᤜᤧᤰᤁᤣ ᤋᤡ᤺ᤳᤗᤥ॥

⁷ ᤂᤧᤱᤜᤠ᤹ ᤁᤧᤖᤧᤰ ᤔᤡᤍ᤺ᤳᤋᤥᤒᤠ ᤔᤡ ᤜᤧᤰᤋᤱᤒᤠ ᤔᤧᤈᤥᤰᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤛᤠᤒᤠᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤛᤡᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤜᤠᤱᤜᤠ᤹ ᤔᤧᤈᤥᤴᤗᤥ. ᤜᤧᤰᤁᤩᤠᤱ ᤀᤠᤳᤋᤡᤴ ᤜᤠᤱᤜᤠ᤹ᤖᤧᤀᤠᤱ ᤐᤣᤗᤡ ᤔᤧᤶᤓᤠᤰᤁᤠᤴᤗᤥ॥”

ᤀᤡᤛᤪᤠᤀᤡᤗ ᤏᤢ ᤘᤣ᤹ ᤛᤢᤘᤠᤱᤜᤠ᤹

⁸ “ᤀᤣᤑᤪᤠᤀᤡᤶᤔᤡᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ ᤑ᤺ᤴᤇᤡᤱᤗᤥ. ᤀᤣᤑᤪᤠᤀᤡᤶᤔᤡᤴ ᤌᤡᤰ ᤗᤧᤵᤔᤠᤱᤗᤰ ᤁᤧᤛᤱᤒᤠ ᤂᤖᤧ᤺ᤱ ᤜᤧᤰᤁᤣ ᤗ᤹ᤖᤥ॥

⁹ ᤘᤣ᤹ ᤗᤠᤈᤣ᤹ᤒᤠᤜᤠ᤹ᤖᤧ ᤂᤧᤸᤗᤧ ᤁᤢᤔᤢᤰᤁᤡᤴ ᤔᤧᤔᤧᤰᤂᤢᤖᤥ. ᤁᤖ ᤂᤧᤸᤗᤧ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤄᤥᤛᤢᤴᤗᤥ॥ ᤂᤧᤸᤗᤧ ᤁᤢᤎᤧᤃᤣᤰ ᤔᤢᤖᤡᤰ ᤁᤧᤓᤢᤵᤐᤧᤴ ᤏᤡᤎᤠ᤺ᤵᤔᤠ ᤜᤣ᤺ᤰᤋᤧᤀᤠᤱ ᤐᤳᤗᤥ. ᤁᤖ ᤂᤧᤴ ᤐᤠ᤺ᤴᤏᤡᤴ ᤂᤢᤏᤧ᤹ ᤏᤡᤱᤘᤠ᤹ᤀᤣ ᤔᤧᤄᤥᤛᤢᤴᤗᤥ॥

¹⁰ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤱᤍᤡᤱᤅᤡᤸᤗᤧ ᤀᤠᤵᤑᤣᤰ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤥ᤺ᤴᤍᤡ ᤐᤡᤖᤢᤛᤡᤖᤥ. ᤁᤖ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤔᤧᤴᤏᤢ᤺ᤱᤏᤧᤴᤗᤥ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤱᤃᤥ᤺ᤳᤋᤢᤴ ᤔᤧᤴᤜᤰᤛᤢᤴᤏᤠᤱᤗᤥ॥

¹¹ “ᤀᤣᤑᤪᤠᤀᤡᤶᤔᤡᤴ ᤁᤢᤗᤧᤶ ᤁᤧᤏᤢ᤹ᤒᤠ ᤏᤢ ᤁᤢᤎᤏᤠ ᤁᤧᤜᤥᤵᤐᤠ. ᤁᤢᤏᤧᤜᤡ ᤁᤧᤜᤥᤵᤐᤠ ᤐᤢᤳᤋᤢ᤺ᤰᤁᤣ ᤜᤧᤰᤋᤱᤒᤠ ᤆᤥᤰᤗᤥ॥ ᤀᤠᤸᤗᤥ ᤂᤧᤱᤜᤠ᤹ᤖᤧ ᤔᤡᤛᤪ ᤗᤠᤈᤣᤴ ᤔᤧᤀᤢ᤺ᤳᤋᤢᤖᤥ. ᤂᤧᤱᤜᤠ᤹ ᤀᤛ᤻ᤛᤢᤖᤀᤥ ᤔᤧᤒᤣ᤺ᤰᤗᤥ॥

¹² ᤀᤠᤸᤗ ᤂᤧᤱᤜᤠ᤹ ᤔᤧᤒᤣ᤺ᤰᤁᤡᤸᤗᤧ. ᤀᤠᤀᤡᤍᤠ᤺ᤰᤁᤡᤴ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤁᤧᤛᤢᤱᤗᤥ. ᤀᤠᤱᤃᤠ᤹ ᤂᤧᤱᤜᤠ᤹ ᤋᤠᤱᤛᤠᤱᤒᤥᤒᤠ ᤐᤢᤜᤠ᤹ ᤜᤧᤰᤁᤣ ᤕᤥ ᤌᤠᤛᤢᤱᤛᤡᤱᤗᤥ॥ ᤀᤠᤸᤗ ᤂᤧᤱᤜᤠ᤹ ᤁᤢᤒᤴᤈᤩᤠᤱᤔᤥ ᤔᤧᤒᤧᤒᤠ ᤂᤧᤵᤛᤢᤱᤅᤡᤸᤗᤧ. ᤀᤠᤱᤃᤠ᤹ ᤂᤧᤱᤜᤠ᤹ ᤋᤧᤶᤛᤢᤱᤛᤡᤱᤗᤥ॥

¹³ “ᤂᤧᤱᤜᤠ᤹ᤃ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤀᤠᤱᤃᤠ᤹ᤗᤠᤶ ᤔᤠ᤺ᤱᤄᤠ ᤔᤧᤄᤧᤳᤇᤡᤱ ᤔᤧᤒᤣᤀᤠᤱ ᤔᤧᤘᤠ᤹ᤖᤥ᥄ ᤂᤧᤱᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤒᤥᤱᤗᤖᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤂᤧᤱᤜᤠ᤹ ᤐᤡᤑᤩᤢᤱᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ ᤁᤢᤔᤧᤸᤗᤢᤱ ᤜᤢᤱᤔᤠᤀᤠᤱ ᤂᤧᤱᤜᤠ᤹ ᤌᤧ᤹ᤔᤠᤛᤡ ᤀᤠᤏᤡᤱᤘᤠ᤹ ᤘᤠ᤹ᤖᤥ. ᤁᤖ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤀᤡᤱᤗᤧᤰ ᤔᤧᤒᤠ᤺ᤳᤋᤢᤖᤥ॥

¹⁴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤱᤔᤧᤸᤗᤧ ᤀᤠᤱᤃᤠ᤹ ᤐᤣᤗᤡ ᤔᤧᤶᤓᤠᤰᤁᤠᤴᤗᤥ. ᤁᤖ ᤂᤢᤴᤇᤡ᤹ ᤀᤠᤵᤑᤣᤰ ᤏᤧᤳᤏᤠᤜᤠ᤹ᤀᤥ ᤔᤧᤖᤡᤱ ᤔᤧᤎᤰᤗᤥ॥ ᤁᤢᤈᤠ ᤏᤢ ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤛᤣᤈᤱᤘᤠ᤺ᤸᤗᤧ ᤗᤠᤃᤡ ᤂᤧᤱᤜᤠ᤹ ᤔᤧᤈᤢᤶᤗᤥ. ᤁᤖ ᤀᤠᤱᤃᤠ᤹ᤏᤢᤃ ᤂᤢᤴᤇᤡ᤹ ᤏᤠᤖᤠᤴ ᤔᤧᤜᤡᤛᤢ ᤔᤧᤍᤣᤛᤢᤖᤥ॥

¹⁵ ᤀᤠᤱᤃᤠ᤹ ᤂᤧᤱᤜᤠ᤹ ᤛᤎᤠᤛᤡᤱᤔᤠ ᤜᤢ᤹ᤖᤢᤱᤛᤡᤱᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤎᤢᤶᤒᤠ ᤆᤥᤃᤢᤱᤛᤡᤱᤗᤥ. ᤁᤖ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤆᤧᤶᤓᤴ ᤔᤧᤈᤥᤃᤢᤖᤥ॥

¹⁶ ᤂᤧᤱᤜᤠ᤹ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤴᤜᤡᤛᤡᤱᤅᤡᤴᤗᤥ. ᤂᤧᤱᤜᤠ᤹ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤗᤡ᤹ᤀᤡᤴ ᤜᤧᤰᤋᤱᤒᤠ ᤔᤧᤈᤥᤰᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤁᤢᤏᤠᤔᤧᤴᤇᤠ᤹ ᤐᤠ᤺ᤴᤈᤠ᤺ᤰᤁᤡᤸᤗᤧ ᤆᤥᤃᤢᤸᤗᤧ ᤋᤠᤓᤣ᤺ᤸᤗᤧ ᤔᤧᤛᤥᤴᤍᤢᤛᤡᤖᤥ. ᤁᤸᤗᤧ ᤆᤥᤃᤢᤸᤗᤧᤀᤣ ᤔᤡᤛᤪ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤛᤡᤖᤥ॥”