ᤜᤥᤛᤣ 6 - LIFOTNT

ᤔᤏᤠᤜᤠ᤹ ᤗᤠᤕᤥᤗᤠᤶ ᤁᤧᤜᤡᤶᤒᤠ ᤔᤧᤗᤧᤱᤛᤡᤱ

¹ “ᤋᤩᤧᤶᤔᤧ᤹ᤀᤥ. ᤕᤜᤘᤣ ᤍᤠᤱᤒᤠᤀᤥ ᤀᤠᤏᤡ᤹ ᤏᤢ᤺ᤰᤂᤡᤖᤥ॥ ᤂᤢᤏᤧ᤹ ᤀᤠᤏᤡ᤹ ᤁᤢᤶᤈᤡᤰᤔᤠ ᤀᤠᤕ᤺ᤵᤛᤧᤀᤠᤱ ᤘᤠ᤹ᤖᤥ. ᤁᤖ ᤀᤠᤸᤗ ᤂᤢᤏᤧ᤹ ᤀᤠᤏᤡ᤹ ᤀᤠᤘᤣ᤺ᤴᤗᤥ॥ ᤂᤢᤏᤧ᤹ ᤀᤠᤏᤡ᤹ ᤀᤠᤎᤃᤧᤀᤠᤱ ᤀᤠᤘᤠ᤹ᤖᤥ. ᤁᤖ ᤂᤢᤏᤧ᤹ ᤀᤠᤏᤡ᤹ ᤕᤠᤱᤄᤣ᤺ᤰᤜᤠ᤹ᤀᤥ ᤛᤡᤍᤠ᤹ ᤜᤢ᤺ᤳᤋᤢ ᤀᤠᤒᤡᤖᤥ॥

² ᤏᤡᤕᤠᤴ ᤀᤣᤃᤠᤱ ᤂᤢᤏᤧ᤹ ᤀᤠᤏᤡ᤹ ᤁᤢᤜᤡᤱᤘᤧᤳ ᤀᤠᤈᤥ᤺ᤰᤗᤥ. ᤛᤢᤶᤛᤡᤃᤣᤰᤐᤠ ᤕᤧᤴᤏᤥ ᤂᤢᤏᤧ᤹ ᤀᤠᤏᤡ᤹ ᤀᤠᤓᤥᤱᤗᤥ. ᤜᤧᤰᤁᤩᤠᤱ ᤀᤠᤏᤡ᤹ ᤂᤢᤏᤧ᤹ ᤁᤢᤍᤃᤡ ᤀᤠᤜᤡᤱᤗᤥ॥

³ ᤕᤜᤘᤣ ᤍᤠᤱᤒᤧᤴ ᤀᤠᤏᤡ᤹ ᤁᤢᤛᤡᤱ ᤏᤡ᤺ᤳᤋᤢᤶᤗᤥ. ᤕᤜᤘᤣ ᤍᤠᤱᤒᤧᤴ ᤁᤢᤛᤡᤱ ᤏᤡ᤺ᤵᤔᤠᤖᤧ ᤗᤠᤃᤡ ᤆᤰᤔᤧᤸᤗ᤹ᤀᤣ ᤋᤶᤛᤡᤱ ᤆᤥᤃᤢᤶᤗᤥ॥ ᤋᤠᤏᤠᤶ ᤏᤠᤶ ᤗᤡᤱᤒᤠ ᤜᤧᤰᤁᤣ ᤛᤧᤰᤂᤠ ᤂᤢᤏᤧ᤹ ᤛᤧᤰᤂᤠ ᤋᤠᤖᤥ. ᤂᤢᤏᤧ᤹ᤃ ᤀᤠᤏᤡ᤹ᤀᤥ ᤜᤠᤱᤘᤠᤔᤠ ᤕᤧᤶᤔᤥᤒᤠ ᤘᤜᤡᤳ ᤜᤧᤰᤁᤣ. ᤂᤠᤶᤒᤣᤰ ᤘᤠᤃᤧᤖᤱᤒᤠ ᤁᤢᤏᤢᤵᤔᤥᤒᤠ ᤘᤜᤡᤳ ᤁᤢᤀᤡᤛᤡᤰ ᤋᤠᤖᤥ॥”

⁴ ᤀᤣᤑᤪᤠᤀᤡᤔᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤌᤣ ᤔᤧᤳᤏᤧᤒᤠᤒᤣ᥅ ᤕᤜᤢᤍᤠᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤜᤧᤴ ᤔᤧᤳᤏᤧᤒᤠᤒᤣ᥅ ᤂᤡᤏᤡ᤹ ᤔᤡ᤺ᤶᤈᤡᤴ ᤋᤠᤏᤠᤶᤒᤠ ᤋᤢᤱᤜᤡ᤺ᤰ ᤜᤧᤰᤁᤣ ᤗ᤹ᤖᤥ ᤂᤧᤒᤩᤠᤱ ᤀᤠᤴᤍᤣᤴ ᤋᤠᤏᤠᤶᤒᤠ ᤁᤧᤔᤠᤒᤠ ᤁᤧᤒᤣ᤺ᤰᤐᤠ ᤛᤣ᤺ᤰᤘᤠ ᤜᤧᤰᤁᤣ ᤗ᤹ᤖᤥ॥

⁵ ᤁᤸᤗᤧᤆᤥᤃᤢᤸᤗᤧ ᤀᤠᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤀᤠᤱᤃᤠ᤹ ᤂᤡᤏᤡ᤹ ᤁᤢᤶᤈᤡᤰᤔᤠ ᤆᤥ᤺ᤰᤏᤡᤱᤅᤠᤱ ᤘᤠ᤹ᤖᤥ. ᤀᤠᤱᤃᤠ᤹ ᤂᤡᤏᤡ᤹ ᤀᤠᤶᤒᤪᤠᤀᤥᤒᤠ ᤐᤠ᤺ᤴᤈᤠ᤺ᤰᤁᤡᤸᤗᤧ ᤛᤧᤳᤏᤡᤱᤅᤠᤱ ᤘᤠ᤹ᤖᤥ ᤀᤠᤱᤃᤠ᤹ ᤀᤠᤄᤠᤛᤧᤴᤏᤡᤴ ᤂᤡᤏᤡ᤹ᤀᤥ ᤛᤠ᤺ᤶᤓᤣ ᤜᤧᤰᤁᤣ ᤗᤧᤰᤋᤧᤀᤠᤱ ᤘᤠ᤹ᤖᤥ॥

⁶ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ᤃ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤔᤣ᤺ᤴᤗᤥ ᤆᤰᤔᤧᤴᤗ᤹ᤀᤣ ᤕᤠᤵᤔᤡ ᤔᤡ᤺ᤶ ᤁᤧᤔᤧᤳᤋᤡᤒᤠ ᤏᤡᤱᤘᤠ᤹ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤏᤢ᤺ᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥

⁷ ᤁᤖ ᤂᤧᤱᤜᤠ᤹ᤖᤧᤃ ᤀᤠᤍᤶᤔᤡᤴ ᤁᤢᤀᤡᤛᤡᤰ ᤔᤠᤱᤜᤢᤵᤐᤡᤴ ᤔᤧᤓᤣ᤺ᤴᤍᤢᤀᤠᤱ ᤘᤠ᤹ᤖᤥ. ᤂᤧᤵᤔᤥ ᤂᤧᤱᤜᤠ᤹ ᤀᤠᤱᤃᤠ᤹ ᤗᤧᤵᤔᤠᤱ ᤏᤛᤠ᤺ᤴᤛᤠᤒᤠ ᤔᤧᤶᤒᤥ᤺ᤰᤂᤧᤴᤗᤥ॥

⁸ ᤃᤡᤗᤠᤍᤧᤴ ᤁᤢ᤹ᤀᤡᤁᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤗᤥ ᤔᤠᤰᤂᤡ᤹ ᤗᤠᤱᤕᤥ᤺ᤰᤜᤠ᤹ᤖᤧ ᤂᤧᤴ ᤋᤡᤶᤛᤧᤀᤠᤱ ᤏᤧᤖᤥ॥

⁹ ᤀᤠᤰᤂᤣᤗ᤹ᤖᤡᤰ ᤁᤧᤏᤠᤵᤐᤠᤜᤠ᤹ᤖᤧ ᤗᤠᤶᤔᤥ ᤔᤏᤠᤴ ᤔᤧᤛᤢᤃᤢᤀᤠᤱ ᤔᤧᤕᤢᤱ᤹. ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤔᤧᤎᤢᤰᤛᤡᤱᤅᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤛᤣᤁᤣᤔ ᤁᤧᤒᤣ᤺ᤰᤐᤠ ᤗᤠᤶᤔᤥ ᤔᤏᤠ ᤔᤧᤛᤧᤖᤢᤛᤡᤖᤥ. ᤁᤶᤓᤗ᤹ᤖᤡᤰ ᤂᤧᤱᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖᤥ॥

¹⁰ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤅᤥ ᤁᤡᤵᤔᤠᤃᤧᤄᤢᤒᤠ ᤐᤠᤴ ᤏᤡᤛᤢᤱᤅᤠᤱ ᤘᤠ᤹ᤖᤥ. ᤀᤣᤑᤪᤠᤀᤡᤶᤔᤡᤴ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤴ ᤆᤡ᤺ᤴᤈᤡ᤺ᤴᤃᤧᤄᤢᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥

¹¹ ᤕᤜᤢᤍᤠᤀᤣ. ᤂᤧᤏᤧ᤹ ᤁᤧᤗᤠᤃᤡᤀᤠᤱ ᤆᤠᤛᤢᤶᤔᤠ ᤕᤧᤶ ᤐᤥ᤺ᤰᤂᤧᤀᤠᤱ ᤏᤧᤖᤥ॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤢ᤹ᤔᤠ ᤋᤠᤔᤠᤜᤠ᤹ ᤏᤢ᤺ᤰᤋᤢᤱᤅᤡᤸᤗᤧ.