ᤜᤥᤛᤣ 5 - LIFOTNT

¹ “ᤏᤡᤱᤘᤠ᤹ᤑᤢᤛᤠᤶᤒᤠᤛᤣ. ᤁᤴ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ᥄ ᤀᤡᤛᤪᤠᤀᤡᤗᤡ ᤜᤡᤶᤛᤕᤱᤛᤣ. ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ᥄ ᤜᤠᤱ ᤜᤡᤶᤛᤕᤱᤛᤣ. ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤠᤱ ᤂᤧᤵᤛᤧᤶᤔᤧ᤹ᤀᤥ᥄ ᤁᤴ ᤏᤡ᤺ᤴᤎᤥ ᤁᤧᤒᤥᤱᤒᤠ ᤂᤠᤛᤧᤴᤏᤡᤴ ᤂᤡᤏᤡ᤹ ᤋᤱᤗᤧᤱᤘᤠᤀᤥ ᤘᤠ᤹ᤖᤥ— ᤔᤡᤛ᤻ᤐᤠᤀᤥ ᤂᤡᤏᤡ᤹ ᤆᤧᤴ ᤏᤢ ᤋᤒᤥᤖᤀᤥ ᤁᤧᤔᤏᤠᤒᤠ ᤀᤡᤍᤠᤰ ᤁᤧᤒᤥ᤺ᤰᤂᤡᤀᤠᤱ ᤘᤠ᤹ᤖᤥ॥

² ᤐᤡᤑᤩᤢᤱᤒᤠᤜᤠ᤹ ᤔᤏᤠ ᤆᤧᤵᤔᤠ ᤛᤧᤵᤔᤠ ᤕᤠ᤺ᤶᤒᤰᤁᤥ ᤔᤧᤎᤩᤧᤀᤠᤱ ᤔᤧᤕᤠᤰᤗᤥ॥ ᤀᤠᤱᤃᤠ᤹ ᤂᤧᤱᤜᤠ᤹ ᤁᤧᤖᤧᤰ ᤜᤧᤴᤌᤡᤶᤔᤥ ᤋᤠᤖᤢᤱᤛᤡᤱᤗᤥ॥

³ ᤀᤠᤱᤃᤠ᤹ ᤀᤡᤑᤪᤠᤀᤡᤔᤖᤧ ᤁᤢᤍᤰᤗᤧᤱᤘᤠᤀᤥ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤡᤛᤢᤱᤗᤥ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤴ ᤀᤠᤱᤃᤠ᤹ᤗᤠᤶ ᤆᤡᤱᤛᤡᤱᤒᤠ ᤜᤥᤵᤗᤥ॥ ᤀᤡᤑᤪᤠᤀᤡᤔᤀᤣ. ᤂᤧᤏᤧ᤹ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤀᤠᤱ ᤘᤠ᤹ᤖᤥ. ᤀᤡᤛᤪᤠᤀᤡᤗᤧᤴ ᤛᤠ᤹ᤖᤡᤰ ᤕᤠᤶᤃᤧᤛᤡᤱᤒᤠ ᤘᤠ᤹ᤖᤥ॥”

ᤜᤥᤛᤣ᤺ᤸᤗᤧ ᤏᤠᤘᤠᤀᤡᤳᤗᤠ ᤔᤠᤱᤃᤧᤄᤒᤠᤜᤠ᤹ ᤛᤠᤶᤍᤡᤱ ᤐᤡᤖᤢᤛᤡ

⁴ “ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤜᤠ᤹ᤖᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤏᤢ᤺ᤱᤔᤠ ᤔᤧᤓᤠ᤺ᤰᤋᤢᤛᤡᤴᤗᤥ॥ ᤕᤠᤶᤒᤥ᤺ᤵᤔᤠ ᤏᤡᤱᤘᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤶᤔᤥ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤁᤢᤛᤡᤱ ᤏᤡ᤺ᤵᤔᤠ ᤏᤡᤱᤘᤠ᤹ ᤔᤧᤴᤈᤥᤃᤢᤴᤗᤥ॥

⁵ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤱᤍᤡᤱ ᤗ᤹ᤔᤧᤸᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤋᤰᤗᤧᤱᤘᤠᤀᤥ ᤋᤥ᤺ᤴᤍᤡ ᤐᤡᤖᤢᤛᤡᤖᤥ॥ ᤀᤡᤛᤪᤠᤀᤡᤗ ᤏᤢ ᤀᤣᤑᤪᤠᤀᤡᤶᤔᤡᤴᤏᤠᤱ ᤂᤢᤴᤇᤡ᤹ ᤀᤠᤵᤑᤣᤰ ᤗᤠᤕᤥᤀᤥ ᤂᤢᤴᤇᤡ᤹ ᤆᤥ᤺ᤴᤇᤡᤖᤥ. ᤕᤜᤢᤍᤠ᤺ᤴᤏᤠᤱ ᤂᤧᤱᤜᤠ᤹ᤏᤢᤀᤣ ᤆᤥ᤺ᤴᤗᤥ॥

⁶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ ᤏᤢ ᤐᤡᤵᤔᤠ ᤐᤡᤳ ᤗᤢᤵᤜᤠ᤹ ᤔᤧᤍᤣ᤹ᤖᤢᤛᤡᤀᤠᤱ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤛᤡᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤃᤥ᤺ᤳᤇᤧ ᤔᤧᤒᤣ᤺ᤰᤁᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤴᤍᤢᤔᤢᤴᤗᤥ. ᤂᤢᤏᤧ᤹ ᤂᤧᤱᤜᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤂᤧᤳᤇᤡᤱᤄᤧᤖᤧᤀᤠᤱ ᤘᤠ᤹ᤖᤥ॥

⁷ ᤕᤜᤘᤣ ᤍᤠᤱᤒᤠᤀᤥ ᤂᤧᤱᤜᤠ᤹ ᤀᤡᤱᤗᤧᤰᤛᤫᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ. ᤂᤧᤱᤜᤠ᤹ᤖᤧ ᤂᤥ᤹ᤛᤠ ᤛᤠᤜᤠ᤹ ᤛᤠᤔᤧᤃᤳᤋᤢᤛᤡᤀᤠᤱ ᤔᤧᤘᤠ᤹ᤖᤥ॥ ᤀᤠᤸᤗ ᤗᤠᤍᤢᤵᤐᤥᤒᤠ ᤋᤱᤏᤠᤶᤔᤡᤸᤗᤧ ᤂᤧᤱᤜᤠ᤹ ᤏᤢ ᤂᤢᤴᤇᤡ᤹ ᤀᤡᤰᤋᤠᤵᤜᤠ᤹ᤀᤠᤱ ᤛᤥᤛᤥᤖᤡᤰ ᤂᤠᤵᤐᤢᤌᤩ᤺ᤱ ᤔᤧᤰᤂᤢᤛᤡᤖᤥ॥”

ᤕᤜᤢᤍᤠ ᤏᤢ ᤀᤡᤛᤪᤠᤀᤡᤗ ᤗᤢᤶᤔᤥ ᤋᤧᤴᤎᤱ

⁸ “ᤃᤡᤒᤠᤀᤥ ᤌᤢᤳᤋᤢᤖᤡ᤺ᤵᤐᤠ ᤔᤢ᤺ᤳᤋᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤖᤠᤔᤠᤀᤥ ᤛᤠᤍᤠᤱᤅᤡᤴ ᤗᤠᤀᤡᤰᤂᤠᤶᤔᤧ᤹ᤀᤥ॥ ᤒᤣᤌ-ᤀᤠᤘᤏᤀᤥ ᤌᤱ ᤀᤡᤰᤗᤠᤴ ᤗ᤺ᤳᤋᤧᤶᤔᤧ᤹ᤀᤥ. ᤒᤧᤏᤩᤠᤔᤡᤏᤀᤣ. ᤗᤠᤶᤗᤥᤔᤠ ᤕᤠ᤺ᤶᤒᤰ ᤆᤥᤃᤧ᤹ᤀᤥ॥

⁹ ᤂᤠᤛᤧᤴ ᤕᤧᤴᤏᤥ ᤀᤡᤑᤪᤠᤀᤡᤶᤔᤡᤴ ᤔᤢᤖᤧᤰ ᤂᤠᤖᤧᤰ ᤔᤧᤈᤥᤃᤢᤖᤥ. ᤀᤠᤳᤋᤡᤴ ᤐᤠ᤺ᤴᤏᤡᤴ ᤛᤧᤰᤂᤠᤀᤣ ᤐᤥᤱ᤹. ᤂᤧᤴ ᤀᤡᤛᤪᤠᤀᤡᤗᤒᤠ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤀᤢᤘᤠ ᤆᤥᤃᤢᤱᤗᤥ॥

¹⁰ “ᤕᤜᤢᤍᤠᤒᤠ ᤗᤠᤶᤗᤥᤒᤠᤜᤠ᤹ᤃ ᤀᤡ᤺ᤴᤍᤥᤜᤠ᤹ᤀᤥ ᤁᤧᤕᤢᤱᤒᤠ ᤗᤢᤱᤜᤠ᤹ ᤁᤧᤈᤵᤐᤠ ᤁᤧᤍᤣᤒᤠ ᤜᤧᤰᤋᤱᤒᤠ ᤔᤧᤈᤥᤰᤗᤥ॥ ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤁᤧᤃᤢᤱᤒᤠ ᤆᤫᤠ᤺ᤳ ᤁᤢᤀᤡᤛᤡᤰ ᤌᤠᤛᤢᤱᤗᤥ॥

¹¹ ᤀᤣᤑᤪᤠᤀᤡᤶᤔᤡᤴ ᤋᤢᤰᤂᤣ ᤗᤠᤰᤂᤣ ᤔᤧᤈᤠ᤺ᤳᤋᤢᤀᤠᤱ ᤘᤠ᤹ᤖᤥ. ᤂᤠᤛᤧᤴᤏᤥ ᤂᤧᤴ ᤆᤡᤍᤥ᤹ ᤆᤡᤍᤥ᤹ ᤋᤥ᤹ᤔᤥ ᤌᤩᤧᤀᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤏᤠᤘᤠᤀᤡᤳᤗᤠᤜᤠ᤹ ᤋᤡᤶᤔᤠᤛᤡ ᤂᤧᤸᤗᤧ ᤏᤡ᤺ᤴᤎᤥ ᤆᤥᤃᤢᤀᤠᤱ ᤘᤠ᤹ᤖᤥ॥

¹² ᤁᤸᤗᤧᤆᤥᤃᤢᤸᤗᤧ ᤀᤣᤑᤪᤠᤀᤡᤔᤖᤧ ᤁᤢᤗᤠᤃᤡ ᤌᤰᤐᤠ ᤜᤧᤰᤁᤣ ᤗ᤹ᤀᤠᤖᤥ ᤜᤧᤰᤁᤩᤠᤱ ᤕᤜᤢᤍᤠᤒᤠ ᤜᤡᤶᤛᤕᤱᤜᤠ᤹ᤖᤧ ᤗᤠᤃᤡ ᤁᤧᤕ᤺ᤵᤐᤠ ᤜᤧᤰᤁᤣ ᤗ᤹ᤀᤠᤖᤥ॥

¹³ “ᤀᤠᤸᤗ ᤀᤣᤑᤪᤠᤀᤡᤶᤔᤡᤸᤗᤧ ᤂᤢᤏᤧ᤹ ᤁᤢᤍᤢᤰᤔᤧᤴ ᤏᤡᤛᤢᤖᤥ ᤜᤧᤰᤁᤩᤠᤱ ᤕᤜᤢᤍᤠ᤺ᤸᤗᤧ ᤂᤢᤏᤧ᤹ ᤁᤢᤕᤠᤱᤄᤣ᤺ᤰᤁᤡᤴ ᤏᤡᤛᤢᤖᤥ. ᤂᤧᤒᤩᤠᤱ ᤀᤣᤑᤪᤠᤀᤡᤶᤔᤡᤸᤗᤧ ᤀᤛ᤻ᤛᤢᤖᤒᤠ ᤐᤕᤶ ᤜᤠᤱᤅᤧᤀᤥ ᤁᤢᤓᤠ᤹ᤖᤧ ᤗᤠᤃᤡ ᤔᤏᤠᤜᤠ᤹ ᤐᤠᤱᤄᤢᤍᤣᤛᤢᤛᤡᤖᤥ॥ ᤁᤖ ᤂᤧᤸᤗᤧ ᤂᤧᤏᤧ᤹ ᤁᤧᤏᤢ᤹ᤖ ᤆᤥ᤺ᤰᤔᤠ ᤂᤧᤸᤗᤧ ᤂᤧᤏᤧ᤹ ᤁᤧᤕᤠᤱᤄᤣ᤺ᤰᤁᤡᤴ ᤘᤣ᤺ᤶᤔᤠ ᤔᤧᤛᤢᤰᤋᤢᤴᤗᤥ॥

¹⁴ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤣᤑᤪᤠᤀᤡᤔᤖᤧ ᤁᤢᤗᤠᤃᤡ ᤂᤡᤖᤡᤱᤒᤠ ᤏᤢ ᤕᤜᤢᤍᤠ᤺ᤸᤗᤧ ᤁᤢᤜᤡᤶᤛᤕᤱᤅᤡᤸᤗᤧ ᤗᤠᤃᤡ ᤕᤶᤒᤠ ᤂᤡᤖᤡᤱᤒᤠ ᤜᤧᤰᤋᤱᤒᤠ ᤐᤥᤱᤅᤠᤖᤥ॥ ᤀᤠᤱᤃᤠ᤹ᤀᤣ ᤂᤧᤱᤜᤠ᤹ ᤋᤠᤖᤠᤰ ᤋᤠᤖᤠᤰ ᤛᤠ᤺ᤰᤛᤢᤱᤛᤡᤱᤗᤥ ᤂᤶᤓᤩᤠᤱ ᤀᤠᤱᤃᤠ᤹ ᤀᤠᤗᤠᤶᤔᤥ ᤌᤠᤛᤡᤱᤅᤠᤖᤥ. ᤀᤠᤱᤃᤠ᤹ ᤂᤧᤱᤜᤠ᤹ ᤐᤰᤂᤢᤱ ᤋᤣ᤹ᤖᤢᤱᤛᤡᤱᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤛᤧ᤺ᤵᤐᤠ ᤜᤠ᤺ᤳᤋᤠᤱ ᤔᤧᤜᤥᤵᤗᤥ॥

¹⁵ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤵᤋᤡᤰ ᤐᤠ᤺ᤴᤏᤥ ᤔᤧᤴᤍᤧᤴᤏᤧᤸᤗ ᤌᤠᤖᤡᤰ. ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤘᤠ᤹ᤔᤠᤍᤧᤴᤏᤥ ᤏᤢ᤺ᤱᤅᤠ ᤋᤠᤀᤠᤖᤥ॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤏᤠᤖᤠᤴ ᤀᤥᤔᤧᤵᤔᤠ ᤔᤧᤃᤥ᤺ᤳᤋᤢᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤰᤂᤣᤗᤠᤰᤂᤣᤀᤥ ᤀᤠᤱᤃᤠ᤹ ᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤔᤧᤃᤥ᤺ᤳᤋᤠᤖᤥ॥”