ᤜᤥᤛᤣ 4 - LIFOTNT

ᤀᤡᤛᤪᤠᤀᤡᤗᤖᤧ ᤁᤢᤍᤰᤗᤧᤱᤅᤥ ᤀᤠᤵᤋᤡᤰ

¹ ᤀᤡᤛᤪᤠᤀᤡᤗᤡᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤂᤧᤵᤛᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤴ ᤗᤠᤈᤣ᤹ᤀᤥ ᤁᤧᤕᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤠᤵᤋᤡᤰ ᤀᤰᤋᤱᤒᤠ ᤘᤠ᤹ᤖᤥ— “ᤁᤴ ᤗᤠᤈᤣ᤹ᤀᤥ ᤁᤢᤍᤥ᤺ᤵᤔᤠ ᤏᤛᤠᤴ ᤜᤥᤵᤗᤥ. ᤆᤰᤔᤧᤸᤗ᤹ᤔᤏᤠᤒᤠ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤜᤥᤵᤗᤥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰᤁᤢᤶ ᤏᤡᤱᤘᤠᤴ ᤜᤥᤵᤗᤥ॥

² ᤁ᤹ᤕᤥ ᤔᤠᤱᤍᤣᤛᤡᤱᤔᤠ ᤛᤠᤱᤃᤪᤠ ᤐᤡᤛᤡᤱᤔᤠ. ᤀᤡᤱᤗᤧᤰ ᤐᤠ᤺ᤵᤔᤠ. ᤔᤏᤠᤛᤧᤵᤔᤠ. ᤂᤢ᤺ᤵᤔᤠ ᤏᤢ ᤕᤠᤶᤒᤥ᤺ᤵᤔᤠ ᤐᤠ᤺ᤴᤜᤠ᤹ ᤔᤧᤛᤧᤛᤢᤖᤥ. ᤜᤧᤰᤁᤩᤠᤱ ᤁᤢᤈᤰᤗᤧ ᤁᤢᤈᤰ ᤀᤠᤸᤗᤛᤠᤱ ᤕᤖᤡᤰ ᤔᤏᤠ ᤔᤧᤛᤧᤖᤢᤛᤡᤖᤥ॥

³ ᤁᤸᤗᤧᤆᤥᤃᤢᤸᤗᤧ ᤁᤴ ᤗᤠᤈᤣᤴ ᤔᤧᤖᤡᤱ ᤌᤰᤗᤥ. ᤜᤧᤰᤁᤩᤠᤱ ᤁᤵᤔᤥ ᤁᤧᤕᤢᤱᤒᤠᤜᤠ᤹ ᤁᤧᤖᤧᤰ ᤔᤧᤔᤧᤰᤗᤥ. ᤂᤧᤒᤩᤠᤱ ᤋᤠᤶᤓᤢᤱᤅᤥᤒᤠ ᤌᤰᤛᤠᤜᤠ᤹. ᤋᤠᤱᤛᤠᤱᤒᤥᤒᤠ ᤐᤢᤜᤠ᤹ ᤏᤢ ᤘᤖ᤺ᤱᤅᤥᤒᤠ ᤐᤠᤎᤢᤱ ᤗᤧᤰᤅᤠᤜᤠ᤹ᤀᤠᤱ ᤔᤧᤛᤡᤖᤥ॥”

⁴ “ᤁᤖ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤀᤠᤵᤋᤡᤰ ᤔᤧᤍᤠᤖᤢᤴᤗᤖᤥ. ᤀᤠᤳᤋᤡᤴᤏᤠᤱ ᤀᤠᤵᤋᤡᤰ ᤔᤧᤴᤃᤢ᤺ᤳᤋᤢᤴᤗᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤔᤏᤠᤜᤠ᤹ᤃ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤀᤠᤵᤋᤡᤰ ᤁᤧᤃᤢ᤺ᤵᤐᤠ ᤜᤧᤰᤋᤱᤒᤠ ᤔᤧᤈᤥᤰᤗᤥ॥

⁵ ᤂᤧᤏᤧ᤹ ᤛᤧᤴᤍᤡᤰ ᤗᤧᤴᤍᤡᤰ ᤁᤧᤍᤥ᤺ᤰᤁᤠᤱ ᤁᤧᤈᤥ᤺ᤴᤗᤥ. ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤀᤠᤱ ᤂᤧᤏᤧ᤹ᤏᤢᤀᤣ ᤛᤥᤖᤡᤰ ᤔᤧᤍᤥ᤺ᤰᤁᤠᤱ ᤔᤧᤈᤥᤴᤗᤥ. ᤁᤶᤓᤗ᤹ᤖᤡᤰ ᤀᤠᤱᤃᤠ᤹ ᤂᤧᤏᤧ᤹ ᤁᤧᤶᤔᤠ ᤔᤧᤰᤂᤢᤱᤗᤥ॥

⁶ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤛᤢ᤺ᤶᤔᤠᤖᤧ ᤆᤥᤃᤢᤸᤗᤧ ᤔᤧᤔᤧᤃᤧᤀᤠᤱ ᤘᤠ᤹ᤖᤥ. ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤂᤡᤏᤡ᤹ ᤁᤧᤏᤠ᤹ᤖᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥᤱᤔᤠ ᤔᤧᤒᤠᤱᤏᤡᤱᤅᤡᤴᤗᤥ॥ ᤂᤡᤏᤡ᤹ ᤀᤠᤵᤑᤣᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤂᤡᤏᤡ᤹ ᤏᤡᤏᤡ ᤂᤧᤶᤄᤧᤶ ᤁᤧᤴᤗᤠᤵᤋᤢᤶᤔᤡᤴᤒᤠᤸᤗᤧ ᤆᤥᤃᤢᤸᤗᤧ. ᤀᤠᤱᤃᤠ᤹ᤀᤠᤱ ᤂᤡᤏᤡ᤹ ᤛᤠᤜᤠ᤹ ᤏᤡᤏᤡ ᤔᤧᤗᤠᤵᤐᤠᤛᤡᤱᤅᤡᤴᤗᤥ॥

⁷ ᤀᤠᤰᤂᤩᤠᤖᤡᤰ ᤕᤖᤡᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤔᤧᤒᤥᤖᤧᤖ ᤔᤧᤒᤣ. ᤂᤧᤶᤔᤩᤠᤰ ᤕᤖᤡᤰᤁᤣ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤗᤠᤕᤥ ᤔᤧᤈᤥᤃᤢᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤛᤥ ᤌᤠ᤺ᤱᤛᤥ᤺ᤴ ᤛᤡᤖᤡᤱᤔᤏᤠ ᤐᤠ᤺ᤴᤜᤠ᤹ᤏᤢ ᤔᤧᤗᤧᤰᤋᤢᤖᤥ॥

⁸ “ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤸᤗᤧ ᤂᤧᤱᤜᤠ᤹ ᤐᤥ᤺ᤰᤋᤢᤛᤡᤖᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤖᤠ᤹ᤌᤠᤱᤗᤥ॥

⁹ ᤀᤠᤰᤋᤱᤒᤠ ᤔᤏᤠ ᤜᤧᤰᤋᤱᤒᤠᤀᤣ ᤏᤡᤱᤘᤠ᤹ᤑᤢᤛᤠᤶᤒᤠ ᤔᤧᤒᤥᤱᤗᤥ. ᤂᤢᤴᤇᤡ᤹ ᤕᤧᤵᤗᤧᤰᤁᤡᤸᤗᤧ ᤁᤢᤗᤧᤰᤘᤠ ᤁᤧᤖᤧᤰ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤀᤠᤱᤃᤠ᤹ ᤂᤧᤱᤜᤠ᤹ ᤁᤢᤗᤧᤰᤘᤠ᤹ ᤏᤢ᤺ᤰᤋᤢᤱ ᤐᤡᤖᤢᤱᤛᤡᤱᤗᤥ॥

¹⁰ ᤂᤧᤱᤜᤠ᤹ᤖᤧ ᤆᤠᤔᤠᤃ ᤔᤧᤈ ᤁᤖ ᤂᤧᤱᤜᤠ᤹ ᤔᤧᤱᤄᤠᤏᤧᤴᤗᤥ. ᤂᤧᤱᤜᤠ᤹ᤖᤧ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢ᤹. ᤁᤖ ᤔᤧᤶᤒᤥ᤺ᤴᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤔᤧᤗᤧᤖᤢ ᤔᤧᤍᤣᤛᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰᤁᤥ ᤏᤡᤱᤘᤠ᤹ ᤔᤧᤒᤡᤖᤢᤀᤠᤱ ᤘᤠ᤹ᤖᤥ॥

¹¹ ᤁᤧᤍᤢᤶᤒᤠ ᤆᤧᤸᤗᤧᤰᤛᤣ᤹ ᤌᤡ ᤏᤢ ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤁᤢᤶᤏᤡᤱᤘᤠᤴ ᤗᤧᤰᤂᤢ ᤐᤡᤖᤢᤛᤡᤖᤥ॥

¹² ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤱ ᤏᤠᤘᤠᤀᤡᤳᤗᤠᤴ ᤛᤢᤈᤠ ᤔᤧᤏᤠ᤺ᤰᤋᤢᤖᤥ. ᤜᤧᤰᤁᤩᤠᤱ ᤗᤳᤇᤠ ᤛᤡᤱ ᤋᤰᤁᤠ᤺ᤳᤋᤡᤸᤗᤧ ᤂᤧᤱᤜᤠ᤹ ᤏᤢᤃᤵ ᤐᤡᤖᤢᤛᤡᤖᤥ॥ ᤕᤠᤶᤒᤥ᤺ᤵᤔᤠ ᤏᤡᤱᤘᤠ᤺ᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤴ ᤔᤧᤏᤠ᤹ᤖᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤖᤥ॥

¹³ ᤂᤧᤱᤜᤠ᤹ᤖᤧ ᤁᤥ᤺ᤰᤔᤠᤜᤠ᤹ᤖᤧ ᤁᤢᤛᤶᤜᤠ᤹ᤀᤥ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤖᤥ. ᤜᤧᤰᤁᤩᤠᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥᤒᤠ ᤛᤢᤛᤢ ᤁᤧᤗ᤹ᤒᤠ ᤏᤠᤶᤀᤡ᤺ᤰᤂᤱ ᤀᤠᤒᤡᤒᤡᤒᤠ ᤕᤜᤡᤒᤠ. ᤜᤢᤶᤒᤧᤳ ᤁᤧᤍᤠᤵᤐᤠ ᤐᤡᤐᤥᤖ ᤏᤢ ᤐᤥᤖᤥ᤺ᤰᤛᤡᤱᤔᤠᤜᤠ᤹ᤖᤧ ᤁᤢᤛᤡᤱᤃᤠᤱ ᤛᤢᤰᤐᤠ ᤔᤧᤜᤠ᤺ᤴᤍᤢᤖᤥ॥ “ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤔᤧᤴᤇᤢᤔᤠᤛᤠᤜᤠ᤹ᤖᤧ ᤁᤧᤳᤏᤡᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤂᤡᤏᤡ᤹ ᤐᤠᤱᤗᤡᤔᤠᤜᤠ᤹ᤖᤧ ᤆᤠᤖᤠᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤖᤥ॥

¹⁴ ᤂᤡᤏᤡ᤹ ᤔᤧᤴᤇᤢᤔᤠ ᤛᤠᤜᤠ᤹ ᤁᤧᤳᤏᤡᤔᤠ ᤆᤥ᤺ᤰᤔᤠ ᤗᤧᤵᤔᤠᤱ ᤔᤧᤗᤠ᤺ᤳᤇᤠᤱ ᤀᤠᤱᤃᤠ᤹ ᤂᤡᤏᤡ᤹ ᤔᤧᤴᤇᤢᤔᤠ ᤛᤠᤜᤠ᤹ ᤂᤢᤶᤍᤡᤱ ᤔᤧᤒᤡᤀᤠᤛᤡᤱᤅᤡᤴᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤐᤠᤱᤗᤡᤔᤠᤜᤠ᤹ᤖᤧ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤂᤢᤶᤍᤡᤱ ᤔᤧᤒᤡᤀᤠᤛᤡᤱᤅᤡᤴᤗᤥ॥ ᤌᤣᤀᤠᤱᤓᤧᤸᤗᤧ ᤕᤧᤶᤒᤡᤳᤇᤠᤜᤠ᤹ ᤀᤠᤵᤑᤣᤰᤁᤠᤱ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤗᤧᤵᤔᤠᤱ ᤔᤧᤗᤠᤛᤧᤀᤠᤱ ᤔᤧᤘᤠ᤹ᤖᤥ. ᤜᤧᤰᤁᤩᤠᤱ ᤔᤠᤱᤎᤠ᤺ᤴᤏᤥᤒᤠ ᤁᤧᤳᤏᤡᤔᤠ ᤛᤧᤘᤠᤖᤥᤔᤠᤜᤠ᤹ᤏᤢ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤖᤥ. ᤂᤠᤛᤡᤱᤏᤡ᤺ᤵᤔᤠ ᤏᤧᤜᤡᤏᤡᤱᤘᤠ᤹ ᤔᤧᤱᤃᤵᤔᤏᤠᤒᤠ ᤔᤏᤠᤜᤠ᤹ ᤔᤧᤔᤧᤰᤗᤥ॥

¹⁵ “ᤀᤡᤛᤪᤠᤀᤡᤗᤀᤣ. ᤂᤧᤏᤧ᤹ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤛᤠᤱ ᤕᤜᤢᤍᤠᤴ ᤀᤠᤵᤋᤡᤰᤛᤠᤒᤠ ᤔᤧᤒᤥᤱᤅᤡᤴᤗᤖᤥ॥ ᤃᤡᤗᤃᤠᤗᤀᤥ ᤂᤡᤏᤡ᤹ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ ᤜᤧᤰᤁᤩᤠᤱ ᤒᤣᤌ-ᤀᤠᤘᤏᤀᤥᤀᤠᤱ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ ‘ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ’ ᤐᤠ᤺ᤳᤋᤠᤶᤔᤧ᤹ᤖ ᤔᤠᤱᤜᤧᤰᤁᤠᤱ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥

¹⁶ ᤐᤠᤴ ᤔᤧᤱᤄᤧᤶᤔᤏᤠᤔᤠ ᤁᤖ᤺ᤱ ᤐᤡᤵᤔᤠ ᤁᤢᤀᤡᤛᤡᤰ ᤀᤡᤛᤪᤠᤀᤡᤗᤡᤜᤠ᤹ ᤀᤠᤎᤡᤱᤃᤠᤏᤡ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ ᤂᤧᤒᤩᤠᤱ ᤀᤠᤰᤂᤣᤗ᤹ᤖᤡᤰ ᤘᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤆᤠᤖᤠᤶᤔᤠᤍᤧᤴᤏᤥ ᤔᤧᤸᤗᤢᤰᤛᤠ᤺ᤳᤜᤠ᤹ ᤆᤠᤔᤧᤖᤠᤶᤒᤠ ᤁᤢᤀᤡᤛᤡᤰ ᤆᤠᤖᤠᤶᤛᤢᤛᤡᤒᤣ᥅

¹⁷ ᤀᤣᤑᤪᤠᤀᤡᤶᤔᤡᤴ ᤏᤠᤘᤠᤀᤡᤳᤗᤠᤜᤠ᤹ᤖᤧ ᤂᤢᤴᤇᤡ᤹ ᤆᤢᤶ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤂᤧᤴ ᤀᤣ᤺ᤰᤛᤧᤳᤇᤠ ᤗᤧᤖᤧᤶᤍᤣᤛᤧᤶᤔᤧ᤹ᤀᤥ॥

¹⁸ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤢᤱᤔᤠ ᤛᤣᤈᤱᤘᤠᤴ ᤂᤳᤋᤪᤧᤰ ᤔᤠ᤺ᤳᤇᤠᤱ ᤂᤧᤱᤜᤠ᤹ ᤁᤧᤳᤏᤡᤔᤠ ᤆᤥ᤺ᤰᤔᤠ ᤕᤠ᤺ᤶᤒᤰᤁᤥ ᤆᤰᤔᤧᤸᤗ᤹ᤀᤣ ᤔᤧᤒᤳᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤛᤠᤒᤠᤜᤠ᤹ᤖᤧ ᤛᤡᤖᤡᤱᤔᤔᤠ ᤕᤠ᤺ᤶᤒᤰᤜᤠ᤹ ᤛᤠ᤹ᤖᤡᤰ ᤂᤢᤴᤇᤡ᤹ ᤛᤡᤖᤠ᤹ᤎᤠᤱᤗᤥ॥

¹⁹ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤂᤧᤱᤜᤠ᤹ ᤑᤧᤛᤢ ᤋᤣ᤹ᤖᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤛᤡᤍᤢᤱᤈᤓᤠᤜᤠ᤹ᤖᤧ ᤆᤥᤃᤢᤸᤗᤧ ᤛᤡᤖᤡᤱᤔᤔᤥ ᤔᤧᤎᤠᤖᤥ॥”