ᤜᤥᤛᤣ 2 - LIFOTNT

¹ “ᤂᤡᤏᤡ᤹ ᤀᤠᤵᤑᤣᤰ ᤀᤡᤛᤪᤠᤀᤡᤗᤒᤠ ᤑᤢ᤹ᤏᤢᤛᤠ᤹ᤜᤠ᤹ ‘ᤀᤠᤱᤃᤠ᤹ ᤀᤠᤔᤏᤠᤛᤣ’ ᤔᤧᤳᤋᤧᤶᤛᤡᤶᤔᤧ᤹ ᤜᤧᤰᤁᤩᤠᤱ ᤏᤧ᤹ᤏᤢᤛᤠ᤹ᤜᤠ᤹ ‘ᤀᤠᤱᤃᤠ᤹ ᤀᤠᤗᤢᤱᤔᤠ᤹ ᤁᤧᤍᤢᤰᤔᤠᤛᤣ’ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

ᤀᤡᤛᤪᤠᤀᤡᤗᤖᤧ ᤁᤢᤄᤢᤶᤍᤡᤱ ᤏᤢ ᤕᤠᤶᤔᤥ ᤕᤢᤰᤛᤡᤱ

² ᤂᤡᤏᤡ᤹ ᤔᤠ᤺ᤴ ᤑᤧ᤺ᤰᤋᤧᤶᤔᤧ᤹ᤀᤥ. ᤂᤢᤏᤧ᤹ ᤑᤧ᤺ᤰᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤠᤱᤃᤠ᤹ ᤀᤠᤔᤣᤳ ᤔᤣ᤺ᤴᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤢᤏᤧ᤹ ᤁᤢᤕᤧᤶᤒᤠᤀᤠ ᤔᤣ᤺ᤴᤗᤥ॥ ᤂᤢᤏᤧ᤹ ᤁᤢᤏᤠᤖᤠᤀᤥᤗᤠᤶ ᤕᤠᤶᤒᤥ᤺ᤵᤔᤠ ᤆᤡᤳᤗᤡ ᤏᤠᤖᤠᤴ ᤜᤧᤰᤁᤩᤠᤱ ᤁᤢᤏᤢᤜᤠ᤹ᤀᤥᤗᤠᤶ ᤁᤢᤀᤡᤱᤗᤧᤰᤔᤠᤴ ᤂᤧᤳᤋᤢᤖᤖᤥ.

³ ᤔᤣ᤺ᤴᤏᤧᤓᤃᤪ ᤀᤠᤱᤃᤠ᤹ ᤂᤢᤏᤧ᤹ ᤗᤧᤰᤆᤠᤒᤧᤎᤡᤰ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤘᤠ᤺ᤴᤇᤡᤱᤒᤠ ᤕᤧᤴᤏᤥ ᤜᤧᤰᤁᤣ ᤂᤧᤒᤩᤠᤱ ᤏᤠᤶᤔᤡᤸᤗᤧ ᤛᤣ᤺ᤰᤋᤢᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴ ᤁᤢᤀᤡᤛᤡᤰ ᤆᤥᤃᤢᤱᤗᤥ ᤜᤧᤰᤁᤩᤠᤱ ᤘᤠᤔᤡ᤺ᤰᤔᤠᤗᤠᤶ ᤛᤡᤔᤠᤖᤧ ᤗᤠᤃᤡ ᤗᤧᤖᤢᤱᤍᤣᤛᤢᤱᤗᤥ॥

⁴ ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤀᤠᤱᤃᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤢᤱᤛᤡᤱᤅᤡᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤧᤸᤗᤧ ᤁᤢᤛ᤻ᤛᤠᤛᤡᤖᤥ॥

⁵ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠ᤺ᤸᤗᤧ ᤀᤡᤱᤗᤧᤰ ᤆᤥᤃᤢᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤛᤡᤖᤡᤱᤔᤔᤥ ᤂᤧᤱᤜᤠ᤹ ᤛᤠᤵᤐᤥ᤺ᤰᤁᤥ ᤁᤢᤕᤢᤛᤡᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤐᤠ᤺ᤳᤋᤢ. ‘ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤋᤢᤛᤡᤱᤒᤠᤜᤠ᤹ ᤋᤡᤶᤍᤢᤱᤛᤡᤱᤗᤥ. ᤂᤧᤱᤜᤠ᤹ᤖᤧ ᤀᤠᤈᤠᤔᤠ ᤂᤖᤧ᤺ᤱ ᤀᤠᤎᤢᤱᤔᤠ ᤆᤫᤠ᤺ᤳ. ᤛᤧᤔᤢᤖᤡᤰ. ᤏᤤᤏᤠᤛᤢᤳ ᤆᤡᤖᤡᤰ. ᤆᤤᤋᤢᤏ ᤏᤡ᤺ᤱᤃᤣ᤹ ᤏᤢ ᤆᤧᤸᤗᤧᤰᤛᤣ᤹ ᤌᤡ ᤔᤧᤒᤡᤀᤠᤖᤥ॥’

⁶ “ᤂᤧᤸᤗᤧᤆᤥᤃᤢᤸᤗᤧ ᤋᤡᤱᤃᤪᤣᤰᤐᤠ ᤑᤠᤳᤋᤠᤵᤜᤠ᤹ᤖᤧ ᤀᤠᤱᤃᤠ᤹ ᤂᤧᤸᤗᤧ ᤁᤢᤗᤠᤶᤔᤡᤴ ᤌᤣ᤺ᤰᤋᤢᤱᤗᤥ. ᤜᤧᤰᤁᤩᤠᤱ ᤗᤢᤱᤎᤠᤰ ᤛᤡᤃᤠᤱ ᤛᤠᤰᤋᤢᤱ ᤕᤢᤰᤂᤢᤱᤗᤥ ᤜᤧᤰᤁᤣᤗ᤹ᤖᤡᤰ ᤂᤧᤸᤗᤧ ᤗᤠᤶ ᤔᤧᤄᤥᤛᤢᤴᤗᤥ॥

⁷ ᤂᤢᤏᤧ᤹ ᤗᤢᤱᤔᤠ᤹ ᤜᤡ᤺ᤵᤋᤢᤛᤡᤒᤠᤜᤠ᤹ ᤀᤣᤃᤠᤱ ᤀᤣᤃᤠᤱ ᤋᤡᤶᤍᤢᤛᤡᤖᤥ. ᤁᤖ ᤂᤢᤏᤧ᤹ ᤂᤧᤱᤜᤠ᤹ ᤔᤧᤛᤡ᤹ᤖᤢᤛᤡᤴᤗᤥ ᤂᤢᤏᤧ᤹ ᤂᤧᤱᤜᤠ᤹ ᤜᤰᤛᤢᤛᤡᤖᤥ ᤁᤖ ᤂᤢᤏᤧ᤹ ᤂᤧᤱᤜᤠ᤹ ᤔᤧᤄᤥᤛᤢᤴᤛᤡᤴᤗᤥ॥ ᤂᤧᤒᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ. ‘ᤀᤠᤱᤃᤠ᤹ ᤋᤃᤡᤒᤠ ᤀᤠᤕᤧᤶᤒᤠᤀᤥ ᤏᤢ᤺ᤱᤅᤠ ᤐᤣ᤺ᤰᤁᤠᤖᤥ. ᤌᤣᤀᤠᤱᤓᤧᤸᤗᤧ ᤀᤠᤸᤗᤥᤏᤢ᤺ᤸᤗᤧ ᤂᤧᤴ ᤕᤧᤶᤔᤥ ᤀᤠᤱᤃᤠ᤹ ᤏᤢᤖᤠᤱ ᤋᤠᤛᤠᤱᤅᤠᤱ ᤘᤕᤠᤱᤗᤥ॥’

⁸ ᤂᤢᤏᤧ᤹ ᤐᤥᤃᤢᤃᤧᤴ ᤁᤢᤈᤠ. ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡ ᤜᤧᤰᤁᤩᤠᤱ ᤆᤤᤋᤢᤏ ᤏᤡ᤺ᤱᤃᤣ᤹ ᤁᤧᤒᤡᤒᤠᤃ ᤀᤠᤱᤃᤠ᤹ᤀᤣ ᤘᤕᤠᤱᤗᤥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤂᤢᤏᤧ᤹ ᤛᤶᤎᤠᤱ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤌᤠᤛᤢᤱᤅᤠᤱ ᤘᤕᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ. ᤂᤧᤴ ᤐᤠ᤺ᤴᤜᤠ᤹ᤃ ᤂᤧᤱᤜᤠ᤹ᤖᤧ ᤒᤠᤗ ᤔᤠᤱᤅᤥ ᤔᤧᤴᤍᤥ᤺ᤴᤍᤢᤖᤥ॥

⁹ “ᤂᤧᤸᤗᤧᤆᤥᤃᤢᤸᤗᤧ ᤁᤢᤈᤠ ᤋᤢᤶᤔᤡᤸᤗᤧ ᤀᤠᤱᤃᤠ᤹ ᤀᤠᤈᤠᤴ. ᤜᤧᤰᤁᤩᤠᤱ ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡ ᤕᤠᤖᤡᤵ ᤐᤥᤱᤅᤡᤸᤗᤧ ᤀᤠᤈᤧᤸᤗᤧᤰᤛᤣ᤹ ᤌᤡᤴ ᤀᤠᤱᤃᤠ᤹ ᤏᤢ᤺ᤰᤋᤢᤱ ᤋᤣ᤹ᤖᤢᤱᤗᤥ॥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤧᤰᤆᤠᤒᤧᤎᤡᤰ ᤋᤧᤵᤔᤠ ᤀᤠᤛᤧᤔᤢᤖᤡᤰᤁᤡᤴ ᤏᤢ ᤏᤤᤏᤠᤛᤢᤳ ᤆᤡᤖᤡᤰᤁᤡᤴ ᤀᤠᤱᤃᤠ᤹ ᤏᤠᤵᤋᤢᤱ ᤋᤣ᤹ᤖᤢᤱᤗᤥ॥

¹⁰ ᤀᤠᤸᤗ ᤂᤢᤏᤧ᤹ ᤗᤢᤱᤔᤠ᤹ ᤜᤡ᤺ᤵᤋᤢᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤀᤣ ᤀᤠᤱᤃᤠ᤹ ᤂᤧᤸᤗᤧ ᤁᤢᤔᤧᤴᤍᤵᤐᤡᤴ ᤏᤡᤎᤠ᤺ᤵᤗ ᤕᤠ᤺ᤴᤍᤢᤱᤗᤥ. ᤜᤧᤰᤁᤩᤠᤱ ᤀᤠᤜᤢᤰᤁᤥᤗᤠᤶ ᤜᤠ᤺ᤳᤗᤧᤀᤠᤱ ᤂᤧᤴ ᤋᤠᤱᤔᤧᤛᤧ᤺ᤵᤋᤢᤴᤗᤥ॥

¹¹ ᤀᤠᤱᤃᤠ᤹ ᤂᤧᤸᤗᤧ ᤁᤧᤖᤧᤰ ᤁᤢᤛᤥᤛᤥᤳ ᤗᤖᤠᤱᤜᤠ᤹. ᤂᤧᤸᤗᤧ ᤁᤢᤗᤠᤍᤢᤵᤐᤥᤒᤠ ᤋᤱᤏᤠᤶᤜᤠ᤹. ᤂᤧᤸᤗᤧ ᤁᤧᤖᤧᤰ ᤁᤢᤏᤠ᤺ᤶᤛᤡᤱᤔᤠ ᤕᤧᤴᤜᤠ᤹ ᤏᤢ ᤏᤡ᤺ᤴᤎᤥ ᤁᤧᤒᤥᤱᤒᤠ ᤂᤧᤸᤗᤧ ᤁᤧᤖᤧᤰ ᤁᤢᤛᤠᤓ᤺ᤱᤈᤠᤜᤠ᤹ ᤛᤠᤰᤋᤢᤱ ᤐᤡᤖᤢᤱᤗᤥ॥

¹² ᤂᤧᤸᤗᤧ ᤁᤢᤈᤧᤸᤗᤧᤰᤛᤣ᤹ᤒᤢᤱᤜᤠ᤹ ᤏᤢ ᤁᤢᤒ᤺ᤳᤇᤣ᤹ᤒᤢᤱᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ. ‘ᤁᤴ ᤗᤢᤱᤔᤠ᤹ ᤜᤡ᤺ᤵᤋᤢᤱᤛᤡᤒᤠᤜᤠ᤹ᤖᤧ ᤔᤧᤒᤡᤖᤠᤱᤒᤠ ᤀᤠᤏᤠᤶᤕᤠᤰᤗᤥ॥’ ᤀᤠᤱᤃᤠ᤹ ᤂᤧᤱᤜᤠ᤹ ᤔᤢᤖᤧᤰ ᤂᤠᤖᤧᤰ ᤆᤥᤃᤢᤱ ᤐᤡᤖᤢᤱᤗᤥ. ᤀᤠᤱᤃᤠ᤹ ᤂᤧᤱᤜᤠ᤹ ᤑᤠᤵᤋᤠᤵ ᤆᤥᤃᤢᤱᤗᤥ ᤜᤧᤰᤁᤩᤠᤱ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤛᤡᤱᤛᤣ᤹ᤜᤠ᤹ ᤔᤧᤈᤔᤧᤍᤣᤛᤢᤖᤥ॥

¹³ ᤂᤧᤴ ᤕᤧᤴᤜᤠ᤹ᤀᤥ ᤂᤢᤏᤧ᤹ ᤒᤠᤗ ᤔᤠᤱᤜᤠ᤹ᤖᤧ ᤗᤠᤃᤡ ᤛᤢᤰᤐᤠ ᤜᤠ᤺ᤴᤍᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤂᤢᤶᤍᤡᤱ ᤐᤡᤖᤢᤱᤗᤥ. ᤂᤢᤏᤧ᤹ ᤁᤢᤴᤍᤢᤸᤗᤥᤜᤠ᤹ ᤏᤢ ᤛᤠᤔᤠᤜᤠ᤹ ᤘᤠ᤺ᤳᤇᤡᤱᤗᤥ ᤜᤧᤰᤁᤩᤠᤱ ᤗᤢᤱᤔᤠ᤹ ᤜᤡ᤺ᤵᤋᤢᤛᤡᤒᤠᤜᤠ᤹ ᤋᤡᤶᤍᤢᤛᤡᤖᤥ. ᤂᤧᤒᤩᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤑᤣ᤺ᤳᤇᤠᤱᤅᤠᤱ ᤘᤕᤧᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤀᤠᤱ ᤘᤠ᤹ᤖᤥ॥

ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡ

¹⁴ “ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤀᤠᤱᤃᤠ᤹ ᤂᤧᤴ ᤗᤧᤔᤢᤱᤅᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤋᤣ᤹ᤖᤢᤱᤗᤥ. ᤜᤧᤰᤁᤩᤠᤱ ᤂᤧᤵᤔᤥ ᤏ᤺ᤶᤏ᤺ᤶᤔᤠᤱ ᤋᤠ᤹ᤈᤧᤰᤋᤢᤱᤗᤥ॥

¹⁵ ᤂᤧᤵᤔᤥ ᤂᤧᤸᤗᤧ ᤁᤢᤈᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ ᤏᤢ᤺ᤰᤋᤢᤱ ᤐᤡᤖᤢᤱᤗᤥ. ᤜᤧᤰᤁᤩᤠᤱ ᤀᤠᤁᤥᤖᤒᤠ ᤏᤧᤏᤧᤒᤠᤍᤧᤴᤏᤡᤴ ᤀᤠᤱᤃᤠ᤹ ᤏᤡᤱᤛᤠᤱ ᤆᤥ᤺ᤰᤔᤠ ᤗᤠᤶᤎᤣ᤺ᤵ ᤆᤥᤃᤢᤱ ᤐᤡᤖᤢᤱᤗᤥ॥ ᤂᤧᤵᤔᤥ ᤂᤢᤏᤧ᤹ ᤘᤧᤴᤍᤧᤀᤠᤱ ᤘᤕᤧᤒᤠ ᤁᤢᤕᤧᤴᤜᤠ᤹ᤀᤥ ᤜᤧᤰᤁᤣ ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤌᤠᤅᤧᤒᤠ ᤕᤧᤴᤏᤥ ᤜᤧᤰᤁᤣ ᤛᤠᤶᤗᤥᤖᤥ॥”

¹⁶ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣᤗ᤹ᤖᤡᤰ ᤀᤢᤘᤠ ᤆᤥᤃᤢᤖᤥ. “ᤂᤧᤸᤗᤧ ᤕᤠ᤺ᤴᤍᤡᤰ ‘ᤀᤠᤱᤃᤠ᤹ ᤀᤠᤕᤧᤶᤒᤠᤀᤣ’ ᤁᤧᤔᤧᤳᤋᤠᤖᤥ. ᤜᤧᤰᤁᤩᤠᤱ ‘ᤀᤠᤱᤃᤠ᤹ ᤀᤠᤴᤍᤠᤱᤒᤠᤀᤣ’ ᤁᤧᤶᤔᤧᤳᤋᤠᤴᤗᤥ॥

¹⁷ ᤒᤠᤗ ᤔᤠᤱᤜᤠ᤹ᤖᤧ ᤁᤢᤔᤡᤱᤜᤠ᤹ ᤂᤧᤸᤗᤧ ᤁᤢᤶᤒᤪᤠᤀᤥᤗᤠᤶ ᤂᤧᤳᤋᤢᤱᤗᤥ. ᤜᤧᤰᤁᤩᤠᤱ ᤂᤧᤴ ᤔᤡᤱᤜᤠ᤹ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤔᤧᤀᤡᤱᤄᤢᤴᤗᤥ॥

¹⁸ ᤂᤧᤴ ᤕᤧᤴᤏᤥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤋᤠᤶᤓᤢᤱᤅᤥᤒᤠ ᤌᤰᤛᤠᤜᤠ᤹ᤏᤢ ᤜᤧᤰᤁᤩᤠᤱ ᤋᤠᤱᤛᤠᤱᤒᤥᤒᤠ ᤐᤢᤛᤠᤜᤠ᤹ᤏᤢ ᤂᤧᤒᤩᤠᤱ ᤂᤠᤶᤒᤠᤱᤅᤥ ᤁᤧᤛ᤺ᤴᤇᤡᤱᤒᤠ ᤌᤰᤛᤠᤜᤠ᤹ᤏᤢ ᤔᤠᤱᤜᤢᤵ ᤆᤥᤃᤢᤱᤗᤥ॥ ᤂᤥ. ᤋᤠᤓᤣ ᤏᤢ ᤌᤱᤜᤠ᤹ ᤀᤠᤱᤃᤠ᤹ ᤗᤠᤈᤣ᤹ᤗᤠᤶ ᤗᤠ᤺ᤳᤗᤠ᤺ᤳ ᤆᤥᤃᤢᤱᤗᤥ. ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰ ᤌᤠᤵᤌᤣ᤺ᤰ ᤕᤠᤶᤎᤣᤰ ᤏᤧᤔᤠ ᤔᤧᤄᤥᤖᤖᤥ॥

¹⁹ ᤀᤠᤱᤃᤠ᤹ ᤂᤧᤏᤧ᤹ ᤛᤍᤠᤍᤡᤱᤗᤧ ᤗᤠᤃᤡ ᤐᤠ᤺ᤴᤓᤢ᤹ᤏᤧᤖᤥ. ᤀᤠᤱᤃᤠ᤹ ᤛᤠᤶᤕᤥᤏᤡᤔᤠ ᤏᤢ ᤁᤢᤍᤥ᤺ᤵᤔᤠ ᤂᤠᤛᤧᤴᤏᤥ ᤗᤢᤱᤔᤠ᤹ ᤋᤢᤰᤏᤧ ᤜᤧᤰᤁᤩᤠᤱ ᤔᤡ᤺ᤶᤈᤡᤀᤥ ᤐᤠ᤺ᤴᤓᤢ᤹ᤏᤧᤖᤥ॥

²⁰ ᤁᤢᤍᤥ᤺ᤵᤔᤠᤀᤠᤱ ᤀᤠᤱᤃᤠ᤹ ᤂᤧᤏᤧ᤹ ᤀᤠᤔᤣᤳ ᤆᤥ᤺ᤰᤏᤧᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤖᤥ॥”

²¹ “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣᤗ᤹ᤖᤡᤰ ᤀᤢᤘᤠ ᤆᤥᤃᤢᤖᤥ. ᤂᤧᤴ ᤕᤧᤴᤏᤥ ᤀᤠᤱᤃᤠ᤹ ᤏᤢᤃᤵ ᤐᤡᤖᤢᤱᤗᤥ. ᤀᤠᤱᤃᤠ᤹ ᤋᤠᤱᤛᤠᤱᤒᤧᤴ ᤏᤢᤃᤵ ᤐᤡᤖᤢᤱᤗᤥ ᤜᤧᤰᤁᤩᤠᤱ ᤋᤠᤱᤛᤠᤱᤒᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢᤃᤵ ᤐᤡᤖᤢᤖᤥ॥

²² ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤸᤗᤧ ᤐᤥᤃᤢᤃᤧᤴ ᤁᤢᤈᤠ. ᤆᤧᤸᤗᤧᤰᤛᤣ᤹ ᤌᤡᤴ ᤏᤢ ᤆᤤᤋᤢᤏ ᤏᤡ᤺ᤱᤃᤣᤴ ᤏᤢᤃᤵ ᤐᤡᤖᤢᤛᤡᤖᤥ ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤕᤡᤈᤖᤣᤗᤧᤴ ᤏᤢᤃᤵ ᤔᤧᤒᤡᤖᤢᤖᤥ॥

²³ ᤀᤠᤵᤑᤣᤰ ᤀᤠᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤕᤢᤰᤂᤢᤱᤛᤡᤱᤗᤥ. ᤀᤠᤱᤃᤠ᤹ ᤀᤠᤳᤋᤡᤴ ‘ᤗᤢᤱᤔᤠ᤹ ᤔᤧᤴᤍᤢᤰᤔᤏᤠᤔᤠ’ ᤔᤧᤳᤋᤢᤱᤅᤠᤱ ᤘᤕᤧ. ᤀᤠᤱᤃᤠ᤹ ᤂᤧᤴ ᤗᤢᤱᤔᤠ᤹ ᤋᤢᤰᤋᤢᤱᤗᤥ॥ ᤀᤠᤳᤋᤡᤴᤜᤠ᤹ ‘ᤀᤠᤱᤃᤠ᤹ ᤀᤠᤔᤏᤠᤏᤡᤱ ᤔᤣ᤺ᤴ’ ᤔᤧᤳᤋᤢᤱᤛᤡᤱᤅᤠᤱ ᤘᤕᤧ ᤂᤧᤱᤜᤠ᤹ ‘ᤀᤠᤱᤃᤠ᤹ ᤀᤠᤔᤏᤠᤏᤡᤱ’ ᤔᤧᤳᤋᤢᤱᤛᤡᤱᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤰᤂᤣ ᤔᤧᤔᤧᤳᤋᤠᤖᤥ. ‘ᤂᤧᤏᤧ᤹ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ॥’”