ᤜᤥᤛᤣ 14 - LIFOTNT

ᤜᤥᤛᤣ᤺ᤸᤗᤧ ᤀᤡᤛᤪᤠᤀᤡᤗᤗᤧᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤏᤢ᤺ᤰᤂᤧ᤹ ᤔᤧᤳᤋᤢ

¹ ᤀᤡᤛᤪᤠᤀᤡᤗᤀᤣ. ᤕᤜᤘᤣ ᤁᤧᤏᤡᤱᤘᤠ᤹ᤑᤢᤔᤠᤱᤅᤥ ᤏᤢ᤺ᤰᤂᤧ ᤋᤩᤧ᤹ᤀᤥ. ᤂᤧᤏᤧ᤹ ᤁᤧᤗᤠᤕᤥᤜᤠ᤹ᤖᤧᤀᤣ ᤂᤧᤏᤧ᤹ ᤁᤧᤛᤥ᤺ᤴᤍᤧᤀᤠᤱ ᤘᤠ᤹ᤖᤥ॥

² ᤐᤠ᤺ᤴᤈᤠ᤺ᤰᤜᤠ᤹ ᤕᤠᤱᤅᤠᤛᤡᤶᤔᤧ᤹ᤀᤠᤱ ᤕᤜᤘᤣ ᤍᤠᤱᤒᤠᤀᤥ ᤏᤢ᤺ᤰᤂᤧᤶᤔᤧ᤹ᤀᤥ. ᤂᤢᤏᤧ᤹ ᤔᤧᤳᤋᤧᤶᤔᤧ᤹. “ᤀᤠᤏᤡᤃᤣ ᤁᤧᤖᤧᤰ ᤗᤠᤕᤥᤴ ᤗᤧᤵᤔᤡ ᤆᤥᤃᤧ ᤀᤠᤒᤡᤖᤧ᤹ᤀᤥ ᤂᤧᤶᤒᤩᤠᤱ ᤀᤠᤏᤡᤃᤣ ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤠᤱ ᤀᤠᤍᤠ᤺ᤰᤋᤧ᤹ᤀᤥ. ᤂᤧᤶᤒᤩᤠᤱ ᤀᤠᤏᤡᤃᤣ ᤔᤢᤖᤠᤗᤠᤶ ᤁᤧᤗ᤺ᤶᤒᤠ ᤛᤡᤍᤢᤱᤈᤓᤠᤴ ᤋᤥ᤺ᤶᤔᤠ ᤛᤢᤰᤋᤢᤶᤒᤧᤖᤥ॥

³ ᤀᤛ᤻ᤛᤢᤖᤧᤸᤗᤧ ᤀᤠᤏᤡᤃᤣ ᤋᤠᤱᤛᤧ᤺ᤵᤔᤠ ᤔᤧᤛᤢᤰᤋᤡᤃᤧᤴᤗᤥ. ᤌᤱᤅᤥᤒᤠ ᤀᤴᤜᤠ᤹ ᤀᤠᤏᤡᤃᤣ ᤔᤧᤕᤢᤰᤋᤢᤶᤛᤡᤶᤒᤧᤴᤗᤥ॥ ᤀᤠᤏᤡᤃᤣ ᤀᤠᤵᤑᤣᤰ ᤜᤢᤰᤁᤡᤸᤗᤧ ᤆᤥᤃᤢᤶᤛᤡᤶᤒᤧᤒᤠ ᤐᤠ᤺ᤴᤜᤠ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ‘ᤀᤠᤏᤡᤃᤣ ᤔᤠᤱᤛᤣ’ ᤔᤧᤔᤧᤳᤋᤢᤛᤡᤶᤒᤧᤴᤗᤥ. ᤌᤣᤀᤠᤱᤓᤧᤸᤗᤧ ᤕᤧᤳᤇᤠ ᤜᤥ᤹ᤍᤥᤰᤜᤠ᤹ᤖᤧ ᤂᤧᤏᤧ᤹ᤗᤠᤶ ᤗᤢᤱᤔᤠ᤹ ᤋᤢᤰᤔᤠ ᤔᤧᤄᤥᤛᤢᤖᤥ॥”

ᤀᤡᤛᤪᤠᤀᤡᤗᤖᤧ ᤁᤢᤗᤠᤃᤡ ᤁᤢᤛᤱ ᤜᤡᤱᤔᤠ ᤔᤠᤱᤜᤢᤵ

⁴ “ᤂᤧᤱᤜᤠ᤹ ᤀᤠᤱᤃᤠ᤹ᤗᤠᤶ ᤋᤠᤵᤔᤧᤒᤧ᤹ᤖᤧᤒᤠᤗᤠᤶ ᤘᤣ᤺ᤴᤍᤢᤱᤛᤡᤱᤗᤥ. ᤀᤠᤱᤃᤠ᤹ ᤂᤧᤱᤜᤠ᤹ ᤀᤠᤶᤓᤠᤀᤣ ᤗᤢᤱᤔᤠ᤹ ᤋᤢᤰᤋᤢᤱᤛᤡᤱᤗᤥ. ᤌᤣᤀᤠᤱᤓᤧᤸᤗᤧ ᤀᤠᤛᤠᤰᤁᤧᤴᤏᤡᤴ ᤂᤧᤱᤜᤠ᤹ᤗᤠᤶ ᤏᤢ᤺ᤰᤂᤧᤀᤠᤱ ᤘᤠ᤹ᤖᤥ॥

⁵ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤠᤃᤡ ᤛᤣ᤺ᤰᤘᤠ ᤜᤧᤳᤋᤱᤒᤠ ᤐᤥᤱᤅᤠᤖᤥ. ᤀᤠᤱᤃᤠ᤹ ᤗᤧᤰᤘᤠ ᤑᤢᤱ ᤁᤢᤀᤡᤛᤡᤰ ᤑᤧᤰᤁᤠᤖᤥ ᤗᤧᤒᤏᤠᤏᤒᤠ ᤛᤠᤶᤔᤠᤱᤛᤡᤱ ᤜᤧᤰᤁᤣ ᤂᤧᤸᤗᤧ ᤁᤢᤛᤠ᤺ᤵ ᤗᤣ᤺ᤳᤇᤡᤱᤗᤥ॥

⁶ ᤂᤧᤸᤗᤧ ᤂᤠᤖᤰ ᤁᤧᤗ᤺ᤶᤒᤠ ᤁᤢᤈᤱᤜᤠ᤹ ᤐᤥᤎᤠᤱᤗᤥ. ᤂᤧᤸᤗᤧ ᤁᤢᤜᤠᤱᤘᤠ ᤁᤢᤔᤠᤱᤘᤠᤴ ᤆᤤᤋᤢᤏ ᤛᤡᤱᤒᤢᤱ ᤜᤧᤰᤋᤱᤒᤠ ᤐᤥᤱᤗᤥ. ᤂᤧᤸᤗᤧ ᤁᤢᤏᤠᤶᤛᤧᤔᤧᤴ ᤗᤧᤒᤏᤠᤏᤒᤠ ᤛᤠᤶᤔᤠᤱᤛᤡᤱᤜᤠ᤹ ᤜᤧᤰᤁᤣ ᤗ᤹ᤖᤥ॥

⁷ ᤔᤏᤠᤜᤠ᤹ ᤕᤠᤶᤔᤥ ᤂᤧᤸᤗᤧ ᤀᤡ᤺ᤵᤋᤢᤒᤠᤍᤧᤴᤏᤥ ᤔᤧᤕᤢᤱᤗᤥ. ᤔᤠ᤺ᤰᤁᤡ ᤁᤢᤀᤡᤛᤡᤰ ᤂᤧᤴ ᤜᤢᤖᤢᤶ ᤜᤢᤖᤢᤶ ᤗ᤹ᤖᤡᤰ ᤐᤥᤎᤠᤱᤗᤥ ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤺ᤸᤗᤧ ᤁᤢᤒᤢᤱ ᤜᤧᤰᤁᤣ ᤂᤧᤴ ᤑᤧᤰᤗᤥ. ᤂᤶᤓᤩᤠᤱ ᤁᤢᤔᤡᤱᤅᤡᤴ ᤗᤧᤒᤏᤠᤏᤒᤠ ᤆᤧᤸᤗᤧᤰᤛᤣ᤹ ᤌᤡ ᤜᤧᤰᤁᤣ ᤛᤧᤖᤥ॥

⁸ “ᤀᤣᤑᤪᤠᤀᤡᤔᤀᤣ. ᤏᤠᤘᤠᤀᤡᤳᤗᤠᤜᤠ᤹ᤏᤢ ᤀᤠᤱᤃᤠ᤹ ᤌᤧᤔᤠ ᤆᤥᤃᤢᤱᤒᤣ᥅ ᤀᤠᤱᤃᤠ᤹ ᤂᤧᤴ ᤏᤢᤃᤵ ᤐᤡᤖᤢᤱᤅᤠᤱ ᤀᤠᤱᤃᤠ᤹ ᤁᤶᤒᤪᤠᤱ ᤔᤧᤳᤋᤢᤱᤗᤥ॥ ᤀᤠᤱᤃᤠ᤹ᤃ ᤛᤖᤣ᤺ᤰᤕᤠ᤺ᤵᤐᤠ ᤀᤠ᤺ᤱᤅᤡᤸᤗᤧ ᤁᤢᤒᤢᤱ ᤜᤧᤰᤁᤣ ᤗ᤹ᤀᤠᤖᤥ. ᤀᤡᤱᤃᤠ᤹ᤗᤠᤶᤔᤣ ᤂᤧᤏᤧ᤹ ᤁᤢᤈᤠ᤹ ᤁᤧᤒᤵᤐᤠ ᤁᤧᤒᤥᤱᤗᤥ॥

ᤁᤢᤏᤢᤵᤔᤠ ᤐᤠ᤺ᤴᤜᤠ᤹

⁹ ᤛᤡᤰᤁᤢᤶᤛᤠᤒᤠ ᤜᤠᤳ ᤘᤠ᤹ᤒᤣ᥅ ᤂᤧᤸᤗᤧ ᤁᤴ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤖᤥ. ᤂᤠᤛᤡᤱ ᤁᤧᤏᤡ᤺ᤵᤐᤠ ᤜᤠᤳ ᤘᤠ᤹ᤒᤣ᥅ ᤂᤧᤸᤗᤧ ᤁᤴ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤳᤋᤢᤖᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶᤜᤠ᤹ ᤋᤥ᤹ᤋᤥ᤺ᤶᤒᤠ ᤆᤥᤰᤗᤥ. ᤛᤠᤶᤕᤥᤒᤠ ᤔᤏᤠᤜᤠ᤹ ᤂᤧᤵᤔᤥᤀᤣ ᤗᤠᤱᤔᤧᤄᤣ᤺ᤰᤗᤥ. ᤁᤖ ᤐᤡᤑᤩᤢᤱᤒᤠᤜᤠ᤹ ᤂᤧᤵᤔᤥ ᤔᤧᤍᤥ᤺ᤰᤁᤠᤱ ᤔᤧᤈᤥᤴᤗᤥ॥”