ᤜᤥᤛᤣ 13 - LIFOTNT

ᤀᤡᤛᤪᤠᤀᤡᤗᤧᤴ ᤁᤢᤏᤢᤵᤔᤠ ᤂᤢᤶᤍᤡᤱ ᤐᤡᤔᤠ ᤀᤡᤱᤈᤠᤱ

¹ ᤀᤣᤑᤪᤠᤀᤡᤶᤔᤡᤴ ᤐᤠᤖᤧᤸᤗᤧ ᤔᤏᤠᤜᤠ᤹ ᤔᤧᤕᤰᤂᤧᤖᤥ. ᤀᤡᤛᤪᤠᤀᤡᤗᤀᤥ ᤂᤧᤴ ᤌᤠ᤺ᤱᤎᤠ᤺ᤱ ᤔᤧᤓᤥ᤺ᤰᤂᤢᤖᤥ॥ ᤁᤖ ᤂᤧᤸᤗᤧ ᤒᤠᤗ ᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤳᤋᤢᤖᤥ ᤜᤧᤰᤁᤩᤠᤱ ᤀᤠᤵᤋᤡᤰᤛᤠᤒᤠ ᤐᤥ᤺ᤰᤂᤧᤀᤠᤱ ᤂᤧᤴ ᤛᤩᤧᤖᤥ॥

² ᤀᤠᤸᤗ ᤂᤧᤱᤜᤠ᤹ᤖᤧ ᤀᤠᤸᤗᤛᤠᤱ ᤕᤖᤡᤰ ᤗᤠᤕᤥ ᤔᤧᤈᤥᤃᤢᤖᤥ. ᤂᤢᤴᤇᤡ᤹ ᤀᤠᤵᤑᤣᤰ ᤗᤠᤃᤡ ᤂᤢᤴᤇᤡ᤹ ᤕᤢᤵᤐᤠᤜᤠ᤹ᤗᤠᤶ ᤂᤧᤱᤜᤠ᤹ᤖᤧ ᤕᤥ᤺ᤶᤔᤏᤠᤒᤠ ᤏᤠᤘᤠᤀᤡᤳᤗᤠᤜᤠ᤹ ᤔᤧᤎᤃᤢᤛᤡᤖᤥ. ᤀᤡᤃᤪ ᤔᤡᤰᤗᤧᤱᤔᤠᤗᤠᤶ ᤁᤢᤀᤡᤳ ᤗ᤺ᤵᤔᤏᤠᤒᤠ ᤏᤠᤘᤠᤀᤡᤳᤗᤠᤜᤠ᤹ ᤂᤧᤱᤜᤠ᤹ ᤁᤧᤖᤧᤰ ᤆᤥᤒᤣᤃᤢᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤗᤥ॥ ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤔᤧᤒᤠ᤺ᤳᤋᤢᤀᤠᤱ ᤘᤠ᤹ᤖᤥ. “ᤁᤴᤜᤠ᤹ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤛᤡᤶᤔᤧ᤹ᤀᤥ ᤐᤡᤳᤛᤠᤳ ᤏᤠᤘᤠᤀᤡᤳᤗᤠᤜᤠ᤹ ᤆᤢᤵ ᤔᤧᤳᤋᤧᤶᤛᤡᤶᤔᤧ᤹ᤀᤥ᥄”

³ ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤋᤠᤏᤠᤶᤒᤠ ᤂᤠ᤹ᤔᤡᤳ. ᤀᤠᤴᤍᤣᤴ ᤜᤠᤖᤠ ᤁᤧᤕᤥ᤺ᤶᤒᤠ ᤁᤧᤒᤣ᤺ᤰᤐᤠ ᤛᤣ᤺ᤰᤘᤠ. ᤛᤢᤖᤡᤳ ᤁᤣᤈᤱᤅᤡᤸᤗᤧ ᤆᤠᤎᤠᤶᤔᤠᤍᤧᤴᤏᤥᤗᤠᤶ ᤑᤧᤛᤢᤍᤣ᤹ᤖᤢᤒᤠ ᤆᤠᤛᤡᤵ ᤏᤢ ᤐᤣᤎᤠ᤺ᤵᤐᤥᤗᤠᤶ ᤁᤧᤗ᤺ᤶᤒᤠ ᤔᤡ᤺ᤰᤂᤢ᤹ ᤁᤢᤀᤡᤛᤡᤰ ᤔᤧᤒᤥᤱᤗᤥ॥

⁴ “ᤁᤖ ᤀᤠᤱᤃᤠ᤹ᤃ ᤕᤜᤘᤣ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ. ᤀᤠᤱᤃᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤗ᤺ᤳᤏᤡᤱᤅᤠᤱ ᤌᤠᤰᤏᤡᤱᤅᤠᤱ ᤘᤠ᤹ᤖᤥ॥ ᤀᤠᤱᤃᤠ᤹ᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴ ᤔᤠᤱᤅᤡᤴᤏᤠᤱ. ᤘᤣ᤹ ᤀᤠᤳᤋᤡᤴ ᤛᤧᤴᤗᤵᤍᤠᤱᤒᤧᤴᤏᤠᤱ ᤂᤡᤏᤡ᤹ ᤁᤧᤴᤍᤠ᤺ᤰᤋᤢᤶᤔᤡᤴᤗᤥ॥

⁵ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥ. ᤀᤡᤃᤪ ᤛᤠ᤹ᤖᤡᤰ ᤏᤠᤶᤃᤧᤛᤧ᤺ᤰᤐᤠ ᤗᤠᤈᤣ᤹ᤀᤥ ᤀᤠᤱᤃᤠ᤹ᤀᤣ ᤂᤡᤏᤡ᤹ ᤁᤶᤒᤪᤠᤱ ᤔᤧᤳᤏᤡᤱᤅᤠᤱ ᤘᤕᤧᤖᤥ॥

⁶ ᤀᤠᤱᤃᤠ᤹ ᤂᤧᤱᤜᤠ᤹ ᤁᤢᤈᤠ ᤆᤠ᤺ᤳᤋᤢᤱᤛᤡᤱᤅᤡᤸᤗᤧ. ᤂᤧᤱᤜᤠ᤹ ᤔᤧᤄᤠᤛᤧᤀᤠᤱ ᤂᤢᤴᤇᤡ᤹ ᤛᤡᤰᤀᤣ᤺ᤵᤋᤢᤖᤥ॥ ᤂᤧᤱᤜᤠ᤹ ᤔᤧᤄᤠᤛᤧᤀᤠᤱ ᤂᤢᤴᤇᤡ᤹ ᤛᤡᤰᤀᤣ᤺ᤵᤋᤢᤸᤗᤧ. ᤂᤧᤱᤜᤠ᤹ ᤀᤠᤱᤍᤡᤱ ᤁᤧᤗ᤹ᤒᤠ ᤔᤧᤒᤥ᤺ᤰᤂᤧᤖᤥ ᤂᤧᤴ ᤀᤣᤃᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤏᤡᤱᤘᤠ᤹ ᤔᤧᤓᤣ᤺ᤳᤇᤠᤱᤗᤥ॥

⁷ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ᤀᤥ ᤂᤡᤖᤡᤱᤒᤠ ᤜᤧᤰᤁᤣ ᤋᤠᤀᤠᤖᤥ. ᤌᤧᤖᤡᤱᤒᤠ ᤜᤧᤰᤁᤣ ᤀᤠᤱᤃᤠ᤹ ᤂᤢᤴᤇᤡ᤹ ᤗᤠᤶᤔᤥ ᤛᤢᤃᤢᤱᤛᤡᤱᤅᤠᤱ ᤕᤢᤱᤅᤠᤖᤥ॥

⁸ ᤁᤢᤛ᤻ᤛᤠᤜᤠ᤹ ᤔᤧᤏᤠᤵᤋᤢᤔᤠ ᤁᤢᤶᤔᤠᤔᤠ ᤔᤠ᤹᤺ᤕᤢ᤺ᤸᤗᤧ ᤌᤧ᤺ᤰᤂᤢᤛᤡᤒᤠ ᤜᤧᤰᤁᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤧᤖᤧᤳᤋᤧᤴ ᤌᤡ᤺ᤰᤋᤢᤱᤗᤥ॥ ᤂᤡᤖᤡᤱᤒᤠ ᤜᤧᤰᤁᤣ ᤀᤠᤱᤃᤠ᤹ ᤂᤧᤱᤜᤠ᤹ ᤂᤠᤔᤢᤱᤛᤡᤱᤗᤥ. ᤋᤠᤶᤓᤢᤱ ᤌᤰᤛᤠ᤺ᤸᤗᤧ ᤂᤧᤱᤜᤠ᤹ ᤌᤧ᤺ᤰᤂᤢᤛᤡᤖᤥ॥

⁹ “ᤀᤡᤛᤪᤠᤀᤡᤗᤀᤣ. ᤀᤠᤱᤃᤠ᤹ ᤂᤡᤏᤡ᤹ ᤔᤧᤶᤓᤤ ᤆᤥ᤺ᤰᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ. ᤁᤢᤓᤠ᤹ᤒᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤘᤕᤡᤖᤥ॥

¹⁰ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤔᤠᤱ ᤘᤠ᤹ᤖᤥ. ‘ᤀᤠᤏᤡᤃᤣ ᤗᤳᤇᤠ ᤜᤠᤱ ᤏᤢ ᤜᤠᤱᤛᤠᤜᤠ᤹ ᤀᤠᤒᤡᤖᤧ᤹ᤀᤥ॥’ ᤂᤡᤏᤡ᤹ ᤋᤠᤱᤛᤧ᤺ᤵᤔᤠ ᤁᤧᤛᤢᤰᤐᤠ. ᤂᤡᤏᤡ᤹ ᤜᤠᤱᤅᤡᤴ ᤀᤠᤳᤋᤡ ᤘᤠ᤹ᤒᤣ᥅ ᤂᤡᤏᤡ᤹ ᤁᤧᤖᤧᤰ ᤐᤠᤱᤈᤢᤜᤠ᤹ᤀᤥᤒᤠ ᤕᤢᤰᤛᤠᤒᤠᤜᤠ᤹ ᤀᤠᤳᤋᤥ ᤔᤧᤘᤠ᤹ᤒᤣ᥅

¹¹ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤕᤠ᤺ᤰᤗᤧ᤹ᤔᤥ ᤂᤡᤏᤡ᤹ ᤗᤳᤇᤠ ᤜᤠᤱ ᤐᤡᤏᤡᤱᤗᤥ. ᤜᤧᤰᤁᤩᤠᤱ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤥ ᤂᤧᤴ ᤑᤥ᤺ᤰᤂᤢᤱᤅᤠᤱ ᤋᤣ᤹ᤖᤢᤱᤗᤥ॥

¹² “ᤀᤣᤑᤪᤠᤀᤡᤔᤖᤧ ᤁᤢᤀᤠᤵᤋᤡᤰᤁᤡᤴ ᤗᤢᤶᤔᤏᤠᤀᤠᤱ ᤘᤠ᤹ᤖᤥ. ᤂᤧᤸᤗᤧ ᤁᤢᤗᤠᤕᤥᤜᤠ᤹ ᤛᤠᤵᤏᤠᤀᤠᤱ ᤏᤧᤖᤥ॥

¹³ ᤔᤧᤴᤇᤢᤔᤠᤴ ᤛᤠᤃᤵᤔᤠ ᤋᤢᤱᤅᤡᤸᤗᤧ ᤋᤖᤢᤒᤠ ᤜᤧᤰᤁᤣ ᤂᤧᤴ ᤋᤢᤰᤂᤧ᤺ᤴ ᤀᤣᤑᤪᤠᤀᤡᤔᤀᤥ ᤋᤠᤖᤥ. ᤁᤖ ᤂᤧᤴ ᤁᤢᤏᤧᤜᤡ ᤔᤧᤴᤍᤢᤶᤔᤏᤠᤒᤠ ᤀᤅᤧ᤺ᤰᤘᤠ ᤜᤧᤰᤁᤣ ᤗ᤹ᤖᤥ. ᤛᤠᤘᤠ᤺ᤴᤇᤡᤱᤔᤠ ᤕᤧᤶᤔᤥ ᤂᤧᤴ ᤁᤢᤗ᤺ᤶᤔᤠ ᤗᤠᤶᤔᤥ ᤔᤧᤍᤥ᤺ᤴᤇᤡᤱᤅᤡᤸᤗᤥ॥

¹⁴ “ᤀᤠᤱᤃᤠ᤹ ᤂᤧᤱᤜᤠ᤹ ᤀᤡᤐᤢᤱᤅᤡᤸᤗᤧ ᤁᤢᤔᤢᤰᤁᤥᤗᤠᤶ ᤀᤠᤱᤃᤠ᤹ ᤁᤢᤔᤧᤸᤗᤢᤱ ᤜᤢᤅᤢᤱᤅᤠᤱ ᤌᤧ᤹ᤖᤢᤱᤛᤡᤱᤗᤥ. ᤀᤠᤱᤃᤠ᤹ ᤂᤧᤱᤜᤠ᤹ ᤛᤡᤔᤠᤗᤠᤶ ᤛᤧᤴᤗᤵ ᤐᤡᤖᤢᤱᤛᤡᤱᤗᤥ॥ ᤛᤡᤔᤠᤀᤣ. ᤂᤧᤏᤧ᤹ ᤁᤧᤔᤠᤱᤍᤢᤰᤔᤧᤸᤗᤧ ᤁᤢᤔᤡᤴᤍᤣᤜᤠ᤹ ᤀᤠᤳᤋᤡ ᤘᤠ᤹ᤒᤣ᥅ ᤀᤡᤐᤢᤱᤅᤣ. ᤂᤧᤏᤧ᤹ ᤁᤧᤔᤧᤱᤔᤠᤴ ᤀᤠᤳᤋᤥ ᤘᤠ᤹ᤃ᥅

¹⁵ ᤀᤠᤵᤑᤣᤰ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤣᤑᤪᤠᤀᤡᤔᤧᤴ ᤏᤢ᤹ᤍᤠᤛᤠᤱ ᤀᤠᤱᤃᤠ᤹ ᤂᤧᤴ ᤗᤢᤱᤔᤠ᤹ ᤔᤧᤍᤢᤰᤁᤠᤴᤗᤥ॥ ᤕᤜᤘᤣ ᤍᤠᤱᤒᤠᤗᤠᤶ ᤏᤠᤱᤃᤧᤴ ᤐᤡᤛᤠᤱᤒᤠ ᤛᤢᤖᤡ᤺ᤳᤋᤡᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤗᤧᤵᤔᤠᤱ ᤗᤠᤶ ᤜᤢᤓᤧᤴᤗᤥ॥ ᤂᤧᤸᤗᤧ ᤁᤢᤈᤫᤠ᤺ᤳ ᤘᤒᤢᤴᤍᤠᤰᤘᤠᤴ ᤆᤵᤐᤪᤧᤰ ᤆᤵᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤘᤠᤒᤠᤰᤁᤡᤴ ᤛᤷᤃᤧᤱ ᤜᤣᤒᤣ᤺ᤰᤗᤥ॥ ᤂᤧᤸᤗᤧ ᤁᤧᤖᤧᤰ ᤀᤡᤔᤧᤸᤗᤢᤱᤒᤠ ᤁᤢᤈᤡᤃᤰᤘᤠ ᤕᤢᤱᤔᤠᤍᤧᤴᤏᤡᤴ ᤔᤧᤏᤠᤵᤋᤢᤖᤥ॥

¹⁶ ᤛᤠᤔᤖᤡᤕᤠᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤋᤡᤰᤁᤡᤸᤗᤧ ᤂᤢᤶᤍᤡᤱ ᤂᤥᤔᤠᤀᤣ ᤐᤥᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤱᤜᤠ᤹ ᤐᤡᤑᤩᤢᤱᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ ᤋᤠᤓᤣ᤺ᤸᤗᤧ ᤗᤖᤧ᤺ᤱᤓᤖᤧ᤺ᤱ ᤔᤧᤛᤥᤴᤍᤢᤛᤡᤖᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤅᤧ᤺ᤰᤘᤠ ᤛᤠᤜᤠ᤹ ᤂᤠᤶᤒᤠᤱᤅᤥ ᤔᤧᤎᤠᤵᤛᤢᤛᤡᤖᤥ. ᤜᤧᤰᤁᤩᤠᤱ ᤔᤧᤴᤇᤢᤰᤔᤠ ᤁᤧᤘᤠ᤹ᤔᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ ᤛᤠᤵᤐᤥᤰᤁᤧᤴ ᤔᤧᤈᤡᤖᤢᤛᤡᤖᤥ॥”