ᤜᤥᤛᤣ 12 - LIFOTNT

ᤀᤡᤛᤪᤠᤀᤡᤗᤖᤧ ᤗᤠᤕᤥ ᤆᤥᤃᤢ

¹ ᤀᤡᤑᤪᤠᤀᤡᤶᤔᤡᤴ ᤆᤰᤔᤧᤸᤗ᤹ᤀᤣ ᤛᤢᤖᤡᤳ ᤁᤣᤈᤱ ᤆᤠ᤺ᤳᤇᤡᤱᤗ. ᤂᤧᤸᤗᤧ ᤁᤧᤖᤧᤰ ᤕᤧᤴ ᤏᤠᤱᤃᤧᤴ ᤐᤡᤛᤠᤱᤒᤠ ᤛᤢᤖᤡᤳᤋᤧᤴ ᤏᤠ᤺ᤳᤋᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤀᤡᤱᤗᤧᤰ ᤏᤢ ᤔᤏᤠᤛᤧᤵᤔᤠ ᤕᤠ᤺ᤶᤒᤰᤜᤠ᤹ ᤑᤥᤛᤢᤖᤥ॥ ᤂᤧᤸᤗᤧ ᤀᤛ᤻ᤛᤢᤖᤧᤴᤏᤢ ᤏᤠᤍᤱ ᤆᤥᤃᤢᤖᤥ. ᤂᤧᤒᤩᤠᤱ ᤔᤡᤛᤪᤀᤥ ᤆᤤᤋᤢᤏ ᤏᤡ᤺ᤱᤃᤣ᤹ᤀᤡᤴ ᤜᤠᤅᤢᤖᤥ॥

² ᤕᤠᤁᤢᤒᤖᤧ ᤁᤢᤍᤰᤗᤧᤱᤘᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤗᤳᤇᤠ ᤁᤢᤀᤠᤵᤋᤡᤰ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤕᤠᤁᤢᤒᤧᤴ ᤂᤧᤸᤗᤧ ᤁᤢᤕᤧᤵᤗᤧᤰ ᤁᤢᤀᤡᤛᤡᤰ ᤂᤢᤶᤍᤡᤱ ᤐᤡᤖᤢᤖᤥ॥ ᤂᤧᤸᤗᤧ ᤁᤢᤕᤠ᤺ᤶᤒᤰ ᤁᤢᤀᤡᤛᤡᤰ ᤂᤢᤏᤧ᤹ᤀᤥ ᤁᤢᤗᤧᤰᤘᤠ ᤜᤢᤅᤢᤖᤥ॥

³ ᤛᤠᤵᤐᤥ᤺ᤰᤁᤥ ᤂᤢᤏᤧ᤹ ᤁᤢᤶᤓᤢ᤹ᤖᤧ ᤁᤢᤗᤠᤱᤃᤠᤰᤌᤡ᤺ᤶᤒᤧᤴ ᤋᤧᤶᤛᤢᤖᤥ. ᤜᤧᤰᤁᤩᤠᤱ ᤕᤶᤒᤠ ᤐᤥ᤺ᤰᤂᤧᤀᤠᤱ ᤕᤜᤢᤍᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤌᤰᤋᤧᤖᤥ॥

⁴ ᤂᤢᤏᤧ᤹ ᤔᤠᤱᤗᤠᤀᤡᤱᤒᤧᤴᤏᤢ ᤌᤰᤋᤧᤀᤠᤱ ᤂᤧᤴ ᤏᤠ᤺ᤴᤍᤢᤖᤥ. ᤂᤢᤏᤧ᤹ ᤜᤠᤒᤧᤀᤠᤱ ᤔᤢ᤹ᤀᤡᤛᤠᤶᤗᤧ ᤗᤠᤃᤡ ᤂᤧᤴ ᤐᤣᤗᤡ ᤑᤠᤰᤋᤢᤖᤥ. ᤂᤢᤏᤧ᤹ ᤒᤣᤌᤣᤗᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤢᤔᤢᤖᤥ. ᤜᤧᤰᤁᤩᤠᤱ ᤂᤧᤵᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ᤏᤢ ᤋᤠ᤹ᤈᤧᤰᤂᤧᤖᤥ—

⁵ ᤂᤧᤴ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤏᤡᤱᤘᤠ᤹ᤑᤢᤔᤠᤱᤗᤥ. ᤂᤢᤏᤧ᤹ ᤁᤢᤔᤡᤱᤅᤡᤴ ᤕᤜᤘᤣᤖᤥ॥

⁶ ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤀᤠᤵᤑᤣᤰ ᤏᤡᤱᤘᤠ᤹ᤑᤢᤔᤠᤱᤅᤥ ᤁᤧᤏᤢ᤺ᤰᤂᤡᤖᤀᤣ ᤐᤥᤱᤗᤥ. ᤔᤡ᤺ᤶᤈᤡᤴ ᤏᤢ ᤂᤠᤛᤧᤴᤏᤡᤴ ᤜᤠᤒᤠ ᤋᤰᤋᤧᤶ ᤁᤳᤋᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤆᤰᤔᤧᤸᤗ᤹ᤀᤣ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤠᤱᤄᤧᤶᤔᤧ᤹ᤀᤥ॥

ᤘᤣ᤹ ᤂᤢᤶᤍᤡᤱᤅᤡᤸᤗᤧᤴ ᤀᤡᤱᤈᤠᤱ

⁷ “ᤗᤧᤱᤜᤱ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤧᤱᤃᤧᤵᤔᤏᤠᤒᤠ ᤁᤢᤎᤠᤱᤔᤠᤜᤠ᤹ ᤔᤧᤕᤠᤅᤢᤖᤥ. ᤀᤡᤱᤗᤧᤰ ᤆᤥ᤺ᤰᤔᤠ ᤂᤧᤱᤜᤠ᤹ ᤂᤢᤴᤇᤡ᤹ ᤛᤡᤖᤠ᤹ᤌᤠᤱᤗᤥ॥

⁸ ᤀᤣᤑᤪᤠᤀᤡᤶᤔᤡᤸᤗᤧ ᤐᤠ᤺ᤳᤋᤢ᤹. ‘ᤀᤠᤱᤃᤠ᤹ ᤛᤠ᤹ᤖᤡᤰ ᤕᤠᤱᤛᤠᤁᤢᤴᤎᤣᤛᤠᤒᤠ ᤆᤥ᤺ᤰᤁᤠᤖᤥ. ᤀᤠᤱᤃᤠ᤹ ᤁᤧᤃᤵᤐᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤱᤃᤠ᤹ ᤁᤧᤖᤧᤰ ᤀᤠᤕᤠᤱᤛᤠ ᤁᤢᤴᤎᤣᤜᤠ᤹ᤖᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ᤀᤥ ᤌᤧᤔᤠᤀᤠᤱ ᤑᤧᤴᤕᤠ᤺ᤶᤒᤰ ᤏᤢ ᤗᤠᤕᤥ ᤔᤧᤱᤄᤥᤛᤢᤴᤗᤥ॥’

⁹ “ᤀᤠᤱᤃᤠ᤹ ᤕᤜᤘᤣ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤀᤠᤖᤥ. ᤀᤠᤱᤃᤠ᤹ ᤂᤧᤏᤧ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤌᤠᤰᤏᤧᤀᤠᤱ ᤘᤠ᤹ᤖᤥ॥ ᤏᤡ᤺ᤴᤎᤥ ᤁᤧᤒᤥᤱᤒᤠ ᤂᤧᤏᤧ᤹ ᤁᤧᤍᤱᤏᤠᤶᤒᤠ ᤕᤧᤴᤏᤥ ᤁᤢᤀᤡᤛᤡᤰ ᤀᤠᤱᤃᤠ᤹ ᤂᤧᤏᤧ᤹ ᤕᤠᤶᤔᤥ ᤛᤠ᤺ᤱᤃᤠᤜᤡᤶᤔᤥ ᤘᤠ᤹ᤔᤠ ᤐᤠᤱᤏᤧᤖᤥ॥

¹⁰ ᤀᤠᤱᤃᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤏᤢ ᤋᤠ᤹ᤈᤧᤰᤂᤠᤱᤗᤥ. ᤀᤠᤱᤃᤠ᤹ ᤂᤧᤱᤜᤠ᤹ ᤕᤖᤡᤰ ᤛᤢᤑᤥᤜᤠ᤹ ᤐᤡᤖᤢᤱᤛᤡᤱᤗᤥ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤂᤧᤍᤠ᤹ ᤐᤠ᤺ᤴᤜᤠ᤹ ᤐᤡᤏᤡᤱᤗᤥ॥

¹¹ “ᤌᤣ ᤃᤡᤗᤠᤍᤧᤴ ᤁᤢ᤹ᤀᤡᤃᤧᤓᤧᤶᤒᤠ ᤆᤥ᤺ᤰᤐᤡ᥅ ᤂᤧᤸᤗᤧ ᤁᤢᤔᤏᤠᤜᤠ᤹ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤔᤧᤈᤥᤰᤗᤥ᥄ ᤌᤣ ᤂᤧᤱᤜᤠ᤹ᤖᤧ ᤃᤡᤗᤃᤠᤗᤀᤥ ᤛᤧᤃᤶᤒᤠ ᤐᤡᤳᤜᤠ᤹ ᤛᤡᤍᤢᤱᤈᤓᤠ ᤔᤧᤈᤥᤃᤢᤛᤡᤒᤡ᥅ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤁᤧᤰᤆᤢ ᤌᤥᤱᤔᤏᤠᤒᤠ ᤀᤡᤰᤋᤠᤵᤐᤥ ᤁᤧᤗᤢᤶᤛᤡᤱᤒᤠᤀᤠᤱ ᤁᤧᤏᤧᤒᤠ ᤗᤢᤱᤜᤠ᤹ ᤜᤧᤰᤋᤱᤒᤠ ᤐᤥᤱᤗᤥ॥

¹² ᤕᤠᤁᤢᤒᤧᤴ ᤂᤧᤳᤇᤡᤱᤅᤠᤱ ᤀᤠᤖᤠᤔᤒᤠ ᤗᤠᤈᤣ᤹ᤀᤥ ᤐᤣᤖᤥ. ᤀᤡᤛᤪᤠᤀᤡᤗᤖᤧ ᤗᤳᤇᤠ ᤔᤣ᤺ᤳᤗᤧ ᤗᤠᤃᤡ ᤛᤧᤘᤠᤖᤥᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤕᤧᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤔᤣ᤺ᤳᤗᤧ ᤗᤠᤃᤡ ᤔᤧᤸᤗᤢᤰᤜᤠ᤹ ᤆᤠᤖᤠᤶᤛᤢᤛᤡᤖᤥ॥

¹³ ᤕᤜᤘᤣ ᤍᤠᤱᤒᤧᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤌᤡᤰ ᤕᤠᤅᤢᤀᤠᤱ ᤀᤡᤛᤪᤠᤀᤡᤗᤧᤴ ᤔᤡᤛᤪ ᤗᤠᤈᤣ᤹ᤗᤠᤶ ᤗ᤺ᤳᤋᤢ ᤌᤠᤰᤋᤢᤖᤥ. ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤌᤡᤰ ᤕᤠᤅᤢᤀᤠᤱ ᤂᤢᤏᤧ᤹ ᤀᤡᤛᤪᤠᤀᤡᤗᤧᤴ ᤁᤶᤒᤪᤠᤱ ᤔᤧᤳᤋᤢᤖᤥ॥

¹⁴ ᤁᤖ ᤀᤣᤑᤪᤠᤀᤡᤶᤔᤡᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤛᤡᤰ ᤑᤥ᤺ᤰᤂᤢᤀᤠᤱ ᤘᤠ᤹ᤖᤥ. ᤂᤧᤸᤗᤧ ᤔᤠᤰᤂᤡ᤹ᤛᤡᤘᤠ ᤛᤧᤛᤢᤒᤠᤸᤗᤧ ᤀᤠᤵᤋᤡᤰᤁᤡᤴ ᤁᤢᤴᤍᤠᤱᤒᤠᤸᤗᤧ ᤂᤧᤸᤗᤧᤀᤣ ᤁᤢᤛᤶᤎᤠᤱ ᤘᤠ᤹ᤖ ᤕᤠ᤺ᤴᤍᤢᤖᤥ. ᤂᤶᤓᤩᤠᤱ ᤂᤧᤸᤗᤧ ᤐᤠ᤺ᤴᤎᤡᤰᤔᤠ ᤁᤢᤀᤠᤵᤋᤡᤰᤁᤧᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤋᤢᤖᤥ॥”