ᤜᤥᤛᤣ 11 - LIFOTNT

ᤀᤡᤛᤪᤠᤀᤡᤗᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤋᤢᤰᤋᤢ

¹ “ᤀᤠᤸᤗ ᤀᤡᤛᤪᤠᤀᤡᤗᤧᤴ ᤗᤳᤇᤠ ᤀᤅᤧ᤺ᤰᤘᤠ ᤘᤕᤧᤖᤥ ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤴ ᤗᤢᤱᤔᤠ᤹ ᤋᤢᤰᤋᤢᤱᤗᤥ. ᤜᤧᤰᤁᤩᤠᤱ ᤀᤠᤵᤑᤣᤰ ᤀᤠᤛ᤻ᤛᤠᤴ ᤔᤡᤛᤪ ᤗᤠᤈᤣ᤹ᤗᤠᤶ ᤀᤢ᤺ᤳᤋᤢᤱᤗᤥ॥

² ᤁᤖ ᤀᤠᤰᤂᤧᤴ ᤀᤠᤰᤂᤧᤴᤗᤧᤱ ᤀᤠᤱᤃᤠ᤹ ᤂᤧᤱᤜᤠ᤹ ᤀᤢ᤺ᤳᤋᤢᤱᤛᤡᤱ. ᤂᤧᤶᤔᤩᤠᤰ ᤂᤧᤶᤔᤩᤠᤰᤁᤣ ᤂᤧᤱᤜᤠ᤹ ᤀᤠᤱᤃᤠ᤹ᤗᤠᤶ ᤔᤠ᤺ᤱᤄᤠ ᤔᤧᤒᤥ᤺ᤰᤂᤧᤖᤥ॥ ᤂᤧᤱᤜᤠ᤹ᤖᤧ ᤒᤠᤗ ᤔᤠᤱᤜᤠ᤹ᤀᤥ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤠᤘᤠ ᤆᤀᤡ᤺ᤳᤜᤠ᤹ᤀᤥ ᤛᤢᤰᤐᤠ ᤔᤧᤜᤠ᤺ᤴᤍᤢᤖᤥ॥

³ ᤀᤣᤑᤪᤠᤀᤡᤶᤔᤡᤴ ᤜᤢᤰᤁᤥ ᤁᤧᤍᤧᤶᤒᤠᤀᤠᤱ ᤗᤠᤱᤄᤣ᤺ᤰᤔᤠ ᤁᤧᤜᤢ᤹ᤒᤠᤃ ᤀᤠᤱᤃᤠ᤹ᤀᤣ ᤘᤕᤠᤱᤗᤥ. ᤁᤖ ᤀᤠᤱᤃᤠ᤹ ᤂᤧᤱᤜᤠ᤹ ᤘᤣ᤺ᤴᤍᤢᤱᤛᤡᤱ ᤑᤠ᤹ᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥

⁴ ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤴᤇᤠᤶᤃᤧᤴ ᤕᤠᤵᤔᤡ ᤔᤡ᤺ᤶᤈᤡᤒᤠ ᤌᤠᤰᤐᤠ᤺ᤸᤗᤧ. ᤗᤢᤱᤔᤠ᤹ ᤋᤢᤰᤔᤠ ᤀᤡᤄᤣ᤺ᤱᤅᤡᤸᤗᤧ ᤂᤣ᤺ᤰᤂᤢᤱᤛᤡᤱᤅᤠᤱ ᤋᤡ᤺ᤰᤋᤢᤱᤛᤡᤱᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤳᤗᤠᤀᤥᤗᤠᤶ ᤂᤧ᤺ᤵᤛᤡᤱᤅᤡᤴ ᤂᤧᤳᤋᤢᤱᤗᤥ ᤜᤧᤰᤁᤩᤠᤱ ᤁᤢᤈᤠ ᤆᤠ᤺ᤵᤔᤠᤛᤡᤖᤧ ᤗᤠᤃᤡ ᤀᤠᤱᤃᤠ᤹ ᤀ᤺ᤰᤂᤢᤶ ᤑᤴᤇᤡᤱᤅᤠᤖᤥ॥

⁵ “ᤂᤧᤱᤜᤠ᤹ ᤀᤠᤱᤃᤠ᤹ ᤗᤧᤵᤔᤠᤱ ᤏᤢ᤺ᤱᤔᤠ ᤔᤧᤴᤍᤧᤴᤏᤧᤴᤗᤥ. ᤜᤧᤰᤁᤩᤠᤱ ᤔᤡᤛᤪ ᤗᤧᤵᤔᤠᤱ ᤔᤧᤏᤢᤱ ᤔᤧᤒᤣ᤺ᤰᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤛ᤻ᤛᤢᤖᤡᤜᤠ᤹ᤖᤧ ᤔᤧᤕᤢᤰᤋᤢᤛᤡᤖᤥ॥

⁶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤜᤠ᤹ᤀᤥ ᤋᤠᤓᤣᤜᤠ᤹ ᤔᤧᤜᤡᤰᤂᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤎᤣ᤺ᤳᤜᤠ᤹ᤖᤧ ᤁᤢᤎᤣ᤺ᤰᤔᤠᤜᤠ᤹ ᤔᤧᤕᤴᤇᤢᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤥ᤺ᤰᤔᤠ ᤔᤧᤃᤥ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤔᤧᤏᤢᤵᤛᤢ ᤔᤧᤒᤡᤖᤢᤛᤡᤖᤥ॥

⁷ ᤀᤠᤔᤏᤠᤜᤠ᤹ᤖᤧ ᤀᤠᤱᤃᤠ᤹ᤗᤠᤶ ᤏᤢᤱᤔᤠ ᤐᤣ᤺ᤰᤔᤠ ᤏᤡ᤺ᤴᤎᤥ ᤔᤧᤈᤥᤃᤢᤀᤠᤱ ᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤐᤣᤗᤡ ᤔᤧᤓᤠᤰᤋᤢᤛᤠᤱ ᤂᤢᤏᤧ᤹ ᤂᤧᤱᤜᤠ᤹ ᤌᤥ ᤔᤧᤓᤥ᤺ᤰᤂᤢᤛᤡᤴᤗᤥ॥

⁸ “ᤀᤣᤑᤪᤠᤀᤡᤔᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤀᤠᤰᤂᤣᤗ᤹ᤖᤡᤰ ᤗᤧᤵᤔᤠ ᤛᤢᤰᤏᤧᤃ᥄ ᤀᤡᤛᤪᤠᤀᤡᤗᤀᤣ. ᤀᤠᤰᤂᤣᤗ᤹ᤖᤡᤰ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤔᤠ ᤛᤢᤰᤏᤧᤒᤣ᥅ ᤂᤧᤏᤧ᤹ ᤀᤠᤓᤣᤗ᤹ᤖᤡᤰ ᤀᤍᤔᤠᤴ ᤜᤧᤰᤁᤣ ᤗᤧᤵᤔᤠ ᤛᤢᤰᤏᤧᤒᤣ᥅ ᤀᤠᤱᤃᤠ᤹ ᤀᤠᤓᤣᤗ᤹ᤖᤡᤰ ᤛᤒᤥᤕᤡᤔᤧᤴ ᤜᤧᤰᤋᤱᤒᤠ ᤆᤥ᤺ᤰᤔᤠ ᤛᤢᤰᤏᤧᤒᤣ᥄ ᤀᤠᤱᤃᤠ᤹ ᤀᤠᤛᤡᤰᤗᤢᤰᤔᤧᤴ ᤀᤠᤱᤃᤠ᤹ ᤀᤠᤛᤡᤃᤠᤱᤅᤣ ᤏᤢ᤺ᤰᤋᤢᤱᤅᤠᤱ ᤘᤠ᤹ᤖᤥ॥ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤗᤢᤱᤔᤠ᤹ ᤛᤩᤠ᤺ᤳ ᤁᤧᤗ᤹ᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥

⁹ ᤀᤠᤱᤃᤠ᤹ ᤛᤠ᤹ᤖᤡᤰ ᤁᤧᤒᤥ᤺ᤰᤐᤠ ᤀᤠᤛᤠᤰᤁᤧᤴᤏᤡᤴ ᤔᤧᤎᤠᤀᤠᤴᤗᤥ. ᤀᤠᤱᤃᤠ᤹ ᤀᤣᤑᤪᤠᤀᤡᤶᤔᤡᤴ ᤕᤠᤶᤔᤥ ᤔᤧᤶᤓᤤ ᤔᤧᤈᤥᤃᤢᤱᤅᤡᤴᤗᤥ॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤔᤏᤠᤀᤠ ᤔᤧ᤺ᤴᤏᤠᤖᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ. ᤂᤡᤏᤡ᤹ ᤗᤢᤶᤔᤥ ᤁᤧᤘᤠ᤹ᤒᤠ ᤁᤧᤖᤧᤰᤏᤢ᤺ᤸᤗᤧ ᤛᤣᤛᤣᤒᤠ— ᤀᤠᤱᤃᤠ᤹ ᤀᤠᤛᤡᤰ ᤐᤥ᤺ᤰᤔᤥ ᤂᤡᤏᤡ᤹ᤀᤥ ᤔᤧᤍᤠᤀᤠᤴᤗᤥ॥

¹⁰ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤔᤧᤍᤡᤶᤍᤢ ᤔᤧᤏᤠ᤺ᤳᤋᤢᤖᤥ. ᤂᤢᤏᤧ᤹ ᤂᤡᤖᤡᤱᤒᤠ ᤁᤢᤀᤡᤛᤡᤰ ᤜᤢ᤺ᤰ ᤜᤢ᤺ᤰ ᤗ᤹ᤖᤡᤰ ᤜᤢ᤺ᤰᤗᤥ. ᤀᤠᤸᤗ ᤂᤢᤏᤧ᤹ ᤜᤢ᤺ᤰᤁᤡᤸᤗᤧ ᤂᤢᤏᤧ᤹ ᤁᤢᤛ᤻ᤛᤠ ᤀᤅᤧ᤺ᤰᤘᤠᤜᤠ᤹ ᤔᤧᤕᤱᤗ ᤏᤠᤶᤎᤠ ᤐᤡᤛᤠᤱᤗᤠᤶ ᤔᤧᤓᤧᤴᤗᤥ॥

¹¹ ᤂᤧᤱᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤐᤢᤛᤠᤜᤠ᤹ ᤁᤢᤀᤡᤛᤡᤰ ᤜᤧᤰᤁᤩᤠᤱ ᤀᤛ᤻ᤛᤢᤖᤗᤠᤶ ᤛᤠᤵᤐᤧᤳᤋᤪᤢ᤺ᤰᤔᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤌᤧᤃᤰᤁᤰᤏᤠ ᤔᤧᤕᤱᤗ ᤔᤧᤓᤧᤴᤗᤥ॥ ᤀᤠᤱᤃᤠ᤹ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤜᤡᤶᤔᤥ ᤕᤢᤰᤂᤢᤱᤛᤡᤱᤗᤥ.” ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤀᤠᤱ ᤘᤠ᤹ᤖᤥ॥

ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤀᤥ ᤂᤢᤶᤍᤡᤱ

¹² ᤀᤣᤑᤪᤠᤀᤡᤔᤖᤧ ᤁᤢᤀᤡᤱᤗᤧᤰ ᤏᤢ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤴᤘᤠ᤹ᤔᤏᤠᤒᤠ ᤐᤠ᤺ᤴᤜᤠ᤹ᤖᤧ ᤀᤠᤱᤃᤠ᤹ ᤁᤒᤠᤱᤅᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤕᤜᤢᤍᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢ ᤏᤛᤠ᤺ᤴᤛᤠᤒᤠ ᤛᤣᤛᤣᤒᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥᤃᤧᤀᤠᤱ ᤘᤠ᤹ᤖᤥ॥