ᤜᤥᤛᤣ 10 - LIFOTNT

¹ ᤀᤡᤛᤪᤠᤀᤡᤗᤧᤱᤃ ᤜᤢᤶᤒᤧᤳ ᤁᤧᤍᤠᤵᤐᤠ ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱᤗᤥ. ᤂᤧᤸᤗᤧ ᤀᤠᤵᤑᤣᤰ ᤗᤠᤃᤡ ᤁᤢᤈᤠ᤹ ᤌᤥ᤺ᤰᤋᤧᤖ ᤕᤠ᤺ᤴᤍᤢᤖᤥ॥ ᤀᤠᤰᤂᤩᤠᤖᤡᤰ ᤕᤖᤡᤰ ᤁᤢᤈᤠ᤹ᤜᤠ᤹ ᤌᤥ᤺ᤰᤋᤧ ᤂᤧᤶᤔᤩᤠᤰᤁᤣ ᤕᤖᤡᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤆᤥᤃᤢᤖᤥ. ᤗᤠᤈᤣᤴ ᤀᤠᤰᤂᤩᤠᤖᤡᤰ ᤏᤢᤒᤠ ᤐᤥ᤺ᤰᤂᤧᤖᤒᤣ ᤂᤧᤶᤓᤩᤠᤖᤡᤰ ᤕᤖᤡᤰ ᤛᤣᤛᤣ ᤗᤢᤱᤜᤠ᤹ ᤁᤧᤄᤧᤶᤛᤡᤱᤒᤠ ᤆᤥᤃᤢᤖᤥ॥

² ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤱᤔᤠᤴ ᤀᤡᤱᤗᤧᤰᤐᤠ ᤆᤥᤰᤗᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤠᤵᤋᤡᤰᤁᤡᤸᤗᤧ ᤁᤢᤗᤧᤰᤘᤠ ᤂᤢᤶᤍᤡᤱ ᤂᤥᤔᤠᤀᤣ ᤐᤥᤱᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤕᤴᤇᤢ ᤐᤡᤖᤢᤛᤡᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤣᤛᤣ ᤗᤢᤱᤜᤠ᤹ ᤘᤖᤧᤱᤗᤧᤱ ᤕ᤺ᤵᤛᤢ ᤐᤡᤖᤢᤛᤡᤖᤥ॥

³ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. “ᤀᤠᤏᤡᤃᤣ ᤜᤠᤱ ᤜᤥᤵᤗᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤀᤠᤏᤡᤃᤣ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤶᤒᤧᤴᤗᤥ॥ ᤀᤠᤏᤡᤃᤣ ᤗᤠᤃᤡ ᤜᤠᤱ ᤘᤕᤧᤛᤠᤱ ᤂᤢᤏᤧ᤹ ᤀᤠᤏᤡᤃᤣ ᤗᤠᤃᤡ ᤌᤧᤔᤠ ᤆᤥ᤺ᤰᤔᤠ ᤛᤢᤰᤋᤢᤒᤠ ᤘᤕᤧᤀᤠᤱᤒᤣ᥅”

⁴ ᤂᤧᤱᤜᤠ᤹ᤖᤧ ᤌᤣᤏᤠᤎᤣᤒᤠ ᤐᤠ᤺ᤴᤜᤠ᤹ ᤔᤧᤒᤠ᤺ᤳᤋᤢᤖᤥ. ᤀᤡᤱᤗᤧᤰᤐᤠ ᤔᤠᤱᤜᤧᤰ ᤔᤧᤈᤥᤃᤢᤀᤠᤱ ᤔᤠᤱᤜᤢᤵᤜᤠ᤹ ᤔᤧᤈᤥᤃᤢᤖᤥ॥ ᤁᤸᤗᤧᤆᤥᤃᤢᤸᤗᤧ ᤁᤧᤰᤆᤢ ᤌᤥᤱᤔᤏᤠᤒᤠ ᤂᤠᤶᤒᤣ᤺ᤰᤁᤥ ᤁᤢᤏᤡᤱ ᤁᤧᤕᤠᤰᤐᤠ ᤕᤠ᤺ᤴᤛᤢᤱᤜᤠ᤹ ᤗᤡᤱᤒᤠ ᤜᤧᤰᤁᤣ ᤂᤠᤛᤧᤴ ᤆᤥ᤺ᤰᤔᤠ ᤋᤢ᤺ᤴᤍᤣ᤹ ᤐᤠ᤺ᤴᤜᤠ᤹ ᤐᤥᤖᤒᤣ᤺ᤰᤗᤥ॥

⁵ ᤛᤠᤔᤖᤡᤕᤠ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤒᤣᤌ-ᤀᤠᤘᤏᤒᤠ ᤐᤡᤳᤛᤠᤳ ᤏᤠᤘᤠᤀᤡᤳᤗᤠᤴ ᤌᤧᤃᤰᤁᤰᤏᤠ ᤔᤧᤕᤱᤗ ᤔᤧᤃᤡᤖᤢᤖᤥ॥ ᤂᤧᤸᤗᤧ ᤁᤢᤔᤏᤠᤜᤠ᤹ ᤂᤢᤏᤧ᤹ ᤁᤢᤗᤠᤃᤡ ᤏᤧᤳᤔᤧᤕᤢᤰᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤠᤱᤘᤠ ᤁᤢᤔᤠᤱᤘᤠᤀᤥ ᤁᤧᤛ᤺ᤵᤐᤠ ᤂᤧᤴ ᤏᤠᤘᤠᤀᤡᤳᤗᤠ ᤛᤧᤘᤠ ᤁᤧᤔᤧᤵᤐᤠ ᤕᤰᤕᤠᤒᤠᤜᤠ᤹ ᤔᤧᤖᤡᤱ ᤔᤧᤎᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤂᤢᤴᤇᤡ᤹ᤀᤥᤗᤠᤶ ᤘᤣ᤹ ᤗᤠᤈᤣ᤹ ᤔᤧᤍᤣ᤹ᤖᤢᤀᤠᤱ ᤘᤠ᤹ᤖᤥ॥

⁶ ᤐᤕᤶ ᤜᤠᤱᤅᤡᤸᤗᤧ ᤗᤠᤃᤡ ᤂᤧᤴ ᤀᤣ᤺ᤱᤕᤠᤱ ᤜᤧᤰᤁᤣ ᤀᤛ᤻ᤛᤢᤖᤀᤥ ᤔᤧᤍᤣ᤹ᤖᤢᤖᤥ. ᤀᤣᤑᤪᤠᤀᤡᤶᤔᤡᤴ ᤁᤢᤈᤠ᤺ᤳᤌᤡ ᤐᤣ᤺ᤰᤔᤥ ᤔᤧᤎᤠᤛᤢᤖᤥ. ᤀᤡᤛᤪᤠᤀᤡᤗᤧᤴ ᤛᤡᤱ ᤁᤢᤏᤠᤘᤠᤀᤡᤳᤗᤠᤗᤠᤶ ᤛᤡᤖᤡᤱᤔᤔᤥ ᤌᤠᤖᤥ॥

⁷ ᤛᤠᤔᤖᤡᤕᤠᤴ ᤏᤢ ᤂᤧᤵᤔᤥᤒᤠ ᤜᤠᤱᤅᤡᤱᤃ ᤆᤫᤠ᤺ᤳᤋᤡᤸᤗᤧ ᤘᤍᤣ᤹ᤖᤢᤒᤠ ᤛᤡᤱᤀᤠᤳ ᤁᤢᤀᤡᤛᤡᤰ ᤘᤍᤣ᤹ᤖᤢ ᤋᤣ᤹ᤖᤢᤛᤡᤖᤥ॥

⁸ ᤀᤡᤛᤪᤠᤀᤡᤗᤖᤧ ᤁᤢᤗᤠᤕᤥ. ᤀᤡᤃᤪ ᤁᤢ᤹ᤀᤡᤃᤧᤓᤧᤶᤒᤧᤸᤗᤧ ᤁᤢᤈᤴᤈᤶᤒᤠᤍᤧᤴᤜᤠ᤹ ᤔᤧᤰᤗᤥ. ᤂᤢᤴᤇᤡ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ᤀᤥ ᤋᤡᤱᤃᤪᤣᤰ ᤏᤢ ᤋᤡᤱᤜᤠ᤹ᤖᤧ ᤛᤢ᤺ᤵᤋᤢᤖᤥ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤁᤥ᤺ᤰᤔᤠᤜᤠ᤹ ᤔᤧᤔᤧᤳᤋᤢᤛᤡᤖᤥ. “ᤀᤠᤏᤡᤃᤣ ᤀᤠᤍᤧᤵᤋᤧ᤹ᤀᤥ.” ᤜᤧᤰᤁᤩᤠᤱ ᤌᤧᤃᤢᤜᤠ᤹ ᤔᤧᤔᤧᤳᤋᤢᤛᤡ. “ᤀᤠᤏᤡᤃᤣ ᤛᤶᤎᤠᤱ ᤔᤰᤌᤩᤧᤶᤔᤥ॥”

ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤀᤥ ᤂᤠᤛᤧᤴ ᤆᤥᤃᤢ

⁹ “ᤀᤡᤛᤪᤠᤀᤡᤗᤀᤣ. ᤃᤡᤒᤠᤒᤠ ᤕᤧᤶᤔᤠᤱᤎᤥ ᤂᤧᤏᤧ᤹ ᤗᤠᤕᤥ ᤆᤥ᤺ᤰᤔᤠ ᤁᤧᤜᤣ᤺ᤰᤋᤢᤖᤥ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᤂᤧᤏᤧ᤹ ᤜᤠᤒᤠ ᤂᤧᤶᤔᤥᤀᤣ ᤁᤧᤒᤳᤗᤥ॥ ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤧᤴᤎᤱᤅᤡᤸᤗᤧ ᤌᤣ ᤃᤡᤒᤠᤀᤥ ᤂᤧᤱᤜᤠ᤹ ᤔᤧᤕᤠᤱᤄᤢᤛᤡᤴᤏᤠᤱᤒᤡ᥅

¹⁰ ᤀᤠᤱᤃᤠ᤹ ᤏᤡᤱᤘᤠ᤹ ᤆᤥᤃᤢᤱᤅᤡᤸᤗᤧ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤧᤳᤇᤡ ᤗᤠᤕᤥᤜᤠ᤹ᤖᤧ ᤁᤢᤗᤧᤰᤘᤠ ᤂᤧᤱᤜᤠ᤹ ᤑᤵᤔᤠᤛᤡᤖᤧ ᤗᤠᤃᤡ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤈᤢᤶᤗᤥ॥

¹¹ “ᤀᤣᤑᤪᤠᤀᤡᤶᤔᤡᤴ ᤆᤠᤎᤠᤶᤔᤠᤍᤧᤴᤏᤥ ᤁᤧᤛ᤺ᤵᤔᤠ ᤂᤢᤶᤔᤏᤠᤔᤠ ᤁᤖ᤺ᤱ ᤐᤡᤵᤔᤠᤖᤥ. ᤁᤸᤗᤧᤆᤥᤃᤢᤸᤗᤧ ᤂᤧᤸᤗᤧ ᤏᤢᤒᤠ ᤁᤢᤓᤰᤋᤠᤱᤅᤥ ᤂᤧ᤺ᤵᤛᤡᤱᤅᤡᤴ ᤑᤳᤇᤢᤱᤗᤥ॥ ᤀᤠᤱᤃᤠ᤹ ᤀᤣᤑᤪᤠᤀᤡᤶᤔᤡᤴ ᤁᤢᤍᤢᤱᤍᤢᤱᤏᤠ ᤗᤥ᤺ᤰᤂᤢᤱᤗᤥ ᤕᤜᤢᤍᤠ᤺ᤸᤗᤧ ᤁᤧᤰᤆᤢ ᤌᤥ᤺ᤰᤂᤢᤖ ᤐᤥᤱᤗᤥ. ᤜᤧᤰᤁᤩᤠᤱ ᤕᤠᤁᤢᤒᤖᤧ ᤂᤠᤶᤒᤢᤰᤏᤠᤜᤠ᤹ ᤕ᤺ᤵᤛᤢᤖ ᤐᤥᤱᤗᤥ॥

¹² ᤂᤡᤏᤡ᤹ ᤗᤠᤃᤡ ᤛᤠᤶᤕᤥᤒᤠ ᤕᤠ᤺ᤶᤒᤰᤁᤡᤴ ᤕᤠ᤹ᤖᤡ᤺ᤶᤒᤠ ᤜᤣ᤹ᤖᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤆᤰᤔᤧᤴᤗ᤹ᤔᤏᤠᤒᤠ ᤔᤡ᤺ᤶᤈᤡᤸᤗᤧ ᤛᤡᤱᤛᤣᤴ ᤛᤢᤵᤛᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤂᤡᤏᤡ᤹ ᤕᤠᤰᤆᤠᤏᤠ ᤀᤡᤰᤋᤠᤵᤜᤠ᤹ ᤌᤥᤰᤛᤧᤶᤔᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤕᤢᤀᤠᤱ ᤂᤡᤏᤡ᤹ᤀᤥ ᤛᤠᤶᤕᤥᤏᤡᤔᤧᤴ ᤔᤧᤎᤠᤛᤢᤴᤗ ᤂᤡᤏᤡ᤹ᤀᤥ ᤌᤠᤖᤡᤰ ᤂᤢᤏᤧ᤹ ᤁᤥ᤺ᤵᤔᤠ ᤕᤧᤶᤔᤡᤴ ᤀᤠᤸᤗᤥᤀᤣᤖᤥ॥

¹³ “ᤁᤖ ᤂᤡᤏᤡ᤹ᤃ ᤑᤧᤴᤕᤠ᤺ᤶᤒᤰᤁᤡᤴ ᤁᤧᤗᤣ᤺ᤳᤋᤢᤶᤔᤠᤱ ᤘᤠ᤹ᤖᤥ. ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤁᤧᤛᤢᤵᤛᤢᤶᤔᤠᤱ ᤁᤧᤘᤕᤡᤖᤥ॥ ᤀᤡᤱᤗᤧᤰᤁᤡᤸᤗᤧ ᤁᤢᤈᤠ᤹ᤀᤡᤴ ᤂᤡᤏᤡ᤹ ᤁᤧᤈᤠᤶᤔᤠᤱ ᤁᤧᤘᤕᤡᤖᤥ. ᤂᤡᤏᤡ᤹ ᤀᤠᤵᤑᤣᤰ ᤔᤢᤰᤛᤠᤶᤔᤥ ᤏᤢ ᤂᤡᤏᤡ᤹ ᤕᤖᤡᤰ ᤌᤰᤛᤢᤒᤠᤜᤠ᤹ᤀᤥ ᤏᤡᤱᤘᤠ᤹ ᤁᤧᤕᤢᤰᤂᤢᤶᤒᤠᤸᤗᤧ ᤆᤥᤃᤢᤸᤗᤧ.

¹⁴ ᤂᤡᤏᤡ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤱ ᤀᤡᤰᤗᤠᤴ ᤜᤢ᤺ᤰᤗᤥ. ᤂᤡᤏᤡ᤹ ᤁᤧᤖᤧᤰ ᤕᤰᤜᤠ᤹ ᤘᤖᤧᤱᤗᤧᤱ ᤂᤠᤵᤐᤢᤌᤩ᤺ᤱ ᤔᤧᤔᤧᤰᤂᤢᤖᤥ ᤜᤧᤰᤁᤩᤠᤱ ᤋᤧᤴᤎᤱᤅᤥ ᤛᤸᤔᤏᤖᤧ ᤒᤣᤌ-ᤀᤠᤷᤒᤣᤗᤧᤴ ᤌᤩ᤺ᤱ ᤆᤥᤃᤢᤒᤠ ᤜᤧᤰᤁᤣ— ᤂᤧᤴ ᤕᤧᤶᤔᤥ ᤔᤠᤜᤠ᤹ ᤂᤢᤴᤇᤡ᤹ ᤀᤅᤧ᤺ᤰᤘᤠ ᤛᤠᤜᤠ᤹ᤏᤢ ᤛᤥᤛᤥᤖᤡᤰ ᤂᤠᤶᤒᤠᤱᤅᤥ ᤐᤡᤷᤎᤠᤵ ᤐᤡᤷᤎᤠᤵ ᤔᤧᤎᤠᤵᤛᤢᤛᤡᤀᤠᤱ ᤘᤕᤧᤖᤥ॥

¹⁵ ᤁᤶᤓᤗ᤹ᤖᤡᤰ ᤒᤣᤌᤣᤗᤒᤠᤛᤣ. ᤂᤡᤏᤡ᤹ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤂᤧᤴ ᤐᤥᤱᤍᤠᤖᤥ॥ ᤂᤧᤸᤗᤧ ᤕᤠ᤺ᤴᤍᤡᤰ ᤂᤠᤀᤥ᤺ᤳᤋᤡᤸᤗᤧ. ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤘᤖᤧᤱᤗᤧᤱ ᤂᤠᤵᤐᤢᤌᤩ᤺ᤱ ᤔᤧᤔᤧᤰᤂᤢᤖᤥ॥”