ᤜᤡᤒᤪᤢ 8 - LIFOTNT

ᤂᤪᤡᤛ᤻ᤋᤧᤴ ᤀᤠᤏᤡ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤖᤥ

¹ ᤀᤠᤏᤡᤃᤣ ᤐᤠ᤺ᤳᤋᤢᤶᤒᤧᤒᤠ ᤐᤠ᤺ᤴᤏᤡᤴ ᤒᤠ ᤁᤴᤗᤥ—ᤀᤠᤏᤡ᤹ᤏᤢ ᤀᤰᤋᤱᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤘᤠ᤹ ᤜᤧᤰᤁᤩᤠᤱ ᤂᤢᤏᤧ᤹ᤃ ᤛᤠᤱᤃᤪᤠᤶᤐᤣᤍᤠᤱᤅᤥ ᤔᤡᤔᤡᤍᤡᤱᤃᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤠᤱᤕᤢᤰᤏᤠ᤺ᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤗᤥ॥

² ᤂᤢᤏᤧ᤹ᤃ ᤛᤣᤛᤣᤍᤧᤴᤏᤥ ᤔᤠᤱᤛᤧᤘᤠ ᤆᤥᤃᤢ᤹ᤖᤥ. ᤂᤧᤴ ᤛᤣᤛᤣᤍᤧᤴᤏᤡᤱᤃ ᤔᤧᤴᤇᤠᤶ ᤕᤠᤵᤔᤡᤖᤧ ᤔᤧᤈᤥᤃᤢᤒᤠ ᤔᤣ᤺ᤴ. ᤁᤖ ᤕᤜᤘᤣ ᤍᤠᤱᤒᤠᤸᤗᤧ ᤀᤠᤒᤠᤅᤣ ᤆᤥᤃᤢᤒᤠ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤗᤥ॥

³ ᤁᤧᤖᤧᤰ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤃ ᤆᤥᤓᤠ᤹ ᤏᤢ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤑᤠ᤹ᤀᤠᤱ ᤛᤣ᤺ᤰᤕᤢᤰ ᤔᤧᤒᤥ᤺ᤰᤂᤧᤒᤠᤖᤥ. ᤜᤧᤰᤁᤣ᤺ᤸᤗᤧ ᤁᤴ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤀᤠᤱ ᤋᤥ᤺ᤶᤔᤠ ᤑᤠ᤹ᤀᤠᤱ ᤌᤣᤀᤡᤃ ᤁᤵᤔᤠᤀᤣ ᤐᤥᤱᤗᤥ॥

⁴ ᤂᤢᤏᤧ᤹ ᤂᤠᤶᤒᤣ᤺ᤰᤔᤥᤀᤣ ᤘᤕᤧᤸᤗᤧᤃ ᤏᤡᤱᤘᤠ᤹ᤑᤢᤛᤠᤶᤒᤠ ᤔᤧᤒᤥ᤺ᤰᤂᤧᤴᤒᤠᤖᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤆᤥᤓᤠ᤹ ᤁᤧᤍᤥᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤃ ᤋᤃᤡᤏᤢᤛᤠ ᤔᤧᤘᤠ᤹ᤖᤥ॥

⁵ ᤂᤧᤱᤜᤠ᤹ᤖᤧ ᤔᤠᤱᤛᤧᤘᤠ ᤔᤧᤈᤥᤃᤢᤒᤠ ᤛᤣᤛᤣᤍᤧᤴᤏᤡᤱᤃ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤛᤧᤰᤂᤠᤛᤔᤠ ᤛᤣᤛᤣᤍᤧᤴᤏᤡᤸᤗᤧ ᤁᤢᤒᤡᤀᤡᤳᤇᤠᤵᤗᤰᤗᤥ॥ ᤌᤣᤀᤠᤱᤓᤧᤸᤗᤧ ᤔᤥᤛᤠ᤺ᤸᤗᤧ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶ ᤆᤥ᤺ᤰᤔᤠ ᤀᤡ᤺ᤳᤋᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣᤗ᤹ᤖᤡᤰ ᤛᤠᤶᤍᤡᤱ ᤐᤡᤖᤢ. “ᤂᤧᤏᤧ᤹ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤡᤴ ᤁᤧᤈᤥᤃᤢᤸᤗᤧ ᤁᤥ᤺ᤰᤔᤠ ᤛᤶᤍᤠᤱ ᤁᤧᤏᤡᤛᤢᤒᤠ ᤜᤧᤰᤁᤣ ᤕᤥᤎᤥ ᤔᤧᤶᤒᤥᤱᤅᤣ ᤆᤥᤃᤧ᤹ᤀᤥ॥”

⁶ ᤁᤖ ᤕᤧᤛᤢᤖᤧ ᤂᤥᤛᤢᤒᤠ ᤔᤠᤱᤛᤣᤘᤠ᤺ᤱᤃ ᤂᤧᤱᤜᤠ᤹ᤖᤧᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤆᤥᤰᤗᤥ. ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱ ᤏᤢ ᤔᤧᤴᤇᤠᤶ ᤕᤠᤵᤔᤡᤗᤢᤶᤔᤥ ᤂᤢᤏᤧ᤹ ᤐᤠ᤺ᤴᤍᤱ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤋᤃᤡᤛᤔᤠᤴᤏᤢ᤺ᤸᤗᤧᤀᤠᤱ ᤏᤢᤒᤠ ᤆᤥᤰ. ᤌᤣᤀᤠᤱᤓᤧᤸᤗᤧ ᤁᤴ ᤁᤢᤛᤱ ᤔᤠᤱᤜᤢᤵᤐᤡᤱᤃ ᤏᤢᤒ᤻ ᤏᤢᤒᤠ ᤔᤠᤱᤜᤧᤰᤜᤠ᤹ᤀᤥᤏᤧ ᤆᤥᤃᤧᤀᤠᤱ ᤘᤠ᤹ᤖᤥ॥

⁷ ᤌᤣᤀᤠᤱᤓᤧᤸᤗᤧ ᤋᤃᤡᤛᤔᤠ ᤔᤠᤱᤜᤢᤵᤐᤡᤴ ᤑᤥᤋᤩᤠ ᤔᤣ᤺ᤴᤏᤣᤒᤠ ᤘᤕᤧᤸᤗᤧᤃ ᤘᤣ᤹ᤛᤔᤠ ᤔᤠᤱᤜᤢᤵᤐᤡᤴ ᤆᤠᤜᤠᤒᤠ ᤔᤧᤈᤥᤃᤧᤴᤒᤠᤖᤥ॥

⁸ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ᤀᤥ ᤑᤥᤋᤩᤠ ᤂᤥᤛᤢᤀᤠᤱ ᤐᤠ᤺ᤳᤋᤢ. “ᤀᤥᤔᤧᤳᤋᤧᤶᤔᤧ᤹. ᤁᤧᤍᤠᤒᤠᤖ ᤁᤧᤒᤵᤐᤠ ᤕᤧᤶᤔᤥ. ᤀᤡᤱᤃᤠ᤹ ᤀᤡᤛᤪᤠᤀᤡᤗᤛᤔᤠ ᤔᤏᤠᤜᤠ᤹ ᤜᤧᤰᤁᤩᤠᤱ ᤕᤜᤢᤍᤠᤛᤔᤠ ᤔᤏᤠᤜᤠ᤹ᤏᤢ ᤁᤢᤛᤱ ᤔᤠᤱᤜᤢᤵ ᤆᤥᤃᤢᤱ ᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹ᤖᤥ॥

⁹ ᤁᤴ ᤁᤢᤛᤱ ᤔᤠᤱᤜᤢᤵᤐᤡᤱᤃ ᤔᤡᤛᤪᤗᤠᤶ ᤀᤠᤜᤢᤰᤁᤡᤸᤗᤧ ᤋᤧᤶᤛᤢᤱᤛᤡᤱᤅᤠᤱ ᤗᤠᤶᤗᤥᤛᤢᤱ ᤗ᤺ᤳᤋᤢᤱᤛᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤏᤢ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤁᤢᤀᤡᤛᤡᤰ ᤔᤧᤒᤥᤱᤏᤧᤸᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤀᤡᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵᤐᤥ ᤏᤛᤠ᤺ᤴᤛᤠᤒᤠ ᤔᤧᤶᤒᤥ᤺ᤰᤂᤧᤴ ᤜᤧᤰᤁᤩᤠᤱ ᤁᤶᤒᤪᤠᤱ ᤔᤧᤵᤔᤠ ᤗᤧᤖᤢᤱᤛᤡᤱᤗᤥ ᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹ᤖᤥ॥

¹⁰ ᤂᤧᤴ ᤕᤧᤶ ᤀᤣᤃᤠᤱ ᤀᤡᤛᤪᤠᤀᤡᤗᤡ ᤔᤏᤠᤜᤠ᤹ᤏᤢ ᤁᤴ ᤔᤠᤱᤜᤢᤵᤐᤡᤴ ᤆᤥᤃᤢᤱ. ᤂᤢᤏᤡ᤹ ᤏᤡᤱᤘᤠ᤹ᤒᤥ ᤀᤠᤎᤡᤶᤜᤠ᤹ ᤁᤣ᤺ᤳᤋᤢᤱ ᤐᤡᤖᤢᤱᤛᤡᤱᤅᤠᤱ ᤂᤢᤏᤡ᤹ ᤛᤡᤰᤗᤢᤱᤔᤥ ᤛᤠᤵᤋᤢᤱ ᤐᤡᤖᤢᤱᤛᤡᤱ. ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤔᤏᤠ ᤔᤧᤒᤥᤱᤗᤥ ᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹ᤖᤥ॥

¹¹ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤁᤢᤗᤠᤈᤣ᤹ᤒᤠ ᤔᤏᤠᤴ ᤜᤢ᤹ᤔᤠ ᤆᤠᤜᤠᤒᤠ ᤔᤧᤈᤥᤰᤏᤧᤴᤗᤥ ᤜᤧᤰᤁᤩᤠᤱ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤁᤢᤶᤓᤢ᤹ ᤁᤢᤴᤛᤠ᤹ᤛᤡ ᤍᤠᤱᤒᤠᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ ᤗ᤹ᤖᤡᤰ ᤔᤧᤵᤔᤠᤛᤡ ᤔᤧᤒᤥᤱᤏᤧᤸᤗᤥ. ᤌᤣᤀᤠᤱᤓᤧᤸᤗᤧ ᤕᤶᤒᤠ ᤆᤢᤰᤐᤠ ᤁᤧᤖᤧᤰᤗᤧ ᤀᤡᤱᤃᤠ᤹ ᤁᤢᤛᤡᤱ ᤔᤧᤏᤡ᤺ᤳᤋᤠᤖᤥ॥

¹² ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤴ ᤗᤧᤵᤔᤡ ᤐᤡᤖᤢᤱᤛᤡᤱ ᤜᤧᤰᤁᤩᤠᤱ ᤂᤢᤏᤡ᤹ ᤗᤠᤕᤥᤴ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤱᤅᤡᤴᤗᤥ॥”

¹³ ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤁᤢᤛᤱ ᤔᤠᤱᤜᤢᤵ ᤐᤠ᤺ᤳᤋᤢᤸᤗᤧ ᤋᤃᤡᤛᤔᤠᤴ ᤕᤢᤰ ᤔᤣ᤺ᤴᤏᤣᤒᤠ ᤆᤥᤃᤢᤒᤠ ᤐᤥᤱᤗᤥ॥ ᤜᤧᤰᤁᤩᤠᤱ ᤕᤢᤰ ᤔᤣ᤺ᤴᤏᤣᤒᤠ ᤏᤢ ᤀᤥᤃᤵ ᤔᤧᤶᤒᤥᤱᤔᤏᤠ ᤀᤠᤳᤋᤡᤴ ᤐᤠ᤺ᤴᤏᤡᤴᤇᤠᤱ ᤜᤠᤖᤠᤀᤣ ᤔᤠᤒᤣ᤺ᤰᤗᤥ॥