ᤜᤡᤒᤪᤢ 6 - LIFOTNT

ᤁᤢᤛᤠᤱ ᤗᤔᤠ ᤗᤧᤵᤔᤠᤱ ᤐᤥᤔᤠ

^1-2 ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡ᤹ᤃ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥᤒᤠ ᤁᤢᤜᤣ᤺ᤰᤛᤡᤱᤔᤠ ᤏᤡᤛᤠᤶᤜᤠ᤹ ᤗᤧᤖᤢᤶᤔᤠᤱ ᤁᤢᤛᤠᤱ ᤗᤔᤠ ᤗᤧᤵᤔᤠᤱ ᤋᤃᤡ ᤐᤥᤖᤡᤖᤥ॥ ᤀᤠᤏᤡ᤹ᤃ ᤛᤡᤔᤧᤴᤏᤥ ᤁᤧᤍᤣ᤹ᤒᤠ ᤗᤠᤕᤥᤒᤠ ᤐᤠ᤺ᤴᤜᤠ᤹ᤗᤠᤶ ᤜᤡᤶᤔᤠ ᤐᤠ᤺ᤴᤜᤠ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤆᤥ᤺ᤰᤔᤠ ᤐᤥᤱ ᤁᤧᤗ᤹ᤒᤠ ᤐᤠ᤺ᤴᤜᤠ᤹. ᤜᤧᤰᤁᤩᤠᤱ ᤒᤵᤋᤡᤛ᤻ᤔᤠᤜᤠ᤹ᤖᤧ ᤁᤢᤕᤠ᤺ᤶᤒᤣᤒᤠ ᤏᤡᤛᤠᤶᤜᤠ᤹. ᤜᤢᤰ ᤏᤧᤔᤠ ᤐᤠ᤺ᤴᤜᤠ᤹. ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠ ᤐᤠ᤺ᤴᤜᤠ᤹ ᤜᤧᤰᤁᤩᤠᤱ ᤔᤧᤴᤏᤢᤵᤔᤏᤠᤒᤠ ᤂᤢᤶᤍᤡᤱ ᤜᤧᤰᤋᤱᤒᤠ ᤁᤢᤜᤣ᤺ᤰᤛᤡᤱᤔᤠ ᤏᤡᤛᤠᤶᤜᤠ᤹ ᤕᤠᤶᤔᤥ ᤐᤠ᤺ᤳᤋᤢᤶ ᤔᤣ᤺ᤴᤗᤥ॥

³ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤆᤥᤃᤢᤏᤧ ᤑᤠ᤹ᤃᤪ ᤜᤧᤰᤁᤣᤗ᤹ᤖᤡᤰᤁᤣ ᤁᤢᤛᤠᤱ ᤗᤔᤠ ᤗᤧᤵᤔᤠᤱ ᤋᤃᤡ ᤀᤠᤒᤥᤖᤥ॥

^4-6 ᤁᤖ ᤋᤃᤡᤛᤠ ᤛᤧᤰᤂᤠᤒᤠ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ ᤁᤧᤏᤡᤒᤠᤜᤠ᤹. ᤛᤠᤱᤃᤪᤠᤶᤐᤣᤍᤠᤱᤅᤡᤸᤗᤧᤴ ᤐᤷᤎᤠ᤺ᤶ ᤁᤧᤛᤠ᤹ᤒᤠᤜᤠ᤹. ᤛᤣᤛᤣᤔᤠᤱ ᤗᤰᤁᤧᤄᤥᤒᤠ ᤔᤏᤠᤜᤠ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤸᤗᤧ ᤁᤢᤏᤥ-ᤁᤢᤍᤠ᤺ᤴ ᤏᤢ ᤋᤠᤕᤧᤶᤗᤧᤴ ᤔᤢᤰᤛᤠᤶ ᤁᤧᤛᤠ᤹ᤒᤠᤜᤠ᤹ᤖᤧ ᤏᤛᤠ᤺ᤴᤏᤡᤴ ᤔᤧᤗᤧᤖᤢ ᤔᤧᤍᤣᤛᤢ᤹ᤏᤧ ᤑᤠ᤹ᤃᤪ ᤂᤧᤱᤜᤠ᤹ ᤏᤢ᤺ᤰᤔᤠ ᤋᤠ᤺ᤵᤔᤠᤛᤡ ᤛᤢᤰᤔᤧᤴᤍᤧᤳᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤗᤠᤶᤒᤠ ᤏᤡᤱᤘᤠ᤹ᤑᤢᤛᤠᤴ ᤕᤠᤶᤔᤥ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤀᤠᤱ ᤔᤏᤠᤗᤢᤶᤔᤥ ᤁᤢᤈᤠ᤺ᤳᤌᤡ ᤔᤧᤍᤣᤛᤢᤒᤠ ᤜᤧᤰᤁᤣ ᤐᤥᤱᤗᤥ॥

⁷ ᤐᤠᤱᤃᤧᤴᤍᤡᤱ ᤘᤠᤜᤡᤳᤋᤡᤸᤗᤧ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤡᤴ ᤘᤠᤖᤰᤂᤢ᤹. ᤜᤧᤰᤁᤩᤠᤱ ᤀᤡᤰ ᤁᤧᤔᤒᤠᤴ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤐᤥᤃᤢᤃᤧᤴ ᤁᤢᤈᤠ ᤁᤧᤎᤥ᤺ᤰᤐᤠ ᤂᤧᤴ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤢ᤹ᤀᤡᤛᤠᤶ ᤌᤠ᤺ᤛᤢᤀᤠᤱ ᤕᤖᤡᤰ ᤁᤢᤈᤠ ᤌᤥ᤺ᤰᤗ ᤆᤥᤃᤢ᤹ᤖᤥ॥

⁸ ᤁᤖ ᤂᤧᤵᤔᤥ ᤋᤡᤱ ᤏᤢ ᤛᤡᤎᤪᤠ᤺ᤰᤐᤠᤖᤰ ᤗᤡᤱᤏᤧ ᤑᤠ᤹ᤃᤪ ᤂᤧᤴ ᤀᤡᤰᤋᤠᤵᤐᤡᤴ ᤀᤡᤏᤠᤶ ᤐᤥᤱᤅᤠᤱ ᤀᤡᤰ ᤁᤧᤔᤒᤠᤸᤗᤧ ᤛᤠᤱᤃᤪᤠ ᤔᤧᤳᤋᤢᤀᤠᤱ ᤑᤠ᤺ᤳᤋᤪᤠ ᤁᤣ᤺ᤳᤋᤢ᤹ᤖᤥ॥

⁹ ᤀᤠᤔᤡ᤺ᤶ ᤋᤣ᤺ᤱᤈᤢᤶᤛᤣ. ᤀᤠᤏᤡᤃᤣ ᤀᤰᤂᤣᤗ᤹ᤖᤡᤰ ᤐᤠᤖᤡᤃᤧᤛᤠᤱ ᤂᤡᤏᤡ᤹ ᤕᤠ᤺ᤶᤒᤣᤀᤥᤃ ᤛᤧᤴᤗᤵᤐᤡᤴ ᤁᤧᤃᤠᤵᤐᤠ ᤏᤢᤒᤠ ᤐᤠ᤺ᤴᤜᤠ᤹ ᤁᤧᤈᤥᤃᤢᤶ ᤁᤧᤗ᤹ᤒᤠ ᤛᤧᤰᤂᤠᤀᤣ ᤏᤡᤛᤢᤶᤒᤧᤖᤥ॥

¹⁰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤏᤢ᤺ᤖᤡᤰᤁᤠᤱ ᤂᤠᤛᤧᤴ ᤆᤥᤃᤢ᤹ᤖᤥ—ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤏᤠᤜᤠ᤹ ᤋᤃᤡ ᤁᤢᤓᤠ᤹ ᤁᤧᤒᤡᤖᤢᤶᤛᤡᤶᤔᤡᤸᤗᤧ ᤂᤢᤏᤧ᤹ ᤀᤥᤛᤣ᤺ᤴᤍᤠᤱ ᤁᤧᤈᤥᤃᤢᤶᤒᤠ ᤔᤡ᤺ᤶᤈᤡᤴ ᤂᤢᤏᤧ᤹ ᤏᤡᤱᤘᤠ᤹ ᤔᤧᤓᤢ᤺ᤳᤇᤢᤴᤗᤥ॥ ᤂᤧᤱᤃ ᤀᤠᤸᤗᤥ ᤌᤠᤖᤡᤰᤁᤠᤱ ᤁᤧᤈᤥᤃᤢᤶᤗ ᤁᤧᤘᤕᤡ᤹ᤖᤥ॥

¹¹ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰᤗᤧ ᤏᤡᤱᤛᤠᤱ ᤁᤧᤈᤥᤃᤢᤶᤒᤠ ᤐᤠ᤺ᤴᤜᤠ᤹ ᤛᤧᤰᤂᤠᤀᤣ ᤁᤧᤄᤥᤛᤢᤶᤗ ᤑᤠ᤹ᤀᤠᤱ ᤒᤠ ᤂᤧᤴ ᤕᤠᤶᤈᤠᤱᤘᤠᤴ ᤂᤡᤏᤡ᤹ ᤜᤡᤱᤜᤡᤱ ᤌᤠᤖᤡᤰ ᤁᤳᤋᤧᤶᤔᤧ᤹ ᤁᤧᤗ᤹ᤒᤠ ᤀᤠᤏᤡᤃᤣ ᤏᤡᤱᤘᤠ᤹ ᤆᤥᤃᤢᤶᤒᤧ᤹ᤖᤥ॥

¹² ᤜᤧᤰᤁᤩᤠᤱ ᤂᤡᤏᤡ᤹ ᤗᤧᤶᤛᤫᤠᤒᤠ ᤔᤏᤠᤜᤠ᤹ ᤁᤢᤀᤡᤛᤡᤰ ᤔᤣ᤺ᤴ. ᤁᤖ ᤏᤛᤠᤴ ᤏᤢ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤒᤠᤴ ᤗᤰ ᤁᤧᤄᤥᤒᤠᤜᤠ᤹ᤖᤧ ᤂᤢᤏᤡ᤹ ᤆᤥ᤺ᤱ ᤀᤡ᤺ᤳᤋᤧᤶᤔᤧ᤹ᤀᤥ ᤁᤧᤗ᤹ᤒᤠ ᤀᤠᤏᤡᤃᤣ ᤏᤡᤱᤘᤠ᤹ ᤘᤠ᤹ᤖᤥ॥

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤧᤰᤜᤠ᤹ ᤏᤡ᤺ᤴᤎᤥ ᤘᤠ᤹

¹³ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤶᤔᤡᤴᤏᤢ ᤔᤠᤱᤜᤧᤰ ᤆᤥᤃᤢᤸᤗᤧ ᤂᤢᤏᤧ᤹ ᤀᤠᤒᤠᤅᤣ ᤁᤢᤔᤡᤱᤅᤡᤴᤏᤢ᤺ᤸᤗᤧ ᤘᤣ᤹ ᤕᤶᤒᤠ ᤔᤡᤱ ᤜᤥ᤺ᤵᤋᤧᤒᤠᤸᤗᤧ ᤀᤠᤒᤠᤅᤣ ᤁᤢᤔᤡᤱᤅᤥ ᤀᤰᤂᤣᤗ᤹ᤖᤡᤰ ᤔᤠᤱᤜᤧᤰᤛᤡᤱᤗᤥ.

¹⁴ “ᤛᤧᤰᤂᤠᤀᤣ ᤀᤡᤱᤃᤠ᤹ ᤕᤖᤡᤰ ᤔᤢ᤹ᤀᤡᤛᤠᤶ ᤐᤡᤏᤧᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤕᤖᤡᤰ ᤑᤥᤛᤢᤱᤛᤡᤱᤗᤥ॥”

¹⁵ ᤜᤧᤰᤁᤣᤗ᤹ᤖᤡᤰ ᤀᤒᤪᤠᤜᤠᤔᤖᤧ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤗ ᤜᤠᤱᤄᤢᤀᤠᤱ ᤔᤠᤱᤜᤧᤰᤁᤥ ᤁᤧᤘᤠ᤹ᤒᤠ ᤐᤠ᤺ᤴᤜᤠ᤹ ᤂᤥᤛᤢᤖᤥ॥

¹⁶ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧᤃ ᤀᤠᤒᤠᤅᤣᤏᤢ᤺ᤸᤗᤧ ᤕᤶᤒᤠ ᤔᤡᤱᤅᤥ ᤔᤠᤱᤔᤧᤜᤧᤰᤛᤡᤱ ᤜᤧᤰᤁᤩᤠᤱ ᤂᤧᤴ ᤔᤠᤱᤜᤧᤰᤁᤡᤸᤗᤧ ᤁᤠᤰ ᤐᤠ᤺ᤴᤎᤱ ᤔᤧᤏᤢᤵᤛᤢ᤹ᤖᤥ॥

¹⁷ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤧᤰᤁᤡᤴ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤰᤂᤢᤴ ᤁᤧᤗ᤹ᤒᤠᤴ ᤁᤢᤔᤠᤱᤜᤧᤰ ᤁᤧᤄᤥᤒᤠᤜᤠ᤹ ᤀᤥᤛᤣ᤺ᤴᤎᤠᤰᤔᤠᤛᤡ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤢᤒᤠᤸᤗᤧ ᤂᤢᤏᤧ᤹ ᤔᤠᤱᤜᤧᤰᤛᤡᤱᤗᤥ॥

¹⁸ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤀᤠᤱ ᤔᤠᤱᤜᤧᤰᤛᤡᤱᤗᤥ॥ ᤁᤴ ᤏᤧᤳᤇᤡ ᤐᤠ᤺ᤴᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤱᤏᤧᤴ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤗᤧᤰ ᤐᤠ᤺ᤵᤔᤠᤀᤣ ᤔᤧᤛᤢᤰᤋᤢᤴ॥ ᤀᤠᤏᤡ᤹ ᤂᤢᤏᤧ᤹ ᤁᤢᤃᤶᤒᤪᤠᤱᤅᤥ ᤋᤠᤱᤛᤧ᤺ᤵᤛᤡᤱᤛᤧ ᤁᤧᤒᤣ᤺ᤰᤐᤠᤜᤠ᤹ᤖᤧ ᤀᤠᤄᤥᤛᤢᤶ ᤁᤧᤗ᤹ᤒᤠ ᤏᤡᤱᤛᤠᤱᤅᤡᤴ ᤀᤠᤸᤗᤧᤖᤢᤶᤔᤡᤴᤏᤡᤸᤗᤧ ᤜᤠᤱᤜᤠᤱ ᤀᤠᤗ᤹ᤖᤥ॥

¹⁹ ᤁᤴ ᤏᤡᤱᤛᤠᤱᤅᤡᤸᤗᤧ ᤀᤠᤏᤡ᤹ ᤜᤡᤱᤔᤴᤏᤡᤴ ᤌᤎᤵ ᤔᤧᤸᤗ᤹ᤔᤏᤠᤒᤠ ᤆᤥᤃᤢ᤹ᤖᤥ॥ ᤁᤴ ᤏᤡᤱᤛᤠᤱ ᤀᤠᤈᤥᤃᤢᤶᤒᤠ ᤕᤧᤛᤢᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤑᤥ᤺ᤴᤍᤠ ᤛᤡᤃᤠᤱᤒᤠ ᤛᤣᤛᤣᤒᤠᤍᤧᤴᤏᤥ ᤗᤠ᤺ᤳᤗᤥ॥

²⁰ ᤂᤧᤵᤔᤥᤃ ᤕᤧᤛᤢᤴ ᤀᤠᤏᤡ᤹ ᤗᤠᤃᤡ ᤋᤃᤡᤛᤠ ᤐᤣᤀᤠᤱ ᤘᤠ᤹ᤖᤥ॥ ᤂᤢᤏᤧ᤹ᤃ ᤔᤸᤁᤡᤛᤧᤍᤧᤁ ᤁᤢᤀᤡᤛᤡ᤺ᤰᤐᤠ ᤛᤍᤠᤍᤡᤱ ᤁᤧᤘᤠ᤹ᤒᤠ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥