ᤜᤠᤃ᤻ᤃᤤ 2 - LIFOTNT

ᤁᤢᤛᤱ ᤔᤠᤱᤜᤡᤶᤔᤡᤸᤗᤧ ᤁᤢᤜᤠᤱᤘᤠ ᤁᤢᤔᤠᤱᤘᤠ

¹ ᤏᤢᤛᤡᤃᤣᤰᤐᤠ ᤗᤠ ᤁᤧᤖᤧᤒᤠ ᤏᤡᤒᤥᤱᤅᤠᤱ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤠᤃ᤻ᤃᤤᤀᤥ ᤁᤧᤖᤧᤖᤥ—

² “ᤛᤠᤗᤋᤡᤀᤣᤗᤖᤧ ᤁᤢᤛ᤻ᤛᤠ ᤕᤜᤢᤍᤠᤒᤠ ᤜᤠᤱᤕᤢᤰᤐᤠ ᤕᤖᤢᤒᤠᤒᤣᤗᤧᤴ ᤏᤢ ᤕᤜᤥᤛᤠᤍᤠᤁᤖᤧ ᤁᤢᤛ᤻ᤛᤠ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤛᤢᤴ ᤜᤧᤰᤁᤩᤠᤱ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ ᤂᤧᤏᤧ᤹ ᤀᤰᤂᤣ ᤔᤧᤳᤋᤧᤛᤧ᤹॥

³ ᤂᤧᤱᤜᤠ᤹ ᤛᤣ᤺ᤴᤍᤥᤛᤧᤛᤧ᤹. ‘ᤂᤧᤴ ᤜᤡᤶᤔᤧᤸᤗᤧᤴ ᤋᤃᤡᤒᤠ ᤔᤡᤔᤡᤍᤡᤱᤅᤡᤴ ᤁᤧᤏᤡᤒᤠᤀᤠᤱ ᤁᤧᤘᤠ᤹ᤒᤠ ᤁᤢᤓᤠ ᤂᤡᤏᤡ᤹ ᤗᤢᤶᤔᤥᤗᤠᤶ ᤀᤠᤸᤗ ᤁᤧᤕᤠ᤺ᤰᤋᤡᤀᤠᤱ ᤁᤧᤘᤕᤡᤒᤡ᥅ ᤂᤡᤏᤡ᤹ ᤀᤠᤸᤗᤥ ᤁᤴ ᤀᤠᤰᤋᤱᤒᤠ ᤁᤧᤏᤡᤛᤢᤶᤒᤣ᥅ ᤌᤣ ᤂᤡᤏᤡ᤹ ᤔᤡᤰᤛᤠᤀᤥ ᤁᤱᤃ ᤌᤧᤔᤠᤀᤠᤱ ᤔᤣ᤺ᤴ ᤜᤧᤰᤁᤣ ᤗ᤹ᤒᤡ᥅’

⁴ ᤁᤖ ᤀᤠᤸᤗ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ‘ᤕᤖᤢᤒᤠᤒᤣᤗᤀᤣ. ᤀᤠ᤺ᤴᤇᤡᤱᤅᤧ᤹. ᤜᤧᤰᤁᤩᤠᤱ ᤕᤜᤥᤛᤠᤍᤠᤁᤖᤧ ᤁᤢᤛ᤻ᤛᤠ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤛᤢᤀᤣ. ᤜᤠᤱᤜᤠᤱ ᤔᤧᤳᤇᤡᤱᤅᤧ᤹॥ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤔᤏᤠᤛᤣ. ᤜᤠᤱᤜᤠᤱ ᤗ᤹ᤖᤧᤶᤔᤧ᤹. ᤕᤠ᤺ᤶᤒᤰ ᤆᤥ᤺ᤰᤔᤠ ᤜᤣ᤺ᤰᤋᤧᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠ’ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

⁵ ‘ᤔᤡᤛᤪ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤁᤧᤗ᤺ᤴᤍᤡ ᤁᤧᤎᤠᤱᤅᤡᤸᤗᤧ ᤀᤠᤱᤃᤠ᤹ ᤂᤡᤏᤡ᤹ᤏᤢ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤜᤠᤒᤠ ᤁᤴᤗᤥ. ᤀᤠᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤂᤡᤏᤡ᤹ᤏᤢ ᤛᤥᤖᤡᤰ ᤘᤠ᤹ᤖᤥ॥ ᤂᤡᤏᤡ᤹ ᤔᤧᤃᤡᤛᤧᤶᤔᤡᤴᤏᤧ᤹ᤀᤥ॥’

⁶ “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤀᤠᤸᤗ ᤛᤵᤔᤠ ᤀᤣᤃᤠᤱᤅᤠᤱ ᤀᤠᤱᤃᤠ᤹ ᤋᤠᤱᤛᤠᤱᤒᤠᤴ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ. ᤘᤖ᤺ᤱᤅᤡᤴ ᤏᤢ ᤁᤢᤛᤧᤱᤃᤪᤠ ᤂᤠᤶᤔᤡᤴ ᤕᤰᤂᤢᤱ᤹॥

⁷ ᤀᤠᤱᤃᤠ᤹ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤕᤰᤂᤢᤱᤛᤡᤱ᤹. ᤜᤧᤰᤁᤩᤠᤱ ᤏᤡᤱᤘᤠ᤹ ᤔᤧᤈᤥᤃᤢᤒᤠ ᤐᤠ᤺ᤴᤜᤠ᤹ ᤏᤢ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤒᤠ ᤔᤏᤠᤜᤠ᤹ ᤔᤧᤍᤠᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤴ ᤜᤡᤶᤔᤡᤴ ᤔᤡᤔᤡᤍᤡᤱᤅᤡᤸᤗᤧ ᤛᤎᤧᤰ ᤌᤡᤶᤛᤢᤱ᤹’ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

⁸ ‘ᤕᤢᤵᤐᤠᤴ ᤀᤠᤱᤃᤠ᤹ᤀᤡᤴᤏᤣᤖᤥ. ᤜᤧᤰᤁᤩᤠᤱ ᤛᤠᤶᤔᤩᤠᤱᤅᤡᤴᤏᤠᤱ ᤀᤠᤱᤃᤠ᤹ᤀᤡᤴᤏᤣᤖᤥ.’ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

⁹ ‘ᤁᤴ ᤜᤡᤶᤔᤡᤸᤗᤧᤴ ᤀᤣᤃᤠᤱᤒᤠ ᤔᤡᤔᤡᤍᤡᤱᤅᤡᤴ ᤋᤃᤡᤒᤠᤴᤏᤢ᤺ᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤐᤥᤱ᤹.’ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ ‘ᤜᤧᤰᤁᤩᤠᤱ ᤁᤴ ᤋᤧᤴᤏᤥ ᤀᤠᤱᤃᤠ᤹ ᤏᤢ᤹ᤔᤠᤍᤠᤔᤠ ᤛᤏᤠᤖᤢᤱ ᤐᤥᤱᤗ ᤆᤥᤃᤢᤱ᤹.’ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ॥”

ᤀᤠᤛᤢᤳᤌᤥ ᤁᤧᤒᤥᤱᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤔᤢ᤹ᤀᤡᤛᤠᤶ

¹⁰ ᤍᤠᤖᤠ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤡᤛᤡᤃᤣᤰᤐᤠ ᤋᤱᤒᤣ. ᤑᤠᤱᤛᤡᤃᤣᤰᤐᤠ ᤗᤠ ᤁᤧᤖᤧᤒᤠ ᤏᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤠᤃ᤻ᤃᤤᤀᤥ ᤁᤧᤖᤧᤖᤥ—

¹¹ “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤸᤗᤧ ᤌᤣ ᤐᤠ᤺ᤳᤋᤢ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤣ᤺ᤴᤍᤥᤛᤧᤛᤧ᤹॥

¹² ᤁᤢᤓᤠ ᤗᤳᤇᤠ ᤔᤏᤠᤖᤧ ᤋᤥ᤺ᤶᤔᤏᤠᤒᤠ ᤛᤠᤴ ᤁᤢᤈᤠᤱᤅᤥ ᤀᤡᤓᤢᤳᤋᤢᤀᤠᤱ ᤁᤳᤋᤢ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤠ᤺ᤸᤗᤧ ᤁᤢᤓᤠ ᤂᤖᤧ᤺ᤱ. ᤛᤠᤔᤧᤰᤘᤠ. ᤆᤧᤸᤗᤧᤰᤛᤣ᤹ ᤌᤡ. ᤏᤡ᤺ᤱᤃᤣ᤹ ᤀᤡᤃᤪ ᤘᤣ᤹ ᤁᤢᤓᤠ ᤁᤢᤈᤠᤜᤠ᤹ ᤛᤢᤛᤢᤏᤧᤓᤃᤪ ᤌᤣ ᤂᤧᤴ ᤛᤣᤛᤣ ᤐᤥᤱᤒᤡ᥅’” ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤏᤢᤃᤵ ᤔᤧᤒᤡᤖᤢᤀᤠᤱ ᤔᤧᤔᤧᤳᤋᤢ. “ᤔᤧᤒᤥᤱᤏᤧᤴᤗᤥ॥”

¹³ ᤂᤧᤒᤩᤠᤱ ᤜᤠᤃ᤻ᤃᤤ᤺ᤸᤗᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤆᤣ ᤁᤧᤛᤢᤒᤠᤀᤠᤱ ᤀᤠᤛᤢᤳᤌᤥ ᤁᤧᤒᤥᤱᤒᤠ ᤔᤏᤠ᤺ᤸᤗᤧ ᤀᤰᤋᤱᤒᤠ ᤁᤢᤓᤠ ᤁᤢᤈᤠᤜᤠ᤹ ᤛᤢᤛᤢᤏᤧᤓᤃᤪ ᤌᤣ ᤂᤧᤴ ᤀᤠᤛᤢᤳᤌᤥ ᤐᤥᤱᤒᤡ᥅” ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤏᤢᤃᤵ ᤔᤧᤒᤡᤖᤢᤀᤠᤱ ᤔᤧᤔᤧᤳᤋᤢ. “ᤂᤧᤱᤃ ᤀᤠᤛᤢᤳᤌᤥ ᤐᤥᤱᤗᤥ॥”

¹⁴ ᤂᤧᤒᤩᤠᤱ ᤜᤠᤃ᤻ᤃᤤ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “‘ᤀᤠᤱᤃᤠ᤹ ᤀᤠᤏᤡᤔᤥ ᤁᤴ ᤔᤧᤴᤇᤠᤶ ᤛᤢᤘᤠᤱᤒᤠ ᤔᤏᤠᤜᤠ᤹ᤀᤠᤱ ᤀᤠᤛᤢᤳᤌᤥᤀᤣ ᤔᤧᤈᤥᤰᤗᤥ.’ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ ‘ᤁᤴᤜᤠ᤹ᤖᤧ ᤌᤧᤔᤠ ᤔᤧᤈᤥᤃᤢ᤹ ᤜᤧᤰᤁᤩᤠᤱ ᤌᤧᤔᤠ ᤔᤧᤍᤥᤴᤍᤢ᤹. ᤂᤧᤴ ᤀᤠᤛᤢᤳᤌᤥ ᤐᤥᤱ᤹॥

¹⁵ ᤏᤡᤱᤘᤠ᤹ ᤜᤧᤳᤋᤠᤛᤡᤶᤔᤧ᤹. ᤀᤠᤀᤡᤴᤏᤠᤱᤎᤥ ᤁᤴ ᤐᤠ᤺ᤴᤏᤡᤴ ᤏᤢᤖᤡᤰᤁᤠᤱ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤁᤧᤈᤥᤃᤢᤶᤔᤡᤸᤗᤧ ᤗᤢᤱᤅᤡᤸᤗᤧ ᤁᤢᤛᤶᤎᤠᤱ ᤗᤢᤱ ᤏᤧᤔᤠᤏᤢ᤺ᤸᤗᤧ ᤋᤃᤡ ᤀᤠᤰᤋᤱᤒᤠ ᤕᤧᤶ ᤘᤕᤧ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹॥

¹⁶ ᤂᤧᤴ ᤕᤧᤴᤏᤥ ᤏᤡᤒᤥᤱ ᤐᤰᤘᤠ ᤁᤢᤈᤠ ᤗᤠᤛᤧ ᤁᤧᤍᤠᤒᤧᤸᤗᤧ ᤌᤡᤒᤥᤱ ᤐᤰᤘᤠᤖᤰ ᤂᤥᤛᤢᤀᤠᤱ ᤘᤕᤧ॥ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤗᤠᤶ ᤅᤠᤒᤥᤱ ᤁᤢ᤺ᤴᤍᤠ ᤆᤧᤸᤗᤧᤰᤛᤣ᤹ ᤌᤡ ᤗ᤺ᤳᤇᤧ ᤁᤧᤍᤠᤒᤧᤸᤗᤧ ᤏᤡᤒᤥᤱ ᤁᤢ᤺ᤴᤍᤠᤖᤰ ᤂᤥᤛᤢᤀᤠᤱ ᤘᤕᤧ॥

¹⁷ ᤀᤠᤱᤃᤠ᤹ ᤂᤡᤏᤡ᤹ ᤜᤢᤰᤁᤡᤸᤗᤧ ᤁᤧᤈᤥᤃᤢᤶᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤔᤧᤴᤏᤢ᤹ᤔᤏᤠᤒᤠ ᤁᤧᤈᤥ᤺ᤰᤐᤠ. ᤛᤢᤰᤏᤠ᤺ᤶᤒᤠ ᤁᤧᤎ᤹ᤒᤠ ᤏᤢ ᤑ᤺ᤴᤏᤡᤸᤗᤧ ᤜᤡᤵᤋᤢᤖ ᤕᤠ᤺ᤴᤍᤢᤱ. ᤜᤧᤰᤁᤣᤛᤠᤱ ᤂᤡᤏᤡ᤹ ᤀᤠᤱᤃᤠ᤹ ᤗᤧᤵᤔᤠᤱ ᤁᤧᤴᤏᤢ᤺ᤰᤂᤡᤴ’ ᤑᤠᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

¹⁸ “ᤀᤠᤀᤡᤴᤒᤠ ᤕᤧᤴᤏᤠᤱᤎᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤸᤗᤧ ᤁᤢᤒᤢᤱ ᤔᤧᤕᤢᤰᤂᤢᤀᤠᤱ ᤘᤕᤧᤒᤠ ᤕᤧᤴ. ᤑᤠᤱᤛᤡᤃᤣᤰᤐᤠ ᤗᤠᤀᤥᤒᤠ ᤏᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤕᤧᤴᤏᤡᤴ ᤏᤢᤖᤡᤰᤁᤠᤱ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹॥

¹⁹ ᤌᤣ ᤆᤠᤎᤠ᤺ᤱᤅᤥ ᤁᤢᤗᤡ᤺ᤶᤒᤠ ᤀᤠᤸᤗᤛᤠᤱ ᤕᤠ᤺ᤰᤋᤧᤀᤠᤱ ᤕᤠᤰᤐᤡ᥅ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤀᤡᤘᤠ᤺ᤳ. ᤐ᤺ᤳᤇᤣᤸᤗᤧ ᤁᤢᤒᤢᤱ. ᤑᤢ᤹ᤗᤧᤛᤣ᤹ ᤏᤢ ᤆᤤᤋᤢᤏᤧᤸᤗᤧ ᤁᤢᤒᤢᤱᤜᤠ᤹ ᤀᤠᤸᤗᤛᤠᤱ ᤁᤢᤈᤠ᤹ ᤔᤧᤴᤎᤥ᤺ᤰᤁᤣ ᤕᤢᤱ॥ ᤁᤖ ᤀᤠᤀᤡᤴᤒᤠ ᤕᤧᤴᤏᤠᤱᤎᤥ ᤀᤠᤱᤃᤠ᤹ ᤂᤡᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤏᤡᤱᤗᤥ॥”

ᤕᤖᤢᤒᤠᤒᤣᤗᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ

²⁰ ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤑᤠᤱᤛᤡᤃᤣᤰᤐᤠ ᤗᤠ ᤏᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤕᤧᤴᤏᤥ ᤏᤡᤛᤡᤃᤣᤰᤐᤠᤗᤧᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤜᤠᤃ᤻ᤃᤤᤀᤥ ᤁᤧᤖᤧᤖᤥ—

²¹ “‘ᤀᤠᤱᤃᤠ᤹ ᤋᤖ᤺ᤱᤃᤧᤴ ᤋᤠᤱᤛᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤕᤰᤂᤢᤱ ᤑᤠ᤹ᤀᤠᤱ ᤕᤜᤢᤍᤠᤒᤠ ᤜᤠᤱᤕᤢᤰᤐᤠ ᤕᤖᤢᤒᤠᤒᤣᤗᤧᤴ ᤔᤧᤳᤋᤧ᤹॥

²² ᤀᤠᤱᤃᤠ᤹ ᤜᤠᤱᤕᤢᤰᤏᤠᤴ ᤆᤡᤸᤗᤧᤰ ᤗᤧᤰᤂᤢᤱ᤹ ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ ᤜᤠᤱᤈᤢᤶᤜᤠ᤹ᤀᤥᤒᤠ ᤔᤢᤰᤛᤠᤶᤔᤡᤴ ᤔᤧᤰᤂᤢᤱ॥ ᤀᤠᤱᤃᤠ᤹ ᤀᤴᤗᤠᤎᤠᤜᤠ᤹ ᤏᤢ ᤂᤧᤵᤔᤥ ᤗᤠᤱᤃᤧᤄᤣ᤺ᤰᤐᤠᤜᤠ᤹ ᤂᤳᤋᤪᤧᤰ ᤗᤧᤰᤂᤢᤱᤛᤡᤱ᤹॥ ᤀᤴᤜᤠ᤹ ᤏᤢ ᤀᤴᤃᤧᤗᤥᤱᤒᤠᤜᤠ᤹ ᤋᤠᤓᤣ᤺ᤸᤗᤧ ᤀᤠᤒᤠᤅᤣ ᤔᤧᤈᤩᤧᤵᤛᤡᤱ ᤔᤧᤛᤧᤳᤇᤡᤱ᤹॥’

²³ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ‘ᤂᤧᤸᤗᤧ ᤕᤠ᤺ᤴᤍᤡᤰ. ᤛᤠᤗᤋᤡᤀᤣᤗᤖᤧ ᤁᤢᤛ᤻ᤛᤠ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤕᤖᤢᤒᤠᤒᤣᤗᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤀᤣ᤺ᤵᤛᤠᤵ ᤕᤢᤰᤔᤏᤠᤒᤠ ᤛᤫᤠᤃᤣᤵ ᤜᤧᤰᤋᤱᤒᤠ ᤆᤥ᤺ᤰᤏᤧᤖᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤛᤣ᤺ᤰᤏᤧᤀᤠᤱ ᤘᤠ᤹ᤖᤥ॥’ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ॥”