ᤜᤒᤁᤢᤁ 3 - LIFOTNT

ᤜᤒᤁᤢᤁᤖᤧ ᤁᤢᤒᤣᤗᤡ

¹ ᤛᤡᤃ᤻ᤃᤡᤀᤥᤏᤥᤌ ᤀᤡᤰᤗᤠᤗᤠᤶ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤒᤁᤢᤁᤖᤧ ᤑᤠᤰᤋᤢᤒᤠ ᤐᤣᤗᤡ॥

² ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤔᤡᤱᤛᤥ ᤁᤧᤎᤠᤱᤛᤥᤴ ᤀᤠᤱᤃᤠ᤹ ᤂᤧᤵᤛᤢᤱᤅᤠᤱ ᤘᤠ᤹ᤀᤠᤖᤥ. ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤕᤠ᤺ᤶᤒᤰᤜᤠ᤹ ᤂᤧᤵᤛᤢᤱᤗᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤏᤡᤱᤘᤠ᤹ ᤔᤠᤖᤥ॥ ᤀᤠᤏᤡᤃᤣ ᤕᤧᤴᤏᤥ ᤂᤧᤱᤜᤠ᤹ ᤂᤧᤏᤧ᤹ ᤁᤢᤛᤱ ᤆᤥᤃᤧ᤹ᤀᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤏᤡᤃᤣ ᤀᤥᤛᤣᤴ ᤀᤠᤎᤠᤰᤋᤧ᤹ᤀᤥ ᤀᤠᤏᤡᤃᤣ ᤕᤧᤶᤔᤥ ᤂᤧᤱᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤀᤠᤒᤠᤱᤄᤧ᤹ᤀᤥ. ᤛᤠ᤹ᤖᤡᤰ ᤁᤧᤛᤠᤰᤁᤧᤴ ᤐᤥ᤺ᤰᤐᤠ ᤕᤧᤶᤔᤥ ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤥ॥

³ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤧᤔᤠᤏᤗᤠᤶᤒᤠ ᤑᤧᤖᤧᤖᤥ. ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤠᤖᤠᤏᤒᤠ ᤁᤥ᤺ᤰᤔᤠᤜᤠ᤹ᤗᤠᤶ ᤑᤧᤖᤧᤖᤥ॥ ᤂᤢᤏᤧ᤹ ᤁᤢᤔᤡᤔᤡᤍᤡᤱᤅᤡᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤡᤴ ᤋᤧᤵᤋᤢᤖᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤢᤏᤠᤖᤠ ᤑᤥᤔᤠ ᤐᤠ᤺ᤴᤏᤡᤸᤗᤧ ᤋᤡᤶᤗᤥ॥ ᤛᤣᤗᤠ

⁴ ᤂᤢᤏᤧ᤹ ᤁᤢᤜᤠᤱᤘᤠ ᤁᤢᤔᤠᤱᤘᤠᤴ ᤏᤠᤶ ᤁᤧᤃᤧᤵᤐᤠ ᤜᤧᤰᤁᤣ ᤗ᤹ᤖᤧᤖᤥ. ᤂᤢᤏᤧ᤹ ᤁᤢᤜᤢᤰᤁᤥᤗᤠᤶ ᤏᤠᤶᤛᤠᤱᤅᤡᤴ ᤀᤥ᤺ᤳᤋᤧ ᤗ᤺ᤴᤍᤧᤖᤥ. ᤂᤧᤵᤔᤥᤀᤣ ᤂᤢᤏᤧ᤹ ᤁᤢᤔᤢᤰᤛᤠᤶᤔᤡᤴ ᤆᤡᤱᤛᤡᤱᤅᤠᤱ ᤘᤕᤧᤖᤥ॥

⁵ ᤂᤢᤏᤧ᤹ ᤁᤢᤍᤃᤡ ᤁᤢᤍᤃᤡ ᤔᤡᤱᤍᤣᤴ ᤐᤥᤖᤧᤖ ᤐᤣᤖᤥ. ᤔᤠᤱᤍᤢᤰᤔᤠᤴ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤌᤠᤛᤡᤱᤒᤣᤖᤥ॥

⁶ ᤕᤧᤶᤛᤡᤱᤅᤡᤸᤗᤧ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤢᤴᤍᤢᤖᤥ. ᤂᤢᤏᤧ᤹ ᤀᤥᤔᤢᤕᤧᤀᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤆᤡᤖᤡᤶᤗᤡᤶ ᤔᤧᤕᤰᤂᤧᤖᤥ॥ ᤀᤢᤴᤇᤣ᤺ᤴ ᤀᤢᤴᤇᤣ᤺ᤴᤏᤠᤱᤎᤥᤒᤠ ᤁᤥ᤺ᤰᤔᤠᤜᤠ᤹ ᤑᤕ᤺ᤵᤑᤕ᤺ᤵ ᤕᤒᤧᤖᤥ. ᤂᤧᤴ ᤁᤠᤵᤐᤥᤒᤠ ᤌᤧᤃᤢ ᤔᤠᤱᤘᤠᤜᤠ᤹ ᤆᤥ᤺ᤴᤍᤧ ᤗᤠᤛᤧᤖᤥ. ᤂᤢᤏᤧ᤹ ᤁᤢᤗᤠᤶᤜᤠ᤹ ᤀᤠᤓᤧᤸᤗᤧᤀᤠᤱ ᤔᤧᤶᤏᤢᤵᤔᤏᤠᤒᤠ ᤆᤥᤰᤗᤥ॥

⁷ ᤀᤠᤱᤃᤠ᤹ ᤁᤢᤛᤏᤒᤠ ᤔᤏᤠᤜᤠ᤹ ᤋᤢᤰᤂᤣᤗᤠᤰᤂᤣᤀᤥ ᤔᤧᤎᤩᤧᤒᤠ ᤏᤡᤛᤢᤱᤗᤥ. ᤔᤡᤍᤩᤠᤏᤒᤠ ᤔᤧᤴᤇᤠᤶ ᤛᤢᤘᤠᤱᤅᤡᤴ ᤁᤡᤔᤠ ᤕᤱᤔᤠᤀᤥ ᤌᤩᤧᤒᤠ ᤏᤡᤛᤢᤱᤗᤥ॥

⁸ ᤌᤣ ᤂᤧᤏᤧ᤹ ᤁᤧᤛᤠᤰᤁᤧᤴᤏᤡᤴ ᤘᤜ᤺ᤱᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤘᤕᤧᤒᤡ. ᤕᤜᤘᤣ ᤍᤠᤱᤒᤠᤀᤣ᥅ ᤌᤣ ᤂᤧᤏᤧ᤹ ᤁᤧᤕᤠ᤺ᤰᤗᤧ᤹ᤔᤠᤴ ᤜ᤺ᤱᤃᤢᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤘᤕᤧᤒᤡ᥅ ᤂᤧᤏᤧ᤹ ᤁᤧᤀᤴᤜᤠ᤹ᤀᤥ ᤏᤢ ᤌᤱ ᤁᤧᤏᤠ᤺ᤶᤒᤠ ᤁᤧᤀᤴᤗᤠᤎᤠᤜᤠ᤹ᤀᤥ ᤁᤧᤗᤥ᤺ᤰᤋᤧᤖ ᤁᤧᤒᤳᤇᤧᤸᤗᤧ ᤌᤣ ᤂᤧᤏᤧ᤹ ᤘᤖ᤺ᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤏᤧ᤹ ᤁᤧᤛᤡᤰ ᤐᤥᤃᤧᤀᤠᤱ ᤘᤕᤧᤒᤡ᥅

⁹ ᤂᤧᤏᤧ᤹ ᤀᤠᤵᤑᤣᤰ ᤁᤧᤗᤡ᤹ᤀᤡᤴ ᤁᤧᤗ᤺ᤳᤋᤢᤖᤥ. ᤂᤧᤏᤧ᤹ ᤕᤖᤡᤰ ᤋᤥ᤺ᤱᤜᤠ᤹ ᤋᤠᤖᤠᤶᤔᤧ᤹ ᤑᤠ᤹ᤀᤠᤱ ᤁᤧᤒᤠ᤺ᤳᤋᤢᤖᤥ. ᤛᤣᤗᤠ ᤂᤧᤏᤧ᤹ ᤘᤜ᤺ᤱᤜᤠ᤹ᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤧᤈᤧᤖᤢᤖᤥ॥

¹⁰ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ᤖᤧ ᤂᤧᤏᤧ᤹ ᤁᤧᤶᤏᤡᤛᤧᤀᤠᤱ ᤔᤧᤕᤰᤂᤧᤖᤥ. ᤘᤎᤥ᤺ᤰᤁᤥᤗᤠᤶ ᤜᤢᤱᤔᤏᤠᤒᤠ ᤜᤧᤰᤁᤣ ᤆᤫᤠ᤺ᤳᤜᤠ᤹ ᤁᤢᤰᤂᤧᤒᤣᤖᤥ. ᤘᤖ᤺ᤱᤅᤡᤴ ᤜᤢ᤺ᤰᤋᤧᤀᤠᤱ ᤘᤠᤓᤧᤸᤗᤧᤱᤜᤠ᤹ ᤌᤠ᤺ᤱ ᤐᤥᤃᤧᤖᤥ॥

¹¹ ᤋᤡᤸᤗᤧᤰ ᤋᤡᤸᤗᤧᤰ ᤁᤧᤒᤧᤒᤠᤀᤠᤱ ᤁᤧᤒᤵᤐᤠ ᤁᤧᤍᤥ᤺ᤱᤜᤠ᤹ᤖᤧ ᤜᤧᤰᤁᤩᤠᤱ ᤛᤧᤸᤗᤧᤱ ᤛᤧᤸᤗᤧᤱ ᤁᤧᤗᤧᤰᤐᤠ ᤁᤧᤗᤠ᤺ᤰᤁᤡᤸᤗᤧ ᤆᤥᤃᤢᤸᤗᤧ. ᤏᤠᤶᤔᤡᤴ ᤏᤢ ᤗᤠᤒᤧᤴ ᤋᤠᤱᤛᤠᤰᤐᤥ ᤛᤫᤠ᤺ᤳ ᤑᤴᤏᤧᤛᤡᤖᤥ॥

¹² ᤂᤧᤏᤧ᤹ ᤁᤧᤛᤠᤰᤁᤧᤴᤏᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤱᤃᤧᤄᤣᤃᤧᤖᤥ. ᤂᤧᤏᤧ᤹ ᤁᤧᤕᤠ᤺ᤰᤗᤧ᤹ᤔᤥ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤧᤍᤥ᤹ᤖᤢᤛᤡᤖᤥ॥

¹³ ᤂᤧᤏᤧ᤹ ᤀᤠᤒᤠᤅᤣ ᤁᤧᤔᤏᤠᤜᤠ᤹ ᤋᤠᤱᤛᤧ᤺ᤵᤔᤠᤛᤡᤖᤧ ᤗᤠᤃᤡ. ᤁᤧᤛᤣ᤺ᤴᤍᤢᤒᤠ ᤁᤧᤔᤏᤠᤴ ᤛᤧ᤺ᤵᤔᤠᤖᤧ ᤗᤠᤃᤡ ᤁᤧᤗ᤺ᤴᤍᤧᤖᤥ॥ ᤁᤢ᤹ᤀᤡᤃᤧᤓᤧᤶᤒᤠ ᤗᤠᤈᤣ᤹ᤒᤠ ᤗᤠᤶᤗᤥᤒᤠᤴ ᤂᤠᤵᤐᤢᤌᤩ᤺ᤱ ᤁᤧᤈᤥᤃᤢᤖᤥ. ᤂᤧᤴ ᤁᤢᤎᤧᤃᤣ᤺ᤰᤐᤥᤗᤠᤶ ᤁᤢᤗᤠᤱᤅᤥ ᤌᤧᤶᤒᤠᤀᤣ ᤗᤧᤰᤆᤠ᤹ ᤁᤧᤈᤥᤃᤢᤖᤥ॥ ᤛᤣᤗᤠ

¹⁴ ᤂᤧᤱᤜᤠ᤹ᤖᤧ ᤀᤠᤏᤡᤃᤣ ᤑᤢᤳᤇᤡᤱᤈᤩᤠᤱ ᤛᤧᤔᤠᤍᤧᤔᤠᤖᤧ ᤗᤠᤃᤡ ᤂᤧᤱᤜᤠ᤹ ᤛᤢᤖᤡᤳ ᤁᤣᤈᤱ ᤁᤢᤀᤡᤛᤡᤰ ᤔᤧᤓᤧᤖᤧᤖᤥ. ᤕᤠᤱᤃᤧᤛᤠ᤹ᤒᤠᤜᤠ᤹ ᤔᤧᤏᤠᤵᤋᤢᤛᤡᤸᤗᤧ ᤂᤧᤱᤜᤠ᤹ ᤁᤧᤏᤠᤱᤒᤠ ᤔᤧᤜᤥ᤺ᤵᤋᤧᤒᤠᤀᤥ ᤂᤧᤱᤜᤠ᤹ ᤔᤧᤛ᤺ᤳᤋᤧᤀᤠᤱ ᤔᤧᤀ᤺ᤰᤋᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤧᤴ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠ᤺ᤰᤁᤡᤸᤗᤧ ᤂᤧᤏᤧ᤹ ᤂᤧᤸᤗᤧ ᤁᤢᤎᤧᤃᤣᤰᤐᤠᤴ ᤐᤷᤜᤱ ᤁᤧᤜᤱᤄᤢ ᤁᤧᤒᤡᤖᤢᤖᤥ॥

¹⁵ ᤘᤖ᤺ᤱᤅᤡᤴ ᤁᤧᤀᤴᤜᤠ᤹ᤖᤧ ᤔᤧᤍᤥ᤹ᤖᤢᤖ ᤁᤧᤕᤠ᤺ᤴᤍᤢᤛᤡᤸᤗᤧ ᤂᤧᤏᤧ᤹ ᤐᤕᤶ ᤕᤶᤒᤠ ᤆᤫᤠ᤺ᤳᤜᤠ᤹ ᤁᤧᤀᤡ᤺ᤵᤛᤢᤖᤥ॥

¹⁶ ᤀᤠᤱᤃᤠ᤹ ᤁᤴ ᤂᤧᤵᤛᤢᤱᤅᤠᤱ ᤀᤠᤛᤡᤰᤗᤢᤱᤔᤠᤴ ᤕᤰᤂᤧᤖᤥ. ᤂᤧᤴ ᤀᤡᤰᤗᤠᤴ ᤂᤧᤵᤛᤢᤱᤅᤡᤸᤗᤧ ᤀᤠᤶᤒᤪᤠᤛᤣᤴ ᤌᤧᤃᤰᤁᤰᤏᤠ ᤕᤰᤂᤧᤖᤥ. ᤀᤠᤱᤃᤠ᤹ ᤀᤠᤕᤧᤳ ᤀᤠᤗᤢᤱᤛᤡᤜᤠ᤹ ᤛᤡᤃᤠᤱᤅᤣ ᤕᤖᤧᤒᤣᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤗᤠᤱᤜᤠ᤹ ᤆᤡᤖᤡᤶᤗᤡᤶᤏᤠ ᤕᤰᤂᤧᤖᤥ॥ ᤜᤧᤰᤁᤣᤛᤠᤱ ᤀᤠᤏᤡᤃᤣ ᤕᤠᤵᤔᤡ ᤁᤧᤓᤵᤐᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤁᤧᤍᤠᤒᤠ ᤋᤢᤰᤂᤣᤗᤠᤰᤂᤣᤒᤠ ᤕᤧᤴᤏᤡᤸᤗᤧ ᤗᤠᤃᤡ ᤀᤠᤱᤃᤠ᤹ ᤏᤠᤛᤡ ᤌ᤺ᤳᤋᤢᤱᤅᤠᤱ ᤜᤠᤱᤄᤢᤱᤗ ᤘᤠ᤹ᤀᤠᤖᤥ॥

¹⁷ ᤐ᤺ᤳᤇᤣᤸᤗᤧ ᤁᤢᤒᤢᤱᤅᤥ ᤁᤢᤏ᤺ᤰ ᤔᤧᤗ᤺ᤴᤏᤧᤴᤇᤠᤱ ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤺ᤸᤗᤧ ᤁᤢᤒᤢᤱᤅᤥ ᤁᤢᤈᤠ᤹ ᤔᤧᤎᤥ᤺ᤰᤏᤧᤴᤇᤠᤱ. ᤆᤤᤋᤢᤏᤧᤸᤗᤧ ᤁᤢᤒᤢᤱᤅᤥ ᤁᤢᤈᤠ᤹ ᤔᤧᤎᤥ᤺ᤰᤏᤧᤴᤇᤠᤱ. ᤜᤧᤰᤁᤩᤠᤱ ᤀᤡᤰᤋᤠᤵᤜᤠ᤹ᤀᤥ ᤐᤥᤃᤢᤃᤧᤴ ᤁᤢᤈᤠ ᤔᤧᤒᤳᤏᤧᤴᤇᤠᤱ. ᤂᤖᤀᤥ ᤔᤧᤸᤗᤢᤰ ᤔᤧ᤺ᤴᤍᤠᤰ ᤔᤧᤴᤕᤠᤰᤏᤧᤴᤇᤠᤱ ᤜᤧᤰᤁᤩᤠᤱ ᤐᤡᤳ ᤕᤧᤵᤔᤏᤠᤀᤥ ᤐᤡᤳᤜᤠ᤹ ᤔᤧᤜᤥ᤺ᤵᤛᤠᤱ.

¹⁸ ᤀᤠᤱᤃᤠ᤹ᤃ ᤕᤜᤘᤣ ᤍᤠᤱᤒᤠᤀᤥ ᤛ᤺ᤳᤋᤠᤖᤥ. ᤀᤠᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤕᤧᤕᤧ ᤗ᤹ᤀᤠᤖᤥ॥

¹⁹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤔᤢᤰᤛᤠᤶᤗᤥ. ᤂᤢᤏᤧ᤹ ᤀᤠᤗᤠᤱᤜᤠ᤹ ᤐᤧ᤺ᤱᤘᤠ᤺ᤸᤗᤧ ᤁᤢᤗᤠᤱ ᤜᤧᤰᤁᤣ ᤔᤧᤸᤗᤧ᤺ᤱᤔᤏᤠᤒᤠ ᤔᤧᤴᤍᤥ᤺ᤰᤔᤏᤠᤒᤠ ᤆᤥᤃᤢᤖᤥ. ᤀᤠᤱᤃᤠ᤹ ᤆᤴᤈᤶᤒᤠᤍᤧᤴᤜᤠ᤹ᤀᤥ ᤐᤣ᤺ᤰᤔᤠ ᤁᤧᤛᤢᤰᤐᤠ ᤆᤥ᤺ᤰᤁᤠᤖᤥ॥ ᤛᤠᤶᤗᤥ ᤁᤧᤜᤢ᤹ᤒᤠᤸᤗᤧ ᤁᤢᤗᤠᤃᤡ—ᤀᤴᤔᤣ ᤂᤡᤱᤔᤏᤠᤒᤠ ᤔᤢᤰᤗᤠᤜᤠ᤹ᤀᤥ ᤔᤢᤱᤔᤏᤠᤒᤠ ᤀᤡᤰᤗᤠᤖᤥ॥