ᤜᤒᤁᤢᤁ 2 - LIFOTNT

¹ ᤀᤠᤱᤃᤠ᤹ ᤀᤠᤀᤡᤰᤁᤥᤔᤠᤍᤧᤴᤏᤥᤀᤣ ᤕᤣᤵᤐᤠᤈᤠᤀᤠᤖᤥ. ᤜᤧᤰᤁᤩᤠᤱ ᤗᤢᤱᤎᤠᤰᤁᤥ ᤀᤠᤱᤃᤠ᤹ ᤌ᤺ᤵᤐᤧᤳ ᤕᤧᤵᤐᤠᤖᤥ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤌᤧᤔᤠ ᤔᤧᤳᤋᤠᤀᤠ ᤀᤠᤱᤃᤠ᤹ ᤂᤧᤴ ᤀᤥᤔᤧᤳᤋᤢᤱᤅᤠᤱ ᤕᤧᤵᤐᤠᤖᤥ॥ ᤁᤴ ᤗᤢᤱᤜᤠᤴ ᤐᤠ᤺ᤴᤏᤡᤸᤗᤧᤴ ᤏᤢᤃᤵ ᤀᤠᤰᤋᤱᤒᤠ ᤐᤡᤔᤠ ᤁᤧᤒᤥᤱᤒᤠ ᤀᤠᤱᤃᤠ᤹ ᤂᤧᤴ ᤀᤥᤔᤧᤳᤋᤢᤱᤗᤥ॥

ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤢᤃᤵ

² ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤏᤢᤃᤵ ᤐᤡᤖᤠᤱᤗᤥ. “ᤂᤧᤏᤧ᤹ ᤁᤴ ᤛᤢᤑᤥᤴ ᤛᤠᤵᤗᤢᤱᤜᤠ᤹ᤀᤥ ᤏᤢᤖᤡᤰ ᤛᤠᤵᤋᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤀᤡᤱᤛᤠᤒᤧᤴ ᤂᤧᤴ ᤀᤡᤱᤄᤱᤅᤡᤴ ᤋᤣ᤹ᤔᤠᤀᤠᤱ ᤗᤥ᤺ᤰᤔᤠ ᤛᤢᤰᤗᤖᤥ॥

³ ᤌᤣᤀᤠᤱᤓᤧᤸᤗᤧ ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤶᤔᤡᤴ ᤁᤧᤵᤔᤠᤖᤧ ᤗᤠᤃᤡ ᤛᤢᤑᤥ᤺ᤸᤗᤧ ᤜᤠᤱᤄᤢᤖ ᤘᤠ᤹ᤖᤥ. ᤂᤧᤸᤗᤧ ᤁᤢᤏᤢᤵᤔᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤖᤥ ᤜᤧᤰᤁᤩᤠᤱ ᤂᤧᤴ ᤛᤧᤰᤂᤠᤀᤣ ᤐᤥᤱᤗᤥ॥ ᤂᤧᤴ ᤁᤧᤵᤔᤠ ᤛᤢᤛᤠᤱ ᤂᤧᤏᤧ᤹ ᤜᤠᤱᤛᤧ᤹ᤀᤠᤱ ᤕᤢᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤛᤧᤰᤂᤠᤀᤣ ᤁᤧᤳᤗᤥ. ᤂᤧᤴ ᤁᤧᤵᤔᤠ ᤛᤠ᤹ᤖᤡᤰ ᤔᤧᤛᤢᤏᤧᤴᤗᤥ॥

⁴ “ᤀᤡᤱᤄᤱᤅᤡᤴ ᤜᤠᤒᤠ ᤁᤴᤗᤥ. ᤂᤧᤴ ᤕᤶᤒᤠ ᤁᤧᤜᤧᤴᤇᤡᤱᤒᤠᤱᤃ ᤛᤠᤶᤕᤥᤒᤠ ᤔᤣ᤺ᤴᤗᤥ. ᤛᤠᤶᤕᤥᤒᤠᤱᤃ ᤁᤢᤏᤛᤠ᤺ᤴᤗᤠᤶ ᤜᤡᤱᤗᤥ॥

⁵ ᤛᤧᤰᤂᤠᤛᤠᤱ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤂᤧᤴ ᤀᤡᤱᤗᤧᤰᤁᤥ ᤌᤠᤛᤢᤖᤥ. ᤂᤧᤴ ᤛᤠ᤹ᤖᤡᤰ ᤜᤠᤍᤡᤱ ᤁᤧᤎᤰᤐᤠ ᤆᤥᤰᤗᤥ. ᤜᤧᤰᤁᤩᤠᤱ ᤀᤠᤓᤧᤸᤗᤧᤀᤠᤱ ᤁᤢᤏᤡᤱᤘᤠ᤹ ᤔᤧᤍᤠᤏᤧᤴᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤴ ᤆᤠ᤹ᤖᤡᤰ ᤁᤧᤄᤡ᤺ᤶᤒᤠ ᤆᤥᤰᤗᤥ ᤛᤡᤔᤧᤴ ᤁᤢᤀᤡᤛᤡᤰ ᤂᤧᤴ ᤀᤠᤵᤑᤠᤸᤗᤧᤀᤠᤱ ᤔᤧᤄᤠᤏᤧᤴᤗᤥ॥ ᤂᤧᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤢᤏᤧ᤹ᤀᤥ ᤑᤢᤰᤂᤢᤛᤡᤖᤥ. ᤜᤧᤰᤁᤩᤠᤱ ᤔᤏᤠᤜᤠ᤹ ᤂᤰᤐᤧᤳ ᤋᤧᤶᤛᤢᤍᤣ᤹ᤖᤢᤛᤡᤖᤥ॥

⁶ “ᤌᤣ ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤏᤧ᤹ ᤔᤧᤴᤕᤣ᤺ᤳᤋᤢᤴᤒᤡ᥅ ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤁᤢᤏᤠᤔᤧᤴᤇᤠ᤹ ᤔᤧᤶᤔᤧᤳᤋᤢᤶᤒᤡ᥅ ᤂᤢ᤺ᤳᤋᤢ ᤋᤠᤖᤢᤒᤠ ᤛᤠᤔᤠᤜᤠ᤹ ᤁᤧᤗᤢ᤺ᤶᤒᤠ ᤏᤢ ᤏᤠᤵᤋᤢ ᤋᤠᤖᤢᤛᤡᤒᤠ ᤆᤡᤃᤰᤘᤠᤜᤠ᤹ᤖᤧ ᤁᤧᤃᤵᤐᤠ ᤁᤧᤒᤥᤱᤒᤧᤱᤃ ᤆᤡ᤺ᤳᤋᤧᤛᤩᤧᤖᤥ᥄ ᤂᤧᤸᤗᤧ ᤀᤠᤰᤂᤩᤠᤖᤡᤰ ᤀᤡᤖᤡᤰ ᤌᤠᤖᤡᤰ ᤜᤧᤰᤁᤣ ᤆᤥᤃᤢᤒᤠᤒᤣ᥅

⁷ ᤁᤧᤏᤠᤵᤋᤢᤛᤡᤒᤠ ᤔᤏᤠᤜᤠ᤹ ᤔᤢᤳᤌᤪᤡᤰ ᤔᤧᤶᤒᤥ᤺ᤰᤏᤧᤶᤒᤡ᥅ ᤂᤧᤱᤜᤠ᤹ ᤔᤧᤒᤥ᤺ᤰᤁᤠᤱ ᤁᤡᤔᤠ ᤕᤱᤔᤠᤀᤥ ᤁᤧᤶᤎᤠᤀᤠᤱ ᤁᤧᤶᤏᤠᤵᤗᤥ॥

⁸ ᤂᤧᤏᤧ᤹ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤧᤏᤠᤵᤋᤢᤛᤡᤖᤥ. ᤁᤸᤗᤧᤆᤥᤃᤢᤸᤗᤧ ᤁᤧᤜᤡᤱᤒᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤶᤏᤠᤵᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤔᤏᤠ ᤔᤠᤰᤂᤡ᤹ ᤁᤧᤛᤧᤛᤢᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤗᤠᤈᤣ᤹ᤜᤠ᤹ ᤏᤢ ᤕᤧᤰᤕᤰᤜᤠ᤹ ᤂᤶᤓᤩᤠᤱ ᤂᤧᤵᤔᤥ ᤁᤧᤕᤢᤱᤒᤠᤜᤠ᤹ ᤁᤧᤖᤧᤰ ᤁᤧᤔᤧᤰᤂᤢᤛᤡᤖᤥ॥

⁹ “ᤁᤢᤜᤠᤱᤈᤢᤶᤔᤡᤴ ᤑᤥᤔᤠᤖᤧ ᤗᤠᤃᤡ ᤔᤧᤴᤘᤠ᤹ᤔᤏᤠ ᤐᤠ᤺ᤴᤗᤠᤶ ᤕᤠᤱᤛᤠᤁᤢᤴᤎᤣ ᤁᤧᤎᤰᤐᤧᤴ ᤆᤡ᤺ᤳᤋᤧᤛᤩᤧᤖᤥ॥ ᤔᤧᤰᤔᤠ ᤛᤡᤔᤠᤗᤠᤶ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤆᤴᤈᤶᤒᤠᤍᤧᤴᤏᤥ ᤕᤢᤰᤏᤠᤍᤧᤴ ᤁᤧᤈᤥᤰᤐᤧᤴ ᤆᤡ᤺ᤳᤋᤧᤛᤩᤧᤖᤥ॥

¹⁰ ᤂᤧᤏᤧ᤹ ᤕᤖᤡᤰ ᤔᤏᤠᤜᤠ᤹ ᤔᤧᤱᤔᤠᤛᤡ ᤆᤧᤶᤓᤴ ᤁᤧᤈᤥᤃᤢᤀᤠᤱ ᤘᤠ᤹ᤖᤥ. ᤂᤧᤏᤧ᤹ ᤀᤠᤵᤑᤣᤰ ᤁᤧᤜᤡᤶᤛᤕᤱᤜᤠ᤹ ᤛᤡᤖᤡᤱᤔᤔᤥ ᤁᤧᤎᤠᤛᤢᤛᤡᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤵᤑᤣᤰ ᤔᤧᤰᤔᤠ ᤛᤡᤔᤥ ᤁᤧᤎᤩᤧᤀᤠᤱ ᤘᤠ᤹ᤖᤥ॥

¹¹ ᤗᤢᤱᤎᤠᤰᤁᤥᤒᤠ ᤗᤢᤱᤜᤠ᤹ᤗᤠᤶ ᤀ᤺ᤰᤔᤠ ᤑᤡ᤺ᤰᤔᤠ ᤀᤡᤰᤗᤠ ᤗ᤺ᤴᤗᤥ. ᤜᤧᤰᤁᤩᤠᤱ ᤁᤠ᤺ᤱᤓᤠ ᤛᤡᤱᤜᤠ᤹ᤀᤥᤗᤠᤶ ᤁᤧᤗᤥᤱᤒᤠ ᤀᤡᤰᤗᤠ ᤗ᤺ᤴᤗᤥ॥

¹² “ᤔᤠᤰᤂᤡ᤹ ᤁᤧᤛᤧᤒᤠᤀᤠᤱ ᤕᤧᤰᤕᤰ ᤁᤧᤈᤥᤰᤐᤧᤴ ᤆᤡ᤺ᤳᤋᤧᤛᤩᤧᤖᤥ. ᤜᤧᤰᤁᤩᤠᤱ ᤑᤧᤴᤕᤠ᤺ᤶᤒᤰᤗᤠᤶ ᤐᤠᤱᤈᤢᤶ ᤁᤧᤈᤥᤰᤐᤧᤴ ᤆᤡ᤺ᤳᤋᤧᤛᤩᤧᤖᤥ᥄

¹³ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤏᤡ᤺ᤴᤎᤥ ᤆᤥᤃᤢᤀᤠᤱ ᤔᤧᤘᤠ᤹ᤏᤧᤶᤒᤡ᥅ ᤔᤏᤠᤜᤠ᤹ᤖᤧ ᤛᤩᤠᤱᤔᤧᤴᤍᤠᤱ ᤔᤧᤈᤥᤃᤢᤒᤠᤴ ᤔᤡ᤺ᤸᤗᤧ ᤂᤠᤵᤐᤢ ᤐᤥᤱᤗᤥ. ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠᤴ ᤌᤣᤏᤠᤎᤣ ᤜᤏᤧᤒᤠ ᤐᤥᤱᤗᤥ॥

¹⁴ ᤌᤣᤀᤠᤱᤓᤧᤸᤗᤧ ᤘᤖ᤺ᤱᤅᤡᤴ ᤆᤫᤠ᤺ᤳᤋᤡᤸᤗᤧ ᤋᤡᤶᤒᤠ ᤁᤢᤀᤡᤛᤡᤰ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤒᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤖᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤢᤎᤡᤶ ᤐᤥᤱᤗᤥ॥

¹⁵ “ᤁᤢᤜᤡᤶᤒᤣᤛᤠᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤧᤰᤆᤠᤒᤢᤎᤢ᤺ᤰᤐᤠ ᤌᤰᤁᤡᤴ ᤀᤍᤰᤋᤰ ᤀᤥᤔᤧᤵᤔᤠᤛᤡᤖᤧ ᤗᤠᤃᤡ ᤂᤧᤱᤜᤠ᤹ ᤆᤧᤸᤗᤧᤰᤛᤣ᤹ ᤌᤡ ᤌᤢᤱᤔᤠ ᤁᤧᤒᤠᤱᤒᤠᤀᤠᤱ ᤔᤕᤢᤛᤡᤖ ᤁᤧᤕᤠ᤺ᤶᤒᤧᤱᤃ ᤆᤡ᤺ᤳᤋᤧᤛᤩᤧᤖᤥ॥

¹⁶ ᤔᤡᤱᤛᤥᤖᤧ ᤁᤢᤗᤧᤰᤘᤠ ᤂᤧᤏᤧ᤹ ᤁᤧᤏᤠ ᤁᤧᤛᤠᤶ ᤌᤠᤖᤥ. ᤀᤠᤸᤗ ᤂᤧᤏᤧ᤹ ᤁᤧᤗᤠᤃᤡ ᤁᤧᤕᤧᤶ ᤋᤩᤧᤖᤥ᥄ ᤂᤧᤏᤧ᤹ᤀᤠᤱ ᤌᤢᤅᤧ᤹ᤀᤠᤱ ᤗᤧᤰᤆᤠᤒᤧᤎᤡ᤺ᤰ ᤐᤥ᤺ᤰᤂᤧ᤹ᤀᤥ᥄ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤄᤠᤛᤧᤴᤏᤡᤸᤗᤧᤴ ᤆᤸᤗᤠᤱᤏᤠ ᤂᤥᤷᤕᤠᤴ ᤂᤧᤏᤧ᤹ ᤌᤢᤱᤔᤠ ᤁᤧᤒᤥᤱᤒᤠ ᤐᤥᤱᤗᤥ. ᤜᤧᤰᤁᤩᤠᤱ ᤁᤧᤔᤡᤱᤛᤥᤴ ᤛᤡᤖᤡᤱ ᤔᤔᤧᤸᤗᤧ ᤛᤢ᤺ᤵᤋᤢᤖᤥ॥

¹⁷ ᤗᤧᤒᤏᤠᤏᤒᤠ ᤋᤠᤶᤓᤢᤱᤜᤠ᤹ ᤂᤧᤏᤧ᤹ ᤁᤧᤗᤧ᤺ᤰᤂᤢᤀᤠᤱ ᤏᤧᤖᤥ. ᤀᤠᤸᤗ ᤂᤧᤏᤧ᤹ ᤂᤧᤱᤜᤠ᤹ᤖᤧ ᤁᤧᤶᤗᤧ᤺ᤱᤗᤥ॥ ᤂᤧᤵᤔᤥᤒᤠ ᤌᤰᤛᤠᤜᤠ᤹ ᤂᤧᤏᤧ᤹ ᤁᤧᤛᤧᤖᤢᤛᤡᤖᤥ ᤀᤠᤸᤗ ᤂᤧᤴ ᤌᤰᤛᤠᤜᤠ᤹ᤖᤧ ᤂᤧᤏᤧ᤹ ᤕᤱᤔᤠ ᤁᤧᤶᤛᤧᤳᤗᤥ॥ ᤁᤴᤜᤠ᤹ ᤁᤧᤖᤧᤰ ᤐᤥᤱ᤹ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡ᤹ ᤁᤧᤛᤧᤛᤢᤖᤥ. ᤂᤧᤒᤩᤠᤱ ᤂᤧᤏᤧ᤹ ᤗᤠᤈᤣ᤹ᤜᤠ᤹ ᤏᤢ ᤕᤧᤰᤕᤰᤜᤠ᤹ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤕᤢᤱᤒᤠᤜᤠ᤹ ᤁᤧᤖᤧᤰ ᤁᤧᤔᤧᤰᤂᤢᤛᤡᤖᤥ॥

¹⁸ “ᤛᤠᤵᤆᤥᤒᤣᤸᤗᤧ ᤜᤡᤒᤢ. ᤗᤰᤋᤢ ᤂᤥ᤺ᤴᤍᤢᤀᤠᤱ ᤆᤥᤃᤢᤒᤠ ᤏᤠᤘᤠᤀᤡᤳᤗᤠ᤺ᤸᤗᤧ ᤁᤢᤕᤠ᤺ᤶᤒᤰ ᤌᤧᤔᤠ ᤘᤠ᤹ᤀᤠᤱᤒᤣ᥅ ᤀᤡᤃᤪ ᤀᤡᤱᤗᤧᤰ ᤁᤧᤜᤢ᤹ᤒᤠ ᤏᤠᤘᤠᤀᤡᤳᤗᤠ᤺ᤸᤗᤧ ᤁᤢᤕᤠ᤺ᤶᤒᤰ ᤌᤣ ᤘᤠ᤹ᤒᤣ᥅ ᤌᤣᤀᤠᤱᤓᤧᤸᤗᤧ ᤂᤧᤴ ᤏᤠᤘᤠᤀᤡᤳᤗᤠ ᤁᤧᤈᤥ᤺ᤰᤐᤠ ᤆᤥᤒᤣᤃᤢ᤺ᤸᤗᤧ ᤀᤠᤵᤑᤣᤰ ᤁᤢᤜᤢᤰᤁᤡᤸᤗᤧ ᤆᤥᤃᤢᤒᤠ ᤆᤀᤡ᤺ᤳᤋᤧᤴ ᤏᤠᤛᤠ᤹ᤖᤢᤖᤥ. ᤂᤢᤏᤧ᤹ ᤆᤥᤃᤢᤛᤡᤒᤠ ᤏᤠᤘᤠᤀᤡᤳᤗᤠᤜᤠ᤹ ᤐᤠ᤺ᤵᤔᤠ ᤔᤧᤴᤇᤢᤰᤏᤧᤴᤗᤥ॥

¹⁹ ᤛᤡᤱᤅᤡᤴ ‘ᤐᤥᤃᤧ᤹’ ᤜᤧᤰᤁᤩᤠᤱ ᤐᤠ᤺ᤵᤔᤠ ᤔᤧᤴᤇᤢᤰᤔᤏᤠ ᤗᤢᤱᤅᤡᤴ ‘ᤛᤥᤖᤧ᤹’ ᤁᤧᤔᤧᤵᤐᤠ ᤔᤏᤠ᤺ᤱᤃ ᤆᤡ᤺ᤳᤋᤧᤛᤩᤧᤖᤥ॥ ᤌᤣ ᤂᤧᤸᤗᤧ ᤗᤠᤶ ᤀᤥ᤺ᤴᤎᤠᤰᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤢᤰᤋᤢᤒᤡ᥅ ᤁᤱᤃ ᤛᤠᤶᤔᤩᤠᤱ ᤏᤢ ᤕᤢᤵᤐᤠ᤺ᤸᤗᤧ ᤛᤢ᤺ᤵᤔᤏᤠᤒᤠ ᤆᤥᤰᤗᤥ. ᤁᤖ ᤂᤧᤵᤔᤥ ᤛᤠ᤺ᤱᤃᤢᤃᤧᤴ ᤛᤰᤔᤠᤀᤣ ᤔᤧᤕᤠᤰᤏᤧᤴᤗᤥ॥

²⁰ ᤁᤖ ᤕᤜᤘᤣ ᤍᤠᤱᤒᤧᤱᤃ ᤂᤢᤏᤧ᤹ ᤁᤢᤜᤡᤶᤔᤥ ᤘᤠ᤹ᤖᤥ. ᤂᤢᤏᤧ᤹ ᤁᤢᤍᤃᤡ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤴ ᤆᤡᤈᤡ ᤕᤧᤶᤕᤧᤶ ᤏᤧᤖᤖᤥ॥”