ᤋᤥᤗᤡᤱᤛᤥᤔᤢ 9 - LIFOTNTᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢᤜ᤺ᤴᤏᤢ ᤆᤥᤃᤢᤒᤠ ᤔᤠᤱᤜᤢᤵ 1 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢᤜᤴ ᤏᤢ ᤁᤢᤛ᤻ᤛᤠᤜᤠ᤹ ᤜᤠᤱᤘᤠᤔᤢ᤹ᤀᤡ ᤐᤡᤖᤢᤛᤡᤀᤠᤱ ᤔᤧᤳᤋᤢᤛᤡ. “ᤔᤡᤰᤁᤡᤑᤢᤱ ᤑᤧᤰᤋᤠᤶᤔᤧ᤹ᤖ ᤐᤥ᤺ᤴᤍᤧᤶ ᤌᤧ᤹ᤖᤧᤶᤔᤧ᤹. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤌᤡᤶᤛᤧᤶᤔᤧᤖ ᤐᤣᤃᤧᤶᤔᤧ᤹॥ 2 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤌᤰᤛᤠᤜᤠ᤹ ᤏᤢ ᤋᤠᤱᤛᤠᤱᤒᤥ ᤁᤧᤒᤧᤒᤠ ᤁᤧᤖᤧᤰ ᤐᤢᤛᤠᤜᤠ᤹ᤖᤧ ᤜᤧᤰᤁᤩᤠᤱ ᤘᤖ᤺ᤱᤅᤥ ᤁᤧᤕᤠᤰᤐᤠ ᤁᤧᤖᤧᤰ ᤅᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤃᤡᤖᤡ᤹॥ ᤂᤧᤱᤜᤠ᤹ ᤂᤡᤏᤡ᤹ ᤜᤢᤰᤁᤥᤀᤣ ᤔᤧᤘᤠ᤹ᤖᤥ॥ 3 ᤁᤢᤛᤰᤔᤠ ᤁᤧᤕᤠᤰᤐᤠ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠ ᤁᤧᤖᤧᤰ ᤌᤰᤛᤠᤐᤢᤛᤠᤜᤠ᤹ ᤂᤡᤏᤡ᤹ ᤆᤠᤔᤠ ᤁᤢᤈᤠ ᤐᤥᤱ॥ ᤁᤧᤖᤧᤰ ᤛᤖᤣ᤺ᤰᤁᤩᤠ᤺ᤵᤐᤠ ᤌᤠᤒᤢᤍᤡᤱ ᤛᤡᤱᤒᤢᤱ ᤗᤢᤱᤒᤢᤱᤜᤠ᤹ ᤂᤡᤏᤡ᤹ ᤐᤡᤏᤡᤱᤒᤠ ᤜᤧᤰᤁᤣᤀᤣ ᤀᤠᤸᤗ ᤂᤡᤏᤡ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤡᤏᤡᤱᤗᤥ॥ 4 “ᤁᤖ ᤜᤡᤱᤔᤴ ᤁᤧᤒᤡᤒᤠ ᤁᤢᤔᤠᤰᤂᤡ᤹ᤀᤡᤴᤏᤢ ᤛᤥᤖᤡᤰ ᤂᤡᤏᤡ᤹ ᤛᤠ ᤔᤧᤈᤧᤶᤔᤡᤴᤏᤧ᤹॥ 5 ᤜᤧᤰᤁᤩᤠᤱ ᤂᤡᤏᤡ᤹ ᤜᤡᤱᤔᤴ ᤁᤧᤒᤡᤒᤠ ᤔᤠᤰᤂᤡ᤹ᤀᤡᤸᤗᤧ ᤁᤢᤗᤧᤰᤘᤠ ᤀᤠᤱᤃᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ॥ ᤁᤧᤖᤧᤰ ᤌᤰᤛᤠᤗᤠᤶᤒᤠ ᤜᤡᤱᤔᤴᤗᤧ ᤁᤢᤗᤧᤰᤘᤠ ᤏᤠ᤺ᤰᤋᤢᤱᤗᤥ. ᤜᤧᤰᤁᤩᤠᤱ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡ ᤗᤠᤶᤒᤠᤀᤠᤱ ᤘᤣ᤹ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤴᤇᤡ ᤜᤡᤱᤔᤴᤗᤧ ᤁᤢᤗᤧᤰᤘᤠ ᤏᤠ᤺ᤰᤋᤢᤱᤗᤥ॥ 6 “ᤔᤏᤠ ᤁᤧᤛᤧᤵᤐᤠᤴ ᤔᤏᤠᤖᤧᤀᤣ ᤔᤧᤛᤧᤖᤢᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤈᤀᤡ᤺ᤳᤋᤥ ᤔᤧᤴᤇᤠᤶ ᤕᤠᤵᤔᤡᤴ ᤆᤥᤃᤢᤒᤠᤖᤥ॥ 7 ᤂᤡᤏᤡ᤹ᤃ ᤔᤡᤰᤁᤡᤑᤢᤱ ᤑᤧᤰᤋᤠᤶᤔᤧ᤹ᤖ ᤐᤥ᤺ᤴᤍᤧᤶ ᤌᤧ᤹ᤖᤧᤶᤔᤧ᤹॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤔᤧᤘᤠ᤹ᤖ. ᤜᤧᤰᤁᤩᤠᤱ ᤕᤖᤡᤰ ᤔᤧᤒᤥᤱᤅᤠᤱ ᤔᤧᤒᤥᤴ ᤔᤧᤒᤣ᤺ᤰᤗ॥” 8 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢᤜᤴ ᤏᤢ ᤁᤢᤛ᤻ᤛᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. 9-10 “ᤂᤡᤏᤡ᤹ ᤜᤧᤰᤁᤩᤠᤱ ᤂᤡᤏᤡ᤹ ᤛᤠᤔᤧᤴᤇᤠ᤹ᤜᤠ᤹ᤏᤢ. ᤘᤠᤗᤠᤎᤠᤀᤥᤗᤠᤶ ᤂᤡᤏᤡ᤹ᤏᤢ ᤁᤧᤗ᤺ᤶᤒᤠ ᤁᤧᤖᤧᤰ—ᤁᤢᤜᤡᤱᤘᤧᤳ ᤌᤰᤛᤠᤐᤢᤛᤠᤜᤠ᤹. ᤜᤡᤶᤎᤰᤛᤠᤜᤠ᤹. ᤋᤠᤶᤓᤢᤱ ᤌᤰᤛᤠᤜᤠ᤹ᤏᤢ ᤀᤠᤱᤃᤠ᤹ ᤀᤠᤔᤠᤱᤜᤢᤵᤐᤡᤴ ᤕᤢᤰᤛᤡᤱ ᤆᤥᤃᤢᤱᤗᤥ॥ 11 ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤘᤍᤵᤔᤠᤀᤥᤒᤠ ᤆᤫᤠ᤺ᤳᤋᤡᤸᤗᤧ ᤐᤠᤎᤢᤱᤛᤠᤜᤠ᤹ ᤔᤧᤶᤔᤧᤰᤏᤧᤴ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤧᤱᤔᤠᤖᤧ ᤗᤠᤃᤡ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤘᤍᤵᤔᤠ ᤔᤧᤎᤠᤱᤏᤧᤴ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤠᤔᤠᤱᤜᤢᤵᤐᤡᤴ ᤕᤢᤰᤛᤡᤱ ᤆᤥᤃᤢᤱᤗᤥ॥” 12 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ. “ᤀᤠᤱᤃᤠ᤹ ᤏᤢ ᤂᤧᤏᤧ᤹ ᤜᤧᤰᤁᤩᤠᤱ ᤂᤧᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤁᤢᤛᤰᤔᤠ ᤁᤧᤕᤠᤰᤐᤠ ᤌᤰᤛᤠᤐᤢᤛᤠᤜᤠ᤹ ᤗᤢᤶᤔᤥ ᤜᤧᤰᤁᤩᤠᤱ ᤋᤠ᤺ᤴᤍᤡ ᤁᤧᤍᤠᤒᤠ ᤁᤧᤖᤧᤰ ᤌᤠ᤺ᤰᤜᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤸᤗᤧ ᤔᤡᤰᤛᤣᤴ ᤁᤴ ᤐᤥᤱᤗᤥ— 13 ᤂᤠ᤹ᤔᤡ᤺ᤳᤋᤥ ᤀᤠᤏᤠᤶᤎᤡᤱᤃᤥᤴ ᤑᤳᤇᤢᤱ. ᤜᤧᤰᤁᤩᤠᤱ ᤂᤧᤴ ᤀᤠᤱᤃᤠ᤹ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤗᤢᤶᤔᤥ ᤗᤳᤇᤠ ᤔᤠᤱᤜᤢᤵᤗᤧᤴ ᤔᤡᤰᤛᤣᤴ ᤐᤥᤱᤗᤥ॥ 14 ᤀᤠᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤠ᤹ᤔᤡ᤺ᤵᤐᤠᤴ ᤑᤳᤇᤢᤱ ᤜᤧᤰᤁᤩᤠᤱ ᤏᤠᤶᤎᤡᤱᤃᤥᤴ ᤏᤡᤎᤠ᤺ᤵᤐᤡᤸᤗᤧ. 15 ᤀᤠᤱᤃᤠ᤹ ᤏᤢ ᤂᤡᤏᤡ᤹ ᤜᤧᤰᤁᤩᤠᤱ ᤁᤧᤖᤧᤰ ᤐᤖᤡᤰᤐᤠ ᤐᤠᤎᤢᤱᤛᤠᤜᤠ᤹ᤗᤢᤶᤔᤥ ᤆᤥᤃᤢᤱᤒᤠ ᤀᤠᤔᤠᤱᤜᤢᤵᤐᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ ᤁᤧᤖᤧᤰ ᤐᤠᤎᤢᤱᤛᤠᤜᤠ᤹ ᤁᤧᤛᤧᤵᤐᤠ ᤘᤍᤵᤔᤠ ᤆᤫᤠ᤺ᤳᤋᤡᤴ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤌᤠᤱᤗ ᤔᤧᤕᤠ᤺ᤴᤏᤠᤸᤗᤥ॥ 16 ᤂᤠ᤹ᤔᤡ᤺ᤵᤐᤥ ᤏᤠᤶᤎᤡᤱᤃᤥᤴ ᤏᤡᤎᤠ᤺ᤵᤐᤡᤸᤗᤧ. ᤀᤠᤱᤃᤠ᤹ ᤂᤧᤴ ᤀᤥᤔᤧᤳᤋᤢᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤁᤢᤜᤡᤱᤘᤧᤳ ᤐᤠᤎᤢᤱᤛᤠᤜᤠ᤹ᤗᤢᤶᤔᤥ ᤁᤧᤒᤥᤱᤒᤠ ᤛᤍᤠᤍᤡᤱᤒᤠ ᤔᤠᤱᤜᤢᤵᤐᤡᤴ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥” 17 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣᤗ᤹ᤖᤡᤰ ᤏᤢᤜᤴ ᤔᤧᤳᤋᤢ. “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤁᤢᤜᤡᤱᤘᤧᤳ ᤐᤠᤎᤢᤱᤛᤠᤜᤠ᤹ ᤏᤢ ᤀᤠᤱᤃᤠ᤹ ᤀᤠᤗᤢᤶᤔᤥ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤸᤗᤧ ᤔᤡᤰᤛᤣ᤺ᤴᤏᤡᤴ ᤀᤠᤶᤓᤠ ᤁᤴᤗᤥ॥” ᤏᤢᤜ᤺ᤸᤗᤧ ᤁᤢᤛ᤻ᤛᤠᤜᤠ᤹ 18 ᤘᤠᤗᤠᤎᤠᤀᤥᤏᤢ ᤁᤧᤗ᤺ᤶᤒᤠ ᤏᤢᤜ᤺ᤸᤗᤧ ᤁᤢᤛ᤻ᤛᤠᤜᤠ᤹ ᤛᤣᤔ. ᤜᤠᤔ. ᤕᤧᤐᤧᤍ ᤔᤧᤘᤕᤧ॥ ᤜᤠᤔᤔᤧᤴ ᤁᤏᤠᤏᤗᤧ ᤁᤢᤶᤒᤠ ᤘᤕᤧ॥ 19 ᤏᤥᤜ᤺ᤸᤗᤧ ᤁᤢᤛ᤻ᤛᤠᤜᤠ᤹ ᤜᤠᤒᤠ ᤁᤴ ᤛᤢᤶᤛᤡ ᤔᤧᤘᤕᤧ. ᤁᤴᤜᤠ᤹ᤗᤠᤶᤒᤠᤀᤣ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤂᤠᤖᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤛᤧᤖᤥ॥ 20 ᤏᤢᤜᤴ ᤕᤠ᤺ᤴᤃᤧᤔᤒᤠ ᤁᤧᤈᤠᤒᤠ ᤐᤥ᤺ᤰᤂᤧ. ᤂᤢᤏᤧ᤹ᤀᤣ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤁᤧᤗᤣ᤺ᤵᤐᤠ ᤘᤕᤧ॥ 21 ᤂᤧᤸᤗᤧ ᤆᤧᤸᤗᤧᤰᤛᤣ᤹ ᤌᤡᤴ ᤌᤢᤅᤢ. ᤂᤧᤒᤩᤠᤱ ᤂᤢᤏᤧ᤹ ᤔᤕᤢᤀᤠᤱ ᤁᤢᤛᤠ᤺ᤱᤃᤠᤜᤡᤶ ᤛᤡᤃᤠᤱ ᤗᤧᤰᤆᤠ᤹ᤒᤢᤎᤢᤰ ᤀᤡᤵᤛᤧᤀᤠᤱ ᤏᤧᤛ᤻ᤛᤧ॥ 22 ᤁᤏᤠᤏᤗᤧ ᤁᤢᤶᤒᤠ ᤜᤠᤔᤧᤸᤗᤧ ᤀᤠᤒᤠᤅᤣ ᤁᤢᤶᤒᤠᤴ ᤗᤧᤰᤆᤠ᤹ᤒᤢᤎᤢᤰ ᤏᤧᤛ᤻ᤛᤧᤒᤠ ᤏᤡᤛᤢᤀᤠᤱ ᤗᤠ᤺ᤰᤁᤠᤳ ᤗ᤺ᤴᤍᤧᤒᤣ ᤜᤧᤰᤁᤩᤠᤱ ᤁᤢᤶᤓᤢ᤹ᤛᤡ ᤏᤧᤵᤔᤈᤠᤱ ᤆᤧᤰᤋᤢᤛᤡ॥ 23 ᤁᤖ ᤛᤣᤔᤧᤴ ᤏᤢ ᤕᤧᤐᤣᤳᤋᤧᤸᤗᤧ ᤗᤳᤇᤠ ᤆᤡᤖᤡᤰᤌᤡᤰ ᤕᤠᤱᤏᤧᤳᤇᤡ. ᤜᤧᤰᤁᤩᤠᤱ ᤏᤧᤵᤔᤠᤱᤗᤧ ᤂᤢᤴᤇᤡ᤹ ᤑᤰᤋᤠᤱᤅᤥ ᤑᤳᤇᤧᤇᤢ. ᤜᤧᤰᤁᤩᤠᤱ ᤀᤣᤃᤠᤱ ᤀᤣᤃᤠᤱ ᤛ᤺ᤴᤏᤧᤇᤡᤖ ᤐᤣᤃᤧᤳᤇᤡᤀᤠᤱ ᤂᤧᤱᤜᤠ᤹ᤖᤧ ᤗᤧᤰᤆᤠ᤹ᤒᤢᤎᤢᤰ ᤁᤧᤏᤧᤒᤠ ᤂᤢᤴᤇᤡ᤹ ᤐᤠᤴ ᤋᤧᤵᤋᤧᤳᤇᤢ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤖᤠᤴ ᤀᤣᤃᤠᤱ ᤗᤧᤵᤛᤠᤱ ᤜᤡᤛᤡᤱᤅᤠᤱ ᤐᤳᤇᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤴ ᤗᤧᤰᤆᤠ᤹ ᤏᤧᤛ᤻ᤛᤧᤒᤠ ᤔᤧᤏᤡᤛᤧᤳᤇᤢᤴ॥ 24 ᤏᤢᤜᤴ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤔᤔᤠ ᤗᤧᤖᤢᤸᤗᤧ ᤁᤢᤛ᤻ᤛᤠ ᤑᤥ᤺ᤰᤘᤠᤒᤠᤸᤗᤧ ᤆᤥᤃᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥᤛᤢ. 25 ᤂᤧᤒᤩᤠᤱᤃ ᤂᤧᤸᤗᤧ ᤐᤠ᤺ᤳᤋᤢ. “ᤁᤏᤠᤏᤏᤧᤴ ᤔᤠᤱᤍᤣ ᤛᤠᤱᤃᤪᤠᤖᤧ ᤋᤧᤳᤋᤢᤖᤥ. ᤂᤧᤱᤃ ᤁᤢᤶᤓᤢ᤹ᤛᤡᤖᤧ ᤂᤢᤴᤇᤡ᤹ ᤕᤥ᤺ᤃ᤻ᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤕᤥᤕᤥᤰᤐᤠ ᤕᤥᤃ᤻ᤒᤠ ᤐᤥᤱᤗᤥ॥” 26 ᤂᤧᤸᤗᤧ ᤀᤰᤂᤣᤀᤠᤱ ᤐᤠ᤺ᤳᤋᤢ. “ᤛᤣᤔᤧᤸᤗᤧ ᤁᤢᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥᤖᤖᤥ. ᤜᤧᤰᤁᤩᤠᤱ ᤁᤏᤠᤏᤧᤴ ᤂᤧᤸᤗᤧ ᤁᤢᤕᤥ᤺ᤃ᤻ᤒᤠ ᤐᤥᤱᤗᤖᤥ॥ 27 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤧᤐᤣᤳᤋᤧᤴ ᤐᤥ᤺ᤴᤌᤧ᤹ᤖ ᤕᤠ᤺ᤴᤍᤢᤖᤖᤥ. ᤂᤧᤴ ᤛᤣᤔᤧᤸᤗᤧ ᤁᤢᤛᤠ᤺ᤱᤃᤠ ᤜᤡᤶᤔᤥ ᤕᤠᤱᤎᤥ᤺ᤰᤗᤖᤥ. ᤜᤧᤰᤁᤩᤠᤱ ᤁᤏᤠᤏᤧᤱᤃ ᤕᤧᤐᤣᤳᤋᤧᤸᤗᤧ ᤁᤢᤕᤥ᤺ᤃ᤻ᤒᤠ ᤐᤥᤱᤗᤖᤥ॥” 28 ᤘᤍᤵᤔᤠ ᤌᤠᤅᤧᤀᤠᤱ ᤀᤣᤃᤠᤱ ᤏᤢᤜᤴ ᤁᤡᤵ ᤛᤢᤶᤛᤡᤀᤠᤱ ᤅᤠᤒᤥᤱ ᤋᤱᤒᤣ ᤌᤠᤖᤡᤰ ᤜᤡᤅᤧ॥ 29 ᤏᤢᤜᤴ ᤁᤧᤖᤧᤰᤗᤧ ᤁᤢᤃᤡᤵ ᤑᤠᤱᤛᤡᤀᤠᤱ ᤅᤠᤒᤥᤱ ᤋᤱᤒᤣ ᤁᤧᤖᤧᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤔᤠᤛᤡᤱ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.