ᤋᤥᤗᤡᤱᤛᤥᤔᤢ 8 - LIFOTNT

ᤘᤍᤵᤔᤠᤴ ᤆᤡᤒᤧᤒᤠ

¹ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤘᤠᤗᤠᤎᤠᤀᤥ ᤁᤧᤕᤠᤰᤐᤠ ᤏᤢᤜᤴ ᤏᤢ ᤁᤧᤖᤧᤰ ᤋᤠᤶᤓᤢᤱ ᤌᤰᤛᤠᤜᤠ᤹ ᤜᤧᤰᤁᤩᤠᤱ ᤜᤡᤶᤌᤰᤛᤠᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤢᤖᤡᤳ ᤁᤣᤈᤱ ᤜᤢᤖᤧᤖ ᤕᤠ᤺ᤴᤍᤢ. ᤜᤧᤰᤁᤩᤠᤱ ᤆᤫᤠ᤺ᤳᤋᤡᤴ ᤆᤒᤧᤖ ᤐᤣ॥

² ᤔᤢᤜᤡ᤺ᤰᤛᤥ ᤂᤠᤜᤡ᤺ᤰᤛᤥᤀᤥᤒᤠ ᤘᤒᤢᤴᤜᤠ᤹ ᤆᤡᤒᤧᤗᤠᤛᤧ ᤜᤧᤰᤁᤩᤠᤱ ᤋᤠᤱᤛᤠᤰᤐᤥᤒᤠ ᤘᤜᤡᤳᤗᤧᤴ ᤗᤠᤶᤎᤣ᤺ᤵᤐᤠᤜᤠ᤹ ᤛᤢᤒᤧ ᤜᤧᤰᤁᤩᤠᤱ ᤘᤜᤡᤳ ᤌᤠᤔᤠ ᤏᤠ᤹ᤖᤧ॥

³ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤆᤫᤠ᤺ᤳᤋᤡᤴ ᤌᤡᤰᤕᤠ᤺ᤴᤎᤰ ᤆᤒᤧᤖ ᤐᤣ॥ ᤁᤡᤵ ᤌᤡᤰᤁᤠᤱ ᤅᤠᤒᤥᤱ ᤕᤧᤴ ᤀᤣᤃᤠᤱ ᤆᤫᤠ᤺ᤳᤋᤡᤴ ᤕᤢᤔᤧ॥

⁴ ᤏᤢᤛᤡᤃᤣᤰᤐᤠ ᤗᤠ᤺ᤸᤗᤧ ᤌᤡᤒᤥᤱᤅᤠᤱ ᤏᤢᤛᤡ ᤕᤧᤴᤏᤥ ᤘᤠᤗᤠᤎᤠᤴ ᤀᤠᤖᤠᤖᤠᤋᤒᤠ ᤁᤥ᤺ᤰᤔᤠᤜᤠ᤹ᤀᤥ ᤏᤠ᤺ᤶᤛᤡᤱ॥

⁵ ᤌᤡᤒᤥᤱ ᤗᤠ ᤌᤠᤖᤡᤰ ᤆᤫᤠ᤺ᤳᤋᤡᤴ ᤌᤡᤰᤕᤠ᤺ᤴᤎᤰ ᤆᤒᤧᤖ ᤐᤣ॥ ᤌᤡᤒᤥᤱ ᤗᤠ ᤁᤧᤖᤧᤒᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤁᤥ᤺ᤰᤔᤠᤜᤠ᤹ᤖᤧ ᤁᤢᤛᤶᤜᤠ᤹ ᤏᤡᤎᤠᤒᤧ॥

⁶ ᤗᤡᤒᤥᤱ ᤕᤧᤴ ᤀᤣᤃᤠᤱ ᤏᤢᤜ᤺ᤸᤗᤧ ᤆᤥᤃᤢᤒᤠ ᤘᤠᤗᤠᤎᤠᤀᤥᤒᤠ ᤐᤣᤎᤠ᤺ᤵᤐᤡᤴ ᤂᤢᤏᤧ᤹ ᤜᤴᤍᤢ॥

⁷ ᤜᤧᤰᤁᤩᤠᤱ ᤗᤳᤇᤠ ᤁᤠ᤺ᤰᤘᤠᤎᤡᤰ ᤑᤧᤛᤢᤍᤣᤛᤢ. ᤜᤧᤰᤁᤩᤠᤱ ᤂᤠᤶᤒᤣ᤺ᤰᤔᤥᤒᤠ ᤆᤫᤠ᤺ᤳᤋᤡᤴ ᤔᤧᤴᤈᤵᤐᤣ ᤌᤠᤖᤡᤰ ᤂᤧᤴ ᤁᤠ᤺ᤰᤘᤠᤴ ᤏᤠ ᤏᤢ ᤁᤳᤏᤠ ᤐᤧᤖᤧᤖ ᤘᤕᤧ॥

⁸ ᤂᤧᤒᤩᤠᤱ ᤏᤢᤜ᤺ᤸᤗᤧ ᤂᤠᤶᤒᤣ᤺ᤰᤔᤥ ᤆᤫᤠ᤺ᤳᤋᤡᤴ ᤕᤢᤔᤧᤒᤡ ᤑᤠᤀᤠᤱ ᤗᤳᤇᤠ ᤐᤢᤳᤋᤢ᤺ᤰᤁᤣ ᤌᤡᤰᤁᤠᤱ ᤑᤧᤛᤢᤍᤣᤛᤢ॥

⁹ ᤂᤧᤴ ᤐᤢᤳᤋᤢ᤺ᤰᤁᤣ᤺ᤸᤗᤧ ᤗᤠᤱ ᤋᤥ᤹ᤔᤠᤍᤧᤴ ᤔᤧᤄᤥᤛᤢᤴᤏᤠᤱ ᤂᤧᤴ ᤂᤢᤏᤧ᤹ᤀᤥᤀᤣ ᤘᤠᤗᤠᤎᤠᤀᤥ ᤏᤢ᤺ᤰᤂᤧᤍᤩᤧ. ᤌᤣᤀᤠᤱᤓᤧᤸᤗᤧ ᤂᤠᤶᤒᤣ᤺ᤰᤔᤥ ᤀᤠᤸᤗᤛᤠᤱ ᤆᤫᤠ᤺ᤳ ᤏᤧᤛ᤻ᤛᤧ॥ ᤂᤧᤒᤩᤠᤱ ᤏᤢᤜ᤺ᤸᤗᤧ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤂᤧᤴ ᤐᤢᤳᤋᤢ᤺ᤰᤁᤣᤴ ᤋᤧᤶᤛᤢᤀᤠᤱ ᤂᤢᤏᤧ᤹ᤏᤢ ᤘᤠᤗᤠᤎᤠᤀᤥ ᤁᤣ᤺ᤳᤋᤢ॥

¹⁰ ᤜᤧᤰᤁᤩᤠᤱ ᤕᤠᤶᤔᤥ ᤏᤢᤛᤡ ᤕᤧᤴ ᤜᤠᤱᤄᤢᤀᤠᤱ ᤂᤢᤏᤧ᤹ ᤂᤧᤴ ᤐᤢᤳᤋᤢ᤺ᤰᤁᤣᤴ ᤘᤠᤗᤠᤎᤠᤀᤥᤗᤠᤶ ᤑᤧᤛᤢᤍᤣᤛᤢ॥

¹¹ ᤂᤧᤴ ᤐᤢᤳᤋᤢ᤺ᤰᤁᤣᤴ ᤕᤢ᤺ᤴᤇᤡᤰ ᤂᤢᤏᤧ᤹ᤀᤥ ᤏᤢ᤺ᤰᤂᤧᤍᤩᤧ॥ ᤂᤧᤸᤗᤧ ᤁᤢᤶᤒᤪᤠᤀᤥ ᤂᤠᤖᤰ ᤋᤢᤵᤔᤏᤠᤒᤠ ᤐᤧ᤺ᤱᤘᤠᤗᤡ᤺ᤳᤇᤣᤸᤗᤧ ᤁᤢᤓᤧᤰᤘᤠᤎᤡᤰ ᤑᤡ᤺ᤳᤋᤢᤀᤠᤱ ᤐᤳᤇᤧ॥ ᤂᤧᤒᤩᤠᤱ ᤆᤫᤠ᤺ᤳᤋᤡᤴ ᤂᤠᤶᤒᤣ᤺ᤰᤔᤥ ᤕᤢᤔᤧᤖᤳᤇ ᤁᤧᤗ᤹ᤒᤠ ᤏᤢᤜ᤺ᤸᤗᤧ ᤏᤡᤱᤘᤠ᤹ ᤂᤥᤛᤢ॥

¹² ᤂᤧᤒᤩᤠᤱ ᤂᤢᤏᤧ᤹ ᤘᤣ᤹ ᤏᤢᤛᤡ ᤕᤧᤴ ᤜᤠᤱᤄᤢᤀᤠᤱ ᤂᤧᤴ ᤐᤢᤳᤋᤢ᤺ᤰᤁᤣᤴ ᤕᤠᤶᤔᤥ ᤑᤧᤛᤢᤍᤣᤛᤢ. ᤁᤖ ᤁᤴᤇᤢᤔᤥ ᤂᤧᤴ ᤂᤢᤏᤧ᤹ᤀᤥ ᤔᤧᤏᤢ᤺ᤰᤂᤧᤴ ᤔᤧᤍᤩᤧᤏᤧᤴ॥

¹³ ᤏᤢᤜᤴ ᤁᤡᤵ ᤋᤢᤰᤛᤡᤀᤠᤱ ᤋᤱᤒᤣᤎᤡᤰ ᤁᤧᤖᤧᤒᤠ ᤌᤡᤰᤛᤡᤃᤣᤰᤐᤠ ᤗᤠ᤺ᤸᤗᤧ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤆᤫᤠ᤺ᤳᤋᤡᤴ ᤆᤒᤧ. ᤜᤧᤰᤁᤩᤠᤱ ᤏᤢᤜ᤺ᤸᤗᤧ ᤘᤠᤗᤠᤎᤠᤀᤥᤒᤠ ᤂᤠᤶᤒᤢᤴ ᤜᤴᤍᤢᤀᤠᤱ ᤀᤥᤔᤧᤳᤋᤢᤸᤗᤧ ᤂᤠᤶᤒᤣ᤺ᤰᤔᤧᤴ ᤛᤧᤱᤛᤧᤱᤒᤠ ᤏᤡᤛᤢ॥

¹⁴ ᤜᤧᤰᤁᤩᤠᤱ ᤏᤡᤛᤡᤃᤣᤰᤐᤠ ᤗᤠ᤺ᤸᤗᤧ ᤏᤡᤒᤥᤱᤅᤠᤱ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤂᤠᤶᤒᤣ᤺ᤰᤔᤧᤴ ᤁᤧᤖᤧᤰ ᤜᤣᤖᤧ॥

¹⁵ ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢᤜᤴ ᤔᤧᤳᤋᤢ.

¹⁶ “ᤂᤧᤏᤧ᤹. ᤔᤧᤸᤗᤡᤱᤃᤧᤴ ᤁᤧᤔᤣ᤺ᤳᤋᤡᤴ. ᤁᤧᤛ᤻ᤛᤠᤜᤠ᤹ ᤜᤧᤰᤁᤩᤠᤱ ᤁᤧᤶᤒᤠᤱᤗᤡᤜᤠ᤹ ᤘᤠᤗᤠᤎᤠᤀᤥᤗᤠᤶ ᤗ᤺ᤴᤍᤧᤶᤔᤧ᤹॥

¹⁷ ᤂᤧᤏᤧ᤹ᤏᤢ ᤁᤧᤘᤠ᤹ᤒᤠ ᤁᤢᤛᤰᤔᤠ ᤁᤧᤕᤠᤰᤐᤠ ᤁᤧᤖᤧᤰ—ᤌᤰᤛᤠᤜᤠ᤹. ᤜᤧᤰᤁᤩᤠᤱ ᤐᤢᤛᤠᤜᤠ᤹. ᤂᤧᤒᤩᤠᤱ ᤁᤧᤀᤢ᤺ᤱᤛᤡᤱᤒᤠ ᤌᤰᤛᤠᤜᤠ᤹ ᤁᤧᤖᤧᤰ ᤗᤠ᤺ᤰᤁᤠᤳ ᤗ᤺ᤳᤋᤧᤛᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤧᤒᤥᤴ ᤔᤧᤎᤧ᤹ᤀᤠᤱ ᤕᤖᤡᤰ ᤔᤧᤒᤥᤱᤗ ᤔᤧᤒᤣ᤺ᤰᤗ॥”

¹⁸ ᤂᤧᤒᤩᤠᤱ ᤏᤢᤜᤴ. ᤔᤧᤸᤗᤡᤱᤃᤧᤴ ᤁᤢᤔᤣ᤺ᤳᤋᤡᤴ. ᤁᤢᤛ᤻ᤛᤠᤜᤠ᤹. ᤜᤧᤰᤁᤩᤠᤱ ᤁᤢᤶᤒᤠᤱᤗᤡᤜᤠ᤹ ᤘᤠᤗᤠᤎᤠᤀᤥᤗᤠᤶ ᤔᤧᤗ᤺ᤴᤍᤧ॥

¹⁹ ᤜᤧᤰᤁᤩᤠᤱ ᤀᤡᤰᤛᤠᤅᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤖᤡᤰᤐᤠ ᤁᤢᤗᤡ᤺ᤴᤒᤠ ᤌᤰᤛᤠᤜᤠ᤹. ᤁᤧᤀᤢ᤺ᤱᤛᤡᤱᤒᤠ ᤁᤧᤛ᤺ᤴᤇᤡᤱᤒᤠ ᤌᤰᤛᤠᤜᤠ᤹. ᤐᤢᤛᤠᤜᤠ᤹ ᤘᤠᤗᤠᤎᤠᤀᤥᤗᤠᤶ ᤔᤧᤗ᤺ᤴᤍᤧ॥

ᤏᤢᤜ᤺ᤸᤗᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤴᤍᤢ᤹

²⁰ ᤜᤧᤰᤁᤩᤠᤱ ᤏᤢᤜ᤺ᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤎᤡᤰ ᤆᤥᤃᤢᤀᤠᤱ ᤁᤧᤖᤧᤰ ᤐᤖᤡᤰᤐᤠ ᤛᤢᤳᤌᤥ ᤌᤰᤛᤠ ᤏᤢ ᤛᤢᤳᤌᤥ ᤐᤢᤛᤠᤜᤠ᤹ᤀᤥᤗᤠᤶ ᤔᤡᤎᤡᤱᤔᤏᤠᤒᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤗᤧᤳᤋᤡ ᤋᤥ᤺ᤴᤍᤢ॥

²¹ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤴ ᤁᤢᤏᤠᤶᤃᤧᤏᤢ᤹ᤒᤠ ᤛᤡᤍᤢᤱᤈᤓᤠ ᤔᤡ᤺ᤰᤂᤢ᤹ᤀᤡᤴ ᤏᤠᤶᤛᤢᤀᤠᤱ ᤁᤢᤏᤡᤱᤘᤠ᤹ᤀᤥ ᤐᤠ᤺ᤳᤋᤢ. “ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤢᤏᤡᤱᤘᤠ᤹ᤀᤥᤒᤠ ᤐᤠ᤺ᤴᤜᤠ᤹ ᤂᤢᤏᤧ᤹ ᤆᤢ᤺ᤰᤁᤠᤱᤎᤥᤛᤠ ᤋᤠᤵᤑᤧ᤺ᤶᤒᤠ ᤆᤥᤰ. ᤜᤧᤰᤁᤣᤛᤠᤱ ᤋᤠᤵᤑᤧ᤺ᤶᤒᤠ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤛᤠᤰᤔᤢᤖᤠ ᤔᤧᤔᤧᤳᤋᤠᤴ॥ ᤀᤠᤸᤗᤥ ᤆᤥᤃᤢᤱᤒᤠ ᤁᤢᤀᤡᤛᤡᤰ ᤁᤧᤖᤧᤰ ᤌᤰᤛᤠᤐᤢᤛᤠᤜᤠ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤔᤧᤔᤧᤱᤅᤠᤛᤡᤅᤡᤴ॥

²² “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤧᤖ ᤌᤠᤖᤡᤰ ᤕᤠ᤹ᤖᤡᤶᤒᤠ ᤗᤧᤵᤔᤠ ᤏᤢ ᤁᤢᤈᤠ ᤛᤢᤶᤔᤠ ᤕᤧᤶ. ᤛᤣ᤺ᤶᤔᤠ ᤏᤢ ᤁᤥᤔᤠ. ᤜᤠᤱᤘᤠᤔᤠ ᤏᤢ ᤆᤢᤱᤈᤡ᤺ᤰᤔᤠ. ᤜᤧᤰᤁᤩᤠᤱ ᤗᤧᤴᤍᤡᤰ ᤏᤢ ᤛᤧᤴᤍᤡᤰ ᤀᤠᤓᤧᤸᤗᤧᤀᤠᤱ ᤔᤧᤏᤢᤵᤏᤧᤸᤗᤥ॥”