ᤋᤥᤗᤡᤱᤛᤥᤔᤢ 49 - LIFOTNTᤕᤠᤒᤢᤒᤖᤧ ᤁᤢᤏᤢᤵᤔᤠ ᤁᤢᤒᤠ᤺ᤴᤇᤣ᤺ᤰᤘᤠᤜᤠ᤹ 1 ᤂᤧᤒᤩᤠᤱ ᤕᤠᤁᤢᤒᤖᤧ ᤁᤢᤛ᤻ᤛᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤁ᤹ᤕᤥ ᤆᤢᤵᤛᤧᤶᤔᤧ᤹. ᤜᤧᤰᤁᤩᤠᤱ ᤋᤠ᤺ᤴᤍᤡ ᤂᤡᤏᤡ᤹ ᤌᤣᤎᤣ ᤁᤧᤍᤢᤔᤢᤶ ᤂᤧᤴ ᤀᤠᤱᤃᤠ᤹ ᤔᤧᤳᤏᤡᤱᤗᤥ॥ 2 “ᤕᤠᤁᤢᤒᤖᤧ ᤁᤢᤛ᤻ᤛᤠᤛᤣ. ᤆᤢᤵᤛᤧᤶᤔᤧ᤹ᤀᤠᤱ ᤂᤧᤵᤛᤧᤶᤔᤧ᤹ᤀᤥ. ᤂᤡᤏᤡ᤹ ᤐᤠ ᤀᤡᤛᤪᤠᤀᤡᤗᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥ 3 “ᤖᤢᤒᤧᤴᤏᤣ. ᤂᤧᤏᤧ᤹ ᤀᤠᤱᤃᤠ᤹ ᤋᤢᤶᤒᤠ ᤀᤠᤛ᤻ᤛᤠᤏᤧᤖᤥ. ᤀᤠᤔᤢᤰᤛᤠᤶ ᤏᤢ ᤀᤠᤛᤠ᤹ᤀᤡᤖᤧ ᤋᤃᤡᤒᤠ ᤀᤠᤛ᤻ᤛᤠᤏᤧᤖᤥ. ᤔᤡᤔᤡᤍᤡᤱ ᤏᤢ ᤔᤢᤰᤛᤠᤶᤔᤥ ᤁᤧᤖᤧᤰᤏᤢ᤺ᤸᤗᤧ ᤁᤧᤕᤧ᤺ᤰᤐᤠᤏᤧᤖᤥ॥ 4 ᤆᤫᤠ᤺ᤳ ᤜᤧᤰᤋᤱᤒᤠ ᤂᤧᤏᤧ᤹ ᤁᤧᤗᤧ᤺ᤱᤒᤠᤀᤠᤱ ᤁᤧᤘᤠ᤹ᤒᤠᤏᤧᤖᤥ. ᤁᤧᤔᤡᤱᤛᤥ ᤁᤧᤎᤠᤱᤛᤥᤖᤧ ᤁᤧᤴᤍᤰᤏᤧᤸᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤀᤡᤵᤏᤠᤀᤥ ᤁᤧᤗᤠᤛᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤣ᤺ᤳᤋᤧᤴᤏᤢ ᤁᤧᤀᤡᤵᤛᤧ. ᤜᤧᤰᤁᤩᤠᤱ ᤂᤧᤴ ᤀᤠᤛᤢᤳᤌᤥ ᤁᤧᤈᤥᤃᤢᤖᤥ॥ 5 “ᤛᤡᤔᤡᤕᤥᤏ ᤏᤢ ᤗᤧᤒᤡᤴ ᤁᤢᤶᤓᤢ᤹ ᤁᤢᤴᤛᤠ᤹ᤛᤡᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤠᤓᤣ᤺ᤴᤏᤣ ᤜᤕᤱᤋᤧᤴᤎᤱ ᤁᤧᤈᤥ᤺ᤰᤐᤠᤖᤥ. 6 ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤢᤶᤗᤢᤱᤅᤥ ᤔᤧᤍᤠᤀᤠᤴᤗᤥ. ᤀᤠᤱᤃᤠ᤹ ᤂᤧᤱᤜᤠ᤹ᤏᤢ ᤘᤠ᤹ᤔᤠ ᤔᤧᤒᤥᤱᤏᤧᤸᤗᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰ ᤐᤥᤃᤧᤸᤗᤧ ᤔᤏᤠᤜᤠ᤹ ᤛᤧᤖᤧᤳᤇᤢᤛᤡᤀᤠᤱ ᤘᤠ᤹ᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤖᤠ᤹ᤌᤠᤱᤎᤠᤱ ᤐᤡᤳᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤛᤠ᤹ᤀᤡ ᤜᤧᤃᤧᤇᤢ ᤐᤡᤖᤧᤳᤇᤢᤛᤡᤀᤠᤱ ᤘᤠ᤹ᤖᤥ॥ 7 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤐᤥ᤺ᤰᤔᤥ ᤛᤠᤱᤃᤪᤠ᤺ᤸᤗᤧ ᤋᤧᤳᤋᤢᤛᤡᤖᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤆᤥᤰᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤰᤁᤧᤴ ᤆᤶᤔᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤛᤡᤰᤋᤥ᤺ᤰᤏᤠ ᤆᤥ᤺ᤰᤛᤡᤖᤥ॥ ᤂᤧᤱᤜᤠ᤹ ᤀᤠᤱᤃᤠ᤹ ᤕᤠᤁᤢᤒᤖᤧᤀᤥ ᤛᤧᤛᤢᤱᤍᤣᤛᤢᤛᤡᤱ᤹. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤀᤥ ᤂᤧᤱᤜᤠ᤹ ᤑᤢᤳᤇᤡᤱᤇ᤻ᤕᤠ᤺ᤱ ᤛᤧᤛᤢᤛᤡᤱ᤹॥ 8 “ᤕᤜᤢᤍᤠᤀᤣ. ᤁᤧᤶᤓᤢ᤹ ᤁᤧᤴᤛᤠ᤹ᤛᤡᤖᤧ ᤂᤧᤏᤧ᤹ ᤁᤧᤏᤠᤖᤠ ᤔᤧᤓᤥᤛᤢᤖᤥ. ᤁᤧᤜᤢᤰᤁᤡᤸᤗᤧ ᤁᤧᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤛᤡᤳᤗᤠ ᤕ᤹ᤖᤢᤖᤥ. ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤛ᤻ᤛᤠᤜᤠ᤹ ᤂᤧᤏᤧ᤹ ᤁᤧᤍᤃᤡ ᤛᤠᤶᤒᤥᤴ ᤜᤒᤳ ᤔᤧᤒᤳᤗᤥ॥ 9 ᤕᤜᤢᤍᤠᤴ ᤌᤧᤖᤡᤱᤒᤧᤸᤗᤧ ᤁᤢᤛ᤻ᤛᤠᤖᤥ. ᤀᤠᤛ᤻ᤛᤠᤀᤣ. ᤂᤧᤏᤧ᤹ ᤛᤠ ᤁᤧᤏᤠ᤺ᤳᤋᤢᤀᤠᤱ ᤁᤧᤏᤢ᤺ᤰᤂᤧ ᤁᤧᤍᤧᤀᤠᤱ ᤁᤧᤘᤠ᤹ᤖᤥ. ᤌᤧᤖᤡᤱᤒᤧᤴ ᤜᤧᤰᤁᤣ ᤂᤧᤴ ᤌᤡᤱᤛᤡᤱᤅᤠᤱ ᤏᤧᤖᤥ. ᤌᤧᤖᤡᤱᤔᤧᤴ ᤜᤧᤰᤁᤣ ᤜᤠ᤺ᤳᤗᤧ ᤂᤧᤴ ᤑᤥᤱᤔᤠ ᤁᤥ᤺ᤳᤋᤢᤒᤣ᥅ 10 ᤕᤜᤢᤍᤠ᤺ᤸᤗᤧ ᤁᤢᤜᤢᤰᤁᤥᤗᤠᤶ ᤜᤠᤱᤋᤰᤁᤠ᤺ᤳᤋᤡᤴ ᤔᤧᤗᤧᤳᤏᤧᤸᤗᤥ. ᤁᤢᤴᤍᤠᤱᤒᤧᤴ ᤔᤧᤴᤍᤠᤀᤣ ᤌᤠᤖᤡᤰ ᤜᤠᤱᤈᤢᤶᤔᤥ ᤀᤥᤃᤵ ᤁᤧᤒᤥᤱᤒᤠ ᤋᤰᤁᤠ᤺ᤳᤋᤡᤴ ᤁᤢᤗᤠᤱᤓᤡ᤺ᤵᤔᤥᤗᤠᤶ ᤔᤧᤈᤳᤏᤧᤸᤗᤥ॥ ᤜᤧᤰᤁᤩᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤢᤏᤧ᤹ ᤔᤧᤳᤋᤢᤛᤡᤒᤠ ᤐᤠ᤺ᤴᤏᤡᤴ ᤂᤧᤶᤔᤠ ᤁᤧᤍᤧᤶᤒᤠ ᤔᤧᤒᤥᤱᤗᤥ॥ 11 ᤂᤧᤸᤗᤧ ᤁᤢᤀᤍᤱᤅᤡᤴ ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱᤅᤥ ᤏᤢ ᤁᤢᤀᤍᤱᤛᤠ᤺ᤳᤋᤡᤴ ᤏᤢᤒᤠ ᤐᤖᤡᤰᤗᤧᤴ ᤆᤧᤸᤗᤧᤰᤛᤣᤸᤗᤧ ᤁᤢᤒᤥᤖᤠᤰᤁᤥ ᤀᤡᤄᤣ᤺ᤰᤂᤢᤖᤥ॥ ᤂᤧᤸᤗᤧ ᤁᤢᤈᤠᤱᤜᤠ᤹ ᤆᤧᤸᤗᤧᤰᤛᤣ᤹ ᤌᤡᤀᤥ. ᤂᤢᤏᤧ᤹ ᤆᤧᤸᤗᤧᤰᤛᤣᤸᤗᤧ ᤁᤢᤘᤠᤀᤥ ᤁᤢᤍᤣ᤺ᤳᤜᤠ᤹ ᤘᤠᤜᤵᤋᤢᤖᤥ॥ 12 ᤂᤧᤸᤗᤧ ᤁᤢᤔᤡᤰᤁᤡᤴ ᤆᤧᤸᤗᤧᤰᤛᤣ᤹ ᤌᤡ᤺ᤴᤏᤢ᤺ᤸᤗᤧᤀᤠᤱ ᤜᤧ᤺ᤳᤋᤠᤱᤒᤠ. ᤜᤧᤰᤁᤩᤠᤱ ᤁᤢᤜᤠᤒᤥᤴ ᤐᤡᤳᤏᤢᤏᤢ᤺ᤸᤗᤧᤀᤠᤱ ᤑᤍᤠᤱᤒᤠ ᤐᤥᤱᤗᤥ॥ 13 “ᤈᤒᤢᤗᤢᤏᤖᤧ ᤁᤢᤕᤠᤱᤎᤥ᤺ᤰᤔᤠ ᤋᤧᤴ ᤘᤖ᤺ᤱᤅᤡᤸᤗᤧ ᤁᤢᤕᤠᤴ ᤐᤥᤱᤗᤥ. ᤘᤠᤗᤠᤎᤠᤜᤠ᤹ᤖᤧ ᤗᤠᤃᤡ ᤂᤧᤴ ᤘᤠᤗᤠᤎᤠᤂᤣ᤺ᤱ ᤐᤥᤱᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤀᤡ᤺ᤴᤍᤥᤴ ᤛᤡᤍᤥᤏ ᤌᤠᤖᤡᤰ ᤐᤥᤱᤗᤥ॥ 14 “ᤀᤡᤛ᤻ᤛᤠᤁᤠᤖᤧᤴ ᤏᤧᤳᤇᤡ ᤁᤰᤜᤠ᤹ᤖᤧ ᤁᤢᤗᤢᤶᤔᤥ ᤁᤧᤏᤧᤒᤠ ᤁᤧᤎᤢᤶᤒᤠ ᤀᤍᤱᤗᤥ॥ 15 ᤂᤢᤏᤧ᤹ ᤁᤢᤏᤠ᤺ᤶᤛᤡᤱᤔᤠ ᤋᤧᤴᤏᤡᤴ ᤏᤢᤒᤠ ᤆᤥᤰ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤗᤠᤈᤣᤴ ᤛᤡᤰᤁᤧᤛᤶᤒᤠ ᤆᤥᤰ ᤁᤧᤗ᤹ᤒᤠᤴ ᤏᤡᤛᤢᤀᤠᤱ. ᤂᤧᤸᤗᤧ ᤁᤰ ᤁᤢᤔᤠᤖᤧ ᤗᤠᤃᤡ ᤁᤢᤓᤰᤋᤠᤱᤅᤡᤴ ᤛᤥᤖᤥ ᤔᤧᤳᤋᤢᤖᤥ. ᤜᤧᤰᤁᤩᤠᤱ ᤛᤧᤘᤠᤖᤥᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤋᤧᤴᤗᤥ॥ 16 ᤍᤠᤏᤧᤴ ᤀᤡᤛᤪᤠᤀᤡᤗᤒᤠ ᤌᤠ᤺ᤰᤜᤠ᤹ᤀᤥᤒᤠ ᤗᤳᤇᤠ ᤐᤥᤱᤅᤠᤱ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤗᤠᤃᤡ ᤂᤠᤛᤧᤴ ᤆᤥᤃᤢᤖᤥ॥ 17 ᤍᤠᤏᤧᤴᤃ ᤗᤠᤶᤔᤥ ᤁᤧᤏᤧᤒᤠ ᤀᤛ᤻ᤛᤣ᤺ᤰᤗᤥ. ᤜᤧᤰᤁᤩᤠᤱ ᤆᤢ᤺ᤰᤐᤠ ᤗᤠᤶᤔᤥ ᤁᤧᤏᤧᤒᤠ ᤁᤢᤏᤡᤱ ᤁᤧᤕᤠᤰᤐᤠ ᤀᤛ᤻ᤛᤣ᤺ᤰᤗᤥ. ᤂᤧᤸᤗᤧ ᤀᤴᤏᤧᤸᤗᤧ ᤁᤢᤗᤠᤱᤃᤠᤰᤌᤡ᤺ᤶᤒᤧᤴ ᤀᤃᤢᤖᤥ. ᤜᤧᤰᤁᤩᤠᤱ ᤀᤴ ᤁᤧᤕᤢᤰᤐᤧᤴ ᤂᤧᤸᤗᤧ ᤁᤢᤀᤣᤃᤠᤱ ᤗᤧᤵᤛᤠᤱ ᤗᤧᤱᤗᤥ॥ 18 “ᤕᤜᤘᤣ ᤍᤠᤱᤒᤣ. ᤂᤧᤏᤧ᤹ ᤁᤧᤍᤠᤱᤃᤧᤛᤧ᤺ᤵᤔᤠᤴ ᤜᤠᤱᤛᤢᤱᤗ ᤕᤢᤱᤀᤧᤖᤥ॥ 19 “ᤃᤠᤍᤧᤴ ᤗᤳᤇᤠ ᤔᤏᤠ ᤗᤢᤵᤗᤧ ᤑᤵᤔᤠᤃ ᤔᤧᤓᤳᤋᤢ᤹. ᤁᤖ ᤂᤧᤸᤗᤧᤏᤣ ᤂᤧᤱᤜᤠ᤹ ᤏᤠ᤺ᤳᤋᤢᤛᤡᤖ ᤑᤳᤋᤢᤛᤡ᤹॥ 20 “ᤀᤠᤛᤣᤖᤧᤸᤗᤧ ᤑᤳᤇᤢᤒᤠ ᤁᤢᤈᤠᤴ ᤏᤢᤒᤠ ᤐᤥᤱᤗᤥ. ᤂᤧᤸᤗᤧ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤆᤠᤔᤠ ᤁᤢᤈᤠ ᤐᤡᤖᤢᤛᤡᤖ॥ 21 “ᤏᤵᤋᤠᤗᤡᤴ ᤗᤧᤵᤔᤏᤠᤒᤠ ᤐᤧ᤺ᤱᤘᤠ᤹ ᤔᤠᤖᤥ. ᤂᤧᤸᤗᤧ ᤏᤢ᤺ᤒ᤻ᤏᤢᤒᤠ ᤐᤧ᤺ᤱᤘᤠᤛᤠ᤺ᤳ ᤌᤠᤵᤋᤢᤛᤡᤖᤥ॥ 22 “ᤕᤢᤛᤢᤑᤧᤴ ᤁᤢᤈᤠ᤹ ᤀᤡᤛ᤻ᤛᤣ᤺ᤱᤒᤠ ᤀᤡᤘᤠ᤺ᤳᤗᤥ. ᤘᤒᤢᤴᤍᤠᤰᤁᤡᤸᤗᤧ ᤁᤢᤒᤣᤛᤠᤱᤒᤠ ᤁᤢᤈᤠ᤹ ᤁᤧᤒᤵᤐᤠ ᤁᤢᤀᤡᤘᤠ᤺ᤳᤗᤥ. ᤂᤧᤸᤗᤧ ᤁᤢᤒᤥᤖᤠᤰᤜᤠ᤹ ᤗᤢᤱᤎᤠᤰ ᤆᤱ ᤜᤧ᤹ᤕᤥ ᤋᤠᤵᤐᤣ᤺ᤰᤗᤥ॥ 23 ᤋᤥᤱ ᤗᤡ ᤁᤧᤕᤠᤱᤒᤠᤜᤠ᤹ᤖᤧ ᤂᤧᤴ ᤛᤠ᤹ᤖᤡᤰ ᤋᤢᤰᤂᤣ ᤔᤧᤈᤠ᤺ᤳᤋᤢᤖᤥ. ᤂᤧᤴ ᤋᤥ᤺ᤱᤅᤡᤸᤗᤧ ᤔᤧᤀᤠᤒᤢ. ᤜᤧᤰᤁᤩᤠᤱ ᤂᤧᤴ ᤔᤧᤏᤠ᤺ᤳᤋᤢ॥ 24 ᤜᤧᤰᤁᤣᤛᤠᤱ ᤂᤧᤸᤗᤧ ᤁᤢᤗᤡᤴ ᤁᤧᤈᤠ᤹ᤒᤠᤀᤣ ᤆᤥᤃᤧᤖᤥ. ᤜᤧᤰᤁᤩᤠᤱ ᤁᤢᤜᤢᤰᤜᤠ᤹ ᤁᤧᤎᤢᤶᤒᤠᤀᤣ ᤐᤥ᤺ᤰᤂᤧᤖᤥ. ᤕᤠᤁᤢᤒᤖᤧ ᤔᤢᤰᤛᤠᤶᤛᤠᤒᤧᤸᤗᤧ ᤁᤢᤜᤢᤰᤁᤡᤸᤗᤧ ᤆᤥᤃᤢᤸᤗᤧ. ᤀᤡᤛᤪᤠᤀᤡᤗᤒᤠ ᤕᤠᤰᤐᤣ᤹. ᤔᤧᤸᤗᤢᤰ ᤁᤶᤒᤠᤸᤗᤧ ᤆᤥᤃᤢᤸᤗᤧ. 25 ᤀᤡᤃᤪ ᤂᤧᤏᤧ᤹ ᤁᤧᤓᤠ᤹ᤒᤠᤱ ᤁᤧᤶᤒᤠᤖᤧ ᤁᤢᤏᤡᤱᤘᤠ᤹ᤑᤢᤔᤠᤱ. ᤂᤢᤏᤧ᤹ ᤁᤧᤓᤠ᤹ᤖᤥ. ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱ. ᤂᤢᤏᤧ᤹ ᤂᤧᤏᤧ᤹ ᤜᤠᤱᤘᤠ ᤔᤢ᤹ᤀᤡᤛᤠᤶ ᤁᤧᤒᤡᤖᤥ— ᤌᤥ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤘᤠ ᤔᤢ᤹ᤀᤡᤛᤠᤶᤜᤠ᤹. ᤁᤢᤍᤡᤶᤒᤣ ᤁᤣ᤺ᤶᤒᤠ ᤘᤒᤢᤴᤜᤠ᤹ᤀᤥᤒᤠ ᤜᤠᤱᤘᤠ ᤔᤢ᤹ᤀᤡᤛᤠᤶᤜᤠ᤹. ᤏᤢ ᤜᤧᤰᤁᤩᤠᤱ ᤛᤠᤵᤐᤥ᤺ᤰᤁᤥᤒᤠ ᤜᤠᤱᤘᤠ ᤔᤢ᤹ᤀᤡᤛᤠᤶᤜᤠ᤹॥ 26 ᤁᤧᤶᤒᤠᤖᤧ ᤁᤢᤜᤠᤱᤘᤠ ᤔᤢ᤹ᤀᤡᤛᤠᤶᤜᤠ᤹ ᤀᤢᤴᤇᤣ᤺ᤴᤒᤠ ᤌᤧᤃᤢ ᤔᤠᤱᤘᤠᤜᤠ᤹ᤀᤥᤒᤠ ᤜᤠᤱᤘᤠ ᤔᤢ᤹ᤀᤡᤛᤠᤶᤜᤠ᤹ᤏᤢ᤺ᤸᤗᤧᤀᤠᤱ ᤜᤧᤰᤁᤩᤠᤱ ᤛᤍᤠᤍᤡᤱ ᤁᤧᤏᤧᤒᤠ ᤁᤥ᤺ᤰᤔᤠᤜᤠ᤹ᤀᤥᤒᤠ ᤜᤠᤱᤘᤠ ᤔᤢ᤹ᤀᤡᤛᤠᤶᤜᤠ᤹ᤏᤢ᤺ᤸᤗᤧᤀᤠᤱ ᤔᤢᤰᤛᤠᤶᤒᤠ ᤆᤥᤰᤗᤥ॥ ᤂᤧᤴ ᤁᤧᤖᤧᤰ ᤔᤢ᤹ᤀᤡᤛᤠᤶᤜᤠ᤹ ᤕᤢᤛᤢᤑᤖᤧ ᤁᤢᤎᤧᤃᤣ᤺ᤰᤁᤥ ᤆᤢᤰᤗᤖᤥ. ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ᤀᤥ ᤗᤠᤶᤗᤥᤒᤠ ᤁᤧᤒᤥᤱᤒᤠ ᤕᤢᤛᤢᤑᤖᤧ ᤁᤢᤍᤫᤠᤒᤥ ᤌᤠᤖᤖᤥ॥ 27 “ᤒᤣᤴᤈᤠᤔᤡᤏᤧᤴᤃ ᤗᤳᤇᤠ ᤛᤠ ᤁᤧᤏᤠ᤺ᤵᤐᤠ ᤁᤧᤈᤠᤒᤠ ᤐᤖᤠᤒᤠᤖᤥ. ᤋᤠᤏᤠᤶ ᤂᤧᤸᤗᤧ ᤋᤠᤖᤢᤒᤠ ᤛᤠᤴ ᤆᤖᤥ. ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤂᤧᤸᤗᤧ ᤂᤢ᤺ᤳᤋᤢᤒᤠᤴ ᤜᤠᤛᤢᤖᤥ॥” 28 ᤁᤱᤜᤠ᤹ ᤁᤧᤖᤧᤰ ᤀᤡᤛᤪᤠᤀᤡᤗᤒᤠ ᤌᤡᤒᤥᤱᤅᤠᤱ ᤏᤧᤳᤇᤡ ᤌᤠ᤺ᤰᤛᤡᤖᤥ॥ ᤂᤢᤴᤇᤡ᤹ ᤐᤠ᤺ᤸᤗᤧ ᤜᤠᤱᤘᤠ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤒᤠ ᤐᤠ᤺ᤴᤜᤠ᤹ ᤜᤠᤒᤠ ᤁᤸᤗᤥ॥ ᤂᤢᤏᤧ᤹ ᤁᤧᤖᤧᤰ ᤗᤠ᤹ᤖᤢᤛᤡᤒᤠ ᤜᤠᤱᤘᤠ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤖᤥ॥ ᤕᤠᤁᤢᤒᤧᤴ ᤔᤠᤛᤡᤱ᤹ 29 ᤂᤧᤒᤩᤠᤱ ᤕᤠᤁᤢᤒᤖᤧ ᤂᤧᤱᤜᤠ᤹ ᤁᤴ ᤀᤡᤱᤈᤠᤱᤅᤡᤴ ᤐᤡᤖᤢᤛᤡ. “ᤀᤠᤱᤃᤠ᤹ᤃ ᤛᤡᤔᤠ ᤆᤥ᤺ᤰᤁᤠᤀᤠᤱ ᤀᤠᤔᤏᤠᤜᤠ᤹ᤀᤥ ᤐᤣ᤺ᤰᤔᤠ ᤀᤡ᤺ᤳᤋᤠᤱᤗᤥ॥ ᤜᤡᤳᤋᤡ ᤀᤣᤐᤪᤥᤏᤧᤸᤗᤧ ᤁᤢᤒᤩᤠᤱᤛᤡᤀᤥᤒᤠ ᤑᤢᤰᤁᤢᤀᤥ ᤀᤠᤛᤢᤎᤧᤒᤠ ᤀᤠᤍᤠᤰᤌᤧᤒᤠᤜᤠ᤹ᤏᤢ ᤕᤠᤵᤔᤡ ᤀᤠᤗᤢᤵᤋᤧ᤹ᤀᤥ॥ 30 ᤀᤡᤃᤪ ᤁᤏᤠᤏ ᤗᤠᤈᤣ᤹ᤒᤠ ᤔᤔᤪᤣ᤺ᤸᤗᤧ ᤁᤢᤒᤣᤛᤠᤱᤒᤠ ᤔᤰᤐᤣᤗᤠᤒᤠ ᤐᤩᤠᤱᤛᤡᤀᤥ ᤁᤧᤏᤧᤒᤠ ᤑᤢᤰᤁᤢᤀᤥ. ᤂᤧᤴ ᤀᤒᤪᤠᤜᤠᤶᤗᤧ ᤜᤡᤳᤋᤡ ᤀᤣᤐᤪᤥᤏᤗᤠᤶᤒᤠ ᤐᤩᤠᤱᤛᤡ᤺ᤴᤏᤢᤀᤣ ᤀᤡᤐᤢᤱ ᤆᤥ᤺ᤰᤔᤠᤖᤧ ᤗᤠᤃᤡ ᤀᤡᤅᤢᤀᤠᤱ ᤘᤕᤧ॥ 31 ᤂᤧᤵᤔᤥᤀᤣ ᤂᤧᤱᤜᤠ᤹ᤖᤧ ᤀᤒᤪᤠᤜᤠᤔ ᤏᤢ ᤁᤢᤔᤣᤳ ᤛᤠᤖᤠᤴ ᤔᤧᤗᤢᤵᤋᤢᤛᤡᤀᤠᤱ ᤏᤧᤛ᤻ᤛᤧ॥ ᤜᤧᤰᤁᤩᤠᤱ ᤂᤧᤵᤔᤥᤀᤣ ᤂᤧᤱᤜᤠ᤹ᤖᤧ ᤀᤡᤛᤜᤠᤰᤁᤧᤴ ᤏᤢ ᤖᤡᤒᤣᤁᤠᤴᤏᤠᤱ ᤔᤧᤗᤢᤵᤋᤢᤛᤡᤀᤠᤱ ᤏᤧᤛ᤻ᤛᤧ॥ ᤂᤧᤵᤔᤥᤀᤣ ᤀᤠᤱᤃᤠ᤹ ᤗᤡᤀᤠ᤺ᤴ ᤗᤢᤵᤋᤢᤱ॥ 32 ᤂᤧᤴ ᤐᤩᤠᤱᤛᤡᤴ ᤏᤢ ᤂᤧᤵᤔᤥ ᤁᤧᤏᤧᤒᤠ ᤑᤢᤰᤁᤢᤴ ᤜᤡᤳᤋᤡᤜᤠ᤹ᤗᤠᤶᤒᤠ ᤀᤡᤱᤔᤏᤠᤒᤠᤖᤥ॥” 33 ᤁᤢᤛ᤻ᤛᤠᤜᤠ᤹ ᤁᤴ ᤀᤡᤱᤈᤠᤱᤅᤡᤴ ᤐᤡᤖᤢ ᤛᤢᤖᤢᤛᤡᤀᤠᤱ ᤕᤠᤁᤢᤒᤖᤧ ᤁᤢᤗᤠᤱᤅᤡᤴ ᤏᤧᤳᤏᤠᤀᤥ ᤛᤴᤇᤢᤀᤠᤱ ᤁᤢᤛᤰᤔᤠ ᤐᤣ. ᤜᤧᤰᤁᤩᤠᤱ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤧ ᤐᤣᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.