ᤋᤥᤗᤡᤱᤛᤥᤔᤢ 45 - LIFOTNTᤕᤢᤛᤢᤑᤧᤴ ᤁᤢᤶᤓᤢ᤹ᤛᤡᤏᤢ ᤀᤥᤛᤣ᤺ᤴᤎᤠᤰᤛᤡᤱ᤹ 1 ᤂᤧᤒᤩᤠᤱ ᤂᤢᤏᤧ᤹ ᤁᤢᤄᤡᤖᤡ ᤁᤧᤕᤧᤵᤐᤠ ᤁᤧᤖᤧᤰ ᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤠᤒᤠᤅᤣ ᤌᤶᤔᤠ ᤔᤧᤛᤢᤰᤋᤢᤴᤏᤠᤱ ᤕᤛᤢᤑᤖᤧ ᤀ᤺ᤰᤋᤧᤖ ᤔᤧᤳᤋᤢᤛᤡ. “ᤁ᤹ᤕᤥᤗᤠᤶ ᤁᤧᤖᤧᤰ ᤗᤠ᤺ᤰᤁᤠᤳ ᤐᤠᤱᤄᤧᤶᤛᤧ᤹॥” ᤁᤸᤗᤧᤆᤥᤃᤢᤸᤗᤧ ᤕᤛᤢᤑᤖᤧ ᤁᤢᤶᤓᤢ᤹ ᤁᤢᤴᤛᤠ᤹ᤛᤡᤏᤢ ᤀᤥ᤺ᤴᤎᤠᤰᤛᤡᤱᤅᤧᤸᤗᤧ ᤂᤧᤵᤔᤥ ᤘᤣ᤹ ᤜᤠ᤺ᤳᤋᤠᤱ ᤔᤧᤜᤥ᤺ᤵᤋᤧ॥ 2 ᤜᤧᤰᤁᤩᤠᤱ ᤂᤢᤏᤧ᤹ ᤁᤶᤓᤩᤠᤖᤡᤰ ᤕᤶᤒᤠ ᤀᤡᤰᤗᤠᤀᤥ ᤜᤠᤒᤧ. ᤂᤧᤴ ᤔᤡᤛᤪᤡᤜᤠ᤹ᤖᤧ ᤔᤧᤄᤧᤵᤛᤢ. ᤜᤧᤰᤁᤩᤠᤱ ᤑᤠᤖᤥᤸᤗᤧ ᤁᤢᤜᤡᤶᤛᤕᤱᤗᤧᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢ॥ 3 ᤕᤢᤛᤢᤑᤖᤧ ᤀᤠᤒᤠᤅᤣ ᤁᤢᤶᤓᤢ᤹ ᤁᤢᤴᤛᤠ᤹ᤛᤡ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤕᤢᤛᤢᤑᤀᤧᤖᤥ॥ ᤀᤠᤶᤒᤠ ᤁᤢᤜᤡᤱᤘᤧᤳᤋᤣ ᤘᤠ᤹ᤒᤡ᥅” ᤁᤖ ᤂᤢᤏᤧ᤹ ᤁᤢᤶᤓᤢ᤹ᤛᤡᤖᤧ ᤏᤥᤃᤵ ᤐᤡᤔᤠ ᤔᤧᤴᤇᤢᤰᤋᤢᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤍᤃᤡ ᤂᤧᤱᤜᤠ᤹ ᤔᤧᤃᤡᤛᤧᤀᤠᤱ ᤔᤧᤕᤰᤂᤧᤀᤠᤱ ᤔᤧᤘᤕᤧ॥ 4 ᤂᤧᤒᤩᤠᤱ ᤕᤢᤛᤢᤑᤖᤧ ᤀᤠᤒᤠᤅᤣ ᤁᤢᤶᤓᤢ᤹ ᤁᤢᤴᤛᤠ᤹ᤛᤡ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤒᤣᤛᤠᤱ ᤋᤧᤶᤔᤧ᤹ᤀᤥ॥” ᤂᤧᤱᤜᤠ᤹ ᤁᤢᤒᤣᤛᤠᤱ ᤔᤧᤒᤣᤀᤠᤱ ᤂᤢᤏᤧ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤔᤡᤛᤪᤀᤥ ᤁᤧᤛᤱᤄᤢᤶᤒᤠ ᤂᤡᤏᤡ᤹ ᤏᤢᤛᤠ᤹ ᤕᤢᤛᤢᤑᤧᤴ ᤀᤠᤱᤃᤠ᤹ᤀᤣᤖᤥ॥ 5 ᤂᤡᤏᤡ᤹ ᤀᤠᤱᤃᤠ᤹ ᤕᤠᤵᤔᤡ ᤀᤠᤃᤧᤛᤱᤄᤧᤒᤠᤀᤥ ᤏᤡᤱᤘᤠ᤹ ᤔᤧᤍᤢᤰᤂᤧᤶᤔᤧᤴᤏᤧ᤹॥ ᤜᤧᤰᤁᤩᤠᤱ ᤀᤠᤒᤠᤅᤣᤀᤠᤱ ᤏᤡᤱᤘᤠ᤹ ᤔᤧᤗᤥᤖᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤜᤡᤱᤔᤴ ᤛᤧ᤺ᤵᤔᤠ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤏᤢ᤺ᤸᤗᤧ ᤋᤃᤡ ᤀᤠᤱᤃᤠ᤹ ᤁ᤹ᤕᤥ ᤐᤠᤱᤄᤠᤱᤒᤠᤖᤥ॥ 6 ᤗᤠᤈᤣ᤹ᤀᤥ ᤛᤠᤰ ᤋᤩᤧᤒᤠ ᤋᤱᤒᤣ ᤏᤧᤳᤇᤡ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᤋᤱᤒᤣ ᤅᤠᤛᤡ ᤀᤠᤳᤋᤡᤀᤠᤱ ᤁᤧᤰᤆᤢ᤹ ᤔᤧᤎᤥ᤺ᤱᤏᤧᤸᤗᤥ. ᤜᤧᤰᤁᤩᤠᤱ ᤆᤠᤀᤠᤱ ᤔᤧᤛᤢᤶᤏᤧᤸᤗᤥ॥ 7 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤡ᤹ ᤜᤡᤱᤔᤴ ᤛᤧ᤺ᤵᤗ ᤑᤠ᤹ᤀᤠᤱ ᤂᤧᤏᤡ᤹ᤏᤢ᤺ᤸᤗᤧ ᤋᤃᤡ ᤁ᤹ᤕᤥ ᤐᤠᤱᤄᤠᤱᤒᤠᤖᤥ॥ 8 “ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤁ᤹ᤕᤥ ᤕᤠᤵᤔᤡ ᤁᤧᤒᤠᤱᤒᤠ ᤂᤡᤏᤡ᤹ ᤔᤣ᤺ᤴᤏᤡᤱ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣᤖᤥ॥ ᤂᤢᤏᤧ᤹ ᤀᤠᤱᤃᤠ᤹ ᤑᤠᤖᤥᤸᤗᤧ ᤁᤢᤛᤢᤈᤠᤍᤠᤱᤒᤠ ᤏᤢ ᤂᤢᤏᤧ᤹ ᤁᤢᤜᤡᤶᤛᤕᤱᤅᤡᤸᤗᤧ ᤁᤢᤴᤍᤠᤱᤒᤠ ᤜᤧᤰᤁᤩᤠᤱ ᤔᤡᤛᤪ ᤂᤠᤖᤠᤰᤐᤠ ᤛᤢᤜᤠᤱᤕᤢᤰᤐᤠ ᤆᤥᤃᤠᤱᤅᤠᤱ ᤘᤠ᤹॥ 9 ᤀᤠᤸᤗ ᤜᤠᤖᤠ ᤀᤠᤶᤒᤠᤖᤧ᤹ᤀᤥ ᤐᤣᤃᤧᤶᤔᤧ᤹ᤀᤠᤱ ᤂᤢᤏᤧ᤹ ᤔᤧᤳᤋᤧᤶᤔᤧ᤹. ‘ᤁᤧᤛ᤻ᤛᤠ ᤕᤢᤛᤢᤑᤖᤧ ᤀᤰᤂᤣ ᤐᤠ᤺ᤳᤋᤢᤖᤥ—ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤔᤡᤛᤪ ᤗᤠᤈᤣ᤺ᤸᤗᤧ ᤁᤢᤴᤍᤠᤱᤒᤠ ᤆᤥᤃᤠᤱᤅᤠᤱ ᤘᤠ᤹॥ ᤔᤧᤴᤇᤢᤀᤣ ᤜᤠᤖᤠ ᤀᤠᤱᤃᤠ᤹ᤀᤥ ᤕᤧ᤹ᤀᤥ॥ 10 ᤂᤧᤏᤧ᤹ ᤃᤥᤛᤣᤏ ᤋᤧᤱᤃᤵᤐᤥ ᤕᤢᤅᤧ᤹॥ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ ᤁᤧᤶᤔᤧᤴᤇᤠ᤹ᤜᤠ᤹ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤒᤡᤳᤜᤠ᤹ ᤁᤧᤔᤧ᤺ᤴᤍᤠᤰᤜᤠ᤹ ᤏᤢ ᤂᤧᤏᤧ᤹ ᤁᤧᤃᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤀᤠᤒᤣᤛᤠᤱ ᤔᤧᤘᤠ᤹ᤖᤥ॥ 11 ᤂᤧ᤹ᤕᤥ ᤀᤠᤱᤃᤠ᤹ ᤂᤧᤏᤧ᤹ ᤜᤡᤱᤏᤧ. ᤌᤣᤀᤠᤱᤓᤧᤸᤗᤧ ᤀᤠᤸᤗᤛᤠᤱ ᤛᤠᤰᤁᤡᤸᤗᤧ ᤅᤠᤛᤡ ᤋᤱᤒᤣ ᤋᤠᤔᤠᤀᤣ ᤘᤠ᤹॥ ᤔᤣ᤺ᤴᤏᤡᤸᤗᤧᤃ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤜᤡᤶᤛᤕᤱ ᤂᤶᤒᤩᤠᤱ ᤂᤧᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤖᤧᤰ ᤛᤠᤰᤁᤡᤸᤗᤧ ᤁᤧᤛᤩᤧ᤹ᤀᤡᤖᤥ॥’ 12 “ᤀᤠᤸᤗ ᤂᤧᤏᤡ᤹ᤏᤢ ᤋᤠ᤹ᤃᤧᤈᤧᤱᤒᤠᤴ ᤀᤠᤱᤃᤠ᤹ ᤕᤢᤛᤢᤑᤧᤴᤏᤣ ᤑᤠ᤹ᤀᤠᤱ ᤂᤧᤏᤡ᤹ ᤀᤠᤒᤠᤅᤣ ᤔᤡᤰᤁᤡᤸᤗᤧ ᤕᤠᤵᤔᤡ ᤁᤧᤏᤡᤛᤧ ᤜᤧᤰᤁᤩᤠᤱ ᤀᤠᤴᤛᤠ᤹ ᤒᤧᤴᤈᤠᤔᤡᤏᤧᤸᤗᤧᤀᤠᤱ ᤏᤡᤛᤠᤱᤅᤠᤱ ᤘᤠ᤹॥ 13 ᤔᤡᤛᤪ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤀᤠᤔᤡᤔᤡᤍᤡᤱᤅᤡᤴ ᤏᤢ ᤂᤧᤏᤡ᤹ ᤁᤧᤏᤡᤛᤢᤶᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤶᤒᤠ ᤆᤧᤰᤋᤧᤶᤔᤧ᤹. ᤜᤧᤰᤁᤩᤠᤱ ᤜᤠᤖᤠᤀᤣ ᤀᤠᤶᤒᤠ ᤁ᤹ᤕᤥ ᤕᤢᤖᤧᤶᤔᤧ᤹ᤀᤥ॥” 14 ᤂᤧᤒᤩᤠᤱ ᤀᤠᤒᤠᤅᤣ ᤁᤢᤴᤛᤠ᤹ ᤒᤣᤏᤩᤠᤔᤡᤏᤧᤴ ᤜᤧᤵᤐᤪᤧᤰ ᤜᤧᤵᤋᤢᤀᤠᤱ ᤛᤠ᤹ᤖᤡᤰ ᤜᤠᤒᤧ. ᤜᤧᤰᤁᤩᤠᤱ ᤒᤧᤴᤈᤠᤔᤡᤏᤧᤸᤗᤧᤀᤠᤱ ᤜᤧᤵᤐᤪᤧᤰ ᤜᤧᤵᤋᤢᤀᤠᤱ ᤜᤠᤒᤧ॥ 15 ᤂᤧᤒᤩᤠᤱ ᤂᤢᤏᤧ᤹ ᤜᤠᤒᤧᤖ ᤁᤢᤶᤓᤢ᤹ᤛᤡ ᤁᤧᤖᤧᤰ ᤆᤢᤵ ᤔᤧᤳᤋᤢᤛᤡ॥ ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤁᤢᤶᤓᤢ᤹ᤛᤡᤀᤠᤱ ᤂᤢᤏᤧ᤹ᤏᤢ ᤋᤠ᤹ᤔᤧᤈᤧᤰᤂᤧ॥ 16 ᤕᤢᤛᤢᤑᤖᤧ ᤁᤢᤶᤓᤢ᤹ ᤁᤢᤴᤛᤠ᤹ᤛᤡ ᤔᤧᤍᤩᤧᤀᤠᤱ ᤔᤧᤘᤠ᤹ ᤁᤧᤗ᤹ᤒᤠ ᤀᤡᤱᤄᤱ ᤑᤠᤖᤥᤸᤗᤧ ᤁᤢᤜᤡᤶᤔᤥ ᤁᤧᤖᤧᤸᤗᤧ ᤑᤠᤖᤥ᤺ᤴᤏᤢ ᤂᤢᤏᤧ᤹ ᤁᤢᤛᤢᤜᤠᤱᤃᤧᤶᤒᤠᤜᤠ᤹ ᤁᤧᤖᤧᤰ ᤔᤧᤛ᤺ᤳᤋᤧ॥ 17 ᤑᤠᤖᤥᤸᤗᤧ ᤕᤢᤛᤢᤑᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤶᤓᤢ᤹ ᤁᤧᤴᤛᤠ᤹ᤜᤠ᤹ ᤔᤧᤳᤋᤧᤛᤧ᤹. ‘ᤂᤧᤏᤡ᤹ ᤌᤰᤛᤠᤜᤠ᤹ ᤆᤠ ᤁᤢ᤺ᤳᤋᤧᤶᤛᤡᤶᤔᤧ᤹ᤀᤠᤱ ᤁᤏᤠᤏ ᤗᤠᤈᤣ᤹ᤀᤥ ᤏᤢ᤺ᤰᤂᤧᤶ ᤐᤣᤃᤧᤶᤔᤧ᤹. 18 ᤜᤧᤰᤁᤩᤠᤱ ᤂᤧᤏᤡ᤹ ᤐᤠᤴ ᤏᤢ ᤂᤢᤏᤧ᤹ ᤁᤢᤜᤡᤶᤛᤕᤱᤅᤥᤒᤠ ᤁᤧᤖᤧᤰ ᤕᤠᤱᤛᤡᤅᤧᤶᤔᤧ᤹ᤀᤠᤱ ᤀᤠᤱᤃᤠ᤹ᤀᤥ ᤕᤧᤶᤔᤧ᤹॥ ᤔᤡᤛᤪᤒᤠ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤋᤧᤴᤏᤡᤴ ᤀᤠᤱᤃᤠ᤹ ᤂᤡᤏᤡ᤹ ᤐᤡᤏᤡᤱ᤹ ᤜᤧᤰᤁᤩᤠᤱ ᤂᤡᤏᤡ᤹ ᤁᤴ ᤗᤠᤈᤣ᤹ᤀᤥᤒᤠ ᤏᤢᤒᤠ ᤆᤠ ᤁᤧᤈᤠᤶᤗᤥ॥’ 19 “ᤂᤧᤱᤜᤠ᤹ ᤀᤰᤂᤣᤀᤠᤱ ᤔᤧᤳᤋᤧᤛᤧ᤹ᤀᤠᤱ ᤀᤡᤱᤈᤠᤱ ᤐᤡᤖᤧᤛᤧ᤹. ‘ᤂᤡᤏᤡ᤹ ᤛᤠᤜᤠ᤹ᤖᤧ ᤗᤠᤃᤡ ᤏᤢ ᤔᤣ᤺ᤳᤜᤠ᤹ᤖᤧ ᤗᤠᤃᤡ ᤐᤡᤳᤗᤠᤎᤠᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤋᤣ᤹ᤖᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤐᤠᤴ ᤕᤢᤖᤧᤶᤔᤧ᤹॥ 20 ᤂᤡᤏᤡ᤹ ᤆᤡᤃᤰᤘᤠᤜᤠ᤹ᤖᤧ ᤗᤠᤃᤡ ᤂᤡᤏᤡ᤹ ᤏᤡᤱᤘᤠ᤹ ᤔᤧᤒᤡᤖᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤔᤡᤛᤪᤒᤠ ᤏᤢ᤺ᤒ᤻ᤏᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤢᤏᤧ᤹ᤀᤡᤴᤏᤣᤖᤥ॥’” 21 ᤕᤠᤁᤢᤒᤖᤧ ᤁᤢᤛ᤻ᤛᤠᤜᤠ᤹ᤖᤧ ᤜᤧᤰᤁᤣᤀᤣ ᤔᤧᤈᤥᤃᤢ॥ ᤑᤠᤖᤥᤸᤗᤧ ᤀᤡᤱᤈᤠᤱ ᤐᤡᤖᤢᤒᤠ ᤜᤧᤰᤁᤣ ᤕᤢᤛᤢᤑᤖᤧ ᤂᤧᤱᤜᤠ᤹ ᤐᤡᤳᤗᤠᤎᤠᤜᤠ᤹ ᤏᤢ ᤗᤠᤶᤍᤡ᤺ᤰᤗᤧ ᤗᤠᤃᤡ ᤆᤧᤛᤠᤰ ᤑᤢᤱᤛᤠᤰ ᤐᤡᤖᤢᤛᤡ॥ 22 ᤂᤧᤱᤜᤠ᤹ ᤁᤧᤖᤧᤰ ᤁᤢᤛᤱ ᤆᤠᤱ ᤐᤡᤖᤢᤛᤡ॥ ᤁᤖ ᤒᤧᤴᤈᤠᤔᤡᤏᤧᤱᤃ ᤁᤡᤵ ᤛᤢᤶᤛᤡ ᤕᤢᤵᤐᤠᤕᤠᤱ ᤏᤢ ᤁᤢᤃᤠᤵ ᤅᤠᤛᤡ ᤆᤠᤱ ᤐᤡᤖᤢ॥ 23 ᤔᤡᤛᤪᤒᤠ ᤏᤢ᤺ᤒ᤻ᤏᤢᤒᤠ ᤐᤠ᤺ᤴᤜᤠ᤹ᤖᤧ ᤆᤡᤒᤧ᤺ᤳ ᤔᤧᤒᤧ᤺ᤳᤋᤧᤖ ᤌᤡᤒᤥᤱ ᤀᤍᤱᤜᤠ᤹ ᤁᤢ᤺ᤳᤋᤢᤛᤡᤀᤠᤱ ᤁᤢᤶᤒᤠᤖᤧ ᤁᤢᤗᤠᤃᤡ ᤁᤴ ᤐᤠ᤺ᤴᤜᤠ᤹ ᤜᤠᤅᤢ. ᤜᤧᤰᤁᤩᤠᤱ ᤆᤠ. ᤂᤖᤧ᤺ᤱ ᤏᤢ ᤘᤣ᤹ ᤁᤢᤈᤠ ᤁᤧᤃᤢᤔᤠ ᤌᤡᤒᤥᤱ ᤁᤢᤶᤔᤠᤔᤠ ᤀᤍᤱᤜᤠ᤹ ᤜᤠᤅᤢᤍᤣᤛᤢ॥ 24 ᤂᤢᤏᤧ᤹ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ ᤐᤠᤱᤄᤢᤍᤣᤛᤢᤛᤡ. ᤜᤧᤰᤁᤩᤠᤱ ᤔᤧᤎᤠᤛᤡᤱᤅᤡᤸᤗᤧ ᤁᤢᤶᤓᤢ᤹ ᤁᤢᤴᤛᤠ᤹ᤛᤡ ᤔᤧᤳᤋᤢᤛᤡ. “ᤗᤠᤶᤔᤥ ᤔᤧᤱᤄᤣᤀᤣ ᤐᤣᤃᤧᤶᤔᤧ᤹ᤀᤥ॥” 25 ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶᤒᤠ ᤁᤏᤠᤏ ᤗᤠᤈᤣ᤹ᤀᤥ ᤀᤠᤒᤠᤅᤣ ᤂᤢᤴᤇᤡ᤹ ᤐᤠ ᤕᤠᤁᤢᤒᤖᤧᤀᤥ ᤔᤧᤎᤠᤅᤧ॥ 26 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤕᤢᤛᤢᤑᤧᤱᤃ ᤀᤠᤸᤗᤥᤛᤠᤱ ᤁᤢᤜᤡᤱᤘᤧᤳᤋᤣ ᤘᤠ᤹ᤖᤇ. ᤜᤧᤰᤁᤩᤠᤱ ᤔᤡᤛᤪᤒᤠ ᤛᤢᤜᤠᤱᤕᤢᤰᤐᤠ ᤂᤢᤏᤧ᤹ᤀᤣ ᤐᤥ᤺ᤰᤂᤧᤀᤠᤱ ᤘᤠ᤹ᤖᤇ॥” ᤁᤴ ᤐᤠ᤺ᤴᤏᤡᤴ ᤂᤢᤏᤧ᤹ ᤂᤧᤵᤛᤢᤀᤠᤱ ᤁᤢᤗᤢᤱᤔᤠ᤹ ᤋᤡᤰᤋᤡᤰ ᤗ᤹ᤖᤧ॥ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤏᤠᤔᤧᤛᤠ᤹ᤖᤢᤴ॥ 27 ᤁᤖ ᤕᤢᤛᤢᤑᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡᤀᤠᤱ ᤐᤠᤱᤄᤢᤛᤡᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤵᤛᤢ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤗᤠᤛᤧ ᤕᤢᤛᤢᤑᤖᤧ ᤜᤠᤅᤢᤒᤠ ᤐᤡᤳᤗᤠᤎᤠᤜᤠ᤹ ᤏᤡᤛᤢᤛᤡᤀᤠᤱ ᤂᤢᤴᤇᤡ᤹ ᤐᤠ ᤕᤠᤁᤢᤒᤖᤧ ᤁᤢᤏᤡᤱᤘᤠ᤹ ᤛᤣᤖᤧ॥ 28 ᤜᤧᤰᤁᤩᤠᤱ ᤕᤠᤁᤢᤒᤖᤧ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤋᤩᤧ॥ ᤀᤠᤛ᤻ᤛᤠ ᤕᤢᤛᤢᤑᤧᤴ ᤀᤠᤸᤗᤛᤠᤱ ᤁᤢᤜᤡᤱᤘᤧᤳ ᤘᤠ᤹ᤖᤇ ᤀᤠᤱᤃᤠ᤹ ᤐᤣ᤺ᤰᤁᤠᤖᤥ. ᤜᤧᤰᤁᤩᤠᤱ ᤛᤡᤔᤠᤏᤢ᤺ᤸᤗᤧ ᤋᤃᤡ ᤀᤠᤱᤃᤠ᤹ ᤂᤧᤸᤗᤧ ᤁᤢᤏᤠᤖᤠᤴ ᤀᤥᤔᤧᤳᤋᤢᤱᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.