ᤋᤥᤗᤡᤱᤛᤥᤔᤢ 43 - LIFOTNTᤕᤢᤛᤢᤑᤖᤧ ᤁᤢᤶᤓᤢ᤹ᤛᤡ ᤒᤧᤴᤈᤠᤔᤡᤏᤧᤴᤏᤢ ᤛᤥᤖᤡᤰ ᤔᤡᤛᤪᤀᤥ ᤔᤧᤒᤣ᤺ᤰ 1 ᤁᤏᤠᤏ ᤗᤠᤈᤣ᤹ᤀᤥ ᤁᤧᤛᤠᤰᤐᤠ ᤛᤠ᤹ᤖᤡᤰ ᤕᤶᤒᤠ ᤛᤠᤰ ᤐᤥᤃᤧᤀᤠᤱ ᤘᤕᤧ॥ 2 ᤔᤡᤛᤪᤗᤠᤶ ᤔᤧᤍᤠᤖᤢᤒᤠ ᤆᤠ᤺ᤴ ᤂᤧᤱᤜᤠ᤹ᤖᤧ ᤔᤧᤈᤔᤧᤔᤠ᤺ᤴᤍᤢ. ᤂᤧᤒᤩᤠᤱ ᤂᤢᤴᤇᤡ᤹ ᤐᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤏᤡ᤹ ᤗᤠᤃᤡ ᤆᤠ ᤀᤡᤱᤛᤧ ᤕᤠᤶᤔᤥ ᤐᤣᤃᤧᤶᤔᤧ᤹॥” 3 ᤁᤖ ᤕᤜᤢᤍᤠ᤺ᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤴ ᤔᤏᤠ᤺ᤸᤗᤧ ‘ᤂᤡᤏᤡ᤹ ᤏᤢᤛᤠ᤹ᤀᤡᤴ ᤂᤡᤏᤡ᤹ᤏᤢ ᤔᤧᤴᤍᤠ᤺ᤳᤋᤣ ᤌᤠᤖᤡᤰ ᤀᤠᤱᤃᤠ᤹ᤀᤥ ᤋᤠᤔᤠ ᤁᤧᤱᤄᤥᤛᤡᤴ’ ᤔᤧᤳᤋᤡᤃᤧᤀᤠᤱ ᤁᤧᤛᤠᤰᤐᤠ ᤛᤠᤶᤍᤡᤱ ᤐᤡᤖᤡᤃᤧᤀᤠᤱ ᤘᤠ᤹॥ 4 ᤂᤧᤏᤧ᤹ ᤀᤠᤏᤡᤃᤣ ᤏᤢᤛᤠ᤹ᤀᤡᤴ ᤀᤠᤏᤡᤃᤧᤏᤢ ᤁᤧᤒᤠᤱᤛᤢᤃᤪᤖᤰ ᤀᤠᤏᤡᤃᤣ ᤐᤣᤃᤡᤃᤧᤀᤠᤱ ᤁᤧᤗᤠᤃᤡ ᤆᤠ ᤀᤡᤅᤢᤶ ᤌᤠᤰᤋᤢᤶᤒᤧ॥ 5 ᤁᤖ ᤂᤧᤴ ᤁᤧᤶᤒᤠᤱᤛᤢᤴᤏᤧ ᤑᤠᤃᤪ ᤀᤠᤏᤡᤃᤣ ᤔᤧᤒᤣᤃᤡᤃᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤔᤏᤠ᤺ᤸᤗᤧ ‘ᤂᤡᤏᤡ᤹ ᤏᤢᤛᤠ᤹ᤀᤡᤴ ᤂᤡᤏᤡ᤹ᤏᤢ ᤜᤥ᤺ᤵᤏᤧ ᤑᤠᤃᤪ ᤀᤠᤱᤃᤠ᤹ ᤀᤠᤍᤃᤠᤱ ᤋᤠᤔᤠ ᤁᤧᤱᤄᤥᤛᤡᤸᤗᤥ’ ᤑᤠᤀᤠᤱ ᤀᤠᤏᤡᤃᤣ ᤔᤧᤳᤋᤡᤃᤧᤀᤠᤱ ᤘᤠ᤹॥” 6 ᤕᤠᤁᤢᤒᤖᤧ ᤔᤧᤳᤋᤢ. “ᤂᤡᤏᤡ᤹ ᤂᤧᤴ ᤔᤏᤠᤴ ᤀᤠᤏᤡᤃᤣ ᤘᤣ᤹ ᤏᤢᤛᤠ᤹ᤎᤡᤰ ᤘᤠ᤹ ᤁᤧᤔᤧᤳᤋᤢᤶᤔᤠᤱ ᤂᤡᤏᤡ᤹ ᤌᤣᤀᤠᤱ ᤀᤠᤱᤃᤠ᤹ᤀᤥ ᤋᤢᤰᤂᤣ ᤁᤧᤍᤠᤖᤢᤶᤒᤠᤒᤣ᥅” 7 ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤂᤧᤴ ᤔᤏᤠ᤺ᤸᤗᤧ ᤀᤰᤂᤣ ᤔᤧᤳᤋᤡᤃᤧᤖ ᤀᤠᤏᤡᤃᤣ ᤁᤠ᤹ᤀᤡ ᤏᤢ ᤜᤡᤶᤛᤕᤱᤖᤧ ᤁᤢᤕᤠ᤺ᤶᤒᤣᤀᤥ ᤛᤣ᤺ᤴᤍᤥᤛᤡᤃᤧ. ‘ᤂᤡᤏᤡ᤹ ᤐᤠᤏᤢᤍᤡᤱ ᤐᤠᤴ ᤀᤠᤸᤗᤛᤠᤱ ᤘᤠ᤹ᤒᤡ᥅ ᤂᤡᤏᤡ᤹ ᤘᤣ᤹ ᤏᤢᤛᤠ᤹ᤀᤠᤱ ᤘᤠ᤹ᤒᤡ᥅’ ᤀᤠᤏᤡᤃᤧᤃ ᤜᤠᤒᤠ ᤁᤴ ᤛᤣ᤺ᤴᤍᤥ᤺ᤸᤗᤧ ᤁᤢᤏᤥᤃᤵᤗᤰ ᤐᤡᤔᤏᤠ॥ ᤂᤧᤸᤗᤧ ‘ᤂᤡᤏᤡ᤹ ᤏᤢᤛᤠ᤹ᤀᤡᤴ ᤁ᤹ᤕᤥ ᤋᤠᤖᤠᤶᤔᤧ᤹’ ᤀᤠᤏᤡᤃᤣ ᤔᤧᤳᤋᤡᤃᤧ ᤑᤠ᤹ᤀᤠᤱ ᤀᤠᤳᤋᤡᤗᤠᤶ ᤏᤡᤛᤢᤶᤒᤧᤃ᥅” 8 ᤂᤧᤒᤩᤠᤱ ᤕᤜᤢᤍᤠ᤺ᤸᤗᤧ ᤁᤢᤶᤒᤠ ᤔᤧᤳᤋᤢ. “ᤁᤴ ᤆᤢ᤺ᤰᤐᤧᤴ ᤀᤠᤱᤃᤠ᤹ᤏᤢ ᤐᤠᤱᤛᤧ᤹. ᤜᤧᤰᤁᤩᤠᤱ ᤀᤠᤏᤡᤃᤣ ᤂᤡᤔᤥ ᤌᤠᤏᤧᤇᤡᤃᤧ. ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡᤃᤣ ᤏᤢ ᤂᤧᤏᤧ᤹ ᤜᤧᤰᤁᤩᤠᤱ ᤀᤠᤏᤡ᤹ ᤛᤠᤜᤠ᤹ᤏᤢ ᤛᤩᤧ᤹ᤀᤡ ᤔᤣ᤺ᤴ ᤁᤖ ᤜᤡᤅᤡᤖᤥ॥ 9 ᤁᤸᤗᤧ ᤗᤠᤃᤡ ᤀᤠᤱᤃᤠ᤹ᤀᤣ ᤐᤥ᤺ᤰᤛᤠᤱ. ᤂᤧᤴ ᤕᤥᤎᤥ ᤐᤥᤱᤏᤧ ᤑᤠᤃᤪ ᤀᤠᤱᤃᤠ᤹ ᤋᤧᤶᤛᤠᤱᤅᤧ᤹॥ ᤀᤠᤱᤃᤠ᤹ ᤁᤴ ᤏᤢ᤺ᤰᤋᤢᤱᤅᤠᤱ ᤔᤧᤴᤍᤠ᤺ᤵᤐᤠᤴᤏᤣ ᤑᤠᤃᤪ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤍᤃᤠᤱ ᤔᤧᤴᤕᤢᤱᤒᤠᤴᤏᤧ ᤑᤠᤃᤪ. ᤀᤠᤱᤃᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤀᤠᤵᤋᤡᤰ ᤁᤢᤕᤢᤱᤗᤥ॥ 10 ᤀᤠᤏᤡ᤹ ᤀᤠᤴᤇᤢᤛᤧᤴᤏᤡᤸᤗᤧᤃ ᤏᤡᤗᤧᤱᤅᤠᤱ ᤀᤠᤃᤧᤖᤧ ᤀᤠᤎᤠᤅᤧᤒᤠᤖᤥ॥” 11 ᤂᤧᤒᤩᤠᤱ ᤂᤢᤴᤇᤡ᤹ ᤐᤠ ᤕᤠᤁᤢᤒᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤰᤂᤣ ᤐᤥᤱᤔᤤ ᤐᤥᤱᤃᤪ ᤀᤰᤂᤣ ᤆᤥᤃᤧᤶᤔᤧ᤹. ᤁᤴ ᤗᤠᤈᤣ᤹ᤀᤥ ᤁᤧᤒᤥ᤺ᤰᤐᤠ ᤏᤢ᤺ᤒ᤻ᤏᤢᤒᤠ ᤐᤠ᤺ᤴᤜᤠ᤹. ᤁᤢᤓᤠ ᤁᤢᤏᤠᤶ ᤁᤧᤏᤢ᤹ᤒᤠ ᤜᤢ᤺ᤳᤇᤡᤱᤔᤏᤠᤒᤠ. ᤁᤢᤓᤠ ᤛᤰᤘᤠ ᤂᤢ. ᤁᤢᤓᤠ ᤁᤢᤏᤠᤶ ᤁᤧᤏᤢ᤹ᤒᤠ ᤔᤠᤖᤢᤰ. ᤔᤢᤷᤖ. ᤐᤣᤛ᤻ᤋᤠ ᤜᤧᤰᤁᤩᤠᤱ ᤂᤱᤈᤱᤛᤣ᤹ᤜᤠ᤹ ᤂᤧᤴ ᤔᤏᤠ᤺ᤸᤗᤧ ᤁᤢᤗᤠᤃᤡ ᤂᤡᤏᤡ᤹ ᤛᤢᤰᤘᤠᤀᤥ ᤀᤠᤰᤋᤧᤶᤔᤧ᤹ᤀᤠᤱ ᤆᤧᤛᤢᤱ ᤜᤧᤰᤁᤣ ᤋᤣ᤹ᤖᤠᤶ ᤐᤡᤖᤧᤶᤔᤧ᤹॥ 12 ᤂᤡᤏᤡ᤹ᤏᤢ ᤕᤢᤵᤐᤠ ᤕᤠᤱᤅᤡᤴ ᤏᤧᤳᤇᤡᤗᤧᤱᤒᤠ ᤕᤠᤖᤡᤰ ᤕᤠᤱᤅᤠᤱ ᤋᤣ᤹ᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤂᤡᤏᤡ᤹ ᤛᤢᤰᤘᤠ᤺ᤸᤗᤧ ᤁᤢᤛᤶᤎᤠᤱ ᤁᤧᤕᤠᤰᤐᤠ ᤕᤢᤵᤐᤠ ᤕᤠᤱᤅᤡᤴ ᤏᤢ᤺ᤰᤔᤠ ᤐᤥᤱ॥ ᤂᤧᤴ ᤔᤧᤓᤣ᤺ᤴᤍᤢᤀᤠᤱ ᤔᤧᤃᤣ᤺ᤳᤋᤢᤒᤡᤗᤠ॥ 13 ᤂᤡᤏᤡ᤹ ᤏᤢᤛᤠ᤹ᤀᤡᤴ ᤋᤣ᤹ᤖᤧᤶᤔᤧ᤹ᤀᤠᤱ ᤜᤠᤖᤠ ᤂᤧᤴ ᤔᤏᤠ᤺ᤸᤗᤥ ᤕᤠᤶᤔᤥ ᤐᤣᤃᤧᤶᤔᤧ᤹॥ 14 ᤂᤡᤏᤡ᤹ ᤘᤣ᤹ ᤏᤢᤛᤠ᤹ᤀᤡᤴ ᤏᤢ ᤒᤣᤏᤩᤠᤔᤡᤏᤧᤴ ᤂᤡᤏᤡ᤹ᤏᤢ ᤏᤢ᤺ᤱᤔᤠ ᤑᤧᤶᤔᤠᤖᤧᤗᤠᤃᤡ ᤂᤧᤴ ᤔᤏᤠᤸᤗᤧ ᤁᤢᤍᤃᤡ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤁᤧᤍᤢᤰᤋᤡᤖ॥ ᤀᤠᤱᤃᤠ᤹ ᤀᤠᤛ᤻ᤛᤠᤜᤠ᤹ ᤔᤠᤔᤤ ᤐᤥᤱᤛᤠᤱ. ᤜᤧᤰᤁᤣᤀᤣ ᤐᤥᤱᤗᤖᤥ॥” 15 ᤂᤧᤒᤩᤠᤱ ᤂᤧᤴ ᤔᤏᤠᤜᤠ᤹ ᤆᤧᤛᤢᤱ. ᤏᤧᤳᤇᤡᤗᤧᤱ ᤕᤠᤖᤡᤰ ᤕᤢᤵᤐᤠᤕᤠᤱ ᤜᤧᤰᤁᤩᤠᤱ ᤒᤣᤏᤩᤠᤔᤡᤏᤧᤴ ᤔᤧᤕᤠᤱᤛᤡᤱᤅᤠᤱ ᤔᤡᤛᤪ ᤗᤧᤵᤔᤠᤱ ᤔᤧᤎᤠᤛᤡᤱ. ᤜᤧᤰᤁᤩᤠᤱ ᤕᤢᤛᤢᤑᤖᤧ ᤁᤢᤍᤃᤡ ᤔᤧᤍᤥ᤺ᤴᤇᤡᤱ॥ 16 ᤕᤢᤛᤢᤑᤖᤧ ᤂᤧᤱᤜᤠ᤹ᤏᤢ ᤒᤣᤴᤈᤠᤔᤡᤏᤧᤴ ᤏᤡᤛᤢ ᤂᤧᤒᤩᤠᤱ ᤂᤢᤏᤧ᤹ ᤁᤢᤜᤡᤶᤔᤥᤒᤠ ᤁᤧᤜᤡᤒᤠ ᤁᤧᤍᤱᤒᤠ ᤛᤧᤘᤠᤖᤥᤒᤠᤴ ᤔᤧᤳᤋᤢ. “ᤁᤴ ᤔᤏᤠᤜᤠ᤹ ᤀᤠᤜᤡᤶᤔᤥ ᤋᤣ᤹ᤖᤧᤛᤧ᤹. ᤜᤧᤰᤁᤩᤠᤱ ᤗᤳᤇᤠ ᤌᤰᤛᤠᤎᤡᤰ ᤛᤧᤖᤧ᤹ᤀᤠᤱ ᤛᤠᤓ᤺ᤱᤈᤠ ᤕᤠᤖᤡᤵ ᤆᤥᤃᤧ᤹॥ ᤌᤣᤀᤠᤱᤓᤧᤸᤗᤧ ᤁᤴ ᤔᤏᤠᤜᤠ᤹ ᤀᤠᤀᤡᤴ ᤀᤠᤱᤃᤠ᤹ᤏᤢᤀᤣ ᤋ᤺ᤰ ᤔᤧᤈᤠᤖᤥ॥” 17 ᤕᤢᤛᤢᤑᤖᤧ ᤀᤡᤱᤈᤠᤱ ᤐᤡᤖᤢᤒᤠ ᤜᤧᤰᤁᤣ ᤂᤧᤴ ᤔᤏᤠ᤺ᤸᤗᤧ ᤆᤥᤃᤢ. ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤕᤢᤛᤢᤑᤖᤧ ᤁᤢᤜᤡᤶᤔᤥ ᤋᤠᤖᤢᤛᤡ॥ 18 ᤁᤖ ᤕᤢᤛᤢᤑᤖᤧ ᤁᤢᤜᤡᤶᤔᤥ ᤔᤧᤍᤠᤖᤢᤛᤡᤒᤠᤸᤗᤧ ᤕᤢᤛᤢᤑᤖᤧ ᤁᤢᤶᤓᤢ᤹ᤜᤠ᤹ ᤔᤧᤃᤡᤛᤧᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. “ᤋᤃᤡᤛ᤻ᤔᤥ ᤀᤠᤏᤡ᤹ ᤛᤢᤰᤘᤠᤀᤥ ᤔᤧᤏᤢ᤺ᤰᤋᤢᤒᤠ ᤕᤢᤵᤐᤠ᤺ᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤁ᤹ᤕᤥ ᤀᤠᤶᤍᤠᤖᤧᤒᤠᤒᤡᤗᤠ॥ ᤀᤠᤸᤗ ᤂᤧᤸᤗᤧ ᤀᤠᤏᤡ᤹ ᤀᤠᤍᤧᤶᤔᤠᤱ ᤀᤠᤏᤡ᤹ ᤕᤥᤰ ᤀᤠᤈᤥᤰ ᤜᤧᤰᤁᤩᤠᤱ ᤀᤠᤏᤡ᤹ ᤀᤍᤱᤜᤠ᤹ ᤀᤠᤏᤠᤵᤐᤡᤗᤠ॥” 19 ᤁᤸᤗᤧᤆᤥᤃᤢᤸᤗᤧ ᤕᤢᤛᤢᤑᤖᤧ ᤁᤢᤜᤡᤶᤔᤥ ᤁᤧᤜᤡᤒᤠ ᤁᤧᤍᤱᤒᤠ ᤛᤧᤘᤠᤖᤥᤒᤠᤸᤗᤧ ᤁᤢᤗᤠᤶᤎᤣ᤺ᤵᤐᤢᤱᤅᤥ ᤔᤧᤒᤣᤀᤠᤱ ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. 20 “ᤀᤠᤍᤠᤱᤒᤣ. ᤋᤃᤡᤛᤔᤠ ᤕᤧᤶᤔᤥ ᤀᤠᤏᤡᤃᤣ ᤆᤠ ᤀᤡᤱᤛᤧ ᤋᤠᤔᤏᤠᤀᤠᤱ ᤘᤕᤧ॥ 21 ᤀᤠᤏᤡᤃᤣ ᤏᤢ᤺ᤰᤂᤡᤃᤧᤖ ᤐᤳᤇᤡᤃᤧᤸᤗᤧ ᤕᤠᤱᤎᤥ᤺ᤰᤔᤠ ᤋᤧᤴᤏᤥ ᤁᤧᤖᤡᤃᤧ ᤜᤧᤰᤁᤩᤠᤱ ᤀᤠᤏᤡᤃᤣ ᤛᤢᤰᤘᤠᤜᤠ᤹ ᤑᤠ᤺ᤰᤂᤢᤶᤒᤧᤸᤗᤧ ᤀᤠᤏᤡᤃᤣ ᤁᤧᤖᤧᤰᤗᤧ ᤛᤢᤰᤘᤠᤀᤥ ᤀᤠᤒᤠᤅᤣ ᤀᤠᤏᤡᤃᤣ ᤁᤳᤋᤢᤶᤒᤧᤒᤠ ᤁᤧᤖᤧᤰ ᤕᤢᤵᤐᤠ ᤕᤠᤱᤅᤡᤴ ᤂᤥ᤺ᤶᤏᤠ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤀᤠᤏᤡᤃᤧᤏᤢᤀᤣ ᤕᤢᤖᤢᤶᤒᤧᤀᤠᤱ ᤘᤠ᤹॥ 22 ᤆᤠ ᤀᤡᤱᤔᤠᤖᤧ ᤗᤠᤃᤡ ᤘᤣ᤹ ᤆᤩᤸᤗᤡᤰ ᤕᤢᤵᤐᤠᤀᤠᤱ ᤋᤠᤖᤢᤶᤒᤧᤀᤠᤱ ᤘᤠ᤹॥ ᤀᤠᤏᤡᤃᤣ ᤛᤢᤰᤘᤠᤜᤠ᤹ᤀᤥ ᤀᤠᤏᤡᤃᤣ ᤕᤢᤵᤐᤠᤴ ᤜᤠ᤺ᤳᤗᤧ ᤁᤣ᤺ᤳᤋᤢ ᤐᤡᤖᤡᤃᤧ ᤂᤧᤴ ᤀᤠᤏᤡᤃᤣ ᤔᤧᤏᤡᤛᤢᤶᤒᤧᤸᤗᤥ॥” 23 ᤂᤧᤸᤗᤧ ᤏᤥᤃᤵ ᤐᤡᤖᤢᤛᤡ. “ᤏᤢ᤹. ᤔᤧᤃᤡᤛᤧᤶᤔᤡᤴᤏᤧ᤹॥ ᤛᤧᤰᤂᤠᤛᤠᤱ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱ. ᤂᤡᤏᤡ᤹ ᤐᤠ᤺ᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤛᤢᤰᤘᤠᤜᤠ᤹ᤀᤥ ᤕᤠᤱ ᤁᤣ᤺ᤳᤋᤢ ᤁᤧᤒᤡᤖᤡᤒᤠᤒᤡᤗᤠ॥ ᤂᤡᤏᤡ᤹ ᤕᤢᤵᤐᤠ᤺ᤱᤃ ᤀᤠᤱᤃᤠ᤹ ᤂᤥᤛᤢᤱᤅᤠᤱᤅᤣ ᤘᤕᤧ॥” ᤂᤧᤒᤩᤠᤱ ᤂᤧᤸᤗᤧ ᤛᤡᤔᤡᤕᤥᤏᤧᤴ ᤗ᤺ᤳᤋᤢᤀᤠᤱ ᤂᤧᤱᤜᤠ᤹ᤖᤥ ᤋᤠᤖᤢ॥ 24 ᤂᤧᤴ ᤔᤏᤠ᤺ᤸᤗᤧ ᤂᤧᤱᤜᤠ᤹ ᤕᤢᤛᤢᤑᤖᤧ ᤁᤢᤜᤡᤶᤛᤡᤃᤠᤱ ᤋᤣ᤹ᤖᤢᤛᤡ. ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤱ ᤘᤠᤜᤵᤔᤠᤖᤧ ᤗᤠᤃᤡ ᤆᤫᤠ᤺ᤳ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤍᤱᤜᤠ᤹ᤀᤠᤱ ᤁᤢᤈᤠ ᤐᤡᤖᤢᤛᤡ॥ 25 ᤗᤧᤴᤍᤡᤰ ᤕᤢᤛᤢᤑᤧᤴ ᤁᤢᤍᤢᤶᤔᤠ ᤕᤧᤶᤗᤧ ᤗᤠᤃᤡ ᤂᤧᤱᤜᤠ᤹ᤖᤧ ᤆᤧᤛᤢᤱ ᤕᤠᤖᤡᤵ ᤔᤧᤈᤥᤃᤢ. ᤌᤣᤀᤠᤱᤓᤧᤸᤗᤧ ᤂᤧᤵᤔᤥᤀᤣ ᤋ᤺ᤰ ᤆᤠᤔᤠ ᤐᤥᤱ ᤑᤠ᤹ᤀᤠᤱ ᤔᤧᤔᤧᤳᤋᤢᤛᤡᤀᤠᤱ ᤘᤕᤧ॥ 26 ᤕᤢᤛᤢᤑᤧᤴ ᤜᤡᤶᤔᤥ ᤋᤩᤧ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤍᤠᤖᤢᤒᤠ ᤆᤧᤛᤢᤱᤅᤡᤴ ᤂᤢᤏᤧ᤹ ᤐᤡᤔᤠ ᤑᤠ᤹ᤀᤠᤱ ᤁᤢᤜᤡᤶᤔᤥ ᤔᤧᤍᤠᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤶᤒᤥᤴ ᤜᤒᤳᤋᤠᤱ ᤛᤧᤘᤠ ᤔᤧᤔᤧᤳᤋᤢ॥ 27 ᤂᤢᤏᤧ᤹ ᤂᤧᤱᤜᤠ᤹ᤏᤢ ᤜᤧᤏᤠ ᤔᤕᤧᤖ ᤛᤧ᤺ᤴᤗᤠᤵᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤐᤠ ᤂᤍᤠᤰᤔᤡᤴ ᤏᤢ᤹ᤀᤠᤱ ᤘᤠᤒᤡ᥅ ᤂᤢᤏᤧ᤹ ᤀᤠᤸᤗᤛᤠᤱ ᤘᤠ᤹ᤒᤡ᥅” 28 ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤁᤧᤛᤧᤘᤠᤖᤥᤒᤠ ᤀᤠᤏᤡᤃᤣ ᤐᤠᤏᤢᤍᤡᤱ ᤐᤠᤴ ᤏᤢ᤹ᤍᤠᤖᤥ. ᤜᤧᤰᤁᤩᤠᤱ ᤀᤠᤸᤗ ᤌᤠᤖᤡᤰ ᤘᤠ᤹ᤖᤥ॥” ᤂᤧᤒᤩᤠᤱ ᤂᤠᤶᤒᤠᤱᤅᤥ ᤌᤠᤖᤡᤰ ᤛᤠᤶᤒᤥᤴ ᤔᤧᤓᤴᤇᤡᤱᤅᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤧᤘᤠ ᤔᤧᤔᤧᤳᤋᤢ॥ 29 ᤕᤢᤛᤢᤑᤖᤧ ᤀᤰᤂᤣ ᤀᤥᤔᤕᤧᤖ ᤀᤠᤒᤠᤅᤣ ᤁᤢᤴᤛᤠ᤹. ᤀᤠᤒᤠᤅᤣ ᤁᤢᤶᤔᤠᤖᤧ ᤁᤢᤛ᤻ᤛᤠ. ᤒᤣᤏᤩᤠᤔᤡᤏᤧᤴ ᤏᤡᤛᤢᤀᤠᤱ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤱᤃᤠ᤹ ᤕᤠᤵᤔᤡ ᤁᤧᤔᤧᤳᤋᤧᤒᤠ ᤂᤡᤏᤡ᤹ ᤑᤥ᤺ᤰᤘᤠᤒᤠ ᤏᤢᤛᤠ᤹ᤀᤡᤴ ᤜᤠᤒᤠ ᤁᤴᤒᤡ᥅” ᤂᤧᤒᤩᤠᤱ ᤕᤢᤛᤢᤑᤖᤧ ᤔᤧᤳᤋᤢ. “ᤐᤠᤒᤢ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤂᤧᤏᤧ᤹ᤏᤢ ᤘᤠ᤹ᤖ॥” 30 ᤂᤢᤏᤧ᤹ ᤁᤢᤴᤛᤠ᤹ᤖᤧ ᤗᤠᤃᤡ ᤁᤢᤕᤥᤶ ᤐᤢ᤹ᤖᤧ ᤌᤠᤅᤧᤀᤠᤱ ᤁᤢᤜᤠ᤺ᤵᤔᤠ ᤕᤢᤛᤧᤀᤠᤱ ᤆᤠᤳᤋᤧᤖ ᤜᤠ᤺ᤵᤔᤠ ᤋᤧᤴ ᤁᤥ᤺ᤳᤋᤢᤖ ᤁᤢᤕᤠᤰᤑᤠᤀᤥ ᤗᤠᤛᤧᤀᤠᤱ ᤜᤠᤒᤧ॥ 31 ᤂᤧᤒᤩᤠᤱ ᤁᤢᤏᤠ᤺ᤴ ᤜᤵᤋᤢᤀᤠᤱ ᤗᤠ᤺ᤰᤁᤠᤳ ᤗ᤺ᤴᤍᤧ. ᤜᤧᤰᤁᤩᤠᤱ ᤀᤠᤒᤠᤅᤣ ᤋᤧᤶᤛᤡᤱᤗ ᤂᤢᤏᤧ᤹ ᤔᤧᤳᤋᤢᤛᤡ. “ᤀᤠᤸᤗ ᤋ᤺ᤰ ᤑᤧᤳᤋᤠᤶᤔᤧ᤹॥” 32 ᤂᤧᤒᤩᤠᤱ ᤕᤢᤛᤢᤑᤖᤧ ᤁᤢᤗᤠᤃᤡ ᤘᤣ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤓᤢ᤹ ᤁᤢᤴᤛᤠ᤹ᤛᤡᤖᤧ ᤗᤠᤃᤡ ᤘᤣ᤹ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤈᤠᤒᤠ ᤔᤡᤛᤪᤡᤜᤠ᤹ᤖᤧ ᤗᤠᤃᤡ ᤘᤣ᤹ ᤋ᤺ᤰ ᤔᤧᤕᤢᤰᤂᤢ. ᤌᤣᤀᤠᤱᤓᤧᤸᤗᤧ ᤔᤡᤛᤪᤡᤜᤠ᤹ᤖᤧ ᤜᤡᤒᤪᤢᤜᤠ᤹ᤏᤢ ᤛᤥᤛᤥᤖᤡᤰ ᤕᤢᤱᤔᤠᤀᤠᤱ ᤆᤠᤔᤠ ᤔᤧᤴᤏᤢ᤹ᤔᤏᤠᤒᤠ ᤘᤕᤧ॥ ᤜᤧᤰᤁᤣ ᤆᤥ᤺ᤰᤔᤠ ᤔᤡᤛᤪᤡᤜᤠ᤹ᤖᤧ ᤗᤠᤃᤡ ᤛᤡᤰᤁᤧᤗᤧ᤺ᤱᤒᤠ ᤐᤠᤴ ᤘᤕᤧ॥ 33 ᤋᤢᤶᤒᤠᤀᤠᤱᤎᤥ ᤑᤥ᤺ᤰᤘᤠᤒᤠ ᤌᤠᤖᤡᤰ ᤂᤢᤴᤇᤡ᤹ ᤋᤱᤒᤣ ᤀᤡᤛᤡ᤺ᤰ ᤕᤢᤛᤢᤑᤖᤧ ᤕᤢᤰᤂᤢᤛᤡᤀᤠᤱ ᤕᤢᤅᤧ॥ ᤂᤧᤴ ᤔᤏᤠᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤀᤥᤔᤧᤔᤧᤳᤇᤡᤱᤗ ᤔᤧᤕᤢᤅᤧ॥ 34 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤰᤁᤡᤴ ᤕᤢᤛᤢᤑᤖᤧ ᤁᤢᤈᤠᤔᤠᤏᤧᤳᤋᤥ ᤗᤠᤶᤒᤠ ᤔᤧᤎᤠᤒᤢ ᤔᤧᤒᤡᤖᤢᤛᤡᤀᤠᤱ ᤘᤕᤧ॥ ᤁᤖ ᤒᤧᤴᤈᤠᤔᤡᤏᤧᤸᤗᤧ ᤁᤢᤗᤰᤁᤡᤴ ᤂᤢᤴᤇᤡ᤹ ᤁᤧᤖᤧᤰᤗᤧ ᤗᤰᤁᤡᤴᤏᤢ᤺ᤸᤗᤧ ᤅᤠᤛᤡᤗᤧᤱ ᤕᤠᤖᤡᤰ ᤕᤸᤗᤡᤰ ᤕᤥᤖᤧ॥ ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤕᤢᤛᤢᤑᤧᤴᤏᤢ ᤛᤥᤖᤡᤰ ᤔᤧᤈ ᤔᤧᤎᤢᤅᤢᤀᤠᤱ ᤕᤧᤕᤧ ᤔᤧᤗ᤹ᤖᤧ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.