ᤋᤥᤗᤡᤱᤛᤥᤔᤢ 42 - LIFOTNTᤔᤡᤛᤪ ᤗᤠᤈᤣ᤹ᤀᤥ ᤕᤢᤛᤢᤑᤖᤧ ᤁᤢᤶᤓᤢ᤹ᤛᤡ ᤆᤠ ᤀᤡᤱᤛᤧ ᤔᤧᤒᤣ᤺ᤰ 1 ᤔᤡᤛᤪ ᤗᤠᤈᤣ᤹ᤀᤥ ᤆᤠ ᤘᤠ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤕᤠᤁᤢᤒᤖᤧ ᤁᤢᤛ᤻ᤛᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤌᤣᤀᤠᤱ ᤀᤥᤃᤧᤔᤧᤳᤋᤠᤛᤡᤀᤠᤱ ᤁᤧᤕᤢᤅᤡᤒᤠᤒᤣ᥅ 2 ᤔᤡᤛᤪ ᤗᤠᤈᤣ᤹ᤀᤥ ᤆᤠ ᤘᤠ᤹ᤔᤢ ᤁᤧᤗ᤹ᤒᤠ ᤂᤧᤵᤛᤢᤱᤅᤠᤱ ᤘᤠ᤹॥ ᤀᤠᤏᤡ᤹ ᤜᤡᤱᤔᤠᤀᤣ ᤐᤥᤱᤏᤧ ᤑᤠ᤹ᤃᤪ ᤂᤧ᤹ᤕᤥ ᤐᤣᤃᤧᤶᤔᤧ᤹ᤀᤠᤱ ᤀᤠᤏᤡ᤹ ᤗᤠᤃᤡ ᤆᤠ ᤀᤡᤅᤧᤶ ᤌᤠᤰᤋᤧᤶᤔᤧ᤹॥” 3 ᤁᤸᤗᤧᤆᤥᤃᤢᤸᤗᤧ ᤕᤢᤛᤢᤑᤖᤧ ᤌᤡᤒᤥᤱ ᤁᤢᤶᤓᤢ᤹ᤜᤠ᤹ ᤔᤡᤛᤪᤀᤥ ᤆᤠ ᤀᤡᤱᤛᤧ ᤔᤧᤒᤣ॥ 4 ᤁᤖ ᤕᤠᤁᤢᤒᤧᤸᤗᤧ ᤕᤢᤛᤢᤑᤖᤧ ᤁᤢᤴᤛᤠ᤹ ᤒᤧᤴᤈᤠᤔᤡᤏᤧᤱᤃ ᤁᤢᤶᤓᤢ᤹ᤛᤡᤏᤢ ᤔᤧᤒᤠᤱᤄᤢᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤁᤧᤛᤠᤰᤐᤥ ᤌᤠᤒᤡ ᤑᤠ᤹ᤀᤠᤱ ᤕᤠᤁᤢᤒᤧᤴ ᤁᤡᤛᤧ॥ 5 ᤀᤰᤂᤣᤗ᤹ᤖᤡᤰ ᤘᤣ᤹ ᤆᤠ ᤀᤡᤱᤛᤧ ᤁᤧᤒᤣ᤺ᤰᤐᤠᤜᤠ᤹ᤏᤢ ᤛᤥᤖᤡᤰ ᤕᤠᤁᤢᤒᤖᤧ ᤁᤢᤛ᤻ᤛᤠᤜᤠ᤹ᤀᤠᤱ ᤆᤠ ᤀᤡᤱᤛᤧ ᤔᤧᤒᤣ. ᤌᤣᤀᤠᤱᤓᤧᤸᤗᤧ ᤁᤏᤠᤏ ᤗᤠᤈᤣ᤹ᤀᤥᤀᤠᤱ ᤛᤠᤰ ᤐᤥᤃᤧᤀᤠᤱ ᤏᤧᤛ᤻ᤛᤧ॥ 6 ᤂᤧᤴ ᤕᤧᤶᤔᤥ ᤕᤢᤛᤢᤑᤧᤴ ᤔᤡᤛᤪ ᤗᤠᤈᤣ᤹ᤀᤥ ᤛᤢᤜᤠᤱᤕᤢᤰᤐᤠ ᤘᤕᤧ॥ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤆᤠ ᤁᤧᤛᤱᤒᤠ ᤁᤧᤒᤡᤒᤠᤀᤠᤱ ᤂᤢᤏᤧ᤹ᤀᤣ ᤘᤕᤧ॥ ᤂᤧᤸᤗᤧᤆᤥᤃᤢᤸᤗᤧ ᤕᤢᤛᤢᤑᤧᤸᤗᤥ ᤁᤢᤶᤓᤢ᤹ᤛᤡ ᤔᤧᤍᤩᤧᤀᤠᤱ ᤂᤠᤶᤒᤠᤱᤅᤥ ᤌᤠᤖᤡᤰ ᤀ᤺ᤰᤂᤢᤶ ᤔᤧᤓᤴᤇᤡᤱᤅᤠᤱ ᤛᤧᤘᤠ ᤔᤧᤔᤧᤳᤋᤢ॥ 7 ᤕᤢᤛᤢᤑᤖᤧ ᤁᤢᤶᤓᤢ᤹ᤛᤡ ᤏᤡᤛᤢᤛᤡᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤛᤡ. ᤁᤖ ᤂᤢᤏᤧ᤹ ᤂᤧᤱᤜᤠ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤇᤡᤴᤒᤠ ᤜᤧᤰᤁᤣ ᤗᤧᤱᤛᤡᤱᤅᤠᤱ ᤔᤠᤱᤓᤠ ᤆᤠ᤹ᤖᤧᤖ ᤂᤧᤱᤜᤠ᤹ ᤛᤣ᤺ᤴᤗᤠᤵᤋᤢᤛᤡ. “ᤂᤡᤏᤡ᤹ ᤀᤠᤳᤋᤥᤗᤠᤶ ᤁᤧᤍᤩᤧ᤹ᤀᤡᤒᤠᤒᤣ᥅” ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤁᤏᤠᤏ ᤗᤠᤈᤣᤗᤠᤶ ᤆᤠ ᤀᤡᤱᤛᤧ ᤋᤩᤧ᤹ᤀᤡᤃᤧᤒᤠᤖᤥ॥” 8 ᤕᤢᤛᤢᤑᤖᤧ ᤀᤠᤒᤠᤅᤣ ᤁᤢᤶᤓᤢ᤹ᤛᤡ ᤁᤢᤛᤡᤱ ᤏᤡ᤺ᤳᤋᤢᤛᤡ. ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ॥ 9 ᤂᤧᤒᤩᤠᤱ ᤕᤢᤛᤢᤑᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤛᤧᤵᤔᤠᤱ ᤔᤠᤰᤋᤢᤒᤠ ᤛᤧᤵᤔᤠᤱᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤌᤥ᤺ᤶᤛᤫᤠᤒᤠᤏᤡᤱ॥ ᤁᤴ ᤗᤠᤈᤣᤴ ᤀᤠᤰᤂᤣᤀᤠᤱ ᤏᤠ᤺ᤶᤔᤠ ᤛᤢᤰᤋᤧᤳᤋᤡ ᤑᤠ᤹ᤀᤠᤱ ᤁᤢᤀᤥᤔᤧᤳᤇᤧ ᤁᤧᤍᤩᤧ᤹ᤀᤡᤒᤠᤖᤥ॥” 10 ᤂᤧᤱᤜᤠ᤹ᤖᤧ ᤕᤢᤛᤢᤑᤧᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤜᤧᤰᤁᤣ ᤔᤣ᤺ᤴᤗᤥ॥ ᤀᤠᤏᤡᤃᤣ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠᤜᤠ᤹ ᤆᤠ ᤀᤡᤱᤛᤧ ᤋᤩᤧ᤹ᤀᤡᤃᤧᤒᤠᤖᤥ॥ 11 ᤀᤠᤏᤡᤃᤣ ᤗᤳᤇᤠ ᤔᤏᤠ᤺ᤸᤗᤧ ᤁᤢᤛ᤻ᤛᤠᤍᤡᤃᤧᤖᤥ॥ ᤀᤠᤏᤡᤃᤧᤃ ᤁᤢᤍᤥ᤺ᤵᤔᤠ ᤔᤏᤠᤛᤡᤃᤧ. ᤌᤥ᤺ᤶᤛᤫᤠᤒᤠᤍᤡᤃᤧ ᤔᤣ᤺ᤸᤗᤥ॥” 12 ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤣ᤺ᤴ. ᤁᤴ ᤗᤠᤈᤣᤴ ᤀᤠᤰᤂᤣᤀᤠᤱ ᤏᤠ᤺ᤶᤔᤠ ᤛᤢᤰᤋᤧᤳᤋᤡ ᤑᤠ᤹ᤀᤠᤱ ᤁᤢᤀᤥᤔᤧᤳᤇᤧ ᤁᤧᤍᤩᤧ᤹ᤀᤡᤒᤠᤖᤥ॥” 13 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤀᤠᤏᤡᤃᤣ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠᤜᤠ᤹ ᤌᤡᤒᤥᤱᤅᤠᤱ ᤏᤧᤳᤇᤡ ᤘᤠ᤹ᤔᤏᤠ॥ ᤁᤏᤠᤏ ᤗᤠᤈᤣ᤹ᤀᤥᤒᤠ ᤗᤳᤇᤠ ᤔᤏᤠ᤺ᤸᤗᤧ ᤁᤢᤛ᤻ᤛᤠᤍᤡᤃᤧᤖᤥ॥ ᤑᤥ᤺ᤰᤘᤠᤒᤧᤴ ᤀᤠᤸᤗᤥ ᤀᤠᤏᤡᤃᤣ ᤐᤠ᤺ᤴᤏᤢ ᤘᤠ᤹. ᤜᤧᤰᤁᤩᤠᤱ ᤗᤳᤇᤠ᤺ᤱᤃ ᤔᤠᤛᤡᤱᤅᤠᤱ ᤀᤠᤸᤗᤥ ᤜᤥᤵ॥” 14 ᤕᤢᤛᤢᤑᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤜᤧᤰᤁᤣᤀᤣ ᤂᤡᤏᤡ᤹ ᤌᤥ᤺ᤶᤛᤫᤠᤒᤠᤏᤡᤱᤖᤇ॥ 15 ᤀᤠᤸᤗ ᤀᤰᤂᤣᤗ᤹ᤖᤡᤰ ᤂᤡᤏᤡ᤹ ᤛᤠ᤹ᤏᤡᤱᤗᤥ॥ ᤑᤠᤖᤥᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤜᤧᤰᤁᤣ. ᤂᤡᤏᤡ᤹ ᤑᤥ᤺ᤰᤘᤠᤒᤠ ᤏᤢᤛᤠ᤹ᤀᤡᤴ ᤔᤧᤴᤍᤠᤀᤣ ᤌᤠᤖᤡᤰ ᤂᤡᤏᤡ᤹ ᤁᤴ ᤋᤧᤴᤏᤥᤗᤠᤶ ᤐᤣ᤺ᤰᤔᤠ ᤁᤧᤱᤄᤥᤛᤡᤸᤗᤥ॥ 16 ᤂᤡᤏᤡ᤹ᤀᤥ ᤌᤡᤵᤐᤠ ᤂᤡᤏᤡ᤹ ᤏᤢᤛᤠ᤹ ᤗᤠᤛᤧ ᤐᤠᤱᤄᤧᤶᤔᤧ᤹॥ ᤂᤢᤏᤧ᤹ ᤁᤢᤕᤢᤕᤢ ᤂᤡᤏᤡ᤹ ᤐᤢᤱᤗᤠᤜᤡᤶᤔᤥ ᤕᤠᤃᤠᤶᤔᤧ᤹॥ ᤀᤰᤂᤣᤗ᤹ᤖᤡᤰ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠ ᤐᤠ᤺ᤴᤏᤡᤴ ᤛᤧᤰᤂᤠᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤛᤠ᤹ᤖᤢᤱ॥ ᤔᤣ᤺ᤴᤏᤧᤑᤠᤃᤪ ᤑᤠᤖᤥᤸᤗᤧ ᤁᤢᤜᤡᤱᤔᤴᤏᤥ ᤔᤠᤱᤜᤧᤰᤛᤡᤱᤀᤠ ᤂᤡᤏᤡ᤹ᤃ ᤌᤥ᤺ᤶᤛᤫᤠᤒᤠᤏᤡᤱᤅᤣᤖᤥ॥” 17 ᤜᤧᤰᤁᤩᤠᤱ ᤕᤢᤛᤢᤑᤖᤧ ᤂᤧᤱᤜᤠ᤹ ᤐᤢᤱᤗᤠᤜᤡᤶᤔᤥ ᤌᤡᤰᤔᤧᤳ ᤛᤢᤶᤕᤧᤴ ᤕᤢᤰᤂᤢᤛᤡ॥ 18 ᤛᤢᤶᤕᤧᤴᤏᤥ ᤕᤢᤛᤢᤑᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤰᤂᤣ ᤆᤥᤃᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤜᤡᤅᤡᤖᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤡᤀᤠ॥ 19 ᤂᤡᤏᤡ᤹ ᤁᤢᤍᤥ᤺ᤵᤔᤠᤏᤡᤱᤏᤧ ᤑᤠᤃᤪ ᤂᤡᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ᤀᤥ ᤌᤡᤵᤐᤠ ᤁ᤹ᤕᤥ ᤐᤢᤱᤗᤠᤜᤡᤶᤔᤥ ᤕᤢᤅᤧᤶᤔᤧ᤹. ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤂᤡᤏᤡ᤹ ᤜᤡᤶᤛᤕᤱᤜᤠ᤹ᤖᤧ ᤁᤢᤈᤠ ᤆᤠᤔᤠ ᤔᤧᤄᤥᤛᤢᤖ ᤑᤠ᤹ᤀᤠᤱ ᤆᤠ ᤁᤢᤕᤠᤶ ᤋᤣ᤹ᤖᤠᤶᤔᤧ᤹॥ 20 ᤁᤖ ᤂᤡᤏᤡ᤹ ᤑᤥ᤺ᤰᤘᤠᤒᤠ ᤏᤢᤛᤠ᤹ᤀᤡᤴ ᤁ᤹ᤕᤥ ᤀᤠᤱᤃᤠ᤹ᤀᤥ ᤋᤠᤖᤧᤶᤔᤧ᤹॥ ᤀᤰᤂᤣᤗ᤹ᤖᤡᤰ ᤂᤡᤏᤡ᤹ ᤐᤠ᤺ᤴᤏᤡᤴ ᤛᤧᤰᤂᤠᤖᤥ ᤑᤠ᤹ᤀᤠᤱ ᤏᤡᤍᤧᤳᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤴᤇ᤻ᤕᤧ᤹ᤀᤡᤴᤗᤥ॥” ᤂᤧᤱᤜᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤔᤧᤍᤧᤴᤍᤧ॥ 21 ᤂᤢᤴᤇᤡ᤹ ᤗᤢᤶᤔᤥ ᤀᤰᤂᤣ ᤔᤧᤔᤧᤳᤇᤡᤱ. “ᤛᤧᤰᤂᤠᤛᤠᤱ ᤀᤠᤏᤡ᤹ ᤏᤢᤛᤠ᤹ᤀᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤵᤋᤡᤰ ᤀᤠᤄᤥᤛᤢᤶᤔᤠᤱ ᤀᤠᤘᤠ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤐᤣᤗᤡ ᤀᤠᤓᤠᤰᤋᤧᤸᤗᤧ ᤂᤧᤸᤗᤧ ᤁᤢᤏᤡᤱᤘᤠ᤹ ᤋᤢᤃᤧᤒᤠᤴ ᤀᤠᤏᤡ᤹ ᤀᤠᤏᤡᤛᤢᤶᤔᤠᤱᤛᤠᤱ ᤂᤧᤸᤗᤧ ᤁᤢᤒᤠ᤺ᤴᤏᤡᤴ ᤀᤠᤱᤄᤧᤵᤛᤢᤶᤏᤧᤴ॥ ᤂᤧᤸᤗᤧᤆᤥᤃᤢᤸᤗᤧ ᤁᤴ ᤕᤧᤳᤋᤢᤰᤂᤣᤴ ᤀᤠᤏᤡ᤹ᤀᤥ ᤋᤩᤧᤒᤠᤖᤥ॥” 22 ᤖᤢᤒᤧᤏᤧᤸᤗᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤧᤴ ᤆᤢ᤺ᤰᤐᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤔᤧᤈᤥᤃᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤂᤡᤏᤡ᤹ ᤔᤧᤳᤏᤡᤱᤒᤠ ᤔᤣ᤺ᤶᤒᤡ᥅ ᤁᤖ ᤂᤡᤏᤡ᤹ ᤂᤧᤶᤔᤠᤀᤣ ᤁᤧᤱᤄᤧᤵᤛᤢᤶᤏᤧᤴ॥ ᤀᤠᤸᤗ ᤂᤧᤸᤗᤧ ᤁᤢᤔᤠᤰᤂᤡ᤹ᤀᤡᤸᤗᤧ ᤁᤢᤗᤧᤰᤘᤠ ᤀᤠᤏᤡ᤹ ᤀᤠᤍᤢᤔᤢᤶᤗ ᤐᤥᤱ॥” 23 ᤕᤢᤛᤢᤑᤧᤴ ᤏᤢ ᤁᤢᤶᤓᤢ᤹ ᤁᤢᤴᤛᤠ᤹ᤛᤡ ᤗᤢᤶᤔᤥ ᤐᤠᤴ ᤁᤧᤗᤧᤱᤒᤠ ᤔᤏᤠᤎᤡᤰ ᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤕᤢᤛᤢᤑᤖᤧ ᤁᤢᤛᤡᤱᤏᤡ᤺ᤳᤋᤢ ᤑᤠ᤹ᤀᤠᤱ ᤔᤧᤴᤏᤡᤛᤢᤴ॥ 24 ᤕᤢᤛᤢᤑᤧᤴ ᤂᤧᤱᤜᤠ᤹ᤗᤠᤶ ᤌᤡᤰᤗᤧᤵᤔᤠᤱ ᤜᤡᤛᤡᤱᤅᤠᤱ ᤜᤠᤒᤧ ᤜᤧᤰᤁᤩᤠᤱ ᤕᤠᤶᤔᤥ ᤂᤢᤴᤇᤡ᤹ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤂᤧᤱᤜᤠ᤹ᤏᤢ ᤋᤠ᤹ᤈᤧᤰᤂᤧ॥ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤀᤣ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤖᤀᤣ ᤛᤡᤔᤡᤕᤥᤏᤧᤴ ᤀᤡᤄᤣ᤺ᤰᤂᤢ॥ ᤕᤢᤛᤢᤑᤖᤧ ᤁᤢᤶᤓᤢ᤹ᤛᤡ ᤁᤏᤠᤏ ᤗᤠᤈᤣ᤹ ᤔᤧᤏᤢ᤺ᤱ᤹ 25 ᤕᤢᤛᤢᤑᤖᤧ ᤂᤢᤴᤇᤡ᤹ ᤛᤢᤰᤘᤠᤜᤠ᤹ᤀᤥ ᤆᤠ ᤁᤣ᤺ᤳᤋᤧᤶ ᤐᤡᤖᤧᤶᤛᤡᤶᤔᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤢᤵᤐᤠ ᤕᤠᤱᤜᤠ᤹ ᤀᤠᤒᤠᤅᤣ ᤂᤢᤴᤇᤡ᤹ ᤆᤠ ᤛᤢᤰᤘᤠᤀᤥᤀᤣ ᤁᤣ᤺ᤳᤋᤧᤶ ᤐᤡᤖᤧᤶᤛᤡᤶᤔᤧ᤹ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤶᤍᤡ᤺ᤰᤁᤥ ᤆᤠᤜᤠᤒ᤻ ᤁᤧᤈᤥ᤺ᤰᤐᤠ ᤆᤠᤛᤠᤰ ᤁᤢ᤺ᤳᤋᤧᤶᤍᤣᤛᤧᤶᤛᤧ᤹ ᤑᤠ᤹ᤀᤠᤱ ᤔᤢᤖᤠ ᤔᤧᤳᤋᤢᤛᤡ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤜᤧᤰᤁᤣᤀᤣ ᤔᤧᤈᤥᤃᤢ॥ 26 ᤂᤧᤒᤩᤠᤱ ᤂᤢᤴᤇᤡ᤹ ᤀᤍᤱᤜᤠ᤹ ᤆᤠᤃᤰ ᤔᤧᤃᤢ᤺ᤳᤋᤢᤛᤡᤀᤠᤱ ᤂᤧ᤹ᤕᤥᤗᤠᤶ ᤔᤧᤎᤠᤛᤡᤱ ᤔᤧᤒᤣ॥ 27 ᤕᤠᤱᤎᤥ᤺ᤰᤔᤠ ᤋᤧᤴᤏᤥ ᤂᤧᤱᤜᤠ᤹ᤀᤥ ᤌᤡᤰᤗᤧ ᤁᤢᤀᤍᤱᤅᤡᤴ ᤆᤠ ᤐᤡᤔᤠ ᤑᤠ᤹ᤀᤠᤱ ᤁᤢᤛᤢᤰᤘᤠᤴ ᤜᤴᤍᤢᤸᤗᤧ ᤁᤢᤕᤢᤵᤐᤠ ᤕᤠᤱᤜᤠ᤹ ᤁᤢᤛᤢᤰᤘᤠ᤺ᤸᤗᤧ ᤁᤢᤔᤢᤖᤠᤀᤥ ᤕᤠᤃᤧᤒᤠ ᤏᤡᤛᤢ॥ 28 ᤂᤧᤸᤗᤧ ᤁᤢᤶᤓᤢ᤹ ᤁᤢᤴᤛᤠ᤹ᤛᤡ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤕᤢᤵᤐᤠ ᤕᤠᤱᤅᤡᤱᤃ ᤔᤧᤏᤢ᤺ᤰᤋᤠᤱ ᤔᤧᤒᤡᤖᤠᤱᤏᤡᤒᤡ᥅ ᤀᤥᤔᤧᤳᤋᤧᤶᤔᤧ᤹. ᤀᤠᤛᤢᤰᤘᤠ᤺ᤸᤗᤧ ᤁᤢᤔᤢᤖᤠᤀᤥ ᤕᤠᤰᤗᤥ॥” ᤁᤴ ᤔᤧᤏᤡᤛᤢᤀᤠᤱ ᤂᤧᤱᤜᤠ᤹ ᤁᤡᤔᤠᤸᤗᤧ ᤂᤢᤴᤇᤡ᤹ ᤛᤠᤶᤔᤡᤰ ᤔᤕᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤆᤡᤖᤡᤶᤗᤡᤶᤏᤠ ᤔᤧᤕᤰᤂᤧᤖ ᤀᤥᤔᤧᤔᤳᤇᤡᤱᤗ ᤀᤰᤂᤣ ᤔᤧᤳᤇᤡᤱᤔᤠ ᤔᤧᤜᤣ᤺ᤰᤋᤧ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤌᤣ ᤆᤥ᤺ᤰᤔᤠ ᤀᤠᤀᤡ᤺ᤳᤋᤧᤀᤡᤖᤥ᥅” 29 ᤂᤧᤱᤜᤠ᤹ ᤁᤏᤠᤏ ᤗᤠᤈᤣ᤹ᤀᤥ ᤂᤢᤴᤇᤡ᤹ ᤐᤠᤏᤢᤍᤡᤱ ᤐᤠ ᤕᤠᤁᤢᤒᤖᤥ ᤔᤧᤃᤧᤖᤧ. ᤂᤧᤒᤩᤠᤱ ᤂᤢᤴᤇᤡ᤹ᤏᤢ ᤐᤥ᤺ᤰᤂᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤔᤧᤳᤋᤢ. 30 “ᤂᤧᤴ ᤗᤠᤈᤣ᤺ᤸᤗᤧ ᤁᤢᤴᤍᤠᤱᤒᤧᤸᤗᤧ ᤀᤠᤏᤡᤃᤧᤏᤢ ᤁᤧᤛᤠᤰᤐᤠ ᤐᤠᤴ ᤐᤠ᤺ᤳᤋᤢ॥ ᤀᤠᤏᤡᤃᤧᤃ ᤂᤧᤴ ᤗᤠᤈᤣ᤹ᤀᤥ ᤂᤧᤸᤗᤧ ᤌᤥ᤺ᤶᤛᤫᤠᤒᤠ ᤗᤣ᤺ᤳᤋᤡᤃᤧ॥ 31 ᤁᤖ ᤀᤠᤏᤡᤃᤣ ᤂᤧᤴ ᤔᤧᤵᤔᤏᤠ. ‘ᤀᤠᤏᤡᤃᤣ ᤁᤢᤍᤥ᤺ᤵᤔᤠ ᤔᤏᤠᤛᤡᤃᤧ॥ ᤀᤠᤏᤡᤃᤣ ᤌᤥ᤺ᤶᤛᤫᤠᤒᤠ ᤔᤣ᤺ᤴᤇᤡᤃᤧ॥ 32 ᤀᤠᤏᤡᤃᤣ ᤐᤠ᤺ᤸᤗᤧ ᤌᤡᤒᤥᤱᤅᤠᤱ ᤏᤧᤳᤇᤡ ᤁᤢᤛ᤻ᤛᤠᤛᤡᤃᤧ॥ ᤗᤳᤇᤠᤃ ᤔᤠᤛᤡᤱᤅᤠᤱ ᤀᤠᤸᤗᤥ ᤜᤥᤵ. ᤑᤥ᤺ᤰᤘᤠᤒᤧᤱᤃ ᤀᤠᤸᤗᤥ ᤀᤠᤏᤡᤃᤣ ᤐᤠ᤺ᤴᤏᤢ ᤘᤠ᤹॥’ 33 “ᤂᤧᤴ ᤗᤠᤈᤣ᤹ᤀᤥᤒᤠ ᤛᤢᤜᤠᤱᤕᤢᤰᤐᤠᤸᤗᤧ ᤔᤧᤳᤋᤡᤃᤧ. ‘ᤁᤴ ᤐᤠ᤺ᤴᤏᤥᤗᤠᤶ ᤂᤡᤏᤡ᤹ ᤁᤢᤍᤥ᤺ᤵᤔᤠ ᤔᤏᤠᤏᤡᤱ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱᤗᤥ. ᤂᤡᤏᤡ᤹ ᤑᤢ᤹ᤏᤢᤛ᤻ᤛᤠ᤹ᤀᤥ ᤌᤡᤵᤐᤠ ᤁ᤹ᤕᤥ ᤀᤠᤱᤃᤠ᤹ᤏᤢ ᤕᤢᤰᤂᤧᤶ ᤌᤩᤧᤶᤔᤧ᤹. ᤜᤧᤰᤁᤩᤠᤱ ᤛᤠᤰᤁᤥ ᤂᤡᤏᤡ᤹ ᤜᤡᤶᤛᤕᤱᤜᤠ᤹ ᤂᤠ᤺ᤵᤔᤠᤛᤡᤖᤧ ᤗᤠᤃᤡ ᤆᤠ ᤕᤠᤱᤅᤠᤛᤡᤶᤔᤧ᤹ᤀᤠᤱ ᤌᤠᤛᤡᤱᤅᤠᤶᤔᤧ᤹॥ 34 ᤁᤖ ᤂᤡᤏᤡ᤹ ᤑᤥ᤺ᤰᤘᤠᤒᤠ ᤏᤢᤛᤠ᤹ᤀᤡᤴ ᤁ᤹ᤕᤥ ᤋᤠᤖᤠᤶᤔᤧ᤹॥ ᤂᤧᤒᤩᤠᤱᤗᤰ ᤂᤡᤏᤡ᤹ ᤌᤥ᤺ᤶᤛᤫᤠᤒᤠ ᤔᤣ᤺ᤴᤏᤡᤱ. ᤁᤖ ᤁᤢᤍᤥ᤺ᤵᤔᤠ ᤔᤏᤠᤏᤡᤱ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤴ ᤂᤡᤏᤡ᤹ ᤏᤢᤛᤠ᤹ᤀᤡᤴ ᤂᤡᤏᤡ᤹ ᤜᤢᤰᤁᤥ ᤐᤡᤏᤡᤱ. ᤜᤧᤰᤁᤩᤠᤱ ᤂᤡᤏᤡ᤹ ᤁᤴ ᤗᤠᤈᤣ᤹ᤀᤥ ᤗᤧᤱᤜᤱ ᤆᤥ᤺ᤰᤔᤠ ᤁᤧᤄᤥᤛᤢᤶᤗᤥ॥’” 35 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤢᤰᤘᤠᤴ ᤔᤧᤗᤡᤱᤛᤢᤸᤗᤧ ᤁᤧᤖᤧᤰᤗᤧ ᤂᤢᤴᤇᤡ᤹ ᤕᤢᤵᤐᤠ ᤕᤠᤱᤅᤡᤸᤗᤧ ᤁᤢᤛᤢᤱᤔᤧᤴ ᤀᤠᤒᤠᤅᤣ ᤂᤢᤴᤇᤡ᤹ ᤛᤢᤰᤘᤠᤀᤥ ᤕᤠᤃᤧᤖᤇ॥ ᤂᤧᤱᤜᤠ᤹ᤖᤧ ᤜᤧᤰᤁᤩᤠᤱ ᤂᤢᤴᤇᤡ᤹ ᤐᤠ᤺ᤸᤗᤧ ᤂᤧᤴ ᤕᤢᤵᤐᤠ ᤕᤠᤱᤅᤡᤸᤗᤧ ᤁᤢᤛᤢᤱᤔᤧᤴ ᤏᤡᤛᤢᤀᤠᤱ ᤂᤧᤱᤜᤠ᤹ ᤔᤧᤃᤡᤛᤧ॥ 36 ᤂᤢᤴᤇᤡ᤹ ᤐᤠ ᤕᤠᤁᤢᤒᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ᤃ ᤀᤠᤱᤃᤠ᤹ ᤀᤠᤛ᤻ᤛᤠᤜᤠ᤹ ᤀᤠᤃ᤻ᤏᤠᤵᤋᤧᤀᤠᤱ ᤀᤠᤱᤃᤠ᤹ ᤛᤠ᤹ᤖᤡᤰ ᤔᤧᤖᤡᤱᤅᤥ ᤕᤠᤵᤔᤡ ᤁᤧᤎᤠᤛᤧᤀᤠᤱ ᤘᤠ᤹॥ ᤕᤢᤛᤢᤑᤧᤴ ᤜᤥᤵ. ᤛᤡᤔᤡᤕᤥᤏᤧᤴ ᤜᤥᤵ. ᤀᤠᤸᤗ ᤒᤧᤴᤈᤠᤔᤡᤏᤧᤴᤏᤠᤱ ᤋᤣ᤹ᤔᤠ ᤁᤧᤈᤥᤃᤢᤶ॥ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤀᤠᤛᤶᤎᤠᤱ ᤌᤩᤧᤀᤠᤱ ᤘᤠ᤹॥” 37 ᤂᤧᤒᤩᤠᤱ ᤖᤢᤒᤧᤏᤧᤸᤗᤧ ᤁᤢᤶᤒᤠ ᤔᤧᤳᤋᤢ. “ᤀᤠᤱᤃᤠ᤹ ᤒᤣᤏᤩᤠᤔᤡᤏᤧᤴ ᤂᤧᤏᤧ᤹ᤀᤥ ᤔᤧᤍᤠ᤺ᤳᤋᤠᤴᤏᤣ ᤑᤠᤃᤪ ᤀᤠᤱᤃᤠ᤹ ᤏᤧᤵᤑᤢ ᤀᤠᤛ᤻ᤛᤠᤜᤠ᤹ ᤛᤩᤧᤖᤧᤛᤧ᤹॥ ᤒᤣᤏᤩᤠᤔᤡᤏᤧᤴ ᤀᤠᤱᤃᤠ᤹ ᤀᤠᤜᤢᤰᤁᤥ ᤐᤡᤖᤠᤱᤅᤧ᤹॥ ᤂᤧᤴ ᤀᤠᤱᤃᤠ᤹ ᤂᤧᤏᤧ᤹ᤀᤥ ᤏᤢ᤺ᤰᤋᤢᤱᤅᤠᤱ ᤋᤠᤖᤢᤱᤗᤥ॥” 38 ᤁᤖ ᤕᤠᤁᤢᤒᤖᤧ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤛ᤻ᤛᤠᤴ ᤂᤡᤏᤡ᤹ᤏᤢ ᤔᤧᤒᤣ᤺ᤰᤏᤧᤴ. ᤌᤣᤀᤠᤱᤓᤧᤸᤗᤧ ᤁᤢᤶᤓᤢ᤹ᤀᤡᤴ ᤔᤠᤛᤡᤱᤄᤧᤖᤧ. ᤜᤧᤰᤁᤩᤠᤱ ᤀᤠᤸᤗ ᤂᤢᤏᤧ᤹ᤖᤰ ᤋᤠᤅᤧᤀᤠᤱ ᤘᤠ᤹॥ ᤂᤡᤏᤡ᤹ ᤗᤠᤶᤍᤡ᤺ᤰᤁᤥ ᤂᤢᤏᤧ᤹ᤀᤠᤱ ᤁᤧᤛᤠᤰᤐᤠ ᤐᤠᤴ ᤋᤢᤔᤢᤸᤗᤧᤃ. ᤂᤡᤏᤡ᤹ ᤁᤴ ᤁᤧᤓᤢᤵᤐᤠ ᤀᤠᤎᤧᤃᤣ᤺ᤰᤁᤧᤴ ᤏᤡᤱᤛᤠᤱ ᤐᤢᤰᤔᤥᤀᤣ ᤀᤡ᤺ᤵᤐᤢᤱᤅᤥ ᤁᤧᤃᤧᤳᤋᤢᤶᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.