ᤋᤥᤗᤡᤱᤛᤥᤔᤢ 41 - LIFOTNTᤕᤢᤛᤢᤑᤖᤧ ᤜᤠᤱᤅᤡᤸᤗᤧ ᤁᤢᤛᤧᤵᤔᤠᤱᤅᤡᤸᤗᤧ ᤁᤢᤒᤣ ᤜᤴᤍᤢ᤹ 1 ᤋᤱᤒᤣ ᤏᤧᤳᤇᤡ ᤁᤧᤖᤧᤀᤠᤱ ᤀᤣᤃᤠᤱ ᤑᤠᤖᤥᤸᤗᤧ ᤗᤳᤇᤠ ᤛᤧᤵᤔᤠᤱᤎᤡᤰ ᤔᤠᤰᤋᤢ॥ ᤛᤧᤵᤔᤠᤱᤅᤥ ᤂᤢᤏᤧ᤹ ᤏᤡᤗ ᤕᤱᤄᤱᤅᤡᤸᤗᤧ ᤁᤢᤕᤠᤀᤥ ᤕᤧᤒᤧᤒᤠ ᤔᤠᤰᤋᤢ॥ 2 ᤏᤡᤗ ᤕᤱᤄᤱᤅᤥᤗᤠᤶ ᤛᤠ᤹ᤖᤡᤰ ᤘᤖᤡᤰᤗᤡᤰᤔᤠ ᤁᤧᤔᤧ᤹ᤔᤠ ᤏᤢᤛᤡ ᤐᤡᤵᤔᤠᤜᤠ᤹ ᤔᤧᤗ᤺ᤴᤍᤧ ᤔᤧᤎᤠᤅᤧ. ᤜᤧᤰᤁᤩᤠᤱ ᤑᤱᤍᤢᤗᤠᤀᤥ ᤆᤠᤗᤠᤶᤔᤠ ᤔᤧᤜᤣ᤺ᤰᤋᤧ॥ 3 ᤂᤧᤴ ᤀᤣᤃᤠᤱ ᤘᤣ᤹ ᤏᤢᤛᤡ ᤕᤧᤵ ᤏᤢ ᤜᤥᤖᤡᤰᤗᤰ ᤁᤧᤒᤵᤐᤠ ᤕᤧ᤺ᤱᤄᤡ᤺ᤰᤂᤡ᤺ᤰᤔᤠ ᤐᤡᤵᤔᤠᤜᤠ᤹ ᤔᤧᤗ᤺ᤴᤍᤧ. ᤜᤧᤰᤁᤩᤠᤱ ᤏᤡᤗ ᤕᤱᤄᤱᤅᤡᤸᤗᤧ ᤁᤢᤕᤠᤀᤥ ᤁᤧᤕᤧᤵᤔᤠ ᤋᤃᤡᤒᤠ ᤐᤡᤵᤔᤠᤜᤠ᤹ᤏᤢ ᤔᤧᤕᤧᤶᤛᤡᤱ॥ 4 ᤂᤧᤴ ᤏᤢᤛᤡ ᤕᤧᤵᤐᤠ ᤏᤢ ᤜᤥᤖᤡᤰᤗᤰ ᤁᤧᤒᤵᤐᤠ ᤕᤧ᤺ᤱᤄᤡ᤺ᤰᤂᤡ᤺ᤰᤔᤠ ᤐᤡᤵᤔᤠᤜᤠ᤹ᤖᤧ ᤁᤧᤔᤧ᤹ᤔᤠ ᤘᤖᤡᤰᤗᤡᤰᤔᤠ ᤏᤢᤛᤡ ᤐᤡᤵᤔᤠᤜᤠ᤹ ᤔᤧᤈᤔᤧᤍᤣᤛᤢᤛᤡ॥ ᤂᤧᤒᤩᤠᤱ ᤑᤠᤖᤥᤴ ᤛᤥᤖᤧ॥ 5 ᤂᤧᤴ ᤀᤣᤃᤠᤱ ᤂᤢᤏᤧ᤹ ᤕᤠᤶᤔᤥ ᤀᤡᤵᤛᤧᤗᤠᤛᤧ. ᤜᤧᤰᤁᤩᤠᤱ ᤘᤣ᤹ ᤛᤧᤵᤔᤠᤱᤎᤡᤰ ᤔᤠᤰᤋᤢ॥ ᤐᤏᤢ᤹ ᤁᤧᤏᤢ᤹ᤒᤠ ᤏᤢ ᤏᤢᤛᤡ ᤏᤢᤒᤠ ᤆᤠᤍᤠᤵᤔᤠᤜᤠ᤹ ᤗᤳᤇᤠ ᤁᤢᤒᤢᤱᤅᤥ ᤗᤡᤱᤛᤧᤀᤠᤱ ᤐᤳᤇᤧ॥ 6 ᤂᤧᤒᤩᤠᤱ ᤁᤢᤓᤡ᤹ ᤀᤡᤛ᤻ᤛᤣ᤺ᤱᤒᤠ ᤜᤧᤰᤁᤩᤠᤱ ᤏᤠᤶᤃᤧᤴ ᤐᤡᤛᤠᤱᤗᤠᤶ ᤁᤧᤒᤥ᤺ᤰᤐᤠ ᤛᤠᤶᤔᤡ᤺ᤳᤋᤡᤸᤗᤧ ᤔᤢ᤺ᤳᤋᤢᤀᤠᤱ ᤀᤡᤃᤧᤗᤧᤶᤒᤠ ᤘᤣ᤹ ᤏᤢᤛᤡ ᤆᤠᤍᤠᤵᤔᤠᤜᤠ᤹ ᤔᤧᤃᤧᤖᤧ॥ 7 ᤜᤧᤰᤁᤩᤠᤱ ᤂᤧᤴ ᤁᤢᤓᤡ᤹ ᤀᤡᤛ᤻ᤛᤣ᤺ᤱᤒᤠ ᤆᤠᤍᤠᤵᤔᤠᤜᤠ᤹ᤖᤧ ᤁᤢᤈᤠ᤹ᤀᤡ ᤏᤢᤛᤡ ᤏᤢᤒᤠ ᤆᤠᤍᤠᤵᤔᤠᤜᤠ᤹ ᤔᤧᤗᤖᤢ ᤔᤧᤍᤣᤛᤢᤛᤡ॥ ᤂᤧᤒᤩᤠᤱ ᤑᤠᤖᤥᤴ ᤛᤥᤖᤧ. ᤂᤧᤱᤃ ᤛᤧᤵᤔᤠᤱᤏᤡᤖᤧᤇ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥᤛᤢ॥ 8 ᤛᤥᤖᤧᤀᤠᤱ ᤋᤠᤏᤠᤶ ᤛᤠ᤹ᤖᤡᤰ ᤏᤡᤱᤛᤠᤱᤅᤥ ᤌᤩᤧ. ᤜᤧᤰᤁᤩᤠᤱ ᤔᤡᤛᤪ ᤗᤠᤈᤣ᤹ᤒᤠ ᤁᤧᤖᤧᤰ ᤁᤡᤳᤆᤠᤰᤜᤠ᤹ ᤏᤢ ᤂᤧ᤹ᤕᤥᤒᤠ ᤛᤡᤰᤁᤢᤶᤛᤠᤒᤠ ᤔᤏᤠᤜᤠ᤹ ᤂᤢᤏᤧ᤹ ᤀᤢ᤺ᤳᤋᤢᤛᤡ॥ ᤑᤠᤖᤥᤸᤗᤧ ᤂᤧᤱᤜᤠ᤹ ᤁᤢᤛᤧᤵᤔᤠᤱᤜᤠ᤹ ᤆᤧᤰᤋᤢᤛᤡ. ᤁᤖ ᤂᤧ᤹ᤕᤥ ᤂᤢᤏᤧ᤹ ᤁᤢᤛᤧᤵᤔᤠᤱᤅᤡᤸᤗᤧ ᤁᤢᤒᤣ ᤁᤧᤜᤶᤒᤠ ᤁᤧᤒᤡᤒᤠ ᤜᤠ᤺ᤳᤋᤠᤱ ᤔᤧᤜᤥ᤺ᤵᤋᤧ॥ 9 ᤂᤧᤒᤩᤠᤱ ᤂᤧᤴ ᤋᤢᤶ ᤌᤡ ᤁᤧᤍᤥᤶᤒᤠ ᤁᤧᤒᤡᤒᤠᤸᤗᤧ ᤑᤠᤖᤥᤴ ᤔᤧᤳᤋᤢ. “ᤀᤠᤱᤃᤠ᤹ ᤏᤡᤱᤘᤠ᤹ ᤔᤢ᤺ᤳᤇᤢᤱᤒᤠ ᤐᤠ᤺ᤴᤏᤡᤴ ᤀᤠᤀᤡᤴ ᤀᤠᤏᤡᤱᤘᤠ᤹ ᤛᤢᤶᤗ᤹ᤖᤧ॥ 10 ᤁᤢᤓᤠ ᤕᤧᤶ ᤋᤃᤡ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤜᤠ᤹ᤏᤢ ᤁᤧᤛᤡᤰ ᤐᤥᤃᤧᤀᤠᤱ ᤀᤠᤱᤃᤠ᤹ ᤏᤢ ᤋᤢᤶ ᤋ᤺ᤰ ᤁᤧᤎᤥ᤺ᤰᤐᤧᤴ ᤌᤰᤁᤶᤒᤪᤠᤱ ᤁᤧᤔᤧᤵᤐᤠ ᤌᤰᤐᤧᤒᤧᤸᤗᤧ ᤁᤢᤒᤢᤱᤗᤠᤜᤡᤶᤔᤥ ᤕᤠᤵᤔᤡ ᤁᤧᤕᤠᤰᤋᤧᤸᤗᤧ 11 ᤌᤡᤰᤛᤧᤴᤏᤥ ᤂᤢᤏᤧ᤹ ᤏᤢ ᤀᤠᤱᤃᤠ᤹ ᤀᤠᤒᤠᤅᤣ ᤁᤢᤒᤣ ᤜᤶᤔᤠ ᤁᤧᤒᤥᤱᤒᤠ ᤛᤧᤵᤔᤠᤱ ᤔᤠᤰᤋᤧᤇᤢᤃᤧ॥ 12 ᤂᤧ᤹ᤕᤥ ᤌᤰᤁᤶᤒᤪᤠᤱ ᤁᤧᤔᤧᤵᤐᤠ ᤌᤰᤐᤧᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤗᤳᤇᤠ ᤜᤡᤒᤪᤢ ᤌᤠᤱᤒᤧᤴᤎᤡᤰ ᤀᤠᤴᤇᤡᤃᤧᤏᤢ ᤘᤕᤧ. ᤜᤧᤰᤁᤩᤠᤱ ᤀᤠᤴᤇᤡᤃᤣ ᤏᤧᤵᤔᤠᤱᤗᤧ ᤛᤧᤵᤔᤠᤱᤅᤡᤴ ᤂᤧᤴ ᤆᤧᤰᤋᤧᤇᤢᤃᤧ. ᤜᤧᤰᤁᤩᤠᤱ ᤀᤠᤴᤇᤡᤃᤣ ᤏᤧᤵᤔᤠᤱᤗᤧᤴ ᤛᤧᤵᤔᤠᤱᤅᤡᤸᤗᤧ ᤀᤠᤒᤠᤅᤣ ᤘᤣ᤹ ᤘᤣ᤹ ᤁᤢᤒᤣ ᤜᤴᤍᤢ ᤐᤡᤖᤧᤳᤇᤡᤃᤧ॥ 13 ᤂᤧᤸᤗᤧ ᤀᤠᤰᤋᤱᤒᤠ ᤁᤢᤒᤣ ᤜᤴᤍᤢᤀᤠᤱ ᤘᤕᤧ. ᤜᤧᤰᤋᤱᤒᤠᤀᤣ ᤐᤥ᤺ᤰᤂᤧᤖᤥ॥ ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤕᤠ᤺ᤶᤒᤰᤁᤥ ᤕᤠᤶᤔᤥ ᤗᤠᤛᤠᤱ. ᤁᤖ ᤂᤧᤴ ᤋᤢᤶ ᤋ᤺ᤰ ᤁᤧᤎᤥ᤺ᤰᤐᤧᤴᤃ ᤔᤧᤓᤥ᤺ᤴᤍᤢᤖᤥ॥” 14 ᤂᤧᤸᤗᤧᤆᤥᤃᤢᤸᤗᤧ ᤑᤠᤖᤥᤸᤗᤧ ᤕᤢᤛᤢᤑᤧᤴ ᤁᤢᤀᤢ᤺ᤳᤇᤧ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤡᤔᤥ ᤐᤢᤱᤗᤠᤜᤡᤶᤔᤥᤗᤠᤶ ᤔᤧᤗ᤺ᤳᤋᤢ ᤔᤧᤓᤧᤳᤋᤢ॥ ᤂᤢᤏᤧ᤹ ᤁᤢᤶᤎᤥ᤹ ᤏᤢ ᤁᤢᤎᤧᤃᤣᤰ ᤏ᤺ᤰᤂᤢ. ᤜᤧᤰᤁᤩᤠᤱ ᤆᤠᤱ ᤗᤧᤰᤛᤡᤱᤅᤠᤱ ᤂᤢᤏᤧ᤹ ᤑᤠᤖᤥ᤺ᤸᤗᤥ ᤋᤩᤧ॥ 15 ᤑᤠᤖᤥᤸᤗᤧ ᤕᤢᤛᤢᤑᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤗᤳᤇᤠ ᤛᤧᤵᤔᤠᤱᤎᤡᤰ ᤔᤠᤰᤋᤢᤱ. ᤁᤖ ᤁ᤹ᤕᤥ ᤀᤠᤳᤋᤡᤸᤗᤧᤀᤠᤱ ᤂᤧᤸᤗᤧ ᤁᤢᤒᤣ ᤜᤶᤔᤠ ᤔᤧᤴᤇᤢᤰᤋᤢᤴ॥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤂᤧᤵᤛᤢᤱ. ᤂᤧᤏᤧ᤹ ᤛᤧᤵᤔᤠᤱ ᤁᤧᤄᤧᤵᤛᤢᤀᤠᤱ ᤂᤧᤸᤗᤧ ᤁᤢᤒᤣ ᤜᤶᤔᤠ ᤁᤧᤛᤢᤰᤋᤢᤔᤢ॥” 16 ᤕᤢᤛᤢᤑᤖᤧ ᤑᤠᤖᤥᤴ ᤔᤧᤳᤋᤢ. “ᤀᤰᤋᤱᤒᤠ ᤛᤠᤶᤈᤡ᤺ᤰᤁ ᤀᤠᤱᤃᤠ᤹ ᤔᤧᤃᤳᤋᤠᤴ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤧᤵᤔᤠᤱᤅᤡᤸᤗᤧ ᤁᤢᤒᤣ ᤁᤧᤜᤴ ᤁᤧᤒᤡ᤹᤺॥” 17 ᤂᤧᤒᤩᤠᤱ ᤑᤠᤖᤥᤸᤗᤧ ᤕᤢᤛᤢᤑᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤛᤧᤵᤔᤠᤱᤅᤥ ᤏᤡᤗ ᤕᤱᤄᤱᤅᤡᤸᤗᤧ ᤁᤢᤕᤠᤀᤥ ᤕᤧᤒᤠᤱᤈᤩᤠᤱᤒᤠ ᤔᤠᤰᤋᤢᤱ॥ 18 ᤏᤡᤗ ᤕᤱᤄᤱᤅᤥᤗᤠᤶ ᤛᤠ᤹ᤖᤡᤰ ᤘᤖᤡᤰᤗᤡᤰᤔᤠ ᤁᤧᤔᤧ᤹ᤔᤠ ᤏᤢᤛᤡ ᤐᤡᤵᤔᤠᤜᤠ᤹ ᤔᤧᤗ᤺ᤴᤍᤧ ᤔᤧᤎᤠᤅᤧ. ᤜᤧᤰᤁᤩᤠᤱ ᤑᤱᤍᤢᤱ ᤕᤠ᤺ᤴ ᤁᤧᤕᤢᤱᤒᤠ ᤋᤧᤴᤏᤥ ᤆᤠᤗᤠᤶᤔᤠ ᤔᤧᤜᤣ᤺ᤰᤋᤧ॥ 19 ᤂᤧᤴ ᤀᤣᤃᤠᤱ ᤕᤧᤵᤐᤠ ᤏᤢ ᤜᤥᤖᤡᤰᤗᤰ ᤁᤧᤒᤵᤐᤠ ᤏᤢᤛᤡ ᤕᤧ᤺ᤱᤄᤡ᤺ᤰᤂᤡ᤺ᤰᤔᤠ ᤐᤡᤵᤔᤠᤜᤠ᤹ᤖᤧ ᤋᤃᤡᤒᤠ ᤐᤡᤵᤔᤠᤜᤠ᤹ ᤔᤧᤍᤡᤶᤍᤢᤛᤡ ᤜᤧᤰᤋᤱᤒᤠ ᤐᤡᤵᤔᤠᤜᤠ᤹ ᤔᤡᤛᤪ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤔᤧᤴᤏᤡᤛᤡᤱᤅᤣ ᤘᤕᤠᤱ॥ 20 ᤂᤧᤴ ᤏᤢᤛᤡ ᤕᤧᤵᤐᤠ ᤏᤢ ᤜᤥᤖᤡᤰᤗᤰ ᤁᤧᤒᤵᤔᤠ ᤕᤧ᤺ᤱᤄᤡ᤺ᤰᤂᤡ᤺ᤰᤔᤠ ᤐᤡᤵᤔᤠᤜᤠ᤹ᤖᤧ ᤁᤧᤔᤧ᤹ᤔᤠ ᤘᤖᤡᤰᤗᤡᤰᤔᤠ ᤏᤢᤛᤡ ᤐᤡᤵᤔᤠᤜᤠ᤹ ᤔᤧᤈᤔᤧᤍᤣᤛᤢᤛᤡ॥ 21 ᤁᤖ ᤂᤧᤱᤜᤠ᤹ᤖᤧ ᤂᤧᤴ ᤏᤢᤛᤡ ᤐᤡᤳᤔᤠᤜᤠ᤹ ᤔᤧᤈᤔᤧᤍᤣᤛᤢᤛᤡᤛᤠᤱ ᤂᤧᤱᤜᤠ᤹ᤖᤧ ᤔᤧᤈᤛᤡ ᤑᤠ᤹ᤀᤠᤱ ᤜᤠ᤺ᤳᤗᤧᤀᤠᤱ ᤐᤠ᤺ᤵᤔᤠ ᤔᤧᤴᤇᤢᤰᤋᤢᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤀᤠᤸᤗᤛᤠᤱ ᤋᤃᤡᤒᤠ ᤜᤧᤰᤁᤣ ᤕᤧ᤺ᤱᤄᤡ᤺ᤰᤂᤡ᤺ᤰᤔᤠᤀᤣ ᤔᤧᤈᤥᤃᤧ॥ ᤂᤧᤒᤩᤠᤱ ᤀᤠᤱᤃᤠ᤹ ᤏᤡ᤺ᤳᤇᤡᤱᤅᤠᤱ ᤗ᤺ᤴᤍᤠᤱ॥ 22 “ᤀᤠᤱᤃᤠ᤹ ᤏᤡᤛᤡᤃᤣᤰᤐᤠ ᤀᤠᤛᤧᤵᤔᤠᤱᤅᤥ ᤁᤴᤏᤠᤱ ᤔᤠᤰᤋᤢᤱ—ᤗᤳᤇᤠ ᤁᤢᤒᤢᤱᤅᤥ ᤁᤢᤈᤠ᤹ ᤀᤡᤛ᤻ᤛᤣ᤺ᤱᤒᤠ ᤏᤢ ᤐᤏᤢ᤹ ᤁᤧᤏᤢ᤹ᤒᤠ ᤏᤢᤛᤡ ᤆᤠᤍᤠᤵᤔᤠᤜᤠ᤹ ᤗᤡᤱᤛᤧ॥ 23 ᤕᤠᤶᤔᤥ ᤁᤢᤓᤡ᤹ ᤀᤡᤛ᤻ᤛᤣ᤺ᤱᤒᤠ ᤜᤧᤰᤁᤩᤠᤱ ᤏᤠᤶᤃᤧᤴ ᤐᤡᤛᤠᤱᤗᤠᤶ ᤁᤧᤒᤥ᤺ᤰᤐᤠ ᤛᤠᤶᤔᤡ᤺ᤳᤋᤡᤸᤗᤧ ᤔᤢ᤺ᤳᤋᤢᤀᤠᤱ ᤀᤡᤃᤧᤗᤧᤶᤒᤠ ᤘᤣ᤹ ᤏᤢᤛᤡ ᤆᤠᤍᤠᤵᤔᤠᤜᤠ᤹ ᤔᤧᤃᤧᤖᤧ॥ 24 ᤂᤧᤴ ᤁᤢᤓᤡ᤹ ᤀᤡᤛ᤻ᤛᤣ᤺ᤱᤒᤠ ᤆᤠᤍᤠᤵᤔᤠᤜᤠ᤹ᤖᤧ ᤐᤏᤢ᤹ ᤁᤧᤏᤢ᤹ᤒᤠ ᤏᤢᤛᤡ ᤏᤢᤒᤠ ᤁᤢᤈᤠ᤹ᤀᤡ ᤆᤠᤍᤠᤵᤔᤠᤜᤠ᤹ ᤔᤧᤗᤖᤢ ᤔᤧᤍᤣᤛᤢᤛᤡ॥ ᤀᤠᤱᤃᤠ᤹ ᤁᤡᤳᤆᤠᤰᤜᤠ᤹ ᤁᤴ ᤛᤧᤵᤔᤠᤱᤜᤠ᤹ ᤆᤧᤰᤋᤢᤱᤛᤡᤱ ᤁᤖ ᤁᤸᤗᤧ ᤁᤢᤒᤣ ᤜᤠ᤺ᤳᤗᤧᤀᤠᤱ ᤔᤧᤴᤜᤴᤍᤠᤱᤅᤧᤴ ᤔᤧᤶᤒᤡᤖᤠᤱᤅᤧᤴ॥” 25 ᤂᤧᤒᤩᤠᤱ ᤕᤢᤛᤢᤑᤖᤧ ᤑᤠᤖᤥᤴ ᤔᤧᤳᤋᤢ. “ᤑᤠᤖᤥᤸᤗᤧ ᤁᤢᤛᤧᤵᤔᤠᤱᤜᤠ᤹ ᤗᤳᤇᤠᤛᤡᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥ᤺ᤰᤔᤠ ᤁᤥ᤺ᤳᤋᤢᤀᤠᤱ ᤁᤧᤘᤠ᤹ᤒᤠ ᤕᤠ᤺ᤶᤒᤰᤁᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤠᤖᤥᤴ ᤀᤥᤛᤣ᤺ᤴᤎᤠᤰᤋᤢᤒᤠᤖᤥ॥ 26 ᤂᤧᤴ ᤘᤖᤡᤰᤗᤡᤰᤔᤠ ᤁᤧᤔᤧ᤹ᤔᤠ ᤏᤢᤛᤡ ᤐᤡᤵᤔᤠᤜᤠ᤹ ᤏᤢᤛᤡ ᤋᤱᤒᤣ ᤜᤧᤰᤁᤩᤠᤱ ᤁᤢᤈᤠ᤹ᤀᤡ ᤏᤢᤛᤡ ᤏᤢᤒᤠ ᤆᤠᤍᤠᤵᤔᤠᤜᤠ᤹ ᤏᤢᤛᤡ ᤋᤱᤒᤣᤛᤡᤖᤥ॥ ᤛᤧᤵᤔᤠᤱᤅᤡᤴ ᤗᤳᤇᤠᤖᤥ॥ 27 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤣᤃᤠᤱ ᤁᤧᤍᤠᤒᤠ ᤏᤢᤛᤡ ᤕᤧᤵᤐᤠ ᤏᤢ ᤜᤥᤖᤡᤰᤗᤰ ᤁᤧᤒᤵᤔᤠ ᤕᤧ᤺ᤱᤄᤡ᤺ᤰᤂᤡ᤺ᤰᤔᤠ ᤐᤡᤵᤔᤠᤜᤠ᤹ ᤛᤠᤰᤘᤠᤸᤗᤧᤴ ᤏᤢᤛᤡ ᤋᤱᤒᤣᤖᤥ॥ ᤜᤧᤰᤁᤩᤠᤱ ᤁᤢᤓᤡ᤹ ᤀᤡᤛ᤻ᤛᤣ᤺ᤱᤒᤠ ᤜᤧᤰᤁᤩᤠᤱ ᤏᤠᤶᤃᤧᤴ ᤐᤡᤛᤠᤱᤗᤠᤶ ᤁᤧᤒᤥ᤺ᤰᤐᤠ ᤛᤠᤶᤔᤡ᤺ᤳᤋᤡᤸᤗᤧ ᤔᤢ᤺ᤳᤋᤢᤒᤠ ᤏᤢᤛᤡ ᤆᤠᤍᤠᤵᤔᤠᤜᤠ᤹ᤀᤠᤱ ᤛᤠᤰᤘᤠᤸᤗᤧᤴ ᤏᤢᤛᤡ ᤋᤱᤒᤣᤖᤥ॥ 28 “ᤁᤱᤃ ᤀᤠᤱᤃᤠ᤹ ᤂᤧᤏᤧ᤹ ᤔᤧᤳᤏᤧᤒᤠ ᤜᤧᤰᤍᤱᤒᤠᤖᤥ—ᤆᤥ᤺ᤰᤔᤠ ᤁᤥ᤺ᤳᤋᤢᤀᤠᤱ ᤁᤧᤘᤠ᤹ᤒᤠ ᤕᤠ᤺ᤶᤒᤰᤁᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤠᤖᤥᤴ ᤀᤥᤛᤣ᤺ᤴᤎᤠᤰᤋᤢᤒᤠᤖᤥ॥ 29 ᤁᤧᤖᤧᤰ ᤔᤡᤛᤪ ᤗᤠᤈᤣ᤹ᤀᤥ ᤋᤱᤒᤣ ᤏᤢᤛᤡ ᤌᤠᤖᤡᤰ ᤐᤥᤃᤢᤃᤧᤴ ᤁᤢᤈᤠ ᤏᤢᤖᤡᤰ ᤌᤥᤰ. 30 ᤁᤖ ᤂᤧᤴ ᤀᤣᤃᤠᤱ ᤛᤠᤰᤁᤡᤸᤗᤧᤴ ᤏᤢᤛᤡ ᤋᤱᤒᤣ ᤋᤠ᤹᤺. ᤜᤧᤰᤁᤩᤠᤱ ᤁᤧᤖᤧᤰ ᤔᤡᤛᤪ ᤗᤠᤈᤣ᤹ᤀᤥ ᤂᤧᤴ ᤐᤥᤃᤢᤃᤧᤴ ᤁᤢᤈᤠ ᤁᤧᤏᤢ᤹ᤒᤠ ᤋᤱᤒᤣ᤺ᤸᤗᤧ ᤕᤧᤶᤔᤡᤴ ᤏᤡᤱᤘᤠ᤹ ᤔᤢ᤺ᤴᤗᤥ॥ ᤜᤧᤰᤁᤩᤠᤱ ᤛᤠᤰ ᤐᤥ᤺ᤰᤁᤠᤱ ᤗᤠᤈᤣᤴ ᤌᤩ᤺ᤱ ᤐᤥᤱᤗᤥ॥ 31 ᤀᤣᤃᤠᤱ ᤁᤧᤍᤠᤒᤠ ᤛᤠᤰᤁᤡᤸᤗᤧ ᤆᤥᤃᤢᤸᤗᤧ ᤗᤠᤈᤣ᤹ᤀᤥ ᤐᤥᤃᤢᤃᤧᤴ ᤁᤢᤈᤠ ᤐᤥᤃᤧᤒᤠᤴ ᤏᤡᤱᤘᤠ᤹ᤛᤢᤶ ᤔᤧᤍᤠᤏᤧᤸᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤛᤠᤰᤁᤡᤴ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤐᤥᤱᤗᤥ॥ 32 ᤑᤠᤖᤥᤸᤗᤧ ᤏᤡᤗᤧᤱ ᤔᤠᤰᤋᤢᤒᤠ ᤁᤴ ᤛᤧᤵᤔᤠᤱᤅᤡᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤒᤠᤴ ᤋᤃᤡ ᤏᤡᤱᤛᤣᤰ ᤆᤥᤃᤢᤛᤢᤖᤢᤀᤠᤱ ᤘᤠ᤹ ᤁᤧᤗ᤹ᤒᤠ ᤀᤥᤛᤣ᤺ᤴᤎᤠᤱ ᤆᤥᤃᤢ᤹. ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤖᤠᤀᤣ ᤆᤥᤃᤢᤖᤥ॥ 33 “ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤑᤠᤖᤥᤸᤗᤧ ᤗᤳᤇᤠ ᤆᤠ᤺ᤵᤐᤠ ᤏᤢ ᤛᤡᤰᤁᤢᤶᤛᤠᤒᤠ ᤔᤏᤠᤎᤡᤰ ᤛᤣᤃᤧ᤹ᤀᤠᤱ ᤔᤡᤛᤪ ᤗᤠᤈᤣ᤹ᤀᤥ ᤁᤧᤖᤧᤰ ᤕᤢᤰ ᤆᤥᤃᤢᤖ ᤑᤠ᤹ᤀᤠᤱ ᤔᤢᤖᤠ ᤔᤧᤳᤋᤢᤖ॥ 34 ᤐᤥᤃᤢᤃᤧᤴ ᤁᤢᤈᤠ ᤁᤧᤒᤵᤐᤠ ᤏᤢᤛᤡ ᤋᤱᤒᤣ ᤌᤠᤖᤡᤰ ᤔᤡᤛᤪᤀᤥ ᤁᤧᤒᤥ᤺ᤰᤐᤠ ᤁᤢᤈᤠ᤺ᤸᤗᤧ ᤁᤢᤗᤰ ᤅᤠᤛᤡᤴ ᤑᤥᤱᤔᤠᤖᤧ ᤗᤠᤃᤡ ᤗᤠᤈᤣ᤹ᤀᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤔᤢᤖᤠ ᤔᤧᤔᤧᤳᤋᤢᤛᤡᤖ॥ 35 ᤂᤧᤱᤜᤠ᤹ᤖᤧ ᤁᤧᤍᤠᤒᤠ ᤐᤥᤃᤢᤃᤧᤴ ᤁᤢᤈᤠ ᤁᤧᤒᤵᤐᤠ ᤋᤱᤒᤣᤜᤠ᤹ᤀᤥ ᤁᤧᤖᤧᤰ ᤁᤢᤈᤠᤜᤠ᤹ ᤔᤧᤓᤥ᤺ᤰᤛᤢᤖ. ᤜᤧᤰᤁᤩᤠᤱ ᤕᤧᤰᤕᤰ ᤌᤵᤔᤣ ᤆᤠᤔᤠᤖᤧ ᤗᤠᤃᤡ ᤑᤠᤖᤥᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤆᤠᤜᤠ᤹ ᤔᤧᤗᤢᤵᤛᤢᤖ ᤜᤧᤰᤁᤩᤠᤱ ᤂᤧᤴ ᤔᤧᤃᤥᤛᤢᤖ॥ 36 “ᤛᤠᤰᤁᤡᤸᤗᤧ ᤗᤠᤈᤣᤴ ᤔᤧᤔᤧᤰᤏᤧᤸᤗ ᤑᤠ᤹ᤀᤠᤱ ᤔᤡᤛᤪ ᤗᤠᤈᤣ᤹ᤀᤥ ᤁᤧᤍᤠᤒᤠ ᤁᤧᤏᤧᤵᤐᤠ ᤏᤢᤛᤡ ᤋᤱᤒᤣᤒᤠ ᤛᤠᤰᤁᤥ ᤆᤠᤔᤠ ᤑᤠ᤹ᤀᤠᤱ ᤗᤠᤈᤣ᤺ᤸᤗᤧ ᤗᤠᤃᤡ ᤆᤠᤜᤠ᤹ ᤛᤢᤶᤔᤠ ᤕᤢᤱᤔᤠ ᤐᤥᤱ ᤜᤧᤰᤁᤣᤗ᤹ᤖᤡᤰ ᤔᤡᤛᤪ ᤗᤠᤈᤣᤴ ᤛᤠᤰᤁᤡᤸᤗᤧ ᤔᤧᤔᤧᤰᤏᤧᤸᤗ॥” ᤕᤢᤛᤢᤑᤧᤴ ᤔᤡᤛᤪᤒᤠ ᤛᤢᤜᤠᤱᤕᤢᤰᤐᤠ ᤐᤥᤱ᤹ 37 ᤁᤴ ᤛᤢᤈᤠᤴ ᤑᤠᤖᤥᤴ ᤏᤢ ᤁᤢᤛᤢᤜᤠᤱᤃᤧᤶᤒᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤛᤡᤖᤠ᤹ᤌᤠᤅᤧ॥ 38 ᤜᤧᤰᤁᤩᤠᤱ ᤑᤠᤖᤥᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤏᤠᤴ ᤜᤧᤰᤋᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶ ᤁᤧᤃᤵᤐᤠ ᤘᤣ᤹ ᤔᤏᤠ ᤀᤠᤏᤡ᤹ ᤜᤠᤳ ᤂᤥᤔᤠ ᤀᤠᤛᤢᤰᤋᤢᤶᤒᤣ᥅” 39 ᤂᤧᤒᤩᤠᤱ ᤑᤠᤖᤥᤸᤗᤧ ᤕᤢᤛᤢᤑᤧᤴ ᤔᤧᤳᤋᤢ. “ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤥᤛᤣ᤺ᤴᤃᤧᤎᤠᤰᤋᤧᤀᤠᤱ ᤘᤠ᤹. ᤂᤧᤏᤧ᤹ ᤜᤧᤰᤋᤱᤒᤠ ᤆᤠ᤺ᤵᤐᤠ ᤏᤢ ᤛᤡᤰᤁᤢᤶᤛᤠᤒᤠ ᤔᤏᤠ ᤘᤣ᤹ ᤜᤠ᤺ᤳᤋᤠᤱ ᤜᤥᤵᤗᤥ॥ 40 ᤀᤠᤱᤃᤠ᤹ ᤀᤠᤜᤡᤶᤔᤥ ᤂᤧᤏᤧ᤹ᤀᤣ ᤕᤢᤰ ᤆᤥᤃᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣ ᤁᤧᤖᤧᤰ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤔᤧᤈᤥᤃᤢᤖᤥ॥ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥᤖᤰ ᤀᤠᤱᤃᤠ᤹ ᤂᤧᤏᤧ᤹ᤏᤢ᤺ᤸᤗᤧ ᤌᤥ ᤘᤠ᤹ᤀᤠ॥” ᤔᤡᤛᤪᤀᤥ ᤕᤥᤛᤣᤑᤖᤧ ᤕᤢᤰ ᤆᤥᤃᤢ 41 ᤜᤧᤰᤁᤩᤠᤱ ᤑᤠᤖᤥᤸᤗᤧ ᤕᤢᤛᤢᤑᤧᤴ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤔᤡᤛᤪ ᤗᤠᤈᤣ᤹ᤒᤠ ᤁᤧᤖᤧᤰ ᤕᤢᤰᤁᤡᤴ ᤂᤧᤏᤧ᤹ ᤐᤡᤏᤧᤀᤠᤱ ᤘᤠ᤹॥” 42 ᤂᤧᤒᤩᤠᤱ ᤑᤠᤖᤥᤸᤗᤧ ᤁᤢᤀᤣ᤺ᤵᤛᤠᤵ ᤛᤫᤠᤃᤣ᤺ᤵᤐᤡᤴ ᤁᤢᤜᤢᤰᤆᤥ᤺ᤳᤗᤥᤗᤠᤶ ᤑᤡ᤺ᤰᤂᤢᤀᤠᤱ ᤕᤢᤛᤢᤑᤖᤧ ᤁᤢᤜᤢᤰᤆᤥ᤺ᤳᤗᤥ ᤘᤠ᤺ᤳᤋᤢ. ᤜᤧᤰᤁᤩᤠᤱ ᤂᤧᤴ ᤐᤠᤖᤠᤴᤗᤠ ᤆᤠᤱᤅᤡᤴ ᤆᤠᤰᤋᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤡᤳᤗᤠᤀᤥ ᤛᤠᤶᤔᤩᤠᤱ ᤛᤡᤁᤪᤡ᤺ᤴ ᤘᤠ᤺ᤳᤋᤢ॥ 43 ᤂᤧᤴ ᤑᤠᤖᤥᤸᤗᤧ ᤀᤠᤒᤠᤅᤣ ᤁᤢᤛᤡ᤺ᤰᤋᤥᤒᤠ ᤏᤡᤛᤡᤃᤣᤰᤐᤠ ᤋᤠᤰᤑᤠᤀᤥᤒᤠ ᤛᤢᤜᤠᤱᤕᤢᤰᤐᤠ ᤜᤧᤰᤁᤣ ᤀᤴᤗᤠᤎᤠᤀᤥ ᤕᤢᤰᤂᤢᤀᤠᤱ ᤗᤠᤱᤄᤣ᤺ᤰᤛᤢ॥ ᤔᤏᤠᤜᤠ᤹ ᤂᤢᤏᤧ᤹ ᤁᤢᤍᤃᤡ “ᤌᤢᤶᤒᤥ᤹ᤜᤈ᤹ ᤕᤢᤅᤧᤶᤔᤧ᤹ᤀᤠᤱ ᤛᤠᤶᤒᤥᤴ ᤑᤴᤇᤡᤱᤅᤧᤶᤔᤧ᤹” ᤔᤧᤒᤠ᤺ᤳᤋᤢᤖ ᤔᤧᤀ᤺ᤰᤋᤧᤖ ᤗᤠᤱᤔᤧᤄᤣᤃᤧ॥ ᤀᤰᤂᤣᤗ᤹ᤖᤡᤰ ᤔᤡᤛᤪ ᤗᤠᤈᤣ᤹ᤀᤥ ᤁᤧᤖᤧᤰ ᤕᤢᤰᤁᤡᤴ ᤂᤢᤏᤧ᤹ ᤐᤡᤖᤢ॥ 44 ᤑᤠᤖᤥᤸᤗᤧ ᤕᤠᤶᤔᤥᤀᤠᤱ ᤕᤢᤛᤢᤑᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤑᤠᤖᤥᤀᤠ. ᤁᤖ ᤀᤠᤱᤃᤠ᤹ ᤁᤴ ᤐᤠ᤺ᤳᤋᤢᤱ ᤂᤧᤏᤧ᤹ ᤁᤧᤏᤡᤱᤘᤠ᤹ ᤀᤡᤛᤡ᤺ᤰᤁᤠᤱᤎᤥ ᤘᤣ᤹ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤔᤡᤛᤪ ᤗᤠᤈᤣ᤹ᤀᤥ ᤌᤣᤀᤠᤱ ᤆᤥ᤺ᤰᤔᤠ ᤔᤧᤄᤥᤛᤢᤸᤗᤥ॥” 45 ᤑᤠᤖᤥᤸᤗᤧ ᤕᤢᤛᤢᤑᤖᤧ ᤁᤢᤔᤡᤱ ᤛᤠᤐᤏᤋ-ᤐᤠᤏᤣᤜ ᤕᤢᤰᤂᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤀᤥᤏᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥᤋᤡᤐᤣᤖᤠ᤺ᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤀᤠᤛᤏᤋᤧᤴᤏᤢ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤳᤋᤢ॥ ᤂᤧᤴ ᤀᤣᤃᤠᤱ ᤕᤢᤛᤢᤑᤧᤴ ᤔᤡᤛᤪ ᤗᤠᤈᤣ᤹ ᤂᤠᤖᤠᤰ ᤗᤠᤶᤍᤡᤰ ᤆᤥ᤺ᤰᤔᤠ ᤜᤣ᤺ᤰᤋᤧ॥ 46 ᤔᤡᤛᤪᤒᤠ ᤜᤠᤱ ᤑᤠᤖᤥᤸᤗᤧ ᤁᤢᤜᤠᤱ ᤕᤠ᤺ᤶᤒᤰᤁᤥ ᤛᤣᤃᤧᤸᤗᤧ ᤕᤢᤛᤢᤑᤧᤴ ᤋᤱᤒᤣ ᤛᤢᤶᤒᤥᤱ ᤁᤧᤖᤧᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤕᤢᤛᤢᤑᤧᤴ ᤑᤠᤖᤥᤸᤗᤧ ᤁᤢᤍᤃᤠᤱᤗᤠᤶ ᤗ᤺ᤴᤍᤧᤀᤠᤱ ᤔᤡᤛᤪ ᤗᤠᤈᤣ᤹ ᤂᤠᤖᤠᤰ ᤋᤠᤰᤁᤴᤍᤧ॥ 47 ᤁᤢᤈᤠ ᤁᤧᤒᤵᤐᤠ ᤏᤢᤛᤡ ᤋᤱᤒᤣᤜᤠ᤹ᤀᤥ ᤀᤠᤳᤋᤠᤋᤠᤴᤏᤣ ᤆᤠ ᤏᤢᤖᤧ॥ 48 ᤕᤢᤛᤢᤑᤖᤧ ᤁᤢᤈᤠ ᤁᤧᤒᤵᤐᤠ ᤏᤢᤛᤡ ᤋᤱᤒᤣ ᤌᤠᤖᤡᤰ ᤔᤡᤛᤪᤒᤠ ᤁᤧᤖᤧᤰ ᤆᤠᤜᤠ᤹ ᤛᤢᤵᤛᤢ. ᤜᤧᤰᤁᤩᤠᤱ ᤕᤧᤰᤕᤰ ᤌᤵᤔᤣ ᤆᤠᤜᤠ᤹ ᤑᤢᤰᤂᤢᤕᤢᤰᤂᤢ॥ ᤂᤢᤏᤧ᤹ ᤁᤧᤖᤧᤰ ᤕᤧᤰᤕᤰᤁᤥ ᤂᤡᤖᤡᤒᤠ ᤐᤩᤠᤱᤛᤡᤀᤥᤒᤠ ᤆᤠᤜᤠ᤹ ᤛᤢᤵᤛᤢᤕᤢᤰᤂᤢ॥ 49 ᤕᤢᤛᤢᤑᤖᤧ ᤘᤖ᤺ᤱᤅᤥᤒᤠ ᤕᤧ᤺ᤱᤄᤠ ᤕᤠᤖᤡᤰ ᤆᤠ ᤛᤢᤵᤛᤢᤕᤢᤰᤂᤢ. ᤂᤧᤴ ᤕᤖᤡᤰ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤂᤧᤴ ᤂᤠᤖᤠᤳ ᤛᤠᤵᤔᤠ ᤕᤢᤱᤔᤠᤀᤠᤱ ᤗᤧᤖᤢᤍᤣᤛᤢ॥ 50 ᤛᤠᤰᤁᤧᤸᤗᤧ ᤋᤱᤒᤣᤜᤠ᤹ ᤋᤠᤔᤠᤏᤢ᤺ᤸᤗᤧ ᤋᤃᤡ ᤀᤥᤏᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤀᤠᤛᤏᤋᤗᤠᤶᤒᤠ ᤕᤢᤛᤢᤑᤖᤧ ᤏᤧᤵᤑᤢ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤘᤕᤧᤛᤡ॥ 51 ᤋᤢᤶᤒᤧᤸᤗᤧ ᤁᤢᤔᤡᤱ ᤕᤢᤛᤢᤑᤖᤧ ᤔᤏᤛ᤻ᤛᤣ ᤘᤠ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤍᤢᤰᤂᤣᤜᤠ᤹ ᤏᤢ ᤀᤠᤶᤒᤠᤖᤧ ᤁᤢᤜᤡᤶᤔᤡᤸᤗᤧ ᤏᤡᤱᤘᤠᤛᤢᤶᤔᤡᤴ ᤏᤡᤱᤘᤠ᤹ ᤔᤢ᤺ᤳᤇᤢᤱᤗ ᤕᤠ᤺ᤴᤍᤠᤱᤅᤠᤱ ᤘᤠ᤹॥” 52 ᤘᤣ᤹ᤛᤔᤠᤸᤗᤧ ᤁᤢᤔᤡᤱ ᤂᤢᤏᤧ᤹ ᤀᤣᤑᤪᤠᤀᤡᤔ ᤘᤠ᤺ᤳᤋᤢ ᤜᤧᤰᤁᤩᤠᤱ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤋᤢᤰᤂᤣ ᤆᤩᤠᤱᤒᤠ ᤗᤠᤈᤣ᤹ᤀᤥ ᤏᤢ᤹ᤔᤠ ᤋᤠᤔᤠᤴ ᤐᤡᤖᤠᤱᤅᤠᤱ ᤘᤠ᤹॥” 53 ᤔᤡᤛᤪᤒᤠ ᤆᤠ ᤏᤢ᤹ᤔᤠ ᤏᤢᤛᤡ ᤋᤱᤒᤣᤜᤠ᤹ ᤗᤧᤰᤋᤧ॥ 54 ᤂᤧᤒᤩᤠᤱ ᤕᤢᤛᤢᤑᤖᤧ ᤐᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤛᤠᤰᤁᤧᤸᤗᤧᤴ ᤏᤢᤛᤡ ᤋᤱᤒᤣᤜᤠ᤹ ᤋᤠᤔᤠ ᤜᤣ᤺ᤰᤋᤧ॥ ᤁᤧᤖᤧᤰ ᤗᤠᤈᤣ᤹ᤜᤠ᤹ᤀᤥ ᤛᤠᤰᤘᤠᤴ ᤐᤥᤃᤧ. ᤁᤖ ᤔᤡᤛᤪ ᤂᤠᤖᤠᤰ ᤆᤠ ᤘᤕᤧ॥ 55 ᤁᤧᤖᤧᤰ ᤔᤡᤛᤪᤀᤥ ᤛᤠᤰᤁᤧᤴ ᤋᤩᤧ᤺ᤸᤗᤧ. ᤕᤰᤕᤢᤱᤒᤠᤜᤠ᤹ᤖᤧ ᤑᤠᤖᤥᤴ ᤆᤠᤖᤧ ᤗᤠᤃᤡ ᤐᤣᤗᤡ ᤔᤧᤓᤠᤰᤋᤢ॥ ᤑᤠᤖᤥᤸᤗᤧ ᤁᤧᤖᤧᤰ ᤔᤡᤛᤪᤡᤜᤠ᤹ ᤔᤧᤳᤋᤢᤛᤡ. “ᤕᤢᤛᤢᤑᤖᤧᤀᤥ ᤐᤣᤃᤧᤶᤔᤧ᤹. ᤂᤢᤏᤧ᤹ ᤌᤣ ᤆᤥ᤺ᤰᤔᤠ ᤁᤧᤒᤠᤱᤄᤡ᤹ ᤂᤧᤴᤏᤣ ᤆᤥᤃᤠᤶᤔᤧ᤹॥” 56 ᤁᤧᤖᤧᤰ ᤗᤠᤈᤣ᤹ ᤂᤠᤖᤠᤰ ᤛᤠᤰᤁᤧᤴ ᤋᤩᤧ᤺ᤸᤗᤧ. ᤕᤢᤛᤢᤑᤖᤧ ᤁᤧᤖᤧᤰ ᤆᤠᤕᤢᤱᤔᤠ ᤋᤧᤴᤜᤠ᤹ ᤜᤴᤍᤢᤀᤠᤱ ᤔᤡᤛᤪᤒᤠ ᤔᤏᤠᤜᤠ᤹ᤀᤥ ᤆᤠ ᤛᤱᤔᤠ ᤜᤣ᤺ᤰᤋᤢ. ᤌᤣᤀᤠᤱᤓᤧᤸᤗᤧ ᤔᤡᤛᤪ ᤂᤠᤖᤠᤰ ᤁᤧᤛᤠᤰᤐᤠ ᤛᤠᤰ ᤐᤥᤃᤧᤀᤠᤱ ᤘᤕᤧ॥ 57 ᤂᤧᤸᤗᤧᤆᤥᤃᤢᤸᤗᤧ ᤁᤧᤖᤧᤰ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ ᤔᤡᤛᤪᤀᤥ ᤕᤢᤛᤢᤑᤖᤥ ᤆᤠ ᤀᤡᤱᤛᤧ ᤔᤧᤍᤩᤧ॥ ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤂᤠᤖᤠᤰ ᤛᤠ᤹ᤖᤡᤰ ᤕᤶᤒᤠ ᤛᤠᤰ ᤐᤥᤃᤧᤀᤠᤱ ᤘᤕᤧ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.