ᤋᤥᤗᤡᤱᤛᤥᤔᤢ 4 - LIFOTNTᤁᤕᤡᤏ ᤏᤢ ᤜᤠᤒᤡᤗ 1 ᤀᤠᤍᤶᤔᤧᤴ ᤔᤧᤸᤗᤡᤱᤃᤧᤴ ᤁᤢᤔᤣᤳ ᤜᤒ᤻ᤒᤠ᤺ᤴᤏᤢ ᤀᤡᤵᤛᤧ. ᤜᤧᤰᤁᤩᤠᤱ ᤁᤢᤔᤣ᤺ᤳᤋᤧᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧ ᤂᤧᤒᤩᤠᤱ ᤁᤕᤡᤏᤧᤴ ᤛᤠᤘᤠ᤺ᤴᤍᤢ॥ ᤜᤧᤰᤁᤩᤠᤱ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤑᤠ᤹ᤖᤠᤱᤅᤠᤱ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢᤱ॥” 2 ᤕᤠᤱᤛᤡ ᤂᤧᤸᤗᤧ ᤁᤕᤡᤏᤧᤸᤗᤧ ᤁᤢᤴᤛᤠ᤹ ᤜᤠᤒᤡᤸᤗᤧᤴ ᤁᤳᤋᤢ॥ ᤜᤠᤒᤡᤸᤗᤧᤴ ᤔᤧᤸᤗᤢᤰ ᤆᤠᤃᤧᤖᤠᤶᤒᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤁᤕᤡᤏᤧᤴ ᤂᤠᤶᤒᤣ᤺ᤰᤔᤥ ᤕᤠ᤺ᤴᤃᤧᤔᤒᤠ ᤁᤧᤈᤠᤒᤠ ᤐᤥ᤺ᤰᤂᤧ॥ 3 ᤁᤢᤓᤠ ᤕᤧᤶ ᤗᤧᤰᤋᤧᤀᤠᤱ ᤀᤣᤃᤠᤱ ᤁᤕᤡᤏᤧᤸᤗᤧ ᤕᤥ᤹ᤒᤠ᤺ᤸᤗᤧ ᤑᤳᤇᤢᤒᤠ ᤁᤢᤓᤠ ᤐᤥᤃᤢᤃᤧᤴ ᤁᤢᤈᤠᤈᤡ᤹ ᤆᤥᤓᤠ ᤜᤧᤰᤁᤣ ᤕᤜᤘᤣ ᤍᤠᤱᤒᤠᤀᤥ ᤋᤠᤖᤢ॥ 4 ᤜᤧᤰᤁᤩᤠᤱ ᤜᤠᤒᤡᤗᤖᤧ ᤁᤢᤔᤧᤸᤗᤢᤰ ᤗᤢᤵᤐᤥᤗᤠᤶ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤁᤧᤎᤠᤵᤐᤠ ᤔᤧᤸᤗᤢᤰᤛᤠ᤺ᤳᤋᤡᤸᤗᤧ ᤁᤢᤛᤥ᤺ᤳᤋᤣ ᤁᤢᤛᤥᤳ ᤁᤧᤒᤵᤐᤠ ᤛᤠᤴ ᤋᤠᤖᤢ॥ ᤕᤜᤘᤣ ᤍᤠᤱᤒᤠᤸᤗᤧ ᤜᤠᤒᤡᤸᤗᤧᤴ ᤏᤢ ᤂᤢᤏᤧ᤹ ᤋᤥ᤺ᤴᤍᤢᤒᤠ ᤆᤥᤓᤠᤴ ᤋᤠ᤺ᤰᤋᤢ. 5 ᤁᤖ ᤁᤕᤡᤴᤏᤧᤴ ᤏᤢ ᤂᤧᤸᤗᤧ ᤋᤥ᤺ᤴᤍᤢᤒᤠ ᤆᤥᤓᤠᤴ ᤔᤧᤍᤠ᤺ᤰᤋᤢᤴ॥ ᤂᤧᤸᤗᤧᤆᤥᤃᤢᤸᤗᤧ ᤁᤕᤡᤴᤏᤧᤴ ᤆᤠ᤹ᤖᤡᤰ ᤁᤢᤕᤠ᤺ᤰᤗᤧ᤹ᤖᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤏᤠᤔᤠᤰᤋᤧ॥ 6 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤕᤡᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤌᤣᤀᤠᤱ ᤁᤧᤕᤠ᤺ᤰᤗᤧ᤹ᤒᤠᤒᤣ᥅ ᤌᤣᤀᤠᤱ ᤁᤧᤏᤠᤖᤠᤴ ᤔᤠᤰ ᤗ᤹ᤒᤠᤒᤣ᥅ 7 ᤂᤧᤏᤧ᤹ ᤏᤢᤒᤠ ᤁᤧᤈᤥᤃᤢᤸᤗᤧ ᤌᤣ ᤂᤧᤏᤧ᤹ᤀᤠᤱ ᤋᤠ᤺ᤰᤔᤠ ᤁᤧᤗᤠ᤹ᤒᤠ ᤁᤧᤶᤒᤥᤱᤏᤧᤶᤒᤡ᥅ ᤁᤖ ᤂᤧᤏᤧ᤹ ᤏᤢᤒᤠ ᤕᤠ᤺ᤶᤒᤰ ᤁᤧᤴᤈᤥᤃᤢᤴᤏᤧᤓᤃᤪ ᤗᤠᤕᤥᤸᤗᤧ ᤁᤧᤗᤠᤶᤎᤣ᤺ᤵᤐᤢᤱᤅᤥ ᤁᤧᤛᤢᤰᤁᤠᤱ ᤕᤢᤱᤗᤥ॥ ᤂᤧᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤂᤧᤏᤧ᤹ ᤗᤧᤵᤔᤠᤱ ᤐᤳ ᤁᤖ ᤂᤧᤏᤧ᤹ ᤂᤧᤴ ᤁᤧᤕᤢᤰᤋᤢᤖᤀᤣ ᤐᤥᤱ॥” 8 ᤁᤕᤡᤏᤧᤸᤗᤧ ᤁᤢᤴᤛᤠ᤹ ᤜᤠᤒᤡᤸᤗᤧᤴ ᤔᤧᤳᤋᤢ. “ᤑᤧᤖᤧ᤹ ᤀᤠᤴᤇᤡ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤐᤡᤳᤇᤡ॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤘᤕᤧᤛᤡᤸᤗᤧ ᤁᤕᤡᤴᤏᤧᤸᤗᤧ ᤁᤢᤴᤛᤠ᤹ ᤜᤠᤒᤡᤸᤗᤧᤴ ᤜᤡᤵᤋᤢᤀᤠᤱ ᤛᤧᤖᤢ॥ 9 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤕᤡᤴᤏᤧᤴ ᤛᤣ᤺ᤴᤍᤥᤛᤢ. “ᤁᤧᤴᤛᤠ᤹ ᤜᤠᤒᤡᤸᤗᤧᤴ ᤀᤠᤳᤋᤥ ᤘᤠ᤹᥅” ᤂᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤔᤧᤏᤡᤀᤠᤴ॥ ᤀᤠᤱᤃᤠ᤹ ᤀᤠᤴᤛᤠ᤹ ᤀᤥᤃᤧᤔᤧᤵᤐᤠᤀᤠᤒᤡ᥅” 10 ᤕᤜᤘᤣ ᤍᤠᤱᤒᤠᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤌᤣ ᤁᤧᤈᤥᤃᤢᤒᤠᤒᤣ᥄ ᤁᤧᤴᤛᤠ᤹ᤖᤧ ᤁᤢᤔᤠᤰᤂᤡᤸᤗᤧ ᤂᤠᤶᤒᤣ᤺ᤰᤔᤥᤗᤠᤶ ᤀᤠᤱᤃᤠ᤹ ᤋᤢᤘᤠ ᤆᤥ᤺ᤰᤁᤠᤖ ᤕᤠᤰ॥ 11 ᤜᤧᤰᤁᤩᤠᤱ ᤀᤠᤸᤗ ᤂᤧᤏᤧ᤹ ᤛᤠᤰᤔᤢᤖᤠ ᤁᤧᤎᤩᤧᤀᤠᤱ ᤂᤠᤶᤒᤣ᤺ᤰᤔᤥᤗᤠᤶᤒᤠ ᤁᤧᤶᤏᤠ᤺ᤳᤋᤧᤀᤠᤱ ᤁᤧᤘᤠ᤹. ᤌᤣᤀᤠᤱᤓᤧᤸᤗᤧ ᤂᤠᤶᤒᤣ᤺ᤰᤔᤠᤸᤗᤧ ᤁᤧᤴᤛᤠ᤹ᤖᤧ ᤁᤢᤔᤠᤰᤂᤡᤴ ᤁᤧᤜᤢᤰᤁᤥᤗᤠᤶᤒᤠ ᤋᤠ᤺ᤰᤔᤠᤖᤧ ᤗᤠᤃᤡ ᤂᤧᤸᤗᤧ ᤁᤢᤔᤢᤖᤠᤴ ᤜᤴᤍᤢᤀᤠᤱᤘᤠ᤹ᤖᤥ॥ 12 ᤂᤧᤏᤧ᤹ ᤀᤡᤰᤋᤠᤵᤐᤥ ᤕᤠᤁᤧᤔ᤺ᤸᤗᤧ ᤂᤧᤸᤗᤧ ᤐᤥᤃᤢᤃᤧᤴ ᤁᤢᤈᤠ ᤑᤳᤇᤢ ᤁᤧᤶᤒᤡᤏᤧᤴ॥ ᤂᤧᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤏᤠᤛᤡᤱᤔᤠ ᤔᤧᤱᤄᤥᤀᤣ ᤋᤠᤰᤁᤧᤒᤧ᤹ᤒᤠᤀᤠᤱ ᤁᤧᤘᤠ᤹ᤒᤠ ᤁᤧᤒᤥᤱ॥” 13 ᤁᤕᤡᤏᤧᤸᤗᤧ ᤕᤜᤘᤣ ᤍᤠᤱᤒᤠᤴ ᤔᤧᤳᤋᤢ. “ᤁᤱᤃ ᤀᤠᤱᤃᤠ᤹ ᤌ᤺ᤵᤔᤠᤀᤣ ᤔᤧᤛᤢᤰᤁᤠᤴᤒᤠ ᤛᤠ᤹ᤖᤡᤰ ᤁᤧᤛᤠᤰᤐᤠ ᤂᤢᤶᤍᤡᤱ ᤐᤥ᤺ᤰᤂᤧ॥ 14 ᤀᤥᤔᤧᤳᤋᤧ᤹ᤀᤥ. ᤀᤠᤀᤡᤴ ᤂᤧᤏᤧ᤹ ᤁᤴ ᤗᤠᤈᤣ᤹ᤗᤠᤶᤒᤠ ᤁᤧᤗ᤺ᤳᤋᤠᤱ ᤁᤧᤍᤣᤛᤠᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤡᤰᤛᤠᤀᤥᤗᤠᤶ ᤀᤠᤱᤃᤠ᤹ ᤆᤡᤱᤛᤡᤱᤔᤠ ᤁᤧᤒᤥᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹॥ ᤀᤠᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤏᤠᤛᤡᤱᤔᤠ ᤔᤧᤱᤄᤥᤶᤏᤠᤒᤠ ᤋᤠᤰᤁᤧᤒᤧ᤹ᤒᤠᤀᤠᤱ ᤁᤧᤘᤠ᤹ᤒᤠ ᤐᤥᤱᤀᤠ. ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤠᤵᤔᤡ ᤁᤧᤍᤢᤶᤒᤠ ᤀᤠᤳᤋᤡᤴᤜᤠ᤹ᤖᤧᤛᤠᤱ ᤔᤧᤛᤧᤳᤋᤠᤖᤥ॥” 15 ᤁᤖ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤴ ᤔᤧᤳᤋᤢ. “ᤜᤧᤰᤁᤣ ᤔᤣ᤺ᤴ. ᤜᤠ᤺ᤳᤗᤧ ᤂᤧᤏᤧ᤹ ᤁᤧᤛᤧᤳ. ᤂᤧᤸᤗᤧ ᤁᤢᤗᤧᤰᤘᤠ ᤏᤢᤛᤡᤗᤧᤱ ᤌᤠᤖᤡᤰ ᤂᤢᤶᤍᤡᤱ ᤂᤥᤛᤢ᤹॥” ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤕᤡᤏᤧᤴ ᤜᤠ᤺ᤳᤗᤧᤀᤠᤱ ᤔᤧᤛᤧᤖᤢᤸᤗ ᤑᤠ᤹ᤀᤠᤱ ᤁᤕᤡᤏᤧᤸᤗᤧ ᤁᤢᤎᤰᤁᤥ ᤗᤳᤇᤠ ᤔᤡᤰᤛᤣ᤺ᤴᤎᤡᤰ ᤑᤳᤇᤢᤒᤡᤖᤢ॥ 16 ᤂᤧᤒᤩᤠᤱ ᤁᤕᤡᤏᤧᤴ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡᤗᤠᤶ ᤗ᤺ᤴᤍᤧᤒᤣᤀᤠᤱ ᤀᤍᤏᤗᤠᤶ ᤏᤠᤶᤃᤧᤴ ᤐᤡᤛᤠᤱᤒᤠ ᤏᤥᤍ ᤔᤧᤵᤔᤏᤠᤒᤠ ᤗᤠᤈᤣ᤹ᤀᤥ ᤘᤠ᤹ᤔᤠ ᤜᤣ᤺ᤰᤋᤧ॥ ᤁᤕᤡᤏᤧᤸᤗᤧ ᤁᤢᤛ᤻ᤛᤠ ᤁᤢᤀᤣᤜᤠ᤹ 17 ᤁᤕᤡᤏᤧᤴ ᤔᤧᤸᤗᤡᤱᤃᤧᤴ ᤁᤢᤔᤣ᤺ᤳᤋᤡᤴᤏᤢ ᤀᤡᤵᤛᤧ. ᤜᤧᤰᤁᤩᤠᤱ ᤁᤢᤔᤣ᤺ᤳᤋᤧᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤜᤏᤥᤰᤁᤧᤴ ᤛᤠᤘᤠ᤺ᤴᤍᤢ॥ ᤁᤕᤡᤏᤧᤸᤗᤧ ᤗᤳᤇᤠ ᤕᤧᤰᤕᤰᤌᤡᤰ ᤆᤥᤃᤢ ᤜᤧᤰᤁᤩᤠᤱ ᤁᤢᤛ᤻ᤛᤠ᤺ᤸᤗᤧ ᤁᤢᤔᤡᤱᤅᤥ ᤂᤧᤴ ᤕᤧᤰᤕᤰᤁᤡᤸᤗᤧ ᤁᤢᤔᤡᤱ ᤜᤏᤥᤁ ᤕᤢᤰᤂᤢ॥ 18 ᤜᤏᤥᤰᤁᤧᤸᤗᤧ ᤁᤢᤛ᤻ᤛᤠ ᤀᤡᤖᤠᤍᤧᤴ ᤁᤳᤋᤢ॥ ᤀᤡᤖᤠᤍᤧᤸᤗᤧ ᤁᤢᤛ᤻ᤛᤠ ᤔᤜᤢᤕᤠᤀᤣᤸᤗᤧᤴ ᤁᤳᤋᤢ॥ ᤔᤜᤢᤕᤠᤀᤣᤸᤗᤧᤸᤗᤧ ᤁᤢᤛ᤻ᤛᤠ ᤔᤋᤢᤛᤣᤗᤠᤴ ᤁᤳᤋᤢ॥ ᤔᤋᤢᤛᤣᤗᤠ᤺ᤸᤗᤧ ᤁᤢᤛ᤻ᤛᤠ ᤗᤧᤔᤧᤰᤂᤧᤴ ᤁᤳᤋᤢ॥ 19 ᤗᤧᤔᤧᤰᤁᤧᤸᤗᤧ ᤔᤧᤸᤗᤡᤱᤃᤧᤴ ᤁᤢᤔᤣᤳ ᤏᤧᤳᤇᤡ ᤘᤕᤧᤛᤡ॥ ᤌᤡᤰᤁᤧᤸᤗᤧ ᤁᤢᤔᤡᤱ ᤀᤠᤍᤠ ᤜᤧᤰᤁᤩᤠᤱ ᤘᤣ᤹ᤛᤔᤠᤸᤗᤧ ᤁᤢᤔᤡᤱ ᤛᤡᤸᤗᤠ ᤘᤕᤧ॥ 20 ᤀᤠᤍᤠ᤺ᤸᤗᤧ ᤕᤠᤒᤠᤸᤗᤧᤴ ᤁᤳᤋᤢ॥ ᤂᤧᤴ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤁᤧᤕᤢᤱᤒᤠ ᤏᤢ ᤌᤰᤛᤠ ᤁᤧᤜᤡᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤌᤧᤒᤠ ᤘᤕᤧ॥ 21 ᤂᤧᤸᤗᤧ ᤁᤢᤴᤛᤠ᤹ᤖᤧ ᤁᤢᤔᤡᤱ ᤕᤢᤒᤠᤗ ᤘᤕᤧ॥ ᤂᤧᤱᤃ ᤋᤢᤱᤏᤠ ᤁᤧᤜᤡᤵᤐᤠ ᤏᤢ ᤔᤢᤑᤪᤠᤔᤠ ᤁᤧᤔᤢᤱᤒᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤌᤠ᤺ᤰᤌᤧᤒᤠ ᤘᤕᤧ॥ 22 ᤛᤡᤸᤗᤠ᤺ᤸᤗᤧ ᤋᤢᤒᤗ ᤁᤕᤡᤏᤧᤴ ᤁᤳᤋᤢ॥ ᤂᤧᤴ ᤁᤧᤖᤧᤰ ᤐᤖᤡᤰᤗᤧᤴ ᤁᤠᤛᤠ ᤏᤢ ᤑᤧᤴᤈᤣᤸᤗᤧ ᤑᤧᤈᤢᤶᤓᤧᤕᤠ ᤁᤧᤎᤰᤐᤠ ᤘᤕᤧ॥ ᤋᤢᤒᤗ ᤁᤕᤡᤏᤧᤸᤗᤧ ᤏᤠᤔᤠ ᤔᤧᤵᤔᤏᤠᤔᤠ ᤁᤢᤴᤛᤠ᤹ ᤔᤧᤴᤇᤢᤔᤠᤎᤡᤰ ᤘᤕᤧ॥ 23 ᤗᤧᤔᤧᤰᤁᤧᤸᤗᤧ ᤔᤧᤸᤗᤡᤱᤃᤧᤴ ᤁᤢᤔᤣ᤺ᤳᤜᤠ᤹ ᤔᤧᤳᤋᤢᤛᤡ. “ᤀᤠᤍᤠ ᤏᤢ ᤛᤡᤸᤗᤠᤀᤣ. ᤀᤠᤒᤠ᤺ᤴᤏᤡᤴ ᤂᤧᤵᤛᤧᤳᤇᤧ᤹. ᤂᤡᤴᤇᤡ᤹ ᤗᤧᤔᤧᤰᤁᤧᤸᤗᤧ ᤁᤢᤔᤣ᤺ᤳᤇᤣ. ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤏᤢᤖᤡᤰᤁᤠᤱ ᤂᤧᤵᤛᤧᤳᤇᤧ᤹. ᤀᤠᤱᤃᤠ᤹ ᤕᤠᤵᤔᤡ ᤁᤧᤄᤠ᤺ᤶᤒᤠ ᤌᤠᤱᤒᤧᤴ ᤔᤏᤠᤴ ᤛᤧᤖᤢᤱᤗᤥ॥ 24 ᤁᤕᤡᤏ ᤁᤧᤛᤧᤵᤐᤧᤸᤗᤧ ᤏᤢᤛᤡᤗᤧᤱ ᤁᤢᤗᤧᤰᤘᤠ ᤂᤢᤶᤍᤡᤱ ᤂᤥᤛᤢᤏᤧᤓᤃᤪ. ᤗᤧᤔᤧᤰᤁᤧᤴ ᤁᤧᤛᤧᤵᤐᤧᤸᤗᤧ ᤏᤢᤒᤥᤱᤅᤠᤱ ᤏᤢᤛᤡᤗᤧᤱ ᤁᤢᤗᤧᤰᤘᤠ ᤂᤢᤶᤍᤡᤱ ᤂᤥᤛᤢᤖᤥ॥” ᤛᤣᤋ ᤏᤢ ᤀᤣᤏᤥᤛ 25 ᤀᤠᤍᤶᤔᤧᤴ ᤔᤧᤸᤗᤡᤱᤃᤧᤴ ᤁᤢᤔᤣ᤺ᤳᤋᤡᤴᤏᤢ ᤀᤡᤵᤛᤧ. ᤜᤧᤰᤁᤩᤠᤱ ᤁᤢᤔᤣ᤺ᤳᤋᤡᤸᤗᤧ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ॥ ᤜᤧᤰᤁᤩᤠᤱ “ᤁᤕᤡᤏᤧᤸᤗᤧ ᤛᤧᤖᤢᤒᤠ ᤜᤠᤒᤡᤗᤖᤧ ᤁᤢᤗᤧᤰᤘᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤘᤣ᤹ ᤀᤅᤧ᤺ᤰᤘᤠᤎᤡᤰ ᤐᤡᤖᤠᤱᤗᤥ” ᤐᤠ᤺ᤳᤋᤢᤀᤠᤱ ᤂᤧᤴ ᤀᤅᤧ᤺ᤰᤘᤠᤴ ᤛᤣᤋ ᤔᤡᤱ ᤘᤠ᤺ᤳᤋᤢ॥ 26 ᤛᤣ᤺ᤳᤋᤧᤸᤗᤧᤀᤠᤱ ᤛᤠᤎᤡᤰ ᤁᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤀᤣᤏᤥᤛ ᤔᤡᤱ ᤘᤠ᤺ᤳᤋᤢ॥ ᤂᤧᤴ ᤕᤧᤶᤔᤠᤱᤎᤥ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤔᤠᤱᤛᤧᤘᤠ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.