ᤋᤥᤗᤡᤱᤛᤥᤔᤢ 37 - LIFOTNTᤕᤢᤛᤢᤑ ᤏᤢ ᤂᤢᤏᤧ᤹ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ 1 ᤕᤠᤁᤢᤒᤧᤴ ᤀᤠᤒᤠᤅᤣ ᤁᤢᤶᤒᤠ ᤕᤢᤅᤧᤒᤠ ᤁᤏᤠᤏ ᤗᤠᤈᤣ᤹ᤀᤥ ᤕᤢᤅᤧ॥ 2 ᤕᤠᤁᤢᤒᤧᤸᤗᤧ ᤁᤢᤕᤠ᤺ᤶᤒᤣ᤹ᤀᤥ ᤁᤧᤒᤥᤱᤒᤠ ᤛᤠᤵᤔᤢ᤺ᤴᤎᤢᤶᤔᤡᤴ ᤜᤠᤒᤠ ᤁᤸᤗᤥ॥ ᤕᤢᤛᤢᤑᤧᤴ ᤌᤡᤒᤥᤱᤅᤠᤱ ᤏᤢᤛᤡ ᤋᤱᤒᤣ ᤁᤧᤖᤧᤸᤗᤧ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤔᤣᤳ ᤈᤡᤸᤐᤠ ᤏᤢ ᤒᤡᤸᤜᤠᤖᤧ ᤂᤢᤴᤇᤡ᤹ ᤕᤧᤶᤒᤡᤳᤇᤠᤛᤠ ᤂᤢᤏᤧ᤹ ᤁᤢᤶᤓᤢ᤹ᤛᤡᤏᤢ ᤌᤡᤰᤕᤠᤴ ᤔᤧ᤺ᤴᤍᤠ ᤔᤧᤸᤗᤢᤰ ᤆᤠᤖᤠᤶᤏᤢ ᤘᤕᤧ॥ ᤌᤡᤰᤕᤠᤴ ᤁᤢᤶᤓᤢ᤹ᤛᤡᤖᤧ ᤂᤢᤏᤡ᤹ ᤁᤢᤀᤡᤓᤧᤶᤔᤠ ᤕᤠ᤺ᤶᤒᤰᤁᤡᤴ ᤏᤡᤛᤢᤀᤠᤱ ᤁᤢᤶᤒᤠ ᤆᤧᤰᤋᤢ॥ 3 ᤕᤠᤁᤢᤒᤧᤴ ᤁᤠᤵᤐᤥᤒᤠ ᤋᤢᤶᤛᤧᤸᤗᤧ ᤕᤢᤛᤢᤑᤧᤴ ᤁᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤘᤣ᤹ ᤁᤢᤛ᤻ᤛᤠᤜᤠ᤹ᤏᤢ᤺ᤸᤗᤧ ᤕᤖᤡᤰ ᤂᤢᤏᤧ᤹ ᤗᤢᤱᤔᤠ᤹ ᤋᤢᤰᤋᤢ॥ ᤜᤧᤰᤁᤩᤠᤱ ᤕᤠᤁᤢᤒᤧᤸᤗᤧ ᤁᤢᤛ᤻ᤛᤠ ᤕᤢᤛᤢᤑᤧᤴ ᤁᤢᤓᤢᤱ ᤀᤡᤛᤣ᤺ᤱᤒᤠ ᤗᤳᤇᤠ ᤁᤣ᤺ᤶᤒᤠ ᤗᤃᤣ᤺ᤳᤌᤡᤰ ᤋ᤹ᤖᤢ॥ 4 ᤁᤖ ᤁᤢᤶᤓᤢ᤹ᤛᤡᤖᤧ ᤕᤢᤛᤢᤑᤧᤴ ᤂᤢᤴᤇᤡ᤹ ᤐᤠ᤺ᤸᤗᤧ ᤂᤢᤴᤇᤡ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤠ ᤔᤧᤏᤡᤛᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤆᤡ᤺ᤵᤔᤠ ᤔᤧᤜᤣ᤺ᤰᤋᤢ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤏᤧ᤹ᤏᤢ ᤏᤢᤖᤡᤰᤁᤠᤱ ᤔᤧᤶᤒᤠᤖᤧᤴ॥ 5 ᤌᤡᤰᤗᤧᤱ ᤕᤥᤛᤣᤑᤖᤧ ᤛᤧᤵᤔᤠᤱᤎᤡᤰ ᤔᤠᤰᤋᤢ॥ ᤂᤢᤏᤧ᤹ ᤂᤧᤴ ᤁᤢᤛᤧᤵᤔᤠᤱᤅᤡᤴ ᤁᤢᤶᤓᤢ᤹ᤛᤡ ᤆᤧᤰᤋᤢᤛᤡ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤋᤃᤡᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤆᤡ᤺ᤵᤔᤠ ᤔᤧᤜᤣ᤺ᤰᤋᤢ॥ 6 ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤔᤠᤰᤋᤢᤱᤒᤠ ᤛᤧᤵᤔᤠᤱᤅᤡᤴ ᤂᤧᤵᤛᤧᤶᤔᤧ᤹ᤀᤥ॥ 7 ᤀᤠᤏᤡ᤹ ᤁᤧᤖᤧᤰ ᤐᤩᤠᤱᤛᤡᤀᤥ ᤆᤠᤎ᤺ᤱᤔᤠ ᤀᤡᤀᤠᤄᤣ᤺ᤰᤛᤢᤶᤗ ᤀᤠᤕᤠᤃᤧ॥ ᤀᤠᤱᤃᤠ᤹ ᤀᤡᤄᤣ᤺ᤰᤛᤢᤱᤒᤠ ᤆᤠᤎ᤺ᤱᤔᤠ ᤀᤠᤃᤰᤁᤡᤴ ᤐᤥᤃᤧ. ᤜᤧᤰᤁᤩᤠᤱ ᤂᤡᤏᤡ᤹ ᤆᤠᤎ᤺ᤱᤔᤠ ᤁᤰᤜᤠ᤹ ᤂᤡᤷᤗᤡ ᤔᤧᤈᤢᤵᤛᤧᤀᤠᤱ ᤀᤠᤱᤃᤠ᤹ ᤀᤠᤈᤠᤎ᤺ᤱᤔᤠ ᤀᤠᤃᤰᤁᤡᤴ ᤛᤧᤘᤠ ᤔᤧᤔᤧᤳᤋᤢ॥” 8 ᤂᤧᤸᤗᤧ ᤁᤢᤶᤓᤢ᤹ᤛᤡᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤂᤧᤏᤧ᤹ ᤌᤣ ᤀᤠᤏᤡᤃᤣ ᤛᤶᤎᤠᤱ ᤕᤢᤰ ᤁᤧᤈᤥᤃᤢᤒᤠᤒᤡ᥅ ᤌᤣ ᤂᤧᤏᤧ᤹ ᤀᤠᤏᤡᤃᤣ ᤕᤠᤵᤔᤡ ᤁᤧᤕᤢᤰᤐᤠᤒᤡ᥅” ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤧᤵᤔᤠᤱᤅᤡᤴ ᤏᤢ ᤂᤢᤏᤧ᤹ ᤁᤢᤒᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤇᤠᤴ ᤛᤠ᤹ᤖᤡᤰ ᤆᤡ᤺ᤵᤔᤠ ᤔᤧᤜᤣ᤺ᤰᤋᤢ॥ 9 ᤂᤧᤒᤩᤠᤱ ᤂᤢᤏᤧ᤹ ᤘᤣ᤹ ᤛᤧᤵᤔᤠᤱᤎᤡᤰ ᤔᤠᤰᤋᤢ ᤜᤧᤰᤁᤩᤠᤱ ᤁᤢᤶᤓᤢ᤹ᤛᤡ ᤆᤧᤰᤋᤢᤛᤡ. “ᤂᤧᤵᤛᤧᤶᤔᤥ. ᤀᤠᤱᤃᤠ᤹ ᤘᤣ᤹ ᤛᤧᤵᤔᤠᤱᤎᤡᤰ ᤔᤠᤰᤋᤢᤱ॥ ᤏᤠᤶ. ᤗᤠᤒᤠ ᤏᤢ ᤌᤡᤒᤥᤱᤅᤠᤱ ᤌᤡᤰ ᤂᤣ᤺ᤶᤛᤡᤰᤐᤠᤜᤠ᤹ᤖᤧ ᤀᤠᤱᤃᤠ᤹ ᤛᤧᤘᤠ ᤔᤧᤔᤧᤳᤋᤠᤱ॥” 10 ᤁᤢᤶᤓᤢ᤹ᤛᤡ ᤆᤧᤰᤋᤢᤛᤡᤒᤠ ᤜᤧᤰᤁᤣ ᤂᤢᤏᤧ᤹ ᤁᤢᤛᤧᤵᤔᤠᤱᤅᤡᤴ ᤁᤢᤶᤒᤠ ᤆᤧᤰᤋᤢᤸᤗᤧ. ᤁᤢᤶᤒᤠᤖᤧ ᤑᤧ᤺ᤰᤋᤢᤖ ᤔᤧᤳᤋᤢ. “ᤂᤧᤏᤧ᤹ ᤁᤴ ᤁᤧᤔᤠᤰᤋᤢᤒᤠ ᤛᤧᤵᤔᤠᤱᤅᤡᤴ ᤌᤧᤔᤠᤒᤣ᥅ ᤛᤧᤰᤂᤠᤀᤣ ᤂᤧᤏᤧ᤹ ᤁᤧᤶᤔᤠ ᤏᤢ ᤁᤧᤶᤓᤢ᤹ᤛᤡ ᤜᤧᤰᤁᤩᤠᤱ ᤀᤠᤱᤃᤠ᤹ ᤑᤧᤖᤡᤃᤧᤀᤠᤱ ᤛᤠᤶᤒᤥᤴ ᤜᤒᤳᤋᤠᤱ ᤛᤧᤘᤠ ᤔᤧᤳᤋᤠᤛᤡᤃᤧᤒᤠᤒᤡ᥅” 11 ᤂᤧᤒᤩᤠᤱ ᤂᤧᤸᤗᤧ ᤁᤢᤶᤓᤢ᤹ᤛᤡᤖᤧ ᤂᤢᤏᤧ᤹ ᤏᤠᤜᤧᤵᤔᤠ ᤔᤧᤜᤣ᤺ᤰᤋᤢ॥ ᤁᤖ ᤁᤴ ᤐᤠ᤺ᤴᤏᤡᤴ ᤂᤢᤏᤧ᤹ ᤁᤢᤶᤒᤠᤖᤧᤃ ᤁᤢᤏᤡᤱᤘᤠ᤹ᤀᤥᤀᤣ ᤕᤢᤰᤂᤢ॥ ᤕᤢᤛᤢᤑᤧᤴ ᤔᤡᤛᤪ ᤗᤠᤈᤣ᤹ᤀᤥ ᤔᤧᤛᤱᤄᤢ᤹ 12 ᤌᤡᤰᤗᤧᤱ ᤕᤢᤛᤢᤑᤖᤧ ᤁᤢᤶᤓᤢ᤹ᤜᤠ᤹ ᤁᤢᤶᤒᤠᤖᤧ ᤁᤢᤔᤧᤸᤗᤢᤰ ᤁᤢᤔᤧ᤺ᤴᤍᤠ ᤆᤠᤖᤠᤶᤛᤧ ᤛᤁᤣᤔ ᤁᤢᤒᤣᤛᤠᤱ ᤔᤧᤒᤣᤀᤠᤱ ᤔᤧᤘᤕᤧ॥ 13 ᤜᤧᤰᤁᤩᤠᤱ ᤕᤠᤁᤢᤒᤧᤸᤗᤧ ᤕᤢᤛᤢᤑᤧᤴ ᤔᤧᤳᤋᤢ. “ᤁᤧᤶᤓᤢ᤹ᤛᤡ ᤛᤁᤣᤶᤔᤥ ᤔᤧᤸᤗᤢᤰᤜᤠ᤹ ᤆᤠᤔᤧᤖᤠᤶᤛᤢᤛᤡᤖ ᤔᤧᤕᤠᤰ॥ ᤑᤧᤖᤧ᤹. ᤀᤠᤱᤃᤠ᤹ ᤂᤢᤴᤇᤡ᤹ᤀᤥ ᤂᤧᤏᤧ᤹ ᤐᤠᤱᤏᤧᤍᤣᤏᤧ॥” ᤕᤢᤛᤢᤑᤖᤧ ᤔᤧᤳᤋᤢ. “ᤀᤥᤰ. ᤀᤠᤱᤃᤠ᤹ ᤐᤣ᤺ᤰᤁᤠ॥” 14 ᤁᤢᤶᤒᤠᤖᤧ ᤂᤢᤏᤧ᤹ ᤔᤧᤳᤋᤢ. “ᤁᤧᤶᤓᤢ᤹ᤛᤡ ᤏᤢ ᤔᤧᤸᤗᤢᤰᤜᤠ᤹ ᤀᤠᤰᤂᤣ ᤔᤧᤗ᤹ ᤔᤧᤈᤠᤀᤡ ᤐᤣᤃᤧ᤹ᤀᤠᤱ ᤀᤥᤔᤧᤳᤋᤧᤛᤧ᤹॥ ᤜᤧᤰᤁᤩᤠᤱ ᤀᤠᤱᤃᤠ᤹ᤀᤥ ᤀᤡᤱᤄᤱ ᤋᤠᤖᤧ᤹ᤀᤥ॥” ᤂᤧᤒᤩᤠᤱ ᤕᤠᤁᤢᤒᤖᤧ ᤂᤧᤴ ᤜᤣᤒᤪᤥᤏᤒᤠ ᤏᤧᤏᤧᤒᤠᤍᤧᤴᤏᤥᤗᤠᤶ ᤛᤁᤣᤶᤔᤥ ᤐᤠᤱᤄᤢᤍᤣᤛᤢ. ᤕᤢᤛᤢᤑᤧᤴ ᤛᤁᤣᤶᤔᤥ ᤁᤧᤖᤧ॥ 15 ᤗᤳᤇᤠ ᤔᤏᤠᤎᤡᤰᤗᤧ ᤂᤢᤏᤧ᤹ ᤐᤩᤠᤱᤛᤡᤀᤥ ᤋᤠᤰᤁᤴᤍᤧᤖ ᤘᤕᤧᤒᤠ ᤋᤢᤔᤢ॥ ᤂᤧᤴ ᤔᤏᤠ᤺ᤸᤗᤧ ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤜᤠᤳ ᤁᤧᤃᤥ᤺ᤳᤋᤢᤖ ᤁᤧᤘᤠ᤹ᤒᤠᤒᤣ᥅” 16 ᤕᤢᤛᤢᤑᤖᤧ ᤂᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤶᤓᤢ᤹ᤛᤡ ᤁᤥ᤺ᤳᤋᤢᤱᤛᤡᤱᤗ ᤘᤠ᤹ᤀᤠᤒᤠ॥ ᤀᤠᤳᤋᤡᤛᤥᤖᤡ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤧᤸᤗᤢᤰ ᤗᤢᤵᤜᤠ᤹ ᤆᤠᤔᤧᤖᤠᤶᤛᤢᤛᤡᤖ ᤔᤧᤘᤠ᤹ᤒᤣ ᤔᤧᤳᤋᤠᤱᤅᤧᤏᤠ᥅” 17 ᤂᤧᤴ ᤔᤏᤠ᤺ᤸᤗᤧ ᤔᤧᤳᤋᤢ. “ᤂᤢᤴᤇᤡ᤹ᤃ ᤁ᤹ᤕᤥᤗᤠᤶ ᤔᤧᤒᤣ. ᤌᤣᤀᤠᤱᤓᤧᤸᤗᤧ ‘ᤀᤠᤏᤡ᤹ ᤍᤥᤋᤠᤏ ᤗᤧᤵᤔᤠᤱ ᤐᤣᤃᤡ’ ᤔᤧᤗ᤹ᤖᤧᤖ ᤔᤧᤕᤠᤃᤧᤒᤠ ᤀᤠᤱᤃᤠ᤹ ᤂᤧᤵᤛᤢᤱᤛᤡᤱ॥” ᤂᤧᤸᤗᤧᤆᤥᤃᤢᤸᤗᤧ ᤕᤢᤛᤢᤑᤧᤴ ᤍᤥᤋᤠᤏ ᤗᤧᤵᤔᤠᤱ ᤁᤢᤶᤓᤢ᤹ᤛᤡ ᤁᤥ᤺ᤳᤋᤢ ᤜᤰᤛᤢᤛᤡᤖ ᤐᤣᤀᤠᤱ ᤂᤧᤱᤜᤠ᤹ ᤋᤢᤔᤢᤛᤡ॥ 18 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤠ᤺ᤱᤄᤠᤗᤠᤶᤔᤣ ᤑᤧᤖᤧᤖ ᤐᤳᤇᤧᤒᤠ ᤔᤧᤏᤡᤛᤢ. ᤜᤧᤰᤁᤩᤠᤱ ᤂᤢᤴᤇᤡ᤹ ᤐᤣᤛᤠᤱ ᤁᤧᤵᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤢᤏᤧ᤹ ᤛᤧᤵᤔᤠ ᤐᤠᤴ ᤀᤡᤱᤔᤧᤍᤱᤄᤢ॥ 19 ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤂᤧᤴ ᤛᤧᤵᤔᤠᤱ ᤁᤧᤔᤠᤰᤐᤧᤴ ᤑᤧᤸᤗ ᤐᤳᤗᤥ॥ 20 ᤗᤢ. ᤀᤠᤸᤗ ᤂᤧᤴ ᤛᤧᤖᤢᤶᤔᤠᤱ ᤗᤳᤇᤠ ᤘᤒᤠᤰᤁᤥ ᤗᤠᤵᤑᤣᤛᤢᤶ ᤁᤣ᤺ᤳᤋᤢᤶ॥ ‘ᤋᤠᤶᤓᤢᤱ ᤌᤰᤛᤠ᤺ᤸᤗᤧ ᤂᤧᤴ ᤆᤖᤇ’ ᤑᤠ᤹ᤀᤠᤱ ᤐᤠᤵᤐᤠ᤹ ᤔᤧᤳᤋᤢᤶ. ᤂᤧᤒᤩᤠᤱ ᤂᤧᤸᤗᤧ ᤁᤢᤛᤧᤵᤔᤠᤱᤜᤠ᤹ ᤌᤣ ᤐᤥᤱᤒᤡ. ᤀᤥᤔᤧᤳᤋᤢᤶ ᤛᤠ᤹ᤖᤢᤶ॥” 21 ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤖᤢᤒᤧᤏᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤌᤠᤔᤠᤗᤠᤶ ᤛᤧ᤺ᤵᤔᤠ ᤁᤥ᤺ᤳᤋᤢᤖ ᤔᤧᤳᤋᤢᤛᤡ. “ᤀᤠᤏᤡ᤹ ᤂᤧᤴ ᤛᤧᤵᤔᤠᤀᤣᤃ ᤔᤧᤏᤢ᤹ᤏᤧᤴ॥ 22 ᤀᤠᤏᤡ᤹ ᤂᤧᤸᤗᤧ ᤁᤢᤔᤠᤰᤂᤡ᤹ ᤛᤧᤛᤢᤶ ᤔᤣ᤺ᤴ॥ ᤀᤣ᤺ᤰᤛᤠᤍᤧᤴᤏᤥᤒᤠ ᤗᤳᤇᤠ ᤘᤒᤠᤰᤁᤥᤖᤰ ᤀᤠᤰᤋᤢᤶ. ᤁᤖ ᤂᤢᤏᤧ᤹ ᤂᤠ᤺ᤴᤍᤢᤶ ᤔᤣ᤺ᤴ॥” ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤛᤧ᤺ᤵᤔᤠᤀᤠᤱ ᤂᤧᤴ ᤁᤢᤶᤒᤠᤖᤥ ᤋᤣ᤹ᤔᤠ ᤑᤠ᤹ᤀᤠᤱ ᤖᤢᤒᤧᤏᤧᤸᤗᤧ ᤜᤧᤰᤁᤣ ᤔᤧᤳᤋᤢᤛᤡᤀᤠᤱ ᤘᤕᤧ॥ 23 ᤁᤸᤗᤧᤆᤥᤃᤢᤸᤗᤧ ᤕᤢᤛᤢᤑᤧᤴ ᤁᤢᤶᤓᤢ᤹ᤛᤡᤖᤧ ᤂᤢᤏᤡ᤹ ᤐᤣᤛᤠᤱ ᤁᤧᤖᤧᤸᤗᤧ ᤂᤢᤏᤧ᤹ ᤆᤠᤰᤛᤢᤒᤠ ᤏᤢᤒᤠ ᤁᤢᤓᤢᤱ ᤀᤡᤛ᤻ᤛᤣ᤺ᤱᤒᤠ ᤁᤣ᤺ᤶᤒᤠ ᤁᤢᤗᤃᤣ᤺ᤳᤋᤡᤴ ᤔᤧᤓᤧᤴᤍᤢ ᤔᤧᤒᤡᤖᤢᤀᤠᤱ ᤔᤧᤏᤠᤵᤋᤢ॥ 24 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤗᤳᤇᤠ ᤁᤢᤍᤡᤶᤒᤣ᤹ ᤁᤣ᤺ᤶᤒᤠ ᤘᤒᤠᤰᤁᤥ ᤗᤠᤵᤔᤧᤍᤣᤛᤢ ᤔᤧᤃᤣ᤺ᤳᤋᤢ॥ ᤂᤧᤴ ᤆᤫᤠ᤺ᤳ ᤁᤧᤜᤥᤵᤐᤠ ᤛᤧᤱᤛᤧᤱᤒᤠ ᤘᤒᤠᤰ ᤏᤧᤛ᤻ᤛᤧ॥ 25 ᤜᤧᤰᤁᤩᤠᤱ ᤂᤧᤱᤜᤠ᤹ ᤋ᤺ᤰ ᤆᤠᤛᤧ ᤔᤧᤕᤢᤱᤛᤡᤅᤧᤸᤗᤧ ᤂᤧᤱᤜᤠ᤹ ᤀᤰᤂᤣ ᤌᤥ ᤀᤥᤔᤧᤔᤕᤧ ᤜᤧᤰᤁᤣ᤺ᤸᤗᤧ ᤗᤧᤱᤜᤱ ᤁᤧᤈᤥ᤺ᤰᤐᤠ ᤃᤡᤗᤠᤍᤗᤠᤶ ᤁᤧᤓᤧᤶᤒᤠᤖ ᤁᤧᤒᤵᤐᤠ ᤀᤡᤛ᤻ᤔᤠᤀᤡᤗᤡ ᤔᤏᤠᤈᤡ ᤌᤧ᤺ᤰᤐᤧᤳ ᤔᤡᤛᤪ ᤗᤠᤈᤣ᤹ ᤗᤧᤵᤔᤠᤱ ᤁᤢᤏᤠᤶᤃᤧᤏᤢ᤹ᤒᤠ ᤔᤠᤖᤢᤰ. ᤜᤢ᤺ᤳᤇᤡᤱᤔᤏᤠᤒᤠ ᤑᤠᤳᤇᤣ. ᤜᤧᤰᤁᤩᤠᤱ ᤔᤢᤷᤖ ᤁᤰᤜᤠ᤹ ᤀᤢᤔᤣᤜᤠ᤹ ᤔᤧᤃᤢ᤺ᤳᤋᤢᤛᤡᤀᤠᤱ ᤔᤧᤍᤣ᤹ᤖᤢᤛᤡᤖ ᤔᤧᤒᤳᤇᤧᤒᤠ ᤔᤧᤏᤡᤛᤢᤛᤡ॥ 26 ᤂᤧᤒᤩᤠᤱ ᤕᤜᤢᤍᤠ᤺ᤸᤗᤧ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ ᤔᤧᤳᤋᤢᤛᤡ. “ᤀᤠᤏᤡ᤹ ᤏᤢᤛᤠ᤹ᤀᤡᤴ ᤀᤠᤛᤧᤖᤢᤶᤔᤠᤱ ᤀᤠᤔᤠ᤹ᤖᤢᤶᤔᤡᤸᤗᤧ ᤀᤠᤏᤡ᤹ ᤌᤣ ᤀᤠᤄᤥᤛᤢᤶᤔᤠᤱᤒᤣ᥅ 27 ᤑᤧᤖᤧᤶᤔᤧ᤹. ᤀᤠᤸᤗ ᤀᤠᤏᤡ᤹ ᤂᤧᤴ ᤀᤡᤛ᤻ᤔᤠᤀᤣᤗᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤛᤱᤛᤢᤶᤍᤣᤛᤢᤶ॥ ᤀᤠᤏᤡ᤹ ᤂᤧᤴ ᤂᤠ᤺ᤴᤍᤢᤶ ᤔᤣ᤺ᤴ॥ ᤌᤣᤀᤠᤱᤓᤧᤸᤗᤧ ᤂᤧᤴ ᤀᤠᤒᤠᤅᤣ ᤀᤠᤏᤡ᤹ ᤏᤢᤛᤠ᤹ᤖᤥ. ᤀᤠᤏᤡ᤹ᤃ ᤗᤳᤇᤠ ᤐᤠ᤺ᤸᤗᤧ ᤁᤢᤛ᤻ᤛᤠᤍᤡ॥” ᤂᤢᤏᤧ᤹ ᤁᤢᤶᤓᤢ᤹ ᤁᤢᤴᤛᤠ᤹ᤛᤡᤖᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢ॥ 28 ᤂᤧᤸᤗᤧᤆᤥᤃᤢᤸᤗᤧ ᤔᤡᤎᤩᤠᤏ ᤁᤧᤕᤢᤱᤒᤠ ᤗᤧᤱᤜᤱ ᤁᤧᤈᤥ᤺ᤰᤐᤠᤜᤠ᤹ ᤜᤠᤒᤠ ᤂᤧᤴ ᤗᤠᤶᤔᤥᤗᤠᤶ ᤔᤧᤓᤧᤖᤧᤸᤗᤧ ᤕᤢᤛᤢᤑᤧᤴ ᤂᤢᤏᤧ᤹ ᤁᤢᤶᤓᤢ᤹ᤛᤡᤖᤧ ᤘᤒᤠᤰᤁᤥᤏᤢ ᤔᤧᤀᤢ᤺ᤰᤂᤢ ᤔᤧᤗ᤺ᤳᤋᤢᤀᤠᤱ ᤂᤧᤴ ᤀᤡᤛ᤻ᤔᤠᤀᤣᤗᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤏᤡᤒᤥᤱ ᤕᤢᤵᤐᤠᤕᤠᤱᤅᤥ ᤔᤧᤛᤱᤄᤢ ᤔᤧᤍᤣᤛᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤢᤛᤢᤑᤧᤴ ᤔᤡᤛᤪ ᤗᤠᤈᤣ᤹ᤀᤥ ᤔᤧᤍᤣ᤹ᤖᤢᤀᤠᤱ ᤔᤧᤒᤣ॥ 29 ᤖᤢᤒᤧᤏᤧᤴ ᤗᤢᤶᤒᤠ᤺ᤳᤋᤥ ᤏᤢ᤺ᤰᤂᤧ ᤋᤩᤧ᤺ᤸᤗᤧ ᤕᤢᤛᤢᤑᤧᤴ ᤂᤧᤴ ᤘᤒᤠᤰᤁᤥ ᤜᤥ᤺ᤵᤋᤧᤒᤠ ᤏᤡᤛᤢᤀᤠᤱ ᤂᤢᤏᤧ᤹ ᤁᤢᤈᤠᤱᤅᤡᤴ ᤌᤧ᤺ᤰᤂᤢ॥ 30 ᤜᤧᤰᤁᤩᤠᤱ ᤁᤢᤴᤛᤠ᤹ᤜᤠ᤹ᤖᤥ ᤐᤣᤃᤧᤀᤠᤱ ᤔᤧᤳᤋᤢᤛᤡ. “ᤜᤡᤴᤈᤠ᤹ᤀᤡᤴᤃ ᤜᤥ᤺ᤵᤐᤡᤅᤃ᥅ ᤀᤠᤸᤗ ᤀᤠᤱᤃᤠ᤹ ᤀᤠᤳᤋᤠᤴ ᤐᤣ᤺ᤰᤁᤠᤒᤠᤒᤣ᥅” 31 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤗᤳᤇᤠ ᤔᤧ᤺ᤴᤍᤠᤛᤠ᤺ᤳᤌᤡᤰ ᤔᤧᤛᤧᤖᤢᤀᤠᤱ ᤕᤢᤛᤢᤑᤖᤧ ᤁᤢᤍᤣ᤺ᤳᤋᤡᤴ ᤂᤧᤴ ᤔᤠᤰᤂᤡ᤹ᤀᤥ ᤔᤧᤏᤡ᤺ᤵᤛᤢ॥ 32 ᤜᤧᤰᤁᤩᤠᤱ ᤂᤧᤴ ᤏᤢᤒᤠ ᤁᤢᤓᤢᤱ ᤀᤡᤛ᤻ᤛᤣ᤺ᤱᤒᤠ ᤗᤃᤣ᤺ᤳᤋᤡᤴ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ ᤕᤠᤁᤢᤒᤖᤥ ᤔᤧᤍᤠᤖᤢᤀᤠᤱ ᤔᤧᤔᤧᤳᤋᤢ. “ᤁᤴ ᤀᤠᤏᤡᤃᤣ ᤂᤥᤛᤢᤶᤒᤧ॥ ᤀᤥᤔᤧᤳᤋᤧᤛᤠ᤹ᤖᤧ᤹. ᤁᤴ ᤁᤧᤛ᤻ᤛᤠ᤺ᤸᤗᤧᤴᤒᤡ ᤔᤣ᤺ᤶᤒᤡ᥅” 33 ᤁᤢᤶᤒᤠᤖᤧ ᤂᤧᤴ ᤗᤃᤣ᤺ᤳᤋᤡᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤐᤠ᤺ᤳᤋᤢ. “ᤁᤴ ᤗᤃᤣ᤺ᤳᤋᤡᤱᤃ ᤀᤠᤛ᤻ᤛᤠ᤺ᤸᤗᤧᤀᤣ ᤁᤢᤗᤃᤣ᤺ᤳᤗᤥ॥ ᤛᤧᤰᤂᤠᤛᤠᤱ ᤋᤠᤶᤓᤢᤱ ᤌᤰᤛᤠ᤺ᤸᤗᤧ ᤆᤍᤣᤛᤢᤀᤠᤱ ᤁᤢᤈᤰᤋᤠ ᤁᤢᤗᤧᤶᤍᤠ ᤐᤥ᤺ᤰᤂᤧᤒᤡᤗᤠ॥” 34 ᤂᤧᤒᤩᤠᤱ ᤕᤠᤁᤢᤒᤖᤧ ᤁᤢᤗᤃᤣ᤺ᤳᤋᤡᤴ ᤌᤧ᤺ᤰᤂᤢ. ᤜᤧᤰᤁᤩᤠᤱ ᤑ᤹ᤀᤡ ᤕᤢᤶᤔᤠ ᤋᤧᤴᤏᤥ ᤛᤃᤡᤋᤣᤳ ᤁᤡᤳᤇᤡᤱᤅᤠᤱ ᤁᤢᤛ᤻ᤛᤠ᤺ᤸᤗᤧ ᤁᤢᤗᤠᤃᤡ ᤕᤖᤡᤰ ᤕᤧᤴ ᤌᤠᤖᤡᤰ ᤔᤧᤖᤡᤱ ᤌᤰᤋᤧ॥ 35 ᤂᤢᤏᤧ᤹ ᤁᤧᤖᤧᤰ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤏᤢ ᤔᤧᤴᤇᤢᤔᤠᤜᤠ᤹ ᤔᤧᤍᤩᤧᤀᤠᤱ ᤜᤠᤱᤜᤠᤱ ᤔᤧᤵᤔᤠ ᤔᤧᤃᤥ᤺ᤳᤋᤢ. ᤁᤖ ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤥ ᤛᤏᤠᤖᤢᤱ ᤔᤧᤒᤥ᤺ᤰᤂᤧᤴ॥ ᤂᤢᤏᤧ᤹ ᤐᤠ᤺ᤳᤋᤢ. “ᤔᤣ᤺ᤴ. ᤀᤠᤛ᤻ᤛᤠᤴ ᤔᤧᤖᤡᤱ ᤌᤰᤋᤢᤱᤗ ᤀᤠᤱᤃᤠ᤹ ᤛᤡᤀᤠᤖᤥ॥” ᤀᤰᤂᤣᤗ᤹ᤖᤡᤰ ᤕᤢᤛᤢᤑᤧᤴ ᤁᤢᤶᤒᤠᤖᤧ ᤂᤧᤴ ᤜᤠ᤺ᤵᤋᤢ॥ 36 ᤜᤠᤒᤠ ᤂᤧᤴ ᤕᤧᤶᤔᤥ ᤔᤡᤎᤩᤠᤏᤒᤠ ᤔᤏᤠᤜᤠ᤹ᤖᤧ ᤕᤢᤛᤢᤑᤧᤴ ᤔᤡᤛᤪ ᤗᤠᤈᤣ᤹ᤒᤠ ᤜᤠᤱᤜᤡᤶ ᤁᤶᤒᤪᤠᤱ ᤁᤧᤔᤧᤵᤐᤠ ᤌᤰᤐᤣᤒᤠ ᤐᤥᤋᤡᤑᤖᤧᤸᤗᤥ ᤔᤧᤛᤱᤄᤢ ᤔᤧᤍᤣᤛᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.