ᤋᤥᤗᤡᤱᤛᤥᤔᤢ 36 - LIFOTNTᤀᤣᤛᤠᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ 1 ᤀᤣᤛᤠᤒᤧᤸᤗᤧ ᤁᤢᤎᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶᤔᤡᤴ ᤜᤠᤒᤠ ᤁᤴᤗᤥ (ᤂᤧᤴ ᤀᤣᤍᤥᤶᤔᤠᤱ ᤔᤧᤔᤧᤳᤋᤢ)॥ 2 ᤀᤣᤛᤠᤒᤖᤧ ᤁᤏᤠᤏᤡ ᤔᤧᤴᤇᤢᤔᤠᤜᤠ᤹ᤗᤠᤶᤒᤠ ᤔᤣ᤺ᤳᤜᤠ᤹ ᤋᤠᤖᤢᤛᤡ॥ ᤜᤡᤳᤋᤡ ᤀᤣᤗᤥᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤀᤠᤍᤠᤏ. ᤜᤧᤰᤁᤩᤠᤱ ᤜᤡᤒ᤻ᤒᤡ ᤛᤡᤒᤥᤖᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤀᤠᤏᤠᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤀᤥᤜᤥᤗᤡᤒᤠᤔᤠᤴ. 3 ᤜᤧᤰᤁᤩᤠᤱ ᤀᤡᤛ᤻ᤔᤠᤀᤣᤗᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤏᤒᤠᤕᤥᤋᤖᤧ ᤁᤢᤴᤛᤠ᤹ ᤒᤠᤛᤔᤋᤧᤴ॥ 4 ᤀᤣᤛᤠᤒᤗᤠᤶ ᤀᤠᤍᤠ᤺ᤸᤗᤧ ᤀᤣᤗᤡᤐᤈᤧᤴ ᤁᤳᤋᤢ ᤜᤧᤰᤁᤩᤠᤱ ᤒᤠᤛᤔᤋᤧᤸᤗᤧ ᤖᤢᤀᤣᤸᤗᤧᤴ ᤁᤳᤋᤢ. 5 ᤜᤧᤰᤁᤩᤠᤱ ᤀᤥᤜᤥᤗᤡᤒᤠᤔᤠ᤺ᤸᤗᤧ ᤕᤣᤀᤢᤛ. ᤕᤠᤗᤠᤔ ᤏᤢ ᤁᤥᤖᤜᤴ ᤁᤳᤋᤢ॥ ᤁᤏᤠᤏ ᤗᤠᤈᤣ᤹ᤀᤥ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤣᤛᤠᤒᤖᤧ ᤁᤢᤛ᤻ᤛᤠᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ 6 ᤜᤧᤰᤁᤩᤠᤱ ᤀᤣᤛᤠᤒᤖᤧ ᤀᤠᤒᤠᤅᤣ ᤁᤢᤔᤣ᤺ᤳᤜᤠ᤹. ᤁᤢᤛ᤻ᤛᤠᤜᤠ᤹ ᤜᤧᤰᤁᤩᤠᤱ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ ᤂᤢᤏᤧ᤹ ᤁᤢᤜᤡᤶᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤐᤡᤳᤔᤧ᤺ᤴᤍᤠᤜᤠ᤹ ᤜᤧᤰᤁᤩᤠᤱ ᤁᤏᤠᤏ ᤗᤠᤈᤣ᤹ᤀᤥ ᤌᤃᤢᤒᤠ ᤁᤧᤖᤧᤰ ᤁᤢᤕᤠᤱᤛᤠ ᤁᤢᤴᤎᤣᤜᤠ᤹ ᤕᤠᤱᤛᤡᤱᤀᤠᤱ ᤁᤢᤴᤛᤠ᤹ ᤕᤠᤁᤢᤒᤏᤢ ᤛᤧᤴᤍᤧᤀᤠᤱ ᤘᤣ᤹ᤛᤔᤠ ᤗᤠᤈᤣ᤹ᤀᤥ ᤐᤣᤃᤧ॥ 7 ᤂᤢᤴᤇᤡ᤹ ᤛᤠ᤹ᤖᤡᤰ ᤕᤖᤡᤰ ᤕᤠᤱᤛᤠᤁᤢᤴᤎᤣ ᤁᤳᤋᤧᤇᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤕᤢᤅᤧᤇᤡᤒᤠ ᤋᤧᤴᤏᤡᤸᤗᤧ ᤂᤢᤴᤇᤡ᤹ ᤌᤰᤛᤠᤜᤠ᤹ ᤛᤥᤖᤡᤰ ᤘᤠ᤹ᤔᤠᤖᤧ ᤗᤠᤃᤡ ᤔᤧᤕᤥᤖᤢᤴᤛᤡᤴ॥ 8 ᤂᤧᤸᤗᤧᤆᤥᤃᤢᤸᤗᤧ ᤀᤣᤛᤠᤒᤧᤴ (ᤀᤡᤃᤪ ᤀᤧᤍᤥᤶᤔᤧᤴ) ᤛᤣᤀᤡᤖ ᤗᤠᤈᤣ᤹ᤀᤥᤒᤠ ᤁᤥ᤺ᤰᤔᤠᤜᤠ᤹ᤀᤥ ᤕᤢᤱᤔᤠ ᤜᤣ᤺ᤰᤋᤧ॥ 9 ᤛᤣᤀᤡᤖᤒᤠ ᤌᤧᤃᤢ ᤔᤠᤱᤘᤠ ᤁᤥ᤺ᤰᤔᤠ ᤑᤠᤱᤈᤱ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤀᤣᤛᤠᤒᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤀᤣᤍᤥᤔᤡᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶᤔᤡᤴ ᤜᤠᤒᤠ ᤁᤴᤜᤠ᤹ᤖᤥ॥ 10 ᤀᤣᤛᤠᤒᤖᤧ ᤁᤢᤛ᤻ᤛᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤜᤠ᤹ ᤜᤠᤒᤠ ᤁᤴᤗᤥ— ᤀᤣᤛᤠᤒᤖᤧ ᤁᤢᤔᤣᤳ ᤀᤠᤍᤠᤖᤧ ᤁᤢᤛ᤻ᤛᤠ ᤀᤣᤗᤡᤐᤈ. ᤜᤧᤰᤁᤩᤠᤱ ᤀᤣᤛᤠᤒᤖᤧ ᤁᤢᤔᤣᤳ ᤒᤠᤛᤔᤋᤖᤧ ᤁᤢᤛ᤻ᤛᤠ ᤖᤢᤀᤣᤗ॥ 11 ᤀᤣᤗᤡᤐᤈᤖᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹— ᤋᤣᤔᤠᤏ. ᤀᤥᤔᤠᤖ. ᤛᤐᤥ. ᤃᤠᤋᤠᤔ. ᤜᤧᤰᤁᤩᤠᤱ ᤁᤏᤈ॥ 12 ᤀᤣᤛᤠᤒᤖᤧ ᤁᤢᤛ᤻ᤛᤠ ᤀᤣᤗᤡᤐᤈᤖᤧ ᤋᤡᤶᤏ ᤔᤡᤱ ᤁᤧᤘᤠ᤺ᤵᤔᤠ ᤗᤳᤇᤠ ᤁᤢᤈᤰᤔᤣ᤺ᤳ ᤌᤡᤰ ᤘᤕᤧ॥ ᤀᤣᤗᤡᤐᤈᤗᤠᤶ ᤂᤧᤸᤗᤧ ᤀᤔᤠᤗᤧᤰᤁᤧᤴ ᤁᤳᤋᤢ॥ ᤀᤣᤛᤠᤒᤖᤧ ᤁᤢᤔᤣᤳ ᤀᤠᤍᤠᤖᤧ ᤁᤢᤶᤔᤧᤴᤇᤠ᤹ᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ 13 ᤖᤢᤀᤣᤗᤖᤧ ᤁᤢᤛ᤻ᤛᤠᤜᤠ᤹— ᤏᤜᤋ. ᤈᤣᤖᤜ. ᤛᤶᤔᤠ ᤏᤢ ᤔᤡᤈ᤻ᤈᤠ॥ ᤀᤣᤛᤠᤒᤖᤧ ᤁᤢᤔᤣᤳ ᤒᤠᤛᤔᤋᤖᤧ ᤁᤢᤶᤔᤧᤴᤇᤠ᤹ᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ 14 ᤀᤣᤛᤠᤒᤖᤧ ᤁᤢᤔᤣᤳ ᤀᤥᤜᤥᤗᤡᤒᤠᤔᤠ. ᤂᤢᤏᤧ᤹ᤃ ᤛᤡᤒᤥᤏᤧᤸᤗᤧ ᤁᤢᤶᤔᤧᤴᤇᤠ᤹ ᤜᤧᤰᤁᤩᤠᤱ ᤀᤏᤠᤖᤧ ᤁᤢᤛ᤻ᤛᤠ ᤘᤕᤧ. ᤀᤣᤛᤠᤒᤗᤠᤶ ᤂᤢᤏᤧ᤹ ᤁᤳᤋᤢᤛᤡᤒᤠ ᤁᤢᤛ᤻ᤛᤠᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ— ᤕᤣᤀᤢᤛ. ᤕᤠᤗᤠᤔ ᤏᤢ ᤁᤥᤖᤜ॥ 15 ᤀᤣᤛᤠᤒᤖᤧ ᤁᤢᤎᤠ᤺ᤰᤜᤠ᤹ᤀᤥ ᤋᤢᤶ ᤗᤠᤶᤗᤥᤒᤠᤜᤠ᤹ ᤜᤠᤒᤠ ᤁᤴᤜᤠ᤹ ᤔᤧᤘᤕᤧᤖᤥ— ᤀᤣᤛᤠᤒᤖᤧ ᤁᤢᤛ᤻ᤛᤠ ᤋᤢᤶᤒᤠ ᤀᤣᤗᤡᤐᤈᤖᤧ ᤁᤢᤛ᤻ᤛᤠᤜᤠ᤹ᤀᤥ ᤋᤢᤶ ᤗᤠᤶᤗᤥᤒᤠᤜᤠ᤹ ᤋᤣᤔᤠᤏ. ᤀᤥᤔᤠᤖ. ᤛᤐᤥ. ᤁᤏᤈ. 16 ᤁᤥᤖᤜ. ᤃᤠᤋᤠᤔ ᤜᤧᤰᤁᤩᤠᤱ ᤀᤔᤠᤗᤧᤁ॥ ᤀᤧᤍᤥᤔ ᤗᤠᤈᤣ᤹ᤀᤥ ᤀᤣᤗᤡᤐᤈᤗᤠᤶ ᤁᤧᤒᤥᤱᤒᤠ ᤋᤢᤶ ᤗᤠᤶᤗᤠᤶᤗᤥᤒᤠᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ ᤁᤴᤜᤠ᤹ ᤀᤠᤍᤠᤖᤧ ᤁᤢᤶᤔᤧᤴᤇᤠ᤹ᤛᤡᤖᤥ॥ 17 ᤀᤣᤛᤠᤒᤧᤸᤗᤧ ᤁᤢᤛ᤻ᤛᤠ ᤖᤢᤀᤣᤗᤖᤧ ᤁᤢᤛ᤻ᤛᤠ ᤋᤢᤶ ᤗᤠᤶᤗᤥᤒᤠᤜᤠ᤹ ᤏᤜᤋ. ᤈᤣᤖᤜ ᤛᤶᤔᤠ ᤜᤧᤰᤁᤩᤠᤱ ᤔᤡᤈ᤻ᤈᤠ॥ ᤀᤧᤍᤥᤔ ᤗᤠᤈᤣ᤹ᤀᤥ ᤖᤢᤀᤣᤗᤗᤠᤶ ᤁᤧᤒᤥᤱᤒᤠ ᤋᤢᤶ ᤗᤠᤶᤗᤥᤒᤠᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ ᤀᤣᤛᤠᤒᤖᤧ ᤁᤢᤔᤣᤳ ᤒᤠᤛᤔᤋᤖᤧ ᤁᤢᤶᤔᤧᤴᤇᤠ᤹ᤜᤠ᤹ ᤜᤠᤒᤠ ᤁᤴᤜᤠ᤹ ᤔᤧᤘᤕᤧ॥ 18 ᤀᤣᤛᤠᤒᤖᤧ ᤁᤢᤔᤣᤳ ᤀᤥᤜᤥᤗᤡᤒᤠᤔᤠᤖᤧ ᤋᤢᤶ ᤗᤠᤶᤗᤥᤒᤠ ᤁᤢᤛ᤻ᤛᤠᤜᤠ᤹— ᤕᤣᤀᤢᤛ. ᤕᤠᤗᤠᤔ ᤜᤧᤰᤁᤩᤠᤱ ᤁᤥᤖᤜ॥ ᤀᤏᤠᤖᤧ ᤁᤢᤛ᤻ᤛᤠ ᤀᤣᤛᤠᤒᤖᤧ ᤁᤢᤔᤣᤳ ᤀᤥᤜᤥᤗᤡᤒᤠᤖᤧ ᤁᤳᤋᤢᤛᤡᤒᤠ ᤋᤢᤶ ᤗᤠᤶᤗᤥᤒᤠᤜᤠ᤹ ᤜᤠᤒᤠ ᤁᤴᤜᤠ᤹ ᤔᤧᤘᤕᤧ॥ 19 ᤀᤣᤛᤠᤒᤧᤸᤗᤧ (ᤀᤧᤍᤥᤔ ᤑᤠ᤹ᤀᤠᤱᤅᤠᤱ ᤁᤢᤛᤡᤱ ᤏᤡ᤺ᤳᤋᤧᤳ) ᤁᤢᤛ᤻ᤛᤠᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤢᤶ ᤗᤠᤶᤗᤥᤒᤠᤜᤠ᤹ ᤁᤱᤜᤠ᤹ᤖᤥ॥ ᤛᤣᤀᤡᤖᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ( ᥇ ᤛᤠᤵᤔᤢ ᥇:᥉᥎-᥊᥈ ) 20 ᤂᤧᤴ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤜᤥᤖᤡ ᤛᤣᤀᤡᤖᤗᤧ ᤁᤢᤛ᤻ᤛᤠᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ— ᤗᤥᤋᤠᤏ. ᤛᤥᤒᤠᤗ. ᤛᤡᤒᤥᤏ. ᤀᤏᤠ 21 ᤍᤡᤛᤥᤏ. ᤀᤣᤛᤣᤖ ᤏᤢ ᤍᤡᤛᤠᤏ॥ ᤛᤣᤀᤡᤖᤖᤧ ᤁᤴ ᤁᤢᤔᤢ᤹ᤀᤡᤍᤠᤱᤛᤠ ᤜᤥᤖᤡᤜᤠ᤹ ᤀᤧᤍᤥᤔ ᤗᤠᤈᤣ᤹ᤀᤥ ᤋᤢᤶ ᤗᤠᤶᤗᤥᤒᤠ ᤔᤧᤘᤕᤧ॥ 22 ᤗᤥᤋᤠᤏᤖᤧ ᤁᤢᤛ᤻ᤛᤠᤜᤠ᤹— ᤜᤥᤖᤡ ᤏᤢ ᤜᤣᤔᤠᤔ॥ ᤋᤡᤶᤏᤴ ᤗᤥᤋᤠᤏᤧᤸᤗᤧ ᤁᤢᤴᤛᤠ᤹ ᤔᤧᤴᤇᤢᤔᤠ ᤘᤕᤧ॥ 23 ᤛᤥᤒᤠᤗᤖᤧ ᤁᤢᤛ᤻ᤛᤠᤜᤠ᤹— ᤀᤸᤒᤠᤏ. ᤔᤠᤏᤜᤋ. ᤀᤣᤒᤠᤗ. ᤛᤐᤥ ᤏᤢ ᤀᤥᤏᤠᤔ॥ 24 ᤛᤡᤒᤥᤏᤖᤧ ᤁᤢᤛ᤻ᤛᤠᤜᤠ᤹— ᤀᤕᤩᤠ ᤏᤢ ᤀᤏᤠ॥ ᤜᤠᤒᤠ ᤁᤴ ᤀᤏᤠ᤺ᤸᤗᤧᤀᤣ ᤁᤢᤶᤒᤠ ᤛᤡᤒᤥᤏᤖᤧ ᤁᤢᤀᤍᤱᤜᤠ᤹ ᤁᤔᤢᤛᤡ ᤁᤳᤋᤢᤸᤗᤧ ᤀᤣ᤺ᤰᤛᤠᤍᤧᤴᤏᤥ ᤔᤰᤘᤠ ᤆᤫᤠ᤺ᤳᤋᤡᤸᤗᤧ ᤘᤒᤢᤴᤍᤠᤰ ᤂᤥᤛᤢᤀᤠᤱ ᤘᤕᤧ॥ 25 ᤀᤏᤠᤖᤧ ᤁᤢᤛ᤻ᤛᤠᤜᤠ᤹— ᤍᤡᤛᤥᤏ ᤏᤢ ᤀᤏᤠᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤀᤥᤜᤥᤗᤡᤒᤠᤔᤠ॥ 26 ᤍᤡᤛᤥᤏᤖᤧ ᤁᤢᤛ᤻ᤛᤠᤜᤠ᤹— ᤜᤣᤶᤍᤠᤏ. ᤀᤣᤛ᤻ᤒᤠᤏ. ᤕᤡᤋᤪᤠᤏ ᤏᤢ ᤁᤖᤠᤏ॥ 27 ᤀᤣᤛᤣᤖᤖᤧ ᤁᤢᤛ᤻ᤛᤠᤜᤠ᤹— ᤒᤡᤸᤜᤠᤴ. ᤈᤠᤒᤠᤏ ᤏᤢ ᤀᤁᤠᤏ॥ 28 ᤍᤡᤛᤠᤏᤖᤧ ᤁᤢᤛ᤻ᤛᤠ— ᤕᤧᤶᤒᤡᤳᤇᤠᤜᤠ᤹ ᤀᤢᤈ ᤏᤢ ᤀᤖᤠᤏ॥ 29 ᤁᤴᤜᤠ᤹ᤀᤣ ᤜᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤋᤢᤶ ᤗᤠᤶᤗᤥᤒᤠᤛᤡᤖᤥ— ᤗᤥᤋᤠᤏ. ᤛᤥᤒᤠᤗ. ᤛᤡᤒᤥᤏ. ᤀᤏᤠ. 30 ᤍᤡᤛᤥᤏ. ᤀᤣᤛᤣᤖ ᤏᤢ ᤍᤡᤛᤠᤏ॥ ᤛᤣᤀᤡᤖ ᤗᤠᤈᤣ᤹ᤀᤥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤠ᤺ᤰᤜᤠ᤹ᤀᤥ ᤜᤥᤖᤡ ᤋᤢᤶ ᤗᤠᤶᤗᤥᤒᤠᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ ᤀᤣᤍᤥᤔᤒᤠ ᤜᤠᤱᤜᤠ᤹ ( ᥇ ᤛᤠᤵᤔᤢ ᥇:᥊᥉-᥋᥊ ) 31 ᤀᤡᤛᤪᤠᤀᤡᤗᤒᤠ ᤀᤠᤳᤋᤡᤴ ᤜᤠᤱᤜᤠ᤹ᤖᤧᤀᤠᤱ ᤜᤠᤱᤕᤢᤰ ᤔᤧᤴᤈᤥ᤺ᤰᤁᤣ ᤋᤃᤡ ᤀᤧᤍᤥᤔ ᤗᤠᤈᤣ᤹ᤀᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠ ᤜᤠᤱᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ— 32 ᤒᤀᤥᤖᤖᤧ ᤁᤢᤛ᤻ᤛᤠ ᤒᤣᤗᤠᤖᤧ ᤀᤣᤍᤥᤔᤀᤥ ᤜᤠᤱᤕᤢᤰ ᤆᤥᤃᤢᤀᤠᤱ ᤘᤕᤧ॥ ᤂᤢᤏᤧ᤹ ᤁᤢᤜᤠᤱᤒᤠᤱᤓᤣ᤹ᤀᤡᤸᤗᤧ ᤁᤢᤔᤡᤱ ᤍᤡᤴᤜᤠᤘᤠ ᤏᤧᤛ᤻ᤛᤧ॥ 33 ᤒᤣᤗᤠᤴ ᤛᤩᤧᤀᤠᤱ ᤂᤢᤏᤧ᤹ ᤁᤢᤗᤧᤰᤘᤠ ᤒᤥᤈᤪᤠᤀᤥ ᤁᤧᤕᤢᤱᤒᤠ ᤈᤣᤖᤜᤖᤧ ᤁᤢᤛ᤻ᤛᤠ ᤕᤥᤒᤠᤒᤧᤸᤗᤧ ᤜᤠᤱ ᤆᤥᤃᤢ॥ 34 ᤕᤥᤒᤠᤒᤧᤴ ᤔᤠᤛᤡᤱᤅᤠᤱ ᤂᤢᤏᤧ᤹ ᤁᤢᤗᤧᤰᤘᤠ ᤋᤣᤔᤠᤏᤡᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ᤒᤠ ᤜᤢᤛᤠᤔᤧᤸᤗᤧ ᤜᤠᤱᤕᤢᤰ ᤆᤥᤃᤢ॥ 35 ᤜᤢᤛᤠᤔᤧᤴ ᤔᤠᤛᤡᤱᤅᤠᤱ ᤒᤍᤍᤖᤧ ᤁᤢᤛ᤻ᤛᤠ ᤜᤍᤍᤧᤴ ᤜᤠᤱ ᤐᤥ᤺ᤰᤂᤧ॥ ᤂᤢᤏᤧ᤹ ᤔᤥᤀᤠᤒ ᤗᤠᤈᤣ᤹ᤀᤥ ᤔᤡᤍᤩᤠᤏᤡᤜᤠ᤹ ᤏᤠ᤺ᤴᤍᤢᤛᤡ॥ ᤂᤢᤏᤧ᤹ ᤁᤢᤕᤧᤰᤕᤰᤁᤡᤸᤗᤧ ᤁᤢᤔᤡᤱ ᤀᤘᤡᤋ ᤏᤧᤛ᤻ᤛᤧ॥ 36 ᤜᤍᤍᤧᤴ ᤔᤠᤛᤡᤱᤅᤠᤱ ᤂᤢᤏᤧ᤹ ᤁᤢᤗᤧᤰᤘᤠ ᤔᤠᤛᤪᤣᤁᤠᤀᤥ ᤁᤧᤕᤢᤱᤒᤠ ᤛᤶᤗᤠᤖᤧ ᤜᤠᤱᤕᤢᤰ ᤆᤥᤃᤢ॥ 37 ᤛᤶᤗᤠ᤺ᤴ ᤔᤠᤛᤡᤱᤅᤠᤱ ᤕᤢᤑᤪᤣᤋᤡᤛ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤖᤜᤥᤒᤥᤋᤒᤠ ᤛᤦᤗᤧᤴ ᤜᤠᤱ ᤐᤥ᤺ᤰᤂᤧ॥ 38 ᤛᤦᤗᤧᤴ ᤔᤠᤛᤡᤱᤅᤠᤱ ᤀᤰᤒᤥᤖᤖᤧ ᤁᤢᤛ᤻ᤛᤠ ᤒᤠᤗ-ᤜᤠᤏᤠᤏᤧᤴ ᤜᤠᤱ ᤐᤥ᤺ᤰᤂᤧ॥ 39 ᤀᤰᤒᤥᤖᤖᤧ ᤁᤢᤛ᤻ᤛᤠ ᤒᤠᤗ-ᤜᤠᤏᤠᤏᤧᤴ ᤛᤩᤧᤀᤠᤱ ᤂᤢᤏᤧ᤹ ᤁᤢᤗᤧᤰᤘᤠ ᤜᤍᤍᤖᤧ ᤜᤠᤱᤕᤢᤰ ᤆᤥᤃᤢ॥ ᤂᤧᤸᤗᤧ ᤁᤢᤕᤧᤰᤕᤰᤁᤡᤸᤗᤧ ᤁᤢᤔᤡᤱ ᤐᤠᤀᤢ ᤏᤧᤛ᤻ᤛᤧ॥ ᤂᤢᤏᤧ᤹ ᤁᤢᤔᤣ᤺ᤳᤋᤡᤸᤗᤧ ᤁᤢᤔᤡᤱ ᤔᤜᤣᤋᤒᤣᤗ ᤘᤕᤧ. ᤂᤢᤏᤧ᤹ ᤔᤋᤪᤣᤍᤖᤧ ᤁᤢᤛ᤻ᤛᤠ. ᤔᤣ-ᤈᤠᤜᤠᤒᤖᤧ ᤁᤢᤶᤔᤧᤴᤇᤠ᤹ᤔᤠ ᤘᤕᤧ॥ 40 ᤀᤣᤛᤠᤒᤗᤠᤶ ᤁᤧᤒᤥᤱᤒᤠ ᤁᤢᤎᤧᤃᤣᤰ ᤗᤠᤶᤗᤠᤶᤗᤥᤒᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤡᤱ ᤗᤠᤈᤣ᤹ ᤏᤢ ᤂᤢᤴᤇᤡ᤹ ᤌᤠ᤺ᤰ ᤁᤢᤀᤡᤛᤡᤰ ᤁᤴᤜᤠ᤹ᤀᤣᤖᤥ— ᤋᤡᤶᤏ. ᤀᤗᤫᤠ. ᤕᤋᤣᤋ. 41 ᤀᤥᤜᤥᤗᤡᤒᤠᤔᤠ. ᤀᤣᤗᤠᤜ. ᤐᤡᤏᤥᤏ. 42 ᤁᤏᤈ. ᤋᤣᤔᤠᤏ. ᤔᤡᤒ᤻ᤛᤠᤖ. 43 ᤔᤃ᤻ᤍᤡᤀᤣᤗ ᤏᤢ ᤀᤡᤖᤠᤔ॥ ᤂᤧᤱᤜᤠ᤹ᤖᤧ ᤔᤧᤏᤠ᤺ᤴᤍᤢᤛᤡᤒᤠ ᤗᤠᤈᤣ᤹ᤀᤥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤢᤱᤔᤠᤍᤧᤴ ᤁᤢᤀᤡᤛᤡᤰ ᤀᤣᤍᤥᤔᤒᤠ ᤁᤢᤎᤧᤃᤣᤰ ᤗᤠᤶᤗᤠᤶᤗᤥᤒᤠᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ ᤁᤴᤜᤠ᤹ ᤁᤧᤖᤧᤰ ᤀᤣᤛᤠᤒᤗᤠᤶᤒᤠ ᤁᤧᤒᤥ᤺ᤶᤒᤠ ᤁᤧᤎᤧ᤹ᤒᤠ ᤀᤣᤍᤥᤔᤡᤜᤠ᤹ᤖᤧ ᤂᤢᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.