ᤋᤥᤗᤡᤱᤛᤥᤔᤢ 34 - LIFOTNTᤍᤡᤏᤠᤴ ᤑᤧᤳᤔᤧᤗᤠ᤺ᤴᤍᤢ 1 ᤕᤠᤁᤢᤒ ᤏᤢ ᤗᤡᤀᤠᤖᤧ ᤂᤢᤴᤇᤡ᤹ ᤛᤠ ᤍᤡᤏᤠᤴ ᤌᤡᤰᤕᤧᤴ ᤂᤧᤴ ᤗᤠᤈᤣ᤹ᤀᤥᤒᤠ ᤔᤧᤴᤇᤢᤔᤠᤜᤠ᤹ ᤋᤢᤶᤔᤠᤛᤡ ᤑᤠ᤹ᤀᤠᤱ ᤐᤣ॥ 2 ᤂᤧᤴ ᤋᤧᤱᤃᤵᤐᤥᤒᤠ ᤜᤠᤱ ᤜᤡᤒ᤻ᤒᤡ ᤜᤠᤔᤥᤖᤧᤸᤗᤧ ᤁᤢᤛ᤻ᤛᤠ ᤛᤁᤣᤔᤧᤸᤗᤧ ᤍᤡᤏᤠᤴ ᤏᤡᤛᤢ. ᤜᤧᤰᤁᤩᤠᤱ ᤀᤢ᤺ᤰᤂᤢ ᤋᤣ᤹ᤖᤢᤀᤠᤱ ᤔᤣ᤺ᤳᤔᤧᤳᤋᤢ॥ 3 ᤂᤧᤒᤩᤠᤱ ᤂᤧᤸᤗᤧ ᤁᤢᤏᤡᤱᤘᤠᤴ ᤕᤠᤁᤢᤒᤖᤧ ᤁᤢᤛ᤻ᤛᤠ ᤍᤡᤏᤠᤴ ᤗᤧᤵᤔᤠᤱ ᤜᤡᤛᤡᤱ॥ ᤜᤧᤰᤁᤩᤠᤱ ᤂᤧᤸᤗᤧ ᤂᤧᤴ ᤔᤧᤴᤇ᤻ᤕᤠᤴ ᤗᤢᤱᤔᤠ᤹ ᤋᤢᤰᤋᤢᤀᤠᤱ ᤂᤧᤴ ᤏᤢ᤺ᤒ᤻ᤏᤢᤒᤠ ᤐᤠ᤺ᤴᤜᤠ᤹ ᤔᤧᤳᤋᤢ॥ 4 ᤜᤧᤰᤁᤩᤠᤱ ᤛᤁᤣᤔᤧᤸᤗᤧ ᤁᤢᤶᤒᤠ ᤜᤠᤔᤥᤖᤧᤴ ᤔᤧᤳᤋᤢ. “ᤂᤧᤴ ᤛᤡᤛᤠᤍᤡᤱ ᤔᤧᤴᤇ᤻ᤕᤠᤴ ᤀᤠᤱᤃᤠ᤹ ᤀᤠᤜᤡᤶᤛᤠᤔᤠ ᤐᤥᤱᤛᤧ ᤋᤠᤖᤠᤱ ᤐᤡᤖᤠᤱᤅᤧ᤹॥” 5 ᤕᤠᤁᤢᤒᤖᤧ ᤁᤢᤛ᤻ᤛᤠ ᤍᤡᤏᤠᤴ ᤛᤁᤣᤔᤧᤸᤗᤧ ᤑᤧᤳᤗᤠ᤺ᤴᤍᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤢ॥ ᤁᤖ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤐᤡᤳ ᤁᤶᤛᤧ ᤔᤧᤒᤣᤀᤠᤱ ᤔᤧᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤜᤡᤶᤔᤥ ᤔᤧᤴᤏᤢ᤺ᤱ ᤔᤧᤴᤍᤠᤀᤣ ᤌᤠᤖᤡᤰ ᤂᤢᤏᤧ᤹ ᤛᤫᤠ᤺ᤳ ᤕᤢᤅᤧ॥ 6 ᤂᤧᤒᤩᤠᤱ ᤛᤁᤣᤔᤧᤸᤗᤧ ᤁᤢᤶᤒᤠ ᤜᤔᤥᤖᤧᤴ ᤕᤠᤁᤢᤒᤖᤧ ᤁᤢᤜᤡᤶᤔᤥ ᤋᤠ᤹ᤈᤧᤱᤛᤧ ᤑᤧᤖᤧ॥ 7 ᤀᤠᤸᤗ ᤕᤠᤁᤢᤒᤖᤧ ᤁᤢᤛ᤻ᤛᤠᤜᤠ᤹ᤖᤧ ᤌᤣ ᤐᤥ᤺ᤰᤂᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤏᤢᤔᤧ᤺ᤴᤏᤣ ᤐᤡᤳ ᤆᤠᤖᤠᤶᤔᤠ ᤋᤧᤴᤏᤥᤗᤠᤶ ᤔᤧᤏᤢ᤺ᤰᤂᤧ ᤔᤧᤍᤩᤧ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤢᤃᤧᤀᤠᤱ ᤂᤢᤴᤇᤡ᤹ ᤛᤡᤰ ᤐᤥᤃᤧᤀᤠᤱ ᤘᤕᤧ. ᤌᤣᤀᤠᤱᤓᤧᤸᤗᤧ ᤛᤁᤣᤔᤧᤸᤗᤧ ᤕᤠᤁᤢᤒᤖᤧ ᤁᤢᤛ᤻ᤛᤠᤴ ᤑᤧᤳᤗᤠ᤺ᤴᤍᤢᤀᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤏᤧᤒᤥ ᤋᤣᤛᤢᤀᤠᤱ ᤘᤕᤧ॥ ᤀᤰᤋᤱᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤴᤏᤢ᤹ᤔᤏᤠᤒᤠ ᤘᤕᤧ॥ 8 ᤁᤖ ᤜᤔᤥᤖᤧᤴ ᤂᤧᤱᤜᤠ᤹ᤏᤢ ᤀᤰᤂᤣᤗ᤹ᤖᤡᤰ ᤋᤠ᤹ᤈᤧᤰᤂᤧ. “ᤀᤠᤛ᤻ᤛᤠ ᤛᤁᤣᤔᤧᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤂᤧᤏᤧ᤹ ᤁᤧᤛ᤻ᤛᤠ ᤔᤧᤴᤇᤢᤔᤠᤴ ᤗᤧᤵᤔᤠᤱ ᤀᤡᤃᤣ᤺ᤰᤁᤠᤱ ᤐᤳ॥ ᤀᤠᤛ᤻ᤛᤠᤴ ᤍᤡᤏᤠ᤺ᤴᤏᤢ ᤔᤣ᤺ᤰᤂᤡᤶ ᤔᤧᤵᤔᤠ ᤀᤠᤓᤠ᤺ᤰᤋᤧ᤹॥ 9 ᤂᤡᤏᤡ᤹ ᤀᤠᤏᤡᤃᤧᤏᤢ ᤋᤧᤴᤎᤠᤶ ᤔᤣ᤺ᤰᤂᤡᤶ ᤆᤥᤃᤧᤶᤔᤧ᤹॥ ᤂᤡᤏᤡ᤹ ᤔᤧᤴᤇᤢᤔᤠ ᤛᤠᤜᤠ᤹ ᤀᤠᤏᤡᤃᤣ ᤀᤠᤒᤡᤖᤧ᤹ ᤜᤧᤰᤁᤩᤠᤱ ᤀᤠᤏᤡᤃᤣ ᤔᤧᤴᤇᤢᤔᤠ ᤛᤠᤜᤠ᤹ ᤂᤡᤏᤡ᤹ ᤗᤠᤃᤡ ᤋᤣ᤹ᤖᤠᤶᤛᤡᤶᤔᤧ᤹॥ 10 ᤂᤡᤏᤡ᤹ ᤀᤠᤏᤡᤃᤧᤏᤢ ᤕᤢᤱᤔᤠ ᤁᤧᤛᤢᤰᤋᤡ᤹. ᤜᤧᤰᤁᤩᤠᤱ ᤁᤴ ᤗᤠᤈᤣᤴ ᤂᤡᤏᤡ᤹ ᤀᤥᤃᤵ ᤆᤥᤃᤧᤶᤔᤧ᤹॥ ᤂᤡᤏᤡ᤹ ᤁᤵᤔᤥᤀᤣ ᤕᤢᤅᤧᤶᤔᤧ᤹. ᤁᤵᤔᤥᤀᤣ ᤗᤧᤱᤜᤱ ᤆᤥᤃᤧᤶᤔᤧ᤹ ᤜᤧᤰᤁᤩᤠᤱ ᤗᤠᤈᤣ᤹ᤛᤡᤱᤒᤢᤱ ᤀᤡᤅᤠᤶᤔᤧ᤹॥” 11 ᤂᤧᤒᤩᤠᤱ ᤛᤁᤣᤶᤔᤧᤸᤗᤧᤀᤠᤱ ᤍᤡᤏᤠᤖᤧ ᤁᤢᤶᤒᤠ ᤏᤢ ᤁᤢᤶᤓᤢ᤹ᤛᤡ ᤔᤧᤳᤋᤢᤛᤡ. “ᤂᤡᤏᤡ᤹ ᤕᤠᤵᤔᤡ ᤗᤢᤱᤔᤠ᤹ ᤀᤠᤍᤢᤰᤋᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤆᤩᤠ ᤁᤧᤏᤠ᤺ᤰᤋᤢᤶᤛᤠᤱ ᤀᤠᤱᤃᤠ᤹ ᤐᤡᤏᤡᤱ॥ 12 ᤔᤣ᤺ᤰᤂᤡᤶᤗᤧ ᤗᤠᤃᤡ ᤀᤠᤓᤩᤠᤖᤡᤰ ᤕᤠᤱ ᤁᤧᤛᤡᤰᤛᤢᤶᤛᤠᤱ ᤀᤠᤱᤃᤠ᤹ ᤐᤡᤏᤡᤱ॥ ᤂᤧᤴ ᤛᤡᤛᤠᤍᤡᤱ ᤔᤧᤴᤇ᤻ᤕᤠ᤺ᤴᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠᤖᤰ ᤀᤠᤒᤡᤖᤧ᤹ᤀᤥ॥” 13 ᤛᤁᤣᤔᤧᤸᤗᤧ ᤂᤢᤴᤇᤡ᤹ ᤏᤢᤛᤠ᤹ ᤍᤡᤏᤠᤴ ᤑᤧᤳᤗᤠ᤺ᤴᤍᤢᤒᤠᤸᤗᤧ ᤆᤥᤃᤢᤸᤗᤧ ᤕᤠᤁᤢᤒᤖᤧ ᤁᤢᤛ᤻ᤛᤠᤜᤠ᤹ ᤛᤁᤣᤔ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤶᤒᤠ ᤜᤔᤥᤖᤧᤴᤏᤢ ᤀᤡᤱᤗᤧᤰ ᤐᤠᤴ ᤔᤧᤒᤠᤖᤧ॥ 14 ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢᤛᤡ. “ᤜᤷᤍᤥ ᤔᤧᤴᤜᤧᤰᤁᤣᤒᤠ ᤔᤏᤠᤴ ᤀᤠᤏᤡᤃᤣ ᤏᤢᤛᤠ᤹ᤀᤡᤴ ᤐᤡᤔᤠ ᤔᤧᤛᤢᤰᤋᤢᤶᤒᤧᤴ॥ ᤌᤣᤀᤠᤱᤓᤧᤸᤗᤧ ᤜᤧᤰᤁᤣ ᤆᤥᤃᤢᤶᤒᤧᤸᤗᤧᤃ ᤀᤠᤏᤡᤃᤣ ᤆᤠ᤺ᤳᤌᤡ ᤐᤣᤰ॥ 15 ᤁᤖ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤀᤠᤏᤡᤃᤣ ᤗᤳᤇᤠ ᤐᤠ᤺ᤴᤏᤥᤖᤰ ᤋᤧᤴᤍᤡᤃᤧ. ᤂᤡᤏᤡ᤹ᤀᤠᤱ ᤕᤧᤶᤒᤡᤳᤇᤠ ᤁᤧᤖᤧᤰᤗᤧ ᤀᤠᤏᤡᤃᤣ ᤜᤧᤰᤁᤣ ᤜᤷᤍᤥ ᤁᤧᤜᤧᤃᤢᤶᤗᤀᤣ ᤐᤥᤱ॥ 16 ᤂᤧᤒᤩᤠᤱᤗᤰ ᤀᤠᤏᤡᤃᤣ ᤔᤧᤴᤇᤢᤔᤠ ᤛᤠᤜᤠ᤹ ᤂᤡᤏᤡ᤹ ᤐᤡᤏᤧᤳᤇᤡᤃᤧ॥ ᤜᤧᤰᤁᤩᤠᤱ ᤀᤠᤏᤡᤃᤣ ᤂᤡᤏᤡ᤹ ᤔᤧᤴᤇᤢᤔᤠ ᤛᤠᤜᤠ᤹ ᤋᤣ᤹ᤖᤢᤶᤛᤡᤶᤒᤧᤀᤠᤱ ᤂᤡᤏᤡ᤹ᤏᤢ ᤗᤳᤇᤠ ᤛᤢᤘᤠᤱ ᤐᤥ᤺ᤰᤂᤡᤃᤧᤀᤠᤱ ᤂᤡᤏᤡ᤹ᤏᤢ ᤛᤥᤖᤡᤰ ᤕᤢᤅᤡᤃᤧ॥ 17 ᤁᤖ ᤀᤠᤏᤡᤃᤣ ᤐᤠ᤺ᤴᤏᤡᤴ ᤁᤧᤱᤄᤧᤵᤛᤢᤶᤔᤡᤴᤏᤠᤱ ᤜᤷᤍᤥ ᤜᤧᤰᤔᤠ ᤁᤧᤴᤍᤧᤴᤍᤡᤴᤏᤧᤑᤠᤃᤪ ᤀᤠᤏᤡᤃᤣ ᤏᤢᤛ᤻ᤛᤠ᤹ᤀᤡᤴ ᤋᤣ᤹ᤖᤢᤶᤒᤧᤀᤠᤱ ᤐᤣᤃᤡᤃᤧ॥” 18 ᤜᤔᤥᤖ ᤏᤢ ᤛᤁᤣᤔᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤂᤧᤶᤔᤠ ᤋᤧᤴᤍᤧᤳᤇᤡ॥ 19 ᤂᤧᤴ ᤌᤠᤱᤒᤧᤴᤏᤡᤸᤗᤧ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤜᤧᤰᤁᤣ ᤆᤥ᤺ᤰᤔᤠ ᤔᤡᤛᤠᤰᤁᤠᤱ ᤔᤧᤛᤢᤛᤧᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤕᤠᤁᤢᤒᤖᤧ ᤁᤢᤛ᤻ᤛᤠ ᤍᤡᤏᤠᤴ ᤏᤠᤏᤢ᤹ᤖᤢᤀᤠᤱ ᤘᤕᤧ॥ ᤂᤢᤏᤧ᤹ᤃ ᤁᤢᤶᤒᤠᤖᤧ ᤁᤢᤜᤡᤶᤛᤕᤱᤅᤥ ᤁᤧᤖᤧᤰᤏᤢ᤺ᤸᤗᤧ ᤀᤡᤱᤎᤠᤱᤛᤠᤒᤠ ᤆᤥᤃᤧ॥ 20 ᤂᤧᤸᤗᤧᤆᤥᤃᤢᤸᤗᤧ ᤜᤔᤥᤖᤧᤴ ᤏᤢ ᤁᤢᤛ᤻ᤛᤠ ᤛᤁᤣᤶᤔᤡᤴ ᤕᤧᤰᤕᤰᤁᤥᤒᤠ ᤔᤠ ᤗᤠᤶᤎᤣ᤺ᤵᤐᤥ ᤐᤣᤛᤡ ᤜᤧᤰᤁᤩᤠᤱ ᤂᤢᤴᤇᤡ᤹ ᤕᤧᤰᤕᤰᤁᤥ ᤁᤧᤕᤢᤱᤒᤠᤜᤠ᤹ ᤀᤰᤂᤣ ᤔᤧᤳᤋᤧᤇᤢᤛᤡ. 21 “ᤁᤱ ᤔᤏᤠᤜᤠ᤹ ᤀᤠᤏᤡ᤹ᤏᤢ ᤀᤠᤍᤱᤍᤱᤒᤠ ᤔᤧᤈᤥᤰ॥ ᤂᤧᤱᤜᤠ᤹ ᤀᤠᤏᤡ᤹ ᤗᤠᤈᤣ᤹ᤀᤥ ᤔᤧᤕᤢᤱᤅᤠᤱ ᤗᤧᤱᤜᤱ ᤔᤧᤈᤥ᤺ᤰᤗ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤕᤥ᤹ᤒᤠ ᤛᤡᤱᤒᤢᤱᤀᤠᤱ ᤏᤧ᤹᤺॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠ ᤔᤧᤴᤇᤢᤔᤠᤜᤠ᤹ ᤀᤠᤏᤡ᤹ ᤋᤣ᤹ᤖᤢᤶᤛᤡᤶ ᤜᤧᤰᤁᤩᤠᤱ ᤀᤠᤏᤡ᤹ ᤛᤠ ᤔᤧᤴᤇᤢᤔᤠᤜᤠ᤹ ᤂᤢᤴᤇᤡ᤹ ᤐᤡᤖᤢᤶᤛᤡᤶ॥ 22 ᤁᤖ ᤂᤧᤴ ᤔᤏᤠᤜᤠ᤹ ᤀᤠᤏᤡ᤹ᤏᤢ ᤗᤳᤇᤠ ᤛᤢᤘᤠᤱ ᤜᤧᤰᤁᤣ ᤐᤥᤱᤔᤠᤀᤠᤱ ᤕᤢᤱᤔᤠᤖᤧ ᤗᤠᤃᤡ ᤗᤳᤇᤠ ᤐᤠ᤺ᤴᤏᤥᤖᤰ ᤔᤧᤍᤧᤴ. ᤂᤧᤱᤃ ᤂᤧᤱᤜᤠ᤹ ᤜᤧᤰᤁᤣ ᤀᤠᤏᤡ᤹ᤀᤥ ᤁᤧᤖᤧᤰ ᤕᤧᤶᤒᤡᤇᤠᤜᤠ᤹ᤖᤧ ᤜᤷᤍᤥ ᤔᤧᤜᤧᤃᤢᤖᤀᤣ ᤐᤥᤱ॥ 23 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤡᤳᤔᤧ᤺ᤴᤍᤠᤜᤠ᤹ ᤜᤧᤰᤁᤩᤠᤱ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤃᤳᤋᤢᤛᤡᤒᤠ ᤘᤣ᤹ ᤌᤰᤛᤠᤜᤠ᤹ ᤀᤠᤏᤡ᤹ᤀᤡᤴ ᤔᤧᤒᤥᤱᤏᤧᤴᤒᤡ᥅ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴᤗᤰ ᤆᤥ᤺ᤰᤔᤠ ᤋᤧᤴᤍᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤏᤡ᤹ᤏᤢ ᤔᤧᤕᤢᤱ॥” 24 ᤕᤧᤰᤕᤰᤁᤡᤸᤗᤧ ᤔᤠ ᤗᤠᤶᤎᤣ᤺ᤵᤐᤥ ᤁᤧᤈᤢᤶᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤜᤔᤥᤖᤧᤴ ᤏᤢ ᤁᤢᤛ᤻ᤛᤠ ᤛᤁᤣᤶᤔᤧᤸᤗᤧ ᤔᤧᤳᤋᤧᤇᤢᤛᤡᤒᤠ ᤐᤠ᤺ᤴᤏᤡᤴ ᤂᤧᤶᤔᤠ ᤔᤧᤍᤧᤴᤍᤧ॥ ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤁᤧᤖᤧᤰ ᤕᤧᤶᤒᤡᤇᤠᤛᤠᤜᤠ᤹ᤖᤧ ᤜᤷᤍᤥ ᤔᤧᤜᤧᤃᤢ॥ 25 ᤛᤢᤶᤕᤧᤴ ᤀᤣᤃᤠᤱ ᤜᤷᤍᤥ ᤔᤧᤜᤧᤃᤢᤒᤠ ᤕᤠᤶ ᤋᤢᤰᤔᤠᤸᤗᤧ ᤂᤧᤱᤜᤠ᤹ ᤆᤠ᤹ᤖᤡᤰ ᤕᤠ᤺ᤴᤍᤢᤛᤡᤀᤠᤱ ᤔᤧᤏᤧᤛ᤻ᤛᤧ. ᤜᤧᤰᤁᤣ᤺ᤸᤗᤧ ᤕᤠᤁᤢᤒᤖᤧ ᤁᤢᤛ᤻ᤛᤠᤜᤠ᤹. ᤍᤡᤏᤠᤖᤧ ᤁᤢᤶᤓᤢ᤹ ᤏᤧᤵᤑᤢ ᤛᤡᤔᤡᤕᤥᤏ ᤏᤢ ᤗᤧᤒᤡ᤺ᤸᤗᤧ ᤀᤠᤒᤠᤅᤣ ᤂᤢᤴᤇᤡ᤹ ᤋᤠᤓᤣᤜᤠ᤹ ᤕᤠᤱᤏᤧᤇᤡᤀᤠᤱ ᤛᤫᤠ᤺ᤳᤋᤠᤱ ᤕᤧᤰᤕᤰᤁᤥ ᤗᤠᤛᤧᤇᤡ ᤜᤧᤰᤁᤩᤠᤱ ᤁᤧᤖᤧᤰ ᤕᤧᤶᤒᤡᤳᤇᤠᤜᤠ᤹ ᤆᤩᤧᤵᤋᤢ ᤛᤧᤖᤧᤇᤢᤛᤡ॥ 26 ᤂᤧᤴ ᤏᤧᤵᤑᤢᤖᤧ ᤜᤔᤥᤖᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠ ᤛᤁᤧᤶᤔᤡᤴᤏᤠᤱ ᤋᤠᤓᤣ᤺ᤸᤗᤧ ᤆᤩᤧᤵᤋᤧᤇᤢ ᤛᤧᤖᤧᤇᤢᤛᤡ. ᤜᤧᤰᤁᤩᤠᤱ ᤛᤁᤣᤶᤔᤡᤸᤗᤧ ᤁᤢᤜᤡᤶᤔᤥᤗᤠᤶ ᤍᤡᤏᤠᤴ ᤗ᤺ᤳᤋᤧᤇᤢ ᤋᤣ᤹ᤖᤧᤇᤢ॥ 27 ᤜᤧᤰᤁᤩᤠᤱ ᤕᤠᤁᤢᤒᤖᤧ ᤘᤣ᤹ ᤁᤢᤛ᤻ᤛᤠᤜᤠ᤹ ᤁᤧᤛᤡᤒᤠᤜᤠ᤹ᤖᤧ ᤂᤢᤏᤡ᤹ ᤕᤧᤰᤕᤰᤁᤥ ᤔᤧᤒᤣᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤆᤡᤃᤰᤘᤠᤜᤠ᤹ ᤛᤩᤠᤰ ᤘᤕᤠᤰ ᤔᤧᤏᤠᤵᤋᤢᤛᤡ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤢᤛ᤻ᤛᤠ᤹ᤀᤡᤴ ᤑᤧᤳᤔᤧᤗᤠ᤺ᤴᤍᤢᤀᤠᤱ ᤘᤕᤧ॥ 28 ᤂᤧᤱᤜᤠ᤹ᤖᤧ ᤐᤡᤳ ᤔᤧ᤺ᤴᤍᤠ. ᤌᤰᤛᤠᤗᤢᤵᤜᤠ᤹. ᤀᤍᤱᤜᤠ᤹ ᤔᤧᤍᤣ᤹ᤖᤢᤛᤡ ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤏᤢ ᤗᤠ᤺ᤰᤁᤠᤳ ᤐᤩᤠᤱᤛᤡᤀᤥᤒᤠ ᤌᤣᤀᤠᤱ ᤔᤧᤴᤏᤴᤇᤢᤴ॥ 29 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤜᤠ᤹ ᤜᤡᤶᤎᤠ᤺ᤱᤜᤠ᤹ ᤔᤧᤏᤠᤵᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ ᤏᤢ ᤔᤣ᤺ᤳᤜᤠ᤹ᤀᤠᤱ ᤐᤢᤱᤗᤠᤎᤠᤒᤠ ᤜᤧᤰᤁᤣ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡ॥ 30 ᤂᤧᤒᤩᤠᤱ ᤕᤠᤁᤢᤒᤖᤧ ᤛᤡᤔᤡᤕᤥᤏ ᤏᤢ ᤗᤧᤒᤡᤴ ᤔᤧᤳᤋᤢᤛᤡ. “ᤀᤠᤏᤡ᤹ ᤀᤠᤕᤢᤱᤒᤠ ᤁᤏᤠᤏᤡ ᤏᤢ ᤐᤖᤡᤈ᤻ᤈᤡᤜᤠ᤹ᤖᤧ ᤂᤢᤏᤡ᤹ ᤁᤴ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤋᤠᤵᤑᤧ᤺ᤶᤒᤠ ᤐᤥ᤺ᤰᤂᤠᤱᤗ ᤁᤧᤈᤥᤃᤧᤇᤢᤀᤠᤱ ᤀᤠᤱᤃᤠ᤹ ᤁᤧᤛᤠᤰᤐᤥ ᤌᤩᤠᤱᤗ ᤕᤠᤵᤔᤡ ᤁᤧᤕᤠ᤺ᤴᤍᤧᤇᤡ॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤔᤡᤛᤠᤰᤗᤰ ᤔᤧᤘᤠ᤹॥ ᤂᤧᤱᤜᤠ᤹ ᤁᤧᤖᤧᤰ ᤔᤧᤓᤢᤱᤛᤡᤱᤅᤠᤱ ᤀᤠᤱᤃᤠ᤹ ᤔᤧᤛ᤹ᤀᤠᤀᤠᤱ ᤋᤧᤴᤎᤱ ᤔᤧᤈᤥᤃᤢᤸᤗᤧᤃ ᤀᤠᤱᤃᤠ᤹ ᤀᤠᤜᤡᤶᤔᤥᤒᤠ ᤁᤧᤖᤧᤰ ᤌᤠᤵᤐᤢ ᤌᤩ᤺ᤱ ᤔᤧᤈᤥᤃᤡᤃᤧᤖᤥ॥” 31 ᤁᤖ ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤇᤢ. “ᤂᤧᤸᤗᤧ ᤀᤠᤏᤡᤃᤣ ᤏᤢᤛᤠ᤹ᤀᤡᤴ ᤕᤧᤶᤒᤠ ᤁᤧᤃᤥ᤺ᤵᤔᤠ ᤜᤧᤰᤁᤣ ᤁᤧᤳᤏᤡᤔᤠ ᤆᤥ᤺ᤰᤔᤠ ᤏᤢ᤹ᤒᤡ᥅” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.