ᤋᤥᤗᤡᤱᤛᤥᤔᤢ 33 - LIFOTNT

ᤕᤠᤁᤢᤒᤖᤧ ᤀᤣᤛᤠᤒᤧᤴ ᤋᤢᤔᤢ᤹

¹ ᤕᤠᤁᤢᤒᤧᤸᤗᤧ ᤀᤰᤂᤣ ᤀᤥᤔᤧᤳᤋᤢᤸᤗᤧ ᤀᤣᤛᤠᤒᤧᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤛᤥᤖᤡᤰ ᤁᤡᤵ ᤗᤡᤛᤡ ᤔᤏᤠᤜᤠ᤹ ᤔᤧᤓᤧᤖᤧᤖ ᤔᤧᤒᤳᤇᤧᤒᤠ ᤏᤡᤛᤢᤛᤡ॥ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤗᤡᤀᤠ ᤏᤢ ᤖᤠᤜᤣᤗ ᤜᤧᤰᤁᤩᤠᤱ ᤏᤧᤳᤇᤡ ᤂᤢᤴᤇᤡ᤹ ᤛᤧᤘᤠᤖᤥᤔᤠᤜᤠ᤹ᤖᤧ ᤂᤢᤏᤡ᤹ ᤁᤶᤒᤪᤠᤱᤅᤥ ᤁᤢᤛ᤻ᤛᤠᤜᤠ᤹ ᤛᤧᤴᤍᤢᤛᤡ॥

² ᤂᤢᤏᤧ᤹ ᤁᤢᤛᤧᤘᤠᤖᤥᤔᤠᤜᤠ᤹ ᤏᤢ ᤂᤢᤴᤇᤡ᤹ ᤛᤠᤜᤠ᤹ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤗᤠᤶᤗᤥᤛᤢᤛᤡ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤣᤃᤠᤱ ᤗᤡᤀᤠ᤺ᤴ ᤏᤢ ᤁᤢᤛ᤻ᤛᤠᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤖᤠᤜᤣᤗ ᤏᤢ ᤕᤢᤛᤢᤑᤧᤴ ᤑᤳᤇᤢᤛᤡ॥

³ ᤂᤢᤏᤧ᤹ ᤀᤠᤒᤠᤅᤣᤃ ᤁᤢᤶᤓᤢ᤹ᤖᤧ ᤁᤢᤒᤣᤛᤠᤱ ᤁᤧᤖᤧᤸᤗᤧ ᤂᤧᤱᤜᤠ᤹ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤗᤠᤶᤗᤥᤛᤡᤱᤅᤠᤱ ᤏᤢᤛᤡᤗᤧᤱ ᤛᤠᤶᤒᤥᤴ ᤜᤒᤳᤋᤠᤱ ᤛᤧᤘᤠ ᤔᤕᤧᤖ ᤐᤣ॥

⁴ ᤁᤖ ᤀᤣᤛᤠᤒᤧᤴ ᤕᤠᤁᤢᤒᤧᤸᤗᤧ ᤁᤢᤍᤢᤶᤛᤧ ᤗᤥ᤺ᤰᤋᤧᤖ ᤑᤧᤖᤧ ᤜᤧᤰᤁᤩᤠᤱ ᤂᤧᤴ ᤜᤧᤵᤐᤪᤧᤰ ᤜᤧᤵᤋᤢ. ᤂᤧᤒᤩᤠᤱ ᤁᤢᤛᤠ᤺ᤱᤓᤣ᤹ᤀᤥ ᤂᤡᤶᤛᤡᤱᤅᤠᤱ ᤂᤢᤏᤧ᤹ ᤆᤢᤵ ᤔᤧᤳᤋᤢ ᤜᤧᤰᤁᤩᤠᤱ ᤂᤧᤱᤜᤠ᤹ ᤏᤧᤵᤔᤈᤠᤱ ᤛᤠ᤹ᤖᤡᤰ ᤜᤠᤒᤧᤇᤡ॥

⁵ ᤂᤧᤒᤩᤠᤱ ᤀᤣᤛᤠᤒᤧᤴ ᤀᤰᤂᤣ ᤀᤥᤔᤕᤧᤸᤗᤧ ᤔᤧᤴᤇᤢᤔᤠᤜᤠ᤹ ᤏᤢ ᤜᤡᤴᤈᤠ᤹ ᤐᤡᤳᤇᤠ᤹ᤜᤠ᤹ ᤏᤡᤛᤢᤛᤡᤀᤠᤱ ᤔᤧᤳᤋᤢ. “ᤂᤧᤏᤧ᤹ᤏᤢ ᤁᤧᤘᤠ᤹ᤒᤠ ᤁᤧᤘᤠ᤹ᤔᤠ ᤁᤴ ᤕᤠᤵᤔᤡᤜᤠ᤹ ᤜᤠ᤺ᤳᤇᤡᤏᤡᤒᤣ᥅” ᤕᤠᤁᤢᤒᤖᤧ ᤏᤢᤃᤵ ᤐᤡᤖᤢ. “ᤏᤡᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤴ ᤗᤢᤱᤔᤠ᤹ ᤋᤢᤰᤋᤢᤀᤠᤱ ᤐᤡᤖᤢᤒᤠ ᤜᤡᤴᤈᤠ᤹ᤛᤡᤖᤥ॥”

⁶ ᤂᤧᤒᤩᤠᤱ ᤛᤧᤘᤠᤖᤥᤔᤠᤜᤠ᤹ ᤏᤢ ᤂᤢᤴᤇᤡ᤹ ᤛᤠᤜᤠ᤹ ᤏᤡ᤺ᤳᤋᤠᤱ ᤔᤧᤓᤧᤖᤧ ᤜᤧᤰᤁᤩᤠᤱ ᤀ᤺ᤰᤂᤢᤶ ᤔᤧᤓᤴᤇᤡᤱᤅᤠᤱ ᤀᤣᤛᤠᤒᤧᤴ ᤛᤧᤘᤠ ᤔᤧᤔᤧᤳᤋᤢ॥

⁷ ᤂᤧᤴ ᤀᤣᤃᤠᤱ ᤗᤡᤀᤠ᤺ᤴ ᤏᤢ ᤁᤢᤛ᤻ᤛᤠᤜᤠ᤹ ᤔᤧᤓᤧᤖᤧᤀᤠᤱ ᤛᤧᤘᤠ ᤔᤧᤔᤧᤳᤋᤢ॥ ᤁᤧᤖᤧᤰᤏᤢ᤺ᤸᤗᤧ ᤕᤠᤱᤛᤡ ᤕᤢᤛᤢᤑᤧᤴ ᤏᤢ ᤖᤠᤜᤧᤗᤧᤴ ᤑᤧᤖᤧᤇᤡ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤀᤠᤱ ᤛᤧᤘᤠ ᤔᤧᤳᤋᤧᤇᤢ॥

⁸ ᤀᤣᤛᤠᤒᤧᤸᤗᤧ ᤕᤠᤁᤢᤒᤧᤴ ᤛᤣ᤺ᤴᤗᤠᤵᤋᤢ. “ᤀᤠᤱᤃᤠ᤹ ᤑᤧᤖᤠᤱᤅᤡᤸᤗᤧ ᤗᤠᤶᤔᤥ ᤋᤢᤔᤢᤱᤛᤡᤱᤒᤠ ᤁᤴ ᤌᤰᤛᤠᤗᤢᤵᤜᤠ᤹ ᤌᤣᤀᤠᤱ ᤁᤧᤒᤠᤱᤄᤢ ᤁᤧᤓᤧᤴᤇᤢᤛᤡᤒᤠᤒᤣ᥅” ᤕᤠᤁᤢᤒᤖᤧ ᤏᤢᤃᤵ ᤐᤡᤖᤢ. “ᤀᤠᤍᤠᤱᤒᤣ ᤂᤧᤱᤜᤠ᤹ᤃ ᤂᤧᤏᤧ᤹ ᤗᤢᤱᤔᤠ᤹ ᤁᤧᤍᤢᤰᤁᤠᤖ ᤑᤠ᤹ᤀᤠᤱ ᤔᤡᤰᤋᤥᤰ ᤛᤢᤱ ᤑᤧᤳᤋᤢᤱᤛᤡᤱᤒᤠᤖᤥ॥”

⁹ ᤁᤖ ᤀᤣᤛᤠᤒᤧᤸᤗᤧ ᤏᤥᤃᤵ ᤐᤡᤖᤢ. “ᤀᤠᤴᤛᤠ᤹ᤀᤣ. ᤀᤠᤱᤃᤠ᤹ ᤀᤠᤗᤠᤃᤡ ᤁᤧᤕᤥᤒᤠ ᤁᤳᤋᤢᤱᤛᤡᤱ॥ ᤂᤧᤏᤧ᤹ ᤁᤧᤃᤳᤋᤢᤛᤡᤒᤠᤜᤠ᤹ ᤂᤧᤏᤧ᤹ᤀᤣ ᤁᤳᤋᤧᤛᤧ᤹॥”

¹⁰ ᤕᤠᤁᤢᤒᤧᤸᤗᤧ ᤔᤧᤳᤋᤢ. “ᤔᤣ᤺ᤴᤗᤥ. ᤂᤧᤏᤧ᤹ ᤁᤧᤛᤡᤖᤠ᤹ ᤌᤠᤱᤅᤠᤏᤣ ᤑᤠᤃᤪ ᤀᤠᤜᤢᤰᤁᤥᤗᤠᤶ ᤁᤴ ᤔᤡᤰᤋᤥᤰ ᤛᤢᤱᤜᤠ᤹ ᤋᤠ᤺ᤰᤋᤧ᤹ᤀᤥ॥ ᤂᤧᤏᤧ᤹ ᤏᤢᤖᤡᤰᤁᤠᤱ ᤗᤠᤱ ᤁᤧᤍᤠ᤺ᤰᤋᤠᤱ॥ ᤛᤧᤰᤂᤠᤀᤣ ᤂᤧᤏᤧ᤹ ᤋᤢᤶᤏᤧᤸᤗᤧ ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤢᤔᤢᤱᤒᤠ ᤜᤧᤰᤁᤣ ᤐᤥ᤺ᤰᤂᤧᤖᤥ॥

¹¹ ᤂᤧᤏᤧ᤹ᤀᤣ ᤁᤧᤗᤠᤃᤡ ᤑᤠ᤹ᤀᤠᤱ ᤜᤢ᤹ᤏᤧᤒᤠ ᤔᤡᤰᤋᤥ᤺ᤰᤁᤡᤴ ᤋᤠ᤺ᤰᤋᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧᤖᤥ॥ ᤀᤠᤱᤃᤠ᤹ ᤀᤠᤗᤠᤃᤡ ᤁᤧᤕᤥᤒᤠ ᤁᤳᤋᤢᤱ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤏᤢᤖᤡᤰ ᤔᤧᤳᤋᤠᤱᤅᤠᤱ ᤘᤠ᤹॥” ᤁᤶᤓᤗ᤹ᤖᤡᤰ ᤕᤠᤁᤢᤒᤖᤧ ᤕᤧ᤺ᤰᤁᤠᤱ ᤕᤧ᤺ᤰ ᤔᤧᤳᤋᤢᤒᤠᤸᤗᤧ ᤆᤥᤃᤢᤸᤗᤧ ᤀᤣᤛᤠᤒᤖᤧ ᤂᤧᤴ ᤔᤡᤰᤋᤥᤰ ᤛᤢᤱᤅᤡᤴ ᤋᤠ᤺ᤰᤋᤢ॥

¹² ᤂᤧᤒᤩᤠᤱ ᤀᤣᤛᤠᤒᤧᤸᤗᤧ ᤔᤧᤳᤋᤢ. “ᤀᤠᤸᤗ ᤀᤠᤏᤡ᤹ ᤌᤠᤀᤠᤛᤡ॥ ᤀᤠᤱᤃᤠ᤹ ᤂᤡᤏᤡ᤹ ᤗᤠᤶᤗᤥᤏᤡᤱ॥”

¹³ ᤁᤖ ᤕᤠᤁᤢᤒᤧᤸᤗᤧ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤏᤡᤛᤢᤀᤠᤱᤅᤣ ᤁᤧᤘᤠ᤹ᤖᤥ. ᤁᤴ ᤜᤡᤴᤈᤠ᤹ ᤐᤡᤳᤇᤠ᤹ᤜᤠ᤹ ᤔᤧᤈᤢ᤺ᤰ ᤜᤧᤰᤁᤩᤠᤱ ᤛᤠᤘᤠᤔᤠ ᤌᤰᤛᤠᤜᤠ᤹ ᤏᤢᤖᤡᤰ ᤀᤥᤔᤧᤵᤔᤠᤛᤡ ᤐᤥᤱ॥ ᤂᤧᤱᤜᤠ᤹ ᤌᤡᤰ ᤕᤧᤴᤎᤡᤰ ᤆᤩᤖᤡᤰ ᤗᤠᤱᤄᤣ᤺ᤱᤔᤠᤛᤡᤸᤗᤧ ᤁᤧᤖᤧᤰ ᤔᤧᤛᤡᤒᤡᤗᤠ॥

¹⁴ ᤂᤧᤸᤗᤧᤆᤥᤃᤢᤸᤗᤧ ᤀᤠᤍᤠᤱᤒᤠᤴ ᤐᤣᤗᤡ ᤑᤠᤰᤏᤧ. ᤂᤧᤏᤧ᤹ᤀᤣ ᤀᤠᤏᤡᤃᤧᤏᤢ᤺ᤸᤗᤧ ᤋᤃᤡ ᤐᤣᤃᤧ᤹ᤀᤥ॥ ᤀᤠᤱᤃᤠ᤹ ᤀᤠᤍᤃᤡ ᤁᤧᤒᤣ᤺ᤰᤐᤠ ᤌᤰᤛᤠᤜᤠ᤹ ᤜᤧᤰᤁᤩᤠᤱ ᤁᤴ ᤜᤡᤴᤈᤠ᤹ᤐᤡᤳᤇᤠ᤹ ᤗᤠᤱᤔᤧᤄᤣ᤺ᤰᤐᤠ ᤁᤢᤀᤡᤛᤡᤰ ᤛᤣᤀᤡᤖᤀᤥ ᤂᤧᤏᤧ᤹ ᤔᤧᤴᤍᤢᤶᤔᤣ ᤌᤠᤖᤡᤰ ᤀᤠᤱᤃᤠ᤹ ᤔᤛ᤻ᤛᤢᤀᤠᤱ ᤑᤧᤴᤏᤠᤖᤥ॥”

¹⁵ ᤀᤣᤛᤠᤒᤧᤸᤗᤧ ᤔᤧᤳᤋᤢ. “ᤜᤧᤰᤁᤣᤃᤪ ᤂᤧᤏᤧ᤹ ᤁᤧᤓᤠ᤹ᤛᤧ ᤁᤢᤓᤠ ᤀᤠᤔᤏᤠᤜᤠ᤹ ᤗᤧᤖᤢᤱᤎᤠᤱᤛᤡᤱ॥” ᤁᤖ ᤕᤠᤁᤢᤒᤖᤧ ᤔᤧᤳᤋᤢ. “ᤁᤴ ᤆᤠᤜᤠᤒ᤻ ᤔᤧᤈᤥ᤺ᤰᤁᤠᤴᤏᤠ॥ ᤂᤧᤏᤧ᤹ ᤗᤢᤱᤔᤠ᤹ᤖᤰ ᤁᤧᤍᤢᤰᤁᤠᤀᤠᤱᤃ ᤐᤥᤱ॥”

¹⁶ ᤂᤧᤸᤗᤧᤆᤥᤃᤢᤸᤗᤧ ᤜᤠᤒᤠ ᤂᤧᤴ ᤕᤧᤴᤏᤥ ᤀᤣᤛᤠᤒᤧᤴ ᤛᤣᤀᤡᤖ ᤗᤧᤵᤔᤠ ᤌᤠᤛᤡᤱ ᤐᤣ॥

¹⁷ ᤁᤖ ᤕᤠᤁᤢᤒᤧᤱᤃ ᤛᤢᤰᤁᤥᤋ ᤗᤧᤵᤔᤠᤱ ᤌᤠᤛᤡᤱ. ᤜᤧᤰᤁᤩᤠᤱ ᤀᤠᤒᤠᤅᤣ ᤂᤢᤏᤧ᤹ ᤁᤢᤗᤠᤃᤡ ᤜᤡᤶᤎᤡᤰ ᤏᤢ ᤁᤢᤎᤰᤛᤠᤜᤠ᤹ᤖᤧ ᤗᤠᤃᤡ ᤕᤠᤰᤔᤠᤜᤡᤶᤜᤠ᤹ ᤆᤥᤃᤢ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤛᤢᤰᤁᤥᤋ ᤐᤥ᤺ᤰᤂᤧᤖᤥ॥

¹⁸ ᤕᤠᤁᤢᤒᤧᤴ ᤐᤍ᤻ᤍᤏ ᤀᤠᤖᤠᤔᤗᤠᤶ ᤗᤠᤱᤄᤣᤃᤧ ᤐᤣᤀᤠᤱ ᤁᤏᤠᤏ ᤗᤠᤈᤣ᤹ᤀᤥᤒᤠ ᤛᤁᤣᤔ ᤕᤧᤰᤕᤰᤁᤥ ᤏᤢᤖᤡᤰᤁᤠᤱ ᤁᤧᤖᤧ. ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱ ᤛᤠ᤺ᤱᤃᤠᤜᤡᤶ ᤗᤣ᤺ᤳᤋᤢᤀᤠᤱ ᤕᤢᤱᤛᤡᤱ॥

¹⁹ ᤕᤠᤁᤢᤒᤖᤧ ᤂᤢᤏᤧ᤹ ᤛᤠ᤺ᤱᤃᤠᤜᤡᤶ ᤗᤣ᤺ᤳᤋᤢᤒᤠ ᤋᤧᤴᤏᤡᤴ ᤛᤁᤣᤔᤧᤸᤗᤧ ᤁᤢᤶᤒᤠ ᤜᤠᤔᤥᤖᤧᤸᤗᤧ ᤁᤢᤛ᤻ᤛᤠᤜᤠ᤹ᤗᤠᤶ ᤁᤡᤵ ᤌᤡᤰ ᤕᤢᤵᤐᤠ ᤕᤠᤱᤀᤡᤳᤇᤡ ᤁᤢᤔᤧᤸᤗᤢᤱ ᤁᤣ᤺ᤳᤋᤢᤀᤠᤱ ᤀᤡᤅᤢ॥

²⁰ ᤂᤧᤵᤔᤥ ᤂᤢᤏᤧ᤹ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤡᤰ ᤆᤥᤃᤢ ᤜᤧᤰᤁᤩᤠᤱ “ᤀᤧᤗ ᤀᤧᤗᤥᤜ ᤀᤡᤛᤪᤠᤀᤡᤗ” (ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱ) ᤔᤡᤱ ᤕᤢᤰᤂᤢᤖᤥ॥