ᤋᤥᤗᤡᤱᤛᤥᤔᤢ 32 - LIFOTNTᤕᤠᤁᤢᤒᤧᤴ ᤀᤣᤛᤠᤒᤖᤧ ᤁᤢᤍᤢᤶᤛᤧ ᤐᤣ᤺ᤰᤔᤠ ᤕᤠᤖᤡᤵ ᤐᤥᤱ᤹ 1 ᤕᤠᤁᤢᤒᤧᤴᤏᤠᤱ ᤁᤢᤜᤡᤶ ᤗᤧᤵᤔᤠᤱ ᤌᤠᤛᤡᤱ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤢᤔᤢ॥ 2 ᤕᤠᤁᤢᤒᤧᤸᤗᤧ ᤂᤧᤱᤜᤠ᤹ ᤏᤡᤛᤢᤛᤡᤀᤠᤱ ᤐᤠ᤺ᤳᤋᤢ. “ᤁᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤎᤰᤛᤢᤒᤠ ᤁᤢᤍᤢᤖᤠᤕᤰᤗᤥ᥄” ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤔᤜᤏᤥᤔ ᤔᤧᤳᤋᤢ॥ 3 ᤁᤢᤶᤓᤢ᤹ ᤀᤣᤛᤠᤒᤖᤧ ᤁᤢᤍᤢᤶᤛᤧ ᤀᤧᤍᤥᤔ ᤗᤠᤈᤣ᤹ᤀᤥᤒᤠ ᤛᤣᤀᤡᤖ ᤋᤧᤱᤃᤵᤐᤥ ᤕᤠᤁᤢᤒᤧᤸᤗᤧ ᤂᤢᤏᤧ᤹ᤏᤢ᤺ᤸᤗᤧ ᤋᤃᤡ ᤀᤡᤱᤄᤱ ᤁᤧᤛᤠᤒᤠᤜᤠ᤹ ᤐᤠᤱᤄᤢᤍᤣᤛᤢᤛᤡ॥ 4 ᤕᤠᤁᤢᤒᤧᤸᤗᤧ ᤂᤧᤱᤜᤠ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢᤛᤡ. “ᤀᤠᤱᤃᤠ᤹ ᤀᤠᤴᤍᤠᤱᤒᤠ ᤀᤣᤛᤠᤒᤧᤴ ᤀᤰᤂᤣ ᤔᤧᤳᤋᤧᤶᤔᤧ᤹. ᤁᤧᤛᤧᤘᤠᤖᤥᤒᤠ ᤕᤠᤁᤢᤒᤖᤧ ᤀᤰᤂᤣ ᤐᤠ᤺ᤳᤋᤢ. ‘ᤀᤠᤱᤃᤠ᤹ ᤗᤠᤒᤠᤏᤧᤴᤏᤢ ᤘᤕᤠᤱ ᤜᤧᤰᤁᤩᤠᤱ ᤀᤠᤸᤗ ᤌᤠᤖᤡᤰ ᤂᤢᤏᤧ᤹ᤏᤢ ᤘᤕᤠᤱ॥ 5 ᤀᤠᤱᤃᤠ᤹ ᤐᤡᤳᤜᤠ᤹. ᤀᤍᤱᤜᤠ᤹. ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ ᤜᤧᤰᤁᤩᤠᤱ ᤛᤧᤘᤠᤖᤥᤒᤠᤜᤠ᤹ ᤏᤢ ᤛᤧᤘᤠᤖᤥᤔᤠᤜᤠ᤹ ᤁᤳᤋᤢᤱᤛᤡᤱ᤹॥ ᤀᤠᤸᤗ ᤀᤠᤱᤃᤠ᤹ ᤀᤠᤴᤍᤠᤱᤒᤠᤸᤗᤧ ᤁᤢᤛᤡᤖᤠ᤹ᤌᤠᤱᤅᤠᤒᤡ ᤑᤠ᤹ᤀᤠᤱ ᤁᤴ ᤀᤡᤱᤄᤱᤅᤡᤴ ᤜᤠᤅᤢᤱᤒᤠᤖᤥ॥’” 6 ᤂᤧᤴ ᤀᤡᤱᤄᤱ ᤁᤧᤛᤠᤒᤠᤜᤠ᤹ ᤕᤠᤁᤢᤒᤖᤥ ᤔᤧᤏᤢ᤺ᤰᤛᤧ ᤔᤧᤓᤧᤖᤧᤀᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤏᤡᤃᤣ ᤐᤣ᤺ᤰᤔᤏᤠᤀᤠᤱ ᤁᤧᤶᤓᤢ᤹ ᤀᤣᤛᤠᤒᤧᤴ ᤋᤢᤶᤏᤠ. ᤜᤧᤰᤁᤩᤠᤱ ᤀᤠᤸᤗᤥ ᤂᤢᤏᤧ᤹ ᤁᤡᤵ ᤗᤡᤛᤡ ᤔᤏᤠᤜᤠ᤹ᤏᤢ ᤂᤧᤏᤧ᤹ ᤁᤧᤍᤢᤶᤛᤧ ᤑᤧᤴᤗ ᤐᤳ॥” 7 ᤜᤧᤰᤁᤣ᤺ᤸᤗᤧ ᤕᤠᤁᤢᤒᤧᤴ ᤛᤠ᤹ᤖᤡᤰ ᤁᤡᤛᤧᤀᤠᤱ ᤏᤡᤱᤛᤠᤶᤔᤥ ᤌᤩᤧ॥ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤁᤢᤗᤢᤵ ᤏᤧᤳᤇᤡᤀᤥ ᤑ᤺ᤰᤂᤢᤛᤡ ᤜᤧᤰᤁᤩᤠᤱ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹. ᤐᤡᤳᤜᤠ᤹. ᤜᤧᤰᤁᤩᤠᤱ ᤀᤢᤔᤣᤜᤠ᤹ᤀᤠᤱ ᤁᤢᤗᤢᤵ ᤏᤧᤳᤇᤡᤀᤥ ᤑ᤺ᤰᤂᤢᤛᤡ॥ 8 “ᤀᤣᤛᤠᤒᤧᤴ ᤑᤧᤴᤏᤠᤱ ᤗᤳᤇᤠ ᤗᤢᤵᤐᤥᤒᤠᤜᤠ᤹ ᤛᤧᤖᤢᤛᤡᤛᤠᤱ ᤘᤣ᤹ᤛᤔᤠ ᤗᤢᤵᤐᤥᤒᤠᤜᤠ᤹ᤃ ᤔᤧᤍᤠᤱ” ᤑᤠ᤹ᤀᤠᤱ ᤂᤢᤏᤧ᤹ ᤏᤡᤱᤘᤠ᤹ ᤀᤡ᤺ᤳᤋᤢ॥ 9 ᤂᤧᤒᤩᤠᤱ ᤕᤠᤁᤢᤒᤧᤸᤗᤧ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ. “ᤀᤠᤴᤎᤧᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱ. ᤀᤠᤶᤒᤠ ᤀᤡᤛᤜᤠᤰᤁᤧᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱ. ᤕᤜᤘᤣ ᤍᤠᤱᤒᤠᤀᤣ. ‘ᤂᤧᤏᤧ᤹ ᤀᤠᤒᤠᤅᤣ ᤁᤧᤗᤠᤈᤣ᤹ᤀᤥ ᤜᤧᤰᤁᤩᤠᤱ ᤁᤧᤃᤠ᤹ᤀᤡᤜᤠ᤹ᤀᤥ ᤏᤢ᤺ᤰᤂᤧ ᤐᤣᤃᤧ᤹ᤀᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤢᤖᤡᤰ ᤔᤧᤳᤏᤧᤖᤥ’ ᤁᤧᤔᤧᤳᤋᤠᤱᤅᤠᤱ ᤘᤕᤧ॥ 10 ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤴ ᤀᤢᤛᤣ᤺ᤴᤎᤠᤱ ᤁᤧᤈᤥᤃᤢᤒᤠ ᤗᤢᤱᤔᤠ᤹ ᤋᤢᤰᤔᤧᤴ ᤏᤢ ᤏᤛᤠ᤺ᤴᤛᤠᤒᤠ ᤐᤥᤱᤔᤠ ᤐᤠ᤺ᤴᤏᤧᤴ ᤀᤠᤱᤃᤠ᤹ ᤔᤡᤛᤠᤰᤁᤠᤱ ᤔᤧᤗᤠ᤹ᤀᤠᤴᤗᤥ॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤷᤍᤏ ᤕᤱᤄᤱᤅᤡᤴ ᤁᤠ᤺ᤰᤋᤢᤱᤅᤠᤱ ᤑᤧᤖᤠᤱᤅᤡᤸᤗᤧ ᤗᤳᤇᤠ ᤋᤰᤁᤠᤳ ᤌᤡᤰᤗᤰ ᤑᤧᤳᤋᤢᤱᤅᤠᤱ ᤘᤕᤧ॥ ᤁᤖ ᤀᤠᤸᤗᤥ ᤁᤢᤗᤢᤵ ᤏᤧᤳᤇᤡ ᤜᤡᤶᤛᤕᤱ ᤏᤢ ᤁᤶᤓᤩᤠᤖᤡᤰ ᤕᤖᤡᤰ ᤌᤰᤛᤠᤜᤠ᤹ ᤁᤳᤋᤢᤱᤛᤡᤱ᤹॥ 11 ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧᤖᤥ. ᤀᤠᤶᤓᤢ᤹ ᤀᤣᤛᤠᤒᤖᤧ ᤁᤢᤜᤢᤰᤁᤥᤗᤠᤶ ᤀᤠᤱᤃᤠ᤹ ᤛᤧ᤺ᤵᤋᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤁᤢᤶᤔᤠ ᤁᤢᤛ᤻ᤛᤠᤜᤠ᤹ᤀᤠᤱ ᤁᤧᤖᤧᤰ ᤛᤧᤖᤡᤃᤧᤒᤡ ᤑᤠ᤹ᤀᤠᤱ ᤀᤠᤱᤃᤠ᤹ ᤂᤢᤏᤧ᤹ᤏᤢ ᤁᤡᤀᤠᤖᤥ॥ 12 ᤁᤖ ᤂᤧᤏᤧ᤹ ᤁᤧᤒᤠ᤺ᤳᤋᤢᤀᤠᤱ ᤘᤠ᤹. ‘ᤀᤠᤱᤃᤠ᤹ ᤛᤧᤰᤂᤠᤛᤠᤱ ᤂᤧᤏᤧ᤹ ᤁᤧᤏᤢ᤹ ᤁᤧᤍᤠᤖ ᤆᤥᤃᤢᤱ. ᤜᤧᤰᤁᤩᤠᤱ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤘᤖ᤺ᤱᤅᤥᤒᤠ ᤕᤧ᤺ᤱᤄᤠ ᤁᤢᤀᤡᤛᤡᤰ ᤏᤡ᤺ᤳᤔᤧᤍᤧᤳ ᤆᤥᤃᤢᤱᤛᤡᤱ᤹॥’” 13 ᤂᤧᤴ ᤛᤧᤴᤍᤡᤰ ᤂᤢᤏᤧ᤹ ᤜᤠᤒᤠ ᤂᤧᤵᤔᤥ ᤕᤠᤱᤎᤥ᤺ᤰᤋᤧᤀᤠᤱ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤕᤠᤱᤛᤠ ᤁᤢᤴᤎᤣᤗᤠᤶ ᤁᤢᤶᤓᤢ᤹ ᤀᤣᤛᤠᤒᤧᤴ ᤐᤡᤔᤠ ᤑᤠ᤹ᤀᤠᤱ ᤔᤡᤰᤋᤥᤰ ᤛᤢᤱᤜᤠ᤹ ᤛᤧᤴᤍᤢ॥ 14 ᤂᤧᤴ ᤔᤡᤰᤋᤥᤰ ᤛᤢᤱᤜᤠ᤹—ᤁᤢᤃᤡᤵ ᤏᤧᤳᤇᤡ ᤔᤧ᤺ᤴᤍᤠᤔᤠ. ᤏᤡᤒᤥᤱ ᤁᤢᤶᤒᤠᤒᤠ ᤔᤧ᤺ᤴᤍᤠ. ᤁᤡᤵ ᤏᤧᤳᤇᤡ ᤁᤢᤶᤔᤠᤔᤠ ᤔᤧᤸᤗᤢᤰ ᤜᤧᤰᤁᤩᤠᤱ ᤏᤡᤒᤥᤱ ᤌᤢ᤺ᤶᤒᤠ. 15 ᤛᤢᤶᤒᤥᤱ ᤁᤧᤎᤠᤵᤔᤠ ᤀᤢᤔᤣ ᤏᤢ ᤀᤢᤔᤣᤛᤠ᤺ᤳᤜᤠ᤹. ᤜᤧᤰᤁᤩᤠᤱ ᤗᤡᤒᤥᤱ ᤐᤡᤳᤔᤠ. ᤌᤡᤒᤥᤱ ᤐᤡᤳ. ᤏᤡᤒᤥᤱ ᤁᤢᤶᤔᤠᤔᤠ ᤀᤍᤱ ᤏᤢ ᤌᤡᤒᤥᤱ ᤀᤍᤱᤜᤠ᤹ ᤔᤧᤘᤕᤧ॥ 16 ᤂᤢᤏᤧ᤹ ᤂᤧᤱᤜᤠ᤹ ᤁᤧᤖᤧᤰ ᤁᤢᤗᤢᤵ ᤁᤢᤗᤢᤵ ᤛᤧᤴᤍᤢᤛᤡ ᤜᤧᤰᤁᤩᤠᤱ ᤁᤢᤛᤧᤘᤠᤖᤥᤔᤠᤜᤠ᤹ᤖᤧ ᤂᤢᤴᤇᤡ᤹ ᤁᤶᤒᤪᤠᤱᤅᤥ ᤐᤡᤖᤢᤛᤡᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ᤏᤢ᤺ᤸᤗᤧ ᤋᤃᤡ ᤐᤣᤃᤧᤶᤔᤧ᤹ ᤜᤧᤰᤁᤩᤠᤱ ᤌᤰᤛᤠ ᤗᤢᤵᤜᤠ᤹ᤖᤧ ᤂᤢᤴᤇᤡ᤹ᤗᤢᤶᤔᤥ ᤔᤡᤛᤠᤰ ᤋᤠᤶᤍᤠᤶᤒᤠ ᤆᤥᤃᤧᤶ ᤏᤧᤛᤧᤶᤔᤧ᤹॥” 17 ᤂᤢᤏᤧ᤹ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤗᤠᤶᤃᤧᤗᤥᤒᤠᤴ ᤛᤢᤈᤠ ᤐᤡᤖᤢᤀᤠᤱ ᤔᤧᤳᤋᤢ. “ᤀᤠᤶᤓᤢ᤹ ᤀᤣᤛᤠᤒᤖᤧ ᤂᤧᤏᤧ᤹ ᤁᤧᤍᤢᤶᤔᤠᤱ ᤛᤧ᤺ᤴᤃᤧᤍᤥ᤹᤺ ‘ᤂᤧᤏᤧ᤹ ᤜᤠ᤺ᤳᤗᤧ ᤁᤢᤔᤏᤠᤏᤧ᥅ ᤂᤧᤏᤧ᤹ ᤀᤠᤳᤋᤠᤴ ᤁᤧᤒᤣ᤺ᤰᤐᤠᤏᤧ᥅ ᤁᤧᤍᤃᤡ ᤁᤧᤒᤣ᤺ᤰᤐᤠ ᤁᤴ ᤌᤰᤛᤠᤗᤢᤵᤜᤠ᤹ ᤜᤠ᤺ᤳᤗᤧᤴᤇᤡᤒᤣ᥅’ 18 ᤂᤧᤏᤧ᤹ ᤀᤰᤂᤣ ᤔᤧᤳᤋᤧ᤹. ‘ᤂᤧᤱᤜᤠ᤹ᤃ ᤁᤧᤛᤧᤘᤠᤖᤥᤒᤠ ᤕᤠᤁᤢᤒᤖᤧ ᤁᤢᤎᤰᤛᤠᤛᤡ॥ ᤁᤱᤜᤠ᤹ ᤁᤧᤖᤧᤰ ᤀᤠᤍᤠᤱᤒᤠ ᤀᤣᤛᤠᤒᤖᤧ ᤁᤢᤗᤠᤃᤡ ᤔᤡᤰᤋᤥᤰ ᤛᤢᤱᤗᤧ ᤗᤠᤃᤡ ᤜᤠᤅᤢᤒᤠ॥ ᤂᤢᤏᤧ᤹ᤃ ᤀᤠᤏᤡᤃᤣ ᤀᤣᤃᤠᤱ ᤑᤧᤸᤗ ᤐᤳ॥’” 19 ᤂᤢᤏᤧ᤹ ᤏᤡᤛᤡᤃᤣᤰᤐᤠ. ᤛᤢᤶᤛᤡᤃᤣᤰᤐᤠ ᤜᤧᤰᤁᤩᤠᤱ ᤌᤰᤛᤠᤗᤢᤵ ᤁᤧᤍᤡ᤺ᤰᤐᤠᤜᤠ᤹ ᤁᤧᤖᤧᤰ ᤀᤡᤱᤈᤠᤱ ᤐᤡᤖᤢᤛᤡ. “ᤀᤣᤛᤠᤒᤧᤴ ᤁᤣᤍᤢᤶᤔᤢᤶᤔᤡᤸᤗᤧ ᤂᤡᤏᤡ᤹ ᤜᤠᤒᤠᤜᤧᤰᤁᤣ ᤔᤧᤳᤋᤧᤶᤔᤧ᤹ᤀᤥ॥ 20 ‘ᤁᤧᤛᤧᤘᤠᤖᤥᤒᤠ ᤕᤠᤁᤢᤒᤧᤴ ᤀᤠᤏᤡᤃᤣ ᤀᤣᤃᤠᤱ ᤀᤣᤃᤠᤱ ᤑᤧᤸᤗ ᤐᤳ’ ᤑᤠ᤹ᤀᤠᤱ ᤀᤣᤛᤠᤒᤧᤴ ᤔᤧᤳᤋᤠᤶᤔᤧ᤹ᤀᤥ॥” ᤌᤣᤀᤠᤱᤓᤧᤸᤗᤧ “ᤀᤠᤱᤃᤠ᤹ ᤀᤠᤍᤃᤡ ᤜᤠᤅᤢᤱᤒᤠ ᤔᤡᤰᤋᤥ᤺ᤰᤁᤡᤸᤗᤧ ᤀᤣᤛᤠᤒᤧᤸᤗᤧ ᤁᤢᤛᤠᤰᤁᤧᤴᤏᤡᤴ ᤆᤡ᤺ᤰᤔᤠ ᤛᤢᤰᤋᤢᤒᤡᤗᤠ. ᤜᤧᤰᤁᤩᤠᤱ ᤂᤧᤴ ᤀᤣᤃᤠᤱ ᤀᤠᤱᤃᤠ᤹ ᤋᤢᤔᤢᤱᤅᤡᤸᤗᤧ ᤂᤢᤏᤧ᤹ ᤋᤠ᤺ᤰᤁᤠᤒᤡᤗᤠ” ᤑᤠ᤹ᤀᤠᤱ ᤀᤡ᤺ᤳᤋᤢᤀᤠᤱ ᤘᤕᤧ॥ 21 ᤂᤧᤸᤗᤧᤆᤥᤃᤢᤸᤗᤧ ᤕᤠᤁᤢᤒᤖᤧ ᤁᤢᤔᤡᤰᤋᤥᤰ ᤛᤢᤱᤜᤠ᤹ ᤂᤢᤏᤧ᤹ᤏᤢ᤺ᤸᤗᤧ ᤋᤃᤡ ᤜᤠᤅᤢᤍᤣᤛᤢ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤒᤠᤅᤣᤃ ᤂᤧᤴ ᤛᤧᤴᤍᤡᤰ ᤀᤠᤒᤠᤅᤣ ᤁᤢᤛᤠ᤺ᤱᤃᤠ ᤜᤡᤶᤔᤥ ᤕᤠ᤺ᤰᤋᤧ॥ ᤐᤏᤡᤀᤣᤗ ᤔᤧᤵᤔᤏᤠᤒᤠ ᤋᤧᤴᤏᤥ ᤕᤠᤁᤢᤒᤧᤴ ᤆᤢᤱ᤹ 22 ᤂᤧᤴ ᤛᤧᤴᤍᤡᤰ ᤕᤠᤁᤢᤒᤧᤴ ᤐᤥᤃᤧ. ᤜᤧᤰᤁᤩᤠᤱ ᤏᤧᤳᤇᤡ ᤔᤧᤸᤗᤡᤱᤃᤧᤴ ᤁᤢᤔᤣ᤺ᤳᤜᤠ᤹. ᤏᤧᤳᤇᤡ ᤁᤢᤛᤧᤘᤠᤖᤥᤔᤠᤜᤠ᤹ ᤏᤢ ᤌᤡᤒᤥᤱᤅᤠᤱ ᤌᤡᤰ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤕᤠᤱᤛᤡᤱᤅᤠᤱ ᤕᤒ᤻ᤒᤥᤁ ᤕᤱᤄᤱᤅᤡᤴ ᤁᤠ᤺ᤰᤋᤢ॥ 23 ᤂᤢᤏᤧ᤹ ᤂᤧᤱᤜᤠ᤹ ᤕᤱᤄᤱᤅᤡᤸᤗᤧ ᤏᤠᤎᤠ᤺ᤶᤒᤡ ᤐᤠᤱᤄᤢᤛᤡ. ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤧ᤹ ᤁᤳᤋᤢᤒᤠ ᤁᤧᤖᤧᤰ ᤁᤢᤈᤡᤃᤰᤘᤠᤜᤠ᤹ᤀᤠᤱ ᤜᤠᤅᤢᤍᤣᤛᤢ॥ 24 ᤀᤰᤂᤣᤗ᤹ᤖᤡᤰ ᤕᤠᤁᤢᤒᤧᤴ ᤀᤣ᤺ᤰ ᤕᤠ᤺ᤰᤋᤧ॥ ᤜᤧᤰᤁᤩᤠᤱ ᤗᤳᤇᤠ ᤔᤏᤠᤎᤡᤰ ᤂᤠᤔᤧᤴᤀᤥ᤺ᤳᤋᤣ ᤌᤠᤖᤡᤰ ᤂᤢᤏᤧ᤹ᤏᤢ ᤆᤢᤅᤧ॥ 25 ᤂᤧᤴ ᤔᤏᤠ᤺ᤸᤗᤧ ᤕᤠᤁᤢᤒᤧᤴ ᤏᤠ᤺ᤶᤔᤠ ᤔᤧᤛᤢᤰᤋᤢᤶᤒᤠ ᤏᤡᤛᤢᤀᤠᤱ ᤂᤧᤸᤗᤧ ᤕᤠᤁᤢᤒᤖᤧ ᤁᤢᤗᤠᤱᤓᤡ᤺ᤵᤔᤧᤴ ᤛᤢᤛᤢ ᤐᤡᤖᤢ. ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤔᤏᤠ᤺ᤴᤏᤢ ᤆᤢᤅᤧᤸᤗᤧ ᤕᤠᤁᤢᤒᤖᤧ ᤁᤢᤗᤠᤱᤅᤡᤴ ᤗᤡᤄᤧ᤹ ᤗᤧᤴᤍᤧ॥ 26 ᤂᤧᤒᤩᤠᤱ ᤂᤧᤴ ᤔᤏᤠ᤺ᤸᤗᤧ ᤔᤧᤳᤋᤢ. “ᤂᤠᤀᤥ᤺ᤵᤔᤠ ᤆᤥᤰ. ᤀᤠᤱᤃᤠ᤹ ᤐᤣ᤺ᤰᤔᤠ ᤐᤠᤱᤄᤠᤱᤅᤧ᤹॥” ᤁᤖ ᤕᤠᤁᤢᤒᤖᤧ ᤏᤢᤃᤵ ᤐᤡᤖᤢ. “ᤀᤠᤱᤃᤠ᤹ ᤔᤢ᤹ᤀᤡᤛᤠᤶ ᤁᤧᤶᤒᤡᤀᤠᤴᤗ ᤌᤠᤖᤡᤰ ᤔᤧᤗᤧᤳᤏᤧᤴ॥” 27 ᤂᤧᤴ ᤔᤏᤠ᤺ᤸᤗᤧ ᤔᤧᤳᤋᤢ. “ᤁᤧᤔᤡᤱ ᤌᤣᤃ᥅” ᤂᤢᤏᤧ᤹ ᤏᤢᤃᤵ ᤐᤡᤖᤢ. “ᤕᤠᤁᤢᤒ॥” 28 ᤂᤧᤴ ᤔᤏᤠ᤺ᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤸᤗ ᤂᤧᤏᤧ᤹ ᤁᤧᤔᤡᤱ ᤕᤠᤁᤢᤒ ᤔᤣ᤺ᤴ ᤁᤖ ᤀᤡᤛᤪᤠᤀᤡᤗ ᤐᤥᤱ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤏᤢ ᤁᤧᤎᤰᤋᤧᤀᤠᤱ ᤁᤧᤏᤠ᤺ᤴᤍᤢᤖᤥ॥” 29 ᤂᤧᤒᤩᤠᤱ ᤕᤠᤁᤢᤒᤧᤸᤗᤧ ᤂᤧᤴ ᤛᤣ᤺ᤴᤗᤠᤵᤋᤢ. “ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧ. ᤁᤧᤔᤡᤱ ᤌᤣᤃ᥅ ᤔᤧᤳᤋᤠᤱᤅᤧ᤹॥” ᤁᤖ ᤂᤧᤸᤗᤧ ᤔᤧᤳᤋᤢ. “ᤌᤣᤀᤠᤱ ᤀᤠᤔᤡᤱ ᤛᤧ᤺ᤴᤃᤧᤍᤥᤀᤠᤒᤣ᥅” ᤂᤧᤒᤩᤠᤱ ᤕᤠᤁᤢᤒᤧᤴ ᤔᤢ᤹ᤀᤡᤛᤠᤶ ᤐᤡᤖᤢ॥ 30 ᤂᤧᤸᤗᤧᤆᤥᤃᤢᤸᤗᤧ ᤕᤠᤁᤢᤒᤖᤧ ᤂᤧᤴ ᤋᤧᤴᤏᤡᤴ ᤐᤏᤡᤀᤣᤗ ᤔᤡᤱ ᤘᤠ᤺ᤳᤋᤢ. ᤌᤣᤀᤠᤱᤓᤧᤸᤗᤧ “ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤡᤛᤢᤱᤅᤠᤱᤛᤠᤱ ᤀᤠᤱᤃᤠ᤹ ᤁᤢᤜᤡᤱᤘᤧᤳᤋᤣ ᤘᤠ᤹ᤀᤠᤖᤥ” ᤗ᤹ᤖᤡᤰ ᤂᤢᤏᤧ᤹ ᤐᤠ᤺ᤳᤋᤢ॥ 31 ᤂᤧᤸᤗᤧ ᤁᤢᤗᤠᤱᤅᤡᤸᤗᤧ ᤆᤥᤃᤢᤸᤗᤧ ᤀᤧ᤺ᤰᤂᤱ ᤀᤧ᤺ᤰᤂᤱ ᤗ᤹ᤖᤧᤖ ᤗᤠᤱᤄᤣᤃᤧ ᤜᤧᤰᤁᤩᤠᤱ ᤏᤠᤶ ᤁᤧᤖᤧᤸᤗᤧ ᤐᤏᤡᤀᤣᤗ ᤔᤧᤵᤔᤏᤠᤒᤠ ᤋᤧᤴᤏᤡᤴ ᤗᤧᤖᤢᤎ॥ 32 ᤂᤧᤴ ᤔᤏᤠ᤺ᤸᤗᤧ ᤕᤠᤁᤢᤒᤖᤧ ᤁᤢᤗᤠᤱᤓᤡ᤺ᤵᤔᤥ ᤛᤢᤛᤢ ᤐᤡᤖᤢ ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗᤥ ᤌᤠᤖᤡᤰᤛᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤠᤗᤠᤱᤓᤡ᤺ᤵᤔᤥᤒᤠ ᤛᤠᤴ ᤔᤧᤴᤈᤏᤧᤸᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.