ᤋᤥᤗᤡᤱᤛᤥᤔᤢ 31 - LIFOTNTᤕᤠᤁᤢᤒᤧᤴ ᤗᤠᤒᤠᤏᤧᤸᤗᤥᤗᤠᤶ ᤂᤧᤳᤇᤡᤱ᤹ 1 ᤌᤡᤰᤗᤧᤱ ᤗᤠᤒᤠᤏᤧᤸᤗᤧ ᤁᤢᤛ᤻ᤛᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖ ᤔᤧᤕᤠᤃᤧᤒᤠ ᤕᤠᤁᤢᤒᤖᤧ ᤂᤧᤵᤛᤢ. “ᤀᤠᤏᤡ᤹ ᤐᤠᤵᤐᤠ᤹ᤖᤧ ᤁᤳᤋᤢᤒᤠ ᤁᤧᤖᤧᤰ ᤕᤠᤁᤢᤒᤖᤧ ᤋᤣ᤹ᤖᤢ ᤔᤠ᤺ᤴᤍᤢ. ᤜᤧᤰᤁᤩᤠᤱ ᤀᤠᤏᤡ᤹ ᤐᤠᤵᤐᤠ᤹ᤖᤧ ᤁᤢᤕᤠᤱᤛᤠ ᤁᤢᤴᤎᤣᤗᤠᤶ ᤂᤧᤸᤗᤧ ᤁᤶᤕᤠᤰ ᤕᤖᤡᤰ ᤌᤃᤢᤒᤠᤖᤥ॥” 2 ᤜᤧᤰᤁᤩᤠᤱ ᤗᤠᤒᤠᤏᤧᤸᤗᤧ ᤋᤃᤡ ᤜᤧᤰᤁᤣ ᤂᤢᤏᤧ᤹ ᤏᤢᤖᤡᤰ ᤔᤧᤔᤧᤳᤋᤢᤶᤒᤠ ᤕᤠᤁᤢᤒᤖᤧ ᤏᤡᤛᤢ॥ 3 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤕᤠᤁᤢᤒᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤛᤢᤎᤧᤒᤠ ᤁᤧᤍᤠᤰᤌᤧᤒᤠᤜᤠ᤹ ᤏᤢ ᤁᤧᤃᤠ᤹ᤀᤡᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ᤀᤥ ᤏᤢ᤺ᤰᤂᤧ ᤐᤣᤃᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤏᤢ ᤘᤠ᤹ᤀᤠ॥” 4 ᤂᤧᤸᤗᤧᤆᤥᤃᤢᤸᤗᤧ ᤕᤠᤁᤢᤒᤖᤧ ᤖᤠᤜᤣᤸᤗᤧᤴ ᤏᤢ ᤗᤡᤀᤠ᤺ᤴ ᤂᤢᤏᤧ᤹ ᤁᤢᤔᤧᤸᤗᤢᤰ ᤔᤧ᤺ᤴᤍᤠ ᤔᤧᤘᤕᤧᤒᤠᤍᤧᤴᤏᤥ ᤀᤢ᤺ᤳᤋᤢᤛᤡ॥ 5 ᤜᤧᤰᤁᤩᤠᤱ ᤂᤧᤸᤗᤧ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤐᤠ᤺ᤸᤗᤧ ᤋᤃᤡ ᤜᤧᤰᤁᤣ ᤏᤢᤖᤡᤰ ᤔᤧᤔᤧᤳᤋᤠᤴᤒᤠ ᤀᤠᤱᤃᤠ᤹ ᤏᤡᤛᤢᤱ᤹॥ ᤁᤖ ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤱᤃᤠ᤹ᤏᤢ ᤘᤠ᤹॥ 6 ᤀᤠᤱᤃᤠ᤹ ᤌᤢᤶᤍᤠᤱᤅᤠᤱ ᤀᤠᤛᤢᤰᤛᤢᤰ ᤂᤧᤴᤇᤡ᤹ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤢᤛᤧᤘᤠ ᤆᤥᤃᤢᤱ ᤐᤡᤖᤢᤱᤒᤠᤱᤃ ᤂᤡᤴᤇᤡ᤹ ᤁᤧᤏᤡᤛᤧᤇᤢᤀᤠᤱᤅᤧ ᤁᤧᤘᤠ᤹ᤛᤡᤖᤥ॥ 7 ᤜᤧᤰᤁᤣᤛᤠᤱ ᤂᤡᤴᤇᤡ᤹ ᤐᤠ᤺ᤸᤗᤧ ᤀᤠᤱᤃᤠ᤹ ᤀᤡᤱᤗᤧᤰᤋᤠᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤏᤠᤶᤕᤠᤰᤁᤡᤴ ᤌᤡᤒᤥᤱᤗᤧᤱ ᤌᤠᤖᤡᤰ ᤗᤧᤰᤋᤢ ᤐᤡᤖᤠᤱᤅᤠᤱ ᤘᤠ᤹॥ ᤁᤖᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤀᤠᤜᤠᤴᤋᤡ ᤆᤥ᤺ᤰᤔᤠ ᤔᤧᤒᤠᤱᤄᤢᤴ॥ 8 ᤂᤢᤏᤧ᤹ ᤋᤧᤰᤁᤪᤠᤒᤠᤜᤠ᤹ ᤂᤧᤏᤧ᤹ᤀᤡᤴ ᤔᤧᤒᤥᤱᤗ ᤐᤠ᤺ᤳᤋᤢᤸᤗᤧ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ᤖᤧ ᤋᤧᤰᤁᤪᤠᤒᤠᤀᤣ ᤔᤧᤎᤠᤵᤋᤢᤛᤡ॥ ᤜᤧᤰᤁᤩᤠᤱ ᤑᤈᤡᤄᤧ᤺ᤱ ᤔᤠᤰᤆᤡᤄᤧ᤺ᤱ ᤁᤧᤗ᤹ᤒᤠᤜᤠ᤹ ᤂᤧᤏᤧ᤹ᤀᤡᤴ ᤔᤧᤒᤥᤱᤗ ᤐᤠ᤺ᤳᤋᤢᤸᤗᤧ ᤁᤧᤖᤧᤰ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ᤖᤧ ᤑᤈᤡᤄᤧ᤺ᤱ ᤔᤠᤰᤆᤡᤄᤧ᤺ᤱ ᤁᤧᤗ᤹ᤒᤠᤀᤣ ᤔᤧᤎᤠᤵᤋᤢᤛᤡ॥ 9 ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤴᤇᤡ᤹ ᤐᤠ᤺ᤸᤗᤧ ᤁᤢᤔᤧᤸᤗᤢᤰ ᤁᤢᤔᤧ᤺ᤴᤍᤠ ᤗᤢᤵᤜᤠ᤹ ᤀᤠᤱᤃᤠ᤹ ᤐᤡᤖᤠᤱ॥ 10 “ᤂᤡᤴᤇᤡ᤹ ᤔᤧᤸᤗᤢᤰ ᤔᤧ᤺ᤴᤍᤠᤗᤢᤵᤜᤠ᤹ ᤔᤧᤗᤠᤶᤛᤡᤱᤅᤧᤸᤗᤧ ᤌᤢ᤺ᤶᤒᤠᤜᤠ᤹ ᤏᤢ ᤁᤢᤶᤒᤠᤒᤠ ᤔᤧ᤺ᤴᤍᤠᤜᤠ᤹ ᤋᤧᤰᤁᤪᤠᤒᤠ ᤑᤈᤡᤂᤧ᤺ᤱ ᤔᤠᤰᤆᤡᤂᤧ᤺ᤱ ᤁᤧᤗ᤹ᤒᤠ ᤜᤧᤰᤁᤩᤠᤱ ᤑᤍᤠᤱᤒᤠ ᤔᤠᤰᤋᤠᤱᤒᤠ ᤁᤢᤶᤒᤪᤡᤰ ᤁᤧᤕᤢᤱᤒᤠ ᤔᤧᤈᤥᤃᤧᤒᤠ ᤀᤠᤱᤃᤠ᤹ ᤛᤧᤵᤔᤠᤱᤔᤥ ᤏᤡᤛᤢᤱ॥ 11 ᤂᤧᤴ ᤕᤧᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤸᤗᤧ ᤛᤧᤵᤔᤠᤱᤔᤥ ᤀᤠᤱᤃᤠ᤹ ‘ᤕᤠᤁᤢᤒᤀᤣ’ ᤔᤧᤳᤋᤠᤱ॥ ᤜᤧᤰᤁᤩᤠᤱ ‘ᤜᤤ. ᤀᤠᤱᤃᤠ᤹ ᤁ᤹ᤕᤥ ᤘᤠ᤹ᤀᤠᤖᤥ’ ᤔᤧᤳᤋᤢᤱ॥ 12 ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤠᤱ. ‘ᤔᤧᤸᤗᤢᤰ ᤔᤧ᤺ᤴᤍᤠᤗᤢᤵᤜᤠ᤹ ᤁᤧᤗᤡᤱᤒᤠ ᤌᤢ᤺ᤶᤒᤠᤜᤠ᤹ ᤏᤢ ᤁᤢᤶᤒᤠᤒᤠ ᤔᤧ᤺ᤴᤍᤠᤜᤠ᤹ ᤏᤢᤖᤡᤰᤁᤠᤱ ᤀᤥᤔᤧᤳᤋᤧᤛᤧ᤹॥ ᤂᤧᤱᤜᤠ᤹ ᤑᤈᤡᤂᤧ᤺ᤱ ᤔᤠᤰᤆᤡᤂᤧ᤺ᤱ ᤁᤧᤗ᤹ᤒᤠ ᤏᤢ ᤔᤠᤰᤋᤠᤱᤒᤠ ᤑᤍᤠᤱᤒᤠ ᤁᤢᤶᤒᤪᤡᤰ ᤁᤧᤕᤢᤱᤒᤠ ᤔᤧᤒᤥ᤺ᤰᤂᤧᤖ ᤀᤠᤱᤃᤠ᤹ ᤆᤥᤃᤢᤱᤛᤡᤱ ᤌᤣᤀᤠᤱᤓᤧᤸᤗᤧ ᤗᤠᤒᤠᤏᤧᤸᤗᤧ ᤂᤧᤏᤧ᤹ᤀᤥ ᤆᤥᤃᤢᤖ ᤕᤠᤰᤐᤠ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤏᤡᤛᤢᤱᤅᤠᤱ ᤘᤠ᤹॥ 13 ᤂᤧᤏᤧ᤹ ᤏᤡᤱᤘᤠ᤹ᤛᤥᤰᤗᤧ ᤗᤠᤃᤡ ᤛᤡᤳᤗᤠᤱᤅᤡᤴ ᤁᤧᤜᤠᤰᤋᤢᤀᤠᤱ ᤏᤡ᤺ᤱᤃᤣ᤹ ᤁᤧᤗᤧ᤺ᤰᤋᤢᤒᤠ ᤏᤢ ᤔᤠᤱᤃᤧᤜᤧᤰᤛᤡᤱᤒᤠ ᤋᤧᤴ ᤒᤣᤌᤣᤗᤀᤥ ᤏᤡᤃᤧᤎᤠ᤺ᤶᤛᤡᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤱᤃᤠ᤹ᤀᤣᤖᤥ॥ ᤀᤠᤸᤗ ᤐᤥᤃᤧ᤹ ᤜᤧᤰᤁᤩᤠᤱ ᤁᤴ ᤋᤧᤴᤏᤥᤗᤠᤶ ᤂᤧᤏᤧ᤹ ᤛᤠᤃᤧᤘᤠ᤺ᤴᤇᤡᤱᤒᤠ ᤗᤠᤈᤣ᤹ᤀᤥ ᤐᤣᤃᤧ᤹॥’” 14 ᤂᤧᤒᤩᤠᤱ ᤖᤠᤜᤣᤸᤗᤧᤴ ᤏᤢ ᤗᤡᤀᤠ᤺ᤸᤗᤧ ᤂᤢᤏᤧ᤹ ᤔᤧᤳᤋᤧᤇᤢ. “ᤀᤠᤴᤇᤡᤃᤣ ᤐᤠ᤺ᤸᤗᤧ ᤁᤢᤜᤡᤶᤔᤥ ᤀᤠᤴᤇᤡᤃᤣ ᤂᤥᤔᤠ ᤗᤰ ᤌᤧᤔᤠ ᤘᤠ᤹ᤀᤠᤱᤒᤣ᥅ 15 ᤂᤢᤏᤧ᤹ ᤘᤣ᤹ ᤗᤠᤈᤣ᤹ᤒᤠ ᤜᤧᤰᤁᤣ ᤀᤠᤴᤇᤡᤃᤣ ᤔᤧᤔᤧᤳᤋᤧᤇᤡᤃᤧᤴᤏᤠᤱ ᤔᤧᤘᤠ᤹ᤏᤧᤶᤒᤡ᥅ ᤜᤧᤰᤁᤩᤠᤱ ᤀᤠᤴᤇᤡᤃᤣ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤵᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤧᤜᤢᤅᤢᤒᤠ ᤕᤠᤱᤅᤡᤴᤏᤠᤱ ᤂᤢᤏᤧ᤹ᤀᤣ ᤑᤧᤳᤗᤠ᤺ᤴᤍᤢᤍᤣᤛᤢᤀᤠᤱ ᤘᤠ᤹॥ 16 ᤀᤠᤏᤡ᤹ ᤐᤠᤵᤐᤠ᤹ᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤣ᤹ᤖᤢᤒᤠ ᤁᤴ ᤕᤠᤱᤛᤠᤁᤢᤴᤎᤣ᤺ᤴ ᤀᤠᤏᤡ᤹ᤀᤡᤴ ᤏᤢ ᤀᤠᤏᤡ᤹ ᤛᤠᤜᤠ᤹ᤖᤧᤴ ᤐᤥ᤺ᤰᤂᤧᤀᤠᤱ ᤘᤠ᤹॥ ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤔᤧᤳᤋᤧᤒᤠ ᤜᤧᤰᤁᤣᤀᤣ ᤆᤥᤃᤧ᤹॥” 17 ᤂᤧᤒᤩᤠᤱ ᤕᤠᤁᤢᤒᤧᤴ ᤐᤥᤃᤧᤀᤠᤱ ᤁᤢᤛ᤻ᤛᤠ ᤁᤢᤀᤣᤜᤠ᤹ ᤏᤢ ᤁᤢᤔᤣ᤺ᤳᤜᤠ᤹ ᤀᤢᤔᤣᤜᤠ᤹ ᤛᤶᤍᤠᤱ ᤕᤢᤰᤂᤢᤛᤡ॥ 18 ᤜᤧᤰᤁᤩᤠᤱ ᤂᤧᤸᤗᤧ ᤁᤧᤖᤧᤰ ᤁᤢᤔᤧᤸᤗᤢᤰ ᤁᤢᤔᤧ᤺ᤴᤍᤠ ᤁᤢᤎᤰᤛᤠ ᤗᤢᤵᤜᤠ᤹ ᤏᤢ ᤂᤢᤏᤧ᤹ ᤐᤍ᤻ᤍᤏ ᤀᤠᤖᤠᤶᤔᤥ ᤘᤕᤧᤸᤗᤧ ᤂᤢᤏᤧ᤹ ᤂᤥᤛᤢᤒᤠ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤜᤠ᤹ ᤕᤠᤱᤛᤡᤱ॥ ᤂᤧᤒᤩᤠᤱ ᤁᤢᤶᤒᤠ ᤀᤡᤛᤜᤠᤰᤁᤧᤸᤗᤧ ᤁᤢᤗᤠᤈᤣ᤹ ᤁᤏᤠᤏᤏᤥ ᤌᤠᤛᤡᤱᤅᤠᤱ ᤐᤣ॥ 19 ᤂᤧᤴ ᤕᤧᤶᤔᤥ ᤗᤠᤒᤠᤏᤧᤴ ᤔᤧᤸᤗᤢᤰ ᤔᤢᤖᤡᤰ ᤏ᤺ᤱᤛᤧ ᤐᤣᤀᤠᤱ ᤕᤠᤃᤧ॥ ᤜᤧᤰᤁᤣ᤺ᤸᤗᤧ ᤖᤠᤜᤣᤗᤖᤧᤃ ᤁᤢᤶᤒᤠᤖᤧ ᤁᤢᤜᤡᤶᤛᤠᤶᤔᤠᤱᤜᤠ᤹ ᤂᤢ᤺ᤳᤋᤢᤛᤡᤀᤠᤱ ᤋᤣ᤹ᤖᤢᤛᤡ॥ 20 ᤂᤧᤴᤏᤢ᤺ᤸᤗᤧ ᤘᤣ᤹ “ᤀᤠᤱᤃᤠ᤹ ᤐᤣ᤺ᤰᤁᤠ” ᤑᤠ᤹ᤀᤠᤱ ᤕᤠᤁᤢᤒᤧᤸᤗᤧ ᤀᤖᤠᤔᤡ ᤗᤠᤒᤠᤴᤏᤧᤴ ᤔᤧᤔᤧᤳᤋᤢᤴᤏᤠᤱ ᤀᤡᤱᤗᤧᤰᤋᤢ॥ 21 ᤁᤶᤓᤗ᤹ᤖᤡᤰ ᤂᤢᤏᤧ᤹ ᤁᤳᤋᤢᤒᤠ ᤁᤧᤖᤧᤰ ᤆᤡᤃᤰᤘᤠᤜᤠ᤹ ᤕᤠᤱᤛᤡᤱᤅᤠᤱ ᤕᤠᤁᤢᤒᤧᤴ ᤂᤧᤳᤇᤡᤱ ᤐᤣ. ᤜᤧᤰᤁᤩᤠᤱ ᤐᤕᤶ ᤕᤶᤒᤠ ᤕᤢᤑᤪᤣᤋᤡᤛ ᤘᤜ᤺ᤱᤅᤡᤴ ᤁᤠ᤺ᤰᤋᤢᤍᤣ᤹ᤖᤢᤀᤠᤱ ᤃᤡᤗᤠᤍᤒᤠ ᤁᤥ᤺ᤰᤔᤠ ᤗᤠᤈᤣ᤹ ᤗᤧᤵᤔᤠᤱ ᤌᤠᤛᤡᤱ ᤐᤣ॥ ᤗᤠᤒᤠᤏᤧᤸᤗᤧ ᤕᤠᤁᤢᤒᤧᤴ ᤏᤠ᤺ᤳᤋᤢ᤹ 22 ᤛᤢᤶᤕᤠᤴ ᤁᤧᤖᤧᤸᤗᤧ ᤕᤠᤁᤢᤒᤧᤴ ᤂᤧᤳᤇᤡᤱ ᤐᤣ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤗᤠᤒᤠᤏᤧᤸᤗᤧ ᤂᤧᤵᤛᤢ॥ 23 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ ᤑᤢᤰᤛᤢᤛᤡᤀᤠᤱ ᤏᤢᤛᤡ ᤕᤧᤴ ᤌᤠᤖᤡᤰ ᤕᤠᤁᤢᤒᤧᤴ ᤔᤧᤏᤠ᤺ᤳᤋᤢ ᤔᤧᤍᤣ᤹ᤖᤢ. ᤜᤧᤰᤁᤩᤠᤱ ᤂᤧᤴ ᤃᤡᤗᤠᤍᤒᤠ ᤁᤥ᤺ᤰᤔᤠ ᤗᤠᤈᤣ᤹ᤀᤥ ᤂᤢᤏᤧ᤹ ᤔᤧᤛᤡ᤹ᤖᤢ॥ 24 ᤂᤧᤒᤩᤠᤱ ᤛᤧᤴᤍᤡᤰ ᤛᤧᤵᤔᤠᤱᤔᤥ ᤀᤖᤠᤔᤡ ᤗᤠᤒᤠᤏᤧᤴᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤌᤠ᤺ᤴᤇᤡᤱ. ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢ. “ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧ᤹ ᤂᤧᤏᤧ᤹ ᤕᤠᤁᤢᤒᤧᤴ ᤔᤧᤓᤧ᤺ᤰᤋᤧᤴᤏᤧ᤹॥” 25 ᤗᤠᤒᤠᤏᤧᤸᤗᤧ ᤕᤠᤁᤢᤒᤧᤴ ᤛᤡ᤹ᤖᤢᤸᤗᤧ ᤕᤠᤁᤢᤒᤖᤧ ᤃᤡᤗᤠᤍᤒᤠ ᤁᤥ᤺ᤰᤔᤠ ᤑᤠᤱᤈᤱᤒᤠ ᤗᤠᤈᤣ᤹ᤀᤥ ᤁᤢᤛᤠ᤺ᤱᤃᤠ ᤜᤡᤶᤔᤡᤴ ᤂᤡᤱᤛᤢᤀᤠᤱ ᤏᤧᤛ᤻ᤛᤧ. ᤗᤠᤒᤠᤏᤧᤸᤗᤧᤀᤠᤱ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ᤏᤢ ᤛᤥᤖᤡᤰ ᤁᤢᤛᤠ᤺ᤱᤃᤠ ᤜᤡᤶᤔᤡᤴ ᤒᤠᤂᤧᤵᤔᤥ ᤂᤡᤱᤛᤢ॥ 26 ᤗᤠᤒᤠᤏᤧᤸᤗᤧ ᤕᤠᤁᤢᤒᤧᤴ ᤔᤧᤳᤋᤢ. “ᤂᤧᤏᤧ᤹ ᤀᤠᤱᤃᤠ᤹ ᤀᤡᤱᤃᤧᤗᤧᤰᤋᤠᤱᤅᤠᤱ ᤋᤧᤴᤎᤱᤅᤥᤒᤠ ᤐᤢᤱᤗᤠᤎᤠᤒᤠ ᤜᤧᤰᤁᤣ ᤀᤠᤛ᤻ᤛᤠᤜᤠ᤹ ᤁᤧᤍᤣ᤹ᤖᤢᤛᤡᤀᤠᤱ ᤁᤴ ᤌᤣ ᤁᤧᤈᤥᤃᤢᤒᤠᤒᤣ᥅ 27 ᤀᤠᤱᤃᤠ᤹ ᤔᤧᤶᤔᤧᤳᤋᤣ ᤂᤧᤏᤧ᤹ ᤛᤫᤠ᤺ᤳ ᤛᤢᤸᤗᤡ ᤁᤧᤄᤧᤳᤇᤡᤱᤅᤠᤱ ᤌᤣᤀᤠᤱ ᤀᤠᤱᤃᤠ᤹ ᤀᤡᤱᤃᤧᤗᤧᤰᤋᤠᤱᤒᤠ᥅ ᤀᤠᤱᤃᤠ᤹ ᤔᤢᤰᤗᤠ ᤏᤢ ᤛ᤺ᤵᤔᤠ ᤗᤠ᤺ᤱᤔᤠ ᤜᤧᤰᤁᤩᤠᤱ ᤏᤡᤱᤘᤠ᤹ ᤐᤍᤩᤧᤍᤩᤧᤖ ᤐᤠᤱᤏᤧᤛᤠᤔᤧᤴ॥ 28 ᤀᤠᤛ᤻ᤛᤠᤜᤠ᤹ ᤜᤧᤰᤁᤩᤠᤱ ᤀᤠᤶᤔᤧᤴᤇᤠ᤹ᤜᤠ᤹ᤏᤢ ᤛᤧᤶᤔᤢ᤹ᤀᤡ ᤆᤥ᤺ᤰᤔᤠᤀᤠᤱ ᤆᤢᤵ ᤔᤧᤵᤔᤠᤛᤡ ᤀᤠᤱᤃᤠ᤹ ᤌᤣᤀᤠᤱ ᤁᤧᤶᤒᤠᤱᤄᤠᤱᤅᤡᤴᤒᤠ᥅ ᤂᤧᤏᤧ᤹ ᤁᤴ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢ॥ 29 ᤂᤧᤏᤧ᤹ ᤜᤠᤴᤋᤡ ᤁᤧᤒᤥᤱᤗ ᤆᤥ᤺ᤰᤔᤠ ᤔᤢᤰᤛᤠᤶ ᤀᤠᤱᤃᤠ᤹ ᤁᤳᤋᤢᤱ॥ ᤁᤖ ᤔᤡ᤺ᤵᤔᤠ ᤕᤢᤛᤡᤰ ᤁᤧᤶᤒᤠᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ. ‘ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧ᤹. ᤂᤧᤏᤧ᤹ ᤕᤠᤁᤢᤒᤧᤴ ᤔᤧᤓᤧ᤺ᤰᤋᤧᤴᤏᤧ᤹॥’ 30 ᤜᤧᤰᤁᤩᤠᤱ ᤀᤠᤸᤗ ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤜᤡᤶᤔᤥ ᤐᤣ᤺ᤰᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤁᤧᤈᤥᤃᤢᤀᤠᤱ ᤗᤠᤶ ᤁᤧᤎᤠᤛᤡᤱᤅᤠᤱ ᤁᤧᤘᤠ᤹. ᤁᤖ ᤌᤣᤀᤠᤱ ᤀᤠᤜᤡᤶᤛᤠᤶᤔᤠᤱᤜᤠ᤹ ᤁᤧᤄᤢ᤺ᤳᤋᤢᤛᤡᤒᤠᤒᤣ᥅” 31 ᤕᤠᤁᤢᤒᤖᤧ ᤗᤠᤒᤠᤏᤧᤴ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤁᤧᤛ᤻ᤛᤠ ᤔᤧᤴᤇᤢᤔᤠᤜᤠ᤹ ᤀᤠᤱᤃᤠ᤹ ᤛᤠᤰᤁᤧᤸᤗᤧᤰᤁᤠᤱ ᤁᤧᤏᤠᤵᤐᤠ ᤁᤧᤍᤣ᤹ᤀᤠᤒᤡ ᤑᤠ᤹ᤀᤠᤱ ᤀᤠᤱᤃᤠ᤹ ᤁᤡᤛᤠᤱ॥ 32 ᤁᤖ ᤂᤧᤏᤧ᤹ ᤁᤧᤜᤡᤶᤛᤠᤶᤔᤠᤱᤜᤠ᤹ ᤀᤠᤳᤋᤡᤴ ᤔᤏᤠᤀᤥ ᤁᤧᤄᤥᤛᤢ᤹ ᤂᤧᤴ ᤁᤢᤜᤡᤱᤘᤧᤳ ᤔᤧᤍᤠᤱᤏᤧᤴ॥ ᤀᤠᤱᤃᤠ᤹ᤀᤥ ᤁᤧᤘᤠ᤹ᤒᤠ ᤁᤧᤈᤡᤃᤰᤘᤠᤜᤠ᤹ ᤀᤠᤏᤡ᤹ ᤁᤠ᤹ᤀᤡᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤢᤛᤡᤱ ᤏᤡ᤺ᤳᤋᤧᤀᤠᤱ ᤋᤣ᤹ᤖᤧᤀᤥ॥” ᤖᤠᤜᤣᤗᤖᤧ ᤂᤧᤱᤜᤠ᤹ ᤂᤢ᤺ᤳᤋᤢᤛᤡᤒᤠᤴ ᤕᤠᤁᤢᤒᤧᤸᤗᤧ ᤏᤡᤔᤠᤀᤣ ᤔᤧᤴᤏᤡᤀᤣ ᤘᤕᤧ॥ 33 ᤂᤧᤒᤩᤠᤱ ᤗᤠᤒᤠᤏᤧᤴ ᤕᤠᤁᤢᤒᤖᤧ ᤁᤢᤛᤠ᤺ᤱᤃᤠᤜᤡᤶ ᤛᤡᤃᤠᤱ ᤗᤠᤛᤧ ᤜᤧᤰᤁᤩᤠᤱ ᤗᤡᤀᤠᤖᤧ ᤁᤢᤛᤠ᤺ᤱᤃᤠ ᤜᤡᤶᤔᤥ ᤏᤢ ᤏᤧᤵᤔᤈᤠᤱ ᤛᤧᤘᤠᤖᤥᤔᤠᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶ ᤛᤡᤃᤠᤱ ᤗᤠᤛᤧ. ᤁᤖ ᤂᤢᤏᤧ᤹ ᤌᤣᤀᤠᤱ ᤔᤧᤄᤥᤛᤢᤴ॥ ᤁᤢᤏᤢᤵᤔᤥ ᤂᤢᤏᤧ᤹ ᤖᤠᤜᤣᤗᤖᤧ ᤁᤢᤛᤠ᤺ᤱᤃᤠ ᤜᤡᤶᤔᤥ ᤗᤠᤛᤧ॥ 34 ᤁᤖ ᤖᤠᤜᤣᤗᤧᤱᤃ ᤂᤧᤴ ᤜᤡᤶᤛᤠᤶᤔᤠᤱᤜᤠ᤹ ᤕᤠᤱᤛᤡᤱᤅᤠᤱ ᤀᤢᤔᤣ᤺ᤸᤗᤧ ᤁᤰ ᤘᤣ᤹ᤔᤠᤍᤧᤴᤏᤥ ᤕᤢᤰᤂᤢᤛᤡᤀᤠᤱ ᤒᤠᤂᤧᤸᤗᤧ ᤁᤢᤈᤱᤅᤥ ᤕᤢᤅᤧᤈᤩᤧ॥ ᤗᤠᤒᤠ᤺ᤴᤏᤧᤸᤗᤧ ᤛᤠ᤺ᤱᤃᤠᤜᤡᤶ ᤛᤡᤃᤠᤱ ᤁᤧᤖᤧᤰ ᤐᤡᤛᤠᤱ ᤁᤥ᤺ᤳᤋᤢ ᤁᤖ ᤜᤡᤶᤛᤠᤶᤔᤠᤱᤜᤠ᤹ ᤂᤥᤔᤠ ᤔᤧᤛᤢᤰᤋᤢᤴ॥ 35 ᤖᤠᤜᤣᤗᤖᤧ ᤁᤢᤶᤒᤠ ᤔᤧᤳᤋᤢ. “ᤀᤠᤍᤠᤱᤒᤣ. ᤁᤧᤕᤠ᤺ᤰ ᤔᤧᤗᤧ᤹ᤖᤧᤴᤏᤧ᤹ᤀᤥ॥ ᤀᤠᤱᤃᤠ᤹ ᤛᤡᤶ ᤘᤜᤵᤔᤠᤸᤗᤧ ᤛᤢᤛᤠᤱᤅᤠᤱ ᤘᤠ᤹ᤀᤠ ᤂᤧᤸᤗᤧᤆᤥᤃᤢᤸᤗᤧ ᤁᤧᤍᤃᤠᤱ ᤀᤠᤱᤃᤠ᤹ ᤕᤧᤵᤔᤠ ᤔᤧᤏᤢᤖᤧᤴ॥” ᤁᤶᤓᤗ᤹ᤖᤡᤰ ᤂᤢᤏᤧ᤹ ᤁᤥ᤺ᤵᤔᤠᤃ ᤁᤥ᤺ᤳᤋᤢᤛᤡ. ᤁᤖ ᤂᤧᤴ ᤜᤡᤶᤛᤠᤶᤔᤠᤱᤜᤠ᤹ ᤂᤥᤔᤠ ᤔᤧᤛᤢᤰᤋᤢᤛᤡᤴ॥ 36 ᤕᤠᤁᤢᤒᤧᤴ ᤌᤧᤰᤋᤢᤰ ᤁᤢᤕᤠ᤺ᤰᤗᤧ᤹ᤖᤧ ᤜᤧᤰᤁᤩᤠᤱ ᤗᤠᤒᤠᤏᤧᤴ ᤑᤧ᤺ᤰᤋᤢᤀᤠᤱ ᤐᤠᤴ ᤔᤧᤳᤋᤢ. “ᤀᤠᤱᤃᤠ᤹ ᤌᤧᤔᤠ ᤕᤠ᤺ᤶᤒᤰ ᤑᤣ᤺ᤴᤍᤢᤱᤅᤠᤱ ᤘᤕᤠᤱᤅᤠᤱ ᤂᤧᤏᤧ᤹ ᤀᤰᤂᤣᤗ᤹ᤖᤡᤰ ᤁᤧᤓᤳᤋᤠᤱᤒᤠᤒᤣ᥅ 37 ᤀᤠᤸᤗ ᤂᤧᤏᤧ᤹ ᤁᤧᤖᤧᤰ ᤀᤠᤈᤡᤃᤰᤘᤠᤜᤠ᤹ ᤁᤧᤛᤠ᤹ᤖᤢ॥ ᤁᤧᤜᤡᤶᤔᤥᤒᤠ ᤁᤧᤛᤠᤔᤠ ᤁᤧᤒᤢᤔᤠᤜᤠ᤹ ᤀᤠᤳᤋᤡ ᤘᤠ᤹. ᤁᤧᤄᤥᤛᤢᤒᤡ᥅ ᤂᤧᤱᤜᤠ᤹ ᤂᤧᤏᤧ᤹ ᤁᤧᤔᤏᤠᤜᤠ᤹ ᤏᤢ ᤀᤠᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤏᤧᤛ᤻ᤛᤧ ᤐᤡᤖᤧᤛᤧ᤹॥ ᤂᤧᤱᤜᤠ᤹ᤖᤧ ᤀᤠᤴᤇᤡ᤹ ᤗᤢᤶᤔᤥ ᤂᤠᤛᤧᤴ ᤔᤧᤈᤥᤃᤢᤖ॥ 38 “ᤁᤴ ᤏᤡᤒᤥᤱ ᤋᤱᤒᤣᤀᤠᤱᤎᤥ ᤀᤠᤱᤃᤠ᤹ ᤂᤧᤏᤧ᤹ᤏᤢᤀᤣ ᤘᤠ᤹ᤀᤠ॥ ᤁᤶᤓᤩᤠᤖᤡᤰ ᤌᤠᤖᤡᤰᤗᤧ ᤂᤧᤏᤧ᤹ ᤁᤧᤔᤧᤸᤗᤢᤰᤜᤠ᤹ ᤏᤢ ᤁᤧᤔᤧ᤺ᤴᤍᤠᤜᤠ᤹ᤖᤧ ᤀᤠᤓᤧᤸᤗᤧᤀᤠᤱ ᤛᤠᤔᤧᤸᤗᤧᤶᤛᤢᤛᤡᤴ॥ ᤀᤠᤱᤃᤠ᤹ ᤁᤧᤎᤰᤛᤠ ᤗᤢᤵᤐᤥᤒᤠ ᤔᤧᤸᤗᤢᤰᤁᤠᤱ ᤔᤧᤴᤈᤠᤒᤠ॥ 39 ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤔᤧᤄᤠ᤺ᤴᤍᤢᤛᤡᤒᤠᤜᤠ᤹ᤀᤠᤱ ᤀᤠᤱᤃᤠ᤹ ᤂᤧᤏᤧ᤹ᤀᤥ ᤔᤧᤍᤠᤖᤢᤱᤛᤡᤱᤅᤡᤴ ᤂᤧᤱᤜᤠ᤹ᤖᤧ ᤁᤢᤗᤧᤰᤘᤠ ᤀᤠᤱᤃᤠ᤹ᤀᤣ ᤜᤢᤅᤢᤱ॥ ᤛᤧᤴᤍᤡᤰ ᤀᤡᤃᤪ ᤗᤧᤴᤍᤡᤰ ᤀᤠᤓᤧᤸᤗᤧᤛᤠᤱ ᤁᤧᤖᤧᤰ ᤁᤧᤔᤠᤒᤠᤜᤠ᤹ᤖᤧ ᤁᤢᤔᤧᤴᤏᤠᤱ ᤂᤧᤏᤧ᤹ ᤀᤠᤱᤃᤠ᤹ᤀᤣ ᤁᤧᤃᤢ᤺ᤳᤋᤠᤱ॥ 40 ᤗᤧᤴᤍᤡᤰᤐᤠ ᤜᤠᤱᤘᤠ ᤛᤧ᤺ᤰᤔᤠᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤋᤖᤠᤱ ᤜᤧᤰᤁᤩᤠᤱ ᤛᤧᤴᤍᤡᤰᤐᤠ ᤆᤢᤱᤛᤡ᤺ᤰᤔᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤔᤡᤰᤁᤣ ᤔᤧᤕᤢᤛᤧᤴ॥ 41 ᤜᤧᤰᤁᤣᤗ᤹ᤖᤡᤰ ᤏᤡᤒᤥᤱ ᤋᤱᤒᤣ ᤂᤠᤖᤠᤰ ᤀᤠᤱᤃᤠ᤹ ᤁᤧᤕᤠ᤺ᤶᤒᤰ ᤆᤥᤃᤢᤱ ᤐᤡᤏᤧᤀᤠᤱ ᤘᤕᤧ॥ ᤁᤧᤛ᤻ᤛᤠ ᤔᤧᤴᤇᤢᤔᤠ ᤏᤧᤳᤇᤡᤖᤧ ᤗᤠᤃᤡ ᤌᤡᤒᤥᤱᤅᤠᤱ ᤗᤡᤛᤡ ᤋᤱᤒᤣ ᤌᤠᤖᤡᤰ ᤕᤠ᤺ᤶᤒᤰ ᤆᤥᤃᤢᤱ. ᤜᤧᤰᤁᤩᤠᤱ ᤋᤢᤰᤛᤡ ᤋᤱᤒᤣ ᤌᤠᤖᤡᤰ ᤂᤧᤏᤧ᤹ ᤁᤧᤔᤧ᤺ᤴᤍᤠ ᤁᤧᤔᤧᤸᤗᤢᤰᤜᤠ᤹ ᤀᤥᤔᤧᤳᤋᤢᤱᤛᤡᤱ॥ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤏᤠᤶᤕᤠᤰᤁᤡᤴ ᤌᤡᤒᤥᤱᤗᤧᤱ ᤌᤠᤖᤡᤰ ᤁᤧᤗᤧᤰᤂᤢ॥ 42 ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ᤑᤢᤔᤠᤱ ᤀᤒᤪᤠᤜᤠᤶᤔᤡᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱ ᤜᤧᤰᤁᤩᤠᤱ ᤀᤠᤶᤒᤠ ᤀᤡᤛᤜᤠᤰᤁᤧᤸᤗᤧ ‘ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤒᤠ’ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤱᤃᤠ᤹ᤏᤢ ᤜᤥ᤺ᤵᤋᤧᤸᤗᤧᤃ ᤂᤧᤏᤧ᤹ ᤀᤠᤱᤃᤠ᤹ ᤌᤣᤎᤡᤰᤁᤠᤱ ᤔᤣ᤺ᤴᤏᤣ ᤁᤢᤄᤠᤗᤧᤶ ᤜᤢᤰ ᤁᤧᤒᤠᤱᤛᤠᤱ ᤁᤧᤍᤣᤛᤠᤱᤒᤠᤔᤧᤴ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤍᤢᤰᤂᤣᤴ ᤏᤢ ᤀᤠᤱᤃᤠ᤹ ᤛᤠᤰᤋᤧᤖ ᤆᤥᤃᤢᤱᤒᤠ ᤀᤠᤕᤠ᤺ᤶᤒᤰᤁᤡᤴ ᤏᤡᤛᤢᤀᤠᤱ ᤔᤡ᤺ᤵᤔᤠ ᤛᤧᤴᤍᤡᤰ ᤂᤧᤏᤧ᤹ ᤐᤠᤴ ᤁᤧᤔᤧᤳᤋᤧᤒᤠᤖᤥ॥” ᤕᤠᤁᤢᤒ ᤏᤢ ᤗᤠᤒᤠᤏᤖᤧ ᤆᤥᤃᤧᤳᤇᤢᤒᤠ ᤔᤠᤱᤜᤧᤰ 43 ᤂᤧᤒᤩᤠᤱ ᤗᤠᤒᤠᤏᤧᤸᤗᤧ ᤕᤠᤁᤢᤒᤧᤴ ᤏᤥᤃᤵ ᤐᤡᤖᤢ. “ᤁᤴ ᤔᤧᤴᤇᤢᤔᤠᤜᤠ᤹ ᤀᤠᤱᤃᤠ᤹ᤀᤣ ᤀᤠᤛ᤻ᤛᤠ ᤔᤧᤴᤇᤢᤔᤠᤛᤡ॥ ᤜᤧᤰᤁᤩᤠᤱ ᤁᤱ ᤜᤡᤴᤈᤠ᤹ᤜᤠ᤹ ᤀᤠᤱᤃᤠ᤹ᤀᤣ ᤀᤠᤶᤔᤧᤴᤇᤠ᤹ᤛᤡ. ᤜᤧᤰᤁᤩᤠᤱ ᤁᤧᤃᤳᤋᤢᤒᤠ ᤌᤰᤛᤠᤗᤢᤵᤜᤠ᤹ ᤁᤧᤖᤧᤰ ᤀᤠᤱᤃᤠ᤹ᤀᤡᤴᤇᤡ॥ ᤜᤧᤰᤁᤩᤠᤱ ᤂᤧᤏᤧ᤹ ᤁ᤹ᤕᤥ ᤁᤧᤏᤡᤛᤢᤛᤡᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤱᤃᤠ᤹ᤀᤡᤴᤇᤡ॥ ᤁᤖ ᤀᤠᤀᤡᤴ ᤀᤠᤱᤃᤠ᤹ ᤀᤠᤛ᤻ᤛᤠᤜᤠ᤹ ᤏᤢ ᤀᤠᤶᤔᤧᤴᤇᤠ᤹ᤜᤠ᤹ ᤀᤠᤱᤃᤠ᤹ᤏᤢ ᤘᤕᤧᤶᤔᤧ᤹ ᤑᤠ᤹ᤀᤠᤱ ᤌᤣ ᤔᤧᤵᤔᤠ ᤛᤢᤰᤋᤢᤱᤛᤡᤱᤅᤠᤱᤒᤣ᥅ 44 ᤀᤠᤸᤗ ᤂᤧᤏᤧ᤹ ᤁᤳᤏᤠ ᤑᤧᤖᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤏᤢ ᤀᤠᤱᤃᤠ᤹ ᤗᤳᤇᤠ ᤔᤠᤱᤜᤧᤰ ᤌᤡᤰ ᤆᤥ᤺ᤰᤛᤢ. ᤜᤧᤰᤁᤩᤠᤱ ᤒᤠᤂᤧᤴ ᤀᤠᤴᤇᤡ᤹ ᤗᤢᤶᤔᤥ ᤋᤥ᤺ᤴᤍᤡ ᤋᤛᤡ ᤐᤥᤱᤗ॥” 45 ᤂᤧᤒᤩᤠᤱ ᤕᤠᤁᤢᤒᤧᤸᤗᤧ ᤏᤡᤱᤘᤠ᤹ᤛᤥᤰᤗᤧ ᤗᤠᤃᤡ ᤗᤳᤇᤠ ᤗᤢᤱᤎᤡᤰ ᤋᤠᤖᤢᤀᤠᤱ ᤛᤡᤳᤗᤠᤱ ᤁᤢᤀᤡᤛᤡᤰ ᤋᤰᤐᤧᤳ ᤕᤧᤵᤛᤢ॥ 46 ᤜᤧᤰᤁᤩᤠᤱ ᤕᤠᤁᤢᤒᤧᤸᤗᤧ ᤁᤢᤃᤠ᤹ᤀᤡᤜᤠ᤹ ᤔᤧᤳᤋᤢᤛᤡ ᤂᤡᤏᤡ᤹ᤀᤠᤱ ᤗᤢᤱᤜᤠ᤹ ᤋᤠᤖᤧᤶᤔᤧ᤹॥ ᤂᤧᤱᤜᤠ᤹ᤖᤧ ᤗᤢᤱᤜᤠ᤹ ᤔᤧᤍᤠᤖᤢᤀᤠᤱ ᤗᤳᤇᤠᤍᤧᤴᤏᤥ ᤔᤧᤗᤢᤵᤛᤢ ᤜᤧᤰᤁᤩᤠᤱ ᤒᤠᤂᤧᤵᤔᤥ ᤂᤧᤱᤜᤠ᤹ᤖᤧ ᤔᤧᤈ ᤔᤧᤎᤢᤅᤢ॥ 47 ᤗᤠᤒᤠᤏᤧᤸᤗᤧ ᤂᤧᤴ ᤗᤢᤱ ᤔᤧᤗᤢᤵᤛᤢᤒᤠ ᤋᤧᤴᤏᤡᤴᤗᤧ ᤁᤢᤔᤡᤱ ᤕᤃᤖ-ᤛᤜᤍᤋᤠ ᤕᤢᤰᤂᤢ. ᤜᤧᤰᤁᤩᤠᤱ ᤕᤠᤁᤢᤒᤧᤸᤗᤧ ᤂᤧᤴ ᤃᤗᤧᤍ ᤔᤧᤳᤋᤢ॥ 48 ᤗᤠᤒᤠᤏᤧᤸᤗᤧ ᤕᤠᤁᤢᤒᤧᤴ ᤔᤧᤳᤋᤢ. “ᤀᤠᤀᤡᤴ ᤁᤴ ᤗᤢᤱ ᤗᤢᤶᤔᤏᤠᤒᤠ ᤋᤧᤴᤏᤡᤴ ᤂᤧᤏᤧ᤹ ᤏᤢ ᤀᤠᤱᤃᤠ᤹ ᤀᤠᤗᤢᤶᤔᤥ ᤐᤷᤔᤠᤱᤃᤡ ᤜᤧᤰᤁᤣ ᤕᤧᤵᤗᤥ॥” ᤂᤧᤸᤗᤧᤆᤥᤃᤢᤸᤗᤧ ᤂᤧᤸᤗᤧ ᤁᤢᤔᤡᤱ ᤃᤠᤗᤡᤍ ᤔᤡᤱ ᤔᤧᤕᤢᤰᤂᤢ॥ 49 ᤂᤧᤴ ᤔᤡᤛ᤻ᤐᤠᤀᤠᤱ ᤔᤧᤔᤧᤳᤋᤢ. ᤌᤣᤀᤠᤱᤓᤧᤸᤗᤧ ᤗᤠᤒᤠᤏᤧᤸᤗᤧ ᤐᤠ᤺ᤳᤋᤢ. “ᤀᤠᤴᤇᤡ᤹ ᤀᤣ᤹ᤀᤣ ᤀᤠᤛᤧᤴᤍᤧᤇᤡᤛᤠᤱ ᤂᤧᤏᤧ᤹ ᤏᤢ ᤀᤠᤱᤃᤠ᤹ ᤗᤢᤶᤔᤥ ᤕᤜᤘᤣ ᤍᤠᤱᤒᤠᤸᤗᤧ ᤀᤠᤳᤇᤡ᤹ ᤏᤧᤵᤔᤠᤱ ᤀᤥᤀᤠᤔᤧᤳᤇᤡᤖ॥” 50 ᤗᤠᤒᤠᤏᤧᤸᤗᤧ ᤕᤠᤶᤔᤥ ᤐᤠ᤺ᤳᤋᤢ. “ᤂᤧᤏᤧ᤹ ᤀᤠᤱᤃᤠ᤹ ᤀᤠᤛ᤻ᤛᤠᤜᤠ᤹ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤳᤋᤢᤛᤡᤏᤣ ᤑᤠᤃᤪ ᤜᤧᤰᤁᤩᤠᤱ ᤀᤠᤛ᤻ᤛᤠᤜᤠ᤹ᤏᤢ᤺ᤸᤗᤧ ᤘᤣ᤹ ᤀᤣᤕᤠᤱᤔᤠ ᤔᤣ᤺ᤳ ᤁᤧᤍᤠᤖᤢᤛᤡᤏᤣ ᤑᤠᤃᤪ ᤀᤠᤴᤇᤡ᤹ ᤗᤢᤶᤔᤥ ᤜᤠ᤺ᤳᤋᤠᤱ ᤔᤧᤜᤥ᤺ᤵᤛᤠᤱ ᤂᤧᤏᤧ᤹ ᤏᤢ ᤀᤠᤱᤃᤠ᤹ ᤀᤠᤴᤇᤡ᤹ ᤗᤢᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤏᤡᤒᤠ ᤘᤠ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡᤳᤋᤧ᤹ᤀᤥ॥” 51 ᤗᤠᤒᤠᤏᤧᤸᤗᤧ ᤕᤠᤁᤢᤒᤧᤴ ᤕᤠᤶᤔᤥ ᤔᤧᤳᤋᤢ. “ᤂᤧᤏᤧ᤹ ᤏᤢ ᤀᤠᤱᤃᤠ᤹ ᤗᤢᤶᤔᤥ ᤏᤡᤱᤘᤠ᤹ᤛᤥᤰᤗᤧ ᤗᤠᤃᤡ ᤗᤢᤵᤛᤢᤱᤒᤠ ᤗᤢᤱᤅᤡᤴ ᤜᤧᤰᤁᤩᤠᤱ ᤗᤢᤱᤛᤡᤳᤗᤠᤱᤅᤡᤴ ᤀᤥᤔᤧᤳᤋᤧ᤹॥ 52 ᤏᤡᤱᤘᤠ᤹ᤛᤥᤰᤗᤧ ᤗᤠᤃᤡ ᤗᤢᤶᤔᤏᤠᤒᤠ ᤁᤴ ᤗᤢᤱᤅᤡᤴ ᤏᤢ ᤁᤴ ᤛᤡᤳᤗᤠᤱᤅᤡᤴ ᤐᤷᤔᤠᤱᤃᤡ ᤋᤥ᤺ᤴᤍᤡ ᤐᤥᤱᤗ. ᤁᤴ ᤗᤢᤱ ᤗᤢᤶᤔᤏᤠᤒᤠ ᤋᤧᤴᤏᤡᤴ ᤁᤠ᤺ᤰᤋᤢᤱᤅᤠᤱ ᤏᤠᤜᤠᤱᤍᤠᤱ ᤀᤠᤱᤃᤠ᤹ ᤂᤧᤏᤧ᤹ᤀᤥ ᤜᤠᤴᤋᤡ ᤆᤥ᤺ᤰᤛᤧ ᤔᤧᤓᤧᤴᤀᤠᤴ ᤜᤧᤰᤁᤩᤠᤱ ᤂᤧᤏᤧ᤹ᤀᤠᤱ ᤏᤡᤱᤘᤠ᤹ᤛᤥᤰᤗᤧ ᤗᤠᤃᤡ ᤁᤴ ᤗᤢᤶᤔᤏᤠᤒᤠ ᤗᤢᤱᤅᤡᤴ ᤏᤢ ᤛᤡᤳᤗᤠᤱᤅᤡᤴ ᤔᤧᤃᤠ᤺ᤰᤋᤧᤴᤏᤧ᤹ᤀᤠᤱ ᤀᤠᤱᤃᤠ᤹ᤀᤥ ᤜᤠᤴᤋᤡ ᤆᤥ᤺ᤰᤛᤧ ᤔᤧᤶᤓᤧᤴᤏᤧ᤹॥ 53 ᤀᤒᤪᤠᤜᤠᤶᤔᤡᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱ ᤜᤧᤰᤁᤩᤠᤱ ᤏᤠᤜᤥᤖᤗᤧ ᤁᤢᤏᤡᤱᤘᤠ᤹ᤑᤢᤔᤠᤱ ᤜᤧᤰᤁᤩᤠᤱ ᤂᤢᤴᤇᤡ᤹ ᤐᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤴᤇᤡ᤹ ᤗᤢᤶᤔᤥ ᤂᤠᤛᤧᤴ ᤆᤥᤃᤢᤖ॥” ᤂᤧᤸᤗᤧᤆᤥᤃᤢᤸᤗᤧ ᤁᤢᤶᤒᤠ ᤀᤡᤛᤜᤠᤁᤖᤧ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤕᤠᤁᤢᤒᤧᤴ ᤔᤠᤱᤜᤧᤰᤛᤡᤱ॥ 54 ᤕᤠᤁᤢᤒᤧᤸᤗᤧ ᤂᤧᤴ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤀᤥ ᤁᤧᤏᤧᤒᤠ ᤗᤠᤈᤣ᤹ᤀᤥ ᤛᤡᤍᤢᤱᤈᤓᤠ ᤋᤥ᤺ᤴᤍᤢ. ᤜᤧᤰᤁᤩᤠᤱ ᤁᤢᤃᤠ᤹ᤀᤡᤜᤠ᤹ ᤁᤢᤈᤠ ᤆᤠᤛᤧ ᤀᤢ᤺ᤳᤋᤢᤛᤡᤀᤠᤱ ᤔᤧᤈ ᤔᤧᤎᤢᤅᤢ॥ ᤂᤧᤴ ᤛᤧᤴᤍᤡᤰ ᤂᤧᤱᤜᤠ᤹ ᤀᤠᤶᤓᤠ ᤂᤧᤵᤔᤥᤀᤣ ᤔᤧᤏᤧᤛ᤻ᤛᤧ॥ 55 ᤗᤠᤒᤠᤏᤧᤴ ᤋᤠᤏᤠᤶᤛᤠ ᤐᤥᤃᤧᤀᤠᤱ ᤁᤢᤛ᤻ᤛᤠᤜᤠ᤹ ᤏᤢ ᤁᤢᤶᤔᤧᤴᤇᤠ᤹ᤜᤠ᤹ ᤆᤢᤵ ᤔᤧᤳᤋᤢᤛᤡᤀᤠᤱ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤛᤡ॥ ᤂᤧᤒᤩᤠᤱ ᤂᤢᤏᤧ᤹ ᤛᤧᤶᤔᤢᤀᤡ ᤐᤥ᤺ᤰᤂᤧᤀᤠᤱ ᤜᤡᤶᤔᤥ ᤏᤢ᤺ᤰᤂᤧ ᤐᤣᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.