ᤋᤥᤗᤡᤱᤛᤥᤔᤢ 30 - LIFOTNT1 ᤖᤠᤜᤣᤗᤖᤧ ᤕᤠᤁᤢᤒᤗᤠᤶ ᤁᤢᤛ᤻ᤛᤠ ᤔᤧᤒᤥ᤺ᤰᤂᤧᤶᤒᤠ ᤏᤡᤛᤢᤀᤠᤱ ᤀᤠᤒᤠᤅᤣ ᤁᤢᤴᤏᤧ᤹ ᤏᤠᤜᤧᤵᤔᤠ ᤜᤣ᤺ᤰᤋᤢ॥ ᤂᤧᤸᤗᤧ ᤕᤠᤁᤢᤒᤧᤴ ᤔᤧᤳᤋᤢ. “ᤀᤠᤱᤃᤠ᤹ᤀᤠᤱ ᤀᤅᤧ᤺ᤰᤘᤠ ᤛᤠ ᤐᤡᤖᤠᤱᤅᤧ᤹ ᤔᤣ᤺ᤴᤏᤧᤑᤃᤪ ᤛᤡᤀᤠᤖᤥ॥” 2 ᤕᤠᤁᤢᤒᤧᤴ ᤁᤢᤛᤡᤰ ᤐᤥᤃᤧᤀᤠᤱ ᤔᤧᤳᤋᤢ. “ᤌᤣ ᤂᤧᤏᤧ᤹ ᤛᤠᤔᤧᤱᤃᤵᤔᤏᤠᤔᤠ ᤆᤥ᤺ᤰᤔᤠ ᤁᤧᤛᤢᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤧᤴᤏᤥ ᤀᤠᤱᤃᤠ᤹ ᤘᤠᤀᤠᤒᤡ᥅” 3 ᤂᤧᤒᤩᤠᤱ ᤖᤠᤜᤣᤗᤖᤧ ᤔᤧᤳᤋᤢ. “ᤀᤠᤛᤧᤘᤠᤖᤥᤔᤠ ᤒᤡᤸᤜᤠᤴ ᤀᤥᤄᤠ ᤁ᤹ᤕᤥ ᤘᤠ᤹. ᤂᤧᤴᤏᤢ ᤀᤡᤵᤛᤧ᤹॥ ᤜᤧᤰᤁᤩᤠᤱ ᤂᤧᤸᤗᤧ ᤀᤠᤗᤠᤃᤡ ᤀᤅᤧ᤺ᤰᤘᤠ ᤁᤳᤋᤢ ᤐᤡᤀᤠᤖ. ᤜᤧᤰᤁᤩᤠᤱ ᤀᤠᤱᤃᤠ᤹ᤀᤠᤱ ᤀᤠᤜᤡᤶᤛᤕᤱ ᤔᤧᤒᤥᤱᤗ॥” 4 ᤂᤧᤸᤗᤧᤆᤥᤃᤢᤸᤗᤧ ᤖᤠᤜᤣᤗᤖᤧ ᤀᤠᤒᤠᤅᤣ ᤁᤢᤛᤧᤘᤠᤖᤥᤔᤠ ᤒᤡᤸᤜᤠᤴ ᤕᤠᤁᤢᤒᤖᤧ ᤁᤢᤔᤣᤳ ᤜᤧᤰᤁᤣ ᤐᤡᤖᤢ. ᤜᤧᤰᤁᤩᤠᤱ ᤕᤠᤁᤢᤒᤧᤴ ᤂᤧᤴᤏᤢ ᤀᤡᤵᤛᤧ॥ 5 ᤜᤧᤰᤁᤩᤠᤱ ᤒᤡᤸᤜᤠᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤕᤠᤁᤢᤒᤗᤠᤶ ᤗᤳᤇᤠ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ॥ 6 ᤂᤧᤒᤩᤠᤱ ᤖᤠᤜᤣᤗᤖᤧ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤗᤧᤵᤔᤠᤱ ᤂᤠᤛᤧᤴ ᤗᤥ᤺ᤴᤍᤠᤱ ᤐᤡᤖᤠᤱ. ᤜᤧᤰᤁᤩᤠᤱ ᤀᤠᤒᤣᤗᤡᤴ ᤂᤧᤵᤛᤢᤀᤠᤱ ᤕᤧᤶᤒᤡᤳᤇᤠ ᤛᤠᤎᤡᤰ ᤐᤡᤖᤠᤱ॥” ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤀᤅᤧ᤺ᤰᤘᤠᤴ ᤍᤠᤏ ᤔᤡᤱ ᤘᤠ᤺ᤳᤋᤢ॥ 7 ᤖᤠᤜᤣᤗᤖᤧ ᤁᤢᤛᤧᤘᤠᤖᤥᤔᤠ ᤒᤡᤸᤜᤠᤴ ᤕᤠᤶᤔᤥ ᤔᤧᤴᤇᤢᤰᤔᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤧᤸᤗᤧ ᤕᤠᤁᤢᤒᤗᤠᤶ ᤘᤣ᤹ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ॥ 8 ᤂᤧᤒᤩᤠᤱ ᤖᤠᤜᤣᤗᤖᤧ ᤐᤠ᤺ᤳᤋᤢ. “ᤀᤠᤴᤏᤧ᤹ᤏᤢ ᤛᤠ᤹ᤖᤡᤰᤁᤣ ᤌᤰᤋᤠᤱ ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤠ᤺ᤴᤍᤢᤱ॥” ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤂᤧᤴ ᤀᤅᤧ᤺ᤰᤘᤠᤴ ᤏᤵᤋᤠᤗᤡ ᤔᤡᤱ ᤘᤠ᤺ᤳᤋᤢ॥ 9 ᤜᤠᤒᤠ ᤂᤧᤴ ᤕᤧᤶᤔᤥ ᤗᤡᤀᤠ᤺ᤸᤗᤧ ᤀᤠᤱᤃᤠ᤹ ᤛᤠᤃᤵᤔᤠ ᤏᤠ᤹ᤖᤠᤱ ᤁᤧᤗ᤹ᤒᤠ ᤏᤡᤛᤢᤀᤠᤱ ᤁᤢᤛᤧᤘᤠᤖᤥᤔᤠ ᤈᤡᤸᤐᤠᤴ ᤋᤣ᤹ᤖᤢᤀᤠᤱ ᤕᤠᤁᤢᤒᤧᤴ ᤁᤢᤔᤣᤳ ᤆᤥ᤺ᤰᤛᤧ ᤐᤡᤖᤢ॥ 10 ᤂᤧᤒᤩᤠᤱ ᤈᤡᤸᤐᤠ᤺ᤸᤗᤧ ᤕᤠᤁᤢᤒᤗᤠᤶ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ॥ 11 ᤗᤡᤀᤠ᤺ᤸᤗᤧ “ᤀᤠᤱᤃᤠ᤹ ᤛᤠ᤹ᤖᤡᤰ ᤁᤢᤍ᤹ᤕᤠᤴ ᤁᤧᤏᤢ᤹ᤔᤠᤀᤠᤖᤥ” ᤐᤠ᤺ᤳᤋᤢ॥ ᤂᤧᤸᤗᤧᤆᤥᤃᤢᤸᤗᤧ ᤀᤅᤧ᤺ᤰᤘᤠᤴ ᤃᤠᤍ ᤔᤡᤱ ᤘᤠ᤺ᤳᤋᤢ॥ 12 ᤗᤡᤀᤠ᤺ᤸᤗᤧ ᤁᤢᤛᤧᤘᤠᤖᤥᤔᤠ ᤈᤡᤸᤐᤠᤖᤧ ᤕᤠᤁᤢᤒᤗᤠᤶ ᤕᤠᤶᤔᤥ ᤘᤣ᤹ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ॥ 13 ᤜᤧᤰᤁᤩᤠᤱ ᤗᤡᤀᤠ᤺ᤸᤗᤧ ᤐᤠ᤺ᤳᤋᤢ. “ᤀᤠᤱᤃᤠ᤹ ᤁᤢᤏᤡᤱᤘᤠ᤹ ᤕᤧᤕᤧ ᤁᤧᤗ᤹ᤔᤠᤀᤠᤖᤥ॥ ᤀᤠᤸᤗ ᤔᤧᤴᤇᤢᤔᤠᤜᤠ᤹ᤖᤧ ᤀᤠᤱᤃᤠ᤹ ᤁᤧᤛ᤺ᤵᤔᤠ ᤔᤧᤔᤧᤳᤋᤠ॥” ᤂᤧᤸᤗᤧᤆᤥᤃᤢᤸᤗᤧ ᤀᤅᤧ᤺ᤰᤘᤠᤴ ᤀᤠᤛᤣᤖ ᤔᤡᤱ ᤘᤠ᤺ᤳᤋᤢ॥ 14 ᤔᤠᤛᤡ ᤜᤧᤰᤔᤠ ᤕᤧᤶᤔᤥ ᤖᤢᤒᤧᤏᤧᤴ ᤐᤩᤠᤱᤛᤡᤀᤥ ᤐᤣᤃᤧ. ᤜᤧᤰᤁᤩᤠᤱ ᤀᤠᤔᤔᤒᤠ ᤛᤡᤱᤛᤣ᤹ᤜᤠ᤹ ᤂᤥᤛᤢ ᤋᤠᤖᤢᤀᤠᤱ ᤂᤧᤴ ᤁᤢᤶᤔᤠ ᤗᤡᤀᤠ᤺ᤴ ᤐᤡᤖᤢ॥ ᤖᤠᤜᤣᤗᤖᤧ ᤗᤡᤀᤠ᤺ᤴ ᤔᤧᤳᤋᤢ. “ᤁᤧᤛᤠ᤺ᤸᤗᤧ ᤋᤠᤖᤢᤒᤠ ᤛᤡᤱᤛᤣᤜᤠ᤹ ᤀᤠᤱᤃᤠ᤹ᤈᤡ ᤀᤠᤈᤧ᤺ᤳᤇᤡᤰ ᤐᤡᤖᤠᤱᤅᤧ᤹ᤏᤠ॥” 15 ᤁᤖ ᤗᤡᤀᤠ᤺ᤸᤗᤧ ᤂᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤕᤧᤶᤒᤠᤴ ᤁᤧᤏᤠᤵᤋᤠᤱᤅᤠᤱᤛᤠᤱ ᤁᤧᤏᤡᤱᤘᤠ᤹ ᤔᤧᤍᤩᤧᤏᤧᤶᤒᤡ᥅ ᤀᤠᤸᤗ ᤂᤧᤏᤧ᤹ ᤀᤠᤛᤠ᤺ᤸᤗᤧ ᤋᤠᤖᤢᤒᤠ ᤔᤧᤴᤍᤪᤧᤰ ᤔᤧᤵᤔᤏᤠᤒᤠ ᤕᤠ᤺ᤴᤏᤡᤴ ᤋᤣ᤹ᤔᤠ ᤁᤧᤃᤥ᤺ᤳᤋᤢᤒᤡ᥅” ᤖᤠᤜᤣᤗᤖᤧ ᤔᤧᤳᤋᤢ. “ᤁᤧᤛᤠ᤺ᤸᤗᤧ ᤋᤠᤖᤢᤒᤠ ᤔᤧᤴᤍᤪᤧᤰ ᤕᤠ᤺ᤴᤏᤡᤴ ᤁᤧᤒᤡᤀᤠᤏᤧᤓᤃᤪ ᤀᤠᤀᤡᤴ ᤛᤧᤴᤍᤡᤰ ᤕᤠᤁᤢᤒᤧᤴᤏᤢ ᤀᤡᤶᤔᤠ ᤁᤧᤛᤢᤰ॥” 16 ᤕᤢ᤺ᤴᤇᤡᤰ ᤕᤠᤁᤢᤒᤧᤴ ᤐᤩᤠᤱᤛᤡᤀᤥᤗᤠᤶ ᤁᤧᤖᤧᤍᤩᤧ ᤜᤧᤰᤁᤩᤠᤱ ᤗᤡᤀᤠ᤺ᤴ ᤂᤢᤏᤧ᤹ ᤁᤢᤍᤢᤶᤛᤧ ᤐᤣᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤀᤠᤀᤡᤴ ᤛᤧᤴᤍᤡᤰ ᤀᤠᤱᤃᤠ᤹ᤏᤢ ᤁᤧᤀᤡᤶᤗ ᤐᤥᤱ. ᤌᤣᤀᤠᤱᤓᤧᤸᤗᤧ ᤀᤠᤛᤠ᤺ᤸᤗᤧ ᤋᤠᤖᤢᤒᤠ ᤔᤧᤴᤍᤪᤧᤰ ᤕᤠ᤺ᤴᤏᤡᤸᤗᤧ ᤂᤧᤏᤧ᤹ ᤌᤧ᤹ᤏᤧᤀᤠᤱ ᤘᤠ᤹॥” ᤂᤧᤸᤗᤧᤆᤥᤃᤢᤸᤗᤧ ᤕᤠᤁᤢᤒᤧᤴ ᤂᤧᤴ ᤛᤧᤴᤍᤡᤰ ᤗᤡᤀᤠ᤺ᤴᤏᤢ ᤀᤡᤵᤛᤧ॥ 17 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤡᤀᤠ᤺ᤸᤗᤧ ᤁᤢᤒᤣᤗᤡᤴ ᤂᤧᤵᤛᤢ ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤕᤠᤁᤢᤒᤗᤠᤶ ᤂᤧᤸᤗᤧ ᤅᤠᤛᤡᤃᤣᤰᤐᤠ ᤕᤧᤶᤒᤡᤳᤇᤠᤛᤠ ᤁᤳᤋᤢ॥ 18 ᤂᤧᤒᤩᤠᤱ ᤗᤡᤀᤠ᤺ᤸᤗᤧ ᤐᤠ᤺ᤳᤋᤢ. “ᤀᤠᤱᤃᤠ᤹ ᤀᤠᤛᤧᤘᤠᤖᤥᤔᤠᤴ ᤀᤠᤜᤡᤶᤛᤠᤒᤧᤴ ᤐᤡᤖᤢᤱᤒᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤌᤢᤶᤄᤥ ᤐᤡᤖᤠᤱᤗᤥ॥” ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤂᤧᤴ ᤀᤡᤛ᤻ᤛᤠᤁᤠᤖ ᤔᤡᤱ ᤘᤠ᤺ᤳᤋᤢ॥ 19 ᤗᤡᤀᤠ᤺ᤴ ᤕᤠᤶᤔᤥᤀᤠᤱ ᤔᤧᤴᤇᤢᤰᤔᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤕᤠᤁᤢᤒᤗᤠᤶ ᤋᤢᤰᤛᤡᤃᤣ᤺ᤰᤐᤠ ᤕᤧᤶᤒᤡᤳᤇᤠᤛᤠ ᤁᤳᤋᤢ॥ 20 ᤂᤧᤸᤗᤧ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤏᤢᤒᤠ ᤔᤡᤰᤋᤥᤰ ᤐᤡᤖᤠᤱᤗᤥ॥ ᤀᤠᤸᤗ ᤀᤠᤕᤧᤶᤒᤠ᤺ᤸᤗᤧ ᤀᤠᤱᤃᤠ᤹ ᤀᤡᤱᤎᤠᤱ ᤐᤡᤀᤠᤒᤠ ᤐᤥ᤺ᤰᤂᤧ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤋᤢᤰᤛᤡ ᤕᤧᤶᤒᤡᤳᤇᤠᤛᤠᤜᤠ᤹ ᤂᤢᤏᤧ᤹ ᤁᤳᤋᤢᤱ ᤐᤡᤖᤢᤱᤅᤠᤱ ᤘᤠ᤹” ᤂᤧᤸᤗᤧᤆᤥᤃᤢᤸᤗᤧ ᤀᤅᤧ᤺ᤰᤘᤠᤴ ᤈᤒᤢᤗᤢᤏ ᤔᤡᤱ ᤘᤠ᤺ᤳᤋᤢ॥ 21 ᤂᤧᤴ ᤀᤣᤃᤠᤱ ᤂᤧᤸᤗᤧ ᤗᤳᤇᤠ ᤔᤧᤴᤇᤢᤔᤠ ᤛᤠᤎᤡᤰ ᤁᤳᤋᤢ. ᤜᤧᤰᤁᤩᤠᤱ ᤂᤧᤸᤗᤧ ᤂᤧᤴ ᤀᤅᤧ᤺ᤰᤘᤠᤴ ᤍᤡᤏᤠ ᤔᤡᤱ ᤘᤠ᤺ᤳᤋᤢ॥ 22 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤖᤠᤜᤣᤸᤗᤧᤴ ᤏᤡᤱᤘᤠ᤹ ᤀᤡ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤒᤣᤗᤡᤴ ᤂᤧᤵᤛᤢᤀᤠᤱ ᤛᤠᤃᤵᤔᤠ ᤁᤧᤛᤢᤰᤔᤠ ᤆᤥᤃᤢ॥ 23 ᤂᤧᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤗᤳᤇᤠ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤜᤡᤏᤠ᤺ᤶ ᤔᤧᤈᤥᤃᤠᤱᤒᤠᤴ ᤂᤧᤳᤋᤢᤍᤣᤛᤢ ᤐᤡᤖᤠᤱᤗᤥ॥” 24 ᤜᤧᤰᤁᤩᤠᤱ “ᤕᤜᤘᤣ ᤍᤠᤱᤒᤠᤸᤗᤧ ᤕᤠᤶᤔᤥ ᤘᤣ᤹ ᤛᤠᤀᤠᤱ ᤐᤡᤀᤠᤖ” ᤑᤠ᤹ᤀᤠᤱ ᤂᤧᤴ ᤀᤅᤧ᤺ᤰᤘᤠᤴ ᤂᤢᤏᤧ᤹ ᤕᤢᤛᤢᤑ ᤔᤡᤱ ᤘᤠ᤺ᤳᤋᤢ॥ ᤕᤠᤁᤢᤒᤖᤧ ᤗᤠᤒᤠᤏᤧᤴ ᤁᤢᤔᤧᤴ ᤏᤠ᤺ᤰᤋᤢ᤹ 25 ᤖᤠᤜᤣᤗᤖᤧ ᤕᤢᤛᤢᤑᤧᤴ ᤛᤠᤘᤠ᤺ᤴᤍᤢᤒᤠ ᤁᤢᤓᤠ ᤕᤧᤶ ᤀᤣᤃᤠᤱ ᤕᤠᤁᤢᤒᤖᤧ ᤗᤠᤒᤠᤴᤏᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤐᤣ᤺ᤰᤔᤠ ᤑᤠ᤺ᤰᤋᤠᤱᤅᤧ᤹ ᤂᤧᤒᤩᤠᤱ ᤀᤠᤱᤃᤠ᤹ ᤐᤣ᤺ᤰᤁᤠ॥ 26 ᤀᤠᤱᤃᤠ᤹ ᤀᤠᤔᤣ᤺ᤳᤜᤠ᤹ ᤏᤢ ᤀᤠᤛ᤻ᤛᤠᤜᤠ᤹ ᤋᤣ᤹ᤔᤠᤛᤡᤀᤠᤱ ᤐᤣ᤺ᤰᤔᤠ ᤑᤠ᤺ᤰᤋᤠᤱᤅᤧ᤹. ᤂᤧᤱᤜᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤁᤧᤕᤠ᤺ᤶᤒᤰ ᤁᤧᤛᤧᤘᤠ ᤆᤥᤃᤢᤱᤅᤠᤱ ᤘᤠ᤹॥ ᤀᤠᤱᤃᤠ᤹ ᤁᤧᤛᤧᤘᤠ ᤆᤥᤃᤢᤱᤒᤠᤴ ᤂᤧᤏᤧ᤹ ᤁᤧᤏᤡᤛᤢᤀᤠᤱ ᤘᤠ᤹ᤖᤥ॥” 27 ᤗᤠᤒᤠᤏᤧᤸᤗᤧ ᤏᤥᤃᤵ ᤐᤡᤖᤢ. “ᤀᤠᤱᤃᤠ᤹ ᤁᤧᤛᤡᤖᤠ᤹ ᤌᤠᤱᤅᤠᤏᤣ ᤑᤠᤃᤪ ᤐᤰᤔᤧᤎᤩᤠᤱᤅᤧᤴᤏᤧ᤹॥ ᤂᤧᤏᤧ᤹ ᤁᤵᤔᤥ ᤁᤧᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤀᤠᤱᤃᤠ᤹ ᤔᤢ᤹ᤀᤡᤛᤠᤶ ᤐᤡᤖᤠᤱᤅᤠᤱ ᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤛᤢᤑᤥᤗᤠᤶ ᤀᤠᤱᤃᤠ᤹ ᤏᤡᤛᤢᤱᤅᤠᤱ ᤘᤠ᤹ᤖᤥ॥ 28 ᤀᤠᤓᤩᤠᤖᤡᤰ ᤏᤠᤶᤕᤠᤰ ᤁᤧᤏᤠ᤺ᤰᤋᤢ᤹᥅ ᤀᤠᤱᤃᤠ᤹ ᤔᤧᤳᤋᤠᤱᤅᤧ᤹. ᤂᤧᤶᤓᤩᤠᤖᤡᤰ ᤀᤠᤱᤃᤠ᤹ ᤐᤡᤏᤧ॥” 29 ᤕᤠᤁᤢᤒᤖᤧ ᤗᤠᤒᤠᤏᤧᤴ ᤏᤥᤃᤵ ᤐᤡᤖᤢ. “ᤀᤠᤰᤂᤣᤗ᤹ᤖᤡᤰ ᤁᤧᤕᤠ᤺ᤶᤒᤰ ᤆᤥᤃᤢᤱ. ᤜᤧᤰᤁᤩᤠᤱ ᤁᤧᤎᤰᤛᤠᤜᤠ᤹ ᤀᤠᤃᤶᤒᤪᤠᤱᤅᤥ ᤀᤠᤰᤂᤣᤗ᤹ᤖᤡᤰ ᤔᤧᤒᤥ᤺ᤴᤍᤧ ᤂᤧᤱᤃ ᤂᤧᤏᤧ᤹ᤀᤣ ᤁᤧᤏᤡᤛᤢᤀᤠᤱ ᤘᤠ᤹ᤖᤥ॥ 30 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤋᤠᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤔᤡᤛᤠᤰᤗᤰ ᤁᤧᤃᤳᤋᤢᤛᤡ ᤜᤧᤰᤁᤩᤠᤱ ᤀᤠᤸᤗᤥ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤧᤒᤥᤴᤍᤧᤀᤠᤱ ᤔᤧᤘᤠ᤹॥ ᤀᤠᤱᤃᤠ᤹ ᤆᤥᤃᤢᤱᤒᤠ ᤁᤧᤖᤧᤰ ᤐᤠ᤺ᤴᤏᤥ ᤕᤜᤘᤣ ᤍᤠᤱᤒᤠᤸᤗᤧ ᤔᤢ᤹ᤀᤡᤛᤠᤶ ᤁᤧᤒᤡᤖᤧᤀᤠᤱ ᤁᤧᤘᤠ᤹॥ ᤁᤖ ᤀᤠᤱᤃᤠ᤹ ᤀᤠᤜᤡᤶᤛᤕᤱᤜᤠ᤹ᤖᤧ ᤗᤠᤃᤡ ᤀᤠᤓᤧᤸᤗᤧ ᤕᤠ᤺ᤶᤒᤰ ᤆᤥᤃᤢᤱᤒᤠᤒᤣ᥅” 31 ᤗᤠᤒᤠᤏᤧᤸᤗᤧ ᤕᤠᤶᤔᤥ ᤛᤣ᤺ᤴᤍᤥᤛᤢ. “ᤏᤠᤶᤕᤠᤰ ᤀᤠᤰᤂᤧᤴ ᤆᤠᤜᤠ ᤁᤧᤈᤥᤰ᥅” ᤕᤠᤁᤢᤒᤖᤧ ᤔᤧᤳᤋᤢ. “ᤀᤠᤱᤃᤠ᤹ ᤌᤣᤀᤠᤱ ᤔᤧᤒᤡᤖᤠᤱᤅᤧᤴᤏᤧ᤹॥ ᤂᤧᤏᤧ᤹ ᤀᤠᤱᤃᤠ᤹ ᤀᤠᤗᤠᤃᤡ ᤗᤳᤇᤠ ᤐᤠ᤺ᤴᤎᤡᤰ ᤁᤧᤈᤥᤃᤢᤏᤧᤑᤠ᤹ᤃᤪ ᤁᤧᤎᤰᤛᤠᤜᤠ᤹ ᤜᤠᤒᤠ ᤆᤠᤖᤠᤶᤛᤢᤱᤛᤡᤱ ᤀᤥᤔᤧᤳᤋᤢᤱᤛᤡᤱ ᤐᤡᤏᤧ॥ 32 ᤀᤠᤀᤡᤴ ᤁᤧᤖᤧᤰ ᤁᤧᤎᤰᤛᤠ ᤗᤢᤵᤜᤠ᤹ᤀᤥᤗᤠᤶ ᤔᤠᤰᤋᤠᤱᤒᤠ ᤌᤢ᤺ᤶᤒᤠᤜᤠ᤹. ᤋᤧᤰᤁᤪᤠᤒᤠ ᤏᤢ ᤑᤍᤠᤱᤒᤠ ᤔᤠᤰᤋᤠᤱᤒᤠ ᤁᤢᤶᤒᤪᤡᤰ ᤁᤧᤕᤢᤱᤒᤠ ᤔᤧ᤺ᤴᤍᤠ ᤏᤢ ᤔᤧᤸᤗᤢᤰᤜᤠ᤹ ᤛᤧᤶᤔᤠ ᤗ᤺ᤵᤔᤠᤛᤡ ᤑᤠ᤺ᤰᤋᤠᤱᤅᤧ᤹॥ ᤜᤧᤰᤁᤩᤠᤱ ᤀᤠᤏᤠᤶᤕᤠᤰ ᤜᤠᤒᤠ ᤂᤧᤱᤜᤠ᤹ ᤔᤧᤒᤥᤱᤗ॥ 33 ᤀᤠᤱᤃᤠ᤹ ᤀᤠᤏᤠᤶᤕᤠᤰ ᤁᤧᤒᤡᤀᤠᤸᤗᤧ ᤀᤠᤱᤃᤠ᤹ ᤁᤢᤍᤥ᤺ᤵᤔᤠ ᤆᤥ᤺ᤰᤁᤠᤒᤡ ᤔᤣ᤺ᤶᤒᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤏᤧ᤹ ᤀᤥᤔᤧᤵᤔᤠ ᤀᤢᤛᤢᤖᤢ ᤐᤥᤱ॥ ᤀᤠᤎᤰᤛᤠᤜᤠ᤹ᤀᤥ ᤋᤧᤰᤁᤪᤠᤒᤠ ᤑᤈᤡᤂᤧ᤺ᤱ ᤔᤠᤰᤆᤡᤂᤧ᤺ᤱ ᤔᤣ᤺ᤴᤏᤣᤒᤠ ᤁᤢᤓᤖᤠ ᤏᤢ ᤁᤢᤔᤠᤰᤗᤠ ᤔᤧ᤺ᤴᤍᤠ ᤏᤢ ᤔᤧᤸᤗᤢᤰᤜᤠ᤹ ᤁᤧᤄᤥᤛᤢᤛᤡᤏᤣ ᤑᤠᤃᤪ ᤀᤠᤱᤃᤠ᤹ ᤂᤧᤱᤜᤠ᤹ ᤂᤧᤏᤧ᤹ᤀᤥᤗᤠᤶ ᤂᤢ᤺ᤳᤋᤢᤱᤛᤡᤱᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤄᤥᤛᤢ᤹॥” 34 ᤗᤠᤒᤠᤏᤧᤸᤗᤧ ᤔᤧᤳᤋᤢ. “ᤀᤥ᤺ᤰ. ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤐᤥᤱᤗᤖᤥ॥” 35 ᤒᤠᤂᤧᤴ ᤕᤧᤴᤏᤥ ᤗᤠᤒᤠᤏᤧᤸᤗᤧ ᤑᤈᤡᤄᤧ᤺ᤱ ᤏᤢ ᤔᤠᤰᤆᤡᤄᤧ᤺ᤱ ᤔᤡᤰᤛᤣ᤺ᤴ ᤁᤧᤒᤵᤐᤠ ᤔᤧ᤺ᤴᤍᤔᤠ ᤏᤢ ᤁᤢᤶᤒᤠᤒᤠ ᤔᤧ᤺ᤴᤍᤠᤜᤠ᤹ ᤜᤧᤰᤁᤩᤠᤱ ᤁᤢᤔᤠᤰᤗᤠ ᤌᤢ᤺ᤶᤒᤠᤜᤠ᤹ ᤁᤧᤖᤧᤰ ᤛᤧᤴᤍᤢᤛᤡᤀᤠᤱ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤀᤥᤔᤧᤳᤇᤧ ᤐᤡᤖᤢᤛᤡ॥ 36 ᤜᤧᤰᤁᤩᤠᤱ ᤕᤠᤁᤢᤒᤧᤴ ᤏᤢ ᤂᤢᤴᤇᤡ᤹ᤗᤢᤶᤔᤥ ᤗᤠᤒᤠᤏᤧᤸᤗᤧ ᤛᤢᤶᤕᤧᤴ ᤌᤠᤖᤡᤰᤐᤠ ᤗᤠᤶ ᤗᤠ᤺ᤳᤗᤠ᤺ᤳ ᤆᤥᤃᤢᤀᤠᤱ ᤂᤧᤱᤜᤠ᤹ ᤔᤧᤕᤢᤅᤧ॥ ᤜᤧᤰᤁᤩᤠᤱ ᤕᤠᤁᤢᤒᤖᤧ ᤗᤠᤒᤠᤏᤧᤸᤗᤧ ᤁᤧᤘᤠ᤹ᤒᤠ ᤁᤢᤔᤧ᤺ᤴᤍᤠ ᤁᤢᤔᤧᤸᤗᤢᤰ ᤗᤢᤵᤜᤠ᤹ ᤁᤶᤔᤠ ᤀᤥᤔᤧᤵᤔᤠ ᤜᤣ᤺ᤰᤋᤢᤛᤡ॥ 37 ᤂᤧᤒᤩᤠᤱ ᤕᤠᤁᤢᤒᤖᤧ ᤐᤡᤐᤥᤖ ᤀᤡᤘᤠ᤺ᤳ. ᤂᤧᤱᤈᤠ ᤜᤧᤰᤁᤩᤠᤱ ᤋᤧᤶᤒᤣ᤹ᤀᤥ ᤁᤧᤕᤢᤱᤒᤠ ᤁᤢᤗᤣ᤺ᤳᤗᤠ᤹ ᤛᤡᤱᤒᤥᤖᤠ᤺ᤰᤜᤠ᤹ ᤋᤰᤁᤠᤳ ᤕᤠᤱᤛᤡᤱᤅᤠᤱ ᤂᤧᤱᤜᤠ᤹ᤀᤥ ᤁᤢᤓᤖᤠ ᤁᤢᤛᤠᤵ ᤆᤥ᤺ᤰᤔᤠᤖᤧ ᤗᤠᤃᤡ ᤁᤢᤜᤥᤖᤡᤰᤐᤠᤴ ᤌᤡ᤺ᤰᤋᤢ॥ 38 ᤜᤧᤰᤁᤩᤠᤱ ᤂᤢᤏᤧ᤹ ᤌᤡ᤺ᤰᤋᤢᤒᤠ ᤛᤡᤱᤒᤥᤖᤠ᤺ᤰᤜᤠ᤹ ᤔᤧ᤺ᤴᤍᤠ ᤏᤢ ᤔᤧᤸᤗᤢᤰᤜᤠ᤹ᤖᤧ ᤂᤢᤴᤇᤡ᤹ ᤆᤫᤠ᤺ᤳ ᤌᤢᤱᤔᤠᤍᤧᤴ ᤘᤄᤥ᤺ᤱᤀᤥ ᤕᤧᤵᤛᤢ॥ ᤂᤧᤴ ᤔᤧ᤺ᤴᤍᤠ ᤔᤧᤸᤗᤢᤰᤜᤠ᤹ ᤆᤫᤠ᤺ᤳ ᤌᤢᤱᤛᤧ ᤔᤧᤍᤩᤧ᤺ᤸᤗᤧ ᤂᤧᤱᤜᤠ᤹ ᤜᤠᤒᤠ ᤂᤧᤵᤔᤥ ᤔᤧᤗᤡᤱᤛᤡᤱ ᤔᤧᤗᤠᤶᤛᤡᤱ॥ 39 ᤂᤧᤴ ᤔᤧ᤺ᤴᤍᤠ ᤔᤧᤸᤗᤢᤰ ᤗᤢᤵᤜᤠ᤹ ᤂᤧᤴ ᤋᤰᤁᤠ᤺ᤳᤜᤠ᤹ ᤋᤃᤡ ᤔᤧᤗᤠᤶᤛᤡᤱᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤒᤠᤜᤧᤰᤋᤱᤒᤠ ᤋᤧᤰᤁᤪᤠᤒᤠ. ᤑᤈᤡᤂᤧ᤺ᤱ ᤔᤠᤰᤆᤡᤂᤧ᤺ᤱ ᤁᤧᤗ᤹ᤒᤠ ᤔᤧ᤺ᤴᤍᤈᤩᤠ᤺ᤰ ᤔᤧᤸᤗᤢᤰᤛᤠ᤺ᤳᤜᤠ᤹ ᤔᤧᤎᤠᤵᤋᤢᤛᤡ॥ 40 ᤜᤧᤰᤁᤩᤠᤱ ᤕᤠᤁᤢᤒᤧᤸᤗᤧ ᤜᤧᤰᤋᤱᤒᤠ ᤔᤧ᤺ᤴᤍᤠ ᤔᤧᤸᤗᤢᤰ ᤛᤠ᤺ᤳᤜᤠ᤹ ᤛᤧᤴᤍᤢᤛᤡ ᤜᤧᤰᤁᤩᤠᤱ ᤘᤣ᤹ᤜᤠ᤹ ᤗᤠᤒᤠᤏᤧᤸᤗᤧ ᤑᤈᤡᤄᤧ᤺ᤱ ᤔᤠᤰᤆᤡᤂᤧ᤺ᤱ ᤁᤧᤗ᤹ᤒᤠ ᤁᤢᤔᤧ᤺ᤴᤍᤠ ᤁᤢᤔᤧᤸᤗᤢᤰᤜᤠ᤹ ᤗᤧᤵᤔᤠᤱ ᤜᤡᤛᤢᤛᤡ॥ ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤁᤢᤎᤰᤛᤠ ᤗᤢᤵᤜᤠ᤹ ᤗᤠᤒᤠᤏᤧᤸᤗᤧ ᤁᤢᤔᤧ᤺ᤴᤍᤠ ᤁᤢᤔᤧᤸᤗᤢᤰᤜᤠ᤹ᤏᤢ ᤔᤧᤶᤓᤢᤳᤇᤡᤱᤅᤣ ᤀᤠᤒᤠᤅᤣ ᤁᤢᤗᤠᤃᤡ ᤀᤣ᤺ᤰ ᤁᤳᤋᤢᤛᤡ॥ 41 ᤂᤧᤴ ᤋᤰᤁᤠ᤺ᤳᤜᤠ᤹ ᤋᤃᤡᤀᤣ ᤔᤧᤗᤠᤶᤛᤡᤱᤗ ᤑᤠ᤹ᤀᤠᤱ ᤁᤧᤔᤧ᤹ᤒᤠ ᤔᤧ᤺ᤴᤍᤠ ᤔᤧᤸᤗᤢᤰ ᤗᤢᤵᤜᤠ᤹ ᤔᤧᤗᤠᤶᤛᤡᤱᤅᤧᤸᤗᤧ ᤕᤠᤁᤢᤒᤖᤧ ᤘᤄᤥ᤺ᤱᤅᤥ ᤂᤧᤴ ᤔᤧ᤺ᤴᤍᤠ ᤔᤧᤸᤗᤢᤰ ᤗᤢᤵᤜᤠ᤹ ᤋᤃᤡ ᤂᤧᤴ ᤋᤰᤁᤠ᤺ᤳᤜᤠ᤹ ᤂᤢᤴᤇᤡ ᤔᤡᤰᤁᤡᤸᤗᤧ ᤏᤡᤛᤢᤖ ᤕᤧᤵᤛᤢ॥ 42 ᤁᤖ ᤕᤧ᤺ᤱᤄᤡ᤺ᤰᤂᤡ᤺ᤰᤐᤠ ᤔᤧ᤺ᤴᤍᤠ ᤔᤧᤸᤗᤢᤰᤜᤠ᤹ᤖᤧ ᤗᤠᤃᤡᤃ ᤂᤧᤴ ᤋᤰᤁᤠ᤺ᤳᤜᤠ᤹ ᤔᤧᤕᤧᤵᤛᤢᤴ ᤔᤧᤒᤡᤖᤢᤴᤇᤡᤴ॥ ᤂᤧᤸᤗᤧᤆᤥᤃᤢᤸᤗᤧ ᤕᤧ᤺ᤱᤄᤡ᤺ᤰᤄᤡ᤺ᤰᤐᤠᤜᤠ᤹ ᤗᤠᤒᤠᤏᤧᤸᤗᤧᤴ ᤔᤧᤒᤥ᤺ᤰᤛᤧ ᤜᤧᤰᤁᤩᤠᤱ ᤁᤧᤔᤧ᤹ᤒᤠᤜᤠ᤹ ᤕᤠᤁᤢᤒᤖᤧᤴ ᤔᤧᤒᤥ᤺ᤰᤛᤧ॥ 43 ᤀᤰᤂᤣᤗ᤹ᤖᤡᤰ ᤕᤠᤁᤢᤒᤧᤴ ᤀᤠᤳᤋᤠᤋᤠᤴᤏᤣ ᤕᤠᤱᤛᤠᤁᤢᤴᤎᤣᤛᤠᤒᤠ ᤐᤥ᤺ᤰᤂᤧ॥ ᤂᤢᤏᤧ᤹ ᤕᤖᤡᤰ ᤔᤧ᤺ᤴᤍᤠᤰ. ᤔᤧᤸᤗᤢᤰ ᤗᤢᤵᤜᤠ᤹. ᤛᤧᤘᤠᤖᤥᤒᤠ. ᤛᤧᤘᤠᤖᤥᤔᤠᤜᤠ᤹ ᤜᤧᤰᤁᤩᤠᤱ ᤀᤢᤔᤣᤜᤠ᤹ ᤏᤢ ᤀᤍᤱᤜᤠ᤹ ᤁᤳᤋᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.