ᤋᤥᤗᤡᤱᤛᤥᤔᤢ 28 - LIFOTNT

¹ ᤂᤧᤒᤩᤠᤱ ᤀᤡᤛᤜᤠᤰᤁᤧᤸᤗᤧ ᤕᤠᤁᤢᤒᤧᤴ ᤀᤢ᤺ᤳᤋᤢᤀᤠᤱ ᤔᤢ᤹ᤀᤡᤛᤠᤶ ᤐᤡᤖᤢ. ᤜᤧᤰᤁᤩᤠᤱ ᤀᤰᤂᤣ ᤔᤧᤳᤋᤢᤖ ᤀᤡᤱᤈᤠᤱ ᤐᤡᤖᤢ. “ᤂᤧᤏᤧ᤹ ᤀᤠᤳᤋᤡᤴ ᤁᤏᤠᤏᤡ ᤔᤧᤴᤇᤢᤔᤠᤜᤠ᤹ᤏᤢᤀᤠᤱ ᤔᤣ᤺ᤰᤂᤡᤶ ᤔᤧᤈᤥᤃᤧᤴᤏᤧ᤹॥

² ᤐᤍ᤻ᤍᤏ ᤀᤠᤖᤠᤶᤔᤥ ᤁᤧᤶᤔᤠᤖᤧ ᤁᤢᤶᤒᤠ ᤒᤋᤢᤀᤣᤗᤖᤧ ᤁᤢᤜᤡᤶᤔᤥ ᤐᤣᤃᤧ᤹ᤀᤠᤱ ᤂᤧᤏᤧ᤹ ᤁᤧᤱᤃᤫᤠ ᤗᤠᤒᤠᤏᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ᤀᤥ ᤌᤡᤰᤐᤠᤏᤢ ᤔᤣ᤺ᤰᤂᤡᤶ ᤆᤥᤃᤧ᤹॥

³ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤒᤥᤴ ᤁᤧᤎᤧ᤹ᤖ ᤆᤥᤃᤢᤀᤠᤱ ᤁᤧᤓᤥᤖ. ᤜᤧᤰᤁᤩᤠᤱ ᤂᤧᤏᤧ᤹ᤗᤠᤶ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱ ᤔᤧᤒᤥᤱᤗ॥

⁴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤏᤢ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤀᤒᤪᤠᤜᤠᤶᤔᤡᤸᤗᤧ ᤂᤥᤛᤢᤒᤠ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶᤔᤡᤴ ᤁᤧᤒᤡᤖᤡᤖ॥ ᤂᤧᤏᤧ᤹ ᤁᤧᤕᤢᤱᤒᤠ ᤁᤴ ᤗᤠᤈᤣᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤶᤔᤡᤴ ᤐᤡᤖᤢᤒᤠᤖᤥ. ᤂᤧᤴ ᤂᤧᤏᤧ᤹ᤀᤣ ᤁᤧᤕᤢᤰᤁᤥ ᤐᤥᤱᤗᤖᤥ॥”

⁵ ᤀᤰᤂᤣᤗ᤹ᤖᤡᤰ ᤀᤡᤛᤜᤠᤰᤁᤧᤸᤗᤧ ᤕᤠᤁᤢᤒᤧᤴ ᤗᤠᤒᤠᤏᤧᤴ ᤘᤕᤧᤒᤠ ᤐᤍ᤻ᤍᤏ ᤀᤠᤖᤠᤶᤔᤥ ᤐᤠᤱᤄᤢᤍᤣᤛᤢ॥ ᤜᤧᤰᤁᤩᤠᤱ ᤗᤠᤒᤠᤏᤧᤴ ᤀᤖᤠᤔᤡ ᤒᤋᤢᤀᤣᤗᤖᤧ ᤁᤢᤛ᤻ᤛᤠ ᤜᤧᤰᤁᤩᤠᤱ ᤀᤣᤛᤠᤒᤧᤴ ᤏᤢ ᤕᤠᤁᤢᤒᤖᤧ ᤂᤢᤴᤇᤡ᤹ ᤔᤠ ᤖᤡᤒᤣᤁᤠ᤺ᤸᤗᤧ ᤁᤢᤶᤓᤢ᤹ ᤘᤕᤧ॥

ᤀᤣᤛᤠᤒᤧᤴ ᤘᤣ᤹ᤛᤔᤠ ᤔᤧᤴᤇᤢᤔᤠ ᤌᤡᤰᤏᤢ ᤔᤣ᤺ᤰᤂᤡᤶ ᤆᤥᤃᤧ

⁶ ᤀᤠᤸᤗ ᤀᤡᤛᤜᤠᤰᤁᤧᤸᤗᤧ ᤕᤠᤁᤢᤒᤧᤴ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤀᤠᤱ ᤔᤧᤸᤗᤡᤱᤃᤧᤴ ᤔᤣ᤺ᤳ ᤋᤠ᤺ᤳᤇᤧ ᤂᤧᤵᤔᤥᤗᤠᤶᤒᤠ ᤐᤍ᤻ᤍᤏ ᤀᤠᤖᤠᤶᤔᤥ ᤐᤠᤱᤄᤢᤍᤣᤛᤢᤒᤠ ᤐᤠ᤺ᤴᤏᤡᤴ ᤀᤣᤛᤠᤒᤧᤸᤗᤧ ᤏᤡᤱᤘᤠ᤹ ᤂᤥᤛᤢ॥ ᤜᤧᤰᤁᤩᤠᤱ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤸᤗᤧ ᤕᤠᤁᤢᤒᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤏᤠᤏᤡ ᤔᤧᤴᤇᤢᤔᤠᤜᤠ᤹ᤀᤥ ᤀᤠᤳᤋᤡᤴᤏᤢᤀᤠᤱ ᤔᤣ᤺ᤰᤂᤡᤶ ᤔᤧᤈᤥᤃᤧᤴᤏᤧ᤹॥”

⁷ ᤜᤧᤰᤁᤩᤠᤱ ᤕᤠᤁᤢᤒᤧᤸᤗᤧ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤂᤧᤶᤔᤠ ᤋᤧᤴᤍᤧᤀᤠᤱ ᤐᤍ᤻ᤍᤏ ᤀᤠᤖᤠᤔ ᤗᤧᤵᤔᤠᤱ ᤌᤠᤛᤡᤱᤅᤠᤱ ᤐᤣ ᤁᤧᤗ᤹ᤒᤠ ᤐᤠ᤺ᤴᤏᤡᤴᤏᤠᤱ ᤀᤣᤛᤠᤒᤖᤧ ᤏᤡᤱᤘᤠ᤹ ᤂᤥᤛᤢ॥

⁸ ᤁᤏᤠᤏᤡ ᤔᤧᤴᤇᤢᤔᤠᤜᤠ᤹ ᤁᤢᤶᤒᤠᤖᤧ ᤁᤢᤛᤡᤖᤠ᤹ ᤔᤧᤴᤎᤠᤱᤏᤧᤶᤒᤠᤖᤇ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤢᤏᤧ᤹ ᤏᤡᤱᤘᤠ ᤂᤥᤛᤢ॥

⁹ ᤂᤧᤒᤩᤠᤱ ᤂᤢᤏᤧ᤹ ᤀᤡᤛ᤻ᤔᤠᤀᤣᤗᤖᤥ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤹ ᤁᤢᤔᤣ᤺ᤳᤜᤠ᤹ ᤔᤧᤘᤕᤧᤖᤛᤠᤱ ᤀᤒᤪᤠᤜᤠᤶᤔᤡᤸᤗᤧ ᤁᤢᤛ᤻ᤛᤠ ᤀᤡᤛ᤻ᤔᤠᤀᤣᤗᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤴᤏᤢ ᤏᤒᤠᤕᤥᤋᤖᤧ ᤁᤢᤴᤛᤠ᤹ ᤔᤜᤗᤋᤧᤴ ᤔᤣ᤺ᤳ ᤆᤥᤃᤢ ᤋᤠᤖᤢᤛᤡ॥

ᤕᤠᤁᤢᤒᤖᤧ ᤒᤣᤌᤣᤗᤀᤥ ᤛᤧᤵᤔᤠᤱ ᤔᤠᤰᤋᤢ᤹

¹⁰ ᤕᤠᤁᤢᤒᤧᤸᤗᤧ ᤒᤣᤷᤛᤣᤒᤠ ᤋᤧᤴᤏᤡᤴ ᤗᤧᤖᤢᤀᤠᤱ ᤜᤠᤖᤠᤏ ᤗᤧᤵᤛᤠᤱ ᤌᤠᤛᤡᤱ ᤐᤣ॥

¹¹ ᤏᤠᤶ ᤌᤩᤧ᤺ᤸᤗᤧ ᤂᤢᤏᤧ᤹ ᤗᤳᤇᤠ ᤋᤧᤴᤏᤥ ᤁᤧᤖᤧ. ᤜᤧᤰᤁᤩᤠᤱ ᤛᤧᤴᤍᤡᤰ ᤂᤧᤵᤔᤥᤀᤣ ᤕᤠᤱᤎᤥ᤺ᤰᤋᤧ ᤕᤠ᤺ᤰᤋᤧ॥ ᤂᤧᤴ ᤋᤧᤴᤏᤥᤒᤠ ᤗᤳᤇᤠ ᤗᤢᤱᤎᤡᤰ ᤋᤠᤖᤢᤀᤠᤱ ᤋᤠᤰᤂᤥ᤺ᤱ ᤁᤥ᤺ᤰᤛᤡᤱ ᤜᤧᤰᤁᤩᤠᤱ ᤀᤡᤶᤔᤠᤖᤧ ᤗᤠᤃᤡ ᤀᤠᤶᤓᤠ ᤂᤧ᤹ᤕᤥ ᤏᤧᤛᤡᤱ॥

¹² ᤂᤢᤏᤧ᤹ ᤗᤳᤇᤠ ᤀᤰᤋᤱᤒᤠ ᤛᤧᤵᤔᤠᤱᤎᤡᤰ ᤔᤠᤰᤋᤢ. ᤂᤠᤶᤒᤣ᤺ᤰᤔᤥᤗᤠᤶ ᤛᤠᤱᤃᤪᤠᤶᤐᤣᤍᤠᤱ ᤌᤠᤖᤡᤰ ᤁᤧᤛᤢᤒᤠ ᤗᤳᤇᤠ ᤌᤖᤣ᤹ᤎᤡᤰ ᤕᤧᤒᤧ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤂᤧᤴ ᤌᤖᤣ᤹ᤀᤥᤗᤠᤶ ᤕᤥ ᤔᤧᤎᤠᤛᤡᤱ ᤔᤧᤕᤧ ᤜᤧᤰᤁᤩᤠᤱ ᤌᤥ ᤔᤧᤗᤡᤅᤢ ᤔᤧᤍᤣ᤹ᤖᤢ॥

¹³ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤴ ᤂᤧᤸᤗᤧ ᤁᤢᤛᤶᤎᤠᤱ ᤕᤧᤶᤛᤡᤱᤅᤠᤱ ᤕᤠᤁᤢᤒᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤁᤧᤴᤎᤧᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱ ᤜᤧᤰᤁᤩᤠᤱ ᤁᤧᤶᤒᤠ ᤀᤡᤛᤜᤠᤰᤁᤧᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱᤀᤠ॥ ᤂᤧᤏᤧ᤹ ᤁᤧᤏᤧᤒᤠ ᤁᤴ ᤕᤥ᤹ᤒᤠᤴ ᤂᤧᤏᤧ᤹ ᤏᤢ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤐᤡᤏᤡᤱ॥

¹⁴ ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤂᤠᤶᤒᤣ᤺ᤰᤔᤥᤒᤠ ᤂᤠᤶᤓᤢᤋᤪᤠ ᤕᤠᤖᤡᤰ ᤔᤧᤒᤥᤱ॥ ᤂᤧᤏᤧ᤹ ᤏᤠᤶᤃᤧᤳ. ᤏᤠᤶᤎᤠ. ᤌᤠᤱᤃᤧᤳ ᤏᤢ ᤗᤠᤱᤃᤧᤳ ᤐᤡᤛᤠᤱ ᤁᤧᤒᤥ᤺ᤴᤗ ᤁᤧᤒᤣ᤺ᤰ॥ ᤂᤧᤏᤧ᤹ ᤏᤢ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤗᤠᤶᤒᤠᤀᤣ ᤀᤡᤰᤛᤠ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤔᤧᤄᤥᤛᤢᤖᤥ॥

¹⁵ ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤂᤧᤏᤧ᤹ᤏᤢ ᤘᤠ᤹ᤀᤠ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤳᤋᤡ ᤁᤧᤒᤣ᤺ᤰᤛᤠᤱ ᤀᤠᤱᤃᤠ᤹ ᤁᤶᤒᤪᤠᤱ ᤔᤧᤳᤏᤧ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤴ ᤋᤧᤴᤏᤥ ᤂᤧᤏᤧ᤹ ᤏᤢ᤺ᤰᤏᤧ ᤋᤠ᤺ᤳᤏᤧ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤔᤧᤳᤏᤧᤒᤠ ᤐᤠ᤺ᤴᤏᤡᤴ ᤔᤧᤱᤃᤧᤳᤋᤣ ᤌᤠᤖᤡᤰ ᤔᤧᤗᤧᤳᤏᤧᤸᤗᤥ॥”

¹⁶ ᤂᤧᤒᤩᤠᤱ ᤕᤠᤁᤢᤒᤧᤴ ᤁᤢᤔᤡᤰ ᤕᤢᤔᤠᤗᤠᤶ ᤛᤥᤖᤧ ᤗ᤺ᤴᤍᤧᤀᤠᤱ ᤐᤠ᤺ᤳᤋᤢ. “ᤛᤧᤰᤂᤠᤛᤠᤱ ᤁᤴ ᤋᤧᤴᤏᤥ ᤕᤜᤘᤣ ᤍᤠᤱᤒᤠᤴ ᤘᤠ᤹ᤖᤇ. ᤀᤠᤱᤃᤠ᤹ ᤁᤴ ᤔᤧᤴᤏᤡᤒᤧᤴ॥”

¹⁷ ᤂᤢᤏᤧ᤹ ᤛᤠ᤹ᤖᤡᤰ ᤁᤡᤛᤧᤀᤠᤱ ᤐᤠ᤺ᤳᤋᤢ. “ᤁᤴ ᤋᤧᤴᤏᤡᤱᤃ ᤀᤠᤰᤋᤱᤒᤠ ᤁᤡᤵᤔᤠ ᤁᤧᤄᤢᤒᤠ ᤋᤧᤴᤏᤡᤃ॥ ᤁᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤗᤥ॥ ᤁᤱᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤗᤠᤶᤎᤣ᤺ᤳᤏᤡᤖᤇ᥄”

¹⁸ ᤕᤠᤁᤢᤒᤧᤴ ᤋᤠᤏᤠᤶ ᤀᤠᤴᤍᤣᤴ ᤐᤥᤃᤧ ᤜᤧᤰᤁᤩᤠᤱ ᤋᤠᤰᤂᤥ᤺ᤱ ᤁᤥ᤺ᤰᤛᤢᤒᤠ ᤗᤢᤱᤅᤡᤴ ᤛᤡᤳᤗᤠᤱ ᤜᤧᤰᤁᤣ ᤏᤡᤱᤘᤠ᤹ᤛᤥᤰᤗᤧ ᤗᤠᤃᤡ ᤋᤰᤐᤧᤳ ᤑᤥ᤺ᤰᤛᤢᤀᤠᤱ ᤁᤢᤛᤶᤔᤥ ᤏᤡ᤺ᤱᤃᤣᤸᤗᤧ ᤗᤧ᤺ᤰᤋᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤴᤍᤢ॥

¹⁹ ᤂᤢᤏᤧ᤹ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤒᤣᤌᤣᤗ (ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶ) ᤕᤢᤰᤂᤢ॥ ᤋᤃᤡ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤗᤢᤈ ᤘᤕᤧ॥

²⁰ ᤂᤧᤒᤩᤠᤱ ᤕᤠᤁᤢᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤗᤳᤇᤠ ᤔᤠᤱᤜᤧᤰ ᤌᤡᤰ ᤆᤥᤃᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤱᤃᤠ᤹ᤏᤢ ᤘᤠ᤹ᤀᤠᤱ. ᤀᤠᤗᤠᤶᤍᤡ᤺ᤰᤁᤥ ᤁᤶᤒᤪᤠᤱ ᤔᤧᤳᤋᤠ. ᤀᤠᤈᤠᤔᤠ ᤀᤠᤎᤢᤱᤔᤠ ᤁᤢᤈᤠ ᤏᤢ ᤀᤠᤈᤠᤱᤔᤠ ᤆᤠᤱ ᤐᤡᤀᤠ.

²¹ ᤜᤧᤰᤁᤩᤠᤱ ᤔᤧᤱᤃᤧᤱ ᤔᤧᤴᤇ᤺ᤴᤀᤣ ᤌᤣᤀᤠᤱ ᤔᤧᤸᤗ᤹ᤀᤣ ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤜᤡᤶᤔᤥ ᤏᤢ᤺ᤱᤀᤠ ᤋᤠᤀᤠᤏᤣ ᤑᤠᤃᤪ. ᤕᤜᤘᤣ ᤍᤠᤱᤒᤠᤴᤏᤣ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱ ᤐᤥᤱᤗᤥ॥

²² ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤡᤳᤗᤠᤱ ᤜᤧᤰᤁᤣ ᤏᤡᤱᤘᤠ᤹ᤛᤥᤰᤗᤧ ᤗᤠᤃᤡ ᤜᤠᤰᤋᤢᤱᤒᤠ ᤁᤴ ᤗᤢᤱᤅᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶ ᤐᤥᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤁᤧᤒᤡᤀᤠᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤗᤠᤶ ᤌᤡᤒᤥᤱᤗᤰ ᤐᤡᤏᤧᤖᤥ॥”