ᤋᤥᤗᤡᤱᤛᤥᤔᤢ 27 - LIFOTNTᤀᤡᤛᤜᤠᤰᤁᤧᤸᤗᤧ ᤕᤠᤁᤢᤒᤧᤴ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢ 1 ᤀᤡᤛᤜᤠᤰᤁᤧᤴ ᤂᤍᤠᤰᤔᤡ ᤋᤢᤶᤛᤧᤸᤗᤧ ᤔᤡᤰ ᤏᤡᤔᤠ ᤔᤧᤴᤇᤢᤰᤔᤏᤠᤒᤠ ᤐᤥ᤺ᤰᤂᤧ. ᤂᤧᤒᤩᤠᤱ ᤁᤢᤛ᤻ᤛᤠ ᤋᤢᤶᤒᤠ ᤀᤣᤛᤠᤒᤧᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤀᤠᤛ᤻ᤛᤠᤀᤣ॥” ᤂᤧᤸᤗᤧ ᤏᤢᤃᤵ ᤐᤡᤖᤢ. “ᤜᤤ. ᤀᤠᤱᤃᤠ᤹ ᤁ᤹ᤕᤥ ᤘᤠ᤹ᤀᤠᤖᤥ॥” 2 ᤀᤡᤛᤜᤠᤰᤁᤧᤸᤗᤧ ᤔᤧᤳᤋᤢ. “ᤀᤠᤸᤗ ᤀᤥᤔᤧᤳᤋᤧ. ᤀᤠᤱᤃᤠ᤹ ᤂᤍᤠᤰᤔᤡ ᤋᤢᤶᤛᤠᤱ॥ ᤀᤠᤱᤃᤠ᤹ ᤀᤠᤓᤧᤸᤗᤧ ᤛᤡᤀᤠ ᤂᤧᤴ ᤐᤠ᤺ᤵᤔᤠ ᤔᤧᤛᤢᤰᤁᤠᤴ॥ 3 ᤀᤠᤸᤗ ᤂᤧᤏᤧ᤹ ᤁᤧᤓᤧᤈᤢᤶ ᤁᤧᤓᤧᤕᤠᤜᤠ᤹ ᤏᤢ ᤁᤧᤍᤥ᤺ᤱ ᤁᤧᤗᤡᤜᤠ᤹ ᤕᤠᤱᤛᤡᤱᤅᤧ᤹ᤀᤠᤱ ᤋᤧᤶᤒᤣ᤹ᤀᤥ ᤐᤣᤃᤧ᤹. ᤜᤧᤰᤁᤩᤠᤱ ᤀᤠᤗᤠᤃᤡ ᤛᤠ ᤛᤧᤖᤧ ᤋᤠᤖᤧ᤹॥ 4 ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤗᤠᤃᤡ ᤁᤢᤈᤠᤃᤧᤏᤢ᤹ᤒᤠ ᤛᤠ ᤌᤥ᤺ᤰᤋᤧ᤹ᤀᤠᤱ ᤐᤡᤖᤠᤱᤅᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤆᤠᤱ᤹॥ ᤂᤧᤒᤩᤠᤱ ᤀᤠᤱᤃᤠ᤹ ᤛᤡᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤏᤧ॥” 5 ᤀᤡᤛᤜᤠᤰᤁᤧᤴ ᤀᤣᤛᤠᤒᤣᤴᤏᤢ ᤋᤠ᤹ᤈᤧᤰᤂᤧᤖ ᤕᤠᤃᤧᤸᤗᤧ ᤖᤡᤒᤣᤁᤠ᤺ᤸᤗᤧ ᤛᤫᤠ᤺ᤳ ᤂᤧᤵᤛᤢᤖ ᤕᤢᤅᤧ॥ ᤀᤠᤸᤗ ᤀᤣᤛᤠᤒᤧᤴ ᤛᤠ ᤛᤧᤵᤔᤠ ᤋᤠ᤺ᤵᤔᤠᤖᤧ ᤗᤠᤃᤡ ᤋᤧᤶᤒᤣ᤹ᤀᤥ ᤌᤠᤛᤡᤱ ᤐᤣ. 6 ᤜᤧᤰᤁᤣ᤺ᤸᤗᤧ ᤖᤡᤒᤣᤁᤠ᤺ᤸᤗᤧ ᤁᤢᤛ᤻ᤛᤠ ᤕᤠᤁᤢᤒᤧᤴ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤁᤧᤶᤒᤠᤖᤧ ᤁᤧᤶᤓᤢ᤹ ᤀᤣᤛᤠᤒᤧᤴ ᤀᤰᤂᤣ ᤔᤧᤳᤋᤢᤖ ᤋᤠ᤹ᤈᤧᤰᤋᤢᤖ ᤕᤠᤃᤧᤒᤠ ᤀᤠᤱᤃᤠ᤹ ᤂᤧᤵᤛᤢᤱ. 7 ‘ᤛᤠ ᤏᤠ᤺ᤳᤋᤧ᤹ᤀᤠᤱ ᤛᤧᤖᤧ ᤋᤠᤖᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤗᤠᤃᤡ ᤁᤢᤈᤠᤃᤧᤏᤢ᤹ᤒᤠ ᤛᤠ ᤌᤥ᤺ᤰᤋᤧ᤹. ᤜᤧᤰᤁᤩᤠᤱ ᤂᤧᤴ ᤀᤠᤱᤃᤠ᤹ ᤆᤠᤱᤅᤠᤱ ᤀᤠᤱᤃᤠ᤹ ᤛᤡᤔᤠᤏᤢ᤺ᤸᤗᤧ ᤋᤃᤡ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤒᤣᤛᤠᤱ ᤂᤧᤏᤧ᤹ ᤔᤢ᤹ᤀᤡᤛᤠᤶ ᤐᤡᤏᤧ॥’ 8 ᤂᤧᤸᤗᤧᤆᤥᤃᤢᤸᤗᤧ ᤀᤠᤛ᤻ᤛᤠᤀᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧ᤹ᤀᤠᤱ ᤔᤧᤳᤏᤧᤒᤠ ᤜᤧᤰᤁᤣ ᤆᤥᤃᤧ᤹॥ 9 ᤔᤧ᤺ᤴᤍᤠ ᤗᤢᤵᤐᤥ ᤐᤣᤃᤧ᤹ᤀᤠᤱ ᤘᤖᤢᤵᤗᤢᤵᤐᤠ ᤔᤧ᤺ᤴᤍᤠᤈᤩᤠ᤺ᤰ ᤏᤧᤳᤇᤡ ᤑᤧᤳᤋᤧᤛᤧ᤹. ᤜᤧᤰᤁᤩᤠᤱ ᤁᤧᤶᤒᤠᤖᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤛᤠ ᤀᤠᤱᤃᤠ᤹ ᤌᤥ᤺ᤰᤋᤢᤱ᤹॥ 10 ᤜᤧᤰᤁᤩᤠᤱ ᤂᤧᤴ ᤌᤥ᤺ᤰᤔᤏᤠᤒᤠ ᤛᤠᤴ ᤂᤧᤏᤧ᤹ ᤁᤧᤶᤒᤠᤖᤧᤀᤥ ᤋᤣ᤹ᤖᤧ᤹. ᤜᤧᤰᤁᤩᤠᤱ ᤂᤢᤏᤧ᤹ ᤁᤴ ᤆᤀᤠᤱ ᤛᤡᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ᤀᤣ ᤔᤢ᤹ᤀᤡᤛᤠᤶ ᤁᤧᤒᤡᤖ॥” 11 ᤕᤠᤁᤢᤒᤧᤸᤗᤧ ᤁᤢᤶᤔᤠ ᤖᤡᤒᤣᤁᤠᤴ ᤔᤧᤳᤋᤢ. “ᤁᤖ ᤀᤠᤶᤓᤢ᤹ ᤀᤣᤛᤠᤒᤧᤱᤃ ᤁᤢᤶᤒᤪᤡᤰ ᤛᤩᤥ᤺ᤱᤛᤩᤥ᤺ᤱ ᤁᤧᤕᤢᤱᤒᤠ ᤔᤏᤠ ᤆᤥᤰ. ᤜᤧᤰᤁᤩᤠᤱ ᤀᤠᤱᤃᤠ᤹ᤃ ᤁᤢᤶᤒᤪᤡᤰ ᤁᤧᤜᤥᤵᤐᤠ ᤆᤥ᤺ᤰᤁᤠ॥ 12 ᤀᤠᤶᤒᤠᤖᤧ ᤀᤠᤱᤃᤠ᤹ ᤛᤛᤵ ᤛᤥ᤺ᤶᤀᤠᤒᤡᤗᤠ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤃᤡ ᤀᤡᤱᤗᤧᤰᤐᤠ ᤐᤥᤱᤅᤠᤀᤠᤱ ᤔᤢ᤹ᤀᤡᤛᤠᤶᤃ ᤔᤣ᤺ᤴ ᤁᤖ ᤀᤠᤱᤃᤠ᤹ ᤛᤠᤱᤃᤪᤠ ᤔᤠᤱᤍᤣᤖᤧᤏᤡ ᤋᤧᤳᤋᤠᤒᤡ॥” 13 ᤁᤢᤶᤔᤠᤖᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤛ᤻ᤛᤠᤀᤣ. ᤂᤧᤏᤧ᤹ ᤛᤠᤱᤃᤪᤠ ᤔᤠᤱᤍᤣ ᤁᤧᤔᤧᤵᤐᤠᤴ ᤀᤠᤱᤃᤠ᤹ᤀᤥᤀᤣ ᤌᤠᤖ॥ ᤀᤠᤒᤠ᤺ᤴᤏᤡᤸᤗᤰ ᤛᤫᤠ᤺ᤳ ᤂᤧᤵᤛᤧ᤹. ᤜᤧᤰᤁᤩᤠᤱ ᤐᤣᤃᤧ᤹ᤀᤠᤱ ᤀᤠᤱᤃᤠ᤹ ᤔᤧᤳᤏᤧᤒᤠᤴ ᤋᤠᤖᤠᤱ ᤐᤡᤖᤠᤱᤅᤧ᤹॥” 14 ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤐᤣᤃᤧᤀᤠᤱ ᤂᤧᤴ ᤔᤧ᤺ᤴᤍᤠᤈᤩᤠ᤺ᤰᤜᤠ᤹ ᤋᤠᤖᤢᤛᤡ ᤜᤧᤰᤁᤩᤠᤱ ᤁᤢᤶᤔᤠ ᤐᤡᤖᤢ. ᤂᤧᤒᤩᤠᤱ ᤂᤢᤏᤧ᤹ ᤕᤠᤁᤢᤒᤧᤸᤗᤧ ᤁᤢᤶᤒᤠᤖᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤛᤠ ᤌᤥ᤺ᤰᤋᤢ॥ 15 ᤂᤧᤒᤩᤠᤱ ᤖᤡᤒᤣᤁᤠ᤺ᤸᤗᤧ ᤜᤡᤶᤔᤥᤗᤠᤶ ᤁᤢᤛ᤻ᤛᤠ ᤋᤢᤶᤒᤧᤸᤗᤧ ᤏᤢ᤺ᤒ᤻ᤏᤢᤒᤠ ᤁᤢᤈᤠᤱᤜᤠ᤹ ᤗ᤺ᤳᤋᤢᤀᤠᤱ ᤑᤧᤳᤋᤢ. ᤜᤧᤰᤁᤩᤠᤱ ᤁᤢᤛ᤻ᤛᤠ ᤑᤥ᤺ᤰᤘᤠᤒᤠ ᤕᤠᤁᤢᤒᤧᤴ ᤆᤠᤰᤋᤢ॥ 16 ᤂᤢᤏᤧ᤹ ᤕᤠᤁᤢᤒᤧᤸᤗᤧ ᤁᤢᤜᤢᤰᤁᤥ ᤏᤢ ᤁᤢᤛᤡᤳᤗᤠᤀᤥ ᤔᤢᤖᤡᤰ ᤁᤧᤜᤥᤵᤐᤠ ᤋᤧᤴᤏᤥ ᤔᤧ᤺ᤴᤍᤠ ᤜᤥᤖᤡᤰᤜᤠ᤹ ᤑᤳᤇᤢ ᤐᤡᤖᤢ॥ 17 ᤂᤧᤒᤩᤠᤱ ᤂᤢᤏᤧ᤹ ᤌᤥ᤺ᤰᤋᤢᤒᤠ ᤁᤢᤈᤠᤃᤧᤏᤢ᤹ᤒᤠ ᤛᤠ ᤛᤢᤶᤒᤠᤰᤁᤡᤴ ᤏᤢ ᤂᤖᤧ᤺ᤅᤡᤴ ᤁᤢᤛ᤻ᤛᤠ ᤕᤠᤁᤢᤒᤧᤴ ᤐᤡᤖᤢ॥ 18 ᤕᤠᤁᤢᤒᤧᤴ ᤁᤢᤶᤒᤠᤖᤥ ᤐᤣᤀᤠᤱ ᤔᤧᤳᤋᤢ. “ᤀᤠᤶᤒᤦ॥” ᤀᤡᤛᤜᤠᤰᤁᤧᤸᤗᤧ ᤔᤧᤳᤋᤢ. “ᤜᤧ. ᤀᤠᤛ᤻ᤛᤠᤀᤣ. ᤂᤧᤏᤧ᤹ ᤜᤠ᤺ᤳᤏᤧᤒᤣ᥅” 19 ᤕᤠᤁᤢᤒᤧᤸᤗᤧ ᤁᤢᤶᤒᤠ ᤔᤧᤳᤋᤢ. “ᤀᤠᤱᤃᤠ᤹ ᤁᤧᤛ᤻ᤛᤠ ᤋᤢᤶᤒᤠ ᤀᤣᤛᤠᤒᤀᤠᤖᤥ॥ ᤂᤧᤏᤧ᤹ ᤔᤢᤖᤠ ᤁᤧᤔᤧᤳᤋᤠᤱᤒᤠ ᤜᤧᤰᤁᤣᤀᤣ ᤀᤠᤱᤃᤠ᤹ ᤆᤥᤃᤢᤱᤅᤠᤱ ᤘᤠ᤹॥ ᤀᤠᤸᤗ ᤐᤥᤃᤧ᤹ᤀᤠᤱ ᤕᤢᤅᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤠ ᤏᤠ᤺ᤳᤋᤢᤱᤅᤠᤱ ᤋᤠᤖᤢᤱᤒᤠ ᤛᤠᤴ ᤆᤩᤧ᤹ᤀᤠᤱ ᤔᤢ᤹ᤀᤡᤛᤠᤶ ᤐᤡᤖᤠᤱᤅᤧ᤹॥” 20 ᤀᤡᤛᤜᤠᤰᤁᤧᤸᤗᤧ ᤔᤧᤳᤋᤢ. “ᤀᤠᤛ᤻ᤛᤠᤀᤣ. ᤂᤧᤏᤧ᤹ ᤀᤠᤰᤂᤣᤀᤠᤱ ᤂᤧᤴ ᤂᤧᤶᤕᤠᤰ ᤜᤠᤖᤠ ᤂᤥᤔᤠ ᤁᤧᤛᤢᤰᤋᤢᤒᤣ᥅” ᤂᤧᤸᤗᤧ ᤏᤢᤃᤵ ᤐᤡᤖᤢ. “ᤕᤜᤘᤣ ᤍᤠᤱᤒᤠ. ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤂᤥᤔᤠ ᤁᤧᤛᤢᤰᤐᤠ ᤆᤥᤃᤠᤱ॥” 21 ᤂᤧᤒᤩᤠᤱ ᤀᤡᤛᤜᤠᤰᤁᤧᤸᤗᤧ ᤕᤠᤁᤢᤒᤧᤴ ᤔᤧᤳᤋᤢ. “ᤀᤠᤛ᤻ᤛᤠᤀᤣ. ᤁᤳᤏᤠ ᤀᤠᤒᤣᤛᤠᤱ ᤑᤧᤖᤧ᤹ ᤛᤢᤏᤧᤛᤠ᤹ᤏᤧ. ᤂᤧᤏᤧ᤹ ᤀᤠᤛ᤻ᤛᤠ ᤀᤣᤛᤠᤒᤧᤴᤏᤧᤒᤡ ᤔᤧ᤺ᤴᤏᤧᤒᤡ ᤀᤰᤂᤣ ᤀᤥᤔᤧᤳᤏᤧᤛᤠ᤹ᤏᤧ॥” 22 ᤕᤠᤁᤢᤒᤧᤴ ᤁᤢᤶᤒᤠᤖᤧ ᤁᤢᤒᤣᤛᤠᤱ ᤐᤣ. ᤜᤧᤰᤁᤩᤠᤱ ᤀᤡᤛᤜᤠᤰᤁᤧᤸᤗᤧ ᤛᤥ᤺ᤵᤛᤢᤀᤠᤱ ᤔᤧᤳᤋᤢ. “ᤀᤡᤰᤗᤠ᤺ᤱᤃ ᤕᤠᤁᤢᤒᤧᤸᤗᤧ ᤁᤢᤀᤡᤰᤗᤠ. ᤁᤖ ᤜᤢᤰᤜᤠ᤹ᤃ ᤀᤣᤛᤠᤒᤧᤸᤗᤧ ᤁᤢᤜᤢᤰ॥” 23 ᤂᤧᤸᤗᤧ ᤁᤢᤜᤢᤰᤜᤠ᤹ ᤀᤣᤛᤠᤒᤧᤸᤗᤧ ᤁᤢᤜᤢᤰ ᤜᤧᤰᤁᤣ ᤁᤢᤶᤒᤪᤡᤰ ᤛᤩᤥ᤺ᤱᤛᤩᤥ᤺ᤱ ᤁᤧᤗ᤹ᤒᤠ ᤆᤥᤃᤧᤒᤠᤸᤗᤧ ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤴ॥ ᤂᤧᤒᤩᤠᤱ ᤀᤡᤛᤜᤠᤰᤁᤧᤸᤗᤧ ᤕᤠᤁᤢᤒᤧᤴ ᤔᤢ᤹ᤀᤡᤛᤠᤶ ᤐᤡᤛᤧ ᤋᤃᤡ ᤐᤥᤖᤧ॥ 24 ᤂᤢᤏᤧ᤹ ᤕᤠᤶᤔᤥ ᤛᤣ᤺ᤴᤗᤠᤵᤋᤢ. “ᤛᤧᤰᤂᤠᤀᤣ ᤂᤧᤏᤧ᤹ ᤀᤠᤛ᤻ᤛᤠ ᤀᤣᤛᤠᤒᤏᤧᤒᤡ᥅” ᤕᤠᤁᤢᤒᤧᤸᤗᤧ ᤏᤢᤃᤵ ᤐᤡᤖᤢ. “ᤀᤠᤱᤃᤠ᤹ ᤀᤣᤛᤠᤒᤀᤠᤖᤥ॥” 25 ᤂᤧᤒᤩᤠᤱ ᤀᤡᤛᤜᤠᤰᤁᤧᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤛᤠᤃᤧᤏᤠ᤺ᤳᤋᤢᤀᤠᤱ ᤁᤧᤍᤠᤖᤢᤒᤠ ᤛᤠᤴ ᤁᤳᤏᤠ ᤑᤧᤳᤋᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤆᤠᤱᤅᤠᤱ ᤂᤧᤏᤧ᤹ ᤔᤢ᤹ᤀᤡᤛᤠᤶ ᤐᤡᤏᤧ॥” ᤂᤶᤓᤩᤠᤱ ᤕᤠᤁᤢᤒᤧᤸᤗᤧ ᤂᤧᤴ ᤁᤢᤶᤒᤠ ᤕᤢᤰᤂᤢ ᤐᤡᤖᤢ. ᤜᤧᤰᤁᤩᤠᤱ ᤁᤢᤶᤒᤠᤖᤧ ᤂᤧᤴ ᤆ॥ ᤜᤶᤓᤩᤠᤱ ᤂᤧᤸᤗᤧ ᤆᤧᤸᤗᤧᤰᤛᤣ᤹ ᤌᤡ᤺ᤴᤏᤠᤱ ᤐᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤌᤢᤅᤢ॥ 26 ᤂᤧᤒᤩᤠᤱ ᤁᤢᤶᤒᤠ ᤀᤡᤛᤜᤠᤰᤁᤧᤸᤗᤧ ᤂᤧᤴ ᤔᤧᤳᤋᤢ. “ᤀᤠᤛ᤻ᤛᤠᤀᤣ. ᤀᤠᤱᤃᤠ᤹ ᤀᤠᤒᤣᤛᤠᤱ ᤑᤧᤖᤧ᤹ᤀᤠᤱ ᤆᤢᤵ ᤔᤧᤳᤋᤠᤱᤅᤧ᤹॥” 27 ᤕᤠᤁᤢᤒᤧᤴ ᤁᤢᤶᤒᤠᤖᤧ ᤁᤢᤒᤣᤛᤠᤱ ᤐᤣᤀᤠᤱ ᤁᤢᤶᤒᤠᤴ ᤆᤢᤵ ᤔᤧᤳᤋᤢ॥ ᤜᤧᤰᤁᤩᤠᤱ ᤀᤡᤛᤜᤠᤰᤁᤧᤸᤗᤧ ᤂᤧᤸᤗᤧ ᤁᤢᤈᤠᤱᤜᤠ᤹ᤖᤧ ᤁᤢᤏᤠᤶᤔᤡᤴ ᤏᤠᤶᤛᤢᤖ ᤀᤰᤂᤣᤗ᤹ᤖᤡᤰ ᤔᤢ᤹ᤀᤡᤛᤠᤶ ᤐᤡᤖᤢ. “ᤀᤠᤶᤒᤡ. ᤀᤠᤛ᤻ᤛᤠ᤺ᤸᤗᤧ ᤁᤢᤏᤠᤶᤔᤡᤱᤃ. ᤕᤜᤘᤣ ᤍᤠᤱᤒᤠᤸᤗᤧ ᤜᤠᤱᤘᤠ ᤔᤠᤱᤘᤠ ᤌᤠᤛᤢᤒᤠ ᤐᤩᤠᤱᤛᤡ᤺ᤸᤗᤧ ᤁᤢᤏᤠᤶ ᤜᤧᤰᤁᤣ ᤁᤢᤏᤠᤶ ᤐᤏᤢ᤹ᤏᤢ᤹ᤖᤥ॥ 28 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤋᤠᤱᤛᤠᤱᤒᤥᤒᤠ ᤛᤣ᤺ᤰᤘᤠᤗᤠᤶ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤁᤢᤘᤠ᤹ᤔᤠ ᤁᤢᤒᤣ᤺ᤰᤔᤠᤗᤠᤶ ᤕᤖᤡᤰ ᤐᤢᤖᤢᤵᤗᤢᤵᤛᤣ᤹ ᤌᤡ ᤏᤢ ᤐᤥᤃᤢᤃᤧᤴ ᤁᤢᤈᤠ ᤁᤧᤒᤡᤖᤖᤥ॥ 29 ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤧᤏᤧ᤹ ᤁᤧᤛᤣᤖᤥᤘᤠ ᤔᤧᤒᤥᤱᤗᤖᤥ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤛᤧᤘᤠ ᤁᤧᤶᤔᤧᤳᤗᤖᤥ॥ ᤁᤧᤶᤓᤢ᤹ ᤁᤧᤴᤛᤠ᤹ᤛᤡ ᤁᤧᤕᤢᤰᤁᤥ ᤔᤧᤘᤠ᤹ᤖᤖᤥ. ᤂᤧᤏᤧ᤹ ᤁᤧᤶᤔᤠᤖᤧ ᤁᤢᤛ᤻ᤛᤠᤜᤠ᤹ᤖᤧ ᤂᤧᤏᤧ᤹ ᤛᤧᤘᤠ ᤁᤧᤶᤔᤧᤳᤗᤖᤥ॥ ᤂᤧᤏᤧ᤹ ᤛᤠᤱᤃᤪᤠ ᤔᤠᤱᤍᤣ ᤁᤧᤔᤧᤵᤐᤠᤜᤠ᤹ ᤁᤧᤖᤧᤰ ᤛᤠᤱᤃᤪᤠ᤺ᤸᤗᤧ ᤋᤧᤳᤋᤢᤛᤡᤖᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤔᤢ᤹ᤀᤡᤛᤠᤶ ᤁᤧᤒᤡᤒᤠ ᤁᤧᤖᤧᤰᤗᤧ ᤔᤢ᤹ᤀᤡᤛᤠᤶ ᤔᤧᤄᤥᤛᤢᤖᤖᤥ॥” ᤀᤣᤛᤠᤒᤧᤸᤗᤧ ᤀᤡᤛᤜᤠᤁᤗᤠᤶ ᤔᤢ᤹ᤀᤡᤛᤠᤶ ᤏᤠ᤺ᤰᤋᤢ 30 ᤀᤡᤛᤜᤠᤰᤁᤧᤸᤗᤧ ᤕᤠᤁᤢᤒᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤛᤢᤖᤢᤀᤠᤱ ᤁᤢᤶᤒᤠᤖᤥᤗᤠᤶ ᤂᤢᤏᤧ᤹ ᤗ᤺ᤴᤍᤧ ᤐᤣᤏᤢᤔᤧ᤺ᤴᤏᤣ ᤀᤣᤛᤠᤒᤧᤴ ᤛᤠ ᤏᤠ᤺ᤳᤇᤧ ᤐᤣᤀᤠᤱ ᤕᤠᤃᤧᤒᤠᤗᤠᤶ ᤂᤠ ᤁᤧᤖᤧᤍᤩᤧ॥ 31 ᤂᤢᤏᤧ᤹ᤀᤠᤱ ᤁᤢᤈᤠ ᤁᤧᤏᤢ᤹ᤒᤠ ᤛᤠᤍᤠᤷᤁᤠᤖᤡ ᤌᤥ᤺ᤰᤋᤢ ᤜᤧᤰᤁᤩᤠᤱ ᤁᤢᤶᤒᤠᤖᤥ ᤋᤠᤖᤢ. “ᤀᤠᤶᤒᤦ. ᤐᤥᤃᤧ᤹ᤀᤥ ᤀᤠᤱᤃᤠ᤹ ᤛᤠ ᤏᤠ᤺ᤳᤋᤢᤱᤅᤠᤱ ᤋᤠᤖᤢᤱᤒᤠ ᤛᤠᤴ ᤆᤧ᤹ᤀᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤢ᤹ᤀᤡᤛᤠᤶ ᤐᤡᤖᤠᤱᤅᤧ᤹ᤀᤥ॥” 32 ᤁᤢᤶᤒᤠ ᤀᤡᤛᤜᤠᤰᤁᤧᤸᤗᤧ ᤂᤢᤏᤧ᤹ ᤛᤧᤴᤗᤠᤵᤋᤢ. “ᤂᤧᤏᤧ᤹ ᤜᤠ᤺ᤳᤏᤧᤏᤡᤃ᥅” ᤂᤢᤏᤧ᤹ ᤏᤢᤃᤵ ᤐᤡᤖᤢ. “ᤀᤠᤱᤃᤠ᤹ ᤂᤧᤏᤧ᤹ ᤁᤧᤛ᤻ᤛᤠ ᤋᤢᤶᤒᤠ ᤀᤣᤛᤠᤒᤀᤠᤖᤥ॥” 33 ᤀᤡᤛᤜᤠᤰᤁᤧᤴ ᤛᤠ᤹ᤖᤡᤰ ᤆᤡᤖᤡᤶᤗᤡᤶᤏᤠ ᤕᤰᤂᤧ. ᤜᤧᤰᤁᤩᤠᤱ ᤔᤧᤳᤋᤢ. “ᤜᤧᤰᤁᤣᤏᤧ ᤑᤠᤃᤪ ᤂᤧᤴ ᤀᤠᤳᤋᤡᤴ ᤘᤕᤧᤃ. ᤂᤧᤸᤗᤧ ᤛᤠ ᤛᤧᤖᤢᤀᤠᤱ ᤁᤵᤔᤥ ᤀᤠᤱᤃᤠ᤹ᤀᤥ ᤋᤠᤖᤢ. ᤜᤧᤰᤁᤩᤠᤱ ᤂᤧᤏᤧ᤹ ᤋᤠᤔᤠᤏᤢ᤺ᤸᤗᤧ ᤋᤃᤡᤛᤠ ᤂᤧᤴ ᤁᤧᤖᤧᤰ ᤀᤠᤱᤃᤠ᤹ ᤆᤠᤱᤅᤠᤱ ᤂᤧᤴ ᤁᤧᤖᤧᤰ ᤔᤢ᤹ᤀᤡᤛᤠᤶ ᤐᤡᤖᤢᤱᤛᤢᤖᤢᤱᤃ᥅ ᤀᤥᤖᤥ. ᤀᤠᤸᤗ ᤛᤧᤰᤂᤠᤛᤠᤱ ᤂᤧᤴᤏᤣ ᤔᤢ᤹ᤀᤡᤛᤠᤒᤠ ᤐᤥᤱᤗᤥ॥” 34 ᤁᤢᤶᤒᤠ ᤀᤡᤛᤜᤠᤰᤁᤧᤸᤗᤧ ᤐᤠ᤺ᤳᤋᤢᤒᤠ ᤁᤴ ᤐᤠ᤺ᤴᤜᤠ᤹ ᤀᤣᤛᤠᤒᤧᤸᤗᤧ ᤂᤧᤵᤛᤢ. ᤂᤧᤒᤩᤠᤱ ᤂᤢᤏᤧ᤹ ᤕᤶᤒᤠ ᤀᤡᤰᤗᤠᤀᤥ ᤀᤢ᤺ᤰᤁᤠᤱ ᤀᤢ᤺ᤰ ᤜᤠᤒᤧᤖ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤃᤧ. ᤜᤧᤰᤁᤩᤠᤱ ᤁᤢᤶᤒᤠ ᤔᤧᤳᤋᤢ. “ᤀᤠᤶᤒᤦ. ᤀᤠᤱᤃᤠ᤹ᤀᤠᤱ ᤔᤢ᤹ᤀᤡᤛᤠᤶ ᤐᤡᤖᤠᤱᤅᤧ᤹॥” 35 ᤁᤖ ᤀᤡᤛᤜᤠᤰᤁᤧᤸᤗᤧ ᤔᤧᤳᤋᤢ. “ᤁᤧᤴᤛᤠ᤹ᤖᤧ ᤀᤡᤱᤗᤧᤰ ᤆᤥᤃᤢᤀᤠᤱ ᤋᤩᤧ. ᤜᤧᤰᤁᤩᤠᤱ ᤂᤧᤏᤧ᤹ ᤂᤥᤔᤠ ᤁᤧᤒᤥᤱᤒᤠ ᤔᤢ᤹ᤀᤡᤛᤠᤶᤔᤡᤴ ᤋᤣ᤹ᤖᤢᤀᤠᤱ ᤐᤣ॥” 36 ᤀᤣᤛᤠᤒᤧᤸᤗᤧ ᤔᤧᤳᤋᤢ. “ᤂᤧᤸᤗᤧ ᤁᤢᤔᤡᤱ ᤕᤠᤁᤢᤒ ᤘᤠ᤺ᤵᤔᤏᤠᤒᤧᤴ ᤔᤧᤗᤠ᤹ᤖᤢᤶᤒᤡ᥅ ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤱᤃᤠ᤹ ᤏᤡᤗᤧᤱ ᤀᤡᤱᤗᤧᤰᤋᤠᤱ ᤛᤢᤖᤠᤱ॥ ᤂᤧᤸᤗᤧ ᤀᤠᤱᤃᤠ᤹ ᤋᤢᤶᤒᤠ ᤀᤠᤗᤰᤁᤡᤴ ᤏᤠᤵᤋᤠᤱ. ᤜᤧᤰᤁᤩᤠᤱ ᤀᤠᤸᤗᤥ ᤀᤠᤱᤃᤠ᤹ ᤂᤥᤔᤠ ᤁᤧᤒᤥᤱᤒᤠ ᤔᤢ᤹ᤀᤡᤛᤠᤶᤔᤡᤴᤏᤠᤱ ᤋᤣ᤹ᤖᤢ॥” ᤂᤢᤏᤧ᤹ ᤕᤠᤶᤔᤥᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤀᤠᤱᤃᤠ᤹ ᤀᤠᤗᤠᤃᤡ ᤗᤳᤌᤡᤰᤁᤠᤱ ᤔᤢ᤹ᤀᤡᤛᤠᤶ ᤁᤧᤏᤴᤇᤢᤒᤠ ᤜᤥ᤺ᤵᤐᤡ᥅” 37 ᤀᤡᤛᤜᤠᤰᤁᤧᤸᤗᤧ ᤀᤣᤛᤠᤒᤧᤴ ᤏᤥᤃᤵ ᤐᤡᤖᤢ. “ᤀᤥᤔᤧᤳᤋᤧ᤹. ᤂᤧᤴ ᤂᤧᤏᤧ᤹ ᤁᤧᤴᤍᤠᤱᤒᤠ ᤆᤥᤃᤢᤱ ᤛᤢᤖᤢᤱᤅᤠᤱ ᤘᤠ᤹॥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤶᤓᤢ᤹ ᤁᤢᤴᤛᤠ᤹ᤛᤡ ᤁᤧᤖᤧᤰ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠ ᤆᤥᤃᤢᤱ ᤋᤣᤛᤢᤱᤛᤡᤱ॥ ᤐᤥᤃᤢᤃᤧᤴ ᤁᤢᤈᤠ ᤏᤢ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤂᤧᤴ ᤂᤠ᤺ᤳᤋᤢᤱᤅᤠᤱ ᤘᤠ᤹॥ ᤀᤠᤸᤗ ᤂᤧᤏᤧ᤹ ᤁᤧᤗᤠᤃᤡ ᤌᤣ ᤆᤥ᤺ᤰᤔᤠ ᤛᤢᤰᤋᤢᤱᤒᤣ. ᤀᤠᤛ᤻ᤛᤠᤀᤣ᥅” 38 ᤀᤣᤛᤠᤒᤧᤸᤗᤧ ᤁᤢᤶᤒᤠ ᤔᤧᤳᤋᤢ. “ᤀᤠᤶᤒᤦ. ᤂᤧᤏᤧ᤹ ᤗᤳᤌᤡᤰᤌᤡᤰ ᤔᤢ᤹ᤀᤡᤛᤠᤶ ᤁᤧᤃᤳᤋᤢᤒᤡ᥅ ᤀᤠᤱᤃᤠ᤹ᤀᤠᤱᤛᤠ ᤔᤢ᤹ᤀᤡᤛᤠᤶ ᤐᤡᤖᤠᤱᤅᤧ᤹ᤏᤠ॥” ᤜᤧᤰᤁᤩᤠᤱ ᤀᤣᤛᤠᤒᤧᤴ ᤕᤶᤒᤠ ᤀᤡᤰᤗᤠᤀᤥ ᤀᤢ᤺ᤰᤁᤠᤱ ᤀᤢ᤺ᤰ ᤜᤠᤒᤧ॥ 39 ᤂᤧᤒᤩᤠᤱ ᤁᤢᤶᤒᤠ ᤀᤡᤛᤜᤠᤰᤁᤧᤸᤗᤧ ᤔᤧᤳᤋᤢᤖᤥ. “ᤀᤥᤔᤧᤳᤋᤧ᤹. ᤂᤧᤏᤧ᤹ ᤁᤧᤕᤢᤱᤔᤠ ᤁᤧᤘᤠ᤹ᤔᤠᤴ ᤂᤠᤶᤒᤣ᤺ᤰᤔᤥᤒᤠ ᤀᤠᤳᤋᤠᤋᤠᤴᤏᤣ ᤏᤢ᤹ᤔᤠ ᤋᤠᤔᤠᤗᤠᤶ ᤗᤠ᤺ᤰᤁᤠᤳ ᤔᤠ᤺ᤱᤄᤠ ᤐᤥᤱᤗᤥ. ᤜᤧᤰᤁᤩᤠᤱ ᤋᤠᤱᤛᤠᤱᤒᤥᤒᤠ ᤛᤣ᤺ᤰᤘᤠᤗᤠᤶ ᤗᤠ᤺ᤰᤁᤠᤳ ᤔᤠ᤺ᤱᤄᤠ ᤐᤥᤱᤗᤥ॥ 40 ᤂᤧᤏᤧ᤹ ᤀᤠᤒᤠᤅᤣ ᤁᤧᤍᤠᤓᤣ᤺ᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤁᤧᤜᤡᤱᤗᤥ. ᤁᤖ ᤂᤧᤏᤧ᤹ ᤁᤧᤴᤛᤠ᤹ᤖᤧ ᤁᤢᤛᤧᤘᤠᤖᤥᤒᤠ ᤁᤧᤒᤥᤱᤗᤥ॥ ᤁᤖ ᤂᤧᤏᤧ᤹ ᤁᤧᤏᤠᤁᤧᤛᤡᤀᤠᤱ ᤂᤧᤏᤧ᤹ ᤂᤧᤸᤗᤧ ᤁᤢᤈᤡᤄᤧ᤺ᤵᤐᤡᤴ ᤁᤧᤏᤡ᤺ᤱᤔᤥᤗᤠᤶ ᤁᤧᤕᤰᤂᤢᤀᤠᤱ ᤗᤠᤵᤁᤧᤓᤢᤛᤢᤖᤥ॥” 41 ᤁᤢᤶᤒᤠᤖᤧ ᤕᤠᤁᤢᤒᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤒᤠ ᤔᤢ᤹ᤀᤡᤛᤠᤶᤔᤡᤸᤗᤧ ᤆᤥᤃᤢᤸᤗᤧ ᤀᤣᤛᤠᤒᤖᤧ ᤕᤠᤁᤢᤒᤧᤴ ᤆᤡ᤺ᤵᤔᤠ ᤜᤣ᤺ᤰᤋᤢ. ᤜᤧᤰᤁᤩᤠᤱ ᤀᤣᤛᤠᤒᤖᤧ ᤁᤢᤏᤡᤱᤘᤠ᤹ᤀᤥ ᤔᤧᤳᤇᤡᤱ. “ᤀᤠᤶᤒᤠ ᤔᤠᤛᤡᤱᤔᤠ ᤆᤥᤰ॥ ᤂᤧᤴ ᤀᤣᤃᤠᤱ ᤀᤠᤱᤃᤠ᤹ ᤀᤠᤴᤛᤠ᤹ ᤕᤠᤁᤢᤒᤧᤴ ᤛᤧᤖᤢᤱ᤹॥” 42 ᤁᤖ ᤂᤢᤏᤧ᤹ ᤁᤢᤛ᤻ᤛᤠ ᤋᤢᤶᤒᤠ ᤀᤣᤛᤠᤒᤧᤸᤗᤧ ᤆᤥ᤺ᤰᤔᤠ ᤀᤡ᤺ᤳᤋᤢᤒᤠᤴ ᤖᤡᤒᤣᤁᤠ᤺ᤸᤗᤧ ᤂᤧᤵᤛᤢ॥ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤢᤛ᤻ᤛᤠ ᤑᤥ᤹ᤒᤠ ᤕᤠᤁᤢᤒᤧᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤁᤧᤶᤓᤢ᤹ ᤀᤣᤛᤠᤒᤧᤸᤗᤧ ᤂᤧᤏᤧ᤹ ᤛᤧᤵᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤁᤢᤏᤡᤱᤘᤠ᤹ ᤋᤠᤛᤢᤀᤠᤱ ᤘᤠ᤹॥ 43 ᤂᤧᤸᤗᤧᤆᤥᤃᤢᤸᤗᤧ ᤀᤠᤛ᤻ᤛᤠᤀᤣ. ᤀᤠᤱᤃᤠ᤹ ᤔᤧᤳᤏᤧᤒᤠᤴ ᤂᤧᤵᤛᤧ᤹॥ ᤂᤧᤏᤧ᤹ ᤜᤠᤖᤠᤏ ᤗᤠᤈᤣ᤹ᤀᤥᤒᤠ ᤀᤠᤱᤃᤠ᤹ ᤀᤠᤶᤓᤢ᤹ ᤗᤠᤒᤠᤏᤧᤸᤗᤧ ᤁᤢᤜᤡᤶᤔᤥ ᤂᤧᤳᤇᤡᤱᤅᤧ᤹ᤀᤠᤱ ᤐᤣᤃᤧ᤹. 44 ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤶᤓᤢ᤹ᤖᤧ ᤁᤢᤛᤠᤰᤁᤧᤴ ᤔᤧᤴᤈᤡ᤺ᤰᤁᤣ ᤌᤠᤖᤡᤰ ᤀᤠᤱᤃᤠ᤹ ᤀᤠᤶᤓᤢ᤹ ᤗᤠᤒᤠᤏᤧᤴᤏᤢ ᤘᤕᤧ᤹॥ 45 ᤂᤧᤏᤧ᤹ ᤁᤧᤶᤓᤢ᤹ᤖᤧ ᤁᤢᤏᤡᤱᤘᤠ᤹ ᤁᤧᤍᤢᤰᤐᤠ ᤕᤠ᤺ᤶᤒᤰ ᤁᤧᤈᤥᤃᤢᤒᤠᤴ ᤂᤧᤸᤗᤧ ᤋᤠ᤺ᤴᤍᤡ ᤏᤡᤱᤘᤠ᤹ ᤔᤢ᤺ᤳᤇᤢ᤹ ᤜᤧᤰᤁᤩᤠᤱ ᤂᤧᤏᤧ᤹ᤏᤢ ᤐᤥᤃᤧᤒᤠ ᤁᤢᤛᤡᤰᤁᤧᤴ ᤆᤡ᤺ᤰᤋᤢᤀᤠᤱ ᤜᤡᤶᤔᤥ ᤏᤢ᤺ᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤡᤱᤄᤱ ᤜᤠᤰᤏᤧ॥ ᤌᤡᤰᤕᤠ᤺ᤸᤗᤧ ᤂᤡᤴᤇᤡ᤹ ᤏᤧᤵᤔᤠᤱ ᤔᤠᤔᤠ ᤔᤧᤒᤥᤱᤏᤧᤸᤗ॥” ᤀᤡᤛᤜᤠᤁᤖᤧ ᤕᤠᤁᤢᤒᤧᤴ ᤗᤠᤒᤠᤏᤖᤥ ᤐᤠᤱᤄᤢ᤹ 46 ᤂᤧᤒᤩᤠᤱ ᤖᤡᤒᤣᤁᤠ᤺ᤸᤗᤧ ᤀᤡᤛᤜᤠᤰᤁᤧᤴ ᤔᤧᤳᤋᤢ. “ᤁ᤹ᤕᤥᤒᤠ ᤜᤡᤳᤋᤡ ᤔᤧᤴᤇᤢᤔᤠᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤀᤠᤱᤃᤠ᤹ ᤀᤠᤏᤡᤱᤛᤠᤱ ᤐᤢᤃᤧ॥ ᤕᤠᤁᤢᤒᤧᤸᤗᤧᤀᤠᤱ ᤁᤴ ᤗᤠᤈᤣ᤹ᤒᤠ ᤔᤧᤴᤇᤢᤔᤠᤜᤠ᤹ ᤜᤧᤰᤋᤱᤔᤠ ᤗᤳᤇᤠ ᤔᤧᤴᤇᤢᤔᤠ ᤌᤡᤰᤏᤢ ᤔᤣ᤺ᤰᤂᤡᤶ ᤆᤥᤃᤢᤏᤧ ᤑᤠᤃᤪ ᤀᤠᤱᤃᤠ᤹ ᤜᤡᤱᤀᤠᤒᤠᤴ ᤌᤣᤏᤠᤎᤣ ᤐᤥᤱᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.