ᤋᤥᤗᤡᤱᤛᤥᤔᤢ 26 - LIFOTNTᤀᤡᤛᤜᤠᤰᤁᤡᤸᤗᤧ ᤀᤒᤡᤔᤣᤗᤣᤰᤁᤧᤴ ᤀᤡᤱᤗᤧᤰᤋᤢ 1 ᤀᤠᤸᤗ ᤀᤒᤪᤠᤜᤠᤶᤔᤡᤸᤗᤧ ᤁᤢᤕᤧᤶᤔᤥ ᤛᤠᤰ ᤐᤥᤃᤧᤒᤠ ᤜᤧᤰᤁᤣ ᤂᤧᤴ ᤗᤠᤈᤣ᤹ᤀᤥ ᤕᤠᤶᤔᤥ ᤛᤠᤰᤘᤠᤴ ᤋᤩᤧ॥ ᤂᤧᤒᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤀᤒᤡᤔᤣᤗᤣᤰᤁᤧᤴ ᤕᤢᤅᤧᤒᤠᤍᤧᤴ ᤃᤧᤖᤠᤖᤀᤥ ᤀᤡᤛᤜᤠᤰᤁᤧᤴ ᤐᤣ॥ 2 ᤕᤜᤘᤣ ᤍᤠᤱᤒᤠᤴ ᤌᤠ᤺ᤴᤇᤡᤱᤅᤠᤱ ᤀᤡᤛᤜᤠᤰᤁᤧᤴ ᤔᤧᤳᤋᤢ. “ᤔᤡᤛᤪ ᤗᤠᤈᤣ᤹ᤀᤥ ᤔᤧᤶᤒᤣ᤺ᤰᤁᤧ᤹ ᤁᤖ ᤀᤠᤱᤃᤠ᤹ ᤔᤧᤳᤏᤧᤒᤠ ᤋᤧᤴᤏᤥᤀᤣ ᤕᤢᤅᤧ᤹ᤀᤥ॥ 3 ᤜᤠᤒᤠ ᤁᤴ ᤗᤠᤈᤣ᤹ᤀᤥ ᤛᤵᤑᤠ ᤕᤢᤅᤧ᤹. ᤜᤧᤰᤁᤣ ᤁᤧᤈᤥᤃᤢᤏᤧ ᤑᤠᤃᤪ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤘᤠ᤹ᤀᤠ ᤜᤧᤰᤁᤩᤠᤱ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤏᤧ॥ ᤁᤧᤶᤒᤠ ᤀᤒᤪᤠᤜᤠᤶᤔᤧᤴᤏᤢ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤁᤧᤳᤋᤢᤱ᤹ ᤜᤧᤰᤁᤩᤠᤱ ᤁᤴ ᤁᤧᤖᤧᤰ ᤗᤠᤈᤣᤴ ᤂᤧᤏᤧ᤹ ᤏᤢ ᤁᤧᤔᤢᤀᤡᤍᤠᤱᤛᤠᤜᤠ᤹ ᤐᤡᤏᤡᤱᤗᤥ॥ 4 ᤀᤠᤱᤃᤠ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤋᤠᤱᤛᤠᤱᤒᤥ ᤁᤧᤒᤵᤐᤠ ᤂᤣᤛᤣ ᤂᤣ᤺ᤶᤛᤡᤰᤐᤠᤜᤠ᤹ ᤜᤧᤰᤁᤣ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤆᤥᤃᤢᤱᤛᤡᤱ ᤜᤧᤰᤁᤩᤠᤱ ᤁᤴ ᤁᤧᤖᤧᤰ ᤗᤠᤈᤣ᤹ᤜᤠ᤹ ᤂᤧᤱᤜᤠ᤹ ᤐᤡᤖᤢᤱᤛᤡᤱ॥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤗᤠᤶᤒᤠᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤔᤧᤄᤥᤛᤢ᤹. 5 ᤌᤣᤀᤠᤱᤓᤧᤸᤗᤧ ᤀᤒᤪᤠᤜᤠᤶᤔᤡᤸᤗᤧ ᤀᤠᤱᤃᤠ᤹ ᤀᤠᤒᤠ᤺ᤴᤈᤠᤁᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤏᤢ ᤐᤡᤖᤢᤱᤒᤠ ᤀᤠᤀᤡᤱᤈᤠᤱᤜᤠ᤹ ᤜᤧᤰᤁᤩᤠᤱ ᤀᤠᤓᤠᤱᤜᤠ᤹ ᤀᤡ᤺ᤳᤋᤢ ᤏᤠ᤺ᤳᤋᤢᤖᤥ॥” 6 ᤂᤧᤸᤗᤧᤆᤥᤃᤢᤸᤗᤧ ᤀᤡᤛᤜᤠᤰᤁᤧᤴ ᤃᤖᤠᤖᤀᤥᤀᤣ ᤕᤢᤱᤛᤡᤱ॥ 7 ᤜᤧᤰᤁᤩᤠᤱ ᤂᤧᤵᤔᤥᤒᤠ ᤕᤠᤵᤔᤡᤜᤠ᤹ᤖᤧ ᤂᤢᤏᤧ᤹ ᤁᤢᤔᤣ᤺ᤳᤋᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢᤸᤗᤧ. “ᤂᤢᤏᤧ᤹ᤃ ᤀᤠᤱᤃᤠ᤹ ᤀᤠᤴᤈᤣᤗᤡᤔᤠ ᤀᤠᤴᤛᤠ᤹” ᤔᤧᤳᤋᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤴ “ᤀᤠᤱᤃᤠ᤹ ᤀᤠᤔᤣᤳ” ᤑᤠ᤹ᤀᤠᤱ ᤔᤧᤵᤔᤠᤛᤡ ᤂᤢᤏᤧ᤹ ᤁᤡᤛᤧᤀᤠᤱ ᤘᤕᤧ॥ ᤂᤧᤴ ᤋᤧᤴᤏᤥᤒᤠ ᤔᤏᤠᤜᤠ᤹ᤖᤧ “ᤖᤡᤒᤣᤁᤠᤴ ᤋᤣ᤹ᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤔᤧᤛᤧᤳᤋᤠ” ᤑᤠ᤹ᤀᤠᤱ ᤂᤢᤏᤧ᤹ ᤀᤡ᤺ᤳᤋᤢᤀᤠᤱ ᤘᤕᤧ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤏᤢᤔᤠ ᤆᤥᤃᤧ॥ 8 ᤀᤡᤛᤜᤠᤰᤁᤧᤴ ᤂᤧ᤹ᤕᤥ ᤕᤖᤡᤰ ᤕᤧᤴ ᤌᤠᤖᤡᤰ ᤘᤕᤧ. ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤀᤒᤡᤔᤣᤗᤣᤰᤁᤧᤴ ᤐᤣᤎᤠ᤺ᤵᤐᤥᤗᤠᤶ ᤀᤥᤔᤕᤧᤸᤗᤧ ᤀᤡᤛᤜᤠᤰᤁᤧᤸᤗᤧ ᤖᤡᤒᤣᤁᤠᤴ ᤔᤡ᤺ᤶ ᤔᤧᤳᤋᤢᤖ ᤕᤠᤃᤧᤒᤠ ᤏᤡᤛᤢ॥ 9 ᤂᤧᤸᤗᤧᤆᤥᤃᤢᤸᤗᤧ ᤀᤒᤡᤔᤣᤗᤣᤰᤁᤡᤸᤗᤧ ᤀᤡᤛᤜᤠᤰᤁᤧᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤂᤢᤏᤧ᤹ᤃ ᤛᤧᤰᤂᤠᤀᤣ ᤂᤧᤏᤧ᤹ ᤁᤧᤔᤣ᤺ᤋᤪᤧᤇ॥ ‘ᤂᤢᤏᤧ᤹ ᤀᤠᤴᤛᤠ᤹’ ᤗ᤹ᤖᤡᤰ ᤌᤣᤀᤠᤱ ᤁᤧᤒᤠ᤺ᤳᤋᤢᤒᤠᤒᤣ᥅” ᤀᤡᤛᤜᤠᤰᤁᤧᤸᤗᤧ ᤏᤢᤃᤵ ᤐᤡᤖᤢ. “ᤂᤢᤏᤧ᤹ ᤋᤣ᤹ᤔᤠᤖᤧ ᤗᤠᤃᤡ ᤁᤢᤓᤠᤖᤧ ᤀᤠᤱᤃᤠ᤹ ᤔᤧᤛᤧᤳᤋᤠ ᤑᤠ᤹ᤀᤠᤱ ᤁᤡᤛᤠᤱ॥” 10 ᤂᤧᤒᤩᤠᤱ ᤀᤒᤡᤔᤣᤗᤣᤰᤁᤡᤸᤗᤧ ᤔᤧᤳᤋᤢ. “ᤌᤣᤀᤠᤱ ᤂᤧᤏᤧ᤹ ᤁᤴ ᤀᤠᤏᤡᤃᤧᤏᤢ ᤀᤰᤂᤣ ᤁᤧᤈᤥᤃᤢᤒᤠ᥅ ᤁᤢᤓᤠ ᤔᤏᤠᤜᤠ᤹ᤀᤥ ᤌᤡᤰᤐᤠ ᤁᤧᤔᤣ᤺ᤳᤋᤡᤴᤏᤢ ᤀᤡᤵᤛᤣᤸᤗᤧᤃ ᤂᤧᤏᤧ᤹ ᤀᤠᤏᤡᤃᤧᤀᤥ ᤀᤠᤵᤋᤡᤰ ᤁᤧᤍᤠᤖᤢᤔᤧᤴ॥” 11 ᤂᤧᤸᤗᤧᤆᤥᤃᤢᤸᤗᤧ ᤀᤒᤡᤔᤣᤗᤣᤰᤁᤡᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤀᤰᤂᤣᤗ᤹ᤖᤡᤰ ᤀᤡᤱᤈᤠᤱ ᤐᤡᤖᤢᤛᤡ. “ᤀᤠᤳᤋᤡᤸᤗᤧ ᤁᤴ ᤕᤠᤵᤔᤡᤴ ᤀᤡᤃᤪ ᤁᤢᤔᤣ᤺ᤳᤋᤡᤴ ᤋᤢᤰᤂᤣ ᤆᤠ᤺ᤳᤋᤢ᤹ ᤂᤧᤴ ᤛᤧᤵᤔᤠ ᤐᤥᤱ॥” 12 ᤀᤡᤛᤜᤠᤰᤁᤧᤸᤗᤧ ᤕᤠᤰᤘᤠ ᤕᤠ᤹ᤖᤡ᤺ᤶᤒᤠ ᤜᤣ᤹ᤖᤢ. ᤜᤧᤰᤁᤩᤠᤱ ᤒᤠᤂᤧᤴ ᤋᤱᤒᤣᤀᤥ ᤁᤡᤵᤌᤡᤰ ᤗᤧᤱᤏᤢ᤺ᤸᤗᤧ ᤕᤖᤡᤰ ᤁᤢᤈᤠ ᤑᤳᤇᤢ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤂᤢᤏᤧ᤹ ᤜᤠᤱᤘᤠ ᤔᤢ᤹ᤀᤡᤛᤠᤶ ᤌᤠᤛᤢᤐᤡᤖᤢ॥ 13 ᤜᤧᤰᤁᤩᤠᤱ ᤂᤢᤏᤧ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠ᤹ᤖᤡᤰ ᤁᤧᤃᤵᤐᤠ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤧᤶᤒᤥᤱᤅᤣ ᤌᤠᤖᤡᤰ ᤆᤰᤔᤧᤴᤗ᤹ᤀᤣ ᤁᤢᤕᤠᤱᤛᤠ ᤁᤢᤴᤎᤣᤜᤠ᤹ ᤐᤥᤖᤧᤖ ᤐᤣ॥ 14 ᤂᤢᤏᤧ᤹ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤧ᤺ᤴᤍᤠ᤹ ᤔᤧᤸᤗᤢᤰᤜᤠ᤹ ᤜᤧᤰᤁᤩᤠᤱ ᤐᤡᤳᤜᤠ᤹ ᤜᤧᤰᤁᤩᤠᤱ ᤛᤧᤘᤠᤖᤥᤒᤠ ᤛᤧᤘᤠᤖᤥᤔᤠᤜᤠ᤹ ᤁᤳᤋᤢᤛᤡ॥ ᤜᤧᤰᤁᤣ᤺ᤸᤗᤧ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤧ᤹ ᤏᤠᤔᤧᤜᤧᤳᤋᤢ॥ 15 ᤂᤢᤏᤧ᤹ ᤁᤢᤶᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤕᤧᤶᤔᤥ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤔᤧᤍᤕᤢ ᤔᤧᤏᤧᤛ᤻ᤛᤢᤒᤠ ᤁᤧᤖᤧᤰ ᤘᤒᤠᤰᤜᤠ᤹ ᤐᤗᤡᤛ᤻ᤋᤡᤜᤠ᤹ᤖᤧ ᤔᤧᤛᤠᤰᤋᤢ. ᤜᤧᤰᤁᤩᤠᤱ ᤂᤠᤶᤗᤢᤱᤜᤠ᤹ ᤔᤧᤃᤣ᤺ᤳᤋᤢᤀᤠᤱ ᤔᤧᤗᤢᤵᤋᤢ॥ 16 ᤂᤧᤒᤩᤠᤱ ᤀᤒᤡᤔᤣᤗᤣᤰᤁᤡᤸᤗᤧ ᤀᤡᤛᤜᤠᤰᤁᤧᤴ ᤔᤧᤳᤋᤢ. “ᤀᤠᤸᤗ ᤀᤠᤏᤡᤃᤧᤀᤥᤗᤠᤶ ᤔᤠ᤺ᤱᤄᤠ ᤐᤣᤃᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤀᤠᤏᤡᤃᤧᤏᤢ᤺ᤸᤗᤧ ᤔᤢᤰᤛᤠᤶᤛᤠᤒᤠ ᤁᤧᤒᤥᤰᤂᤧᤀᤠᤱ ᤁᤧᤘᤠ᤹ᤖᤥ॥” 17 ᤂᤧᤸᤗᤧᤆᤥᤃᤢᤸᤗᤧ ᤀᤡᤛᤜᤠᤰᤁᤧᤴ ᤂᤧᤵᤔᤥᤗᤠᤶ ᤗ᤺ᤴᤍᤧᤀᤠᤱ ᤃᤖᤠᤖᤒᤠ ᤏᤧᤏᤧᤒᤠ ᤋᤧᤴᤏᤥ ᤛᤠ᤺ᤱᤃᤠᤜᤡᤶ ᤂᤡᤱᤛᤢᤀᤠᤱ ᤒᤠᤂᤧᤵᤔᤥ ᤕᤢᤱᤔᤠ ᤜᤣ᤺ᤰᤋᤧ॥ 18 ᤀᤡᤛᤜᤠᤰᤁᤧᤸᤗᤧ ᤁᤢᤶᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤕᤧᤶᤔᤥ ᤔᤧᤍᤕᤢᤀᤠᤱ ᤁᤧᤏᤧᤒᤠ ᤘᤒᤠᤰᤜᤠ᤹ ᤕᤠᤶᤔᤥ ᤋᤔᤠ ᤐᤠᤱᤄᤢᤛᤡ. ᤌᤣᤀᤠᤱᤓᤧᤸᤗᤧ ᤀᤒᤪᤠᤜᤠᤶᤔᤡᤴ ᤔᤠᤛᤡᤱᤅᤠᤱ ᤀᤣᤃᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤂᤧᤴ ᤘᤒᤠᤰᤜᤠ᤹ ᤔᤧᤗᤢᤵᤋᤢ ᤔᤧᤍᤣᤛᤢᤀᤠᤱ ᤏᤧᤛ᤻ᤛᤧ॥ ᤜᤧᤰᤁᤩᤠᤱ ᤁᤢᤶᤒᤠᤖᤧ ᤘᤠ᤺ᤳᤋᤢᤎᤒᤠ ᤘᤒᤠᤰ ᤔᤡᤱᤜᤠ᤹ᤀᤣ ᤂᤢᤏᤧ᤹ᤀᤠᤱ ᤆᤥᤃᤢ॥ 19 ᤀᤡᤛᤜᤠᤰᤁᤧᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤏᤧᤏᤧᤒᤠ ᤋᤧᤴᤏᤥ ᤁᤢᤛᤱ ᤘᤒᤠᤰ ᤔᤧᤍᤕᤢᤸᤗᤧ ᤆᤫᤠ᤺ᤳ ᤁᤧᤒᤢᤶᤒᤠ ᤁᤧᤗ᤺ᤶᤒᤠ ᤘᤒᤢᤴᤍᤠᤰ ᤔᤧᤄᤥᤛᤢ॥ 20 ᤁᤖ ᤃᤖᤠᤖᤒᤠ ᤐᤡᤳ ᤁᤧᤃᤶᤒᤠᤜᤠ᤹ ᤔᤧᤍᤩᤧᤀᤠᤱ “ᤁᤴ ᤆᤫᤠ᤺ᤳᤋᤡᤴ ᤀᤠᤏᤡᤃᤧᤴ” ᤔᤧᤗ᤹ᤖᤧᤖ ᤀᤡᤛᤜᤠᤰᤁᤧᤸᤗᤧ ᤁᤢᤒᤡᤳ ᤁᤧᤃᤶᤒᤠᤜᤠ᤹ᤏᤢ ᤂᤣᤔᤠ ᤔᤧᤜᤣ᤺ᤰᤋᤧ॥ ᤜᤧᤰᤁᤣᤗ᤹ᤖᤡᤰ ᤂᤧᤔᤠ᤹ ᤔᤧᤈᤥᤃᤧᤒᤠᤸᤗᤧ ᤆᤥᤃᤢᤸᤗᤧ ᤀᤡᤛᤜᤠᤰᤁᤧᤸᤗᤧ ᤂᤧᤴ ᤘᤒᤠᤰᤁᤡᤸᤗᤧ ᤁᤢᤔᤡᤱ ᤀᤣᤛᤣᤰ ᤔᤧᤳᤋᤢ॥ 21 ᤂᤧᤒᤩᤠᤱ ᤀᤡᤛᤜᤠᤰᤁᤡᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤘᤣ᤹ᤛᤔᤠ ᤘᤒᤠᤰ ᤌᤡᤰᤁᤠᤱ ᤔᤧᤍᤕᤢ. ᤁᤖ ᤂᤧᤵᤔᤥᤀᤠᤱ ᤂᤧᤔᤠ᤹ ᤐᤥ᤺ᤰᤂᤧ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤘᤒᤠᤰᤁᤡᤸᤗᤧ ᤁᤢᤔᤡᤱ ᤛᤡᤳᤏᤠ ᤔᤧᤔᤧᤳᤋᤢ॥ 22 ᤂᤢᤏᤧ᤹ ᤂᤧᤵᤔᤥᤗᤠᤶ ᤘᤣ᤹ᤛᤔᤠᤍᤧᤴᤏᤥ ᤐᤣᤃᤧ. ᤜᤧᤰᤁᤩᤠᤱ ᤘᤣ᤹ᤛᤔᤠ ᤘᤒᤠᤰᤌᤡᤰ ᤋᤕᤢ॥ ᤂᤧᤵᤔᤥᤃ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤧᤔᤠ᤹ ᤔᤧᤴᤈᤥᤃᤢᤴ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤘᤒᤠᤰᤁᤡᤸᤗᤧ ᤁᤢᤔᤡᤱ ᤀᤰᤂᤣ ᤐᤠ᤺ᤳᤋᤢᤖ “ᤖᤜᤥᤒᤥᤋ” ᤕᤢᤰᤂᤢ. “ᤀᤠᤸᤗᤃ ᤕᤜᤘᤣ ᤍᤠᤱᤒᤠᤸᤗᤧ ᤀᤠᤏᤡ᤹ ᤕᤢᤱᤔᤠᤍᤧᤴ ᤀᤠᤒᤡᤖᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤏᤡ᤹ ᤁᤴ ᤋᤧᤴᤏᤥ ᤀᤠᤒᤥᤴ ᤀᤠᤎᤧ᤹ᤖᤥ॥” 23 ᤂᤧᤵᤔᤥᤗᤠᤶ ᤀᤡᤛᤜᤠᤰᤁᤧᤴ ᤌᤥ ᤒᤣᤷᤛᤣᤒᤠ ᤆᤳᤇᤡᤱ ᤐᤣ॥ 24 ᤜᤠᤒᤠ ᤂᤧᤴ ᤛᤧᤴᤍᤡᤰ ᤕᤜᤘᤣ ᤍᤠᤱᤒᤠᤴ ᤂᤢᤏᤧ᤹ᤀᤥ ᤏᤡᤎᤠ᤺ᤶᤛᤡᤱ. ᤜᤧᤰᤁᤩᤠᤱ ᤔᤧᤳᤋᤢ. “ᤀᤠᤱᤃᤠ᤹ ᤁᤧᤶᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱᤀᤠ॥ ᤂᤧᤏᤧ᤹ ᤔᤧᤱᤃᤡᤀᤧ᤹ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤘᤠ᤹ᤀᤠ॥ ᤀᤠᤱᤃᤠ᤹ ᤂᤧᤏᤧ᤹ ᤜᤠᤱᤘᤠᤔᤢ᤹ᤀᤡ ᤐᤡᤏᤧ. ᤀᤠᤛᤧᤘᤠᤖᤥᤒᤠ ᤀᤒᤪᤠᤜᤠᤶᤔᤡᤴᤏᤢ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤑᤥᤛᤢᤱᤛᤡᤱ ᤐᤡᤏᤧ॥” 25 ᤂᤧᤒᤩᤠᤱ ᤀᤡᤛᤜᤠᤰᤁᤧᤸᤗᤧ ᤂᤧᤵᤔᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤡᤰ ᤆᤥᤃᤢᤀᤠᤱ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢ॥ ᤜᤧᤰᤁᤩᤠᤱ ᤁᤢᤛᤠ᤺ᤱᤃᤠ ᤜᤡᤶᤔᤡᤴ ᤜᤠᤒᤠ ᤂᤧᤵᤔᤥ ᤂᤡᤱᤛᤢᤀᤠᤱ ᤂᤧᤵᤔᤥ ᤀᤡᤛᤜᤠᤁᤖᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤗᤳᤇᤠ ᤘᤒᤠᤰᤌᤡᤰ ᤔᤧᤍᤕᤢ॥ ᤀᤡᤛᤜᤠᤁ ᤏᤢ ᤀᤒᤡᤔᤣᤗᤣᤁᤖᤧ ᤂᤢᤴᤇᤡ᤹ ᤔᤠᤱᤜᤧᤰ 26 ᤌᤡᤰᤕᤠᤴ ᤃᤖᤠᤖᤗᤠᤶᤒᤠ ᤀᤒᤡᤔᤣᤗᤣᤰᤁᤧᤴ ᤁᤢᤛᤢᤈᤠᤍᤠᤱᤒᤠ ᤀᤜᤢᤈ᤻ᤈᤋᤧᤴ ᤏᤢ ᤁᤢᤎᤰᤛᤢᤒᤠᤜᤠ᤹ᤖᤧ ᤂᤢᤏᤡ᤹ ᤌᤰᤔᤥᤒᤠ ᤐᤡᤁᤥᤸᤗᤧᤴ ᤛᤥᤖᤡᤰ ᤋᤣ᤹ᤖᤢᤛᤡᤀᤠᤱ ᤀᤡᤛᤜᤠᤰᤁᤧᤸᤗᤧ ᤁᤢᤍᤢᤶᤛᤧ ᤋᤩᤧ॥ 27 ᤀᤡᤛᤜᤠᤰᤁᤧᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤡᤱᤔᤡ ᤁᤢᤛᤡᤰ ᤀᤠᤃ᤻ᤀᤡᤋᤧᤀᤠᤱ ᤂᤧᤏᤡ᤹ ᤗᤠᤈᤣ᤹ᤗᤠᤶ ᤀᤠᤱᤃᤠ᤹ ᤕᤠᤵᤔᤡ ᤁᤧᤗ᤺ᤳᤋᤧ ᤁᤧᤍᤣᤛᤧ. ᤜᤧᤰᤁᤩᤠᤱ ᤕᤠᤶᤔᤥ ᤌᤣᤀᤠᤱ ᤀᤠᤍᤢᤶᤛᤧ ᤁᤧᤍᤩᤧ᤹ᤀᤡᤒᤠᤒᤣ᥅” 28 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤕᤜᤘᤣ ᤍᤠᤱᤒᤠᤴ ᤂᤧᤏᤧ᤹ᤏᤢ ᤘᤠ᤹ ᤁᤧᤗ᤹ᤒᤠᤴ ᤀᤠᤏᤡᤃᤣ ᤏᤢᤖᤡᤰᤁᤠᤱ ᤏᤡ᤺ᤶᤏᤠ॥ ᤂᤧᤸᤗᤧᤆᤥᤃᤢᤸᤗᤧ ᤜᤠᤒᤠ ᤁᤴ ᤐᤠ᤺ᤴᤏᤡᤴ ᤂᤧᤏᤧ᤹ ᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢᤶᤒᤧ ᤂᤧᤏᤧ᤹ᤏᤢ ᤀᤠᤏᤡ᤹ ᤗᤢᤶᤔᤥ ᤐᤠ᤺ᤴᤍᤱ ᤐᤥᤱᤗ. ᤜᤧᤰᤁᤩᤠᤱ ᤂᤧᤏᤧ᤹ᤏᤢ ᤀᤠᤏᤡ᤹ ᤗᤢᤶᤔᤥ ᤗᤳᤇᤠ ᤔᤠᤱᤜᤧᤰ ᤌᤡᤰ ᤆᤥᤃᤢᤶ॥ 29 ᤀᤠᤏᤡᤃᤣ ᤂᤧᤏᤧ᤹ ᤌᤣᤀᤠᤱ ᤋᤠᤵᤑᤧ᤺ᤸᤗᤡᤰ ᤔᤧᤶᤔᤧᤳᤋᤣ ᤏᤢᤖᤡᤰ ᤔᤧᤳᤋᤠᤛᤡᤃᤧᤀᤠᤱ ᤛᤏᤠᤖᤢᤱᤅᤥ ᤐᤠᤱᤏᤧᤇᤡᤃᤧᤒᤠ ᤜᤧᤰᤁᤣ ᤂᤧᤏᤧ᤹ᤀᤠᤱ ᤀᤠᤏᤡᤃᤣ ᤜᤠᤴᤋᤡ ᤔᤧᤈᤥᤃᤧᤴᤏᤧ᤹ᤀᤥ॥ ᤜᤧᤰᤁᤩᤠᤱ ᤀᤠᤸᤗ ᤀᤥᤔᤧᤳᤋᤧ᤹. ᤕᤜᤘᤣ ᤍᤠᤱᤒᤠᤸᤗᤧ ᤂᤧᤏᤧ᤹ ᤁᤶᤓᤩᤠᤖᤡᤰ ᤕᤖᤡᤰ ᤔᤢ᤹ᤀᤡᤛᤠᤶ ᤁᤧᤒᤡᤖᤧᤀᤠᤱ ᤘᤠ᤹॥” 30 ᤂᤧᤒᤩᤠᤱ ᤀᤡᤛᤜᤠᤰᤁᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤛᤠ ᤏᤢ ᤋ᤺ᤰ ᤌᤥ᤺ᤰᤋᤢᤀᤠᤱ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤈ ᤔᤧᤎᤢᤅᤢ॥ 31 ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶᤛᤠ ᤂᤧᤱᤜᤠ᤹ ᤔᤧᤒᤥᤃᤧ. ᤜᤧᤰᤁᤩᤠᤱ ᤂᤢᤴᤇᤡ᤹ᤗᤢᤶᤔᤥ ᤔᤠᤱᤔᤧᤜᤧᤰᤛᤡᤱ॥ ᤂᤧᤒᤩᤠᤱ ᤀᤡᤛᤜᤠᤰᤁᤧᤸᤗᤧ ᤂᤧᤱᤜᤠ᤹ ᤗᤠᤶᤔᤧᤳᤋᤢᤛᤡᤀᤠᤱ ᤏᤡᤱᤘᤠ᤹ ᤕᤠᤱᤕᤠᤱ ᤗ᤹ᤖᤡᤰ ᤔᤧᤒᤣ॥ 32 ᤜᤠᤒᤠ ᤂᤧᤴ ᤕᤧᤴᤏᤥ ᤀᤡᤛᤜᤠᤰᤁᤧᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ ᤔᤧᤍᤩᤧᤀᤠᤱ ᤂᤢᤴᤇᤡ᤹ ᤔᤧᤍᤕᤢᤒᤠ ᤘᤒᤠᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤏᤡᤃᤣ ᤆᤫᤠ᤺ᤳ ᤘᤒᤢᤴᤍᤠᤰ ᤂᤥᤔᤏᤠᤀᤠᤱ ᤏᤧ᤹᤺॥” 33 ᤂᤧᤒᤩᤠᤱ ᤂᤢᤏᤧ᤹ ᤂᤧᤴ ᤘᤒᤠᤰᤁᤡᤸᤗᤧ ᤁᤢᤔᤡᤱ ᤛᤡᤒᤠ ᤕᤢᤰᤂᤢ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤌᤠᤖᤡᤰ ᤂᤧᤴ ᤕᤧᤰᤕᤰᤁᤡᤸᤗᤧ ᤁᤢᤔᤡᤱ ᤒᤣᤷᤛᤣᤒᤠ ᤔᤧᤔᤧᤳᤋᤢᤖᤥ॥ ᤀᤣᤛᤠᤒᤧᤸᤗᤧ ᤘᤣ᤹ ᤗᤠᤈᤣ᤹ᤀᤥᤒᤠ ᤁᤢᤔᤣ᤺ᤳᤜᤠ᤹ 34 ᤀᤣᤛᤠᤒᤧᤴ ᤗᤡᤒᤥᤱ ᤋᤱᤒᤣ ᤕᤥᤖᤧᤸᤗᤧ ᤂᤢᤏᤧ᤹ ᤜᤡᤳᤋᤡ ᤒᤣᤖᤡᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤕᤜᤢᤍᤡᤋᤧᤴ ᤏᤢ ᤜᤡᤳᤋᤡ ᤀᤣᤗᤥᤏᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤒᤠᤛᤔᤋᤧᤴ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤳᤋᤢ ᤋᤠᤖᤢᤛᤡ॥ 35 ᤂᤧᤱ ᤔᤧᤴᤇᤢᤔᤠᤜᤠ᤹ᤖᤧ ᤆᤥᤃᤧᤇᤢᤸᤗᤧ ᤀᤡᤛᤜᤠᤁ ᤏᤢ ᤖᤡᤒᤣᤁᤠ᤺ᤸᤗᤧ ᤂᤢᤴᤇᤡ᤹ ᤜᤡᤱᤔᤴᤏᤥ ᤛᤠ᤹ᤖᤡᤰ ᤏᤡᤱᤘᤠ᤹ ᤋᤢᤰᤔᤠ ᤐᤠ᤺ᤴᤜᤠ᤹ ᤐᤥ᤺ᤰᤂᤧᤍᤩᤧ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.