ᤋᤥᤗᤡᤱᤛᤥᤔᤢ 24 - LIFOTNTᤀᤡᤛᤜᤠᤰᤁᤡᤸᤗᤧ ᤔᤣ᤺ᤳ ᤋᤠᤖᤢ 1 ᤀᤠᤸᤗ ᤀᤒᤪᤠᤜᤠᤶᤔᤡᤴ ᤁᤠᤵᤐᤥᤒᤠ ᤋᤢᤶᤛᤧᤄᤧᤖᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ ᤀᤒᤪᤠᤜᤠᤶᤔᤧᤴ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤀᤠᤱ ᤘᤕᤧ॥ 2 ᤀᤒᤪᤠᤜᤠᤶᤔᤡᤸᤗᤧ ᤁᤢᤜᤡᤶᤔᤥ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤜᤡᤒᤠ ᤁᤧᤍᤱᤒᤠ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤁᤧᤛᤧᤘᤠᤖᤥᤒᤠᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤜᤢᤰᤁᤡᤴ ᤀᤠᤗᤠᤱ ᤛᤧᤒᤱᤒᤠᤜᤠ᤹ᤖᤧ ᤁᤢᤛᤡ᤺ᤰᤋᤥ ᤏᤧᤛ᤻ᤛᤧ᤹॥ 3 ᤀᤠᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤁᤴ ᤔᤠᤱᤜᤧᤰᤁᤡᤴ ᤆᤥ᤺ᤰᤐᤠᤱᤏᤧ. ᤀᤠᤸᤗᤥ ᤀᤠᤱᤃᤠ᤹ ᤕᤢᤱᤅᤠᤒᤠ ᤋᤧᤴᤏᤥᤒᤠ ᤁᤏᤠᤏᤡ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤳᤋᤡᤴ ᤔᤧᤴᤇᤢᤔᤠ ᤛᤠᤜᤠ᤹ᤀᤠᤱ ᤀᤠᤛᤠ᤺ᤸᤗᤧ ᤁᤢᤗᤠᤃᤡ ᤂᤧᤏᤧ᤹ ᤔᤣ᤺ᤳ ᤔᤧᤔᤧᤍᤠᤖᤧᤴᤏᤧ᤹ᤀᤥ. 4 ᤁᤖ ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤗᤠᤈᤣ᤹ᤀᤥ ᤁᤧᤒᤣ᤺ᤰᤁᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤀᤥᤗᤠᤶᤔᤧ ᤀᤠᤛ᤻ᤛᤠ ᤀᤡᤛᤜᤠᤰᤁᤡᤸᤗᤧ ᤁᤢᤗᤠᤃᤡ ᤗᤳᤇᤠ ᤔᤣ᤺ᤳ ᤁᤧᤍᤠᤖᤢ ᤁᤧᤒᤡᤖᤢᤖ ᤐᤥᤱᤗᤥ॥” 5 ᤛᤧᤘᤠᤖᤥᤒᤠᤸᤗᤧ ᤀᤒᤪᤠᤜᤠᤶᤔᤧᤴ ᤔᤧᤳᤋᤢ. “ᤂᤧᤴ ᤔᤧᤴᤇᤢᤔᤠ᤺ᤴ ᤁᤴ ᤗᤠᤈᤣ᤹ᤀᤥ ᤀᤠᤱᤃᤠ᤹ᤏᤢ ᤛᤥᤖᤡᤰ ᤑᤧᤶᤔᤠ ᤔᤧᤍᤧᤴᤏᤧᤴᤏᤡᤸᤗᤧᤃ᥅ ᤂᤧᤏᤧ᤹ ᤁᤧᤗᤧᤖᤢ ᤁᤧᤎᤒᤠ ᤗᤠᤈᤣ᤹ᤀᤥᤀᤣ ᤁᤧᤛ᤻ᤛᤠ ᤀᤡᤛᤜᤠᤰᤁᤡᤴ ᤋᤣ᤹ᤖᤢᤱᤒᤡ᥅” 6 ᤀᤒᤪᤠᤜᤠᤶᤔᤡᤸᤗᤧ ᤂᤧᤴ ᤔᤧᤳᤋᤢ. “ᤁᤴ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤆᤥᤃᤧ᤹. ᤂᤧᤏᤧ᤹ ᤀᤠᤛ᤻ᤛᤠᤴ ᤂᤧᤵᤔᤥ ᤔᤧᤏᤢ᤺ᤰᤋᤧᤴ ᤔᤧᤍᤣ᤹ᤖᤧᤴᤏᤧ᤹॥ 7 ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤜᤡᤶ ᤏᤢ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤗᤠᤶ ᤁᤧᤓᤧᤵᤐᤠ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤜᤧᤰᤛᤡᤱᤅᤠᤱ ᤀᤠᤱᤃᤠ᤹ᤏᤢ ᤁᤶᤓᤗ᤹ᤖᤡᤰ ᤔᤠᤱᤜᤢᤵ ᤆᤥᤃᤢᤀᤠᤱ ᤘᤠ᤹. ‘ᤀᤠᤱᤃᤠ᤹ ᤂᤧᤏᤧ᤹ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ᤀᤣ ᤁᤴ ᤗᤠᤈᤣᤴ ᤐᤡᤖᤢᤱᤛᤡᤱ॥’ ᤀᤠᤱᤃᤠ᤹ ᤀᤠᤛ᤻ᤛᤠ᤺ᤸᤗᤧ ᤁᤢᤗᤠᤃᤡ ᤗᤳᤇᤠ ᤔᤣ᤺ᤳᤌᤡᤰ ᤂᤧᤵᤔᤥᤗᤠᤶ ᤑᤧᤵᤔᤠ ᤁᤧᤛᤢᤰᤋᤢᤖ ᤑᤠ᤹ᤀᤠᤱ ᤂᤢᤏᤧ᤹ ᤁᤢᤔᤠᤱᤗᤠ ᤀᤡᤱᤒᤠᤎᤡᤰ ᤂᤧᤏᤧ᤹ ᤁᤧᤍᤃᤡ ᤐᤠᤱᤄᤢᤖᤥ॥ 8 ᤂᤧᤴ ᤔᤧᤴᤇᤢᤔᤠᤴ ᤂᤧᤏᤧ᤹ᤏᤢ ᤑᤧᤶᤔᤠ ᤔᤧᤍᤧᤴᤏᤧᤴᤏᤡᤑᤠᤃᤪ ᤀᤠᤱᤃᤠ᤹ ᤔᤠᤱᤜᤧᤰ ᤆᤥᤃᤢᤱᤒᤠ ᤐᤠ᤺ᤴᤏᤡᤸᤗᤧ ᤂᤧᤏᤧ᤹ ᤁᤧᤴᤇᤢᤏᤧᤴ॥ ᤁᤖ ᤀᤠᤛ᤻ᤛᤠᤴ ᤂᤧᤵᤔᤥ ᤔᤧᤏᤢ᤺ᤰᤋᤧᤴ ᤔᤧᤍᤣ᤹ᤖᤧᤴᤏᤧ᤹॥” 9 ᤂᤧᤒᤩᤠᤱ ᤂᤧᤴ ᤛᤧᤘᤠᤖᤥᤒᤠᤸᤗᤧ ᤁᤢᤴᤍᤠᤱᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤗᤠᤱ ᤛᤧᤒᤱᤒᤠᤸᤗᤧ ᤁᤢᤛᤡ᤺ᤰᤋᤥ ᤁᤢᤜᤢᤰᤁᤡᤴ ᤏᤧᤛ᤻ᤛᤢᤀᤠᤱ ᤁᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤢᤏᤧ᤹ᤏᤢ ᤔᤠᤱᤜᤧᤰᤛᤡᤱ॥ 10 ᤜᤧᤰᤁᤩᤠᤱ ᤂᤧᤴ ᤛᤧᤘᤠᤖᤥᤒᤠᤴ ᤁᤢᤴᤍᤠᤱᤒᤠᤸᤗᤧ ᤌᤡᤒᤥᤱ ᤁᤢᤀᤢᤔᤣᤜᤠ᤹ ᤏᤢ ᤁᤧᤖᤧᤰ ᤐᤖᤡᤰᤗᤧᤴ ᤏᤢ᤺ᤒ᤻ᤏᤢᤒᤠ ᤔᤡᤰᤋᤥᤰ ᤆᤠᤛᤢᤱᤜᤠ᤹ ᤕᤠᤱᤛᤡᤱᤅᤠᤱ ᤌᤠᤛᤡᤱ॥ ᤜᤧᤰᤁᤩᤠᤱ ᤀᤖᤠᤔ ᤏᤜᤖᤤᤶ ᤗᤧᤵᤔᤠᤱ ᤌᤠᤛᤡᤱᤅᤠᤱ ᤏᤠᤜᤥᤖᤗᤧ ᤁᤢᤕᤧᤰᤕᤰᤁᤥ ᤐᤣᤃᤧ॥ 11 ᤕᤢ᤺ᤴᤇᤡᤰ ᤔᤧᤴᤇᤢᤔᤠ ᤜᤡᤴᤈᤠ᤹ᤜᤠ᤹ᤖᤧ ᤂᤢᤴᤇᤡ᤹ ᤆᤫᤠ᤺ᤳ ᤑᤠ᤺ᤵᤔᤠ ᤕᤧᤶ ᤐᤥ᤺ᤰᤂᤧ॥ ᤜᤧᤰᤁᤣ᤺ᤸᤗᤧ ᤕᤧᤰᤕᤰ ᤗᤠ᤺ᤰᤁᤠᤳ ᤗᤧᤵᤔᤠᤱᤒᤠ ᤘᤒᤠᤰᤁᤡᤸᤗᤧ ᤁᤢᤒᤣᤛᤠᤱ ᤂᤢᤏᤧ᤹ ᤀᤢᤔᤣᤜᤠ᤹ ᤕᤧᤵᤛᤢᤛᤡ॥ 12 ᤜᤧᤰᤁᤩᤠᤱ ᤂᤧᤸᤗᤧ ᤋᤢᤘᤠ ᤆᤥᤃᤢ. “ᤀᤠᤴᤍᤠᤱᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤀᤡᤴ ᤀᤠᤱᤃᤠ᤹ ᤀᤠᤕᤠ᤺ᤶᤒᤰᤁᤡᤴ ᤁᤢᤗᤡᤱᤍᤥ ᤁᤧᤳᤋᤠᤱ ᤐᤡᤖᤠᤱᤅᤧ᤹ᤀᤥ. ᤂᤧᤒᤩᤠᤱ ᤀᤠᤴᤍᤠᤱᤒᤠ ᤀᤒᤪᤠᤜᤠᤶᤔᤧᤴ ᤂᤧᤏᤧ᤹ ᤁᤧᤏᤢ᤹ᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤏᤡᤴ ᤀᤢᤛᤣ᤺ᤴᤎᤠᤰᤋᤧ᤹ᤀᤥ॥ 13 ᤀᤥᤔᤧᤳᤋᤧ᤹ᤀᤥ. ᤀᤠᤱᤃᤠ᤹ ᤁᤴ ᤘᤒᤠᤰᤁᤡᤸᤗᤧ ᤁᤢᤕᤠᤀᤥ ᤕᤧᤵᤐᤠᤖᤥ. ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ ᤔᤧᤴᤇᤢᤔᤠ ᤛᤠᤜᤠ᤹ ᤆᤫᤠ᤺ᤳ ᤑᤠ᤺ᤳᤇᤧ ᤔᤧᤓᤧᤴᤗ ᤔᤧᤒᤳ॥ 14 ᤜᤧᤰᤁᤣ᤺ᤸᤗᤧ ᤀᤰᤂᤣ ᤐᤥᤱᤗᤖᤥ—ᤀᤠᤳᤋᤡᤴ ᤛᤡᤛᤠᤍᤡᤱ ᤔᤧᤴᤇ᤻ᤕᤠᤴ ᤀᤠᤱᤃᤠ᤹ ‘ᤁᤧᤃᤢ᤺ᤴᤍᤠᤀᤥᤗᤠᤶ ᤆᤫᤠ᤺ᤳ ᤌᤢᤱᤔᤠᤖᤧᤗᤠᤃᤡ ᤁᤢ᤺ᤴᤍᤠ᤺ᤴ ᤁᤧ᤺ᤱᤕᤠ ᤔᤧᤳᤋᤠᤱ ᤐᤡᤖᤠᤱᤅᤧ᤹’ ᤔᤧᤳᤋᤢᤱ. ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ‘ᤌᤢᤅᤧ᤹ᤏᤧᤒᤠ’ ᤔᤧᤳᤋᤠᤀᤠᤱ ‘ᤁᤧᤀᤢᤔᤣᤜᤠ᤹ᤀᤠᤱ ᤆᤫᤠ᤺ᤳ ᤌᤢᤱᤛᤢᤱᤛᤡᤱ’ ᤗ᤹. ᤜᤠᤒᤠ ᤂᤧᤴᤏᤣ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ ᤀᤡᤛᤜᤠᤰᤁᤡᤸᤗᤧ ᤁᤢᤗᤠᤃᤡ ᤁᤧᤛᤣᤃᤢᤔᤠ ᤐᤥᤱᤗᤖᤥ॥ ᤂᤧᤴᤗᤠᤶᤒᤠᤀᤣ ᤂᤧᤏᤧ᤹ ᤁᤧᤏᤢ᤹ᤒᤠ ᤁᤧᤈᤥᤰ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤀᤠᤴᤍᤠᤱᤒᤠᤴ ᤀᤢᤛᤣ᤺ᤴᤃᤧᤎᤠᤰᤋᤢ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱᤗᤥ॥” 15 ᤂᤧᤸᤗᤧ ᤁᤴ ᤐᤠ᤺ᤵᤔᤠᤀᤠᤱ ᤔᤧᤴᤇᤢ᤺ᤳᤋᤣ ᤘᤕᤧᤖ. ᤖᤡᤒᤣᤁᤠ᤺ᤸᤗᤧ ᤁᤢᤓᤰᤋᤠᤱᤅᤥ ᤁᤢ᤺ᤴᤍᤠ᤺ᤴ ᤐᤰᤛᤢᤖ ᤂᤠ ᤑᤧᤖᤧ॥ ᤂᤧᤴ ᤀᤒᤪᤠᤜᤠᤶᤔᤡᤸᤗᤧ ᤁᤢᤴᤛᤠ᤹ ᤏᤠᤜᤥᤖᤧᤸᤗᤧ ᤁᤢᤔᤣᤳ ᤔᤡᤸᤁᤠᤖᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤒᤋᤢᤀᤣᤗᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤘᤕᤧ॥ 16 ᤛᤡᤛᤠᤍᤡᤱ ᤔᤧᤴᤇ᤻ᤕᤠᤴ ᤆᤠ᤹ᤖᤡᤰ ᤏᤢᤔᤠᤛᤢᤰᤔᤠ ᤆᤥᤃᤧ. ᤜᤧᤰᤁᤩᤠᤱ ᤁᤶᤓ ᤌᤠᤖᤡᤰ ᤀᤠᤳᤋᤡᤴ ᤕᤧᤶᤒᤡᤳᤇᤠ᤺ᤴᤏᤢᤀᤠᤱ ᤛᤥᤖᤡᤰ ᤔᤧᤴᤏᤧᤀᤣ ᤘᤕᤧ॥ ᤂᤢᤏᤧ᤹ ᤘᤒᤠᤰᤁᤥ ᤕᤥ ᤌᤩᤧᤀᤠᤱ ᤆᤫᤠ᤺ᤳᤋᤡᤴ ᤑᤠ᤺ᤳᤋᤢ ᤜᤧᤰᤁᤩᤠᤱ ᤌᤥ ᤌᤠᤅᤧ॥ 17 ᤂᤧᤴ ᤛᤧᤘᤠᤖᤥᤒᤠᤴ ᤜᤠᤖᤠ ᤗᤥ᤺ᤰᤋᤧᤖ ᤐᤣᤀᤠᤱ ᤔᤧᤳᤋᤢ. “ᤁᤧᤃᤢ᤺ᤴᤍᤠᤀᤥᤗᤠᤶ ᤔᤡᤛᤠᤰ ᤆᤫᤠ᤺ᤳ ᤌᤢᤱᤔᤠᤈᤡ ᤐᤡᤖᤠᤱᤅᤧ᤹॥” 18 ᤂᤧᤸᤗᤧ “ᤐᤥᤱ ᤀᤠᤍᤠᤱᤒᤣ. ᤌᤢᤅᤧ᤹ᤒᤠ” ᤔᤧᤳᤋᤢᤀᤠᤱ ᤂᤡᤔᤥ ᤁᤢᤃᤢ᤺ᤴᤍᤠᤴ ᤔᤢ ᤌᤠᤛᤢ. ᤜᤧᤰᤁᤩᤠᤱ ᤁᤢᤜᤢᤰᤁᤡᤸᤗᤧ ᤁᤢ᤺ᤴᤍᤠ᤺ᤴ ᤋᤧᤶᤛᤢᤀᤠᤱ ᤛᤧᤘᤠᤖᤥᤒᤠᤴ ᤆᤫᤠ᤺ᤳ ᤌᤢᤱᤛᤢ॥ 19 ᤆᤫᤠ᤺ᤳ ᤌᤢᤱᤛᤢ ᤛᤢᤖᤢᤀᤠᤱ ᤂᤧᤸᤗᤧ ᤛᤧᤘᤠᤖᤥᤒᤠᤴ ᤔᤧᤳᤋᤢ. “ᤁᤧᤀᤢᤔᤣᤜᤠ᤹ᤖᤧ ᤗᤠᤃᤡᤀᤠᤱ ᤂᤢᤴᤇᤡ᤹ ᤌᤢᤱᤎᤢᤱ ᤀᤠᤱᤃᤠ᤹ ᤆᤫᤠ᤺ᤳ ᤐᤠᤃᤢᤱ ᤐᤡᤖᤢᤱᤛᤡᤱ॥” 20 ᤜᤧᤰᤁᤩᤠᤱ ᤐᤈᤠᤳ ᤆᤠᤳᤋᤧᤖ ᤘᤄᤥ᤺ᤱᤀᤥ ᤂᤧᤸᤗᤧ ᤁᤢᤃᤢ᤺ᤴᤍᤠᤀᤥᤒᤠ ᤆᤫᤠ᤺ᤳᤋᤡᤴ ᤜᤢᤰᤛᤢᤀᤠᤱ ᤕᤠᤶᤔᤥ ᤆᤫᤠ᤺ᤳ ᤑᤠ᤺ᤳᤇᤧ ᤘᤒᤠᤰ ᤗᤧᤵᤔᤠᤱ ᤗᤥ᤺ᤰᤋᤧᤖ ᤐᤣ. ᤜᤧᤰᤁᤩᤠᤱ ᤂᤧᤸᤗᤧ ᤁᤧᤖᤧᤰ ᤁᤢᤀᤢᤔᤣᤜᤠ᤹ᤖᤧ ᤗᤠᤃᤡᤀᤠᤱ ᤆᤫᤠ᤺ᤳ ᤑᤠ᤺ᤳᤋᤢ ᤐᤡᤖᤢ॥ 21 ᤂᤧᤴ ᤛᤧᤘᤠᤖᤥᤒᤠᤸᤗᤧ ᤀᤠᤱᤃᤠ᤹ ᤀᤠᤗᤠᤶᤍᤡ᤺ᤰᤁᤥ ᤐᤥᤱᤔᤠ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤕᤜᤘᤣ ᤍᤠᤱᤒᤠᤸᤗᤧ ᤁᤧᤳᤋᤢ ᤐᤡᤖᤠᤱᤒᤠᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥᤔᤠᤖᤧ ᤗᤠᤃᤡ ᤔᤧᤶᤒᤠ᤺ᤳᤋᤣ ᤛᤫᤠ᤺ᤳ ᤏᤢᤖᤡᤰᤁᤠᤱ ᤂᤧᤴ ᤀᤥᤔᤧᤳᤋᤢᤖ ᤕᤢᤅᤧ॥ 22 ᤀᤢᤔᤣᤜᤠ᤹ᤖᤧ ᤆᤫᤠ᤺ᤳ ᤔᤧᤎᤢᤅᤢ ᤔᤧᤛᤢᤖᤢᤀᤠᤱ ᤂᤧᤴ ᤛᤧᤘᤠᤖᤥᤒᤠᤸᤗᤧ ᤋᤢᤰᤛᤡ ᤃᤪᤠᤔ ᤕᤠᤖᤡᤰᤗᤧᤴ ᤛᤠᤶᤔᤩᤠᤱ ᤔᤢᤴᤍᤪᤡ ᤏᤢ ᤁᤡᤵ ᤌᤡᤰ ᤃᤪᤠᤔ ᤕᤠᤖᤡᤰᤗᤧᤴ ᤏᤧᤵᤈᤠᤱ ᤛᤠᤶᤔᤩᤠᤱ ᤜᤢᤰᤐᤠ᤺ᤱᤃᤡᤜᤠ᤹ ᤗ᤺ᤳᤋᤢ॥ 23 ᤜᤧᤰᤁᤩᤠᤱ ᤔᤧᤳᤋᤢ. “ᤂᤧᤏᤧ᤹ ᤜᤠ᤺ᤳᤗᤧ ᤁᤢᤛ᤻ᤛᤠᤏᤧᤒᤣ᥅ ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤜᤡᤶᤔᤥ ᤀᤠᤀᤡᤴ ᤛᤧᤴᤍᤡᤰ ᤀᤠᤏᤡᤃᤣ ᤗᤠᤃᤡ ᤕᤠᤱᤎᤥ᤺ᤰᤔᤠᤍᤧᤴ ᤏᤧᤒᤡ᥅” 24 ᤂᤢᤏᤧ᤹ ᤂᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤏᤠᤜᤥᤖᤗᤠᤶ ᤔᤡᤸᤁᤠᤖᤧ ᤁᤳᤋᤢᤒᤠ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤒᤋᤢᤀᤣᤗᤖᤧ ᤁᤢᤛ᤻ᤛᤠᤀᤠᤖᤥ॥” 25 ᤂᤧᤸᤗᤧ ᤕᤠᤶᤔᤥᤀᤠᤱ ᤔᤧᤳᤋᤢ. “ᤀᤠᤏᤡᤃᤣ ᤆᤠᤛᤣ᤹ ᤏᤢ ᤕᤠ᤹ᤗᤠᤱ ᤛᤡᤍᤳ ᤁᤳᤋᤢᤶᤒᤧ. ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤂᤡᤏᤡ᤹ ᤕᤠ᤺ᤰᤔᤠᤖᤧ ᤗᤠᤃᤡ ᤕᤠᤱᤎᤥ᤺ᤰᤔᤠᤍᤧᤴᤏᤠᤱ ᤏᤧ᤹᤺॥” 26 ᤂᤧᤒᤩᤠᤱ ᤂᤧᤴ ᤛᤧᤘᤠᤖᤥᤒᤠᤸᤗᤧ ᤕᤜᤘᤣ ᤍᤠᤱᤒᤠᤴ ᤀ᤺ᤰᤂᤢᤶ ᤑᤴᤇᤡᤱᤅᤠᤱ ᤛᤧᤘᤠ ᤔᤧᤳᤋᤢᤖ ᤔᤧᤳᤋᤢ. 27 “ᤕᤜᤘᤣ ᤍᤠᤱᤒᤠ. ᤀᤠᤴᤍᤠᤱᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥᤖᤖᤥ. ᤂᤢᤏᤧ᤹ ᤌᤎᤵ ᤔᤧᤸᤗ᤹ᤔᤏᤠᤒᤠ ᤔᤡ᤺ᤶᤈᤡ ᤏᤢ ᤏᤛᤠ᤺ᤴᤛᤠ᤺ᤴᤒᤠ ᤆᤥ᤺ᤰᤐᤠ ᤐᤠ᤺ᤴᤏᤡᤴ ᤀᤠᤴᤍᤠᤱᤒᤠᤴ ᤀᤥᤛᤣ᤺ᤴᤎᤠᤰᤋᤢᤀᤠᤱ ᤘᤠ᤹॥ ᤀᤠᤱᤃᤠ᤹ᤃ ᤕᤜᤘᤣ ᤍᤠᤱᤒᤠᤸᤗᤧᤀᤣ ᤗᤠᤶᤔᤥ ᤋᤡ᤺ᤰᤋᤠᤱᤗ ᤀᤠᤴᤍᤠᤱᤒᤠᤸᤗᤧ ᤁᤢᤃᤠ᤹ᤀᤡᤸᤗᤧ ᤁᤢᤜᤡᤶᤔᤥ ᤋᤠᤖᤠᤱᤅᤠᤱ ᤘᤠ᤹ᤀᤠᤖᤥ॥” 28 ᤛᤡᤛᤠᤍᤡᤱ ᤔᤧᤴᤇ᤻ᤕᤠᤴ ᤐᤣᤀᤠᤱ ᤁᤢᤶᤔᤠᤖᤧ ᤁᤢᤜᤡᤶᤛᤕᤱᤜᤠ᤹ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤧᤰᤋᤢᤛᤡ॥ 29 ᤖᤡᤒᤣᤁᤠ᤺ᤸᤗᤧ ᤗᤠᤒᤠᤏ ᤔᤡᤱ ᤁᤧᤘᤠ᤺ᤵᤐᤠ ᤁᤢᤶᤓᤢ᤹ᤎᤡᤰ ᤘᤕᤧ॥ ᤜᤧᤰᤁᤩᤠᤱ ᤗᤠᤒᤠᤏᤧᤴ ᤗ᤺ᤴᤍᤧᤀᤠᤱ ᤀᤒᤪᤠᤜᤠᤶᤔᤡᤸᤗᤧ ᤁᤢᤛᤧᤘᤠᤖᤥᤒᤠ ᤁᤧᤘᤠ᤹ᤒᤠ ᤘᤒᤠᤰᤁᤡᤸᤗᤧ ᤁᤢᤒᤣᤛᤠᤱ ᤗᤥ᤺ᤰᤋᤧᤖ ᤐᤣ॥ 30 ᤂᤢᤏᤧ᤹ ᤁᤢᤴᤛᤠ᤹ᤖᤧ ᤁᤢᤴᤒᤥᤀᤥ ᤔᤢᤴᤍᤪᤡ ᤏᤢ ᤁᤢᤜᤢᤰᤁᤥᤒᤠ ᤜᤢᤰᤐᤠ᤺ᤱᤃᤡᤜᤠ᤹ ᤏᤡᤛᤢ ᤜᤧᤰᤁᤩᤠᤱ “ᤂᤧᤴ ᤔᤏᤠ᤺ᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ” ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤴᤛᤠ᤹ᤖᤥᤗᤠᤶ ᤂᤧᤵᤛᤢᤏᤣᤔᤧ᤺ᤴᤏᤣ ᤂᤢᤏᤧ᤹ ᤂᤧᤴ ᤔᤏᤠᤀᤥ ᤐᤣᤃᤧ॥ 31 ᤂᤧᤴ ᤔᤏᤠᤴ ᤘᤒᤠᤰᤁᤡᤸᤗᤧ ᤁᤢᤕᤠᤀᤥ ᤀᤢᤔᤣᤜᤠ᤹ᤖᤧ ᤂᤢᤴᤇᤡ᤹ ᤐᤣᤛᤠᤱ ᤕᤧᤒᤧᤒᤠ ᤗᤠᤒᤠᤏᤧᤸᤗᤧ ᤏᤡᤛᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢ᤹ᤀᤡᤛᤠᤶ ᤁᤧᤄᤥᤒᤠ ᤀᤠᤍᤠᤱᤒᤣ ᤛᤡᤃᤠᤱ ᤑᤧᤖᤧ᤹ᤀᤥ॥ ᤌᤣᤀᤠᤱ ᤗᤠ᤺ᤰᤁᤠᤳ ᤌ᤺ᤵᤐᤧᤳ ᤁᤧᤕᤧᤵᤐᤠᤒᤣ᥅ ᤂᤧᤏᤧ᤹ ᤁᤧᤗᤠᤃᤡ ᤏᤧᤔᤠᤍᤧᤴ ᤏᤢ ᤀᤢᤔᤣᤜᤠ᤹ᤖᤧ ᤗᤠᤃᤡ ᤕᤧᤵᤔᤠᤍᤧᤴ ᤕᤠᤖᤡᤵ ᤆᤥᤃᤢᤱᤅᤠᤱ ᤏᤧᤖᤥ॥” 32 ᤂᤧᤒᤩᤠᤱ ᤂᤧᤴ ᤛᤧᤘᤠᤖᤥᤒᤧᤴ ᤗᤠᤒᤠᤏᤧᤴᤏᤢ ᤜᤡᤶᤔᤥ ᤐᤣᤃᤧ. ᤜᤧᤰᤁᤩᤠᤱ ᤗᤠᤒᤠᤏᤧᤸᤗᤧ ᤀᤢᤔᤣᤜᤠ᤹ᤀᤥᤗᤠᤶ ᤁᤰᤜᤠ᤹ ᤌᤠᤛᤢᤀᤠᤱ ᤂᤧᤱᤜᤠ᤹ ᤕᤠ᤹ᤗᤠᤱ ᤏᤢ ᤆᤠᤛᤣ᤹ ᤐᤡᤖᤢᤛᤡ॥ ᤜᤧᤰᤁᤩᤠᤱ ᤀᤒᤪᤠᤜᤠᤶᤔᤡᤸᤗᤧ ᤁᤢᤛᤧᤘᤠᤖᤥᤒᤠᤴ ᤜᤧᤰᤁᤩᤠᤱ ᤂᤧᤴᤏᤢ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤂᤢᤴᤇᤡ᤹ ᤗᤠᤱ ᤘᤠᤜᤵᤔᤠ ᤆᤫᤠ᤺ᤳᤋᤠᤱ ᤐᤡᤖᤢᤛᤡ॥ 33 ᤜᤧᤰᤁᤩᤠᤱ ᤂᤧᤸᤗᤧ ᤁᤢᤍᤃᤠᤱ ᤆᤠᤔᤠ ᤌᤢᤱᤔᤠ ᤁᤢᤈᤠᤜᤠ᤹ ᤔᤧᤕᤢᤰᤛᤢ ᤔᤧᤒᤢᤖᤢ. ᤁᤖ ᤂᤧᤸᤗᤧ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤀᤡᤱᤄᤱᤅᤡᤴ ᤂᤡᤏᤡ᤹ ᤔᤧᤶᤔᤧᤳᤋᤣᤃ ᤀᤠᤱᤃᤠ᤹ ᤔᤧᤈᤠᤀᤠᤴ ᤔᤧᤎᤢᤱᤅᤠᤸᤗᤥ॥” ᤗᤠᤒᤠᤏᤧᤸᤗᤧ ᤔᤧᤳᤋᤢ. “ᤗᤢ. ᤀᤥᤔᤧᤳᤋᤧ᤹॥” 34 ᤂᤧᤒᤩᤠᤱ ᤂᤧᤸᤗᤧ ᤔᤧᤳᤋᤢᤛᤡ. “ᤀᤒᤪᤠᤜᤠᤶᤔᤡᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤀᤥ ᤀᤠᤱᤃᤠ᤹ ᤌᤡᤰᤐᤠᤀᤠᤖᤥ॥ 35 ᤕᤜᤘᤣ ᤍᤠᤱᤒᤠᤸᤗᤧ ᤀᤠᤱᤃᤠ᤹ ᤀᤠᤴᤍᤠᤱᤒᤧᤴ ᤕᤖᤡᤰ ᤔᤢ᤹ᤀᤡᤛᤠᤶ ᤐᤡᤖᤢᤀᤠᤱ ᤂᤢᤏᤧ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤕᤶᤒᤠ ᤔᤏᤠ ᤐᤥ᤺ᤰᤂᤧᤀᤠᤱ ᤘᤠ᤹॥ ᤕᤜᤘᤣ ᤍᤠᤱᤒᤠᤸᤗᤧ ᤂᤢᤏᤧ᤹ ᤔᤧᤸᤗᤢᤰ ᤏᤢ ᤔᤧ᤺ᤴᤍᤠᤗᤢᤵᤜᤠ᤹. ᤜᤧᤰᤁᤩᤠᤱ ᤐᤡᤳᤜᤠ᤹. ᤛᤠᤶᤔᤩᤠᤱ ᤕᤢᤵᤐᤠ. ᤛᤧᤘᤠᤖᤥᤒᤠ ᤛᤧᤘᤠᤖᤥᤔᤠᤜᤠ᤹. ᤀᤢᤔᤣᤜᤠ᤹ ᤜᤧᤰᤁᤩᤠᤱ ᤀᤍᤱᤜᤠ᤹ ᤐᤡᤖᤢᤀᤠᤱ ᤘᤠ᤹ᤖᤥ॥ 36 ᤀᤠᤱᤃᤠ᤹ ᤀᤠᤴᤍᤠᤱᤒᤠᤸᤗᤧ ᤁᤢᤜᤡᤶᤛᤠᤔᤠ ᤛᤠᤖᤠ᤺ᤸᤗᤧ ᤁᤢᤃᤠᤵᤔᤥ ᤋᤢᤶᤔᤥ ᤀᤒᤪᤠᤜᤠᤶᤔᤡᤴ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ ᤐᤡᤖᤢ. ᤜᤧᤰᤁᤩᤠᤱ ᤀᤠᤴᤍᤠᤱᤒᤠᤸᤗᤧ ᤁᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤢᤏᤧ᤹ ᤐᤡᤖᤢᤀᤠᤱ ᤘᤠ᤹॥ 37 ᤀᤠᤴᤍᤠᤱᤒᤠᤸᤗᤧ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱᤅᤠᤱ ᤔᤠᤱᤜᤧᤰᤛᤡᤱᤔᤠ ᤐᤠᤱᤄᤠᤱᤅᤠᤱ ᤘᤠ᤹. ‘ᤂᤧᤏᤧ᤹ ᤀᤠᤛᤠ᤺ᤸᤗᤧ ᤁᤢᤗᤠᤃᤡ ᤀᤠᤱᤃᤠ᤹ ᤀᤠᤸᤗᤥ ᤕᤢᤱᤀᤠᤒᤠ ᤗᤠᤈᤣ᤹ᤀᤥᤒᤠ ᤁᤏᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤛᤠᤔᤧᤴᤇ᤻ᤕᤠᤜᤠ᤹ ᤀᤠᤳᤋᤡᤴᤏᤠᤱ ᤐᤠᤱᤗᤡ ᤔᤧᤍᤠᤖᤧᤴ ᤔᤧᤒᤡᤖᤧᤴᤏᤧ᤹ᤀᤥ॥ 38 ᤁᤖ ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤗᤠᤈᤣ᤹ᤀᤥ ᤏᤢ ᤀᤠᤶᤒᤠᤖᤧ ᤁᤢᤔᤏᤠᤜᤠ᤹ᤀᤥ ᤐᤣᤃᤧ᤹ᤀᤠᤱ ᤀᤠᤛ᤻ᤛᤠᤴ ᤗᤳᤇᤠ ᤔᤣ᤺ᤳᤌᤡᤰ ᤁᤥ᤺ᤳᤋᤧ ᤋᤠᤖᤧᤒᤡᤖᤧ᤹ᤀᤥ॥’ 39 “ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤴᤍᤠᤱᤒᤧᤴ ᤔᤧᤳᤋᤢᤱ. ‘ᤂᤧᤴ ᤔᤧᤴᤇᤢᤔᤠᤴ ᤀᤠᤱᤃᤠ᤹ᤏᤢ ᤑᤧᤶᤔᤠ ᤔᤧᤍᤧᤴᤏᤧᤴᤏᤡᤸᤗᤧᤃ᥅’ 40 “ᤂᤢᤏᤧ᤹ ᤔᤧᤳᤋᤠᤱ. ‘ᤀᤠᤱᤃᤠ᤹ ᤀᤠᤳᤋᤡᤴ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤗᤠᤱᤄᤣ᤺ᤰᤁᤠ ᤒᤠ ᤂᤢᤏᤧ᤹ᤀᤣ ᤁᤢᤔᤠᤱᤗᤠᤀᤡᤱᤒᤠᤴ ᤂᤧᤏᤧ᤹ᤏᤢ ᤐᤠᤱᤄᤢ ᤁᤧᤒᤡ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤕᤠ᤺ᤶᤒᤰᤁᤡᤴ ᤁᤢᤗᤡᤱᤍᤥ ᤁᤧᤳ. ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤃᤠ᤹ᤀᤡ ᤏᤢ ᤀᤠᤶᤒᤠᤖᤧ ᤁᤢᤜᤡᤶᤛᤕ᤺ᤱᤒᤠᤜᤠ᤹ᤗᤠᤶ ᤀᤠᤛ᤻ᤛᤠ᤺ᤸᤗᤧ ᤁᤢᤗᤠᤃᤡ ᤗᤳᤇᤠ ᤔᤣ᤺ᤳ ᤁᤧᤍᤠᤖᤢ ᤁᤧᤒᤡᤖᤢᤖᤥ॥ 41 ᤂᤧᤏᤧ᤹ ᤀᤠᤱᤃᤠ᤹ ᤀᤠᤃᤠ᤹ᤀᤡᤜᤠ᤹ᤀᤥ ᤁᤧᤒᤣ᤺ᤰᤁᤠᤱ ᤂᤧᤏᤧ᤹ ᤔᤠᤱᤃᤧᤜᤧᤰᤛᤡᤱᤒᤠ ᤐᤠ᤺ᤴᤏᤡᤴ ᤁᤧᤃᤧᤳᤋᤢᤒᤠ ᤐᤥᤱ॥ ᤁᤖ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠ ᤔᤧᤴᤇᤢᤔᤠᤴ ᤑᤧᤶᤔᤠ ᤔᤧᤶᤓᤠ᤺ᤰᤋᤢᤴᤇᤠᤱ ᤂᤧᤏᤧ᤹ ᤔᤠᤱᤃᤧᤜᤧᤰᤛᤡᤱᤒᤠ ᤐᤠ᤺ᤴᤏᤥ ᤁᤧᤴᤎᤠᤏᤧᤴᤗᤥ॥’ 42 “ᤀᤠᤀᤡᤴ ᤘᤒᤠᤰᤁᤥ ᤁᤧᤖᤠᤱᤅᤠᤱ ᤀᤠᤱᤃᤠ᤹ ᤀᤰᤂᤣᤗ᤹ᤖᤡᤰ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢᤱ. ‘ᤀᤠᤱᤃᤠ᤹ ᤀᤠᤴᤍᤠᤱᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱ. ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤡᤑᤠ᤹ᤃᤪ ᤀᤠᤕᤠ᤺ᤶᤒᤰᤁᤡᤴ ᤁᤢᤗᤡᤱᤍᤥ ᤁᤧᤳᤗ ᤕᤠ᤺ᤴᤍᤧ᤹ᤀᤥ॥’ 43 ᤂᤠ ᤁᤴ ᤘᤒᤠᤰᤁᤥ ᤕᤧᤵᤐᤠᤖᤥ॥ ᤀᤠᤳᤋᤡᤴ ᤔᤧᤴᤇ᤻ᤕᤠᤴ ᤆᤫᤠ᤺ᤳ ᤑᤠ᤺ᤳᤇᤧ ᤑᤧᤴ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤴ ‘ᤂᤧᤏᤧ᤹ ᤁᤧᤃᤢ᤺ᤴᤍᤠᤀᤥᤗᤠᤶ ᤆᤒᤧ᤺ᤳᤇᤡᤰ ᤆᤫᤠ᤺ᤳ ᤌᤢᤱᤔᤠ ᤐᤡᤖᤠᤱᤅᤧ᤹.’ ᤔᤧᤳᤋᤢᤱ᤹॥ 44 ᤂᤧᤸᤗᤧ ‘ᤌᤢᤅᤧ᤹ᤀᤥ’ ᤔᤧᤳᤋᤠᤏᤧᤓᤃᤪ ᤜᤧᤰᤁᤩᤠᤱ ‘ᤀᤠᤱᤃᤠ᤹ ᤁᤧᤀᤢᤔᤣᤜᤠ᤹ᤀᤠᤱ ᤆᤫᤠ᤺ᤳ ᤐᤠᤃᤢᤱ ᤐᤡᤖᤢᤱᤛᤡᤱ.’ ᤐᤠ᤺ᤳᤋᤢ᤹. ᤜᤠᤒᤠ ᤂᤧᤴ ᤔᤧᤴᤇᤢᤔᤠ᤺ᤴᤏᤣ ᤀᤠᤴᤍᤠᤱᤒᤠᤸᤗᤧ ᤁᤢᤛ᤻ᤛᤠ᤺ᤸᤗᤧ ᤁᤢᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢᤔᤠ ᤐᤥᤱᤗᤖᤥ॥ 45 “ᤀᤠᤱᤃᤠ᤹ ᤁᤴ ᤐᤠ᤺ᤴᤏᤡᤴ ᤀᤠᤏᤡᤱᤘᤠ᤹ᤀᤥ ᤐᤠ᤺ᤵᤔᤠ ᤛᤢ᤺ᤵᤔᤠᤏᤢ᤺ᤸᤗᤧ ᤋᤃᤡ. ᤁᤢᤓᤰᤋᤠᤱᤅᤥ ᤁᤢᤃᤢ᤺ᤴᤍᤠᤴ ᤐᤰᤂᤢᤖ ᤖᤡᤒᤣᤁᤠᤴ ᤂᤠ ᤑᤧᤖᤧ. ᤜᤧᤰᤁᤩᤠᤱ ᤘᤒᤠᤰᤁᤥ ᤕᤥ ᤌᤠᤛᤡᤱᤅᤠᤱ ᤆᤫᤠ᤺ᤳ ᤑᤠ᤺ᤳᤋᤢ॥ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤔᤧᤳᤋᤢᤱ. ‘ᤀᤠᤱᤃᤠ᤹ ᤆᤫᤠ᤺ᤳᤆᤡ ᤌᤢᤱᤔᤠ ᤐᤡᤖᤠᤱᤅᤧ᤹॥’ 46 “ᤂᤡᤔᤥ ᤂᤢᤏᤧ᤹ ᤁᤢᤃᤢ᤺ᤴᤍᤠᤴ ᤁᤢᤓᤰᤋᤠᤱᤅᤥᤗᤠᤶ ᤕᤥ ᤌᤠᤛᤢᤀᤠᤱ ᤔᤧᤳᤋᤠᤱ ‘ᤐᤥᤱ ᤌᤢᤅᤧ᤹ᤛᤡᤏᤧ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤀᤢᤔᤣᤜᤠ᤹ᤀᤠᤱ ᤆᤫᤠ᤺ᤳ ᤌᤢᤱᤛᤢᤱᤛᤡᤱ᤹॥’ ᤂᤧᤒᤩᤠᤱ ᤀᤠᤱᤃᤠ᤹ ᤆᤫᤠ᤺ᤳ ᤌᤢᤅᤢᤱ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤀᤢᤔᤣᤜᤠ᤹ᤀᤠᤱ ᤆᤫᤠ᤺ᤳ ᤌᤢᤱᤛᤢᤛᤡ॥ 47 “ᤀᤠᤱᤃᤠ᤹ ᤂᤢᤏᤧ᤹ ᤂᤧᤏᤧ᤹ ‘ᤜᤠ᤺ᤳᤗᤧ ᤁᤢᤛ᤻ᤛᤠᤏᤧᤒᤣ᥅’ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤱ॥ “ᤂᤢᤏᤧ᤹ ᤐᤠ᤺ᤳᤋᤢ. ‘ᤏᤠᤜᤥᤖ ᤏᤢ ᤔᤡᤸᤁᤠᤖᤧ ᤂᤢᤴᤇᤡ᤹ ᤕᤧᤶᤒᤡᤳᤇᤠᤛᤠ ᤒᤋᤢᤀᤣᤗᤖᤧ ᤁᤢᤛ᤻ᤛᤠᤀᤠᤖᤥ॥’ “ᤂᤧᤒᤩᤠᤱ ᤀᤠᤱᤃᤠ᤹ ᤂᤢᤏᤧ᤹ ᤁᤢᤴᤒᤥᤀᤥ ᤔᤢᤴᤍᤪᤡ᤺ᤴ ᤏᤢ ᤁᤢᤜᤢᤰᤁᤥ ᤜᤢᤰᤐᤠ᤺ᤱᤃᤡᤜᤠ᤹ ᤘᤠ᤺ᤳᤋᤢᤱ॥ 48 ᤜᤧᤰᤁᤩᤠᤱ ᤀᤠᤱᤃᤠ᤹ ᤀ᤺ᤰᤂᤢᤶ ᤑᤴᤇᤡᤱᤅᤠᤀᤠᤱ ᤕᤜᤘᤣ ᤍᤠᤱᤒᤠᤴ ᤛᤧᤘᤠ ᤔᤧᤳᤋᤢᤱ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤴᤍᤠᤱᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤴᤛᤠ᤹ᤖᤧ ᤁᤢᤶᤔᤧᤴᤇᤠ᤹ᤀᤡᤴ ᤀᤠᤴᤍᤠᤱᤒᤠᤸᤗᤧ ᤁᤢᤛ᤻ᤛᤠᤀᤥ ᤐᤠᤱᤗᤡᤔᤠ ᤋᤠ᤺ᤵᤔᤠᤖᤧ ᤗᤠᤃᤡ ᤁᤢᤍᤥ᤺ᤵᤔᤠ ᤗᤠᤶ ᤁᤧᤍᤥᤶᤒᤠ ᤀᤠᤴᤍᤠᤱᤒᤠ ᤀᤒᤪᤠᤜᤠᤶᤔᤡᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤠᤴ ᤁᤢᤏᤠᤖᤠ ᤑᤥᤛᤢᤱ॥ 49 ᤀᤠᤸᤗ ᤀᤠᤱᤃᤠ᤹ ᤀᤠᤴᤍᤠᤱᤒᤠᤴᤏᤢ ᤂᤡᤏᤡ᤹ ᤌᤎᤵ ᤔᤧᤸᤗ᤹ᤔᤏᤠᤒᤠ ᤔᤡ᤺ᤶᤈᤡ ᤏᤢ ᤛᤧᤰᤂᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤀᤠᤱᤃᤠ᤹ ᤀᤥᤔᤧᤳᤋᤧ᤹॥ ᤔᤣ᤺ᤴᤏᤣ ᤑᤠ᤹ᤛᤠᤱ ᤀᤠᤱᤃᤠ᤹ ᤀᤥᤔᤧᤳᤋᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤌᤣ ᤆᤥ᤺ᤰᤔᤠ ᤐᤥᤱ ᤀᤠᤱᤃᤠ᤹ ᤂᤧᤴ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤱ॥” 50 ᤂᤧᤒᤩᤠᤱ ᤗᤠᤒᤠᤏᤧᤴ ᤏᤢ ᤒᤋᤢᤀᤣᤗᤖᤧ ᤏᤥᤃᤵ ᤐᤡᤖᤧᤇᤢ. “ᤁᤴ ᤐᤠ᤺ᤴᤏᤡᤴ ᤕᤜᤘᤣ ᤍᤠᤱᤒᤠᤗᤠᤶ ᤁᤧᤍᤠᤒᤠᤖᤥ. ᤜᤧᤰᤁᤣ᤺ᤸᤗᤧ ᤀᤠᤴᤇᤡᤃᤣ ᤂᤧᤏᤧ᤹ ᤘᤣ᤹ ᤐᤠᤴ ᤌᤣᤀᤠᤱ ᤔᤧᤵᤔᤠ ᤔᤧᤛᤢᤰᤏᤧᤇᤡᤃᤧᤴᤗᤥ॥ 51 ᤂᤠ ᤀᤥᤔᤧᤳᤋᤧ᤹. ᤖᤡᤒᤣᤁᤠᤴ ᤒᤠᤁᤵᤔᤥᤀᤣ ᤘᤠ᤹. ᤂᤢᤏᤧ᤹ ᤋᤣ᤹ᤖᤧᤀᤠᤱ ᤐᤣᤃᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤂᤧᤴ ᤂᤧᤏᤧ᤹ ᤁᤧᤴᤍᤠᤱᤒᤠᤸᤗᤧ ᤁᤢᤛ᤻ᤛᤠ᤺ᤸᤗᤧ ᤁᤢᤔᤣᤳ ᤐᤥᤱᤗ॥” 52 ᤀᤒᤪᤠᤜᤠᤶᤔᤡᤸᤗᤧ ᤁᤢᤛᤧᤘᤠᤖᤥᤒᤠᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤂᤠᤶᤒᤠᤱᤅᤥ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠᤱ ᤕᤜᤘᤣ ᤍᤠᤱᤒᤧᤴ ᤛᤧᤘᤠ ᤔᤧᤳᤋᤢ॥ 53 ᤂᤧᤒᤩᤠᤱ ᤂᤧᤸᤗᤧ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤘᤠ᤺ᤳᤋᤡᤜᤠ᤹ ᤜᤧᤰᤁᤩᤠᤱ ᤆᤠᤱᤜᤠ᤹ ᤗ᤺ᤳᤋᤢᤀᤠᤱ ᤖᤡᤒᤣᤁᤠᤴ ᤐᤡᤖᤢ॥ ᤂᤧᤸᤗᤧ ᤖᤡᤒᤣᤁᤠ᤺ᤸᤗᤧ ᤁᤢᤶᤔᤠ ᤏᤢ ᤁᤢᤶᤓᤢ᤹ᤛᤡᤀᤠᤱ ᤕᤖᤡᤰ ᤁᤢᤔᤧᤴ ᤁᤧᤄᤡ᤺ᤰᤐᤠ ᤔᤡᤰᤋᤥ᤺ᤰᤜᤠ᤹ ᤐᤡᤖᤢᤛᤡ॥ 54 ᤂᤧᤒᤩᤠᤱ ᤂᤧᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤔᤧᤈ ᤔᤧᤎᤢᤅᤢ. ᤂᤧᤴ ᤛᤧᤴᤍᤡᤰ ᤂᤧᤵᤔᤥᤀᤣ ᤔᤧᤏᤧᤛ᤻ᤛᤧ॥ ᤁᤖ ᤁᤢᤍᤠ᤺ᤴᤍᤡᤰᤔᤠ ᤂᤠᤀᤥ᤺ᤳᤋᤧᤏᤢᤔᤧ᤺ᤴᤏᤣ ᤋᤠᤏᤠᤶᤛᤠ ᤂᤧᤸᤗᤧ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤐᤣᤰ ᤀᤠᤒᤠᤱᤄᤧ᤹ᤀᤥ ᤜᤧᤰᤁᤩᤠᤱ ᤀᤠᤴᤍᤠᤱᤒᤧᤀᤥ ᤐᤣ᤺ᤰᤁᤠᤖᤥ॥” 55 ᤁᤖ ᤖᤡᤒᤣᤁᤠ᤺ᤸᤗᤧ ᤁᤢᤶᤓᤢ᤹ ᤏᤢ ᤁᤢᤶᤔᤠᤖᤧ ᤏᤥᤃᤵ ᤐᤡᤖᤧᤇᤢ. “ᤜᤡᤴᤈᤠ᤹ᤀᤡᤴ ᤌᤡᤒᤥᤱ ᤕᤧᤴ ᤕᤠᤖᤡᤰ ᤀᤠᤏᤡᤃᤧᤏᤢ ᤘᤠ᤹ᤖ ᤜᤧᤰᤁᤩᤠᤱ ᤐᤣ᤺ᤰᤛᤠᤱ ᤏᤢ᤹॥” 56 ᤁᤖ ᤂᤧᤴ ᤛᤧᤘᤠᤖᤥᤒᤠᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ᤃ ᤏᤢ᤺ᤱᤅᤠ ᤐᤣ᤺ᤰᤁᤠ ᤕᤠᤵᤔᤡ ᤀᤠᤴᤇᤠᤰᤋᤧᤴᤏᤧ᤹ᤀᤥ. ᤕᤜᤘᤣ ᤍᤠᤱᤒᤠᤸᤗᤧ ᤀᤠᤱᤃᤠ᤹ ᤀᤠᤗᤠᤶᤍᤡᤰ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤁᤢᤗᤡᤱᤍᤥ ᤁᤧᤳᤋᤠᤱ ᤐᤡᤖᤠᤱᤅᤠᤱ ᤘᤠ᤹॥ ᤀᤠᤱᤃᤠ᤹ ᤐᤣᤰ ᤀᤠᤒᤠᤱᤄᤧ᤹ᤀᤥ ᤜᤧᤰᤁᤩᤠᤱ ᤀᤠᤴᤍᤠᤱᤒᤧᤀᤥ ᤐᤣ᤺ᤰᤁᤠᤖᤥ॥” 57 ᤂᤧᤱᤜᤠ᤹ᤖᤧ ᤔᤧᤳᤋᤧᤇᤢ. “ᤜᤡᤴᤈᤠ᤹ᤀᤡᤴᤏᤣ ᤀᤠᤏᤡ᤹ ᤛᤣ᤺ᤴᤍᤥᤛᤢᤶ ᤂᤢᤏᤧ᤹ ᤌᤣ ᤐᤠ᤺ᤳᤋᤢᤀᤡ॥” 58 ᤜᤧᤰᤁᤩᤠᤱ ᤂᤢᤴᤇᤡ᤹ ᤖᤡᤒᤣᤁᤠᤴ ᤀᤢ᤺ᤳᤋᤧᤇᤢᤀᤠᤱ ᤛᤣ᤺ᤴᤍᤥᤛᤧᤇᤢ. “ᤁᤴ ᤔᤏᤠ᤺ᤴᤏᤢ ᤐᤣ᤺ᤰᤔᤠ ᤁᤧᤍᤧᤶᤒᤡ᥅” ᤂᤢᤏᤧ᤹ ᤐᤠ᤺ᤳᤋᤢ “ᤀᤠᤱᤃᤠ᤹ ᤐᤣ᤺ᤰᤁᤠ॥” 59 ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤢᤛᤠ᤹ ᤖᤧᤒᤡᤁᤠ᤺ᤴ. ᤛᤣᤘᤠᤖᤥᤔᤠᤏᤢ ᤛᤥᤖᤡᤰ ᤀᤒᤪᤠᤜᤠᤶᤔᤡᤸᤗᤧ ᤁᤢᤛᤧᤘᤠᤖᤥᤒᤧᤴ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤏᤠᤜᤠ᤹ᤏᤢ ᤔᤧᤒᤠᤱᤄᤢᤔᤧᤍᤣᤛᤢ॥ 60 ᤂᤧᤱᤜᤠ᤹ᤖᤧ ᤖᤡᤒᤣᤁᤠᤴ ᤔᤢ᤹ᤀᤡᤛᤠᤶ ᤔᤧᤎᤠᤛᤢ ᤔᤧᤒᤢᤖᤢᤀᤠᤱ ᤔᤧᤔᤧᤳᤋᤢ. “ᤀᤠᤏᤡᤃᤣ ᤆᤣᤗᤡᤔᤠ ᤏᤢᤛᤠ᤹ᤀᤣ. ᤂᤧᤏᤧ᤹ ᤜᤧᤴᤇᤡᤱ ᤜᤧᤴᤇᤡᤱᤗᤧ ᤂᤢᤴᤇᤡ᤹ ᤔᤠ ᤁᤧᤒᤥᤱᤗᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛ᤻ᤛᤠ ᤁᤧᤀᤣᤜᤠ᤹ᤏᤢ ᤌᤱ ᤁᤧᤈᤥ᤺ᤰᤐᤠ ᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤕᤧᤰᤕᤰᤜᤠ᤹ ᤁᤧᤛ᤻ᤛᤠᤜᤠ᤹ ᤜᤢᤰᤁᤠᤵ ᤔᤧᤔᤧᤳᤇᤡᤱᤗᤖᤥ॥” 61 ᤂᤧᤒᤩᤠᤱ ᤖᤡᤒᤣᤁᤠᤴ ᤏᤢ ᤁᤢᤛᤧᤘᤠᤖᤥᤔᤠᤜᤠ᤹ ᤀᤢᤔᤣᤜᤠ᤹ᤀᤥ ᤔᤧᤗᤠᤛᤧᤀᤠᤱ ᤂᤧᤴ ᤀᤒᤪᤠᤜᤠᤶᤔᤡᤸᤗᤧ ᤁᤧᤛᤧᤘᤠᤖᤥᤒᤧᤴᤏᤢ ᤔᤧᤎᤠᤛᤡᤱ ᤔᤧᤒᤣ॥ ᤀᤰᤂᤣᤗ᤹ᤖᤡᤰ ᤖᤡᤒᤣᤁᤠᤴ ᤕᤠᤱᤛᤡᤱᤅᤠᤱ ᤂᤧᤴ ᤔᤏᤠᤴ ᤌᤠᤛᤡᤱ ᤐᤣ॥ 62 ᤀᤠᤸᤗ ᤀᤡᤛᤜᤠᤰᤁᤧᤴ ᤒᤣᤀᤖ ᤗᤜᤤ ᤖᤥᤀᤡᤗᤠᤶ ᤑᤧᤖᤧ. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤂᤢᤏᤧ᤹ ᤁᤏᤠᤏᤒᤠ ᤏᤣᤃᤣᤒ ᤔᤧᤵᤔᤏᤠᤒᤠᤍᤧᤴᤏᤥ ᤕᤢᤅᤧ॥ 63 ᤂᤢᤏᤧ᤹ ᤌᤡᤰᤕᤠᤴ ᤕᤢ᤺ᤴᤇᤡᤰ ᤐᤣᤗᤡᤃᤧᤴ ᤋᤢᤘᤠ ᤆᤥ᤺ᤰᤛᤧ ᤐᤩᤠᤱᤛᤡᤀᤥ ᤗ᤺ᤴᤍᤧ. ᤜᤧᤰᤁᤩᤠᤱ ᤌᤥ ᤀᤥᤔᤕᤧᤸᤗᤧ ᤀᤢᤔᤣᤜᤠ᤹ ᤔᤧᤓᤧᤖᤧᤖ ᤔᤧᤒᤳᤇᤧᤒᤠ ᤏᤡᤛᤢᤛᤡ॥ 64 ᤜᤧᤰᤁᤩᤠᤱ ᤖᤡᤒᤣᤁᤠᤴᤏᤠᤱ ᤀᤥᤔᤕᤧᤸᤗᤧ ᤀᤡᤛᤜᤠᤰᤁᤧᤴ ᤏᤡᤛᤢ. ᤜᤧᤰᤁᤩᤠᤱ ᤀᤢᤔᤣᤀᤥᤗᤠᤶ ᤕᤥ ᤗ᤺ᤴᤍᤧ॥ 65 ᤂᤧᤒᤩᤠᤱ ᤂᤧᤴ ᤛᤧᤘᤠᤖᤥᤒᤠᤴ ᤛᤣ᤺ᤴᤗᤠᤵᤋᤢ. “ᤀᤠᤏᤡ᤹ ᤋᤢᤶᤛᤧ ᤐᤩᤠᤱᤛᤡᤀᤥᤗᤠᤶ ᤁᤧᤓᤧᤶᤒᤠᤖ ᤁᤧᤒᤵᤐᤠ ᤕᤠᤵᤔᤡᤴ ᤜᤠ᤺ᤵᤐᤣ᥅” ᤂᤧᤴ ᤛᤧᤘᤠᤖᤥᤒᤠᤸᤗᤧ ᤔᤧᤳᤋᤢ. “ᤂᤢᤏᤧ᤹ᤃ ᤀᤠᤱᤃᤠ᤹ ᤀᤠᤴᤍᤠᤱᤒᤠᤖᤥ॥” ᤜᤧᤰᤁᤣ᤺ᤸᤗᤧ ᤖᤡᤒᤣᤁᤠ᤺ᤸᤗᤧ ᤁᤢᤒ᤺ᤳᤌᤠᤱᤅᤡᤴ ᤂᤢ᤺ᤰᤛᤡᤱᤅᤠᤱ ᤁᤢᤏᤠᤖᤠᤴ ᤋᤧᤵᤋᤢ॥ 66 ᤜᤧᤰᤁᤩᤠᤱ ᤛᤣᤘᤠᤖᤠᤒᤠᤸᤗᤧ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤡᤛᤜᤠᤰᤁᤧᤴ ᤆᤧᤰᤋᤢ॥ 67 ᤀᤡᤛᤜᤠᤰᤁᤧᤸᤗᤧ ᤖᤡᤒᤣᤁᤠᤴ ᤀᤠᤒᤠᤅᤣ ᤁᤢᤶᤔᤠ ᤛᤠᤖᤠ᤺ᤸᤗᤧ ᤁᤢᤛᤠ᤺ᤱᤃᤠ ᤜᤡᤶᤔᤥ ᤋᤣ᤹ᤖᤢᤀᤠᤱ ᤔᤣ᤺ᤰᤂᤡᤶ ᤔᤧᤳᤋᤢ॥ ᤂᤧᤒᤩᤠᤱ ᤂᤧᤴ ᤂᤢᤏᤧ᤹ ᤁᤢᤔᤣᤳ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤀᤡᤛᤜᤠᤰᤁᤡᤸᤗᤧ ᤖᤡᤒᤣᤁᤠᤴ ᤏᤠᤏᤢ᤹ᤖᤢ॥ ᤀᤰᤂᤣᤗ᤹ᤖᤡᤰ ᤀᤡᤛᤜᤠᤰᤁᤡᤸᤗᤧ ᤀᤠᤒᤠᤅᤣ ᤁᤢᤶᤔᤠ ᤔᤠᤛᤡᤱᤒᤠ ᤀᤣᤃᤠᤱ ᤂᤢᤏᤧ᤹ ᤀᤠ᤺ᤴᤇᤡᤱᤔᤠ ᤂᤥᤛᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.