ᤋᤥᤗᤡᤱᤛᤥᤔᤢ 23 - LIFOTNT

ᤛᤠᤖᤠᤴ ᤔᤠᤛᤡᤱ᤹

¹ ᤛᤠᤖᤠᤴ ᤁᤡᤵ ᤌᤡᤰᤁᤠᤱ ᤏᤡᤒᤥᤱ ᤏᤢᤛᤡ ᤋᤱᤒᤣ ᤌᤠᤖᤡᤰ ᤜᤡᤅᤧ॥

² ᤛᤠᤖᤠᤴ ᤁᤏᤠᤏ ᤗᤠᤈᤣ᤹ᤒᤠ ᤁᤡᤷᤕᤋ-ᤀᤷᤒᤠᤀᤥ ᤛᤩᤧ (ᤂᤧᤴ ᤋᤧᤴᤏᤡᤴ ᤜᤧᤒᤪᤥ᤺ᤴᤏᤠᤱ ᤔᤧᤔᤧᤳᤋᤢ᤹)॥ ᤜᤧᤰᤁᤩᤠᤱ ᤀᤒᤪᤠᤜᤠᤶᤔᤧᤸᤗᤧ ᤛᤠᤖᤠᤴ ᤔᤧᤖᤡᤱ ᤌᤰᤋᤢ ᤜᤧᤰᤁᤩᤠᤱ ᤜᤠ᤺ᤵᤋᤢ॥

³ ᤂᤧᤒᤩᤠᤱ ᤀᤒᤪᤠᤜᤠᤶᤔᤧᤴ ᤁᤧᤛᤡᤔᤠ ᤔᤧᤸᤗᤡᤱᤃᤧᤴ ᤁᤢᤔᤣ᤺ᤳᤋᤡᤸᤗᤧ ᤁᤢᤒᤣᤛᤠᤱᤗᤠᤶ ᤐᤥᤃᤧᤀᤠᤱ ᤕᤧᤶᤛᤡᤱ. ᤜᤧᤰᤁᤩᤠᤱ ᤜᤡᤳᤋᤡᤜᤠ᤹ ᤔᤧᤳᤋᤢᤛᤡ.

⁴ “ᤂᤡᤏᤡ᤹ ᤗᤢᤶᤔᤥ ᤀᤠᤱᤃᤠ᤹ ᤗᤳᤇᤠ ᤘᤧᤵᤔᤡᤒᤠᤀᤠ ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ᤀᤥᤒᤠᤀᤠ॥ ᤁᤧᤛᤡᤔᤠ ᤔᤧᤸᤗᤡᤱᤃᤧᤴ ᤀᤠᤔᤣ᤺ᤳᤋᤡᤸᤗᤧ ᤁᤢᤈᤣᤴ ᤗᤢᤵᤔᤠᤖᤧ ᤗᤠᤃᤡ ᤁ᤹ᤕᤥ ᤗᤠᤈᤣ᤹ᤎᤡᤰ ᤀᤡᤱᤔᤠ ᤀᤠᤱᤃᤠ᤹ ᤕᤠᤵᤔᤡ ᤀᤠᤒᤡᤖᤧ᤹. ᤜᤧᤰᤁᤣᤗ᤹ᤖᤡᤰ ᤁᤧᤛᤡᤔᤠ ᤀᤠᤜᤡᤶᤛᤠᤔᤧᤴ ᤀᤠᤱᤃᤠ᤹ ᤂᤧᤵᤔᤥ ᤏᤢᤖᤡᤰᤁᤠᤱ ᤗᤢᤵᤔᤠ ᤛᤢᤰᤋᤢᤱᤗ॥”

⁵ ᤜᤡᤳᤋᤡᤜᤠ᤹ᤖᤧ ᤀᤒᤪᤠᤜᤠᤶᤔᤡᤴ ᤏᤥᤃᤵ ᤔᤧᤒᤡᤖᤢ.

⁶ “ᤀᤠᤍᤠᤱᤒᤣ. ᤀᤠᤄᤧᤵᤛᤧ᤹ᤀᤥ॥ ᤂᤧᤏᤧ᤹ᤃ ᤀᤠᤏᤡᤃᤣ ᤗᤢᤶᤔᤥ ᤔᤢᤰᤁᤧᤃᤢᤒᤠ ᤜᤠᤱᤛᤠᤏᤧᤖᤥ. ᤀᤠᤏᤡᤃᤣ ᤀᤡ᤺ᤵᤐᤢᤱᤜᤠ᤹ᤀᤥ ᤁᤧᤛᤣ᤺ᤰᤛᤣ᤺ᤰᤐᤠ ᤛᤣᤃᤧ᤹ᤀᤠᤱ ᤁᤧᤛᤡᤔᤠ ᤔᤧᤸᤗᤡᤱᤃᤧᤴ ᤁᤧᤔᤣ᤺ᤳᤋᤡᤴ ᤂᤧᤵᤔᤥ ᤗᤢᤵᤋᤧ᤹ᤀᤥ॥ ᤀᤠᤏᤡᤃᤣ ᤀᤠᤳᤋᤡᤸᤗᤧᤀᤠᤱ ᤂᤢᤴᤇᤡ᤹ ᤀᤡᤐᤢᤱᤅᤥ ᤂᤧᤏᤧ᤹ ᤁᤧᤔᤣ᤺ᤳᤋᤡᤸᤗᤧ ᤁᤢᤛᤡᤘᤧᤳ ᤁᤢᤎᤰᤁᤡᤴ ᤔᤧᤸᤗᤢᤵᤐᤧ᤹ ᤔᤧᤔᤧᤳᤋᤠᤛᤡᤃᤧᤸᤗᤥ॥”

⁷ ᤂᤧᤒᤩᤠᤱ ᤀᤒᤪᤠᤜᤠᤶᤔᤧᤴ ᤐᤥᤃᤧᤀᤠᤱ ᤂᤧᤱ ᤗᤠᤈᤣ᤹ᤒᤠ ᤔᤏᤠ ᤜᤡᤳᤋᤡᤜᤠ᤹ ᤛᤧᤘᤠ ᤔᤧᤳᤋᤢᤛᤡ॥

⁸ ᤂᤢᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤠᤔᤣ᤺ᤳᤋᤡᤸᤗᤧ ᤁᤢᤛᤡᤘᤧᤳ ᤁᤢᤎᤰᤁᤡᤴ ᤁᤵᤔᤥ ᤗᤢᤵᤔᤠ ᤕᤠᤵᤔᤡ ᤑᤠ᤺ᤰᤔᤠ ᤂᤡᤏᤡ᤹ ᤏᤡᤱᤘᤠ᤹ ᤘᤠ᤹ᤏᤧ ᤑᤠᤃᤪ. ᤀᤠᤱᤃᤠ᤹ ᤕᤠᤵᤔᤡ ᤀᤠᤄᤧᤵᤛᤧ᤹ᤀᤥ. ᤜᤧᤰᤁᤩᤠᤱ ᤛᤥᤜᤥᤖᤗᤧ ᤁᤢᤛ᤻ᤛᤠ ᤀᤣᤐᤪᤥ᤺ᤴᤏᤧᤴ ᤀᤠᤱᤃᤠ᤹ ᤀᤠᤗᤠᤃᤡ ᤐᤣᤗᤡ ᤀᤠᤓᤠᤰᤋᤧ ᤀᤠᤒᤡᤖᤧ᤹ᤀᤥ॥

⁹ ᤂᤢᤏᤧ᤹ ᤀᤠᤒᤠᤅᤣ ᤁᤢᤗᤠᤈᤣ᤹ ᤔᤰᤐᤣᤗᤠᤒᤠ ᤑᤢᤰᤁᤢᤴ ᤀᤠᤱᤃᤠ᤹ ᤀᤡᤱᤔᤠ ᤐᤡᤀᤠᤖ. ᤂᤧᤴ ᤁᤢᤒᤩᤠᤱᤛᤡ᤺ᤸᤗᤧ ᤁᤢᤕᤠᤀᤥ ᤏᤧ᤹᤺॥ ᤁᤧᤖᤧᤰᤗᤧ ᤂᤡᤏᤡ᤹ ᤋᤃᤠᤱ ᤂᤧᤴ ᤋᤧᤴᤏᤡᤴ ᤁᤧᤒᤢ᤹ᤒᤠ ᤁᤢᤔᤧᤴᤏᤥ ᤗᤳᤇᤠ ᤀᤡ᤺ᤵᤐᤢᤱᤗᤧ ᤗᤠᤃᤡ ᤀᤠᤱᤃᤠ᤹ ᤐᤡᤀᤠᤖ॥”

¹⁰ ᤂᤧᤴ ᤕᤧᤶᤔᤥ ᤀᤣᤐᤪᤥ᤺ᤴᤏᤧᤴ ᤜᤡᤳᤋᤡᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥᤀᤣ ᤕᤢᤅᤧᤃᤖᤧ॥ ᤜᤧᤰᤁᤩᤠᤱ ᤁᤢᤕᤧᤰᤕᤰᤁᤡᤸᤗᤧ ᤗᤠᤶᤎᤣ᤺ᤵᤐᤥ ᤋᤃᤠᤱ ᤁᤧᤈᤢᤶᤒᤠ ᤁᤧᤖᤧᤰ ᤜᤡᤳᤋᤡᤜᤠ᤹ᤖᤧ ᤔᤧᤄᤧᤵᤛᤢᤖ ᤀᤣᤐᤪᤥ᤺ᤴᤏᤧᤸᤗᤧ ᤀᤒᤪᤠᤜᤠᤶᤔᤧᤴ ᤏᤥᤃᤵ ᤐᤡᤖᤢ.

¹¹ “ᤔᤣ᤺ᤴᤗᤥ ᤀᤠᤍᤠᤱᤒᤣ. ᤀᤠᤒᤠ᤺ᤴᤏᤡᤴ ᤂᤧᤵᤛᤧ᤹ᤀᤥ॥ ᤀᤠᤱᤃᤠ᤹ ᤂᤧᤴ ᤐᤩᤠᤱᤛᤡᤴ ᤏᤢ ᤂᤧᤵᤔᤥ ᤁᤧᤏᤧᤒᤠ ᤑᤢᤰᤁᤢᤴᤏᤠᤱ ᤐᤡᤏᤧ॥ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤠᤱᤅᤣ ᤀᤠᤱᤃᤠ᤹ ᤂᤧᤴ ᤐᤡᤏᤧ॥ ᤂᤧᤏᤧ᤹ ᤂᤧᤵᤔᤥᤀᤣ ᤁᤧᤛᤡᤔᤠ ᤁᤧᤜᤡᤶᤛᤠᤔᤧᤴ ᤗᤢᤵᤋᤧ᤹ᤀᤥ॥”

¹² ᤂᤧᤒᤩᤠᤱ ᤀᤒᤪᤠᤜᤠᤶᤔᤡᤸᤗᤧ ᤕᤠᤶᤔᤥ ᤂᤧᤴ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ ᤀ᤺ᤰᤂᤢᤶ ᤑᤴᤇᤡᤱᤅᤠᤱ ᤛᤧᤘᤠ ᤔᤧᤳᤋᤢᤛᤡ॥

¹³ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖ ᤂᤢᤏᤧ᤹ ᤀᤣᤐᤪᤥ᤺ᤴᤏᤧᤴ ᤔᤧᤳᤋᤢ. “ᤂᤧᤵᤛᤧ᤹. ᤀᤠᤱᤃᤠ᤹ ᤂᤧᤴ ᤐᤩᤠᤱᤛᤡ᤺ᤸᤗᤧ ᤁᤧᤒᤢ᤹ᤒᤠ ᤁᤢᤔᤧᤴ ᤐᤡᤏᤧᤖᤥ॥ ᤂᤧᤴ ᤂᤧᤏᤧ᤹ ᤋᤠ᤺ᤰᤋᤧ᤹ᤀᤥ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤛᤡᤔᤠ ᤀᤠᤜᤡᤶᤛᤠᤔᤧᤴ ᤗᤢᤵᤔᤠ ᤂᤥᤛᤢᤱᤗᤖᤥ॥”

¹⁴ ᤀᤣᤐᤪᤥᤏᤧᤸᤗᤧ ᤀᤒᤪᤠᤜᤠᤶᤔᤧᤴ ᤔᤧᤳᤋᤢ.

¹⁵ “ᤀᤠᤍᤠᤱᤒᤣ. ᤀᤠᤒᤠ᤺ᤴᤏᤡᤴ ᤂᤧᤵᤛᤧ᤹ᤀᤥ॥ ᤐᤩᤠᤱᤛᤡ᤺ᤸᤗᤧ ᤁᤢᤔᤧᤴᤏᤧᤱᤃ ᤁᤡᤵ ᤗᤡᤛᤡ ᤕᤢᤵᤐᤠᤕᤠᤱᤗᤥ. ᤁᤖ ᤀᤠᤴᤇᤡ᤹ ᤗᤢᤶᤔᤥ ᤂᤧᤴ ᤕᤠᤱᤅᤡᤴ ᤌᤣᤛᤡᤰᤁᤠᤱᤏᤡᤒᤣ᥅ ᤁᤧᤛᤡᤔᤠᤸᤗᤧ ᤁᤢᤎᤰᤁᤡᤴ ᤂᤧ᤹ᤕᤥ ᤗᤢᤵᤋᤧ᤹ᤀᤥ॥”

¹⁶ ᤀᤣᤐᤪᤥᤏᤧᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤥ ᤜᤡᤳᤋᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤒᤪᤠᤜᤠᤶᤔᤧᤴ ᤋᤧᤴᤍᤧᤀᤠᤱ ᤂᤧᤴ ᤕᤧᤶᤔᤥ ᤛᤠᤔᤠᤐᤢᤔᤠ ᤁᤧᤀᤡᤱᤒᤠ ᤁᤧᤛᤱᤒᤠ ᤗᤧᤱᤜᤱᤒᤠᤜᤠ᤹ᤖᤧ ᤔᤧᤕᤠᤅᤢᤒᤠ ᤀᤡᤛᤡ᤺ᤰ ᤐᤠᤛᤠᤱᤃᤠᤀᤥ ᤁᤡᤵ ᤗᤡᤛᤡ ᤕᤢᤵᤐᤠᤕᤠᤱ ᤌᤠᤱᤛᤢᤀᤠᤱ ᤂᤢᤏᤧ᤹ ᤐᤡᤖᤢ॥

¹⁷ ᤀᤰᤂᤣᤗ᤹ᤖᤡᤰ ᤔᤰᤐᤣᤗᤠᤀᤥ ᤁᤧᤏᤧᤒᤠ ᤔᤔᤪᤣ ᤁᤢᤒᤣᤛᤠᤱᤒᤠ ᤀᤣᤐᤪᤥᤏᤧᤸᤗᤧ ᤁᤢᤒᤩᤠᤱᤛᤡᤴ ᤏᤢ ᤂᤧᤵᤔᤥ ᤁᤧᤏᤧᤒᤠ ᤑᤢᤰᤁᤢᤴ ᤜᤧᤰᤁᤩᤠᤱ ᤛᤡᤱᤒᤢᤱᤜᤠ᤹ᤀᤠᤱ ᤜᤠ᤹ᤕᤠᤰ

¹⁸ ᤕᤧᤰᤕᤰᤁᤥᤒᤠ ᤗᤠᤶᤎᤣ᤺ᤵᤐᤥ ᤁᤧᤈᤢᤶᤒᤠ ᤁᤧᤖᤧᤰ ᤜᤡᤳᤋᤡᤜᤠ᤹ᤖᤧ ᤂᤢᤴᤇᤡ᤹ ᤋᤃᤠᤱ ᤀᤣᤐᤪᤥᤏᤧᤸᤗᤧ ᤀᤒᤪᤠᤜᤠᤶᤔᤡᤴ ᤁᤢᤕᤢᤰᤁᤥ ᤐᤡᤖᤢ॥

¹⁹ ᤂᤧᤴ ᤀᤣᤃᤠᤱ ᤀᤒᤪᤠᤜᤠᤶᤔᤡᤸᤗᤧ ᤁᤢᤔᤣᤳ ᤛᤠᤖᤠᤴ ᤁᤏᤠᤏ ᤗᤠᤈᤣ᤹ᤀᤥ ᤁᤧᤏᤧᤒᤠ ᤔᤔᤪᤣ (ᤜᤣᤒᤪᤥᤏ) ᤁᤢᤒᤣᤛᤠᤱᤒᤠ ᤔᤰᤐᤣᤗᤠ ᤐᤩᤠᤱᤛᤡᤀᤥᤒᤠ ᤑᤢᤰᤁᤢᤀᤥ ᤗᤢᤵᤋᤢ॥

²⁰ ᤀᤰᤂᤣᤗ᤹ᤖᤡᤰ ᤂᤧᤴ ᤐᤩᤠᤱᤛᤡᤴ ᤏᤢ ᤂᤧᤵᤔᤥᤒᤠ ᤑᤢᤰᤁᤢᤴ ᤜᤡᤳᤋᤡᤜᤠ᤹ᤖᤥᤗᤠᤶ ᤀᤡ᤺ᤵᤐᤢᤱᤍᤧᤴᤗᤧ ᤗᤠᤃᤡ ᤀᤒᤪᤠᤜᤠᤶᤔᤡᤸᤗᤧ ᤁᤢᤗᤠᤈᤣ᤹ ᤛᤡᤱᤒᤢᤱ ᤐᤥ᤺ᤰᤂᤧᤖ ᤔᤧᤈᤥᤃᤢᤖᤥ॥