ᤋᤥᤗᤡᤱᤛᤥᤔᤢ 21 - LIFOTNTᤛᤠᤖᤠ᤺ᤸᤗᤧ ᤀᤡᤛᤜᤠᤰᤁᤧᤴ ᤁᤳᤋᤢ 1 ᤀᤠᤸᤗ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢᤒᤠ ᤀᤡᤛᤡ᤺ᤰ ᤂᤢᤏᤧ᤹ ᤛᤠᤖᤠᤴ ᤔᤢ᤹ᤀᤡᤛᤠᤶ ᤐᤡᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤁᤧᤳᤋᤢ॥ 2 ᤛᤠᤖᤠᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤳᤋᤢᤀᤠᤱ ᤘᤕᤧᤒᤠ ᤕᤧᤶᤔᤥ ᤂᤢᤏᤧ᤹ ᤀᤒᤪᤠᤜᤠᤶᤔᤧᤴ ᤁᤠᤵᤐᤥᤒᤠ ᤋᤢᤶᤛᤧᤸᤗᤧ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢᤒᤡᤖᤢ॥ 3 ᤛᤠᤖᤠ᤺ᤸᤗᤧ ᤁᤳᤋᤢᤒᤡᤖᤢᤒᤠ ᤂᤢᤏᤧ᤹ ᤁᤢᤛ᤻ᤛᤠᤴ ᤀᤒᤪᤠᤜᤠᤶᤔᤡᤸᤗᤧ ᤀᤡᤛᤜᤠᤁ ᤔᤡᤱ ᤘᤠ᤺ᤳᤋᤢ॥ 4 ᤀᤒᤪᤠᤜᤠᤶᤔᤡᤸᤗᤧ ᤂᤢᤏᤧ᤹ ᤁᤢᤛ᤻ᤛᤠ ᤀᤡᤛᤜᤠᤰᤁᤧᤴ ᤕᤧᤳᤇᤡ ᤕᤧᤴ ᤕᤥᤖᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤈᤠᤱ ᤐᤡᤖᤢᤒᤠ ᤀᤡᤛᤡ᤺ᤰ ᤂᤧᤴ ᤜᤷᤍᤥ ᤜᤧᤃᤢᤒᤡᤖᤢ॥ 5 ᤀᤒᤪᤠᤜᤠᤶᤔᤡᤸᤗᤧ ᤁᤢᤛ᤻ᤛᤠ ᤀᤡᤛᤜᤠᤰᤁᤧᤴ ᤘᤕᤧᤸᤗᤧ ᤂᤢᤏᤧ᤹ ᤁᤡᤵ ᤌᤡᤰ ᤋᤱᤒᤣ ᤁᤧᤖᤧᤀᤠᤱ ᤘᤕᤧ॥ 6 ᤛᤠᤖᤠ᤺ᤸᤗᤧ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤀᤠᤱᤃᤠ᤹ ᤗᤳᤇᤠ ᤀᤣ᤺ᤵᤔᤠ ᤁᤧᤕᤢᤒᤠ ᤐᤠ᤺ᤴᤎᤡᤰ ᤐᤡᤖᤠᤱᤗᤥ॥ ᤁᤴ ᤐᤠ᤺ᤴᤏᤡᤴ ᤁᤧᤄᤧᤶᤒᤠ ᤁᤧᤖᤧᤰ ᤀᤠᤱᤃᤠ᤹ᤏᤢ ᤔᤧᤀᤣ᤺ᤳᤗᤥ॥” 7 ᤂᤢᤏᤧ᤹ ᤕᤠᤶᤔᤥ ᤐᤠ᤺ᤳᤋᤢ. “ᤛᤠᤖᤠ᤺ᤸᤗᤧ ᤀᤅᤧ᤺ᤰᤘᤠᤴ ᤏᤢᤎᤢᤰᤋᤢ ᤁᤧᤗ᤹ᤒᤠ ᤜᤠ᤺ᤳᤗᤧ ᤀᤒᤪᤠᤜᤠᤶᤔᤧᤴ ᤀᤠᤓᤧᤸᤗᤧ ᤔᤧᤳᤋᤢᤀᤠᤱ ᤘᤕᤧᤃ᥅ ᤜᤧᤰᤁᤣᤛᤠᤱ ᤂᤢᤏᤧ᤹ ᤁᤢᤃᤠᤵᤐᤥ ᤋᤢᤶᤔᤥ ᤀᤠᤱᤃᤠ᤹ ᤂᤢᤏᤧ᤹ ᤗᤳᤇᤠ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢᤱ ᤐᤡᤖᤢᤱᤅᤠᤱ ᤘᤠ᤹॥” 8 ᤀᤅᤧ᤺ᤰᤘᤠᤴ ᤐᤥᤖᤧᤖ ᤐᤣᤃᤧ. ᤜᤧᤰᤁᤩᤠᤱ ᤂᤧᤸᤗᤧ ᤏᤢ ᤌᤢᤱᤔᤠ ᤗᤧᤖᤢ॥ ᤜᤧᤰᤁᤩᤠᤱ ᤀᤡᤛᤜᤠᤰᤗᤧ ᤏᤢᤎᤢᤱᤔᤠ ᤗᤧᤖᤢᤒᤠ ᤕᤧᤴᤏᤥ ᤀᤒᤪᤠᤜᤠᤶᤔᤡᤸᤗᤧ ᤗᤳᤇᤠ ᤕᤶᤒᤠ ᤛᤠᤓ᤺ᤱᤈᤠ ᤛᤧᤛᤢ॥ ᤜᤠᤃᤠᤖᤧᤴᤏᤢ ᤀᤡᤛ᤻ᤔᤠᤀᤣᤸᤗᤧᤴ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡ 9 ᤁᤖ ᤔᤡᤛᤪᤡ ᤜᤠᤃᤠᤖᤧᤸᤗᤧ ᤀᤒᤪᤠᤜᤠᤶᤔᤧᤴ ᤛᤠ ᤁᤳᤋᤢ ᤐᤡᤖᤢᤒᤠ ᤀᤡᤛ᤻ᤔᤠᤀᤣᤗᤖᤧ ᤀᤡᤛᤜᤠᤰᤁᤧᤴ ᤁᤧ᤹ᤖᤢᤒᤠ ᤛᤠᤖᤠ᤺ᤸᤗᤧ ᤏᤡᤛᤢ॥ 10 ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤀᤒᤪᤠᤜᤠᤶᤔᤧᤴ ᤔᤧᤳᤋᤢ. “ᤁᤱ ᤕᤥ᤺ᤃ᤻ᤔᤠᤴ ᤁᤢᤛ᤻ᤛᤠ᤺ᤴᤏᤢ ᤛᤥᤖᤡᤰ ᤗ᤺ᤳᤋᤧᤍᤣᤛᤧᤛᤧ᤹. ᤌᤣᤀᤠᤱᤓᤧᤸᤗᤧ ᤁᤱ ᤕᤥ᤺ᤃ᤻ᤔᤠᤸᤗᤧ ᤁᤢᤛ᤻ᤛᤠᤴ ᤀᤠᤱᤃᤠ᤹ ᤀᤠᤛ᤻ᤛᤠ ᤀᤡᤛᤜᤠᤰᤁᤧᤴᤏᤢ ᤗᤰᤁᤧᤄᤥᤒᤠ ᤐᤥᤱᤔᤠ ᤔᤧᤄᤥᤛᤢᤴ॥” 11 ᤁᤴ ᤐᤠ᤺ᤴᤏᤡᤸᤗᤧ ᤀᤒᤪᤠᤜᤠᤶᤔᤧᤴ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤃᤧ. ᤌᤣᤀᤠᤱᤓᤧᤸᤗᤧ ᤀᤡᤛ᤻ᤔᤠᤀᤣᤸᤗᤧᤴᤏᤠᤱ ᤂᤢᤏᤧ᤹ᤀᤣ ᤁᤢᤛ᤻ᤛᤠ ᤘᤕᤧ॥ 12 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤜᤠᤶᤔᤧᤴ ᤔᤧᤳᤋᤢ. “ᤂᤧᤴ ᤀᤅᤧ᤺ᤰᤘᤠᤴ ᤏᤢ ᤁᤧᤛᤧᤘᤠᤖᤥᤔᤠᤸᤗᤧ ᤁᤢᤗᤠᤃᤡ ᤂᤧᤏᤧ᤹ ᤁᤧᤏᤡᤱᤘᤠ᤹ ᤔᤧᤴᤍᤢᤰᤁᤣ᤹॥ ᤛᤠᤖᤠ᤺ᤸᤗᤧ ᤁᤧᤔᤧᤵᤐᤠ ᤜᤧᤰᤁᤣᤀᤣ ᤆᤥᤃᤧ᤹. ᤌᤣᤀᤠᤱᤓᤧᤸᤗᤧ ᤀᤡᤛᤜᤠᤁᤗᤠᤶᤒᤠᤀᤣ ᤀᤠᤱᤃᤠ᤹ ᤔᤠᤱᤜᤢᤵ ᤆᤥᤃᤢᤱᤒᤠ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤔᤧᤒᤥᤱᤗᤥ॥ 13 ᤂᤧᤴ ᤛᤣᤘᤠᤖᤥᤔᤠᤸᤗᤧ ᤁᤢᤛ᤻ᤛᤠᤗᤠᤶᤔᤠᤱ ᤀᤠᤱᤃᤠ᤹ ᤗᤳᤇᤠ ᤔᤧᤴᤇᤠᤶ ᤛᤢᤘᤠᤱ ᤆᤥᤃᤢᤱᤛᤡᤱ᤹. ᤌᤣᤀᤠᤱᤓᤧᤸᤗᤧ ᤂᤧᤴᤏᤠᤱ ᤂᤧᤏᤧ᤹ᤀᤣ ᤁᤧᤛ᤻ᤛᤠᤖᤥ॥” 14 ᤜᤧᤰᤁᤣ᤺ᤸᤗᤧ ᤀᤒᤪᤠᤜᤠᤶᤔᤡᤴ ᤁᤢᤍᤠ᤺ᤴᤍᤡᤰ ᤂᤠᤀᤥ᤺ᤳᤋᤧᤏᤢᤔᤧ᤺ᤴᤏᤣ ᤋᤠᤏᤠᤶᤛᤠ ᤐᤥᤃᤧ. ᤜᤧᤰᤁᤩᤠᤱ ᤂᤖᤧ᤺ᤱ ᤏᤢ ᤛᤣᤜᤥ᤹ᤒᤠ ᤛᤢᤰᤘᤠᤀᤥ ᤆᤫᤠ᤺ᤳᤋᤧᤴ ᤁᤣ᤺ᤳᤋᤢᤀᤠᤱ ᤜᤠᤃᤠᤖᤧᤸᤗᤧ ᤁᤢᤓᤰᤋᤠᤱᤅᤥ ᤕᤢᤰᤂᤢᤒᤡᤖᤢ. ᤀᤅᤧ᤺ᤰᤘᤠ᤺ᤴᤏᤠᤱ ᤁᤢᤀᤣ᤺ᤰᤁᤥ ᤁᤢ᤺ᤳᤋᤢᤀᤠᤱ ᤐᤠᤱᤄᤢᤍᤣᤛᤢ॥ ᤜᤧᤰᤁᤩᤠᤱ ᤜᤠᤃᤠᤖᤧᤴ ᤒᤣᤷᤛᤣᤒᤠᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤀᤣ᤺ᤰᤛᤠᤍᤧᤴ ᤜᤧᤱᤃᤠᤳᤋᤡ ᤋᤠᤰᤁᤶᤔᤠ ᤜᤣ᤺ᤰᤋᤧ॥ 15 ᤛᤣᤜᤥ᤹ᤒᤠ ᤛᤢᤰᤘᤠᤀᤥ ᤆᤫᤠ᤺ᤳᤋᤡᤴ ᤔᤠᤖᤧᤸᤗᤧ ᤂᤢᤏᤧ᤹ ᤀᤅᤧ᤺ᤰᤘᤠᤴ ᤋᤧᤰᤛᤧᤰᤛᤧ᤺ᤰᤐᤠ ᤛᤡᤱᤒᤢᤱᤎᤡᤰᤗᤧ ᤁᤢᤒᤢᤱᤅᤥ ᤏᤧᤛ᤻ᤛᤢ॥ 16 ᤂᤧᤒᤩᤠᤱ ᤂᤢᤏᤧ᤹ ᤆᤤᤲ ᤋᤥ᤺ᤱᤎᤡᤰ ᤀᤠᤵᤔᤧᤸᤗᤧ ᤁᤧᤃᤧᤵᤐᤠ ᤌᤠᤖᤡᤰ ᤏᤠᤏᤠᤰ ᤐᤣᤀᤠᤱ ᤕᤢᤱᤛᤡᤱ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤴ ᤀᤅᤧ᤺ᤰᤘᤠ᤺ᤸᤗᤧ ᤁᤢᤛᤰᤔᤠ ᤐᤣ᤺ᤰᤐᤠ ᤀᤥᤔᤧᤵᤔᤠ ᤔᤧᤒᤥᤱᤏᤧᤸᤗ ᤑᤠ᤹ᤀᤠᤱ ᤀᤡ᤺ᤳᤋᤢ॥ ᤜᤧᤰᤁᤩᤠᤱ ᤂᤧᤵᤔᤥ ᤕᤢᤱᤛᤡᤱᤅᤠᤱ ᤀᤢ᤺ᤰᤁᤠᤱ ᤀᤢ᤺ᤰ ᤜᤠ᤺ᤵᤔᤠ ᤜᤣ᤺ᤰᤋᤧ॥ 17 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤅᤧ᤺ᤰᤘᤠᤴ ᤜᤠᤒᤧᤒᤠ ᤀᤡᤰᤗᤠᤴ ᤂᤧᤵᤛᤢ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤸᤗᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶᤒᤠ ᤜᤠᤃᤠᤖᤧᤴ ᤔᤧᤳᤋᤢ. “ᤜᤠᤃᤠᤖᤣ. ᤂᤧᤏᤧ᤹ ᤌᤧᤔᤠ ᤋᤢᤰᤂᤣᤴ ᤁᤧᤍᤢᤔᤢᤒᤣ᥅ ᤔᤧᤱᤃᤡᤀᤧ᤹. ᤌᤣᤀᤠᤱᤓᤧᤸᤗᤧ ᤀᤅᤧ᤺ᤰᤘᤠᤴ ᤏᤧᤒᤠ ᤋᤧᤴᤏᤥᤗᤠᤶ ᤂᤧᤴ ᤜᤠ᤺ᤵᤐᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤵᤛᤢᤀᤠᤱ ᤘᤠ᤹ᤖᤥ॥ 18 ᤐᤥᤃᤧ᤹. ᤐᤣᤃᤧ᤹ᤀᤠᤱ ᤀᤅᤧ᤺ᤰᤘᤠᤴ ᤐᤰᤂᤧ ᤜᤧᤰᤁᤩᤠᤱ ᤁᤢᤜᤢᤰᤁᤥ ᤋᤧᤶᤛᤧ ᤑᤳᤇᤧ᤹॥ ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤎᤠ᤺ᤰᤜᤠ᤹ᤗᤠᤶᤒᤠ ᤀᤠᤱᤃᤠ᤹ ᤗᤳᤇᤠ ᤕᤶᤒᤠ ᤔᤧᤴᤇᤠᤶ ᤛᤢᤘᤠᤱ ᤆᤥᤃᤢᤱᤛᤡᤱ॥” 19 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤃᤠᤖᤧᤸᤗᤧ ᤁᤢᤔᤡᤰᤁᤡᤴ ᤜᤴᤍᤢ ᤐᤡᤖᤢ. ᤜᤧᤰᤁᤩᤠᤱ ᤂᤧᤸᤗᤧ ᤘᤠᤒᤠᤰ ᤌᤡᤰ ᤏᤡᤛᤢ॥ ᤂᤧᤒᤩᤠᤱ ᤂᤧᤴ ᤐᤣᤀᤠᤱ ᤛᤣᤜᤥ᤹ᤒᤠ ᤛᤢᤰᤘᤠᤀᤥ ᤆᤫᤠ᤺ᤳᤋᤧᤴ ᤑᤠ᤺ᤳᤋᤢ ᤑᤧᤳᤋᤢᤀᤠᤱ ᤀᤅᤧ᤺ᤰᤘᤠᤴ ᤌᤢᤱᤛᤢ॥ 20 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤅᤧ᤺ᤰᤘᤠ᤺ᤴᤏᤢ ᤘᤕᤧ. ᤜᤧᤰᤁᤩᤠᤱ ᤂᤧᤴ ᤕᤶᤒᤠ ᤐᤥ᤺ᤰᤂᤧ॥ ᤜᤧᤰᤁᤩᤠᤱ ᤀᤣ᤺ᤰᤛᤠᤍᤧᤴᤏᤥ ᤕᤢᤅᤧᤀᤠᤱ ᤁᤢᤛᤢᤖ ᤁᤧᤏᤢ᤹ᤒᤠ ᤋᤥᤱ ᤗᤡ ᤁᤧᤀᤠᤵᤐᤠ ᤔᤏᤠ ᤐᤥ᤺ᤰᤂᤧ॥ 21 ᤂᤢᤏᤧ᤹ ᤐᤠᤖᤠᤏᤒᤠ ᤀᤣ᤺ᤰᤛᤠᤍᤧᤴᤏᤥ ᤕᤢᤅᤧᤸᤗᤧ ᤁᤢᤶᤔᤠᤖᤧ ᤗᤳᤇᤠ ᤔᤡᤛᤪ ᤗᤠᤈᤣ᤹ᤒᤠ ᤔᤧᤴᤇᤢᤔᤠᤎᤡᤰ ᤁᤢᤗᤠᤃᤡ ᤔᤣ᤺ᤳ ᤋᤠᤖᤢᤒᤡᤖᤢ॥ ᤀᤒᤪᤠᤜᤠᤔ ᤏᤢ ᤀᤒᤡᤔᤣᤗᤣᤰᤁᤧᤸᤗᤧ ᤆᤥᤃᤧᤳᤇᤢᤒᤠ ᤔᤠᤱᤜᤧᤰ 22 ᤂᤧᤴ ᤕᤧᤶᤔᤥ ᤀᤒᤡᤔᤣᤗᤣᤰᤁᤧᤴ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ᤖᤧ ᤂᤢᤏᤡ᤹ ᤌᤰᤔᤥᤒᤠ ᤐᤡᤁᤥᤗᤖᤧ ᤀᤒᤪᤠᤜᤠᤶᤔᤧᤴ ᤔᤧᤳᤋᤧᤇᤢ. “ᤂᤧᤏᤧ᤹ ᤁᤧᤈᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ᤏᤢ ᤘᤠ᤹॥ 23 ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤧᤏᤧ᤹ ᤀᤠᤱᤃᤠ᤹ᤏᤢ ᤀᤡᤃᤪ ᤀᤠᤛ᤻ᤛᤠᤜᤠ᤹ᤏᤢ ᤀᤡᤃᤪ ᤀᤠᤶᤔᤧᤴᤇᤠ᤹ ᤀᤠᤈᤰᤔᤧᤴᤇᤠ᤹ᤜᤠ᤹ᤏᤢ ᤀᤡᤱᤗᤧᤰᤐᤠ ᤕᤠ᤺ᤶᤒᤰ ᤔᤧᤈᤥᤰᤁᤠᤴ ᤑᤠ᤹ᤀᤠᤱ ᤔᤠᤱᤒᤠᤆᤠ ᤜᤧᤰᤛᤡᤱᤅᤧ᤹॥ ᤜᤧᤰᤁᤩᤠᤱ ᤂᤧᤏᤧ᤹ ᤘᤣ᤹ ᤗᤠᤈᤣ᤹ᤗᤠᤶ ᤁᤧᤍᤩᤧᤀᤠᤱ ᤁᤧᤕᤢᤱᤒᤠ ᤁᤴ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤏᤢ. ᤀᤠᤱᤃᤠ᤹ ᤂᤧᤏᤧ᤹ ᤏᤢᤖᤡᤰ ᤔᤧᤳᤏᤧᤒᤠ ᤜᤧᤰᤁᤣᤀᤣ ᤆᤥᤃᤧ᤹ᤀᤥ॥” 24 ᤀᤒᤪᤠᤜᤠᤶᤔᤧᤸᤗᤧ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤔᤠᤱᤜᤢᤵ ᤆᤥᤃᤢᤱᤗᤥ॥” 25 ᤂᤧᤒᤩᤠᤱ ᤀᤒᤡᤔᤣᤗᤣᤰᤁᤧᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤛᤠᤰᤁᤧᤗᤧᤰᤁᤠᤱ ᤔᤧᤏᤠᤵᤋᤢ ᤔᤧᤍᤣ᤹ᤖᤢᤒᤠ ᤘᤒᤠᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤒᤪᤠᤜᤠᤶᤔᤧᤸᤗᤧ ᤀᤒᤡᤔᤣᤗᤣᤰᤁᤧᤴ ᤐᤠᤴ ᤔᤧᤳᤋᤢᤖ ᤆᤧᤰᤋᤢ॥ 26 ᤜᤧᤰᤁᤣ᤺ᤸᤗᤧ ᤀᤒᤡᤔᤣᤗᤣᤰᤁᤧᤸᤗᤧ ᤔᤧᤳᤋᤢ. “ᤜᤠ᤺ᤳᤗᤧ ᤀᤰᤂᤣ ᤆᤥᤃᤢ ᤀᤠᤱᤃᤠ᤹ ᤔᤧᤴᤏᤡᤒᤠ॥ ᤂᤧᤏᤧ᤹ ᤁᤧᤶᤔᤧᤳᤋᤠᤱᤅᤡᤴ ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤀᤠᤀᤡᤴᤗᤰ ᤂᤧᤵᤛᤢᤱ॥” 27 ᤂᤧᤸᤗᤧᤆᤥᤃᤢᤸᤗᤧ ᤀᤒᤪᤠᤜᤠᤶᤔᤧᤸᤗᤧ ᤔᤧᤸᤗᤢᤰ ᤏᤢ ᤐᤡᤳᤜᤠ᤹ ᤋᤠᤖᤢᤛᤡᤀᤠᤱ ᤀᤒᤡᤔᤣᤗᤣᤰᤁᤧᤴ ᤐᤡᤖᤢ. ᤜᤧᤰᤁᤩᤠᤱ ᤏᤧᤵᤔᤈᤠᤱᤗᤧ ᤔᤠᤱᤜᤢᤵ ᤆᤥᤃᤧᤳᤇᤢ॥ 28 ᤀᤒᤪᤠᤜᤠᤶᤔᤧᤸᤗᤧ ᤔᤧᤸᤗᤢᤰ ᤗᤢᤵᤐᤥᤗᤠᤶ ᤏᤢᤛᤡ ᤁᤢᤶᤔᤠᤔᤠ ᤔᤧᤸᤗᤢᤰᤛᤠ᤺ᤳᤜᤠ᤹ ᤛᤧᤴᤍᤢ ᤗ᤺ᤳᤋᤢᤛᤡ॥ 29 ᤜᤧᤰᤁᤩᤠᤱ ᤀᤒᤡᤔᤣᤗᤣᤰᤁᤧᤸᤗᤧ ᤀᤒᤪᤠᤜᤠᤶᤔᤧᤴ ᤛᤣ᤺ᤴᤍᤥᤛᤢ. “ᤌᤣᤀᤠᤱ ᤂᤧᤏᤧ᤹ ᤏᤢᤛᤡ ᤁᤢᤶᤔᤠᤔᤠ ᤔᤧᤗᤢᤰᤛᤠ᤺ᤳᤜᤠ᤹ ᤁᤧᤛᤧᤴᤍᤢ ᤁᤧᤗ᤺ᤳᤋᤢᤛᤡᤒᤠᤒᤣ᥅ ᤁᤸᤗᤧ ᤁᤢᤒᤣᤴ ᤌᤣᤃ᥅” 30 ᤀᤒᤪᤠᤜᤠᤶᤔᤧᤸᤗᤧ ᤔᤧᤳᤋᤢ. “ᤁᤴ ᤘᤒᤠᤰᤁᤡᤴ ᤀᤠᤱᤃᤠ᤹ᤀᤣ ᤋᤕᤢᤱᤒᤠ ᤑᤠ᤹ᤀᤠᤱ ᤂᤧᤏᤧ᤹ ᤀᤠᤱᤃᤠ᤹ ᤋᤥ᤺ᤴᤍᤡ ᤐᤡᤔᤠᤖᤧ ᤗᤠᤃᤡ ᤁᤴ ᤏᤢᤛᤡ ᤁᤢᤶᤔᤠᤔᤠ ᤔᤧᤗᤢᤰᤛᤠ᤺ᤳᤜᤠ᤹ ᤀᤠᤱᤃᤠ᤹ ᤀᤠᤜᤢᤰᤁᤥᤗᤠᤶ ᤂᤧᤏᤧ᤹ ᤋᤣ᤹ᤖᤧᤛᤧ᤹ᤀᤥ॥” 31 ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤒᤣᤷᤛᤣᤒᤠ ᤐᤥ᤺ᤰᤂᤧ. ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤂᤢᤴᤇᤡ᤹ ᤏᤧᤵᤔᤈᤠᤱ ᤔᤠᤱᤜᤧᤰᤏᤧᤇᤡᤀᤠᤱ ᤘᤕᤧᤛᤡ॥ 32 ᤀᤰᤂᤣᤗ᤹ᤖᤡᤰ ᤂᤢᤴᤇᤡ᤹ ᤒᤣᤷᤛᤣᤒᤠᤀᤥ ᤔᤠᤱᤜᤧᤰᤏᤧᤇᤡᤀᤠᤱ ᤀᤒᤡᤔᤣᤗᤣᤰᤁᤧᤴ ᤏᤢ ᤁᤢᤎᤰᤛᤢᤒᤠᤜᤠ᤹ᤖᤧ ᤂᤢᤏᤡ᤹ ᤌᤰᤐᤣᤒᤠ ᤐᤡᤁᤥᤗᤧᤴ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ᤀᤥ ᤏᤢ᤺ᤰᤂᤧᤳᤇᤡ॥ 33 ᤀᤒᤪᤠᤜᤠᤶᤔᤧᤸᤗᤧ ᤒᤣᤷᤛᤣᤒᤠᤀᤥ ᤗᤳᤇᤠ ᤋᤠᤔᤠᤖᤡᤛ᤻ᤁ ᤔᤧᤵᤔᤏᤠᤒᤠ ᤛᤡᤱᤒᤢᤱ ᤌᤡᤰ ᤗᤣ᤺ᤳᤋᤢ. ᤜᤧᤰᤁᤩᤠᤱ ᤂᤧᤵᤔᤥ ᤀᤠᤓᤧᤸᤗᤧᤏᤠ ᤀᤠᤓᤧᤸᤗᤧᤛᤠᤱ ᤁᤧᤘᤠ᤹ᤒᤠ ᤏᤢᤵᤔᤧᤴᤍᤡᤱ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤐᤣᤗᤡ ᤑᤠᤰᤋᤢ॥ 34 ᤂᤧᤴ ᤀᤣᤃᤠᤱ ᤀᤒᤪᤠᤜᤠᤶᤔᤧᤴ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤕᤖᤡᤰ ᤕᤧᤶ ᤌᤠᤖᤡᤰ ᤕᤢᤅᤧ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.