ᤋᤥᤗᤡᤱᤛᤥᤔᤢ 16 - LIFOTNT

ᤜᤠᤃᤠᤖ ᤏᤢ ᤀᤡᤛ᤻ᤔᤠᤀᤣᤗ

¹ ᤀᤒᤪᤠᤶᤔᤡᤸᤗᤧ ᤁᤢᤔᤣᤳ ᤛᤠᤖᤠᤀᤡᤗᤠᤶ ᤁᤢᤛ᤻ᤛᤠ ᤔᤧᤶᤒᤥᤱᤅᤣ ᤘᤕᤧ॥ ᤁᤖ ᤜᤠᤃᤠᤖ ᤔᤡᤱ ᤁᤧᤘᤠ᤺ᤵᤔᤠ ᤔᤡᤛᤪᤡ ᤁᤢᤛᤧᤘᤠᤖᤥᤔᤠ ᤌᤡᤰ ᤘᤕᤧ॥

² ᤛᤠᤖᤠᤀᤡᤸᤗᤧ ᤀᤒᤪᤠᤶᤔᤡᤴ ᤔᤧᤳᤋᤢ. “ᤀᤥᤔᤧᤳᤋᤧ᤹ᤀᤥ. ᤕᤜᤘᤣ ᤍᤠᤱᤒᤠᤸᤗᤧ ᤀᤠᤱᤃᤠ᤹ ᤛᤠᤔᤧᤱᤃᤵᤏᤠᤔᤠ ᤆᤥᤃᤠᤱᤅᤠᤱ ᤘᤠ᤹॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤛᤣᤘᤠᤖᤥᤔᤧᤴᤏᤢ ᤂᤧᤏᤧ᤹ ᤀᤡᤵᤛᤧ᤹. ᤜᤠᤃ ᤁᤠᤳᤋᤤ ᤂᤧᤸᤗᤥᤗᤠᤶ ᤀᤠᤱᤃᤠ᤹ ᤀᤠᤗᤠᤃᤡ ᤀᤅᤧ᤺ᤰᤘᤠ ᤘᤠ᤹ᤔᤠ ᤛᤢᤰᤐᤡ॥” ᤛᤠᤖᤠᤀᤡᤸᤗᤧ ᤁᤢᤒᤠ᤺ᤴᤏᤡᤴ ᤀᤒᤪᤠᤶᤔᤡᤸᤗᤧ ᤂᤧᤵᤛᤢ॥

³ ᤀᤒᤪᤠᤶᤔᤡᤴ ᤁᤏᤠᤏ ᤗᤠᤈᤣ᤹ᤀᤥ ᤕᤢᤅᤧᤒᤠ ᤌᤡᤒᤥᤱ ᤋᤱᤒᤣ ᤁᤧᤖᤧᤀᤠᤱ ᤀᤣᤃᤠᤱ ᤁᤢᤔᤣᤳ ᤛᤠᤖᤠᤀᤡᤸᤗᤧ ᤁᤢᤕᤧᤶᤒᤠ ᤀᤒᤪᤠᤶᤔᤡᤴ ᤔᤡᤛᤪᤒᤠ ᤁᤢᤛᤣᤘᤠᤖᤠᤔᤠ ᤜᤠᤃᤠᤖᤧᤴ ᤁᤢᤔᤣᤳ ᤐᤥᤱᤛᤧ ᤐᤡᤖᤢ॥

⁴ ᤜᤧᤰᤁᤩᤠᤱ ᤀᤒᤪᤠᤶᤔᤧᤴ ᤜᤠᤃᤠᤖᤧᤴᤏᤢ ᤀᤡᤵᤛᤧᤀᤠᤱ ᤂᤧᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧ॥ ᤀᤠᤸᤗ ᤂᤧᤸᤗᤧ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤒᤠ ᤏᤡᤱᤘᤠ᤹ ᤂᤥᤛᤢ. ᤂᤧᤒᤩᤠᤱ ᤂᤧᤸᤗᤧ ᤁᤢᤴᤍᤠᤱᤔᤧᤴ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤜᤣ᤺ᤰᤋᤢ॥

⁵ ᤛᤠᤖᤠᤀᤡᤸᤗᤧ ᤀᤒᤪᤠᤶᤔᤡᤴ ᤔᤧᤳᤋᤢ. “ᤀᤠᤱᤃᤠ᤹ ᤋᤢᤔᤢᤱᤒᤠ ᤁᤢᤏᤠᤔᤧᤴᤇᤠ᤹ ᤐᤠ᤺ᤴᤏᤡᤴ ᤂᤧᤏᤧ᤹ ᤁᤧᤈᤥᤃᤢᤸᤗᤧ ᤐᤥ᤺ᤰᤂᤧᤒᤠᤖᤥ॥ ᤀᤠᤱᤃᤠ᤹ ᤀᤠᤛᤧᤘᤠᤖᤥᤔᤠᤴ ᤂᤧᤏᤧ᤹ ᤁᤧᤓᤰᤌᤢᤱᤅᤥ ᤐᤡᤏᤧ. ᤜᤧᤰᤁᤩᤠᤱ ᤂᤧᤱ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤏᤢ ᤔᤣ᤺ᤴᤏᤣ ᤀᤠᤱᤃᤠ᤹ ᤆᤡ᤺ᤵᤔᤠ ᤜᤣ᤺ᤰᤋᤠᤱ॥ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤏᤧ᤹ ᤏᤢ ᤀᤠᤱᤃᤠ᤹ ᤂᤠᤛᤧᤴ ᤀᤠᤈᤥ᤺ᤰᤛᤡ ᤀᤠᤒᤡᤛᤡᤖ॥”

⁶ ᤁᤖ ᤀᤒᤪᤠᤶᤔᤡᤸᤗᤧ ᤛᤠᤖᤠᤀᤡᤴ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤂᤧᤏᤧ᤹ ᤁᤧᤛᤧᤘᤠᤖᤥᤔᤠᤴ ᤂᤧᤏᤧ᤹ ᤁᤧᤜᤢᤰᤁᤥᤀᤣ ᤘᤠ᤹॥ ᤂᤧᤏᤧ᤹ ᤂᤧᤴ ᤌᤣ ᤔᤧᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢ ᤜᤧᤰᤁᤣᤀᤣ ᤆᤥᤃᤧ᤹॥” ᤂᤧᤒᤩᤠᤱ ᤛᤠᤖᤠᤀᤡᤸᤗᤧ ᤂᤧᤴ ᤋᤠᤵᤑᤧ᤺ᤸᤗᤡᤰ ᤔᤧᤵᤔᤠ ᤜᤣ᤺ᤰᤋᤢ. ᤜᤧᤰᤁᤩᤠᤱ ᤂᤧᤴ ᤂᤢᤏᤧ᤹ᤀᤥᤗᤠᤶ ᤂᤧᤳᤇᤡᤱᤅᤠᤱ ᤐᤣ॥

⁷ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤸᤗᤧ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤛᤢᤖ ᤗᤧᤵᤔᤠᤱ ᤁᤧᤒᤣ᤺ᤰᤐᤠ ᤗᤠᤶᤔᤥᤒᤠ ᤘᤒᤢᤴᤍᤠᤰᤁᤡᤸᤗᤧ ᤁᤢᤒᤣᤛᤠᤱ ᤂᤧᤴ ᤋᤢᤔᤢ॥

⁸ ᤜᤧᤰᤁᤩᤠᤱ ᤂᤧᤸᤗᤧ ᤛᤣ᤺ᤴᤍᤥᤛᤢ. “ᤛᤠᤖᤠᤀᤡᤸᤗᤧ ᤁᤢᤛᤧᤘᤠᤖᤥᤔᤠ ᤜᤠᤃᤠᤖᤣ. ᤀᤠᤳᤋᤠᤴᤗᤠᤶ ᤁᤧᤍᤩᤧ ᤜᤧᤰᤁᤩᤠᤱ ᤀᤠᤳᤋᤠᤴ ᤁᤧᤒᤣ᤺ᤰᤐᤠᤒᤣ᥅” ᤂᤧᤸᤗᤧ ᤔᤧᤳᤋᤢ. “ᤀᤠᤴᤍᤠᤱᤔᤠ ᤛᤠᤖᤠᤀᤡᤗᤠᤶ ᤂᤧᤳᤇᤡᤱᤅᤠᤖ ᤐᤳᤋᤠᤒᤠᤖᤥ॥”

⁹ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤸᤗᤧ ᤂᤧᤴ ᤔᤧᤳᤋᤢ. “ᤁᤧᤴᤍᤠᤱᤔᤠᤸᤗᤥ ᤏᤢ᤺ᤰᤂᤧᤀᤠᤱ ᤐᤣᤃᤧ᤹. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤕᤢᤰᤁᤥᤀᤣ ᤘᤕᤧ᤹॥”

¹⁰ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤸᤗᤧ ᤂᤧᤴ ᤕᤠᤶᤔᤥ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤁᤧᤔᤢᤀᤡᤍᤠᤱᤛᤠᤜᤠ᤹ ᤏᤡ᤺ᤵᤔᤠᤀᤣ ᤛᤢᤰᤔᤧᤴᤍᤧᤳᤋᤣ ᤌᤠᤖᤡᤰ ᤕᤖᤡᤰ ᤑᤥᤛᤢᤱᤛᤡᤱ॥”

¹¹ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤸᤗᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤔᤧᤴᤇᤢᤰᤔᤠ ᤁᤧᤒᤥᤰᤂᤧᤀᤠᤱ ᤁᤧᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤧᤃᤳᤋᤢᤖᤥ॥ ᤂᤧᤏᤧ᤹ ᤂᤧᤸᤗᤧ ᤁᤢᤔᤡᤱ ᤀᤡᤛ᤻ᤔᤠᤀᤣᤗ ᤘᤠ᤺ᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤍᤢᤰᤂᤣᤴ ᤂᤧᤵᤛᤢᤀᤠᤱ ᤘᤠ᤹ᤖᤥ॥

¹² ᤔᤧᤴᤇᤠᤶ ᤕᤠᤵᤔᤡᤜᤠ᤹ᤀᤥ ᤂᤧᤴ ᤋᤠᤶᤓᤢᤱ ᤀᤍᤱ ᤜᤧᤰᤋᤱᤒᤠ ᤐᤥᤱᤗᤥ. ᤂᤧᤸᤗᤧ ᤁᤢᤜᤢᤰᤁᤡᤴ ᤁᤧᤖᤧᤰᤗᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤐᤥ᤺ᤰᤗᤥ ᤜᤧᤰᤁᤩᤠᤱ ᤁᤧᤖᤧᤰᤗᤧ ᤂᤢᤴᤇᤡ᤹ ᤜᤢᤰᤁᤡᤴ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤔᤧᤓᤥ᤺ᤰᤂᤢᤖᤥ॥ ᤂᤧᤴ ᤁᤧᤖᤧᤰ ᤁᤢᤃᤠ᤹ᤀᤡᤜᤠ᤹ᤀᤥ ᤔᤧᤴᤍᤱᤔᤏᤠᤒᤠ ᤐᤥᤱᤅᤠᤱ ᤘᤠ᤹ᤃᤴᤗᤥ॥”

¹³ ᤜᤠᤃᤠᤖᤧᤸᤗᤧ ᤂᤢᤏᤧ᤹ᤏᤢ ᤋᤠ᤹ᤁᤧᤈᤧᤱᤒᤠ ᤕᤜᤘᤣ ᤍᤠᤱᤒᤠᤴ ᤀᤰᤋᤱᤒᤠ ᤔᤡᤱ ᤐᤡᤖᤢ. “ᤂᤧᤏᤧ᤹ᤀᤣ ᤀᤠᤱᤃᤠ᤹ ᤕᤠᤵᤔᤡ ᤁᤧᤏᤡᤒᤠ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ॥” ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤐᤠ᤺ᤳᤋᤢ. “ᤀᤠᤱᤃᤠ᤹ ᤕᤠᤵᤔᤡ ᤀᤥᤃᤧᤔᤧᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤰᤂᤠᤀᤣ ᤏᤡᤛᤢᤱᤗᤥ॥”

¹⁴ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤘᤒᤠᤰᤁᤡᤸᤗᤧ ᤁᤢᤔᤡᤱ ᤒᤣᤀᤖ ᤗᤜᤠᤀᤡ ᤖᤥᤀᤡ ᤔᤧᤕᤢᤰᤂᤢ॥ ᤂᤧᤴ ᤀᤠᤸᤗᤥᤛᤠᤱ ᤁᤣᤍᤣᤛ ᤏᤢ ᤒᤣᤖᤣᤍᤖᤧ ᤁᤢᤗᤢᤶᤔᤥ ᤏᤧᤖᤥ॥

¹⁵ ᤜᤧᤰᤁᤩᤠᤱ ᤜᤠᤃᤠᤖᤧᤸᤗᤧ ᤀᤒᤪᤠᤶᤔᤡᤴ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ ᤐᤡᤖᤢ॥ ᤜᤧᤰᤁᤩᤠᤱ ᤂᤧᤸᤗᤧ ᤁᤳᤋᤢᤒᤠ ᤀᤅᤧ᤺ᤰᤘᤠᤴ ᤀᤒᤪᤠᤶᤔᤡᤸᤗᤧ ᤀᤡᤛ᤻ᤔᤠᤀᤣᤗ ᤔᤡᤱ ᤘᤠ᤺ᤳᤋᤢ॥

¹⁶ ᤜᤠᤃᤠᤖᤧᤸᤗᤧ ᤀᤡᤛ᤻ᤔᤠᤀᤣᤗᤧᤴ ᤁᤳᤋᤢᤸᤗᤧ ᤀᤒᤪᤠᤶᤔᤡᤴ ᤕᤧᤵᤐᤥᤱᤅᤠᤱ ᤋᤢᤰᤛᤡ ᤋᤱᤒᤣ ᤁᤧᤖᤧᤀᤠᤱ ᤘᤕᤧ॥