ᤋᤥᤗᤡᤱᤛᤥᤔᤢ 14 - LIFOTNT

ᤀᤒᤪᤠᤶᤔᤡᤸᤗᤧ ᤗᤢᤋᤧᤴ ᤛᤧ᤺ᤵᤋᤢ᤹

¹ ᤀᤔᤪᤠᤐᤣᤗᤧᤴ ᤛᤡᤏᤠᤖᤒᤠ ᤜᤠᤱ ᤘᤕᤧᤒᤠ ᤕᤧᤶᤔᤥ. ᤀᤣᤸᤗᤠᤛᤠᤖᤒᤠ ᤜᤠᤱ ᤀᤠᤷᤕᤥᤁᤧᤴ. ᤀᤣᤗᤠᤔᤒᤠ ᤜᤠᤱ ᤁᤍᤥᤖᤗᤠᤀᤥᤔᤣᤖᤧᤴ ᤜᤧᤰᤁᤩᤠᤱ ᤃᤥᤕᤡᤶᤒᤠ ᤜᤠᤱ ᤋᤡᤍᤠᤗᤧᤴ ᤌᤡᤰᤜᤢᤵ ᤔᤧᤒᤥ᤺ᤰᤂᤧ॥

² ᤜᤧᤰᤁᤩᤠᤱ ᤛᤍᤥᤔᤒᤠ ᤜᤠᤱ ᤒᤣᤖᤠ. ᤃᤔᤥᤖᤠᤒᤠ ᤜᤠᤱ ᤒᤡᤷᤛᤠ. ᤀᤍ᤻ᤔᤠᤒᤠ ᤜᤠᤱ ᤛᤡᤏᤠᤒ. ᤛᤒᤥᤕᤡᤶᤒᤠ ᤜᤠᤱ ᤛᤣᤔᤣᤒᤣᤖ ᤂᤧᤒᤩᤠᤱ ᤒᤣᤗᤠᤒᤠ (ᤂᤧᤴ ᤛᤥᤀᤖᤀᤠᤱ ᤔᤧᤔᤧᤳᤋᤢ) ᤜᤠᤱᤜᤠ᤹ᤖᤧ ᤂᤢᤴᤇᤡ ᤋᤰᤗᤧᤱᤘᤠᤀᤥ ᤌᤱ ᤌᤰᤛᤧ ᤔᤧᤒᤣ॥

³ ᤁᤴ ᤁᤧᤖᤧᤰ ᤜᤠᤱᤜᤠ᤹ ᤌᤡᤰᤜᤢᤵ ᤋᤢᤖᤠ ᤔᤧᤒᤥ᤺ᤰᤂᤧᤀᤠᤱ ᤛᤡᤍ᤻ᤍᤡᤶᤒᤠ (ᤕᤢᤶ ᤘᤖ᤺ᤱ) ᤋᤧᤶᤒᤣ᤹ᤀᤥ ᤔᤧᤓᤢᤱᤛᤡᤱ॥

⁴ ᤌᤡᤒᤥᤱᤅᤠᤱ ᤏᤧᤳᤇᤡ ᤋᤱᤒᤣ ᤌᤠᤖᤡᤰ ᤂᤧᤱᤜᤠ᤹ ᤁᤍᤥᤖᤗᤠᤀᤥᤔᤧᤖᤗᤧ ᤁᤢᤕᤢᤰᤁᤥ ᤔᤧᤘᤕᤧ॥ ᤁᤖ ᤌᤡᤒᤥᤱᤅᤠᤱ ᤛᤢᤶᤛᤡᤃᤣᤰᤐᤠ ᤋᤱᤒᤣᤀᤥ ᤂᤧᤱᤜᤠ᤹ᤖᤧ ᤜᤠᤱ ᤒᤡᤵᤑᤩᤢᤱ ᤔᤧᤈᤥᤃᤢ॥

⁵ ᤌᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤋᤱᤒᤣᤀᤥ ᤁᤍᤥᤷᤗᤠᤀᤥᤔᤧᤖᤧᤴᤏᤢ ᤌᤡᤰᤜᤢᤵ ᤁᤧᤒᤥᤱᤒᤠ ᤜᤠᤱᤜᤠ᤹ ᤔᤧᤒᤣᤀᤠᤱ ᤀᤛ᤻ᤋᤧᤖᤥᤳ ᤁᤷᤏᤣᤶᤒᤠ ᤖᤐᤠᤀᤡᤜᤠ᤹. ᤜᤠᤶᤒᤠ ᤈᤢᤈᤡᤜᤠ᤹. ᤛᤠᤒᤣ ᤁᤡᤷᤕᤠᤋᤤᤔᤒᤠ ᤀᤣᤔᤡᤜᤠ᤹.

⁶ ᤜᤧᤰᤁᤩᤠᤱ ᤜᤥᤖᤡᤜᤠ᤹ ᤛᤣᤀᤡᤖᤒᤠ ᤌᤧᤃᤢ ᤔᤠᤱᤘᤠ ᤗᤠᤈᤣ᤹ᤀᤥᤒᤠ ᤀᤣ᤺ᤰᤛᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤁᤧᤏᤧᤒᤠ ᤀᤧᤸᤐᤠᤖᤠᤴ ᤌᤠᤖᤡᤰ ᤔᤧᤏᤠ᤺ᤴᤍᤢᤛᤡ॥

⁷ ᤂᤧᤒᤩᤠᤱ ᤂᤧᤱᤜᤠ᤹ ᤔᤧᤏᤢ᤺ᤰᤂᤧᤀᤠᤱ ᤀᤣᤏᤔᤡᤛ᤻ᤐᤠᤋᤥ (ᤁᤠᤍᤣᤛ) ᤔᤧᤒᤣᤀᤠᤱ ᤀᤔᤠᤗᤧᤁᤡᤜᤠ᤹ᤖᤧ ᤂᤢᤏᤡ᤹ ᤁᤧᤖᤧᤰ ᤗᤠᤈᤣ᤹ᤜᤠ᤹ ᤏᤢ ᤜᤠᤛᤣᤛᤥᤴ ᤋᤠᤔᤠᤖᤀᤥ ᤁᤧᤕᤢᤱᤒᤠ ᤀᤣᤔᤥᤖᤡᤜᤠ᤹ᤀᤠᤱ ᤔᤧᤏᤠ᤺ᤴᤍᤢᤛᤡ॥

⁸ ᤂᤧᤒᤩᤠᤱ ᤛᤍᤥᤔ. ᤃᤔᤥᤖᤠ. ᤀᤍ᤻ᤔᤠ. ᤛᤒᤥᤕᤡᤔ ᤏᤢ ᤒᤣᤗᤠᤒᤠ (ᤂᤧᤴ ᤛᤥᤀᤖ) ᤜᤠᤱᤜᤠ᤹ ᤔᤧᤗ᤺ᤴᤍᤧᤀᤠᤱ ᤛᤡᤍᤡᤍᤶ ᤋᤧᤶᤒᤣ᤹ᤀᤥ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤔᤧᤈᤢᤵᤛᤧ॥

⁹ ᤀᤣᤗᤠᤔ ᤗᤠᤈᤣ᤹ᤒᤠ ᤜᤠᤱ ᤁᤍᤥᤖᤗᤠᤀᤥᤔᤧᤖ. ᤃᤥᤕᤡᤶᤒᤠ ᤜᤠᤱ ᤋᤡᤍᤠᤗ. ᤛᤡᤏᤠᤖᤒᤠ ᤜᤠᤱ ᤀᤔᤪᤠᤐᤣᤸ. ᤜᤧᤰᤁᤩᤠᤱ ᤀᤣᤸᤗᤠᤛᤠᤖᤒᤠ ᤜᤠᤱ ᤀᤠᤷᤕᤥᤰᤁᤧᤴ. ᤁᤴ ᤗᤡᤛᤡ ᤜᤠᤱᤜᤠ᤹ ᤂᤧᤴ ᤅᤠᤛᤡ ᤜᤠᤱᤜᤠ᤹ᤏᤢ ᤌᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤕᤠᤖᤡᤵ ᤔᤧᤒᤥ᤺ᤰᤂᤧ॥

¹⁰ ᤛᤡᤍ᤻ᤍᤡᤶᤒᤠ ᤏᤧᤏᤧᤒᤠ ᤋᤧᤴᤏᤡᤴ ᤀᤗᤁᤋᤪᤠ ᤀᤡᤛ᤻ᤛᤣ᤺ᤱᤒᤠ ᤗᤢᤶᤒᤠ᤺ᤳᤋᤣ ᤗᤢᤶᤒᤠᤳ ᤁᤧᤏᤧᤒᤠ ᤆᤥᤃᤧ॥ ᤜᤧᤰᤁᤩᤠᤱ ᤛᤍᤥᤔ ᤏᤢ ᤃᤔᤥᤖᤠᤒᤠ ᤜᤠᤱᤜᤠ᤹ ᤌᤱᤅᤥᤗᤠᤶ ᤂᤧᤳᤏᤧᤳᤇᤡᤸᤗᤧ ᤂᤧᤱᤜᤠ᤹ᤖᤧ ᤁᤢᤓᤠ ᤂᤢᤴᤇᤡ᤹ ᤔᤏᤠᤜᤠ᤹ ᤗᤢᤶᤒᤠ᤺ᤳᤜᤠ᤹ᤀᤥ ᤔᤧᤜᤢᤔᤧ ᤔᤧᤗᤠᤛᤧ॥ ᤜᤧᤰᤁᤩᤠᤱ ᤘᤣ᤹ ᤔᤏᤠᤜᤠ᤹ᤃ ᤁᤥ᤺ᤰᤔᤠ ᤑᤠᤱᤈᤱ ᤜᤧᤱᤜᤠᤳᤋᤡ ᤔᤧᤄᤧᤳᤇᤡᤱ॥

¹¹ ᤂᤧᤴ ᤗᤡᤛᤡ ᤜᤠᤱᤜᤠ᤹ᤖᤧ ᤛᤍᤥᤔ ᤏᤢ ᤃᤔᤥᤖᤠᤒᤠ ᤐᤃᤢᤃᤧᤴ ᤁᤢᤈᤠᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰ ᤆᤡᤃᤰᤘᤠᤜᤠ᤹ ᤔᤧᤕᤠᤱᤛᤡᤱᤅᤠᤱ ᤔᤧᤎᤠᤛᤡᤱ॥

¹² ᤂᤧᤱᤜᤠ᤹ᤖᤧ ᤛᤍᤥᤶᤔᤥ ᤁᤧᤕᤢᤱᤒᤠ ᤀᤒᤪᤠᤶᤔᤡᤸᤗᤧ ᤁᤢᤴᤏᤠᤰᤐᤠ ᤗᤢᤋᤧᤴᤏᤠᤱ ᤔᤧᤍᤣ᤹ᤖᤢ ᤜᤧᤰᤁᤩᤠᤱ ᤁᤳᤋᤢᤒᤠ ᤁᤧᤖᤧᤰ ᤁᤢᤈᤡᤃᤰᤘᤠᤜᤠ᤹ ᤔᤧᤍᤣ᤹ᤖᤢ॥

¹³ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤀᤠᤱ ᤁᤧᤄᤧᤳᤇᤡᤱᤒᤠ ᤗᤳᤇᤠ ᤔᤏᤠᤎᤡᤰᤗᤧ ᤜᤡᤒᤪᤢ ᤀᤒᤪᤠᤶᤔᤡᤴ ᤁᤴ ᤐᤠ᤺ᤴᤏᤡᤴ ᤆᤧᤰᤋᤢ॥ ᤀᤒᤪᤠᤶᤔᤡᤴ ᤀᤧᤛ᤻ᤁᤥᤗ ᤏᤢ ᤀᤠᤏᤣᤖᤗᤧ ᤁᤢᤴᤛᤠ᤹ ᤀᤣᤔᤥᤖᤡᤖᤧ ᤔᤔᤪᤣᤒᤠ ᤕᤜᤡᤒᤠ ᤁᤢᤛᤡᤱᤜᤠ᤹ᤖᤧ ᤁᤢᤒᤣᤛᤠᤱ ᤕᤢᤅᤧ॥ ᤂᤧᤱᤜᤠ᤹ ᤀᤒᤪᤠᤶᤔᤡᤸᤗᤧ ᤁᤢᤴᤍᤣ᤺ᤱᤒᤠ ᤘᤕᤧᤛᤡ॥

¹⁴ ᤀᤒᤪᤠᤶᤔᤡᤸᤗᤧ ᤁᤢᤃᤠ᤹ᤀᤡᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢ ᤁᤧᤗ᤹ᤒᤠ ᤀᤡᤱᤄᤱ ᤂᤧᤵᤛᤢᤀᤠᤱ ᤁᤢᤜᤡᤶᤔᤥᤀᤣ ᤛᤠᤃᤧᤘᤠ᤺ᤴᤇᤡᤱᤒᤠ ᤏᤢ ᤌᤱ ᤌᤰᤔᤠ ᤁᤧᤜᤢ᤹ᤛᤡᤱᤒᤠ ᤁᤡᤵ ᤛᤢᤶᤛᤡᤀᤠᤱ ᤌᤡᤒᤥᤱᤅᤠᤱ ᤕᤧᤳᤇᤡ ᤁᤢᤛᤧᤘᤠᤖᤥᤒᤠᤜᤠ᤹ ᤑᤢᤰᤛᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ ᤍᤠᤏ ᤌᤠᤖᤡᤰ ᤏᤠ᤺ᤳᤋᤢᤍᤣ᤹ᤖᤢᤛᤡ॥

¹⁵ ᤛᤧᤴᤍᤡᤰ ᤏᤡᤱᤔᤡᤜᤠ᤹ ᤑᤵᤔᤠᤛᤡᤖᤧ ᤗᤠᤃᤡ ᤂᤢᤏᤧ᤹ ᤁᤢᤔᤏᤠᤜᤠ᤹ ᤁᤢᤗᤢᤵ ᤁᤢᤗᤢᤵ ᤛᤧᤛᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤔᤡᤜᤠ᤹ ᤔᤧᤏᤠ᤺ᤴᤍᤢᤛᤡ. ᤍᤔᤛ᤻ᤁᤛᤒᤠ ᤌᤠᤱᤃᤧᤳ ᤐᤡᤛᤠᤱ ᤁᤧᤏᤧᤒᤠ ᤜᤥᤒᤠ ᤌᤠᤖᤡᤰ ᤔᤧᤏᤠ᤺ᤳᤋᤢᤛᤡ॥

¹⁶ ᤂᤢᤏᤧ᤹ ᤁᤧᤖᤧᤰ ᤆᤡᤃᤰᤘᤠᤜᤠ᤹ ᤕᤠᤱᤏᤠ ᤏᤠᤵᤋᤢᤛᤡ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤃᤠ᤹ᤀᤡ ᤗᤢᤋᤧᤴ. ᤁᤢᤈᤡᤃᤰᤘᤠᤜᤠ᤹ ᤜᤧᤰᤁᤩᤠᤱ ᤔᤧᤴᤇᤢᤔᤠᤜᤠ᤹ ᤏᤢ ᤘᤣ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠ ᤔᤏᤠᤜᤠ᤹ᤀᤠᤱ ᤏᤢ᤺ᤰᤋᤢ ᤋᤠᤖᤢᤛᤡ॥

ᤔᤸᤁᤡᤛᤧᤍᤧᤰᤁᤧᤸᤗᤧ ᤀᤒᤪᤠᤶᤔᤡᤴ ᤔᤢ᤹ᤀᤡᤛᤠᤶ ᤐᤡᤖᤢ

¹⁷ ᤀᤒᤪᤠᤜᤠᤶᤔᤡᤸᤗᤧ ᤁᤍᤥᤖᤗᤠᤀᤥᤔᤣᤖᤧᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤌᤡᤰᤜᤢᤵ ᤁᤧᤒᤥᤱᤒᤠ ᤜᤠᤱᤜᤠ᤹ ᤏᤠ᤺ᤴᤍᤢᤛᤡᤀᤠᤱ ᤏᤢ᤺ᤰᤂᤧ ᤑᤧᤖᤧᤸᤗᤧ ᤛᤠᤒᤣᤒᤠ ᤏᤧᤏᤧᤒᤠᤍᤧᤴᤏᤥ ᤀᤡᤃᤪ ᤜᤠᤱᤅᤡᤸᤗᤧ ᤁᤢᤏᤧᤏᤧᤒᤠ ᤋᤧᤴᤏᤥ ᤛᤍᤥᤔᤒᤠ ᤜᤠᤱᤅᤡᤴ ᤂᤢᤏᤧ᤹ ᤁᤢᤍᤢᤶᤛᤧ ᤋᤩᤧ॥

¹⁸ ᤜᤧᤰᤁᤩᤠᤱ ᤛᤠᤗᤣᤶᤒᤠ ᤜᤠᤱ ᤔᤸᤁᤡᤛᤧᤍᤧᤰᤁᤧᤴ ᤂᤖᤧ᤺ᤱ ᤏᤢ ᤆᤧᤸᤗᤧᤰᤛᤣ᤹ ᤌᤡ ᤕᤠᤱᤛᤡᤱᤅᤠᤱ ᤀᤒᤪᤠᤶᤔᤡᤸᤗᤧ ᤁᤢᤍᤢᤶᤛᤧ ᤑᤧᤖᤧ॥ ᤔᤸᤁᤡᤛᤧᤍᤧᤰᤁᤧᤴ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤛᤧᤘᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧ॥

¹⁹ ᤂᤢᤏᤧ᤹ ᤀᤒᤪᤠᤜᤠᤶᤔᤡᤴ ᤀᤰᤂᤣ ᤔᤧᤳᤋᤢᤖ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤌᤠᤛᤢᤐᤡᤖᤢ. “ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤏᤧᤒᤠ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤶᤔᤡᤴ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤖᤖᤥ॥

²⁰ ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤡᤴ ᤔᤡᤔᤡᤍᤡᤱ ᤐᤥᤱᤗᤖᤥ. ᤂᤢᤏᤧ᤹ᤀᤣ ᤁᤧᤏᤡᤱᤔᤡᤜᤠ᤹ ᤂᤧᤏᤧ᤹ ᤁᤧᤜᤢᤰᤁᤥ ᤜᤢᤰᤁᤧᤛᤢ᤺ᤵᤋᤧ ᤁᤧᤒᤡᤖᤧᤖᤥ॥” ᤜᤧᤰᤁᤩᤠᤱ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧᤴ ᤌᤡᤒᤥᤱᤗᤰ ᤔᤸᤁᤡᤛᤧᤍᤧᤰᤁᤧᤴ ᤐᤡᤖᤢ॥

²¹ ᤜᤧᤰᤁᤩᤠᤱ ᤛᤍᤥᤔᤒᤠ ᤜᤠᤱᤅᤡᤸᤗᤧ ᤀᤒᤪᤠᤶᤔᤡᤴ ᤔᤧᤳᤋᤢ. “ᤀᤠᤱᤃᤠ᤹ ᤔᤏᤠᤜᤠ᤹ᤖᤰ ᤐᤡᤖᤠᤱᤅᤧ᤹. ᤁᤖ ᤆᤡᤃᤰᤘᤠᤜᤠ᤹ ᤂᤧᤏᤧ᤹ᤀᤣ ᤗᤠᤖᤧ᤹॥”

²² ᤁᤖ ᤀᤒᤪᤠᤶᤔᤡᤸᤗᤧ ᤛᤍᤥᤔᤒᤠ ᤜᤠᤱᤅᤡᤴ ᤔᤧᤳᤋᤢ. “ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤜᤘᤣ ᤍᤠᤱᤒᤠ. ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤀᤰᤂᤣᤗ᤹ᤖᤡᤰ ᤔᤠᤱᤜᤢᤵ ᤆᤥᤃᤢᤱᤅᤠᤱ ᤘᤠ᤹ᤀᤠ.

²³ ᤗᤳᤇᤠ ᤂᤡᤎᤡᤰᤁᤠᤱ ᤀᤡᤃᤪ ᤗᤠᤱᤛᤢ᤺ᤵᤐᤡᤸᤗᤧ ᤁᤢᤏᤠᤶᤎᤡᤰᤁᤠᤱ ᤂᤧᤏᤧ᤹ ᤁᤧᤈᤡᤃᤰᤘᤠ ᤌᤣᤎᤡᤰᤁᤠᤱ ᤔᤧᤍᤣ᤹ᤀᤠᤴ. ᤔᤣ᤺ᤴᤏᤧᤓᤃᤪ ‘ᤀᤒᤪᤠᤶᤔᤡᤴ ᤀᤠᤱᤃᤠ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤆᤥᤃᤢᤱ’ ᤗ᤹ᤖᤡᤰ ᤂᤧᤏᤧ᤹ ᤁᤧᤒᤠ᤺ᤳᤋᤢ᤹॥

²⁴ ᤀᤠᤱᤃᤠ᤹ᤏᤢ ᤁᤧᤒᤣ᤺ᤰᤐᤠᤀᤠᤱ ᤁᤧᤘᤠ᤹ᤒᤠ ᤀᤠᤔᤏᤠᤜᤠ᤹ᤖᤧ ᤔᤧᤈᤒᤠ ᤗᤰᤁᤠᤱᤎᤥ ᤘᤣ᤹ ᤗᤰᤁᤡᤴ ᤔᤧᤍᤠ᤺ᤰᤁᤠᤴᤗᤥ. ᤜᤧᤰᤁᤩᤠᤱ ᤁᤴ ᤘᤣ᤹ ᤔᤏᤠ ᤀᤠᤏᤣᤖ. ᤀᤧᤛ᤻ᤁᤥᤗ ᤏᤢ ᤔᤔᤪᤣᤖᤧ ᤂᤢᤴᤇᤡ᤹ ᤗᤰᤁᤡᤴ ᤔᤧᤍᤠ᤺ᤰᤋᤢᤖᤖᤥ॥”