ᤋᤥᤗᤡᤱᤛᤥᤔᤢ 12 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤒᤪᤠᤶᤔᤡᤴ ᤀᤢ᤺ᤳᤋᤢ᤹

¹ ᤕᤜᤘᤣ ᤍᤠᤱᤒᤠᤸᤗᤧ ᤀᤒᤪᤠᤶᤔᤡᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤗᤠᤈᤣᤗᤠᤶ ᤏᤢ ᤂᤧᤏᤧ᤹ ᤁᤧᤃᤠ᤹ᤀᤡᤜᤠ᤹ᤗᤠᤶ ᤜᤧᤰᤁᤩᤠᤱ ᤁᤧᤶᤒᤠᤖᤧ ᤁᤢᤜᤡᤶᤔᤥᤗᤠᤶ ᤗ᤺ᤴᤍᤧ᤹ᤀᤠᤱ ᤀᤠᤱᤃᤠ᤹ ᤀᤢᤛᤣ᤺ᤴᤎᤠᤰᤏᤧᤒᤠ ᤗᤠᤈᤣ᤹ᤀᤥ ᤐᤣᤃᤧ᤹॥

² ᤀᤠᤱᤃᤠ᤹ ᤂᤧᤏᤧ᤹ ᤗᤳᤇᤠ ᤕᤶᤒᤠ ᤛᤢᤘᤠᤱ ᤆᤥ᤺ᤰᤏᤧ. ᤜᤧᤰᤁᤩᤠᤱ ᤂᤧᤏᤧ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤏᤧ॥ ᤀᤠᤱᤃᤠ᤹ ᤁᤧᤔᤡᤱ ᤋᤡ᤺ᤳᤗ ᤆᤥᤃᤢᤱ᤹. ᤜᤧᤰᤁᤩᤠᤱ ᤂᤧᤏᤧ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶᤗᤧ ᤁᤢᤒᤢᤱ ᤁᤧᤒᤥᤱᤗᤥ॥

³ “ᤂᤧᤏᤧ᤹ ᤜᤠᤱᤘᤠᤔᤢ᤹ᤀᤡ ᤁᤧᤒᤡᤒᤠᤜᤠ᤹ ᤀᤠᤱᤃᤠ᤹ ᤜᤠᤱᤘᤠᤔᤢ᤹ᤀᤡ ᤐᤡᤖᤢᤱᤛᤡᤱᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤛᤠᤱᤃᤪᤠ ᤔᤠᤱᤍᤣ ᤁᤧᤔᤧᤵᤐᤠᤜᤠ᤹ ᤀᤠᤱᤃᤠ᤹ ᤛᤠᤱᤃᤪᤠ ᤔᤧᤳᤋᤢᤱᤛᤡᤱᤗᤥ॥ ᤂᤧᤏᤧ᤹ ᤗᤠᤶᤒᤠᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤔᤧᤄᤥᤛᤢᤖᤥ॥”

⁴ ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤔᤧᤳᤋᤢᤒᤠ ᤜᤧᤰᤁᤣ ᤀᤒᤪᤠᤶᤔᤡᤴ ᤌᤠᤛᤡᤱ. ᤜᤧᤰᤁᤩᤠᤱ ᤗᤢᤋᤧᤴᤏᤠᤱ ᤂᤢᤏᤧ᤹ᤏᤢ ᤐᤣ॥ ᤜᤠᤖᤠᤴᤗᤠᤶ ᤗ᤺ᤴᤍᤧᤐᤣ᤺ᤸᤗᤧ ᤀᤒᤪᤠᤶᤔᤡᤴ ᤏᤢᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤁᤧᤖᤧᤀᤠᤱ ᤘᤕᤧ॥

⁵ ᤀᤒᤪᤠᤶᤔᤡᤴ. ᤁᤢᤔᤣᤳ ᤛᤠᤖᤠᤀᤡᤴ ᤜᤧᤰᤁᤩᤠᤱ ᤁᤢᤴᤏᤠᤰᤐᤠ ᤗᤢᤋᤧᤴ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤎᤃᤢᤒᤠ ᤕᤠᤱᤛᤠᤁᤢᤴᤎᤣᤴ ᤜᤧᤰᤁᤩᤠᤱ ᤜᤠᤖᤠᤴᤏᤥ ᤔᤧᤄᤥᤛᤢᤛᤡᤒᤠ ᤔᤏᤠᤜᤠ᤹ ᤔᤧᤕᤠᤱᤛᤡᤱᤅᤠᤱ ᤁᤏᤠᤏ ᤗᤠᤈᤣ᤹ᤀᤥ ᤐᤣ᤺ᤰᤔᤠ ᤑᤠ᤹ᤀᤠᤱ ᤔᤧᤎᤠᤛᤡᤱ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤵᤔᤥ ᤔᤧᤃᤧᤖᤧ॥

⁶ ᤀᤒᤪᤠᤶᤔᤡᤴ ᤁᤏᤠᤏ ᤗᤠᤈᤣ᤹ ᤐᤥ᤺ᤰᤂᤧᤖ ᤐᤣ᤺ᤸᤗᤧ ᤛᤣᤁᤣᤔᤒᤠ ᤕᤜᤡᤒᤠᤛᤡᤱ ᤁᤧᤕᤢᤱᤒᤠᤍᤧᤴ ᤔᤥᤖᤣᤀᤥ ᤌᤠᤖᤡᤰ ᤁᤧᤖᤧ॥ ᤂᤧᤴ ᤕᤧᤶᤔᤥ ᤂᤧ᤹ᤕᤥ ᤁᤏᤠᤏᤡ ᤛᤢᤘᤠᤱᤜᤠ᤹ ᤔᤧᤕᤢᤅᤧ॥

⁷ ᤕᤜᤘᤣ ᤍᤠᤱᤒᤧᤴ ᤀᤒᤪᤠᤶᤔᤡᤴᤏᤢ ᤌᤠ᤺ᤶᤛᤡᤱ. ᤜᤧᤰᤁᤩᤠᤱ ᤂᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤁᤧᤛ᤻ᤛᤠ ᤁᤧᤶᤔᤧᤴᤇᤠ᤹ᤜᤠ᤹ ᤁᤴ ᤗᤠᤈᤣᤴ ᤐᤡᤖᤢᤱᤛᤡᤱ᤹॥” ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ᤏᤢ ᤁᤧᤎᤠ᤺ᤶᤛᤡᤱᤒᤠ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤂᤢᤏᤧ᤹ ᤂᤧᤵᤔᤥ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤡᤰ ᤆᤥᤃᤢ॥

⁸ ᤂᤧᤵᤔᤥᤗᤠᤶ ᤂᤢᤏᤧ᤹ ᤌᤠᤛᤡᤱᤅᤠᤱ ᤒᤣᤌᤣᤗᤗᤠᤶ ᤏᤠᤶᤃᤧᤴ ᤐᤡᤛᤠᤱᤒᤠ ᤁᤥ᤺ᤰᤔᤠᤜᤠ᤹ᤀᤥ ᤆᤳᤇᤡᤱᤒᤣ. ᤜᤧᤰᤁᤩᤠᤱ ᤒᤣᤌᤣᤗᤗᤧᤴ ᤏᤠᤶᤎᤠ ᤐᤡᤛᤠᤱ ᤏᤢ ᤀᤤ ᤕᤧᤰᤕᤰᤁᤡᤴ ᤏᤠᤶᤃᤧᤴ ᤐᤡᤛᤠᤱ ᤋᤰᤔᤧᤳᤋᤢᤀᤠᤱ ᤁᤢᤛᤠ᤺ᤱᤃᤠ ᤜᤡᤶᤔᤡᤴ ᤂᤡᤱᤛᤢ॥ ᤂᤢᤏᤧ᤹ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤕᤠᤶᤔᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤡᤰ ᤆᤥᤃᤢᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤐᤣᤗᤡ ᤑᤠᤰᤋᤢ॥

⁹ ᤜᤧᤰᤁᤩᤠᤱ ᤀᤒᤪᤠᤶᤔᤡᤴ ᤀᤠᤸᤗᤛᤠᤱ ᤗᤠᤶᤍᤡᤰ ᤆᤥᤃᤧᤖ ᤕᤥ ᤗᤠᤱᤃᤧᤴ ᤗᤧᤵᤛᤠᤱᤒᤠ ᤏᤣᤃᤣᤒ ᤔᤧᤵᤔᤏᤠᤒᤠ ᤗᤠᤈᤣ᤹ᤀᤥ ᤐᤣᤃᤧ॥

ᤀᤒᤪᤠᤶᤔᤡᤴ ᤔᤡᤛᤪ ᤗᤠᤈᤣ᤹ᤀᤥ ᤁᤧᤳ

¹⁰ ᤜᤧᤰᤁᤩᤠᤱ ᤂᤧᤴ ᤗᤠᤈᤣ᤹ᤀᤥ ᤛᤠᤰᤘᤠᤴ ᤋᤩᤧ॥ ᤛᤠᤰᤘᤠᤴ ᤁᤧᤛᤠᤰᤐᤠ ᤆᤥᤃᤧᤒᤠᤸᤗᤧ ᤆᤥᤃᤢᤸᤗᤧ ᤀᤒᤪᤠᤶᤔᤡᤴ ᤁᤢᤓᤠ ᤕᤧᤶᤗᤧ ᤗᤠᤃᤡ ᤔᤡᤛᤪ ᤗᤠᤈᤣ᤹ᤀᤥ ᤕᤢᤱᤛᤧ ᤐᤣ॥

¹¹ ᤂᤢᤏᤧ᤹ ᤔᤡᤛᤪ ᤗᤠᤈᤣ᤹ᤀᤥ ᤗᤠ᤺ᤵᤔᤠ ᤆᤥᤃᤧᤸᤗᤧ ᤀᤒᤪᤠᤶᤔᤡᤸᤗᤧ ᤁᤢᤔᤣᤳ ᤛᤠᤖᤠᤀᤡᤴ ᤔᤧᤳᤋᤢ. “ᤂᤧᤏᤧ᤹ ᤏᤢᤔᤠᤛᤢᤰᤔᤠ ᤁᤧᤈᤥᤰ ᤁᤧᤗ᤹ᤒᤠᤴ ᤀᤠᤱᤃᤠ᤹ ᤏᤡᤛᤢᤱ॥

¹² ᤔᤡᤛᤪᤒᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤶᤏᤡ᤺ᤸᤗᤧ ᤂᤧᤱᤜᤠ᤹ᤖᤧ ‘ᤁᤱᤃ ᤂᤢᤏᤧ᤹ ᤁᤢᤔᤣ᤺ᤳᤗᤥ’ ᤔᤧᤒᤠ᤺ᤳᤋᤢ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤛᤧᤳᤋᤠ ᤁᤖ ᤂᤧᤏᤧ᤹ ᤁᤢᤜᤡᤱᤘᤧᤳ ᤁᤧᤶᤍᤠᤱᤗᤥ॥

¹³ ‘ᤀᤠᤱᤃᤠ᤹ ᤂᤢᤏᤧ᤹ ᤁᤢᤴᤈᤣᤗᤡᤔᤠᤀᤠ’ ᤔᤧᤳᤋᤧᤛᤧ᤹. ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤏᤢᤖᤡᤰ ᤔᤧᤔᤧᤳᤋᤠ᤹ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤈᤥᤃᤢᤸᤗᤧ ᤀᤠᤱᤃᤠ᤹ ᤀᤠᤜᤡᤱᤔᤴᤏᤡᤴ ᤋᤠᤱᤗᤥ॥”

¹⁴ ᤀᤒᤪᤠᤶᤔᤡᤴ ᤔᤡᤛᤪᤀᤥ ᤁᤧᤖᤧᤸᤗᤧ. ᤔᤡᤛᤪᤒᤠ ᤔᤏᤠᤜᤠ᤹ᤖᤧ ᤛᤠᤖᤠᤀᤡᤴ ᤆᤠ᤹ᤖᤡᤰ ᤏᤢᤔᤠ ᤔᤧᤴᤇᤢᤔᤠ ᤔᤧᤏᤡᤛᤢ॥

¹⁵ ᤜᤧᤰᤁᤩᤠᤱ ᤑᤠᤖᤥ ᤜᤠᤱᤅᤡᤸᤗᤧ ᤁᤢᤛᤢᤜᤠᤱ ᤕᤢᤰᤐᤠᤜᤠ᤹ᤖᤧ ᤛᤠᤖᤠᤀᤡᤴ ᤔᤧᤏᤡᤛᤢᤀᤠᤱ ᤜᤠᤱᤅᤡᤴ ᤔᤧᤈᤧᤰᤋᤢ. ᤜᤧᤰᤁᤩᤠᤱ ᤛᤠᤖᤠᤀᤡᤴ ᤜᤠᤱᤅᤡᤸᤗᤧ ᤁᤢᤜᤡᤶᤔᤥ ᤔᤧᤍᤣ᤹ᤖᤢ॥

¹⁶ ᤛᤠᤖᤠᤀᤡᤸᤗᤧ ᤆᤥᤃᤢᤸᤗᤧ ᤜᤠᤱᤅᤡᤸᤗᤧ ᤀᤒᤪᤠᤶᤔᤡᤴ ᤏᤢᤖᤡᤰ ᤔᤧᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤸᤗᤢᤰᤜᤠ᤹ᤏᤢ. ᤐᤡᤳᤜᤠ᤹. ᤁᤢᤶᤒᤠᤒᤠ ᤏᤢ ᤁᤢᤶᤔᤠᤔᤠ ᤀᤍᤱᤜᤠ᤹. ᤛᤧᤘᤠᤖᤥᤒᤠ ᤛᤧᤘᤠᤖᤥᤔᤠᤜᤠ᤹ ᤜᤧᤰᤁᤩᤠᤱ ᤀᤢᤔᤣᤜᤠ᤹ ᤐᤡᤖᤢ॥

¹⁷ ᤁᤖ ᤀᤒᤪᤠᤶᤔᤡᤸᤗᤧ ᤁᤢᤔᤣᤳ ᤛᤠᤖᤠᤀᤡ᤺ᤸᤗᤧ ᤆᤥᤃᤢᤸᤗᤧ ᤑᤠᤖᤥᤴ ᤏᤢ ᤁᤢᤜᤡᤶᤛᤕᤱᤅᤥ ᤕᤜᤘᤣ ᤍᤠᤱᤒᤠᤸᤗᤧ ᤁᤡᤵᤔᤠ ᤁᤧᤄᤢᤒᤠ ᤔᤠᤱᤍᤢᤰᤔᤠ ᤐᤠᤱᤄᤢᤍᤠᤛᤢ॥

¹⁸ ᤂᤧᤸᤗᤧᤆᤥᤃᤢᤸᤗᤧ ᤑᤠᤖᤥᤸᤗᤧ ᤀᤒᤪᤠᤶᤔᤡᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤁᤴ ᤀᤠᤱᤃᤠ᤹ᤏᤢ ᤌᤣ ᤁᤧᤈᤥᤃᤢᤒᤠᤒᤣ᥅ ᤛᤠᤖᤠᤀᤡᤴ ᤂᤧᤏᤧ᤹ ᤁᤧᤔᤣ᤺ᤳ ᤑᤠ᤹ᤀᤠᤱ ᤌᤣᤀᤠᤱ ᤁᤧᤶᤔᤧᤳᤋᤠᤱᤏᤧᤴᤒᤠᤒᤣ᥅

¹⁹ ‘ᤂᤢᤏᤧ᤹ ᤀᤠᤴᤈᤣᤗᤡᤔᤠ’ ᤗ᤹ᤖᤡᤰ ᤌᤣᤀᤠᤱ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠᤒᤣ. ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤀᤠᤜᤡᤶᤔᤥ ᤀᤠᤜᤡᤶᤛᤠᤔᤠ ᤆᤥ᤺ᤰᤛᤧ ᤋᤣ᤹ᤖᤢᤱᤅᤠᤱ ᤘᤕᤧ॥ ᤀᤠᤸᤗ ᤀᤥᤔᤧᤳᤋᤧ᤹. ᤂᤧᤏᤧ᤹ ᤁᤧᤔᤣ᤺ᤳᤋᤧᤴ ᤜᤠᤒᤠ ᤁ᤹ᤕᤥ ᤘᤠ᤹॥ ᤂᤧᤴ ᤋᤣ᤹ᤖᤧᤀᤠᤱ ᤐᤣᤃᤧ᤹॥”

²⁰ ᤂᤧᤒᤩᤠᤱ ᤑᤠᤖᤥᤸᤗᤧ ᤀᤒᤪᤠᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤢᤔᤏᤠᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤒᤪᤠᤶᤔᤡᤴ ᤏᤢ ᤁᤢᤜᤡᤶᤛᤠᤔᤧᤴ ᤜᤧᤰᤁᤩᤠᤱ ᤂᤢᤏᤧ᤹ ᤁᤳᤋᤢᤒᤠ ᤁᤧᤖᤧᤰ ᤆᤡᤃᤰᤘᤠᤜᤠ᤹ᤏᤢ ᤔᤧᤒᤠᤱᤄᤢᤔᤧᤍᤣᤛᤢ॥