ᤋᤥᤗᤡᤱᤛᤥᤔᤢ 11 - LIFOTNTᤒᤠᤒᤣᤗᤒᤠ ᤆᤱᤜᤡᤶ 1 ᤂᤧᤴ ᤕᤧᤶᤔᤥ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤳᤇᤠᤖᤰ ᤐᤠ᤺ᤴᤍᤠᤱ ᤘᤕᤧ ᤜᤧᤰᤁᤩᤠᤱ ᤗᤳᤇᤠ ᤐᤖᤡᤰᤗᤧᤴ ᤐᤠ᤺ᤴᤇᤣ᤺ᤰᤘᤠ ᤘᤕᤧ॥ 2 ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤏᤠᤶᤃᤧᤴ ᤐᤡᤛᤠᤱ ᤔᤧᤈᤳᤇᤡᤱᤗ ᤔᤧᤒᤣ᤺ᤸᤗᤧ ᤛᤡᤏᤠᤖ ᤗᤠᤈᤣ᤹ᤀᤥ ᤗᤳᤇᤠ ᤋᤧᤶᤒᤣ᤹ᤎᤡᤰ ᤔᤧᤄᤥᤛᤢᤀᤠᤱ ᤜᤠᤒᤠ ᤂᤧᤵᤔᤥ ᤔᤧᤕᤢᤱᤛᤡᤱ॥ 3 ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤸᤗ ᤀᤠᤏᤡ᤹ ᤂᤠᤶᤗᤧᤰ ᤆᤥᤃᤢᤶᤔᤠᤱ ᤛᤱᤗ ᤀᤥ᤹ᤖᤢᤶ॥” ᤂᤧᤱᤜᤠ᤹ᤖᤧ ᤗᤢᤱᤅᤡᤸᤗᤧ ᤁᤢᤗᤧᤰᤘᤠ ᤂᤠᤶᤗᤧᤰ ᤜᤧᤰᤁᤩᤠᤱ ᤛ᤹ᤔᤏᤠᤒᤠ ᤂᤠᤶᤔᤡᤸᤗᤧ ᤁᤢᤗᤧᤰᤘᤠ ᤀᤗᤁᤋᤪᤠᤴ ᤀᤥᤃᤵ ᤔᤧᤈᤥᤃᤢ॥ 4 ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤗᤢ. ᤀᤠᤏᤡ᤹ ᤀᤠᤒᤠᤅᤣ ᤗᤳᤇᤠ ᤕᤧᤰᤕᤰᤌᤡᤰ ᤆᤥᤃᤢᤶ. ᤂᤧᤴ ᤕᤧᤰᤕᤰᤁᤥ ᤌᤥ ᤛᤠᤱᤃᤪᤠᤶᤐᤣᤍᤠᤱ ᤁᤧᤛᤢᤒᤠ ᤆᤱᤜᤡᤶᤎᤡᤰ ᤆᤥᤃᤢᤶ. ᤜᤧᤰᤁᤩᤠᤱ ᤀᤠᤏᤡ᤹ ᤔᤡᤱ ᤕᤢᤰᤂᤢᤶ ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤖᤧᤰ ᤐᤡᤛᤠᤱ ᤀᤠᤴᤇᤧᤏᤧᤴ ᤀᤠᤶᤒᤣ᤺ᤰᤏᤣᤸᤗᤖᤥ॥” 5 ᤁᤖ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤈᤥᤃᤢᤖ ᤔᤧᤕᤠᤃᤧᤒᤠ ᤕᤧᤰᤕ᤺ᤰᤁᤡᤴ ᤏᤢ ᤆᤱᤜᤡᤶᤔᤡᤴ ᤀᤥᤔᤧᤳᤇᤧ ᤕᤜᤘᤣ ᤍᤠᤱᤒᤠᤴ ᤌᤠᤛᤡᤱ ᤕᤧ॥ 6 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ. “ᤀᤠᤸᤗ ᤁᤴ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤗᤳᤇᤠ ᤛᤢᤘᤠᤱ ᤜᤧᤰᤁᤣ ᤗᤳᤇᤠ ᤐᤖᤡᤰᤗᤧᤴ ᤐᤠ᤺ᤴᤍᤠᤱ ᤔᤧᤒᤠ᤺ᤳᤋᤠᤱ ᤀᤠᤸᤗᤥ ᤁᤴ ᤔᤧᤈᤥᤃᤢᤏᤧᤑᤠᤃᤪ. ᤀᤠᤸᤗ ᤂᤧᤱᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤠᤴ ᤌᤣᤛᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤖᤥ॥ 7 ᤐᤣᤃᤡ. ᤀᤠᤏᤡ᤹ ᤕᤥ ᤌᤩᤧ᤹ᤀᤡᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤑᤥ᤺ᤳᤋᤢᤶ ᤐᤡᤖᤢᤶᤛᤡᤶ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤠ᤺ᤳᤋᤡᤸᤗᤧ ᤂᤢᤴᤇᤡ᤹ ᤐᤠᤴ ᤔᤧᤍᤱᤏᤧᤸᤗ॥” 8 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤂᤧ᤹ᤕᤥᤗᤠᤶ ᤂᤧᤱᤜᤠ᤹ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤧᤛᤢᤍᤣᤛᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤕᤧᤰᤕ᤺ᤰᤁᤡᤴ ᤆᤥ᤺ᤰᤔᤠ ᤔᤧᤏᤠ᤹ᤖᤢ॥ 9 ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤋᤧᤴᤏᤡᤴ ᤒᤠᤒᤣᤗ ᤔᤧᤔᤧᤳᤋᤢ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤵᤔᤥᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤜᤠ᤹ ᤑᤥ᤺ᤳᤋᤢ ᤐᤡᤖᤢᤛᤡᤀᤠᤱ ᤘᤕᤧ॥ ᤜᤧᤰᤁᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤧᤛᤢᤍᤣᤛᤢᤛᤡᤖᤥ॥ ᤛᤣᤔᤧᤸᤗᤧ ᤁᤢᤛ᤻ᤛᤠ ᤁᤢᤶᤔᤧᤴᤇᤠ᤹ᤜᤠ᤹ ( ᥇ ᤛᤠᤵᤔᤢ ᥇:᥈᥊-᥈᥍ ) 10 ᤛᤣᤔᤧᤸᤗᤧ ᤁᤢᤛ᤻ᤛᤠ ᤁᤢᤶᤔᤧᤴᤇᤠ᤹ᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶᤔᤡᤴ ᤜᤠᤒᤠ ᤁᤴᤗᤥ॥ ᤘᤍᤵᤔᤠ ᤌᤠᤅᤧᤀᤠᤱ ᤘᤕᤧᤒᤠ ᤋᤱᤒᤣ ᤏᤧᤳᤇᤡ ᤀᤣᤃᤠᤱ ᤛᤣᤔᤧᤴ ᤁᤡᤵ ᤌᤡᤰ ᤋᤱᤒᤣ ᤁᤧᤖᤧᤸᤗᤧ ᤂᤢᤏᤧ᤹ ᤀᤷᤐᤰᤇᤩᤍᤧᤴ ᤁᤳᤋᤢ॥ 11 ᤀᤷᤐᤰᤇᤩᤍᤧᤴ ᤘᤕᤧᤀᤠᤱ ᤛᤣᤔᤧᤴ ᤕᤠᤶᤔᤥ ᤁᤡᤵ ᤅᤠᤛᤡ ᤋᤱᤒᤣ ᤌᤠᤖᤡᤰ ᤜᤡᤅᤧ ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠᤜᤠ᤹ ᤔᤧᤘᤕᤧ॥ 12 ᤀᤷᤐᤰᤇᤩᤍᤧᤴ ᤛᤢᤶᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤁᤧᤖᤧᤸᤗᤧ ᤂᤢᤏᤧ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤛᤣᤗᤜᤴ ᤁᤳᤋᤢ॥ 13 ᤛᤣᤗᤜᤴ ᤘᤕᤧᤀᤠᤱ ᤀᤷᤐᤰᤇᤩᤍᤧᤴ ᤕᤠᤶᤔᤥ ᤁᤡᤵ ᤗᤡᤛᤡᤀᤠᤱ ᤛᤢᤶᤛᤡ ᤋᤱᤒᤣ ᤜᤡᤅᤧ ᤜᤧᤰᤁᤩᤠᤱ ᤘᤣ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠᤜᤠ᤹ ᤔᤧᤘᤕᤧ॥ 14 ᤛᤣᤗᤜᤴ ᤛᤢᤶᤒᤥᤱ ᤋᤱᤒᤣ ᤁᤧᤖᤧᤸᤗᤧ ᤂᤢᤏᤧ᤹ ᤀᤣᤒᤣᤖᤧᤴ ᤁᤳᤋᤢ॥ 15 ᤀᤣᤒᤣᤖᤧᤴ ᤘᤕᤧᤀᤠᤱ ᤛᤣᤗᤜᤴ ᤕᤠᤶᤔᤥ ᤁᤡᤵ ᤗᤡᤛᤡᤀᤠᤱ ᤛᤢᤶᤛᤡ ᤋᤱᤒᤣ ᤌᤠᤖᤡᤰ ᤜᤡᤅᤧ. ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠᤜᤠ᤹ ᤔᤧᤒᤥ᤺ᤰᤂᤧ॥ 16 ᤀᤣᤒᤣᤖᤧᤴ ᤛᤢᤶᤒᤥᤱᤅᤠᤱ ᤗᤡᤛᤡ ᤋᤱᤒᤣ ᤁᤧᤖᤧᤸᤗᤧ ᤂᤢᤏᤧ᤹ ᤐᤣᤗᤣᤃᤧᤴ ᤁᤳᤋᤢ॥ 17 ᤐᤣᤗᤣᤃᤧᤴ ᤘᤕᤧᤀᤠᤱ ᤀᤣᤒᤣᤖᤧᤴ ᤕᤠᤶᤔᤥ ᤁᤡᤵ ᤗᤡᤛᤡᤀᤠᤱ ᤛᤢᤶᤒᤥᤱ ᤋᤱᤒᤣ ᤜᤡᤅᤧ. ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠᤜᤠ᤹ ᤔᤧᤒᤥ᤺ᤰᤂᤧ॥ 18 ᤐᤣᤗᤣᤃᤧᤴ ᤛᤢᤶᤒᤥᤱ ᤋᤱᤒᤣ ᤁᤧᤖᤧᤸᤗᤧ ᤂᤢᤏᤧ᤹ ᤖᤀᤢᤴ ᤁᤳᤋᤢ॥ 19 ᤖᤀᤢᤴ ᤘᤕᤧᤀᤠᤱ ᤐᤣᤗᤣᤃᤧᤴ ᤕᤠᤶᤔᤥ ᤁᤡᤵ ᤏᤧᤳᤇᤡᤀᤠᤱ ᤑᤠᤱᤛᤡ ᤋᤱᤒᤣ ᤌᤠᤖᤡᤰ ᤜᤡᤅᤧ. ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠᤜᤠ᤹ ᤔᤧᤒᤥ᤺ᤰᤂᤧ॥ 20 ᤖᤀᤢᤴ ᤛᤢᤶᤒᤥᤱᤅᤠᤱ ᤏᤧᤳᤇᤡ ᤋᤱᤒᤣ ᤁᤧᤖᤧᤸᤗᤧ ᤂᤢᤏᤧ᤹ ᤛᤖᤢᤃᤧᤴ ᤁᤳᤋᤢ॥ 21 ᤛᤖᤢᤃᤧᤴ ᤘᤕᤧᤀᤠᤱ ᤖᤀᤢᤴ ᤕᤠᤶᤔᤥ ᤁᤡᤵ ᤏᤧᤳᤇᤡᤀᤠᤱ ᤏᤢᤛᤡ ᤋᤱᤒᤣ ᤌᤠᤖᤡᤰ ᤜᤡᤅᤧ. ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠᤜᤠ᤹ ᤔᤧᤒᤥ᤺ᤰᤂᤧ॥ 22 ᤛᤖᤢᤃᤧᤴ ᤛᤢᤶᤒᤥᤱ ᤋᤱᤒᤣ ᤕᤥᤖᤧᤸᤗᤧ ᤂᤢᤏᤧ᤹ ᤏᤠᤜᤥᤖᤧᤴ ᤁᤳᤋᤢ॥ 23 ᤏᤠᤜᤥᤖᤧᤴ ᤘᤕᤧᤀᤠᤱ ᤛᤖᤢᤃᤧᤴ ᤕᤠᤶᤔᤥ ᤁᤡᤵ ᤏᤧᤳᤇᤡ ᤋᤱᤒᤣ ᤌᤠᤖᤡᤰ ᤜᤡᤅᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠᤜᤠ᤹ ᤔᤧᤒᤥ᤺ᤰᤂᤧ॥ 24 ᤏᤠᤜᤥᤖᤧᤴ ᤏᤡᤒᤥᤱᤅᤠᤱ ᤑᤠᤱᤛᤡ ᤋᤱᤒᤣ ᤁᤧᤖᤧᤸᤗᤧ ᤂᤢᤏᤧ᤹ ᤋᤣᤖᤜᤴ ᤁᤳᤋᤢ॥ 25 ᤋᤣᤖᤜᤴ ᤘᤕᤧᤀᤠᤱ ᤏᤠᤜᤥᤖᤧᤴ ᤕᤠᤶᤔᤥ ᤁᤡᤵ ᤌᤡᤰ ᤜᤧᤰᤁᤩᤠᤱ ᤌᤡᤒᤥᤱᤅᤠᤱ ᤑᤠᤱᤛᤡ ᤋᤱᤒᤣ ᤜᤡᤅᤧ. ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠᤜᤠ᤹ ᤔᤧᤒᤥ᤺ᤰᤂᤧ॥ 26 ᤋᤣᤖᤜᤴ ᤏᤢᤒᤥᤱ ᤋᤱᤒᤣ ᤁᤧᤖᤧᤸᤗᤧ ᤂᤢᤏᤧ᤹ ᤀᤒᤪᤠᤔ. ᤏᤠᤜᤥᤖ ᤏᤢ ᤜᤠᤖᤠᤴᤏᤧᤴ ᤁᤳᤋᤢᤛᤡ॥ ᤋᤣᤖᤜ᤺ᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ 27 ᤋᤣᤖᤜᤖᤧ ᤁᤢᤛ᤻ᤛᤠ ᤁᤢᤶᤔᤧᤴᤇᤠ᤹ᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶᤔᤡᤴ— ᤋᤣᤖᤜ᤺ᤸᤗᤧ ᤀᤒᤪᤠᤔ. ᤏᤠᤜᤥᤖ ᤏᤢ ᤜᤠᤖᤠᤏᤧᤴ ᤁᤳᤋᤢᤛᤡ॥ ᤜᤧᤰᤁᤩᤠᤱ ᤜᤠᤖᤠᤏᤧᤸᤗᤧ ᤗᤢᤋᤧᤴ ᤁᤳᤋᤢ॥ 28 ᤋᤣᤖᤜᤴ ᤔᤧᤴᤇᤡᤀᤣ ᤘᤕᤧᤸᤗᤧᤛᤠ ᤜᤠᤖᤠᤏᤧᤴ ᤛᤠᤘᤠ᤺ᤴᤇᤡᤱᤒᤠ ᤁᤸᤍᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ ᤀᤢᤖᤀᤥ ᤔᤠᤛᤡᤱ॥ 29 ᤀᤒᤪᤠᤔ ᤏᤢ ᤏᤠᤜᤥᤖ ᤏᤧᤵᤔᤈᤠᤱᤗᤧ ᤔᤣ᤺ᤳ ᤋᤠᤖᤧᤛᤢᤀᤠᤱ ᤋᤧᤴᤎᤠᤶ ᤔᤣ᤺ᤰᤂᤡᤶ ᤆᤥᤃᤧᤳᤇᤢ॥ ᤀᤒᤪᤠᤶᤔᤡᤸᤗᤧ ᤁᤢᤔᤣ᤺ᤳᤋᤡᤸᤗᤧ ᤁᤢᤔᤡᤱ ᤛᤠᤖᤠᤀᤡ ᤘᤕᤧ. ᤜᤧᤰᤁᤩᤠᤱ ᤏᤠᤜᤥᤖᤧᤸᤗᤧ ᤁᤢᤔᤣ᤺ᤳᤋᤡᤸᤗᤧ ᤁᤢᤔᤡᤱ ᤔᤡᤸᤁᤠ ᤘᤕᤧ॥ ᤔᤡᤸᤁᤠᤴ ᤜᤠᤖᤠᤏᤧᤸᤗᤧ ᤁᤢᤛ᤻ᤛᤠ ᤘᤕᤧ॥ ᤜᤠᤖᤠᤏᤧᤴ ᤔᤡᤸᤁᤠ ᤏᤢ ᤕᤡᤛ᤻ᤁᤠᤖᤧ ᤂᤢᤴᤇᤡ᤹ ᤐᤠ ᤘᤕᤧ॥ 30 ᤛᤠᤖᤠᤀᤡᤴ ᤛᤠᤔᤧᤱᤃᤵᤔᤏᤠᤔᤠ ᤘᤕᤧ. ᤂᤧᤸᤗᤧ ᤌᤡᤰᤁᤠᤱ ᤁᤢᤛ᤻ᤛᤠ ᤔᤧᤜᤥ᤺ᤵᤋᤧ॥ 31 ᤋᤣᤖᤜᤖᤧ ᤁᤢᤛ᤻ᤛᤠ ᤀᤒᤪᤠᤶᤔᤧᤴ ᤏᤢ ᤁᤢᤶᤒᤠᤱᤗᤡ ᤛᤠᤖᤠᤀᤡᤴ ᤜᤧᤰᤁᤩᤠᤱ ᤜᤠᤖᤠᤏᤧᤸᤗᤧ ᤁᤢᤛ᤻ᤛᤠ ᤂᤢᤏᤧ᤹ ᤁᤢᤶᤔᤧᤴᤇᤠ᤹ ᤗᤢᤋᤧᤴ ᤋᤣ᤹ᤖᤢᤛᤡᤀᤠᤱ ᤁᤏᤠᤏ ᤗᤠᤈᤣ᤹ᤀᤥ ᤐᤣ᤺ᤰᤔᤠᤖᤧ ᤗᤠᤃᤡ ᤁᤸᤍᤡᤜᤠ᤹ᤖᤧ ᤂᤢᤴᤇᤡ᤹ ᤀᤢᤖ ᤗᤠᤈᤣᤴ ᤔᤧᤗᤧᤖᤢᤀᤠᤱ ᤔᤧᤗ᤺ᤴᤍᤧ॥ ᤁᤖ ᤂᤧᤱᤜᤠ᤹ ᤜᤠᤖᤠᤏ ᤗᤠᤈᤣ᤹ᤀᤥ ᤔᤧᤃᤧᤖᤧᤀᤠᤱᤃ ᤜᤠᤒᤠ ᤂᤧᤵᤔᤥᤀᤣ ᤕᤢᤱᤔᤠ ᤔᤧᤜᤣ᤺ᤰᤋᤧ॥ 32 ᤋᤣᤖᤜᤴ ᤁᤡᤵ ᤏᤧᤳᤇᤡᤀᤠᤱ ᤋᤱᤒᤣ ᤅᤠᤛᤡ ᤜᤡᤅᤧ. ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤖᤠᤴᤏᤥ ᤔᤠᤛᤡᤱ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.