ᤃᤗᤠᤋᤡ 6 - LIFOTNT

ᤑᤠ᤹ᤀᤠᤛᤡᤶᤔᤧ᤹

¹ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤏᤢᤛᤠ᤹ᤎᤡᤰ ᤗᤠᤕᤥᤀᤥ ᤌᤠ᤺ᤸᤗᤧ ᤂᤡᤏᤡ᤹ ᤛᤣᤛᤣᤔᤠᤱᤅᤡᤸᤗᤧ ᤗᤠᤶᤃᤧᤗᤥᤛᤡᤒᤠᤜᤠ᤹ᤖᤧ ᤏ᤺ᤶᤏ᤺ᤶᤔᤠᤱ ᤂᤧᤴ ᤋᤥ᤺ᤴᤍᤧᤶᤔᤧ᤹ᤀᤥ॥ ᤁᤖ ᤜᤧᤰᤁᤣ ᤁᤧᤈᤥᤃᤢᤶᤔᤡᤸᤗᤧ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤔᤣ᤺ᤴᤏᤣ ᤑᤠ᤹ᤃᤪ ᤂᤡᤏᤡ᤹ᤀᤠᤱ ᤗᤠᤕᤥᤀᤥ ᤌᤠ᤺ᤔᤠ ᤁᤧᤛᤢᤰᤋᤡ᤹ᤖᤥ॥

² ᤀᤡᤏᤥᤃᤧᤴ ᤋᤢᤰᤂᤣᤀᤥ ᤑᤠ᤹ᤀᤠᤛᤡᤶᤔᤧ᤹ᤀᤥ॥ ᤀᤰᤂᤣᤗ᤹ᤖᤡᤰ ᤂᤪᤡᤛ᤻ᤋᤖᤧ ᤀᤠᤒᤡᤖᤧᤒᤠ ᤛᤠᤶᤕᤥᤌᤡᤶᤔᤡᤴ ᤁᤧᤃᤧᤳᤋᤢᤶᤗᤥ॥

³ ᤂᤧᤏᤧ᤹ ᤁᤧᤕᤧᤰᤐᤠ ᤁᤧᤴᤈᤥ᤺ᤰᤏᤧᤴᤇᤠᤱ ᤘᤣ᤹ᤜᤠ᤹ ᤁᤢᤓᤠ᤹ ᤐᤡᤔᤠᤛᤡᤀᤥ ᤘᤣ᤹ ᤔᤏᤠᤜᤠ᤹ᤏᤢ᤺ᤸᤗᤧ ᤁᤧᤕᤧᤰᤐᤠ ᤆᤥ᤺ᤰᤁᤠ ᤗ᤹ᤖᤡᤰ ᤏᤡᤱᤘᤠ᤹ ᤁᤧᤀᤡ᤺ᤳᤇᤡᤱᤏᤧ ᤑᤠ᤹ᤃᤪ ᤀᤠᤒᤠᤅᤣ ᤀᤡᤱᤃᤧᤗᤧᤰᤛᤡᤱᤗᤥ॥

⁴ ᤁᤖ ᤂᤡᤏᤡ᤹ ᤜᤡᤱᤔᤴᤏᤥ ᤁᤧᤈᤥᤃᤢᤶᤒᤠ ᤕᤠ᤺ᤶᤒᤰᤁᤡᤴ ᤁᤧᤖᤧᤰᤗᤧ ᤀᤠᤒᤠᤅᤣ ᤁᤧᤛᤠ᤹ᤖᤢᤶᤗ ᤐᤥᤱ. ᤜᤧᤰᤁᤩᤠᤱ ᤘᤣ᤹ᤜᤠ᤹ᤏᤢ ᤔᤧᤴᤍᤱᤛᤡᤱᤅᤣ ᤂᤡᤏᤡ᤹ ᤏᤢᤖᤡᤰᤁᤠᤱ ᤁᤧᤈᤥᤃᤢᤶᤒᤠ ᤕᤠ᤺ᤶᤒᤰᤁᤥ ᤂᤡᤏᤡ᤹ ᤏᤡᤱᤘᤠ᤹ ᤋᤠᤖᤥ॥

⁵ ᤌᤣᤀᤠᤱᤓᤧᤸᤗᤧ ᤁᤧᤖᤧᤰᤗᤧ ᤁᤢᤔᤠ ᤁᤧᤒᤥᤱᤒᤠ ᤗᤰᤐᤧᤴᤖᤧᤴ ᤁᤰᤜᤠ᤹ ᤀᤠᤒᤠᤅᤣ ᤁᤢᤔᤠᤀᤣ ᤐᤥᤱᤗᤥ॥

⁶ ᤐᤠ᤺ᤴᤈᤠᤰ ᤁᤧᤜᤢ᤹ᤛᤡᤱᤒᤠᤸᤗᤧ ᤂᤢᤏᤧ᤹ ᤁᤳᤋᤢᤒᤠ ᤁᤠᤰ ᤏᤢᤒᤠ ᤐᤠ᤺ᤴᤜᤠ᤹ ᤁᤢᤛᤡᤰᤛᤠᤶᤒᤠᤜᤠ᤹ᤏᤢ ᤜᤠᤔᤠ ᤐᤥᤱᤗᤥ॥

⁷ ᤂᤡᤏᤡ᤹ ᤀᤡᤱᤔᤧᤗᤧᤰᤁᤠᤛᤡᤶᤔᤡᤴᤏᤧ᤹ᤀᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤡᤏᤠ᤺ᤴᤍᤡ ᤐᤡᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥ ᤔᤏᤠ᤺ᤸᤗᤧ ᤌᤧᤔᤠ᤺ᤴ ᤋᤣᤛᤢ᤹. ᤜᤠᤒᤠ ᤂᤧᤴ ᤛᤢᤵᤛᤢ᤹ᤖᤥ॥

⁸ ᤀᤠᤳᤋᤡᤴ ᤔᤏᤠ᤺ᤸᤗᤧ ᤗᤠᤕᤥᤒᤠ ᤁᤢᤏᤡᤱᤘᤠ᤹ᤀᤡᤴ ᤁᤢᤏᤡᤱᤘᤠ᤹ ᤋᤠᤔᤠᤀᤥᤖᤰ ᤋᤣᤛᤢ᤹. ᤂᤧᤸᤗᤧ ᤗᤠᤕᤥᤒᤠ ᤁᤢᤏᤡᤱᤘᤠ᤹ᤗᤠᤶ ᤛᤡᤔᤧᤴ ᤛᤢᤵᤛᤢ᤹ᤖᤥ॥ ᤁᤖ ᤀᤠᤳᤋᤡᤴ ᤔᤏᤠ᤺ᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤔᤠᤀᤥ ᤋᤣᤛᤢ᤹. ᤂᤧᤸᤗᤧᤃ ᤛᤣᤛᤣᤔᤠᤱᤗᤠᤶ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤛᤢᤵᤛᤢ᤹ᤖᤥ॥

⁹ ᤀᤠᤏᤡ᤹ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤥ ᤏᤠ᤺ᤛ᤻ᤛᤡ ᤔᤣ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤀᤠᤸᤗᤧᤖᤢᤶᤔᤡᤴᤏᤧ ᤑᤠ᤹ᤃᤪ ᤛᤢᤕᤧᤶᤔᤥ ᤀᤠᤏᤡ᤹ ᤔᤢ᤹ᤀᤡᤛᤠᤶ ᤀᤠᤛᤢᤵᤛᤢᤶᤗᤥ॥

¹⁰ ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡ᤹ ᤛᤢᤕᤧᤶ ᤀᤠᤄᤥᤛᤢᤶᤔᤡᤸᤗᤧ ᤁᤠᤰ ᤔᤏᤠᤜᤠ᤹ ᤏᤢᤖᤡᤰ ᤔᤧᤵᤔᤠᤛᤡ ᤐᤥᤱᤗᤥ॥ ᤁᤢᤏᤥ-ᤁᤢᤒᤡ᤹ᤀᤥᤃ ᤀᤠᤏᤡ᤹ ᤏᤛᤠᤏᤡᤒᤠ ᤜᤡᤶᤛᤕᤱᤜᤠ᤹ ᤏᤢᤖᤡᤰ ᤔᤧᤵᤔᤠᤛᤡ ᤐᤥᤱᤗᤥ॥

ᤐᤠᤘᤗᤖᤧ ᤃᤗᤠᤋᤡᤜᤠ᤹ ᤐᤡᤖᤢᤛᤡᤒᤠ ᤛᤢᤈᤠ

¹¹ ᤀᤥᤔᤧᤳᤋᤧᤶᤔᤧ᤹ᤀᤥ. ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤜᤢᤰᤁᤡᤸᤗᤧ ᤕᤶᤒᤕᤶᤒᤠ ᤛᤰᤛᤣ᤹ᤜᤠ᤹ᤀᤥ ᤁᤴ ᤁᤢᤏᤢᤵ ᤐᤠ᤺ᤴᤜᤠ᤹ ᤛᤠᤵᤋᤢᤱᤒᤠᤖᤥ॥

¹² ᤂᤧᤴ ᤜᤷᤍᤥ ᤜᤧᤰᤔᤠ ᤁᤧᤒᤠᤱᤒᤠᤜᤠ᤹ᤖᤧ ᤘᤣ᤹ᤜᤠ᤹ᤖᤧ ᤏᤢᤒᤠ ᤔᤧᤏᤡᤛᤡᤃᤧᤖ ᤑᤠ᤹ᤀᤠᤱ ᤜᤧᤰᤁᤣ ᤔᤧᤈᤥᤃᤢᤒᤠᤖᤥ॥ ᤂᤪᤡᤛ᤻ᤋᤖᤧ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤀᤡᤱᤓᤥᤔᤠᤸᤗᤧ ᤁᤧᤍᤠᤒᤠ ᤋᤢᤰᤂᤣᤴ ᤔᤧᤃᤡᤖᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤜᤷᤍᤥ ᤜᤧᤰᤔᤠ ᤁᤧᤶᤒᤠᤱᤄᤡᤒᤠᤖᤥ॥

¹³ ᤁᤖ ᤂᤧᤴ ᤜᤷᤍᤥ ᤁᤧᤜᤧᤰᤐᤠᤜᤠ᤹ᤖᤧ ᤀᤠᤒᤠᤅᤣᤀᤠᤱ ᤛᤠᤶᤕᤥᤌᤡᤶᤔᤡᤴ ᤔᤧᤴᤏᤠ᤺ᤳᤋᤢᤴᤗᤥ॥ ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤀᤠᤱᤍᤡᤱ ᤗ᤹ᤔᤠ ᤔᤧᤄᤥᤖ ᤑᤠ᤹ᤀᤠᤱ ᤜᤷᤍᤥ ᤜᤧᤰᤔᤠ ᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤶᤒᤠᤱᤄᤡ᤹ᤖᤥ॥

¹⁴ ᤁᤖ ᤀᤡᤱᤃᤠ᤹ᤃ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤛᤡᤗᤠᤶᤛᤠᤰᤔᤠ ᤁᤢᤛᤡᤱᤅᤡᤴᤏᤢ᤺ᤸᤗᤧ ᤘᤣ᤹ ᤌᤧᤔᤠᤀᤥᤀᤠᤱ ᤀᤠᤱᤍᤡᤱ ᤔᤧᤗ᤹ᤀᤠᤴᤗᤥ॥ ᤂᤪᤡᤛ᤻ᤋᤧᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤛᤩᤧᤒᤠᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤀᤠᤗᤠᤃᤡ ᤌᤣᤀᤠᤱ ᤔᤣ᤺ᤴᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡᤀᤠᤱ ᤀᤡᤱᤃᤠ᤹ ᤌᤣᤀᤠᤱ ᤔᤧ᤺ᤴᤏᤠᤖᤥ॥

¹⁵ ᤜᤷᤍᤥ ᤜᤧᤰᤔᤠᤛᤠᤱ ᤔᤧᤴᤜᤧᤰᤔᤠᤛᤠᤱ ᤌᤣᤀᤠᤱ ᤔᤧᤒᤥᤱᤏᤧᤸᤗᤥ. ᤁᤖ ᤁᤢᤛᤱ ᤔᤏᤠ ᤐᤥᤱᤔᤠᤴᤏᤣ ᤕᤶᤒᤠ ᤐᤠ᤺ᤴᤗᤥ॥

¹⁶ ᤁᤴ ᤐᤠ᤺ᤴᤏᤡᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤏᤠᤖᤢᤱ ᤁᤧᤒᤡᤖᤡᤖ ᤜᤧᤰᤁᤩᤠᤱ ᤗᤢᤱᤔᤠ᤹ ᤁᤧᤍᤢᤰᤋᤡᤖᤖᤥ॥ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤁᤢᤛᤱ ᤀᤡᤛᤪᤠᤀᤡᤗᤡᤛᤡᤖᤥ॥

¹⁷ ᤁᤢᤏᤢᤵᤔᤠᤀᤥ. ᤀᤡᤱᤃᤠ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤋᤢᤰᤂᤣ ᤔᤧᤴᤈᤠ᤺ᤳᤋᤠᤴᤗᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤕᤧᤛᤢᤖᤧ ᤁᤢᤕᤥ᤺ᤰᤐᤠᤀᤠ ᤑᤠ᤹ᤀᤠᤱ ᤏᤠᤛᤡᤱᤃᤧᤴ ᤀᤠᤎᤰᤁᤥ ᤔᤡᤰᤛᤣ᤺ᤴᤜᤠ᤹ ᤁᤳᤋᤢᤱᤗᤥ॥

¹⁸ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤔᤡᤴ ᤂᤡᤏᤡ᤹ᤏᤢ ᤘᤠ᤹ᤖᤖᤥ॥ ᤀᤠᤔᤧᤴ॥