ᤃᤗᤠᤋᤡ 5 - LIFOTNTᤂᤪᤡᤛ᤻ᤋᤖᤧ ᤆᤥ᤺ᤰᤕᤢᤶᤓᤥ ᤀᤠᤒᤡ᤹ 1 ᤂᤪᤡᤛ᤻ᤋᤖᤧ ᤛᤧᤰᤂᤠᤀᤣ ᤆᤥ᤺ᤰᤕᤢᤶᤓᤥ ᤀᤠᤒᤡᤖᤧᤀᤠᤱ ᤘᤠ᤹. ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤆᤥ᤺ᤰᤕᤢᤶᤓᤥᤀᤥ ᤔᤧᤶᤔᤢᤴᤏᤣ ᤘᤕᤧᤶᤔᤧ᤹. ᤜᤧᤰᤁᤩᤠᤱ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤥᤰ ᤕᤠᤶᤔᤥ ᤔᤧᤒᤥ᤺ᤰᤂᤧᤶᤔᤡᤴᤏᤧ᤹ᤀᤥ॥ 2 ᤀᤡᤱᤃᤠ᤹ ᤐᤠᤘᤗᤖᤧ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ᥄ ᤜᤷᤍᤥ ᤜᤧᤰᤔᤠᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤂᤡᤏᤡ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤐᤥᤱᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤂᤪᤡᤛ᤻ᤋᤖᤧ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤴ ᤂᤡᤏᤡ᤹ ᤗᤠᤃᤡ ᤜᤏᤧᤒᤠᤖᤰ ᤐᤥᤱᤗᤥ॥ 3 ᤀᤡᤱᤃᤠ᤹ ᤕᤠᤶᤔᤥ ᤔᤧᤳᤏᤡᤱ. ᤜᤷᤍᤥ ᤜᤧᤰᤔᤠᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤂᤡᤏᤡ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤐᤥᤱᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤛᤠᤶᤕᤥᤌᤡᤶᤔᤥ ᤁᤧᤒᤵᤐᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤗᤀᤣ ᤐᤥᤱᤗᤥ॥ 4 ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤐᤥᤱᤔᤠ ᤑᤠ᤹ᤀᤠᤱ ᤛᤠᤶᤕᤥᤌᤡᤶᤔᤡᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ ᤂᤪᤡᤛ᤻ᤋᤗᤠᤶ ᤁᤧᤛᤧᤴᤍᤡ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶ ᤔᤠ᤺ᤱᤄᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥ 5 ᤁᤖ ᤀᤠᤏᤡ᤹ ᤏᤛᤠ᤺ᤴᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤀᤠᤒᤥᤱ ᤁᤧᤗ᤹ᤒᤠ ᤏᤡᤱᤛᤠᤱᤅᤡᤴ ᤛᤣᤛᤣᤔᤠᤱᤅᤡᤸᤗᤧ ᤜᤠᤱᤔᤠ ᤀᤠᤓᤠ᤹ᤖᤥ॥ 6 ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤗᤠᤃᤡᤃ ᤜᤷᤍᤥ ᤜᤧᤰᤔᤠ ᤏᤢ ᤔᤧᤴᤜᤧᤰᤔᤠ ᤐᤠ᤺ᤴᤏᤡᤴ ᤌᤣᤀᤠᤱ ᤔᤣ᤺ᤴᤗᤥ॥ ᤁᤖ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤐᤠ᤺ᤴᤏᤡᤱᤃ ᤀᤠᤏᤡ᤹ ᤏᤛᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤘᤣ᤹ᤜᤠ᤹ ᤗᤢᤱᤔᤠ᤹ ᤀᤠᤍᤢᤰᤋᤢᤶᤛᤡᤶᤗᤥ॥ 7 ᤂᤡᤏᤡ᤹ᤃ ᤏᤢᤖᤡᤰᤁᤠᤱ ᤏᤛᤠᤴ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹. ᤁᤖ ᤛᤧᤰᤂᤠᤒᤠ ᤐᤠ᤺ᤴᤏᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤜᤠ᤺ᤳᤗᤧ ᤁᤧᤛᤠᤰᤋᤡᤒᤣ᥅ 8 ᤁᤴ ᤐᤠ᤺ᤴᤏᤡᤱᤃ ᤛᤧᤰᤂᤠᤛᤠᤱ ᤂᤡᤏᤡ᤹ ᤁᤧᤀᤢ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤧᤒᤠ ᤔᤣ᤺ᤴᤗᤥ॥ 9 ᤂᤖᤧ᤺ᤱ ᤁᤧᤓᤱᤒᤠ ᤆᤩ᤹ᤛᤡᤰ ᤛᤡᤍᤠ᤹ᤀᤡᤸᤗᤧ ᤁᤧᤖᤧᤰ ᤑᤣ᤹ᤖᤢᤶᤔᤡᤴ ᤕᤢᤰᤋᤢᤒᤠ ᤁᤢᤀᤡᤛᤡᤰ ᤗᤳᤇᤠ ᤀᤡᤱᤗᤧᤰᤐᤠ ᤐᤠ᤺ᤴᤏᤡᤸᤗᤧ ᤕᤖᤡᤰ ᤔᤏᤠᤜᤠ᤹ ᤑᤧᤳᤗᤠ᤺ᤴᤍᤢᤛᤡ᤹ᤖᤥ॥ 10 ᤂᤧᤴ ᤀᤡᤱᤗᤧᤰᤐᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤏᤛᤠᤴ ᤁᤧᤴᤈᤥᤃᤢᤶᤔᤡᤴ ᤑᤠ᤹ᤀᤠᤱ ᤍᤠᤱᤒᤠᤴ ᤋᤠ᤺ᤰᤐᤥ ᤆᤥᤃᤢᤱᤗᤥ॥ ᤏᤡᤱᤘᤠ᤹ ᤁᤧᤓᤥ᤺ᤵᤐᤠ ᤏᤢ ᤋᤢᤰᤂᤣ ᤁᤧᤈᤠ᤺ᤵᤐᤠ ᤀᤠᤳᤋᤡᤴᤇᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤖᤢ᤹ᤖᤥ॥ 11 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤁᤢᤓᤠᤖᤧ ᤔᤧᤒᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤀᤡᤱᤃᤠ᤹ ᤀᤠᤸᤗᤛᤠᤱ ᤜᤷᤍᤥ ᤜᤧᤰᤔᤠᤀᤣ ᤐᤥᤱ ᤗ᤹ᤖᤡᤰ ᤀᤡᤱᤓᤴ ᤆᤥᤃᤢᤱᤅᤡᤸᤗᤧ ᤌᤣᤀᤠᤱ ᤔᤏᤠᤜᤠ᤹ᤖᤧ ᤀᤡᤱᤃᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤠᤒᤠᤒᤣ᥅ ᤀᤡᤱᤃᤠ᤹ ᤂᤪᤡᤛ᤻ᤋᤖᤧ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤁᤥᤗᤠᤶ ᤛᤧᤴᤗᤵ ᤂᤥᤍᤧᤳᤗᤥ ᤗ᤹ᤖᤡᤰ ᤀᤡᤱᤓᤴ ᤔᤧᤈᤥᤃᤢᤱᤅᤡᤴᤏᤧ ᤑᤠ᤹ᤃᤪ ᤀᤠᤳᤋᤡᤸᤗᤧᤀᤠᤱ ᤁᤢᤛᤡᤰ ᤔᤧᤄᤧᤅᤧᤴᤒᤠᤔᤧᤴ॥ 12 ᤂᤡᤏᤡ᤹ ᤏᤡᤱᤘᤠ᤹ ᤑᤧᤳᤁᤧᤗᤠ᤺ᤶᤒᤠᤜᤠ᤹ᤖᤧᤃ ᤜᤷᤍᤥ ᤜᤧᤰᤔᤠᤖᤰ ᤔᤣ᤺ᤴ. ᤁᤖ ᤁᤢᤒᤢᤱ ᤌᤧᤖᤧ᤺ᤵ ᤔᤧᤜᤧᤃᤢᤛᤠᤱ ᤐᤥᤱᤒᤠᤖᤥ॥ 13 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥ᤺ᤰᤕᤢᤶᤓᤥ ᤐᤥᤱᤛᤧ ᤁᤧᤀᤢ᤺ᤳᤋᤡᤀᤠᤱ ᤁᤧᤘᤕᤡ᤹॥ ᤂᤧᤱᤃ ᤗᤠᤕᤥᤒᤠ ᤏᤡᤱᤘᤠ᤹ᤀᤡᤸᤗᤧ ᤔᤢᤖᤠ ᤁᤧᤔᤧᤳᤋᤡᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤕᤠᤶᤍᤠᤍᤠ ᤆᤥ᤺ᤰᤔᤠᤖᤧ ᤗᤠᤃᤡ ᤔᤣ᤺ᤴᤗᤥ. ᤁᤖ ᤗᤢᤱᤔᤠ᤹ ᤋᤢᤰᤛᤡᤱᤔᤠᤀᤠᤱ ᤁᤢᤓᤠ᤹ ᤐᤡᤛᤡᤱᤔᤠᤖᤧ ᤗᤠᤃᤡᤏᤧᤖᤥ॥ 14 ᤌᤣᤀᤠᤱᤓᤧᤸᤗᤧ ᤁᤠᤰ ᤛᤠᤶᤕᤥᤌᤡᤶᤔᤡᤴ ᤗᤳᤇᤠ ᤀᤡᤱᤈᤠᤱᤅᤥ ᤁᤧᤖᤧᤀᤠᤱ ᤘᤠ᤹ᤖᤥ. “ᤀᤠᤒᤠᤅᤣ ᤗᤢᤱᤔᤠ᤹ ᤁᤧᤍᤢᤰᤛᤡᤱᤒᤠ ᤁᤢᤀᤡᤛᤡᤰ ᤁᤧᤒᤠᤱᤓᤣ᤹ᤛᤠᤒᤠᤴ ᤗᤢᤱᤔᤠ᤹ ᤋᤢᤰᤋᤧ᤹ᤀᤥ॥” 15 ᤁᤖ ᤂᤡᤏᤡ᤹ ᤁᤧᤜᤠ᤹ᤀᤠᤛᤡ ᤁᤧᤕᤧ᤺ᤱᤅᤠᤛᤡᤸᤗᤧᤃ ᤔᤧᤒᤥᤱᤏᤧᤸᤗᤥ. ᤁᤖ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤔᤣ᤺ᤴᤏᤣ ᤑᤠ᤹ᤃᤪ ᤀᤠᤒᤠᤅᤣ ᤁᤧᤔᤧᤱᤅᤠᤛᤡ᤹ᤖᤥ॥ ᤛᤣᤛᤣᤔᤠᤱᤗᤠᤶᤒᤠ ᤜᤡᤱᤔᤠ 16 ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ ᤀᤰᤂᤣ ᤔᤧᤳᤏᤡᤱ. ᤛᤣᤛᤣᤔᤠᤱᤅᤡᤸᤗᤧ ᤗᤠᤶᤃᤧᤗᤥᤛᤡᤒᤠ ᤁᤢᤀᤡᤛᤡᤰ ᤘᤕᤧᤶᤔᤧ᤹ᤀᤥ. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤗᤠᤕᤥᤒᤠ ᤏᤡᤱᤘᤠ᤹ᤀᤡᤸᤗᤧ ᤏᤡᤱᤘᤠ᤹ ᤆᤥᤃᤢᤒᤠ ᤐᤠ᤺ᤴᤏᤡᤴ ᤁᤧᤴᤈᤥᤃᤢᤶᤔᤡᤴᤗᤥ॥ 17 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤗᤠᤕᤥᤒᤠ ᤏᤡᤱᤘᤠ᤹ᤀᤡᤴ ᤛᤣᤛᤣᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ. ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤴᤏᤠᤱ ᤗᤠᤕᤥᤒᤠ ᤏᤡᤱᤘᤠ᤹ᤀᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤧᤍᤱᤛᤡᤴᤗᤥ॥ ᤜᤧᤰᤁᤣᤗ᤹ᤖᤡᤰ ᤆᤥ᤺ᤰᤔᤠ ᤁᤧᤀᤡ᤺ᤳᤋᤢᤶᤒᤠ ᤏᤢᤒᤠ ᤕᤠ᤺ᤶᤒᤰᤜᤠ᤹ ᤛᤍᤠᤍᤡᤱ ᤁᤧᤴᤈᤥᤃᤢᤶᤔᤡᤴᤗᤥ॥ 18 ᤁᤖ ᤛᤣᤛᤣᤔᤠᤱᤅᤡᤸᤗᤧ ᤗᤠᤶᤃᤧᤗᤥᤛᤡᤒᤠ ᤁᤢᤀᤡᤛᤡᤰ ᤁᤧᤘᤕᤡ᤹ᤏᤧ ᤑᤠ᤹ᤃᤪ ᤀᤰᤂᤣ ᤜᤧᤰᤁᤣ ᤆᤥᤃᤧ᤹ ᤑᤠ᤹ᤀᤠᤱ ᤔᤧᤶᤔᤧᤳᤋᤣ ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤁᤧᤖᤧᤰ ᤂᤡᤏᤡ᤹ ᤀᤠᤒᤠᤅᤣ ᤁᤧᤈᤥᤃᤢᤶᤗᤥ॥ 19 ᤗᤠᤕᤥᤒᤠ ᤏᤡᤱᤘᤠ᤹ᤗᤠᤶ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤜᤠ᤹ ᤏᤡᤎᤠ᤺ᤵᤗᤥ॥ ᤂᤧᤱᤜᤠ᤹ᤖᤧ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢ᤹. ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤔᤧᤈᤥᤃᤢ᤹. ᤛᤡᤖᤡᤱ ᤀᤠᤔᤔᤒᤠ ᤕᤠ᤺ᤶᤒᤰ ᤔᤧᤈᤥᤃᤢ᤹. 20 ᤏᤠᤘᤠᤀᤡᤳᤗᤠᤴ ᤛᤧᤘᤠ ᤔᤧᤈᤥᤃᤢ᤹. ᤁᤡᤳᤆᤠᤰ ᤔᤧᤈᤥᤃᤢ᤹. ᤔᤏᤠᤜᤠ᤹ ᤔᤧᤈᤡ᤺ᤳᤋᤢᤛᤡ᤹. ᤂᤧᤔᤠ᤹ ᤔᤧᤓᤥ᤺ᤰᤂᤢ᤹. ᤔᤏᤠᤜᤠ᤹ ᤏᤠᤔᤧᤜᤧᤳᤋᤢᤛᤡ᤹. ᤂᤢᤏᤡ᤹ ᤛᤡᤰ ᤐᤥᤰ. ᤀᤠᤏᤡᤃᤧᤖᤰ ᤆᤥᤃᤢᤶᤒᤧ ᤐᤠ᤺ᤳᤋᤢᤶᤒᤧ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢ᤹. ᤀᤣ᤺ᤰ ᤛᤧᤴᤇᤡᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢ᤹. ᤌᤢᤰᤛᤡᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢ᤹. 21 ᤘᤣ᤹ᤜᤠ᤹ᤖᤧ ᤔᤧᤈᤥᤃᤢ ᤔᤧᤈᤒᤠᤴ ᤀᤥᤔᤧᤵᤔᤠ ᤔᤧᤴᤇᤢᤰᤋᤢᤴ. ᤌᤡ᤺ᤸᤗᤧ ᤔᤛᤡᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢ᤹. ᤕᤠᤶᤍᤠᤍᤠ ᤑᤧᤴ ᤕᤠ᤺ᤶᤒᤰ ᤔᤧᤈᤥᤃᤢ᤹. ᤜᤧᤰᤁᤩᤠᤱ ᤒᤠᤜᤧᤰᤋᤱᤒᤠ ᤘᤣ᤹ ᤕᤠ᤺ᤶᤒᤰᤜᤠ᤹ ᤔᤧᤈᤥᤃᤢ᤹ᤖᤥ॥ ᤋᤃᤡᤒᤠ ᤁᤢᤀᤡᤛᤡᤰ ᤛᤠᤶᤍᤡᤱ ᤐᤡᤏᤡᤱᤗᤥ. ᤀᤰᤋᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤰ ᤂᤥᤔᤠ ᤔᤧᤴᤇᤢᤰᤋᤢᤴᤗᤥ॥ 22 ᤁᤖ ᤛᤣᤛᤣᤔᤠᤱᤅᤡᤸᤗᤧ ᤗᤠᤶᤗᤥᤛᤢᤛᤡᤒᤠ ᤔᤏᤠᤜᤠ᤹ᤖᤧ ᤘᤣ᤹ᤜᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤢᤛᤡ᤹. ᤂᤧᤱᤜᤠ᤹ ᤔᤧᤛ᤺ᤳ. ᤛᤏᤠᤖᤢᤱᤅᤥ ᤔᤧᤘᤠ᤹. ᤏᤠᤛᤡ ᤔᤧᤎ᤺ᤳ. ᤂᤧᤱᤜᤠ᤹ᤖᤧ ᤘᤣ᤹ᤜᤠ᤹ ᤏᤢᤖᤡᤰ ᤔᤧᤔᤧᤳᤋᤢᤛᤡ᤹. ᤂᤧᤱᤜᤠ᤹ ᤏᤢᤒᤠ ᤕᤠ᤺ᤶᤒᤰ ᤔᤧᤈᤥᤰ. ᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤛᤡᤒᤠ ᤔᤧᤈᤥᤰ. 23 ᤂᤧᤱᤜᤠ᤹ ᤏ᤺ᤶᤏ᤺ᤶ ᤔᤧᤗ᤹ ᤜᤧᤰᤁᤩᤠᤱ ᤏᤠᤛᤡ ᤔᤧᤎ᤺ᤳᤗᤥ॥ ᤀᤰᤋᤱᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤣᤀᤠᤱ ᤌᤡᤶ ᤜᤥᤵᤗᤥ॥ 24 ᤂᤪᤡᤛ᤻ᤋ ᤕᤧᤛᤢᤴ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ᤖᤧᤃ ᤗᤠᤕᤥᤒᤠ ᤏᤡᤱᤘᤠ᤹ ᤏᤢ ᤂᤧᤸᤗᤧ ᤁᤢᤓᤧᤴ ᤕᤠ᤺ᤶᤒᤰᤁᤡᤸᤗᤧ ᤁᤢᤕᤢᤰᤁᤡᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤀᤠᤱ ᤘᤠ᤹ᤖᤥ॥ 25 ᤛᤣᤛᤣᤔᤠᤱᤅᤡᤸᤗᤧ ᤀᤠᤏᤡ᤹ ᤁᤢᤛᤱ ᤜᤡᤱᤔᤴ ᤀᤠᤒᤡᤖᤧᤀᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤀᤠᤏᤡ᤹ ᤘᤕᤡᤖᤥ॥ 26 ᤀᤠᤏᤡ᤹ᤃ ᤀᤠᤱᤍᤡᤱ ᤗ᤹ᤖᤡ ᤔᤣ᤺ᤴ. ᤛᤡᤰ ᤑᤥ᤺ᤱᤛᤡᤱ ᤐᤡᤛᤡᤱᤔᤠ ᤔᤣ᤺ᤴ. ᤜᤧᤰᤁᤩᤠᤱ ᤏᤠᤜᤧᤳᤇᤡᤱᤔᤠ ᤔᤣ᤺ᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.