ᤃᤗᤠᤋᤡ 4 - LIFOTNT1 ᤀᤡᤱᤃᤠ᤹ ᤌᤧᤔᤠ ᤐᤠ᤺ᤵᤔᤠ ᤁᤥ᤺ᤳᤋᤢᤱᤒᤠ ᤑᤠ᤹ᤗᤧ. ᤗᤰ ᤁᤧᤄᤥᤒᤠᤴ ᤜᤡᤴᤈᤠ᤹ ᤘᤠ᤹ᤖ ᤌᤠᤖᤡᤰ ᤕᤖᤡᤰ ᤕᤠᤱᤛᤠᤁᤢᤴᤎᤣᤖᤧ ᤁᤢᤴᤍᤠᤱᤒᤠ ᤁᤧᤒᤥᤱᤒᤠ ᤘᤠ᤹ᤛᤠᤱ ᤕᤥ᤺ᤰᤐᤠ ᤁᤢᤀᤡᤛᤡ᤺ᤰᤁᤣ ᤐᤥᤱᤗᤥ॥ 2 ᤁᤢᤶᤒᤠᤖᤧ ᤕᤢᤰᤋᤡᤱ ᤆᤥᤃᤢᤒᤠ ᤗᤰ ᤂᤥᤔᤠ ᤋᤱᤒᤣ ᤔᤧᤱᤃᤧᤳᤋᤣ ᤌᤠᤖᤡᤰ ᤂᤢᤏᤧ᤹ᤃ ᤁᤶᤒᤪᤠᤱ ᤁᤧᤔᤧᤵᤐᤠ ᤏᤢ ᤀᤥᤃᤧᤔᤧᤵᤐᤠᤸᤗᤧ ᤁᤢᤜᤢᤰᤁᤥᤀᤣ ᤘᤠ᤹ᤖᤥ॥ 3 ᤜᤧᤰᤁᤣᤗ᤹ᤖᤡᤰᤁᤣ ᤀᤠᤏᤡ᤹ᤀᤠᤱ ᤜᤡᤴᤈᤠ᤹ ᤁᤢᤀᤡᤛᤡᤰ ᤀᤠᤘᤕᤧᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤢᤜᤣ᤺ᤰᤛᤡᤱᤔᤥᤒᤠ ᤜᤏᤧᤒᤠ ᤂᤠᤜᤢᤴᤜᤠ᤹ᤖᤧ ᤕᤥᤰ ᤀᤠᤈᤥᤃᤧᤀᤠᤱ ᤀᤠᤘᤕᤧᤖᤥ॥ 4 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤢᤰᤋᤡᤱ ᤆᤥᤃᤢᤒᤠ ᤕᤧᤶᤔᤡᤴ ᤁᤧᤖᤧᤸᤗᤧ ᤀᤠᤒᤢᤃᤧᤴ ᤁᤢᤛ᤻ᤛᤠᤴ ᤐᤠᤱᤄᤢ ᤕᤢᤛᤢᤖᤥ॥ ᤂᤢᤏᤧ᤹ ᤛᤡᤛᤠᤍᤡᤱ ᤔᤧᤴᤇᤢᤔᤠ᤹ᤀᤥᤗᤠᤶ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤁᤥ ᤛᤠᤘᤠ᤺ᤴᤇᤡᤱᤅᤠᤱ ᤘᤕᤧᤖᤥ॥ 5 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤗᤠᤶ ᤀᤠᤏᤡ᤹ ᤀᤠᤎᤧ᤹ᤖ ᤑᤠ᤹ᤀᤠᤱ ᤜᤧᤰᤁᤩᤠᤱ ᤀᤠᤒᤠᤅᤣ ᤀᤠᤒᤢᤃᤧᤴ ᤁᤢᤛ᤻ᤛᤠ ᤀᤠᤒᤥᤱᤗ ᤑᤠ᤹ᤀᤠᤱ ᤂᤢᤏᤧ᤹ ᤐᤠᤱᤄᤢᤖᤥ॥ 6 ᤂᤡᤏᤡ᤹ ᤏᤡᤱᤘᤠ᤹ᤑᤢᤛᤠ ᤁᤧᤒᤥ᤺ᤰᤂᤡᤒᤠᤸᤗᤧ ᤆᤥᤃᤢᤸᤗᤧ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤸᤗᤧ ᤁᤢᤕᤠᤶᤛᤠᤶᤔᤡᤴ ᤀᤠᤏᤡ᤹ ᤛᤡᤰᤗᤢᤱᤔᤥ ᤐᤠᤱᤄᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤴ ᤛᤣᤛᤣᤔᤠᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤠᤏᤢᤍᤡᤱ ᤀᤠᤶᤒᤦ ᤗ᤹ᤖᤡᤰ ᤔᤧᤳᤋᤢ᤹ᤖᤥ॥ 7 ᤀᤠᤸᤗᤀᤠᤱᤎᤥ ᤂᤡᤏᤡ᤹ᤃ ᤕᤥᤰ ᤁᤧᤜᤥ᤺ᤵᤋᤡ᤹ᤖᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤛ᤻ᤛᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥ ᤜᤧᤰᤁᤩᤠᤱ ᤁᤢᤛ᤻ᤛᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤳᤋᤢᤒᤠ ᤁᤠᤰ ᤐᤠ᤺ᤴᤜᤠ᤹ᤖᤧᤴ ᤂᤡᤏᤡ᤹ ᤗᤰᤁᤧᤄᤥᤒᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥ ᤐᤠᤘᤗᤖᤧ ᤃᤗᤠᤋᤡᤒᤠ ᤏᤛᤠᤏᤡᤒᤠᤜᤠ᤹ ᤏᤡᤱᤘᤠ᤹ ᤀᤡᤋᤢᤛᤡ᤹ 8 ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤏᤡ᤺ᤵᤔᤠᤏᤢ᤺ᤸᤗᤧ ᤋᤃᤡ ᤂᤡᤏᤡ᤹ᤃ ᤜᤏᤧᤒᤠ ᤔᤠᤱᤜᤠ᤹ᤖᤧ ᤂᤢᤏᤡ᤹ ᤕᤥᤰ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤖᤥ॥ 9 ᤁᤖ ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹ (ᤀᤡᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤣ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤡᤀᤠᤱ ᤘᤠ᤹). ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤢᤒᤢᤱᤏᤠ ᤁᤢᤛᤶᤒᤠ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤂᤠᤜᤢᤴᤜᤠ᤹ᤀᤥ ᤏᤢ᤺ᤱᤔᤠᤀᤠᤱ ᤕᤥᤰ ᤐᤥᤱᤔᤠ ᤂᤡᤏᤡ᤹ ᤛᤡᤖᤠ᤹ᤌᤠᤱᤒᤠᤒᤣ᥅ 10 ᤂᤡᤏᤡ᤹ᤃ ᤕᤜᤢᤍᤡ ᤛᤠᤶᤕᤥ ᤛᤠᤰᤌᤡᤶᤜᤠ᤹ ᤁᤢᤀᤡᤛᤡ᤺ᤰᤁᤣ ᤕᤧᤴᤜᤠ᤹. ᤗᤠᤜᤠ᤹. ᤆᤢᤱᤘᤠ᤺ᤶᤔᤠ ᤜᤠᤱᤘᤠ᤺ᤶᤔᤠ ᤕᤧᤶᤜᤠ᤹ ᤏᤢ ᤋᤱᤒᤣᤜᤠ᤹ᤏᤧ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤗᤥ॥ 11 ᤂᤡᤏᤡ᤹ ᤗᤠᤃᤡ ᤀᤡᤱᤃᤠ᤹ ᤆᤥᤃᤢᤱᤒᤠ ᤕᤠᤶᤒᤢᤎᤡᤰᤐᤠ ᤕᤠ᤺ᤶᤒᤰᤁᤡᤴ ᤜᤏᤧ ᤐᤥᤱᤒᤡᤗᤠ ᤑᤠ᤹ᤀᤠᤱ ᤁᤡᤛᤠᤱᤅᤠᤱ ᤘᤕᤠᤱᤗᤥ॥ 12 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤧᤴ ᤐᤠ᤺ᤴᤜᤠ᤹ᤗᤠᤶ ᤀᤡᤱᤃᤠ᤹ ᤁᤢᤀᤡᤛᤡᤰ ᤂᤡᤏᤡ᤹ᤀᤠᤱ ᤆᤥ᤺ᤰᤕᤢᤶᤓᤥᤒᤠ ᤐᤥ᤺ᤰᤂᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤋᤃᤡ ᤀᤡᤱᤃᤠ᤹ᤃ ᤂᤡᤏᤡ᤹ ᤜᤧᤰᤁᤣ ᤛᤠᤶᤕᤥ ᤛᤠᤰᤌᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤗᤠᤶ ᤆᤥ᤺ᤰᤕᤢᤶᤓᤥᤒᤠ ᤐᤥ᤺ᤰᤂᤠᤱᤅᤠᤱ ᤘᤕᤠᤱᤗᤥ॥ ᤂᤡᤏᤡ᤹ᤃ ᤀᤡᤱᤃᤠ᤹ ᤌᤣᤀᤠᤱ ᤋᤠᤵᤑᤧ᤺ᤸᤗᤡᤰ ᤕᤠᤵᤔᤡ ᤁᤧᤶᤔᤧᤳᤋᤡᤴᤗᤥ॥ 13 ᤀᤡᤱᤃᤠ᤹ ᤂᤡᤏᤡ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤛᤧ ᤋᤩᤠᤱᤅᤡᤸᤗᤧ ᤀᤠᤕᤠᤶ ᤋᤢᤃᤧᤀᤠᤱ ᤘᤕᤧᤒᤠᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤘᤠ᤹ᤖᤥ॥ 14 ᤀᤠᤕᤠᤶ ᤋᤢᤰᤔᤠᤸᤗᤧ ᤋᤢᤰᤂᤣ ᤁᤧᤈᤩᤧ᤹ᤀᤡᤛᤠᤱ ᤕᤠᤵᤔᤡ ᤁᤧᤴᤈᤡ᤺ᤳᤋᤡᤴ. ᤕᤠᤵᤔᤡ ᤁᤧᤴᤏᤠ᤹ᤖᤡᤴᤗᤥ॥ ᤂᤧᤸᤗᤧ ᤁᤢᤗᤧᤰᤘᤠ ᤔᤠᤱᤗᤠᤀᤡᤱᤒᤠ ᤀᤡᤃᤪ ᤂᤪᤡᤛ᤻ᤋ ᤕᤧᤛᤢᤴ ᤗᤠᤱ ᤁᤧᤍᤠ᤺ᤰᤋᤢᤶᤒᤠ ᤁᤢᤀᤡᤛᤡᤰ ᤕᤠᤵᤔᤡ ᤗᤠᤱ ᤁᤧᤍᤠ᤺ᤰᤋᤡᤖᤥ॥ 15 ᤂᤡᤏᤡ᤹ ᤂᤧᤴ ᤕᤧᤶᤔᤥ ᤛᤠ᤹ᤖᤡᤰ ᤁᤧᤛ᤺ᤳᤋᤡᤀᤠᤱ ᤁᤧᤘᤕᤡᤒᤠᤴ ᤌᤣ ᤐᤥ᤺ᤰᤂᤧᤀᤠᤱᤒᤣ᥅ ᤐᤥᤱᤔᤠ ᤛᤢᤰᤋᤧᤸᤗᤧᤃ ᤀᤡᤱᤃᤠ᤹ ᤁᤢᤓᤠ᤹ ᤐᤡᤔᤠᤖᤧ ᤗᤠᤃᤡ ᤂᤡᤏᤡ᤹ ᤔᤡᤰᤜᤠ᤹ᤀᤠᤱ ᤁᤧᤕᤃᤢᤶ ᤁᤧᤗ᤺ᤳᤋᤢᤶᤔᤠᤱ ᤀᤡᤱᤃᤠ᤹ ᤕᤠᤵᤔᤡ ᤐᤡᤔᤠ ᤁᤧᤛᤢᤰᤋᤡᤔᤧᤴ ᤑᤠ᤹ᤀᤠᤱ ᤐᤠ᤺ᤵᤔᤠ ᤛᤢᤰᤋᤢᤱ॥ 16 ᤁᤖ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱᤒᤠᤸᤗᤧ ᤀᤠᤸᤗᤥ ᤂᤡᤏᤡ᤹ ᤏᤡᤱᤔᤡ ᤐᤥ᤺ᤰᤂᤠᤱᤒᤠᤒᤡ᥅ 17 ᤂᤧᤴ ᤔᤏᤠᤜᤠ᤹ᤖᤧᤃ ᤂᤡᤏᤡ᤹ ᤂᤢᤏᤡ᤹ ᤗᤧᤵᤔᤠᤱ ᤀᤢ᤺ᤱᤔᤠᤛᤡ ᤑᤠ᤹ᤀᤠᤱ ᤛᤠ᤹ᤖᤡᤰ ᤂᤢᤏᤡ᤹ ᤛᤡᤰᤛᤶᤗᤥ. ᤁᤖ ᤁᤴ ᤂᤡᤏᤡ᤹ ᤗᤠᤃᤡ ᤏᤢᤒᤠ ᤔᤣ᤺ᤴᤗᤥ॥ ᤂᤧᤱᤜᤠ᤹ᤖᤧᤃ ᤀᤠᤏᤡᤃᤣ ᤋᤰᤗᤧᤱᤘᤠᤀᤥ ᤁᤧᤒᤥᤃᤡᤀᤠᤱ ᤂᤧᤱᤜᤠ᤹ᤖᤰ ᤁᤧᤍᤡᤶᤍᤢᤶᤛᤡᤶᤗ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤔᤧᤘᤠ᤹ᤖᤥ॥ 18 ᤀᤠᤸᤗ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤸᤗᤧᤖᤰ ᤔᤣ᤺ᤴ. ᤁᤖ ᤂᤡᤏᤡ᤹ᤏᤢ ᤜᤥ᤺ᤵᤐᤠᤛᤠᤱ ᤘᤣ᤹ᤜᤠ᤹ᤖᤧ ᤂᤡᤏᤡ᤹ ᤗᤠᤃᤡ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤡᤰ ᤛᤶᤏᤧ ᤑᤠ᤹ᤃᤪ ᤏᤢᤒᤠᤖᤥ॥ 19 ᤀᤠᤔᤡ᤺ᤶ ᤀᤠᤛ᤻ᤛᤠᤛᤣ. ᤂᤪᤡᤛ᤻ᤋᤧᤴ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤔᤧᤶᤒᤥᤱᤅᤣ ᤌᤠᤖᤡᤰ ᤀᤡᤱᤃᤠ᤹ᤃ ᤀᤠᤸᤗᤥ ᤕᤠᤶᤔᤥ ᤛᤠᤘᤠ᤺ᤶᤔᤠ ᤋᤢᤱᤅᤡᤸᤗᤧ ᤋᤖᤢᤔᤠ ᤔᤧᤴᤇᤢᤔᤠ᤹ ᤁᤢᤀᤡᤛᤡᤰ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥ 20 ᤀᤡᤱᤃᤠ᤹ ᤀᤠᤸᤗᤥ ᤂᤡᤏᤡ᤹ᤏᤢ ᤘᤠ᤹ᤀᤠᤸᤗᤧ ᤀᤰᤂᤣ ᤐᤠ᤺ᤵᤔᤠ ᤔᤧᤒᤥ᤺ᤰᤂᤧᤶᤒᤠ ᤘᤕᤧᤖᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤜᤧᤰᤁᤣ ᤁᤧᤗ᤹ᤖᤡᤒᤠᤀᤥ ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤋᤢᤃᤧᤀᤠᤱ ᤘᤠ᤹ᤖᤥ॥ ᤜᤠᤃᤠᤖ ᤏᤢ ᤛᤠᤖᤠ 21 ᤂᤡᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤁᤥ ᤘᤠ᤹ᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤒᤡ᥅ ᤂᤧᤵᤛᤧᤶᤔᤧ᤹ᤀᤥ᥄ ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹ᤒᤡ᥅ 22 ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ᤹ ᤏᤧᤳᤇᤡ ᤘᤕᤧᤳᤇᤡ ᤑᤠ᤹ᤀᤠᤱ ᤐᤠ᤺ᤳᤋᤢ᤹॥ ᤌᤡᤰᤁᤡᤴ ᤛᤣᤘᤠᤖᤥᤔᤠ ᤁᤢᤔᤣᤳ ᤗᤧᤵᤔᤠᤱᤒᤠ ᤘᤕᤧ. ᤘᤣ᤹ᤛᤔᤠᤴ ᤆᤥ᤺ᤰᤕᤢᤶᤓᤥᤔᤠ ᤁᤢᤔᤣᤳ ᤗᤧᤵᤔᤠᤱᤒᤠ ᤘᤕᤧᤖᤥ॥ 23 ᤜᤠᤃᤠᤖ ᤔᤧᤵᤔᤏᤠᤔᤠ ᤛᤣᤘᤠᤖᤥᤔᤠ ᤁᤢᤔᤣ᤺ᤳᤗᤠᤶ ᤛᤠᤃᤧᤘᤠ᤺ᤴᤇᤡᤱᤒᤠᤴ ᤔᤧᤴᤇᤠᤶ ᤏᤡᤱᤘᤠ᤹ᤗᤠᤶ ᤛᤠᤘᤠ᤺ᤴᤇᤡᤱᤒᤠᤖᤥ॥ ᤁᤖ ᤛᤠᤖᤠ ᤔᤧᤵᤔᤏᤠᤔᤠ ᤆᤥ᤺ᤰᤕᤢᤶᤓᤥᤔᤠ ᤀᤠᤒᤠᤅᤣ ᤁᤢᤔᤣ᤺ᤳᤗᤠᤶ ᤛᤠᤃᤧᤘᤠ᤺ᤴᤇᤡᤱᤒᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵᤗᤠᤶ ᤐᤥ᤺ᤰᤂᤧᤒᤠᤖᤥ॥ 24 ᤀᤠᤸᤗ ᤁᤴ ᤏᤧᤵᤑᤢ ᤔᤧᤴᤇᤢᤔᤠᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤏᤧᤳᤇᤡ ᤔᤠᤱᤜᤢᤵᤐᤡᤸᤗᤧ ᤁᤢᤒᤡᤛᤡᤖᤥ॥ ᤛᤣᤘᤠᤖᤥᤔᤠ ᤜᤠᤃᤠᤖᤖᤧᤱᤃ ᤛᤡᤏᤠᤀᤡ ᤁᤥ᤺ᤰᤔᤠ ᤁᤢᤀᤡᤛᤡᤰ ᤆᤥᤰᤗᤥ॥ ᤂᤧᤵᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤛᤠᤶᤕᤥᤌᤡᤶᤔᤡᤴ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤧᤴ ᤛᤠᤶᤕᤥᤌᤡᤶᤔᤡᤸᤗᤧ ᤔᤏᤠᤜᤠ᤹ ᤕᤥᤰ ᤆᤥᤃᤢᤛᤡᤖᤥ॥ 25 ᤀᤠᤸᤗ ᤀᤠᤸᤗᤥᤒᤠ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤀᤖᤒ ᤗᤠᤈᤣ᤹ᤒᤠ ᤛᤡᤏᤠᤀᤡ ᤁᤥ᤺ᤰᤔᤠ ᤁᤢᤀᤡᤛᤡᤰ ᤆᤥᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤰᤕᤰᤁᤡᤴ ᤏᤢ ᤛᤠᤶᤕᤥᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤁᤧᤖᤧᤰ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤥᤰ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ 26 ᤁᤖ ᤆᤥ᤺ᤰᤕᤢᤶᤓᤥᤔᤠ ᤛᤠᤖᤠ᤺ᤱᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤕᤖᤢᤛᤗᤧᤔ ᤁᤢᤀᤡᤛᤡᤰ ᤆᤥᤰᤗᤥ॥ ᤂᤢᤏᤧ᤹ᤀᤣ ᤀᤠᤏᤡ᤹ ᤔᤠᤖᤥ॥ 27 ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢᤀᤠᤱ ᤘᤠ᤹. “ᤛᤠᤔᤧᤱᤃᤵᤔᤏᤠᤔᤠᤀᤣ. ᤛ᤺ᤳᤋᤧ᤹ᤀᤥ᥄ ᤂᤧᤏᤧ᤹ ᤛᤠᤃᤧᤴᤘᤠ᤺ᤴᤍᤢᤴᤇᤠᤱ ᤛ᤺ᤳᤋᤧ᤹ᤖ ᤀ᤺ᤰᤋᤧ᤹ᤀᤥ᥄ ᤌᤣᤀᤠᤱᤓᤧᤸᤗᤧ ᤂᤧᤴ ᤘᤣ᤹ ᤔᤧᤴᤇᤢᤔᤠ᤹ᤏᤢ᤺ᤸᤗᤧᤀᤠᤱ ᤛᤠᤔᤧᤱᤃᤵᤔᤏᤠᤔᤠᤸᤗᤧ ᤁᤢᤛ᤻ᤛᤠᤜᤠ᤹ ᤕᤖᤡᤰ ᤔᤧᤒᤥᤱᤗᤥ॥” 28 ᤀᤠᤸᤗ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ᤃ ᤀᤡᤛᤜᤠᤁ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤒᤠ ᤔᤢ᤹ᤀᤡᤍᤠᤱᤛᤠᤏᤡᤱᤗᤥ॥ 29 ᤁᤖ ᤂᤧᤴ ᤕᤥ᤺ᤰᤔᤠ ᤔᤣ᤺ᤳᤋᤡᤸᤗᤧ ᤁᤢᤛ᤻ᤛᤠ ᤀᤡᤛ᤻ᤔᤠᤀᤣᤗᤖᤧ ᤔᤠᤱᤜᤧᤰᤗᤠᤶ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤡᤛᤜᤠᤰᤁᤡᤴ ᤋᤢᤰᤂᤣ ᤆᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤛᤣᤛᤣᤔᤠᤱᤗᤠᤶ ᤀᤠᤏᤡ᤹ ᤛᤠᤃᤧᤘᤠ᤺ᤴᤇᤡᤱᤒᤠᤜᤠ᤹ᤀᤠᤱ ᤛᤠᤶᤕᤥᤌᤡᤶ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤋᤢᤰᤂᤣ ᤀᤠᤶᤈᤠ᤺ᤳᤗᤥ॥ 30 ᤁᤖ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤌᤣ ᤐᤠ᤺ᤳᤋᤢ᤹᥅ “ᤛᤣᤘᤠᤖᤥᤔᤠ ᤔᤧᤴᤇᤢᤔᤠ᤹ᤀᤡᤴ ᤏᤢ ᤁᤢᤛ᤻ᤛᤠᤴ ᤏᤠ᤺ᤳᤋᤧᤍᤣᤛᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤣᤘᤠᤖᤥᤔᤠᤸᤗᤧ ᤁᤢᤛ᤻ᤛᤠᤴ ᤆᤥ᤺ᤰᤕᤢᤶᤓᤥᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤛ᤻ᤛᤠ᤺ᤴᤏᤢ ᤛᤥᤖᤡᤰ ᤗᤰᤁᤧᤄᤥᤒᤠ ᤐᤥᤱᤔᤠ ᤔᤧᤛᤢᤰᤏᤧᤴᤗᤥ॥” 31 ᤂᤧᤸᤗᤧᤆᤥᤃᤢᤸᤗᤧ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡ᤹ᤃ ᤛᤣᤘᤠᤖᤥᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤛ᤻ᤛᤠ᤺ᤛᤡ ᤔᤣ᤺ᤴᤗᤥ. ᤁᤖ ᤀᤠᤏᤡ᤹ᤃ ᤆᤥ᤺ᤰᤕᤢᤶᤓᤥᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤛ᤻ᤛᤠ᤺ᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.