ᤃᤗᤠᤋᤡ 2 - LIFOTNT

ᤐᤠᤘᤗ ᤏᤢ ᤘᤣ᤹ ᤛᤣ᤺ᤰᤕᤢᤰᤔᤡᤒᤠᤜᤠ᤹

¹ ᤋᤱᤒᤣ ᤌᤡᤰ-ᤗᤡ (᥇᥊) ᤀᤣᤃᤠᤱ ᤀᤡᤱᤃᤠ᤹ ᤒᤖᤏᤠᤒᤠᤛᤧᤴᤏᤢ ᤕᤠᤶᤔᤥ ᤕᤖᤢᤛᤗᤧᤔ ᤌᤥ ᤐᤣᤃᤠᤱᤅᤡᤸᤗᤧ ᤋᤡᤋᤛᤧᤴᤏᤠᤱ ᤀᤡᤱᤃᤠ᤹ᤏᤢᤀᤣ ᤛᤥᤖᤡᤰ ᤋᤣ᤹ᤖᤢᤱᤅᤠᤱ ᤘᤕᤧ॥

² ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤂᤧᤳᤌᤥ ᤐᤣ᤺ᤰᤔᤠᤀᤣ ᤐᤥᤱ ᤗ᤹ᤖᤡᤰ ᤀᤥ᤺ᤴᤎᤠᤰᤋᤠᤱᤅᤠᤱ ᤘᤕᤧ॥ ᤀᤡᤱᤃᤠ᤹ ᤂᤧᤵᤔᤥ ᤘᤕᤠᤱᤅᤡᤸᤗᤧ ᤂᤧᤵᤔᤥᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤗᤠᤶᤗᤥᤒᤠᤛᤡᤖᤥ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤛᤡᤒᤠᤜᤠ᤹ ᤛᤫᤠ᤺ᤳᤋᤠᤱ ᤋᤢᤔᤢᤱᤛᤡᤱᤅᤠᤱ ᤀᤡᤱᤃᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤡᤱᤓᤥᤛᤢᤱᤛᤡᤱᤒᤠ ᤛᤢᤏᤠᤀᤡᤱᤅᤡᤴ ᤆᤧᤰᤋᤢᤱᤛᤡᤱᤗᤥ॥ ᤂᤧᤱᤜᤠ᤹ᤖᤧ ᤀᤠᤒᤠ᤺ᤴᤏᤡᤴ ᤔᤧᤄᤧᤵᤛᤢᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤱᤅᤠᤱ ᤘᤕᤠᤱ. ᤔᤣ᤺ᤴᤏᤣ ᤑᤠ᤹ᤃᤪ ᤀᤡᤱᤃᤠ᤹ ᤆᤥᤃᤢᤱᤒᤠ ᤔᤠᤱᤛᤧᤘᤠᤴ ᤜᤏᤧ ᤁᤧᤒᤥᤱᤒᤠ ᤘᤕᤧᤖᤥ॥

³ ᤁᤖ ᤀᤠᤴᤍᤣᤱᤒᤠ ᤋᤡᤋᤛᤧᤴ ᤌᤡᤶᤔᤧᤴᤍᤱ ᤛᤢᤘᤠᤱ ᤘᤕᤧᤛᤠᤱ ᤂᤧᤸᤗᤧ ᤜᤷᤍᤥ ᤜᤧᤰᤔᤠ ᤐᤥᤱ ᤑᤠ᤹ᤀᤠᤱ ᤔᤧᤶᤒᤠ᤺ᤳᤋᤢᤴᤗᤥ॥

⁴ ᤁᤖ ᤁᤢᤓᤠ ᤀᤡᤱᤗᤧᤰᤁᤣ ᤑᤢ᤹ᤏᤢᤛᤠ᤹ᤜᤠ᤹ ᤂᤪᤡᤛ᤻ᤋ ᤕᤧᤛᤢᤗᤠᤶ ᤂᤥᤛᤢᤶᤒᤧᤒᤠ ᤆᤥ᤺ᤰᤕᤢᤶᤓᤥᤴ ᤌᤥ᤺ᤶᤛᤧ ᤀᤠᤏᤡᤃᤧᤏᤢ ᤔᤧᤓᤢᤳᤇᤡᤱᤅᤠᤱ ᤀᤠᤏᤡᤃᤣ ᤕᤥ᤺ᤰᤐᤠ ᤜᤧᤰᤁᤣ ᤆᤥ᤺ᤰᤛᤧ ᤂᤢᤏᤡ᤹ ᤕᤜᤢᤍᤡ ᤛᤠᤶᤕᤥᤌᤡᤶᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥᤱ ᤗ᤹ᤖᤡᤰ ᤔᤧᤔᤧᤳᤋᤡᤃᤧᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤁᤠᤰ ᤐᤠ᤺ᤴᤏᤡᤴ ᤐᤥᤃᤧᤒᤠᤖᤥ॥

⁵ ᤁᤖ ᤀᤠᤏᤡᤃᤧᤃ ᤛᤧᤰᤂᤠᤒᤠ ᤛᤢᤏᤠᤀᤡᤱᤅᤡᤴ ᤂᤡᤏᤡ᤹ᤏᤢ ᤛᤍᤠᤍᤡᤱ ᤘᤠ᤹ᤖ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤓᤥᤰᤂᤢᤒᤠ ᤐᤠ᤺ᤴᤏᤡᤴ ᤛᤵᤑᤠᤎᤡᤰᤁᤠᤱ ᤔᤧᤄᤧᤵᤛᤢᤶᤒᤧᤴᤗᤥ॥

⁶ ᤜᤧᤰᤁᤩᤠᤱ ᤛᤣᤛᤣᤜᤢᤵᤗᤰᤐᤠ ᤁᤢᤓᤠ ᤗᤠᤶᤗᤥᤒᤠᤜᤠ᤹ᤃ—ᤁᤧᤗᤧᤒᤠ ᤁᤧᤏᤡᤒᤠ ᤔᤧᤈᤥ᤺ᤰᤛᤠᤱ ᤀᤡᤱᤃᤠ᤹ᤃ ᤌᤣᤀᤠᤱ ᤔᤧᤗᤣ᤺ᤳᤋᤠᤛᤡᤱᤅᤡᤴᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤔᤧᤛᤧᤴᤍᤢᤴᤇᤡᤴᤗᤥ—ᤂᤧᤱᤜᤠ᤹ᤖᤧ ᤀᤡᤱᤓᤥᤛᤢᤱᤒᤠ ᤛᤢᤏᤠᤀᤡᤱᤅᤥ ᤌᤣᤀᤠᤱ ᤔᤧᤴᤈᤰᤋᤢᤴᤗᤥ॥

⁷ ᤂᤧᤸᤗᤧ ᤁᤢᤗᤧᤰᤘᤠ ᤂᤧᤱᤜᤠ᤹ᤖᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤋᤪᤢᤛᤧᤴ ᤕᤜᤢᤍᤡᤜᤠ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤥᤛᤧ ᤐᤠᤱᤄᤢᤒᤠ ᤜᤧᤰᤁᤣᤀᤣ ᤀᤡᤱᤃᤠ᤹ᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤛᤢᤏᤠᤀᤡᤱ ᤀᤡᤱᤓᤥᤔᤠᤛᤡ ᤑᤠ᤹ᤀᤠᤱ ᤗᤰᤐᤧᤴ ᤐᤡᤖᤠᤱᤒᤠᤴ ᤔᤧᤏᤡᤛᤢᤖᤥ॥

⁸ ᤌᤣᤀᤠᤱᤓᤧᤸᤗᤧ ᤐᤋᤪᤢᤛᤧᤖᤧ ᤛᤣ᤺ᤰᤕᤢᤰᤔᤡᤒᤠ ᤁᤢᤕᤠ᤺ᤶᤒᤰᤗᤠᤶ ᤕᤜᤢᤍᤡᤜᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠ᤺ᤶᤒᤰ ᤆᤥᤃᤢᤒᤠ ᤁᤢᤀᤡᤛᤡᤰ ᤀᤡᤱᤃᤠ᤹ ᤛᤣ᤺ᤰᤕᤢᤰᤔᤡᤒᤠ ᤀᤠᤕᤠ᤺ᤶᤒᤰᤗᤠᤶᤔᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤥ ᤕᤠ᤺ᤶᤒᤰ ᤆᤥᤃᤢᤖᤥ॥

⁹ ᤛᤣᤛᤣᤜᤢᤵᤗᤰᤁᤥᤒᤠ ᤗᤠᤶᤗᤥᤒᤠ ᤔᤧᤔᤧᤳᤋᤢᤛᤡᤒᤠ ᤕᤠᤁᤢᤒ. ᤐᤋᤪᤢᤛ ᤏᤢ ᤕᤢᤜᤢᤴᤏᤠᤛᤡᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤆᤥᤃᤢᤱᤒᤠ ᤔᤠᤱᤛᤧᤘᤠᤀᤥ ᤔᤢ᤹ᤀᤡᤛᤠᤶ ᤌᤠᤛᤢᤒᤠ ᤔᤧᤏᤡᤛᤢᤀᤠᤱ ᤒᤖᤏᤠᤒᤠᤛᤧᤴ ᤏᤢ ᤀᤡᤱᤃᤠ᤹ ᤔᤧᤍᤠ᤺ᤰᤋᤧᤳᤇᤡᤃᤧᤖᤥ॥ ᤂᤧᤱᤜᤠ᤹ ᤀᤠᤴᤇᤡᤃᤣ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤥᤛᤧ ᤐᤣ᤺ᤰᤔᤠ ᤔᤧᤍᤧᤴᤍᤧ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤜᤢᤍᤡᤜᤠ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤥᤔᤠ ᤔᤧᤍᤧᤴᤍᤧᤖᤥ॥

¹⁰ ᤂᤧᤱᤜᤠ᤹ᤖᤧᤃ ᤂᤢᤏᤡ᤹ ᤗᤢᤶᤔᤥᤒᤠ ᤕᤠᤱᤃᤧᤛᤠ᤹ᤒᤠᤜᤠ᤹ ᤑᤠ᤹ᤔᤠᤛᤡ ᤛᤢᤈᤠ ᤔᤧᤒᤡᤖᤡᤃᤧ॥ ᤜᤧᤰᤁᤣ ᤆᤥ᤺ᤰᤔᤠ ᤀᤡᤱᤃᤠ᤹ᤀᤠᤱ ᤀᤠᤛᤡᤖᤠ᤹ ᤌᤠᤅᤧᤖᤥ॥

ᤐᤠᤘᤗᤖᤧ ᤐᤋᤪᤢᤛᤧᤴ ᤀᤳᤋᤢ᤹

¹¹ ᤁᤖ ᤐᤋᤪᤢᤛᤧᤴ ᤀᤣᤴᤋᤡᤀᤥᤁ ᤕᤧᤰᤕᤰᤁᤥ ᤋᤩᤧ᤺ᤸᤗᤧ ᤘᤣ᤹ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡᤀᤣ ᤀᤡᤱᤃᤠ᤹ ᤐᤠᤴ ᤔᤧᤳᤋᤢᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤕᤠ᤺ᤶᤒᤰ ᤑᤣ᤺ᤴᤍᤢᤀᤠᤱ ᤘᤕᤧ॥

¹² ᤋᤃᤡ ᤂᤢᤏᤧ᤹ ᤌᤡᤶᤔᤧᤴᤍᤱ ᤛᤢᤘᤠᤱᤒᤠ ᤏᤛᤠᤏᤡᤒᤠᤜᤠ᤹ᤏᤢ ᤛᤥᤖᤡᤰ ᤆᤖ ᤘᤕᤧ. ᤁᤖ ᤕᤠᤁᤢᤒᤖᤧ ᤕᤜᤢᤍᤡ ᤁᤢᤴᤈᤢᤶᤜᤠ᤹ ᤂᤧᤵᤔᤥ ᤔᤧᤍᤩᤧᤸᤗᤧ ᤂᤢᤏᤧ᤹ ᤛᤥᤖᤡᤰ ᤕᤢᤱᤔᤠᤀᤠᤱ ᤆᤠᤔᤠ ᤗᤧᤖᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤴᤏᤠᤱ ᤜᤷᤍᤥ ᤜᤧᤰᤔᤠᤀᤣ ᤐᤥᤱ ᤁᤧᤗ᤹ᤒᤠ ᤂᤧᤴ ᤔᤏᤠᤜᤠ᤹ᤏᤢ ᤁᤡᤛᤧᤀᤠᤱ ᤘᤕᤧᤖᤥ॥

¹³ ᤜᤧᤰᤁᤩᤠᤱ ᤘᤣ᤹ ᤕᤜᤢᤍᤡ ᤏᤛᤠᤏᤡᤒᤠᤜᤠ᤹ᤖᤧᤀᤠᤱ ᤐᤋᤪᤢᤛᤖᤧ ᤁᤡᤛᤪᤢᤰᤐᤠ ᤁᤢᤕᤧᤵᤗᤧᤰᤁᤡᤴ ᤔᤧᤏᤠ᤺ᤳᤋᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤧᤵᤗᤧᤰᤁᤡᤸᤗᤧ ᤒᤖᤏᤠᤒᤠᤛᤧᤴᤏᤠᤱ ᤗᤧᤰᤂᤢ ᤋᤣ᤹ᤖᤢᤖᤥ॥

¹⁴ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤛᤢᤏᤠᤀᤡᤱᤅᤡᤸᤗᤧᤴ ᤛᤧᤰᤂᤠᤒᤠ ᤐᤠ᤺ᤴᤏᤥ ᤔᤧᤶᤒᤳᤇᤧᤶᤒᤠ ᤏᤡᤛᤢᤱᤛᤡᤱᤅᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤃᤡᤀᤣ ᤐᤋᤪᤢᤛᤧᤴ ᤀᤰᤂᤣ ᤔᤧᤳᤋᤢᤱᤗ ᤑᤧ᤺ᤰᤋᤢᤱ. “ᤂᤧᤏᤧ᤹ᤃ ᤕᤜᤢᤍᤡᤏᤧᤛᤠᤱ ᤕᤜᤢᤍᤡ ᤜᤧᤰᤁᤣ ᤁᤧᤴᤘᤠ᤹ᤏᤧᤴ. ᤁᤖ ᤌᤡᤶᤔᤧᤴᤍᤱ ᤛᤢᤘᤠᤱ ᤁᤢᤀᤡᤛᤡᤰ ᤁᤧᤘᤠ᤹॥ ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤗᤧᤖᤢ ᤁᤧᤍᤣᤛᤢᤒᤠ ᤕᤜᤢᤍᤡ ᤛᤠᤶᤕᤥᤌᤡᤶᤔᤡᤴ ᤀᤠᤰᤂᤣᤗ᤹ᤖᤡᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥᤱ ᤗ᤹ᤖᤡᤰ ᤁᤧᤔᤧᤳᤋᤢᤛᤡᤒᤠᤒᤣ᥅”

¹⁵ ᤀᤠᤏᤡ᤹ ᤛᤠᤀᤠᤘᤠ᤺ᤴᤇᤡᤱᤅᤠᤱᤎᤥᤀᤣ ᤕᤜᤢᤍᤡᤛᤡ. ᤌᤡᤶᤔᤧᤴᤍᤱ ᤛᤢᤘᤠᤱ ᤜᤧᤰᤋᤱᤒᤠ “ᤗᤠᤕᤥᤒᤠᤛᤡ” ᤔᤣ᤺ᤴᤗᤥ॥

¹⁶ ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢᤀᤠᤱ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤐᤥᤱᤔᤠ ᤔᤧᤛᤢᤰᤏᤧᤴᤗᤥ. ᤁᤖ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠᤴ ᤆᤥᤃᤢᤀᤠᤱᤗᤰ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤐᤥᤱᤔᤠ ᤛᤢᤰ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤏᤡ᤹ ᤁᤢᤛᤡᤱ ᤏᤡ᤺ᤵᤔᤠ ᤐᤥᤱᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡ᤹ᤀᤠᤱ ᤂᤪᤡᤛ᤻ᤋᤀᤥᤒᤠ ᤏᤛᤠ᤺ᤴᤗᤠᤶ ᤀᤠᤵᤋᤡᤰ ᤔᤣ᤺ᤴᤏᤣ ᤀᤠᤒᤥᤱᤗ ᤑᤠ᤹ᤀᤠᤱ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠᤴ ᤀᤠᤈᤥᤃᤢᤶᤗᤥ. ᤁᤖ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤀᤠᤀᤡ᤺ᤳᤋᤢᤶ ᤀᤠᤏᤠ᤺ᤳᤋᤢᤶᤒᤠᤗᤠᤶ ᤔᤣ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢᤀᤠᤱ ᤀᤠᤳᤋᤡᤴᤏᤠᤱ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤔᤧᤒᤥᤱᤏᤧᤸᤗᤥ॥

¹⁷ ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤂᤪᤡᤛ᤻ᤋᤧᤴ ᤏᤛᤠᤴ ᤆᤥ᤺ᤰᤔᤠᤗᤠᤶ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤐᤥᤱᤔᤠ ᤀᤠᤃᤥ᤺ᤳᤋᤢᤶᤔᤡᤸᤗᤧ ᤘᤣ᤹ᤜᤠ᤹ᤖᤧ ᤂᤡᤏᤡ᤹ ᤗᤠᤕᤥᤀᤥ ᤁᤧᤘᤠ᤹ᤒᤠᤏᤡᤱ ᤀᤠᤶᤔᤧᤳᤗᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤀᤠᤗᤧᤖᤢᤶᤔᤠᤱ ᤀᤠᤘᤠ᤹॥ ᤂᤧᤴ ᤑᤠ᤹ᤀᤡᤴ ᤂᤪᤡᤛ᤻ᤋᤖᤧ ᤗᤠᤕᤥᤀᤥ ᤗᤠᤶᤀᤠᤗᤥᤒᤠᤒᤡ᥅ ᤜᤧᤰᤁᤣ ᤔᤣ᤺ᤴᤗᤥ᥄

¹⁸ ᤂᤧᤸᤗᤧ ᤁᤢᤗᤧᤰᤘᤠ ᤀᤡᤱᤃᤠ᤹ ᤗᤧᤖᤢᤱᤍᤣᤛᤢᤱᤒᤠ ᤐᤠ᤺ᤴᤏᤡᤴ ᤕᤠᤶᤔᤥ ᤜᤢ᤹ᤖᤢᤱᤛᤡᤱᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤗᤠᤕᤥᤒᤠ ᤐᤥᤱᤅᤠᤖᤥ॥

¹⁹ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤥ᤺ᤳᤋᤢᤱᤅᤡᤸᤗᤧ ᤜᤠᤒᤠ ᤂᤧᤴ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤸᤗᤧ ᤀᤠᤵᤋᤡᤰ ᤁᤢ᤺ᤳᤋᤠᤱᤗᤥ॥ ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤜᤡᤱᤅᤠᤖ ᤑᤠ᤹ᤀᤠᤱ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠᤀᤠᤱ ᤛᤧᤴᤗᤵ ᤂᤥᤔᤠ ᤋᤶᤛᤡᤱ ᤆᤥ᤺ᤰᤔᤠ ᤗᤧᤖᤢᤱᤗᤥ॥

²⁰ ᤀᤡᤱᤃᤠ᤹ᤃ ᤂᤪᤡᤛ᤻ᤋᤧᤴᤏᤢ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤛᤩᤠᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤀᤠᤸᤗᤀᤠᤱᤎᤥ ᤀᤡᤱᤃᤠ᤹ᤃ ᤔᤧᤜᤡᤱᤅᤠᤴ. ᤁᤖ ᤂᤪᤡᤛ᤻ᤋᤧᤴ ᤀᤡᤱᤃᤠ᤹ᤀᤥ ᤜᤡᤱᤗᤥ॥ ᤀᤡᤱᤃᤠ᤹ᤃ ᤁᤴ ᤏᤠᤛᤡᤱᤃᤧᤴ ᤌᤰᤁᤥ ᤜᤡᤱᤅᤠᤸᤗᤧ ᤏᤡᤱᤘᤠ᤹ᤑᤢᤛᤠᤀᤥᤒᤠ ᤏᤛᤠ᤺ᤴᤗᤠᤶ ᤜᤡᤱᤅᤠᤖᤥ॥ ᤂᤢᤏᤧ᤹ᤀᤣ ᤗᤢᤱᤔᤠ᤹ ᤋᤢᤰᤋᤠᤱ ᤜᤧᤰᤁᤩᤠᤱ ᤀᤠᤗᤠᤃᤡ ᤁᤢᤜᤡᤱᤔᤴᤏᤡᤴ ᤐᤡᤖᤢᤖᤥ॥

²¹ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤌᤣᤏᤠᤎᤣᤒᤠ ᤔᤧᤀᤡ᤺ᤳᤋᤠᤴᤗᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤐᤥᤱᤔᤠ ᤀᤠᤛᤢᤰᤏᤧ ᤑᤠ᤹ᤃᤪ ᤂᤪᤡᤛ᤻ᤋᤧᤴ ᤜᤏᤧᤖᤰ ᤛᤩᤧᤖᤥ॥