ᤀᤧᤈᤪᤠ 9 - LIFOTNT

ᤀᤧᤈᤪᤠ᤺ᤸᤗᤧ ᤁᤢᤍᤢᤘᤠ ᤏᤢ ᤜᤡ᤺ᤴᤇᤡᤱᤒᤠ

¹ “ᤁᤴ ᤁᤧᤖᤧᤰ ᤆᤥ᤺ᤰᤔᤠ ᤔᤧᤛᤢᤖᤢᤀᤠᤱ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ᤖᤧᤀᤠᤱ ᤂᤢᤴᤇᤡ᤹ ᤐᤣᤛᤠᤱᤒᤠ ᤗᤠᤈᤣ᤹ ᤁᤧᤕᤢᤱᤒᤠ ᤕᤰᤕᤢᤱᤒᤠ ᤁᤏᤠᤏᤡ. ᤜᤡᤳᤋᤡ. ᤐᤖᤡᤈ᤻ᤈᤡ. ᤕᤒᤢᤛᤡ ᤏᤢ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰᤗᤠᤶ ᤗᤠ᤺ᤳᤗᤠ᤺ᤳ ᤔᤧᤴᤕᤢᤱᤅᤣ ᤔᤧᤘᤠ᤹ ᤑᤠ᤹ᤀᤠᤱ ᤀᤡᤛᤪᤠᤀᤡᤗᤒᤠ ᤁᤢᤓᤠ ᤗᤠᤶᤗᤥᤒᤠᤜᤠ᤹ᤖᤧ ᤀᤠᤱᤃᤠ᤹ ᤔᤧᤔᤧᤳᤋᤠᤱ॥ ᤂᤧᤴ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧᤀᤠᤱ ᤔᤧᤈᤥᤃᤢᤖ ᤔᤧᤘᤕᤧ॥

² ᤕᤜᤢᤍᤡ ᤕᤧᤶᤒᤡᤳᤇᤠᤜᤠ᤹ᤖᤧ ᤘᤣ᤹ ᤛᤢᤘᤠᤱᤛᤔᤠ ᤔᤧᤴᤇᤢᤔᤠᤜᤠ᤹ ᤔᤣ᤺ᤰᤂᤡᤶ ᤔᤧᤔᤧᤳᤋᤢᤛᤡᤖ ᤔᤧᤘᤕᤧ॥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣ ᤔᤏᤠᤜᤠ᤹ ᤑᤧᤳᤔᤧᤗᤠ᤹ᤖᤧᤖ ᤔᤧᤘᤕᤧ॥ ᤁᤴ ᤐᤠ᤺ᤴᤏᤥ ᤗᤠᤶᤗᤥᤒᤠᤜᤠ᤹ ᤏᤢ ᤛᤢᤜᤠᤱᤕᤢᤰᤐᤠᤜᤠ᤹ᤀᤣ ᤁᤢᤓᤠᤱ ᤁᤧᤓᤣ᤺ᤶᤒᤠ ᤔᤧᤘᤕᤧ॥”

³ ᤂᤧᤒᤩᤠᤱ ᤀᤠᤱᤃᤠ᤹ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤱᤅᤡᤸᤗᤧ ᤀᤠᤱᤃᤠ᤹ ᤀᤠᤈᤠᤱ ᤏᤢ ᤀᤠᤍᤣ᤺ᤳᤋᤡᤴ ᤋᤧᤖᤧᤰ ᤌᤧ᤺ᤰᤛᤢᤱ ᤜᤧᤰᤁᤩᤠᤱ ᤀᤠᤎ᤻ᤃᤣᤰ ᤀᤡ᤺ᤴ ᤏᤢ ᤀᤠᤔᤢᤕᤢᤱᤅᤡᤴ ᤀᤠ᤺ᤰᤂᤢᤱᤗ ᤔᤧᤖᤡᤱ ᤌᤰᤏᤢ ᤂᤠᤶᤒᤠᤱᤅᤥ ᤕᤢᤅᤠᤱ॥

⁴ ᤜᤧᤰᤁᤩᤠᤱ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤁᤧᤏᤢ᤺ᤱᤒᤠ ᤁᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤈᤠ᤺ᤰᤗᤠᤶ ᤁᤧᤃᤡᤒᤠ ᤔᤏᤠᤜᤠ᤹ ᤀᤠᤱᤃᤠ᤹ ᤀᤠᤃᤒᤪᤡᤱ ᤆᤢᤶᤔᤠ ᤔᤧᤜᤣ᤺ᤰᤋᤧ॥ ᤀᤠᤱᤃᤠ᤹ ᤕᤢ᤺ᤴᤇᤡᤰ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤕᤧᤶ ᤌᤠᤖᤡᤰ ᤔᤧᤖᤡᤱ ᤌᤰᤏᤢ ᤂᤧᤵᤔᤥᤀᤣ ᤕᤢᤅᤠᤱ॥

⁵ ᤕᤢ᤺ᤴᤇᤡᤰ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤕᤧᤶ ᤐᤥ᤺ᤰᤂᤧᤸᤗᤧ ᤀᤠᤱᤃᤠ᤹ ᤀᤠᤒᤠᤅᤣ ᤔᤧᤖᤡᤱ ᤌᤰᤋᤠᤱᤅᤠᤱ ᤕᤢᤅᤠᤱᤒᤠ ᤋᤧᤴᤏᤥᤗᤠᤶ ᤐᤥᤃᤠᤱ॥ ᤀᤠᤱᤃᤠ᤹ ᤀᤠᤸᤗ ᤌᤠᤖᤡᤰᤁᤣ ᤂᤧᤴ ᤁᤧᤍᤧ᤺ᤱᤒᤠ ᤆᤠᤱᤅᤡᤴᤏᤣ ᤆᤠᤰᤂᤢᤱᤅᤠᤱ ᤐᤳᤇᤧ॥ ᤐᤣᤗᤡᤃᤧᤴ ᤋᤢᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤅᤠᤱ ᤜᤧᤰᤁᤩᤠᤱ ᤀᤠᤜᤢᤰᤁᤡᤴ ᤕᤜᤘᤣ ᤍᤠᤱᤒᤠ. ᤀᤠᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤛᤴᤇᤢᤱ॥

⁶ ᤀᤠᤱᤃᤠ᤹ ᤀᤰᤂᤣᤗ᤹ᤖᤡᤰ ᤐᤣᤗᤡ ᤑᤠᤰᤋᤢᤱ. “ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤁᤧᤍᤃᤡ ᤀᤠᤱᤃᤠ᤹ ᤀᤠᤎᤣᤃᤣ᤺ᤰᤁᤡᤴ ᤑᤥᤱᤔᤠ ᤛᤠ᤹ᤖᤡᤰ ᤛᤡᤖᤡᤱᤔᤀᤠ॥ ᤁᤧᤗᤢᤶᤛᤡᤱᤒᤠ ᤀᤠᤏᤡᤃᤣ ᤗᤠᤕᤥᤴ ᤀᤠᤏᤡᤃᤣ ᤌᤧᤃᤣᤰᤐᤠᤴᤏᤢ᤺ᤸᤗᤧᤀᤠᤱ ᤌᤠ᤺ᤱ ᤐᤥᤃᤧᤀᤠᤱ ᤘᤠ᤹. ᤂᤧᤸᤗᤧ ᤋᤠᤱᤛᤠᤱᤒᤠᤴᤏᤠᤱ ᤛᤢᤛᤢᤀᤠᤱ ᤐᤳ॥

⁷ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤔᤠᤱᤎᤥ ᤀᤠᤀᤡᤴ ᤌᤠᤖᤡᤰ ᤀᤠᤏᤡᤃᤣ ᤂᤧᤏᤧ᤹ ᤁᤧᤔᤏᤠᤜᤠ᤹ᤖᤧ ᤕᤶᤒᤠ ᤗᤠᤕᤥ ᤆᤥᤃᤢᤶᤒᤧᤀᤠᤱ ᤘᤕᤡᤃᤧ॥ ᤀᤠᤏᤡᤃᤣ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤣ ᤜᤠᤱᤅᤡᤴ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤘᤣ᤹ ᤛᤢᤘᤠᤱᤛᤔᤠ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤔᤧᤎᤩᤧ ᤜᤧᤰᤁᤩᤠᤱ ᤀᤠᤏᤡᤃᤣ ᤔᤧᤛᤩᤧᤖᤡᤃᤧ. ᤔᤧᤏᤠᤵᤋᤡᤃᤧ ᤂᤧᤒᤩᤠᤱ ᤔᤧᤍᤧᤶᤛᤡᤃᤧᤀᤠᤱ ᤘᤣ᤹ ᤗᤠᤈᤣ᤹ᤀᤥ ᤔᤧᤍᤣ᤹ᤖᤡᤃᤧ॥ ᤀᤠᤏᤡᤃᤣ ᤛᤠ᤹ᤖᤡᤰ ᤆᤠ᤺ᤳᤌᤡ ᤐᤣ॥ ᤀᤠᤀᤡᤴ ᤌᤠᤖᤡᤰᤁᤠᤱ ᤀᤠᤏᤡᤃᤣ ᤜᤧᤰᤋᤱᤒᤠᤀᤣ ᤕᤠᤰᤏᤠᤶ ᤋᤢᤔᤢᤶᤒᤧᤀᤠᤱ ᤘᤕᤡᤃᤧ॥

⁸ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤣ. ᤁᤴ ᤕᤧᤶᤔᤥ ᤁᤢᤓᤠ ᤕᤧᤶᤗᤧ ᤗᤠᤃᤡ ᤂᤧᤏᤧ᤹ ᤀᤠᤏᤡᤃᤣ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤐᤠ ᤁᤧᤒᤥ᤺ᤰᤂᤧ᤹ᤀᤠᤱ ᤁᤧᤘᤠ᤹ ᤜᤧᤰᤁᤩᤠᤱ ᤕᤥᤃ᤻ᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤗᤠᤶ ᤀᤠᤏᤡᤃᤣ ᤔᤡᤛᤠᤰᤗᤰ ᤂᤧᤳᤇᤡᤱᤔᤠᤀᤠᤱ ᤁᤴ ᤛᤣᤛᤣᤍᤧᤴᤏᤥ ᤜᤠᤱᤜᤠᤱᤅᤠᤱ ᤕᤢᤱᤔᤠ ᤕᤠᤵᤔᤡ ᤁᤧᤒᤡᤖᤧᤀᤠᤱ ᤁᤧᤘᤠ᤹॥ ᤕᤥᤃ᤻ᤒᤠ ᤘᤕᤡᤃᤧᤖ ᤘᤕᤡᤃᤧᤖᤛᤠᤱ ᤂᤧᤏᤧ᤹ ᤀᤠᤏᤡᤃᤣ ᤁᤢᤛᤱ ᤜᤡᤱᤔᤴ ᤕᤠᤵᤔᤡ ᤁᤧᤒᤡᤖᤧᤀᤠᤱ ᤁᤧᤘᤠ᤹॥

⁹ ᤀᤠᤏᤡᤃᤣ ᤕᤥᤰ ᤘᤕᤡᤃᤧ ᤁᤖ ᤀᤠᤏᤡᤃᤣ ᤂᤧᤴ ᤕᤠᤰᤏᤠᤶᤔᤥᤀᤣ ᤕᤥᤃ᤻ᤒᤠ ᤐᤥᤱᤔᤠᤀᤠᤱ ᤘᤠ᤹ᤔᤠ ᤕᤠᤵᤔᤡ ᤁᤧᤶᤒᤠᤱᤄᤧᤴ॥ ᤂᤧᤏᤧ᤹ ᤑᤠᤖᤛ ᤗᤠᤈᤣ᤹ᤒᤠ ᤜᤠᤱᤜᤠ᤹ ᤀᤠᤏᤡᤃᤣ ᤗᤢᤱᤔᤠ᤹ ᤔᤧᤍᤢᤰᤋᤡᤃᤧᤖ ᤁᤧᤕᤠ᤺ᤴᤍᤢᤛᤡ ᤜᤧᤰᤁᤩᤠᤱ ᤀᤠᤏᤡᤃᤣ ᤜᤡᤱᤔᤠ ᤏᤢ ᤀᤠᤏᤡᤃᤣ ᤁᤧᤕᤶᤒᤠ ᤔᤠᤱᤜᤡᤶᤔᤡᤴ ᤆᤥ᤺ᤰᤔᤠᤀᤠᤱ ᤁ᤹ᤕᤥ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥ ᤁᤶᤒᤪᤠᤱ ᤂᤥᤔᤠ ᤔᤧᤓᤠ᤺ᤰᤋᤡᤖ ᤁᤧᤕᤠ᤺ᤴᤍᤢᤛᤡ॥

¹⁰ “ᤁᤖ ᤀᤠᤸᤗ ᤁᤴᤜᤠ᤹ ᤁᤧᤖᤧᤰ ᤐᤥ᤺ᤰᤂᤧᤆᤢᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤃᤣ ᤌᤣ ᤐᤠ᤺ᤵᤔᤠ ᤛᤢᤰᤋᤢᤶᤒᤧᤀᤠᤱᤒᤣ᥅ ᤀᤠᤏᤡᤃᤣ ᤕᤠᤶᤔᤥ ᤂᤧᤴ ᤁᤧᤀᤡᤱᤈᤠᤱᤜᤠ᤹ ᤔᤧᤀᤡ᤺ᤳᤋᤢᤶᤒᤧᤴ ᤔᤧᤏᤠ᤺ᤳᤋᤢᤶᤒᤧᤴ.

¹¹ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤂᤧᤴ ᤀᤠᤏᤡᤃᤣ ᤕᤠᤵᤔᤡ ᤁᤧᤒᤡᤖᤧᤀᤠᤱ ᤘᤕᤧ॥ ᤂᤧᤴ ᤀᤠᤏᤡᤃᤣ ᤕᤢᤰᤋᤢᤶᤒᤧᤀᤠᤱ ᤕᤢᤅᤡᤃᤧᤒᤠ ᤗᤠᤈᤣᤴ ᤗᤳᤌᤡᤰ ᤀᤠᤛᤢᤳᤌᤥ ᤗᤠᤈᤣ᤹ ᤆᤥᤰ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤀᤠᤏᤡᤃᤣ ᤕᤠᤵᤔᤡ ᤔᤧᤔᤧᤳᤋᤡᤃᤧᤀᤠᤱ ᤘᤕᤧ ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤧᤴ ᤗᤠᤈᤣᤴ ᤌᤡᤰ ᤁᤢᤛᤢᤰᤐᤥᤏᤢ ᤘᤣ᤹ᤛᤔᤠ ᤁᤢᤛᤢᤰᤐᤥ ᤌᤠᤖᤡᤰ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰᤜᤠ᤹ᤖᤧ ᤔᤧᤎᤡᤶᤛᤢᤀᤠᤱ ᤏᤧ᤹᤺॥

¹² ᤂᤧᤴ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤏᤢ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤈᤥᤃᤧᤶᤔᤡᤴᤏᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤌᤥᤒᤥ ᤔᤧᤒᤥᤱᤗ ᤀᤡᤃᤪ ᤔᤧᤏᤢ᤹ᤔᤧᤍᤠᤖ ᤑᤠ᤹ᤀᤠᤱ ᤔᤧᤓᤠ᤹ᤖᤠᤶᤛᤡᤶᤔᤡᤴᤏᤧ᤹ ᤜᤧᤰᤁᤩᤠᤱᤗᤰ ᤂᤧᤴ ᤗᤠᤈᤣᤴ ᤂᤡᤏᤡ᤹ ᤕᤢᤰᤔᤠ ᤁᤧᤄᤥᤛᤢᤶ᤹ ᤂᤧᤒᤩᤠᤱ ᤂᤡᤏᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤗᤠᤃᤡ ᤂᤧᤴ ᤗᤠᤈᤣᤴ ᤁᤧᤏᤧᤛᤢᤶ ᤁᤧᤎᤠᤶ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤀᤠᤏᤡᤃᤣ ᤔᤧᤔᤧᤳᤋᤡᤃᤧ॥

¹³ ᤀᤠᤏᤡᤃᤣ ᤗᤠᤕᤥᤴ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤂᤢᤶᤍᤡᤱ ᤕᤠᤵᤔᤡ ᤁᤧᤒᤡᤖᤧᤀᤠᤱ ᤕᤖᤡᤰ ᤐᤠ᤺ᤴᤜᤠ᤹ ᤀᤠᤏᤡᤃᤣ ᤛᤶᤎᤠᤱ ᤆᤢᤰᤋᤧ. ᤂᤧᤴ ᤀᤣᤃᤠᤱᤅᤠᤱ ᤀᤠᤏᤡᤃᤣ ᤂᤥᤔᤠ ᤁᤧᤒᤥᤱᤒᤠ ᤕᤖᤡᤰ ᤂᤢᤶᤍᤡᤱᤅᤡᤴᤏᤢ᤺ᤸᤗᤧ ᤛᤢ᤺ᤸᤗᤡᤰᤗᤰ ᤂᤢᤶᤍᤡᤱ ᤕᤠᤵᤔᤡ ᤁᤧᤒᤡᤖᤧᤀᤠᤱ ᤁᤧᤘᤠ᤹ ᤑᤠ᤹ᤀᤠᤱ ᤀᤠᤏᤡᤃᤣ ᤏᤡᤛᤢᤶᤒᤧ ᤜᤧᤰᤁᤩᤠᤱ ᤜᤡᤱᤔᤠᤖ ᤘᤠ᤹ᤔᤠ ᤕᤠᤵᤔᤡ ᤁᤧᤒᤡᤖᤧᤀᤠᤱ ᤁᤧᤘᤠ᤹॥

¹⁴ ᤀᤠᤰᤂᤣᤗ᤹ᤖᤡᤰ ᤀᤠᤏᤡᤃᤣ ᤕᤠᤶᤔᤥ ᤂᤧᤏᤧ᤹ ᤁᤧᤀᤡᤱᤈᤠᤱᤜᤠ᤹ ᤔᤧᤴᤀᤡ᤺ᤳᤋᤣ ᤔᤧᤴᤏᤠ᤺ᤳᤋᤣ ᤁᤴ ᤋᤠᤵᤑᤧ᤺ᤶᤒᤠ ᤔᤏᤠᤜᤠ᤹ᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤛᤢᤰᤋᤢᤶᤒᤧᤒᤣ᥅ ᤀᤠᤏᤡᤃᤣ ᤜᤧᤰᤁᤣ ᤆᤥᤃᤢᤶᤒᤧᤸᤗᤧ ᤂᤧᤏᤧ᤹ ᤛᤠ᤹ᤖᤡᤰᤁᤣ ᤁᤧᤛᤡᤰ ᤐᤥᤰ ᤜᤧᤰᤁᤩᤠᤱ ᤀᤠᤏᤡᤃᤣ ᤁᤧᤖᤧᤰ ᤂᤠᤵᤐᤢᤌᤩ᤺ᤱ ᤀᤠᤃᤧᤈᤥ᤺ᤰᤁᤠᤱ ᤀᤠᤳᤋᤡᤴᤜᤠ᤹ᤀᤠᤱ ᤜᤡᤱᤔᤠ ᤕᤠᤵᤔᤡ ᤁᤧᤶᤒᤠᤱᤏᤧᤴ॥

¹⁵ ᤕᤜᤘᤣ ᤍᤠᤱᤒᤠ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤁᤧᤈᤥ᤺ᤰᤐᤠ ᤁᤧᤈᤥᤰ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤏᤡᤃᤣ ᤋᤠᤱᤔᤠ ᤕᤠ᤺ᤰᤔᤠ ᤕᤠᤵᤔᤡ ᤁᤧᤓᤠ᤺ᤰᤋᤧ॥ ᤀᤠᤏᤡᤃᤣ ᤗᤠᤕᤥ ᤆᤥᤃᤢᤶᤒᤧᤒᤠ ᤑᤠ᤹ᤀᤠᤱ ᤀᤠᤏᤡᤃᤣ ᤂᤧᤏᤧ᤹ ᤁᤧᤍᤃᤡ ᤐᤠ᤺ᤵᤔᤠ ᤋᤧᤴᤍᤡᤃᤧ॥ ᤂᤧᤏᤧ᤹ ᤁᤧᤍᤃᤡ ᤋᤠᤔᤠ ᤀᤠᤏᤡᤃᤣ ᤌᤣᤀᤠᤱ ᤕᤢᤰ ᤔᤧᤃᤳᤋᤢᤶᤒᤧᤴᤗᤥ॥”