ᤀᤧᤈᤪᤠ 8 - LIFOTNTᤁᤧᤏᤢ᤺ᤱᤒᤠ ᤁᤧᤓᤧᤶᤒᤠ ᤔᤏᤠᤜᤠ᤹ 1 ᤀᤷᤋᤠᤛᤠᤛ᤻ᤋᤧᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥ ᤒᤣᤒᤡᤗᤥᤏᤗᤠᤶᤒᤠ ᤀᤠᤱᤃᤠ᤹ᤏᤢ ᤕᤖᤢᤛᤗᤧᤔ ᤁᤧᤏᤢ᤺ᤱᤒᤠ ᤁᤧᤓᤧᤶᤒᤠ ᤜᤡᤶᤛᤕᤱᤒᤠ ᤋᤢᤶᤓᤠᤰᤐᤠᤜᤠ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤔᤡᤱ ᤔᤧᤄᤵᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤛᤪᤠᤴ ᤀᤰᤋᤱᤒᤠ ᤆᤥᤰ— 2 ᤐᤡᤏᤜᤠᤛᤖᤧ ᤁᤢᤜᤡᤶᤛᤕᤱᤗᤠᤶ—ᤃᤣᤷᤛᤥᤔ॥ ᤀᤡᤋᤠᤔᤠᤖᤗᤧ ᤁᤢᤜᤡᤶᤛᤕᤱᤗᤠᤶ—ᤍᤠᤏᤡᤀᤧᤗ॥ ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤗᤠᤶ—ᤛᤁᤏᤩᤠᤜ᤺ᤸᤗᤧ ᤁᤢᤛ᤻ᤛᤠ ᤜᤳᤋᤢᤛ॥ 3 ᤐᤖᤥᤛᤖᤧ ᤁᤢᤜᤡᤶᤛᤕᤱᤗᤠᤶ—ᤈᤁᤖᤡᤕᤠ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤂᤢᤴᤇᤡ᤹ ᤔᤡᤱ ᤁᤧᤛᤠᤵᤐᤠ ᥇᥋᥆ ᤕᤧᤶᤒᤡᤳᤇᤠᤜᤠ᤹ (ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤕᤠ᤺ᤶᤒᤣᤀᤥ ᤛᤠᤵᤗᤠᤔᤢᤴᤍᤣ ᤘᤕᤧ) 4 ᤐᤜᤋ-ᤔᤥᤀᤠᤒᤖᤧ ᤁᤢᤜᤡᤶᤛᤕᤱᤗᤠᤶ—ᤈᤖᤕᤠᤜᤖᤧ ᤁᤢᤛ᤻ᤛᤠ ᤀᤣᤗᤩᤜᤥᤀᤣᤏᤤ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᥈᥆᥆ ᤕᤧᤶᤒᤡᤳᤇᤠ॥ 5 ᤈᤳᤋᤢᤖᤧ ᤁᤢᤜᤡᤶᤛᤕᤱᤗᤠᤶ—ᤕᤜᤠᤛᤣᤗᤖᤧ ᤁᤢᤛ᤻ᤛᤠ ᤛᤁᤏᤩᤠᤜ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᥉᥆᥆ ᤕᤧᤶᤒᤡᤳᤇᤠᤜᤠ᤹॥ 6 ᤀᤠᤍᤡᤏᤖᤧ ᤁᤢᤜᤡᤶᤛᤕᤱᤗᤠᤶ—ᤈᤥᤏᤠᤌᤏᤖᤧ ᤁᤢᤛ᤻ᤛᤠ ᤀᤣᤒᤣᤍ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᥋᥆ ᤕᤧᤶᤒᤡᤳᤇᤠᤜᤠ᤹॥ 7 ᤀᤣᤗᤠᤔᤖᤧ ᤁᤢᤜᤡᤶᤛᤕᤱᤗᤠᤶ—ᤀᤋᤗᤩᤠᤜᤖᤧ ᤁᤢᤛ᤻ᤛᤠ ᤕᤛᤕᤠᤜ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᥍᥆ ᤕᤧᤶᤒᤡᤳᤇᤠᤜᤠ᤹॥ 8 ᤛᤐᤋᤩᤠᤜᤖᤧ ᤁᤢᤜᤡᤶᤛᤕᤱᤗᤠᤶ—ᤔᤡᤂᤠᤀᤣᤗᤖᤧ ᤁᤢᤛ᤻ᤛᤠ ᤈᤒᤍᤡᤕᤠᤜ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᥎᥆ ᤕᤧᤶᤒᤡᤳᤇᤠᤜᤠ᤹॥ 9 ᤕᤥᤀᤠᤒᤖᤧ ᤁᤢᤜᤡᤶᤛᤕᤱᤗᤠᤶ—ᤕᤜᤡᤀᤣᤗᤖᤧ ᤁᤢᤛ᤻ᤛᤠ ᤀᤥᤒᤍᤡᤕᤠ ᤂᤧᤶᤒᤩᤠᤱ ᤂᤢᤏᤧ᤹ᤏᤢ ᥈᥇᥎ ᤕᤧᤶᤒᤡᤳᤇᤠᤜᤠ᤹॥ 10 ᤒᤠᤏᤡᤖᤧ ᤁᤢᤜᤡᤶᤛᤕᤱᤗᤠᤶ—ᤕᤥᤛᤡᤐᤡᤕᤠ᤺ᤸᤗᤧ ᤁᤢᤛ᤻ᤛᤠ ᤛᤗᤥᤔᤡᤋ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᥇᥌᥆ ᤕᤧᤶᤒᤡᤳᤇᤠᤜᤠ᤹॥ 11 ᤒᤣᤒᤤᤖᤧ ᤁᤢᤜᤡᤶᤛᤕᤱᤗᤠᤶ—ᤒᤣᤒᤤᤖᤧ ᤁᤢᤛ᤻ᤛᤠ ᤈᤁᤖᤡᤕᤠ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᥈᥎ ᤕᤧᤶᤒᤡᤳᤇᤠᤜᤠ᤹॥ 12 ᤀᤈ᤻ᤃᤠᤍᤖᤧ ᤁᤢᤜᤡᤶᤛᤕᤱᤗᤠᤶ—ᤜᤰᤁᤠᤋᤠᤏᤖᤧ ᤁᤢᤛ᤻ᤛᤠ ᤕᤥᤜᤠᤏᤠᤏ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᥇᥇᥆ ᤕᤧᤶᤒᤡᤳᤇᤠᤜᤠ᤹॥ 13 ᤀᤍᤥᤏᤡᤁᤠᤔᤖᤧ ᤁᤢᤜᤡᤶᤛᤕᤱᤗᤠᤶ—ᤀᤣᤗᤡᤐᤣᤗᤣᤋ. ᤕᤡᤀᤣᤗ ᤏᤢ ᤛᤔᤠᤕᤠᤜ ᤂᤧᤒᤩᤠᤱ ᤂᤧᤱᤜᤠ᤹ᤏᤢ ᥌᥆ ᤕᤧᤶᤒᤡᤳᤇᤠᤜᤠ᤹ (ᤂᤧᤱᤜᤠ᤹ ᤕᤠᤱᤛᤡ ᤁᤢᤓᤠ ᤕᤧᤶ ᤀᤣᤃᤠᤱ ᤔᤧᤏᤢ᤺ᤰᤂᤧ ᤔᤧᤓᤧᤖᤧᤀᤠᤱ ᤔᤧᤘᤕᤧ॥) 14 ᤒᤡᤃᤫᤤᤖᤧ ᤁᤢᤜᤡᤶᤛᤕᤱᤗᤠᤶ—ᤀᤢᤳᤋᤤ ᤏᤢ ᤈᤰᤁᤢᤖ ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᥍᥆ ᤕᤧᤶᤒᤡᤳᤇᤠᤜᤠ᤹ ᤔᤧᤘᤕᤧᤖᤥ॥ ᤀᤧᤈᤪᤠ᤺ᤸᤗᤧ ᤔᤠᤱᤜᤡᤶᤔᤡᤸᤗᤧ ᤗᤠᤃᤡ ᤗᤧᤒᤡᤜᤠ᤹ ᤁᤥ᤺ᤳᤋᤢᤛᤡ 15 ᤀᤠᤱᤃᤠ᤹ ᤁᤧᤖᤧᤰ ᤔᤏᤠᤜᤠ᤹ ᤀᤜᤠᤘᤠ ᤕᤧᤰᤕᤰ ᤗᤧᤵᤔᤠᤱ ᤁᤧᤒᤣ᤺ᤰᤐᤠ ᤘᤠᤗᤠᤶᤔᤡᤸᤗᤧ ᤁᤢᤒᤣᤛᤠᤱ ᤛᤢᤵᤛᤢᤱᤛᤡᤱ ᤜᤧᤰᤁᤩᤠᤱ ᤀᤠᤏᤡᤃᤣ ᤂᤧᤵᤔᤥ ᤛᤢᤶᤕᤠᤴ ᤌᤠᤖᤡᤰ ᤛᤠ᤺ᤱᤃᤠᤜᤡᤶ ᤆᤥ᤺ᤰᤔᤏᤠᤀᤠᤱ ᤕᤢᤱᤔᤏᤠ॥ ᤂᤧᤴ ᤔᤏᤠᤛᤢᤶᤔᤥ ᤏᤡᤱᤘᤠ᤹ᤑᤢᤛᤠᤶᤒᤠᤃ ᤔᤧᤘᤕᤧ ᤁᤖ ᤗᤧᤒᤡᤜᤠ᤹ ᤔᤧᤜᤥ᤺ᤵᤋᤧᤒᤠ ᤀᤠᤱᤃᤠ᤹ ᤏᤡᤛᤢᤱ॥ 16 ᤁᤸᤗᤧᤆᤥᤃᤢᤸᤗᤧ ᤀᤣᤗᤡᤀᤣᤈᤖ. ᤀᤖᤡᤀᤣᤗ. ᤛᤔᤠᤕᤠᤜ. ᤀᤣᤸᤏᤠᤋᤠᤏ. ᤕᤠᤖᤡᤒ. ᤀᤣᤸᤏᤠᤋᤠᤏ. ᤏᤠᤋᤠᤏ. ᤈᤁᤖᤡᤕᤠ ᤏᤢ ᤔᤛᤢᤸᤗᤠᤔ ᤑᤠᤱᤛᤡ ᤗᤠᤶᤗᤥᤒᤠᤜᤠ᤹ ᤜᤧᤰᤁᤩᤠᤱ ᤏᤧᤵᤑᤢ ᤛᤡᤰᤛᤠᤶᤒᤠ ᤕᤥᤕᤠᤖᤡᤒᤧᤴ ᤏᤢ ᤀᤣᤸᤏᤠᤋᤠᤴᤏᤧᤴ ᤀᤢ᤺ᤳᤋᤢᤱᤛᤡᤱ॥ 17 ᤀᤠᤱᤃᤠ᤹ ᤂᤧᤱᤜᤠ᤹ ᤁᤠᤛᤡᤐᤡᤕᤠᤒᤠ ᤛᤢᤓᤠ ᤀᤡᤍ᤻ᤍᤥᤖᤀᤥ ᤐᤠᤱᤄᤢᤱᤛᤡᤱ॥ ᤂᤢᤏᤧ᤹ ᤏᤢ ᤔᤠᤱᤜᤡᤶᤔᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤂᤢᤏᤧ᤹ ᤁᤢᤓᤠ᤹ᤒᤠᤱ ᤔᤏᤠᤜᤠ᤹ ᤔᤠᤱᤜᤡᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤔᤏᤠᤜᤠ᤹ ᤐᤠᤱᤄᤢᤛᤡᤖ ᤑᤠ᤹ᤀᤠᤱ ᤀᤡᤱᤄᤱ ᤔᤧᤜᤠᤰᤋᤢᤖ ᤕᤠ᤺ᤴᤍᤢᤱᤛᤡᤱ॥ 18 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤂᤧᤱᤜᤠ᤹ᤖᤧ ᤀᤠᤏᤡᤃᤧᤀᤥ ᤔᤜᤗᤡ ᤜᤡᤶᤛᤕᤱᤒᤠ ᤛᤖᤣᤒᤡᤕᤠᤜ ᤔᤡᤱ ᤁᤧᤘᤠ᤺ᤵᤐᤠ ᤛᤠ᤹ᤖᤡᤰ ᤛᤢᤶᤒᤥᤎᤠᤛᤠᤒᤠ ᤗᤧᤒᤡ ᤔᤏᤠᤎᤡᤰ ᤐᤠᤱᤄᤢ ᤋᤠᤛᤢ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤢᤛ᤻ᤛᤠᤜᤠ᤹ ᤂᤧᤒᤩᤠᤱ ᤁᤢᤃᤠ᤹ᤀᤡᤜᤠ᤹ ᤁᤧᤖᤧᤰᤗᤧ ᤌᤡᤒᤥᤱᤅᤠᤱ ᤕᤧᤳᤇᤡ ᤕᤧᤶᤒᤡᤳᤇᤠ ᤔᤧᤍᤩᤧ॥ 19 ᤂᤧᤱᤜᤠ᤹ᤖᤧ ᤜᤛᤒᤩᤠᤜᤴ ᤜᤧᤰᤁᤩᤠᤱ ᤔᤖᤠᤖᤡ ᤜᤡᤶᤛᤕᤱᤒᤠ ᤕᤛᤕᤠᤜ᤺ᤴᤏᤢ ᤛᤥᤖᤡᤰ ᤂᤧᤸᤗᤧ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ ᤜᤧᤰᤁᤩᤠᤱ ᤁᤢᤴᤏᤠᤰᤐᤠᤜᤠ᤹ ᤁᤧᤖᤧᤰᤗᤧ ᤏᤡᤒᤥᤱ ᤕᤧᤶᤒᤡᤳᤇᤠᤜᤠ᤹ ᤔᤧᤒᤠᤱᤄᤢᤛᤡ॥ 20 ᤂᤧᤴᤏᤢ᤺ᤸᤗᤧ ᤘᤣ᤹ ᤔᤠᤱᤜᤡᤶᤔᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤁᤡᤵ ᤏᤧᤳᤇᤡᤀᤠᤱ ᤏᤡᤒᤥᤱ ᤔᤧᤘᤕᤧ. ᤗᤧᤒᤡᤜᤠ᤹ ᤔᤧᤓᤠ᤹ᤖᤢᤛᤡᤖ ᤑᤠ᤹ᤀᤠᤱ ᤔᤠᤱᤛᤧᤘᤠ ᤁᤧᤈᤥ᤺ᤰᤐᤠᤜᤠ᤹ ᤛᤣ᤺ᤰᤕᤢᤰ ᤆᤥ᤺ᤰᤔᤠ ᤌᤡᤶᤔᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤌᤧᤒᤠᤜᤠ᤹ ᤍᤠᤀᤢᤍ ᤜᤠᤱ ᤏᤢ ᤂᤢᤏᤧ᤹ ᤁᤢᤜᤠᤱ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤧᤕᤢᤰᤂᤢᤀᤠᤱ ᤘᤕᤧ॥ ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤔᤡᤱᤜᤠ᤹ ᤔᤡᤱᤏᤠ᤺ᤳᤋᤥ ᤛᤠᤵᤋᤧᤀᤠᤱ ᤐᤳᤇᤧᤖᤥ॥ ᤀᤧᤈᤪᤠ᤺ᤸᤗᤧ ᤔᤏᤠᤜᤠ᤹ ᤋ᤺ᤰᤏᤧᤳ ᤕᤢᤱᤔᤠ ᤏᤢ ᤐᤣᤗᤡᤃᤧᤴ ᤋᤢᤘᤠ ᤆᤥ᤺ᤰᤔᤥ ᤗᤠᤶᤗᤥᤛᤢᤛᤡ 21 ᤂᤧᤵᤔᤥ ᤀᤜᤠᤘᤠ ᤘᤠᤗᤡ᤺ᤸᤗᤧ ᤁᤢᤕᤠᤀᤥ ᤁᤧᤖᤧᤰ ᤋ᤺ᤰᤏᤧᤳ ᤕᤢᤱᤔᤠᤖᤧ ᤗᤠᤃᤡ ᤏᤢ ᤀᤠᤒᤠᤅᤣ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤐᤥᤱᤔᤠᤖᤧ ᤗᤠᤃᤡ ᤜᤧᤰᤁᤩᤠᤱ ᤀᤠᤏᤡᤃᤣ ᤗᤠᤶᤍᤡ᤺ᤰᤁᤥ ᤂᤢᤏᤧ᤹ ᤗᤠᤶᤗᤥᤛᤡᤃᤧᤖ ᤜᤧᤰᤁᤩᤠᤱ ᤀᤠᤏᤡᤃᤣ ᤀᤠᤒᤠᤅᤣ ᤗᤠᤃᤡ. ᤕᤠᤱᤛᤠᤁᤢᤴᤎᤣᤖᤧ ᤗᤠᤃᤡ ᤏᤢ ᤛᤠᤀᤣᤜᤠ᤹ ᤋᤠᤱᤛᤧ᤺ᤵᤔᤠᤛᤡᤖᤧ ᤗᤠᤃᤡ ᤐᤣᤗᤡᤃᤧᤴ ᤋᤢᤘᤠ ᤆᤥ᤺ᤰᤔᤠ ᤐᤠᤱᤄᤢᤱᤛᤡᤱ॥ 22 ᤗᤠᤶᤍᤡ᤺ᤰᤁᤥ ᤏᤡᤱᤔᤡᤜᤠ᤹ᤗᤠᤶᤒᤠ ᤀᤠᤏᤡᤃᤣ ᤋᤠᤱᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤐᤕᤶ ᤜᤠᤱᤅᤡᤴ ᤀᤴᤃᤧᤕᤢᤰᤐᤠ ᤌᤰᤛᤢᤒᤠ ᤋᤢᤖᤠ ᤏᤠ᤺ᤰᤔᤠ ᤀᤠᤱᤃᤠ᤹ ᤏᤢ᤺ᤴᤍᤠᤱ ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤀᤥ ᤏᤡᤱᤘᤠ᤹ ᤁᤧᤕᤢᤱᤒᤠᤜᤠ᤹ ᤁᤧᤖᤧᤰ ᤔᤢ᤹ᤀᤡᤛᤠᤶ ᤐᤡᤖᤢᤛᤡ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤏᤠ᤹ᤒᤠᤜᤠ᤹ᤏᤢ ᤁᤢᤏᤡᤱᤘᤠ᤹ ᤔᤧᤍᤠᤏᤧᤴᤏᤠᤱ ᤂᤢᤶᤍᤡᤱ ᤐᤡᤖᤢᤛᤡ᤹ ᤜᤠᤱᤅᤡᤴ ᤔᤧᤳᤋᤢᤱᤅᤠᤱ ᤘᤕᤠᤱ॥ 23 ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡᤃᤣ ᤋ᤺ᤰᤏᤧᤳ ᤕᤢᤱᤔᤏᤠ ᤜᤧᤰᤁᤩᤠᤱ ᤀᤠᤏᤡᤃᤣ ᤋᤠᤱᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤔᤏᤠ ᤂᤧᤒᤩᤠᤱ ᤂᤢᤏᤧ᤹ ᤀᤠᤏᤡᤃᤣ ᤐᤣᤗᤡᤴ ᤂᤧᤵᤛᤢᤀᤠᤱ ᤏᤥᤃᤵ ᤐᤡᤖᤡᤃᤧᤖᤥ॥ ᤔᤠᤱᤜᤡᤶᤔᤡᤸᤗᤧ ᤗᤠᤃᤡ ᤜᤢᤰᤘᤠᤕᤠᤱ 24 ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤗᤠᤶ ᤀᤠᤱᤃᤠ᤹ ᤛᤖᤣᤒᤡᤕᤠᤜ. ᤜᤛᤒᤩᤠᤜ ᤏᤢ ᤘᤣ᤹ ᤌᤡᤒᤥᤱ ᤔᤏᤠᤜᤠ᤹ ᤛᤣᤃᤢᤱᤛᤡᤱ॥ 25 ᤂᤧᤒᤩᤠᤱ ᤀᤠᤱᤃᤠ᤹ ᤐᤕᤶ ᤜᤠᤱ. ᤁᤢᤛᤢᤈᤠᤛᤠᤒᤠ ᤜᤧᤰᤁᤩᤠᤱ ᤛᤢᤜᤠᤱᤃᤧᤶᤒᤠᤜᤠ᤹ ᤏᤢ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤔᤠᤱᤜᤡᤶᤔᤥ ᤕᤠᤱᤔᤠ ᤑᤠ᤹ᤀᤠᤱ ᤔᤧᤒᤡᤖᤡᤃᤧᤒᤠ ᤛᤠᤶᤔᤩᤠᤱ. ᤕᤢᤵᤐᤠ ᤏᤢ ᤂᤵᤐᤩᤠᤜᤠ᤹ ᤌᤠᤱᤄᤢᤱᤅᤠᤱ ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤐᤡᤖᤢᤱᤛᤡᤱ॥ 26 ᤀᤠᤱᤃᤠ᤹ ᤂᤧᤱᤜᤠ᤹ ᤁᤴ ᤐᤠ᤺ᤴᤜᤠ᤹ ᤐᤡᤖᤢᤱᤛᤡᤱ— ᥈᥈.᥆᥆᥆ ᤁᤡᤗᤥᤃᤪᤠᤔ ᤕᤢᤵᤐᤠ. ᥉.᥊᥆᥆ ᤁᤡᤗᤥᤃᤪᤠᤔ ᤕᤢᤵᤐᤠ ᤂᤵᤐᤩᤠᤜᤠ᤹. ᥉.᥊᥆᥆ ᤁᤡᤗᤥᤃᤪᤠᤔ ᤛᤠᤶᤔᤩᤠᤱ. 27 ᥎ ᤁᤡᤗᤥᤃᤪᤠᤔ ᤛᤠᤶᤔᤩᤠᤱ ᤇᤧ᤺ᤱᤃᤩᤠ. ᤜᤧᤰᤁᤩᤠᤱ ᤁᤢᤔᤧᤴ ᤁᤧᤄᤡ᤺ᤰᤐᤠ ᤏᤢᤒᤠ ᤁᤠᤛᤠ ᤂᤵᤐᤩᤠ ᤏᤧᤳᤇᤡ ᤐᤡᤖᤢᤱᤛᤡᤱ॥ 28 ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤳᤋᤢᤱᤛᤡᤱ. “ᤂᤡᤏᤡ᤹ᤏᤢ ᤛᤥᤛᤥᤖᤡᤰ ᤁᤴ ᤛᤠᤔᤠᤐᤢᤔᤠᤜᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤛᤣᤛᤣᤒᤠ ᤆᤥᤰ. ᤜᤧᤰᤁᤣᤗ᤹ᤖᤡᤰᤁᤣ ᤀᤠᤒᤠᤅᤣ ᤏᤡᤱᤘᤠ᤺ᤸᤗᤧ ᤜᤢᤰᤘᤠ ᤜᤧᤰᤁᤣ ᤁᤧᤍᤥ᤺ᤴᤍᤢᤶᤒᤠ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤂᤵᤐᤩᤠᤜᤠ᤹ᤀᤠᤱ ᤛᤣᤛᤣᤒᤠ ᤆᤥᤰ॥ 29 ᤔᤠᤱᤜᤡᤶᤔᤥ ᤂᤡᤏᤡ᤹ ᤔᤧᤴᤃᤧᤳᤋᤣ ᤌᤠᤖᤡᤰ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤴ ᤛᤠᤔᤠᤜᤠ᤹ ᤋᤠᤱᤛᤧ᤺ᤵᤋᤧᤶᤔᤧ᤹॥ ᤂᤧᤵᤔᤥ ᤁᤧᤖᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤕᤠᤰᤑᤠᤱᤅᤥ ᤂᤧᤱᤜᤠ᤹ ᤌᤠᤱᤄᤠᤶᤔᤧ᤹ ᤜᤧᤰᤁᤩᤠᤱ ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤏᤢ ᤗᤧᤒᤡᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥᤒᤠ ᤂᤧᤒᤩᤠᤱ ᤕᤖᤢᤛᤗᤧ᤺ᤶᤔᤥ ᤁᤧᤘᤠ᤹ᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥᤒᤠᤜᤠ᤹ ᤐᤡᤖᤧᤶᤛᤡᤶᤔᤧ᤹॥” 30 ᤀᤰᤂᤣᤗ᤹ᤖᤡᤰ ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤏᤢ ᤗᤧᤒᤡᤜᤠ᤹ᤖᤧ ᤂᤧᤴ ᤛᤠᤶᤔᤩᤠᤱ ᤕᤢᤵᤐᤠ ᤂᤵᤐᤩᤠᤜᤠ᤹ ᤕᤖᤢᤛᤗᤧ᤺ᤶᤒᤠ ᤔᤠᤱᤜᤡᤶᤔᤥ ᤁᤧᤵᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤀᤠᤒᤠᤅᤣ ᤗᤰᤐᤧᤴᤛᤠᤒᤠ ᤔᤧᤒᤥ᤺ᤰᤂᤧᤖᤥ॥ ᤕᤖᤢᤛᤗᤧᤔ ᤔᤧᤏᤢ᤺ᤰᤂᤧᤒᤠ 31 ᤌᤡᤰᤛᤡᤃᤣᤰᤐᤠ ᤗᤠ ᤌᤡᤒᤥᤱᤅᤠᤱ ᤏᤧᤳᤇᤡ ᤁᤧᤖᤧᤒᤠ ᤕᤧᤴᤏᤥ ᤀᤠᤏᤡᤃᤣ ᤕᤖᤢᤛᤗᤧᤔ ᤐᤣ᤺ᤰᤔᤠᤖᤧ ᤗᤠᤃᤡ ᤀᤜᤠᤘᤠᤒᤠ ᤘᤠᤗᤡᤴ ᤗᤧᤖᤢᤶᤒᤧ॥ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤧᤏᤢ ᤘᤕᤧ ᤜᤧᤰᤁᤩᤠᤱ ᤀᤠᤏᤡᤃᤣ ᤗᤠᤶᤍᤡ᤺ᤰᤁᤥ ᤏᤡᤱᤔᤡᤜᤠ᤹ᤖᤧ ᤑᤵᤔᤠ ᤏᤢ ᤗᤠᤶᤛᤢᤰᤔᤠᤗᤠᤶ ᤋᤠᤱᤛᤧ᤺ᤵᤋᤡᤃᤧ॥ 32 ᤕᤖᤢᤛᤗᤧᤔ ᤁᤧᤖᤡᤃᤧᤀᤠᤱ ᤀᤠᤏᤡᤃᤣ ᤛᤢᤶᤕᤧᤴ ᤌᤠᤖᤡᤰ ᤏᤠ᤺ᤶᤔᤠᤛᤡᤃᤧ॥ 33 ᤗᤡᤕᤠᤴ ᤁᤧᤖᤧᤒᤠ ᤕᤧᤴᤏᤥ ᤔᤠᤱᤜᤡᤶᤔᤥ ᤀᤠᤏᤡᤃᤣ ᤐᤣᤃᤡᤃᤧ. ᤕᤢᤵᤐᤠ. ᤛᤠᤶᤔᤩᤠᤱ ᤏᤢ ᤛᤢᤳᤌᤥ ᤂᤵᤐᤩᤠᤜᤠ᤹ ᤌᤠᤱᤄᤢᤶᤒᤧ ᤜᤧᤰᤁᤩᤠᤱ ᤀᤢᤖᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤔᤖᤣᤔᤥᤋ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤜᤢᤰᤛᤢᤵᤋᤢᤶᤒᤧ॥ ᤂᤢᤏᤧ᤹ᤏᤢ ᤐᤡᤏᤜᤠᤛᤖᤧ ᤁᤢᤛ᤻ᤛᤠ ᤀᤣᤗᤠᤈᤠᤖᤧᤴ ᤘᤕᤧ. ᤜᤧᤰᤁᤩᤠᤱ ᤏᤧᤳᤇᤡ ᤗᤧᤒᤡ ᤕᤣᤛᤢᤀᤠᤖᤧ ᤁᤢᤛ᤻ᤛᤠ ᤕᤥᤈᤠᤒᤠᤍᤧᤴ ᤏᤢ ᤒᤡᤴᤏᤢᤀᤡᤖᤧ ᤁᤢᤛ᤻ᤛᤠ ᤏᤥᤀᤍᤡᤕᤠᤴ ᤘᤕᤧᤛᤡ॥ 34 ᤁᤧᤖᤧᤰ ᤆᤡᤃᤰᤘᤠᤜᤠ᤹ ᤏᤡᤖᤢᤶᤒᤧᤀᤠᤱ ᤌᤠᤱᤄᤢᤶᤒᤧ ᤜᤧᤰᤁᤩᤠᤱ ᤂᤧᤴᤏᤢ ᤛᤥᤛᤥᤖᤡᤰ ᤁᤧᤖᤧᤰ ᤛᤠᤵᤗᤠᤔᤢᤎᤡᤱᤜᤠ᤹ ᤕᤠᤖᤡᤵ ᤆᤥᤃᤢᤶᤒᤧ॥ 35 ᤂᤧᤴ ᤀᤣᤃᤠᤱ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤁᤧᤏᤢ᤺ᤱᤒᤠ ᤁᤧᤓᤧᤶᤒᤠ ᤁᤧᤖᤧᤰᤗᤧ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤛᤡᤍᤢᤱᤓᤈᤠᤜᤠ᤹ ᤔᤧᤍᤠᤖᤢ॥ ᤂᤧᤱᤜᤠ᤹ᤖᤧ ᤁᤧᤖᤧᤰ ᤀᤡᤛᤪᤠᤀᤡᤗᤖᤧ ᤗᤠᤃᤡ ᤌᤡᤒᤥᤱᤅᤠᤱ ᤏᤧᤳᤇᤡ ᤛᤧᤃᤶᤒᤠ ᤐᤡᤳ. ᤑᤠᤱᤒᤥᤱᤅᤠᤱ ᤋᤢᤰᤛᤡ ᤕᤶᤒᤠ ᤔᤧᤸᤗᤢᤰ ᤏᤢ ᤏᤢᤒᤥᤱᤅᤠᤱ ᤏᤢᤛᤡ ᤌᤢ᤺ᤶᤒᤠ ᤛᤡᤍᤢᤱᤈᤓᤠ ᤔᤧᤈᤥᤃᤢ॥ ᤂᤧᤱᤜᤠ᤹ᤖᤧ ᤌᤡᤒᤥᤱᤅᤠᤱ ᤏᤧᤳᤇᤡ ᤔᤧ᤺ᤴᤍᤒᤁᤠᤀᤠᤱ ᤀᤠᤒᤠᤅᤣ ᤗᤠᤕᤥᤗᤠᤶ ᤛᤢᤳᤌᤥ ᤔᤧᤈᤥᤰᤛᤡᤱᤗ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤔᤧᤍᤥᤴᤍᤢ॥ ᤁᤴ ᤁᤧᤖᤧᤰ ᤌᤰᤛᤠᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤛᤡ॥ 36 ᤐᤕᤶ ᤜᤠᤱᤅᤡᤸᤗᤧ ᤐᤡᤖᤢᤛᤡᤒᤠ ᤛᤠᤵᤗᤠᤔᤢᤴᤍᤣᤜᤠ᤹ᤀᤠᤱ ᤔᤧᤕᤠᤱᤛᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤠᤶᤎᤠ ᤐᤡᤛᤠᤱᤒᤠ ᤕᤢᤑᤪᤣᤋᤡᤛ ᤋᤧᤱᤃᤵᤐᤥᤒᤠ ᤋᤢᤶ ᤜᤠᤱᤕᤢᤰᤐᤠ ᤏᤢ ᤛᤢᤜᤠᤱᤃᤧᤶᤒᤠᤜᤠ᤹ ᤔᤧᤒᤡᤖᤢᤛᤡ ᤂᤧᤒᤩᤠᤱ ᤂᤧᤴ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤧᤴ ᤀᤣᤃᤠᤱ ᤀᤡᤛᤪᤠᤀᤡᤗᤡᤜᤠ᤹ ᤏᤢ ᤔᤠᤱᤜᤡᤶᤔᤥ ᤛᤧᤘᤠ ᤆᤥ᤺ᤰᤔᤠ ᤕᤠ᤺ᤶᤒᤰᤁᤥ ᤔᤧᤓᤠ᤹ᤖᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.