ᤀᤧᤈᤪᤠ 7 - LIFOTNTᤀᤧᤈᤪᤠᤴ ᤕᤖᤢᤛᤗᤧᤔ ᤋᤠ᤹᤺ 1 ᤕᤖᤡᤰ ᤋᤱᤒᤣ ᤀᤣᤃᤠᤱ ᤀᤷᤋᤠᤛᤠᤛ᤻ᤋᤧᤴ ᤑᤠᤖᤛ ᤗᤠᤈᤣ᤹ᤒᤠ ᤐᤕᤶ ᤜᤠᤱ ᤘᤕᤧᤸᤗᤧ ᤀᤧᤈᤪᤠ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠᤎᤡᤰ ᤘᤕᤧ॥ ᤂᤢᤏᤧ᤹ ᤁᤢᤶᤒᤠ ᤁᤢᤴᤎᤧᤒᤠ. ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤖᤢᤏ ᤌᤠᤖᤡᤰ ᤀᤰᤂᤣᤗ᤹ᤖᤡᤰ ᤁᤢᤎᤠ᤺ᤰᤔᤡᤱ ᤘᤕᤧ—ᤀᤧᤈᤪᤠᤴ ᤛᤖᤠᤕᤠᤜ᤺ᤸᤗᤧ ᤁᤢᤛ᤻ᤛᤠ ᤘᤕᤧ॥ ᤛᤖᤠᤕᤠᤜᤴ ᤀᤈᤷᤕᤠᤜ᤺ᤸᤗᤧ ᤁᤢᤛ᤻ᤛᤠ ᤘᤕᤧ॥ ᤀᤈᤷᤕᤠᤜᤴ. ᤜᤡᤸᤁᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤘᤕᤧ॥ 2 ᤜᤡᤸᤁᤡᤕᤠᤜᤴ ᤛᤸᤗᤢᤔᤗᤧ ᤁᤢᤛ᤻ᤛᤠ. ᤛᤸᤗᤢᤔᤡᤴ ᤛᤠᤍᤥᤁᤧᤸᤗᤧ ᤁᤢᤛ᤻ᤛᤠ ᤜᤧᤰᤁᤩᤠᤱ ᤛᤠᤍᤥᤁᤧᤴ ᤀᤜᤡᤋᤢᤒᤧᤸᤗᤧ ᤁᤢᤛ᤻ᤛᤠ ᤘᤕᤧ॥ 3 ᤀᤜᤡᤋᤢᤒᤧᤴ ᤀᤔᤷᤕᤠᤜ᤺ᤸᤗᤧ ᤁᤢᤛ᤻ᤛᤠ. ᤀᤔᤷᤕᤠᤜᤴ ᤀᤈᤷᤕᤠᤜ᤺ᤸᤗᤧ ᤜᤧᤰᤁᤩᤠᤱ ᤀᤈᤷᤕᤠᤜᤴ ᤔᤖᤠᤕᤥᤋᤧᤸᤗᤧ ᤁᤢᤛ᤻ᤛᤠ ᤘᤕᤧ॥ 4 ᤔᤖᤠᤕᤥᤋᤧᤴ ᤈᤖᤕᤠᤜ᤺ᤸᤗᤧ ᤁᤢᤛ᤻ᤛᤠ. ᤈᤖᤕᤠᤜᤴ ᤀᤢᤈ᤻ᤈᤡ᤺ᤸᤗᤧ ᤁᤢᤛ᤻ᤛᤠ. ᤀᤢᤈ᤻ᤈᤡᤴ ᤒᤢᤰᤁᤡ᤺ᤸᤗᤧ ᤁᤢᤛ᤻ᤛᤠ. 5 ᤒᤢᤰᤁᤡᤴ ᤀᤒᤡᤛᤢ᤺ᤸᤗᤧ ᤁᤢᤛ᤻ᤛᤠ. ᤀᤒᤡᤛᤢᤴ ᤐᤡᤏᤜᤠᤛᤧᤸᤗᤧ ᤁᤢᤛ᤻ᤛᤠ. ᤐᤡᤏᤜᤠᤛᤧᤴ ᤀᤣᤗᤠᤈᤠᤖᤧᤸᤗᤧ ᤁᤢᤛ᤻ᤛᤠ ᤜᤧᤰᤁᤩᤠᤱ ᤀᤣᤗᤠᤈᤠᤖᤧᤴ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤠᤖᤢᤏᤧᤸᤗᤧ ᤁᤢᤛ᤻ᤛᤠ ᤘᤕᤧ॥ 6 ᤁᤴ ᤀᤧᤈᤪᤠᤴ ᤒᤣᤒᤡᤗᤥᤏᤗᤠᤶ ᤁᤧᤓᤧᤶᤒᤠ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤥᤛᤠ᤺ᤴᤗᤠᤶ ᤀᤡᤛᤪᤠᤀᤡᤗᤡᤜᤠ᤹ ᤐᤡᤖᤢᤛᤡᤒᤠ ᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤁᤧᤖᤧᤰ ᤛᤠᤶᤈᤡᤰ ᤏᤡᤱᤘᤠ᤹ ᤁᤧᤃᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠ ᤘᤕᤧ॥ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤢᤰᤁᤡᤴ ᤀᤧᤈᤪᤠ᤺ᤸᤗᤧ ᤁᤢᤛᤶᤎᤠᤱ ᤐᤳᤇᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤏᤠ᤺ᤰᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤕᤶ ᤜᤠᤱᤅᤡᤸᤗᤧ ᤂᤢᤏᤧ᤹ ᤐᤡᤖᤢ॥ 7 ᤀᤷᤋᤠᤛᤠᤛ᤻ᤋᤧᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤢᤛᤡ ᤋᤱᤒᤣ ᤁᤧᤖᤧᤸᤗᤧ ᤁᤢᤗᤢᤵ ᤌᤡᤰ ᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤛᤥᤖᤡᤰ ᤒᤣᤒᤡᤗᤥᤏᤡᤕᤠᤗᤠᤶ ᤕᤖᤢᤛᤗᤧ᤺ᤶᤔᤥ ᤔᤧᤒᤣ॥ ᤂᤧᤴ ᤗᤢᤵᤐᤥ ᤏᤡᤱᤘᤠ᤹ᤑᤢᤛᤠᤶᤒᤠ. ᤗᤧᤒᤡ. ᤔᤠᤱᤜᤡᤶᤔᤥᤒᤠ ᤛᤠᤶᤃᤧᤗᤥᤒᤠᤜᤠ᤹ ᤜᤧᤰᤁᤩᤠᤱ ᤔᤠᤱᤜᤡᤶ ᤁᤧᤃᤥᤒᤠᤜᤠ᤹ ᤏᤢ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤔᤧᤘᤕᤧ॥ 8 ᤂᤧᤴ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤢᤛᤡ ᤋᤱᤒᤣᤒᤠ ᤅᤠᤛᤡᤃᤣᤰᤐᤠ ᤗᤠᤀᤥ ᤀᤧᤈᤪᤠᤴ ᤕᤖᤢᤛᤗᤧᤔ ᤁᤧᤖᤧ॥ 9 ᤌᤡᤰᤛᤡᤃᤣᤰᤐᤠ ᤗᤠ᤺ᤸᤗᤧ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤀᤧᤈᤪᤠᤴ ᤒᤣᤒᤡᤗᤥᤏᤡᤕᤠᤗᤠᤶ ᤌᤠᤛᤡᤱ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤠ᤹ᤖᤢᤀᤠᤱ ᤗᤠ ᤅᤠᤛᤡ ᤁᤧᤖᤧᤒᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤕᤖᤢᤛᤗᤧᤔ ᤁᤧᤖᤧᤓᤧᤖᤧ॥ 10 ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤏᤡ᤺ᤵᤔᤠ. ᤂᤧᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤢ ᤂᤧᤴ ᤁᤧᤖᤧᤰ ᤁᤢᤓᤠᤱ ᤌᤡᤶᤜᤠ᤹ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤜᤢ᤹ᤔᤠᤛᤡᤖᤧ ᤗᤠᤃᤡ ᤀᤧᤈᤪᤠ᤺ᤸᤗᤧ ᤁᤢᤜᤡᤱᤔᤧᤴ ᤋᤣᤛᤢᤀᤠᤱ ᤘᤕᤧᤖᤥ॥ ᤀᤷᤋᤠᤛᤠᤛ᤻ᤋᤖᤧ ᤀᤧᤈᤪᤠᤴ ᤐᤡᤖᤢᤒᤠ ᤕᤢᤰ ᤛᤰ 11 ᤐᤕᤶ ᤜᤠᤱ ᤀᤷᤋᤠᤛᤠᤛ᤻ᤋᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤐᤡᤖᤢᤛᤡᤒᤠ ᤁᤢᤛᤠᤶᤕᤥᤌᤡᤶᤔᤡᤴ ᤏᤢ ᤁᤢᤀᤡᤱᤈᤠᤱᤜᤠ᤹ ᤁᤧᤖᤧᤰ ᤛᤠᤶᤈᤡᤰ ᤏᤡᤱᤘᤠ᤹ ᤁᤧᤃᤵᤐᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤏᤢ ᤛᤠᤶᤕᤥᤌᤡᤶᤛᤠᤶᤒᤠ ᤀᤧᤈᤪᤠᤴ ᤀᤰᤋᤱᤒᤠ ᤕᤢᤰ ᤛᤰ ᤐᤡᤖᤢ— 12 “ᤜᤠᤱᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤀᤷᤋᤠᤛᤠᤛ᤻ᤋᤗᤠᤶ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤛᤠᤶᤈᤡᤰ ᤁᤧᤃᤵᤐᤠ ᤛᤠᤶᤕᤥᤌᤡᤶᤛᤠᤶᤒᤠ. ᤏᤡᤱᤘᤠ᤹ᤑᤢᤛᤠᤶᤒᤠ ᤀᤧᤈᤪᤠᤀᤣ ᤛᤧᤘᤠᤖᤥ— 13 “ᤀᤠᤱᤃᤠ᤹ ᤁᤠᤰ ᤀᤠᤜᤠᤱᤈᤢᤶᤗᤠᤶᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹. ᤐᤣ᤺ᤰᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤜᤠ᤹. ᤂᤧᤱᤜᤠ᤹ ᤂᤧᤏᤧ᤹ᤏᤢ ᤕᤖᤢᤛᤗᤧ᤺ᤶᤔᤥ ᤐᤣ᤺ᤰᤔᤠ ᤑᤠ᤺ᤰᤋᤢᤱᤛᤡᤱ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤡᤱᤈᤠᤱ ᤐᤡᤖᤢᤱᤛᤡᤱᤗ ᤐᤳᤋᤠ॥ 14 ᤀᤠᤱᤃᤠ᤹ ᤏᤢ ᤏᤢᤛᤡ ᤛᤢᤈᤠᤛᤠᤒᤠᤜᤠ᤹ᤖᤧ ᤂᤧᤏᤧ᤹ ᤕᤖᤢᤛᤗᤧᤔ ᤏᤢ ᤕᤜᤢᤍᤠᤀᤥ ᤐᤠᤱᤅᤠᤛᤡᤃᤧᤖ ᤐᤳᤇᤡᤃᤧ. ᤜᤧᤰᤁᤩᤠᤱ ᤂᤧᤵᤔᤥ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤂᤢᤏᤧ᤹ ᤂᤡᤏᤡ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤁᤧᤒᤡᤖᤡᤀᤠᤱ ᤁᤧᤘᤕᤡ᤹. ᤂᤧᤴ ᤛᤠ᤹ᤖᤡᤰ ᤏᤢᤖᤡᤰᤁᤠᤱ ᤔᤏᤠᤜᤠ᤹ᤖᤧ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤖ ᤔᤧᤘᤠ᤹ᤒᤡ ᤔᤣ᤺ᤶᤒᤡ ᤜᤧᤰᤁᤩᤠᤱ ᤂᤧᤵᤔᤥ ᤀᤠᤰᤋᤱᤒᤠ ᤕᤠᤰᤏᤠᤶ ᤐᤥᤱᤗ ᤐᤳ. ᤂᤧᤴ ᤛᤠ᤹ᤔᤠ ᤀᤥᤔᤧᤵᤔᤠ ᤁᤧᤛᤢᤰᤋᤢ᤹॥ 15 ᤀᤠᤱᤃᤠ᤹ ᤏᤢ ᤏᤢᤛᤡ ᤀᤠᤛᤢᤈᤠᤛᤠᤒᤠᤜᤠ᤹ᤖᤧ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤡᤔᤠ ᤏᤡᤱᤘᤠ᤹ ᤆᤥᤃᤢᤶᤒᤧᤒᤠ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤜᤢᤰᤘᤠᤜᤠ᤹ ᤕᤠᤱᤛᤡᤱᤅᤧ᤹ᤀᤠᤱ ᤂᤧᤏᤧ᤹ ᤐᤣᤃᤧ᤹. ᤂᤢᤏᤧ᤹ ᤁᤢᤜᤡᤶᤔᤡᤴ ᤕᤖᤢᤛᤗᤧ᤺ᤶᤔᤥ ᤏᤧ᤹᤺॥ 16 ᤂᤡᤏᤡ᤹ ᤁᤧᤖᤧᤰ ᤒᤣᤒᤡᤗᤥᤏ ᤋᤧᤱᤃᤵᤐᤥ ᤛᤢᤶᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤒᤠ ᤁᤧᤖᤧᤰ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡ ᤔᤏᤠᤜᤠ᤹ ᤏᤢ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠ ᤀᤠᤵᤑᤣᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤸᤗᤧ ᤗᤠᤃᤡ ᤔᤧᤍᤥᤴᤍᤢᤒᤠ ᤜᤢᤰᤘᤠᤜᤠ᤹ᤀᤠᤱ ᤋᤣ᤹ᤖᤧᤶᤔᤧ᤹ᤀᤠᤱ ᤐᤣᤃᤧᤶᤔᤧ᤹॥ 17 “ᤂᤡᤏᤡ᤹ ᤂᤧᤴ ᤕᤠᤱᤛᤠᤁᤢᤴᤎᤣᤴ ᤑᤛᤧᤶᤔᤧ᤹ᤖ ᤛᤡᤱᤛᤡᤱᤅᤠᤱ ᤛᤧᤃᤶᤒᤠᤜᤠ᤹. ᤔᤧᤸᤗᤢᤰᤜᤠ᤹. ᤌᤢ᤺ᤶᤒᤠᤜᤠ᤹. ᤐᤥᤃᤢᤃᤧᤴ ᤁᤢᤈᤠᤴ. ᤆᤧᤸᤗᤧᤰᤛᤣ᤹ ᤌᤡᤴ ᤀᤡᤅᤧᤶᤔᤧ᤹ ᤜᤧᤰᤁᤩᤠᤱ ᤕᤖᤢᤛᤗᤧᤔ ᤔᤠᤱᤜᤡᤶᤔᤥᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹॥ 18 ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤗᤠᤈᤣ᤹ᤀᤥᤒᤠ ᤗᤠᤈᤣ᤹ᤛᤠᤒᤠᤜᤠ᤹ᤖᤧ ᤏᤡᤱᤘᤠ᤹ ᤁᤧᤈᤥᤃᤢᤶᤒᤠ ᤁᤢᤀᤡᤛᤡᤰ ᤁᤧᤏᤶᤒᤠ ᤛᤠᤶᤔᤩᤠᤱ ᤕᤢᤵᤐᤠᤜᤠ᤹ ᤕᤠᤱᤔᤠ ᤁᤧᤛᤢᤰᤋᤢᤶ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤂᤧᤴ ᤐᤥᤱᤔᤠ ᤐᤥᤱ᤹॥ 19 ᤂᤧᤏᤧ᤹ ᤜᤢᤰᤁᤧᤶᤛᤢᤵᤋᤧᤒᤠ ᤂᤵᤐᤩᤠᤜᤠ᤹ ᤕᤖᤢᤛᤗᤧᤔ ᤔᤠᤱᤜᤡᤶᤔᤥᤒᤠ ᤔᤠᤱᤛᤧᤘᤠ ᤕᤠ᤺ᤶᤒᤰᤁᤥ ᤕᤠᤱᤔᤠᤖᤧ ᤗᤠᤃᤡ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤴᤍᤧ᤹॥ 20 ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤸᤗᤧ ᤗᤠᤃᤡ ᤘᤣ᤹ ᤁᤢᤓᤠ ᤌᤣᤀᤡ ᤐᤠᤴ ᤆᤠᤜᤠ ᤆᤥ᤺ᤰᤏᤧᤓᤃᤪ ᤜᤠᤱ ᤕᤠᤱ ᤕᤠᤱᤔᤠᤍᤧᤴᤏᤥᤗᤠᤶ ᤋᤣ᤹ᤔᤠ ᤁᤧᤛᤢᤰᤋᤢ᤹॥ 21 “ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤛᤠᤶᤕᤥᤌᤡᤶᤛᤠᤶᤒᤠ ᤀᤡᤃᤪ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤧᤈᤪᤠ᤺ᤸᤗᤧ ᤏᤠ᤺ᤰᤋᤢᤒᤠ ᤁᤧᤖᤧᤰ ᤆᤡᤃᤰᤘᤠᤜᤠ᤹ ᤐᤡᤖᤧᤶᤔᤧ᤹ ᤑᤠ᤹ᤀᤠᤱ ᤏᤠᤶᤎᤠ-ᤕᤢᤑᤪᤣᤋᤡᤛ ᤋᤧᤱᤃᤵᤐᤥᤒᤠ ᤁᤧᤖᤧᤰ ᤜᤠᤱ ᤕᤠᤱ ᤕᤠᤱᤔᤠᤍᤧᤴᤏᤥᤒᤠ ᤕᤠᤱᤃᤧᤕᤢᤱᤒᤠᤜᤠ᤹ ᤀᤠᤱᤃᤠ᤹ ᤜᤠᤱ ᤀᤷᤋᤠᤛᤠᤛ᤻ᤋᤧᤸᤗᤧ ᤀᤡᤱᤈᤠᤱ ᤐᤡᤏᤡᤱ. 22 ᤕᤢᤵᤐᤠ ᥉.᥊᥆᥆ ᤁᤡᤗᤥᤃᤪᤠᤔ. ᤔᤠᤛᤡ ᥇᥆.᥆᥆᥆ ᤁᤡᤗᤥᤃᤪᤠᤔ. ᤆᤧᤸᤗᤧᤰᤛᤣ᤹ ᤌᤡ ᥈.᥆᥆᥆ ᤗᤡᤋᤖ. ᤆᤤᤋᤢᤏ ᤏᤡ᤺ᤱᤃᤣ᤹ ᥈.᥆᥆᥆ ᤗᤡᤋᤖ ᤜᤧᤰᤁᤩᤠᤱ ᤆᤠᤜᤠ ᤁᤧᤈᤥ᤺ᤰᤐᤠ ᤕᤠᤖᤡᤰ ᤕᤢᤶ ᤂᤡᤔᤥ ᤂᤢᤏᤧ᤹ ᤐᤡᤖᤧᤶᤔᤧ᤹॥ 23 ᤔᤠᤱᤜᤡᤶᤔᤡᤸᤗᤧ ᤗᤠᤃᤡ ᤆᤠᤜᤠ ᤁᤧᤈᤥ᤺ᤰᤐᤠ ᤁᤧᤖᤧᤰ ᤆᤡᤃᤰᤘᤠᤜᤠ᤹ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤐᤡᤖᤧᤶᤛᤡᤶᤔᤧ᤹ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤏᤢ ᤀᤠᤱᤃᤠ᤹ ᤀᤠᤀᤣᤃᤠᤱᤒᤠ ᤕᤢᤰᤛᤠᤒᤠᤜᤠ᤹ᤀᤥ ᤂᤢᤏᤧ᤹ ᤁᤢᤛᤠᤰᤁᤧᤴ ᤔᤧᤎᤠᤏᤧᤴᤗ॥ 24 ᤏᤡᤱᤘᤠ᤹ᤑᤢᤛᤠᤶᤒᤠ. ᤗᤧᤒᤡ. ᤛᤠᤶᤃᤧᤗᤥᤒᤠ. ᤗᤠᤶᤃᤧᤃᤥᤒᤠ. ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤀᤡᤃᤪ ᤔᤠᤱᤜᤡᤶᤔᤡᤴᤏᤢ ᤁᤧᤈᤰᤛᤡᤱᤒᤠ ᤘᤣ᤹ ᤀᤠᤳᤋᤡᤴᤜᤠ᤹ᤗᤠᤶᤔᤠᤱ ᤂᤡᤏᤡ᤹ ᤀᤣ᤺ᤱᤕᤠᤱ ᤔᤧᤓᤥᤰᤂᤧᤶᤔᤡᤴᤏᤧ᤹॥ 25 “ᤂᤧᤏᤧ᤹. ᤀᤧᤈᤪᤠᤴ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤧᤒᤠ ᤛᤡᤰᤁᤢᤶ ᤏᤡᤱᤘᤠ᤹ ᤁᤢᤀᤡᤛᤡᤰ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤁᤧᤏᤡᤒᤠ ᤁᤧᤗᤧᤒᤠᤜᤠ᤹ ᤕᤢᤑᤪᤣᤋᤡᤛ ᤏᤠᤶᤎᤠ ᤐᤡᤛᤠᤱᤒᤠ ᤋᤧᤱᤃᤵᤐᤥ ᤁᤧᤕᤢᤱᤒᤠ ᤁᤧᤖᤧᤰ ᤔᤏᤠᤜᤠ᤹ᤀᤥ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤕᤢᤰᤛᤠᤒᤠᤜᤠ᤹ ᤏᤢ ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤛᤣ᤺ᤰᤕᤢᤰ ᤆᤥᤃᤧᤛᤧ᤹॥ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤔᤧᤴᤗᤧᤔᤏᤠᤒᤠᤜᤠ᤹ ᤜᤢ᤹ᤖᤧᤛᤧ᤹॥ 26 ᤁᤢᤓᤠᤖᤧ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤀᤡᤃᤪ ᤜᤠᤱᤈᤢᤶᤔᤥᤒᤠ ᤁᤢᤓᤠᤱᤅᤡᤴ ᤔᤧᤀᤡ᤺ᤳᤋᤢᤴ ᤔᤧᤏᤠ᤺ᤳᤋᤢᤴᤏᤧᤓᤃᤪ ᤂᤧᤴ ᤂᤡᤔᤥ ᤂᤢᤶᤍᤡᤱ ᤐᤡᤔᤠ ᤐᤥᤱ᤹—ᤛᤡᤔᤧᤸᤗᤧ ᤂᤢᤶᤍᤡᤱ ᤐᤡᤔᤠ ᤐᤥᤱᤛᤠᤱ ᤀᤡᤃᤪ ᤗᤠᤈᤣ᤹ᤗᤠᤶᤒᤠ ᤗ᤺ᤵᤔᤠᤍᤣᤔᤠ ᤐᤥᤱᤛᤠᤱ ᤀᤡᤃᤪ ᤂᤢᤏᤧ᤹ ᤁᤢᤕᤠᤱᤛᤠᤁᤢᤴᤎᤣᤴ ᤏᤠᤵᤔᤠ ᤀᤡᤃᤪ ᤐᤢᤱᤗᤠᤜᤡᤶᤔᤥ ᤛᤠᤰᤔᤠ ᤐᤥᤱᤛᤠᤱ ᤌᤣᤛᤠᤱ. ᤂᤢᤶᤍᤡᤱ ᤐᤡᤔᤠᤀᤣ ᤐᤥᤱᤗᤥ॥” ᤀᤧᤈᤪᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤢ᤹ 27 ᤀᤧᤈᤪᤠ᤺ᤸᤗᤧ ᤐᤠ᤺ᤳᤋᤢ᤹. “ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹᥄ ᤁᤴ ᤐᤖᤡᤰᤗᤧ ᤂᤢᤏᤧ᤹ ᤐᤕᤶ ᤜᤠᤱᤅᤡᤴ ᤕᤖᤢᤛᤗᤧ᤺ᤶᤒᤠ ᤔᤠᤱᤜᤡᤶᤔᤡᤴ ᤐᤏᤢᤏᤢᤒᤠ ᤆᤥ᤺ᤰᤔᤠ ᤁᤧᤍᤧᤶᤒᤠ ᤆᤥᤃᤢ॥ 28 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤐᤕᤶ ᤜᤠᤱ. ᤂᤢᤏᤧ᤹ ᤁᤢᤛᤢᤈᤠᤛᤠᤒᤠ ᤏᤢ ᤁᤧᤖᤧᤰ ᤔᤢᤰᤁᤧᤃᤢᤒᤠ ᤜᤠᤱᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤀᤠᤱᤃᤠ᤹ ᤗᤢᤱᤔᤠ᤹ ᤔᤧᤍᤢᤰᤋᤠᤱᤅᤠᤱ ᤘᤠ᤹॥ ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤢᤰᤁᤡᤴ ᤀᤠᤱᤃᤠ᤹ ᤀᤠᤛᤶᤎᤠᤱ ᤐᤳ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥᤛᤢᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠ᤺ᤴᤇᤡᤱᤔᤠ ᤘᤠ᤹ ᤂᤧᤒᤩᤠᤱ ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤕᤖᤡᤰ ᤜᤡᤶᤛᤕᤱᤒᤠ ᤋᤢᤶᤓᤠᤰᤐᤠᤜᤠ᤹ ᤀᤠᤱᤃᤠ᤹ᤏᤢ ᤀᤡᤛᤪᤠᤀᤡᤗ ᤏᤢ᤺ᤱᤔᤠ ᤑᤧᤶᤔᤠ ᤔᤧᤍᤧᤴᤍᤧᤖ ᤆᤥ᤺ᤰᤔᤠ ᤛᤢᤰᤋᤢᤱᤛᤡᤱᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.