ᤀᤧᤈᤪᤠ 6 - LIFOTNTᤍᤠᤖᤠᤸᤗᤧ ᤁᤢᤀᤡᤱᤈᤠᤱ ᤛᤰ 1 ᤍᤠᤖᤠ ᤐᤕᤶ ᤜᤠᤱᤅᤡᤸᤗᤧ ᤒᤣᤒᤡᤗᤥᤏᤒᤠ ᤌᤠ᤺ᤱᤅᤥ ᤔᤧᤏᤧᤛ᤻ᤛᤢᤒᤠ ᤜᤠᤱ ᤛᤠᤵᤔᤢᤴᤎᤢᤶ ᤛᤠᤵᤗᤠᤜᤠ᤹ ᤔᤧᤃᤥ᤺ᤳᤋᤢᤖ ᤑᤠ᤹ᤀᤠᤱ ᤔᤢᤖᤠ ᤔᤧᤳᤋᤢᤛᤡ॥ 2 ᤁᤖ ᤂᤧᤴ ᤕᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤐᤠ᤺ᤴᤜᤠ᤹ ᤗᤳᤇᤠ ᤔᤡᤱᤛᤥᤀᤡ᤺ᤳ ᤛᤰᤌᤡᤰᤁ ᤔᤠᤍᤡ ᤋᤧᤱᤃᤵᤐᤥᤒᤠ ᤀᤣᤰᤒᤠᤋᤏᤠ ᤕᤧᤰᤕᤰᤁᤥ ᤔᤧᤄᤥᤛᤢᤖᤥ— 3 “ᤁᤥᤖᤣᤛ ᤐᤕᤶ ᤜᤠᤱᤅᤡᤸᤗᤧ ᤀᤠᤒᤠᤅᤣ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤰᤛᤡᤃᤣᤰᤐᤠ ᤋᤱᤒᤣᤀᤥ ᤕᤖᤢᤛᤗᤧ᤺ᤶᤒᤠ ᤔᤠᤱᤜᤡᤶᤔᤡᤴ ᤔᤧᤈᤥᤃᤢᤖ ᤜᤧᤰᤁᤩᤠᤱ ᤂᤧᤵᤔᤥ ᤜᤢᤰᤛᤥᤕᤠᤱ ᤏᤢ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤶᤔᤠᤍᤧᤴᤏᤡᤴ ᤕᤠᤶᤔᤥ ᤐᤥᤱᤗ ᤁᤧᤗ᤹ᤒᤠ ᤀᤡᤱᤈᤠᤱ ᤆᤥᤃᤢ॥ ᤂᤧᤴ ᤔᤠᤱᤜᤡᤶᤔᤡᤴ ᤏᤡᤒᤥᤱᤅᤠᤱ ᤏᤢᤛᤡ ᤔᤡᤋᤖ ᤁᤢᤗᤡᤱᤃᤧᤴ ᤏᤢ ᤂᤧᤶᤔᤩᤠᤰᤁᤣ ᤁᤢᤓᤧᤖᤧ ᤐᤥᤱ᤹॥ 4 ᤗᤢᤱᤎᤠᤰᤜᤠ᤹ ᤃ ᤁᤢᤎᤠ᤺ᤰ ᤛᤢᤶᤛᤡ ᤗᤢᤱ ᤛᤶᤎᤠᤱ ᤗᤳᤇᤠ ᤁᤢᤛᤧᤳ ᤛᤡᤱ ᤁᤣ᤺ᤵᤔᤠᤀᤠᤱ ᤆᤥ᤺ᤰᤔᤠ ᤐᤥᤱ᤹॥ ᤁᤧᤗᤠ᤺ᤵᤐᤠ ᤁᤧᤖᤧᤰ ᤕᤠᤱᤅᤡᤴ ᤜᤠᤱᤜᤡᤶᤔᤥᤒᤠ ᤕᤠᤱᤕᤢᤱᤔᤥᤗᤠᤶ ᤐᤡᤔᤠᤛᤡ ᤐᤥᤱ᤹॥ 5 ᤏᤒᤢᤁᤍᤏᤣᤛᤖᤖᤧᤸᤗᤧ ᤕᤖᤢᤛᤗᤧᤔ ᤔᤠᤱᤜᤡᤶᤔᤥᤗᤠᤶ ᤗ᤺ᤳᤋᤢᤀᤠᤱ ᤒᤣᤒᤡᤗᤥᤏᤀᤥ ᤋᤣ᤹ᤖᤢᤒᤠ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤂᤵᤐᤩᤠᤜᤠ᤹ ᤕᤖᤢᤛᤗᤧ᤺ᤶᤒᤠ ᤔᤠᤱᤜᤡᤶᤔᤥ ᤕᤠᤶᤔᤥ ᤕᤢᤱᤔᤠ ᤐᤥᤱ᤹॥ ᤂᤧᤱᤜᤠ᤹ ᤁᤧᤖᤧᤰ ᤏᤢ᤺ᤰᤔᤠ ᤑᤧᤵᤔᤠᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥᤒᤠ ᤂᤵᤐᤩᤠ ᤕᤢᤱᤔᤠᤍᤧᤴᤜᤠ᤹ᤀᤥ ᤕᤢᤱᤔᤠ ᤐᤥᤱᤗᤥ॥” 6 ᤂᤧᤒᤩᤠᤱ ᤍᤠᤖᤠ ᤜᤠᤱᤅᤡᤸᤗᤧ ᤀᤰᤋᤱᤒᤠ ᤀᤡᤱᤄᤱ ᤜᤠᤰᤋᤢᤛᤡ— “ᤏᤠᤶᤎᤠ ᤐᤡᤛᤠᤱ ᤕᤢᤑᤪᤣᤋᤡᤛᤒᤠ ᤋᤢᤶ ᤜᤠᤱᤕᤢᤰᤐᤠ ᤋᤳᤋᤏᤤ. ᤛᤳᤋᤖ-ᤒᤥᤈ᤻ᤏᤤ ᤏᤢ ᤂᤧᤴ ᤋᤧᤱᤃᤵᤐᤥ ᤁᤧᤕᤢᤱᤒᤠ ᤂᤡᤏᤡ᤹ ᤑᤠ᤹ᤒᤠᤱᤜᤠ᤹. “ᤔᤠᤱᤜᤡᤶᤗᤠᤶ ᤔᤠ᤺ᤱᤄᤠ ᤘᤕᤧᤶᤔᤧ᤹ 7 ᤜᤧᤰᤁᤩᤠᤱ ᤂᤧᤴ ᤔᤠᤱᤜᤡᤶ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤂᤡᤏᤡ᤹ ᤔᤧᤀᤳᤋᤧᤶᤔᤡᤴᤏᤧ᤹॥ ᤕᤜᤢᤍᤠᤒᤠ ᤋᤢᤶ ᤜᤠᤱᤕᤢᤰᤐᤠ ᤏᤢ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤏᤡ᤹ ᤔᤠᤱᤜᤡᤶᤔᤡᤴ ᤋᤃᤡᤒᤠ ᤋᤧᤴᤏᤥᤀᤣ ᤕᤠᤶᤔᤥ ᤔᤧᤈᤥᤃᤢᤖ॥ 8 ᤂᤧᤴ ᤕᤠ᤺ᤶᤒᤰᤁᤥ ᤂᤧᤱᤜᤠ᤹ ᤑᤠ᤹ᤖᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤂᤡᤏᤡ᤹ ᤀᤡᤱᤈᤠᤱ ᤐᤡᤏᤡᤱ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤒᤣ᤺ᤰᤐᤠ ᤕᤠᤱᤅᤡᤴ ᤏᤠᤶᤎᤠ ᤕᤢᤑᤪᤣᤋᤡᤛ ᤋᤧᤱᤃᤵᤐᤥ ᤑᤥ᤺ᤱᤔᤏᤠᤒᤠ ᤜᤠᤱᤘᤠ ᤀᤣ᤺ᤱᤕᤠᤱᤅᤥᤗᤠᤶ ᤂᤡᤔᤥ ᤐᤡᤖᤧᤶᤛᤡᤶᤔᤧ᤹ ᤜᤧᤰᤁᤩᤠᤱ ᤕᤠ᤺ᤶᤒᤰ ᤆᤥ᤺ᤰᤔᤠᤴ ᤔᤧᤜᤠᤵᤋᤢᤴᤗ॥ 9 ᤌᤡᤰᤕᤠ᤺ᤴᤎᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤌᤧᤔᤠ ᤐᤠ᤺ᤴᤜᤠ᤹ ᤆᤠᤜᤠ ᤆᤥᤰ ᤔᤧᤒᤠ᤺ᤳᤋᤢ᤹. ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤖᤧ ᤗᤠᤃᤡ ᤛᤧᤃᤶᤒᤠ. ᤔᤧᤸᤗᤢᤰ ᤀᤡᤃᤪ ᤌᤢ᤺ᤶᤒᤠ ᤀᤡᤃᤪ ᤔᤠᤛᤡ. ᤕᤢᤶ ᤀᤡᤃᤪ ᤆᤤᤋᤢᤏ ᤏᤡ᤺ᤱᤃᤣᤴ ᤆᤰᤔᤧᤸᤗ᤹ᤀᤣ ᤂᤧᤱᤜᤠ᤹ ᤐᤡᤖᤧᤶᤛᤡᤶᤔᤧ᤹॥ 10 ᤂᤡᤏᤡ᤹ ᤂᤧᤴ ᤆᤥᤃᤧᤶᤔᤧ᤹ ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠ᤺ᤰᤋᤢᤒᤠ ᤛᤡᤍᤢᤱᤈᤓᤠᤜᤠ᤹ ᤂᤧᤱᤜᤠ᤹ᤖᤧ ᤀᤥᤃᤠᤵ ᤆᤥ᤺ᤰᤔᤠ ᤔᤧᤛᤢᤰᤋᤢᤖ ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤢ ᤀᤠᤱᤃᤠ᤹ ᤀᤠᤛ᤻ᤛᤠᤜᤠ᤹ᤖᤧ ᤔᤢ᤹ᤀᤡᤛᤠᤶ ᤂᤥᤔᤠᤖᤧ ᤗᤠᤃᤡ ᤐᤣᤗᤡᤃᤧᤴ ᤋᤢᤘᤠ ᤔᤧᤈᤥᤃᤢᤖ॥ 11 ᤀᤠᤱᤃᤠ᤹ ᤕᤠᤶᤔᤥᤀᤠᤱ ᤀᤡᤱᤈᤠᤱ ᤆᤥᤃᤢᤱ᤹ ᤀᤠᤳᤋᤡᤸᤗᤧ ᤁᤴ ᤀᤡᤱᤈᤠᤱᤅᤡᤴ ᤔᤧᤀᤡ᤺ᤳᤋᤢᤴ ᤔᤧᤏᤠ᤺ᤳᤋᤢᤴ. ᤂᤧᤸᤗᤧ ᤁᤢᤜᤡᤶᤔᤥᤗᤠᤶ ᤛᤡᤱ ᤛᤡᤳᤗᤠᤱᤎᤡᤰ ᤗ᤺ᤳᤋᤧᤶᤔᤧ᤹ ᤜᤧᤰᤁᤩᤠᤱ ᤂᤧᤴ ᤌᤡᤰᤗᤧᤵᤔᤠᤱ ᤜᤠᤛᤶᤛᤶᤒᤠ ᤆᤥᤃᤧᤶᤔᤧ᤹ ᤂᤧᤒᤩᤠᤱ ᤂᤧᤸᤗᤧ ᤁᤢᤎᤰᤁᤡᤴ ᤑᤩᤠᤰ ᤗᤛ᤻ᤛᤢᤖ ᤌᤢᤒᤧᤶᤔᤧ᤹॥ ᤂᤧᤸᤗᤧ ᤁᤢᤜᤡᤶᤔᤡᤴᤏᤠᤱ ᤂᤠᤶᤜᤡ᤺ᤰ ᤐᤥᤱᤗ ᤂᤠᤵᤐᤢᤌᤩ᤺ᤱ ᤆᤥᤃᤧᤶ ᤐᤡᤖᤧᤶᤔᤧ᤹॥ 12 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤔᤠᤱᤛᤧᤘᤠ ᤔᤧᤵᤔᤠ ᤋᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤕᤖᤢᤛᤗᤧ᤺ᤶᤔᤡᤴ ᤛᤣᤃᤢ. ᤁᤴ ᤀᤡᤱᤈᤠᤱᤅᤡᤴ ᤁᤧᤓᤣ᤺ᤶᤒᤠ ᤏᤢ ᤔᤠᤱᤜᤡᤶᤔᤡᤴ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤠ ᤁᤧᤃᤥ᤺ᤵᤐᤠ ᤀᤠᤳᤋᤡᤴ ᤜᤠᤱᤅᤡᤴᤇᤠᤱ ᤀᤡᤃᤪ ᤛᤢᤘᤠᤱᤅᤡᤴᤇᤠᤱ ᤂᤢᤏᤧ᤹ ᤔᤧᤰᤂᤢᤖ॥ ᤀᤠᤱᤃᤠ᤹ ᤍᤠᤖᤠ ᤜᤠᤱᤅᤡᤸᤗᤧ ᤁᤴ ᤀᤡᤱᤈᤠᤱᤅᤡᤴ ᤐᤡᤏᤡᤱ॥ ᤁᤴ ᤁᤧᤖᤧᤰᤗᤧ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤖ ᤐᤥᤱᤗᤥ॥” ᤔᤠᤱᤜᤡᤶᤔᤡᤴ ᤔᤧᤍᤥᤴᤍᤢ 13 ᤂᤧᤴ ᤀᤣᤃᤠᤱ ᤍᤠᤖᤠ ᤜᤠᤱᤅᤡᤸᤗᤧ ᤕᤢᤑᤪᤣᤋᤡᤛ ᤏᤠᤜᤠᤱᤍᤠᤱᤒᤠ ᤋᤢᤶ ᤜᤠᤱᤕᤢᤰᤐᤠ ᤋᤳᤋᤏᤤ. ᤛᤳᤋᤖ-ᤒᤥᤈ᤻ᤏᤤ ᤏᤢ ᤂᤢᤴᤇᤡ᤹ ᤑᤠ᤹ᤒᤠᤱᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤁᤢᤀᤡᤛᤡᤰ ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢ॥ 14 ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤠᤃ᤻ᤃᤤ ᤏᤢ ᤀᤡᤍ᤻ᤍᤥᤖᤧ ᤁᤢᤎᤠ᤺ᤰ ᤈᤁᤖᤡᤕᤠᤗᤠᤶᤒᤠ ᤀᤠ᤺ᤴᤇᤡᤱᤔᤠ ᤔᤧᤄᤥᤛᤢᤀᤠᤱ ᤔᤠᤱᤜᤡᤶ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤏᤢᤖᤡᤰᤁᤠᤱ ᤋᤃᤡ ᤔᤧᤓᤥᤛᤢ॥ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤜᤧᤰᤁᤩᤠᤱ ᤑᤠᤖᤛ ᤗᤠᤈᤣ᤹ᤒᤠ ᤁᤥᤖᤣᤛ. ᤍᤠᤖᤠ ᤏᤢ ᤀᤷᤋᤠᤛᤠᤛ᤻ᤋ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤀᤡᤱᤈᤠᤱ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤔᤠᤱᤜᤡᤶᤔᤡᤴ ᤔᤧᤈᤥᤃᤢ ᤔᤧᤛᤢᤖᤢ॥ 15 ᤜᤠᤱ ᤍᤠᤖᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤋᤱᤒᤣ ᤋᤢᤰᤛᤡ ᤁᤧᤖᤧᤒᤠ ᤀᤍᤠᤖ ᤗᤠ ᤛᤢᤶᤛᤡᤃᤣᤰᤐᤠ ᤕᤧᤴᤏᤥ ᤂᤧᤱᤜᤠ᤹ᤖᤧ ᤔᤠᤱᤜᤡᤶᤔᤡᤴ ᤔᤧᤈᤥᤃᤢ ᤔᤧᤛᤢᤖᤢ॥ 16 ᤂᤧᤴ ᤀᤣᤃᤠᤱ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤗᤧᤒᤡᤜᤠ᤹ ᤜᤧᤰᤁᤩᤠᤱ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤁᤧᤏᤢ᤺ᤱᤒᤠ ᤁᤧᤓᤧᤶᤒᤠ ᤘᤣ᤹ ᤁᤧᤖᤧᤰᤗᤧ ᤏᤡᤱᤘᤠ᤹ ᤕᤧᤕᤧ ᤗ᤹ᤖᤡᤰ ᤔᤠᤱᤜᤡᤶᤔᤡᤴ ᤔᤧᤍᤥᤴᤍᤢ॥ 17 ᤔᤠᤱᤜᤡᤶᤔᤡᤴ ᤔᤧᤍᤥᤴᤍᤢᤸᤗᤧ ᤂᤧᤱᤜᤠ᤹ᤖᤧ ᤁᤡᤵ ᤌᤡᤰ ᤛᤧᤃᤶᤒᤠ. ᤁᤡᤵ ᤏᤧᤳᤇᤡ ᤌᤢ᤺ᤶᤒᤠᤜᤠ᤹ ᤏᤢ ᤁᤡᤵ ᤗᤡᤛᤡ ᤁᤢᤶᤒᤠᤒᤠ ᤔᤧᤸᤗᤢᤰᤛᤠ᤺ᤳᤜᤠ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤔᤧᤈᤥᤃᤢᤛᤡ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤌᤡᤰᤗᤧ ᤌᤡᤰ ᤌᤡᤒᤥᤱᤅᤠᤱ ᤏᤧᤳᤇᤡ ᤔᤧ᤺ᤴᤍᤒᤁᤠ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤛᤡ॥ 18 ᤂᤧᤱᤜᤠ᤹ᤖᤧ ᤕᤖᤢᤛᤗᤧᤔ ᤔᤠᤱᤜᤡᤶᤔᤥ ᤔᤠᤱᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤔᤥᤛᤠᤖᤧ ᤁᤢᤛᤠᤵᤐᤴᤏᤥ ᤁᤧᤒᤵᤐᤠ ᤀᤡᤱᤈᤠᤱ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤛᤠᤶᤒᤠ ᤏᤢ ᤗᤧᤒᤡᤜᤠ᤹ᤖᤧ ᤕᤠ᤺ᤶᤒᤰ ᤆᤥ᤺ᤰᤔᤠ ᤌᤡᤶ ᤏᤢ ᤋᤱᤃᤠᤶ ᤔᤧᤈᤥᤃᤢ ᤔᤧᤒᤡᤖᤢᤛᤡᤖᤥ॥ ᤆᤥ᤺ᤰᤕᤢᤶᤓᤥ ᤋᤱᤏᤠᤶ 19 ᤂᤧᤴ ᤀᤣᤃᤠᤱ ᤌᤡᤰᤛᤡᤃᤣᤰᤐᤠ ᤗᤠ ᤌᤡᤒᤥᤱᤅᤠᤱ ᤗᤡᤛᤡ ᤁᤧᤖᤧᤒᤠ ᤕᤧᤴᤏᤥ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤁᤧᤏᤢ᤺ᤱ ᤁᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤔᤧᤍᤥᤛᤢ॥ 20 ᤁᤧᤖᤧᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ ᤀᤠᤒᤠᤅᤣ ᤛᤣᤛᤣᤛᤠᤱᤛᤠᤱ ᤔᤧᤈᤥ᤺ᤰᤛᤡᤱᤅᤠᤱ ᤔᤧᤘᤕᤧ ᤜᤧᤰᤁᤩᤠᤱ ᤌᤡᤶ ᤁᤢᤀᤡᤛᤡᤰ ᤛᤢᤳᤌᤥ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤕᤧ॥ ᤗᤧᤒᤡᤜᤠ᤹ᤖᤧ ᤁᤧᤏᤢ᤺ᤱᤒᤠ ᤁᤧᤓᤧᤶᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤗᤠᤃᤡ. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤗᤠᤃᤡ ᤏᤢ ᤀᤠᤒᤠᤅᤣ ᤗᤠᤃᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶ ᤌᤰᤛᤠᤜᤠ᤹ ᤔᤧᤛᤧᤖᤢᤛᤡ॥ 21 ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤁᤧᤏᤢ᤺ᤱᤒᤠ ᤁᤧᤓᤧᤶᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤏᤢ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤳᤇᤧ ᤁᤧᤍᤠᤒᤠ. ᤂᤧᤴ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤀᤠᤒᤠᤅᤣ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰ ᤁᤧᤗᤧᤵᤐᤠ ᤜᤧᤰᤁᤩᤠᤱ ᤘᤣ᤹ ᤏᤠᤘᤠᤀᤡᤳᤗᤠ ᤛᤧᤘᤠ ᤔᤧᤵᤔᤠ ᤁᤧᤗᤧᤵᤐᤠ ᤁᤧᤖᤧᤰᤗᤧ ᤛᤡᤍᤢᤱᤈᤓᤠ ᤋᤥ᤺ᤶᤔᤏᤠᤒᤠ ᤌᤰᤛᤠ ᤛᤠᤴ ᤔᤧᤈ॥ 22 ᤏᤢᤛᤡ ᤕᤧᤴ ᤌᤠᤖᤡᤰ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤜᤠᤱᤜᤠᤱ ᤛᤡᤍᤠ᤹ ᤔᤧᤶᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶᤔᤡᤴ ᤔᤧᤍᤥᤛᤢ॥ ᤂᤧᤱᤜᤠ᤹ ᤏᤡᤱᤘᤠ᤹ ᤕᤧᤕᤧ ᤔᤧᤗ᤹ᤖᤧᤀᤠᤱ ᤔᤧᤘᤕᤧ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤛ᤻ᤛᤢᤖᤒᤠ ᤐᤕᤶ ᤜᤠᤱᤅᤡᤴ ᤂᤧᤱᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤠ ᤆᤥᤃᤢᤀᤠᤱ ᤘᤕᤧ ᤜᤧᤰᤁᤩᤠᤱ ᤂᤧᤸᤗᤧ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤴ ᤆᤥ᤺ᤰᤔᤠ ᤂᤧᤱᤜᤠ᤹ ᤑᤠ᤹ᤖᤢᤛᤡᤀᤠᤱ ᤘᤕᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.