ᤀᤧᤈᤪᤠ 5 - LIFOTNT

¹ ᤂᤧᤴ ᤕᤧᤶᤔᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤠᤃ᤻ᤃᤤ ᤏᤢ ᤀᤡᤍ᤻ᤍᤥᤖᤧ ᤁᤢᤛ᤻ᤛᤠ ᤈᤁᤖᤡᤕᤠ᤺ᤸᤗᤧ ᤂᤧᤱᤜᤠ᤹ᤏᤢ ᤁᤧᤘᤠ᤹ᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠ ᤕᤜᤢᤍᤡᤜᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤵᤔᤠ ᤜᤣ᤺ᤰᤋᤧᤳᤇᤢᤛᤡ॥

² ᤜᤧᤰᤁᤩᤠᤱ ᤛᤠᤗᤋᤡᤀᤣᤗᤖᤧ ᤁᤢᤛ᤻ᤛᤠ ᤕᤖᤢᤒᤠᤒᤣᤗ ᤏᤢ ᤕᤥᤛᤠᤍᤠᤰᤁᤧᤸᤗᤧ ᤁᤢᤛ᤻ᤛᤠ ᤕᤣᤛᤢᤀᤠ᤺ᤸᤗᤧ ᤕᤖᤢᤛᤗᤧ᤺ᤶᤔᤥ ᤕᤠᤶᤔᤥ ᤔᤠᤱᤜᤡᤶᤔᤡᤴ ᤆᤥ᤺ᤰᤔᤠ ᤜᤣ᤺ᤰᤋᤧᤛᤢ. ᤜᤧᤰᤁᤩᤠᤱ ᤂᤧᤴ ᤏᤧᤳᤇᤡ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤓᤠ᤹ᤖᤢᤛᤡ॥

³ ᤀᤠᤶᤓᤠ ᤂᤧᤴ ᤕᤧᤶᤔᤥᤀᤣ ᤕᤢᤑᤪᤣᤋᤡᤛ ᤏᤠᤶᤎᤠ ᤐᤡᤛᤠᤱᤒᤠ ᤋᤢᤶ ᤜᤠᤱᤕᤢᤰᤐᤠ ᤋᤳᤋᤏᤤ. ᤛᤳᤋᤖ-ᤒᤥᤈ᤻ᤏᤤᤴ ᤏᤢ ᤂᤧᤸᤗᤧ ᤁᤢᤈᤢᤶ ᤁᤢᤍᤣ᤺ᤱᤜᤠ᤹ ᤕᤖᤢᤛᤗᤧ᤺ᤶᤔᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢᤛᤡ. “ᤜᤠ᤺ᤳᤗᤧ ᤂᤡᤏᤡ᤹ ᤁᤴ ᤔᤠᤱᤜᤡᤶᤔᤡᤴ ᤕᤠᤶᤔᤥ ᤆᤥ᤺ᤰᤔᤠ ᤏᤢ ᤁ᤹ᤕᤥ ᤆᤠᤜᤠ ᤁᤧᤈᤥ᤺ᤰᤐᤠ ᤆᤡᤃᤰᤘᤠᤜᤠ᤹ ᤛᤢᤶᤔᤠ ᤁᤧᤒᤠᤱᤄᤡ᥅”

⁴ ᤔᤠᤱᤜᤡᤶ ᤆᤥ᤺ᤰᤔᤠ ᤁᤧᤓᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤜᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤏᤠ᤺ᤰᤋᤢᤛᤡ॥

⁵ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ ᤀᤥᤔᤧᤳᤋᤢᤛᤡᤀᤠᤱ ᤘᤕᤧ ᤜᤧᤰᤁᤩᤠᤱ ᤑᤠᤖᤛᤒᤠ ᤜᤠᤱᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤍᤠᤖᤠ ᤜᤠᤱᤅᤡᤴ ᤐᤣᤗᤡᤛᤰ ᤔᤧᤛᤠᤵᤋᤢᤀᤠᤱ ᤔᤧᤜᤠᤅᤢ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤥᤃᤵ ᤔᤧᤱᤄᤥᤀᤣ ᤌᤠᤖᤡᤰ ᤕᤠ᤺ᤶᤒᤰ ᤆᤥ᤺ᤰᤔᤠᤗᤠᤶ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤌᤣ᤺ᤰᤔᤠ ᤔᤧᤴᤇᤢᤰᤋᤢᤛᤡᤴ॥

⁶ ᤍᤠᤖᤠ ᤜᤠᤱᤅᤡᤴ ᤕᤢᤑᤪᤣᤋᤡᤛ ᤏᤠᤎᤠ᤺ᤶᤒᤡ ᤋᤧᤱᤃᤵᤐᤥᤒᤠ ᤜᤠᤱᤕᤢᤰᤐᤠ ᤋᤳᤋᤏᤤ. ᤛᤳᤋᤖ-ᤒᤥᤈ᤻ᤏᤤ ᤏᤢ ᤂᤢᤴᤇᤡ᤹ ᤛᤢᤜᤠᤱᤕᤢᤰᤐᤠᤜᤠ᤹. ᤀᤡᤃᤪ ᤕᤢᤑᤪᤣᤋᤡᤛ ᤏᤠᤜᤠᤱᤍᤠᤱᤒᤠ ᤕᤢᤰᤛᤠᤒᤠᤜᤠ᤹ᤖᤧ ᤔᤧᤜᤠᤰᤋᤢᤒᤠ ᤛᤰᤀᤡᤱᤄᤱᤅᤡᤴ ᤀᤰᤋᤱᤒᤠ ᤆᤥᤰᤗᤥ—

⁷ “ᤐᤕᤶ ᤍᤠᤖᤠ ᤜᤠᤱᤅᤣ ᤛᤧᤘᤠᤖᤥ. ᤀᤠᤍᤠᤱᤒᤠᤖᤧ ᤁᤧᤜᤠᤱᤕᤢᤰᤁᤡᤴ ᤛᤏᤠᤖᤢᤱ ᤏᤢ᤹ᤔᤠ ᤋᤠᤔᤠ ᤐᤥᤱᤗᤖᤥ᥄

⁸ “ᤕᤜᤢᤍᤠ ᤋᤧᤱᤃᤵᤐᤥ ᤀᤠᤏᤡᤃᤣ ᤐᤣᤃᤡᤃᤧ ᤜᤧᤰᤁᤩᤠᤱ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤴ ᤔᤧᤈᤥᤃᤢᤖ ᤔᤧᤕᤠᤃᤧᤒᤠ ᤏᤡᤛᤢᤶᤒᤧ॥ ᤁᤴ ᤐᤠ᤺ᤴᤏᤡᤴ ᤀᤠᤍᤠᤱᤒᤠ ᤐᤕᤶ ᤕᤶᤒᤠ ᤜᤠᤱᤅᤡᤸᤗᤧ ᤁᤢᤛᤡᤱ ᤁᤧᤏᤡ᤺ᤳᤋᤢᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤶᤒᤧ॥ ᤕᤶᤒᤕᤶᤒᤠ ᤗᤢᤱᤜᤠ᤹ ᤔᤧᤛᤧᤳᤋᤢᤖ ᤗᤢᤱᤎᤠᤰᤁᤥ ᤐᤧᤖᤧᤶᤛᤡᤱᤜᤠ᤹ ᤔᤧᤕᤠᤰᤋᤢᤖ ᤔᤧᤕᤠᤃᤧ॥ ᤛᤠ᤹ᤖᤡᤰ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤕᤠ᤺ᤶᤒᤰᤁᤡᤴ ᤐᤥᤱᤗ ᤐᤳ ᤂᤧᤒᤩᤠᤱ ᤆᤰᤔᤧᤸᤗ᤹ᤀᤣ ᤋᤃᤡ ᤐᤥᤖ ᤐᤳ॥

⁹ “‘ᤜᤠ᤺ᤳᤗᤧ ᤔᤠᤱᤜᤡᤶᤔᤡᤴ ᤕᤠᤶᤔᤥ ᤆᤥ᤺ᤰᤔᤠ ᤏᤢ ᤂᤧᤵᤔᤥ ᤆᤠᤜᤠ ᤁᤧᤈᤥ᤺ᤰᤐᤠ ᤆᤡᤃᤰᤘᤠᤜᤠ᤹ ᤛᤢᤶᤔᤠ ᤁᤧᤒᤠᤱᤄᤡ᥅’ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥᤒᤠᤜᤠ᤹ ᤀᤠᤏᤡᤃᤣ ᤛᤧ᤺ᤴᤗᤠᤵᤋᤢᤶᤛᤡᤶᤒᤧ॥

¹⁰ ᤀᤠᤏᤡᤃᤣ ᤀᤠᤍᤠᤱᤒᤠᤴ ᤔᤧᤵᤔᤠᤏᤧ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤜᤠ᤹ᤀᤠᤱ ᤛᤧ᤺ᤴᤗᤠᤵᤋᤢᤶᤛᤡᤶᤒᤧ॥

¹¹ “ᤂᤧᤱᤜᤠ᤹ᤖᤧ ᤀᤠᤏᤡᤃᤣ ᤀᤰᤂᤣ ᤔᤧᤔᤧᤳᤋᤡᤃᤧ. ‘ᤀᤠᤏᤡᤃᤧᤃ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠᤛᤡᤃᤧ॥ ᤂᤧᤴ ᤔᤠᤱᤜᤡᤶᤔᤡᤴ ᤀᤡᤛᤪᤠᤀᤡᤗᤒᤠ ᤗᤳᤇᤠ ᤔᤢᤰᤛᤠᤶᤛᤠᤒᤠ ᤜᤠᤱᤅᤡᤸᤗᤧ ᤕᤖᤡᤰ ᤋᤱᤒᤣ ᤋᤃᤡ ᤆᤥᤃᤢ ᤘᤕᤧ ᤜᤧᤰᤁᤩᤠᤱ ᤀᤠᤏᤡᤃᤣ ᤜᤠᤒᤠ ᤂᤧᤴ ᤔᤠᤱᤜᤡᤶᤔᤡᤴ ᤕᤠᤶᤔᤥ ᤆᤥᤃᤢᤶᤒᤧᤖ ᤐᤳᤇᤡᤃᤧ॥

¹² ᤁᤖ ᤀᤠᤏᤡᤃᤣ ᤌᤠ᤺ᤰᤌᤧᤒᤠᤜᤠ᤹ᤖᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤰ ᤔᤧᤓᤥ᤺ᤰᤂᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤁᤸᤍᤡ ᤜᤠᤱᤌᤠ᤺ᤰᤁᤥᤒᤠ ᤜᤠᤱ ᤒᤣᤒᤡᤗᤥᤴᤏᤥ ᤏᤒᤢᤁᤍᤏᤣᤛᤖᤖᤧ ᤁᤢᤕᤢᤰᤁᤥ ᤌᤠᤛᤢᤛᤡ॥ ᤔᤠᤱᤜᤡᤶᤔᤡᤴ ᤌᤩ᤺ᤱ ᤔᤧᤕᤛᤢ ᤔᤧᤍᤣᤛᤢ ᤜᤧᤰᤁᤩᤠᤱ ᤔᤏᤠᤜᤠ᤹ ᤒᤣᤒᤡᤗᤥᤏᤀᤥ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡ॥

¹³ “‘ᤂᤧᤒᤩᤠᤱ ᤒᤣᤒᤡᤗᤥᤏᤒᤠ ᤜᤠᤱ ᤁᤥᤖᤣᤛᤧᤸᤗᤧ ᤜᤠᤱ ᤆᤥᤃᤢᤒᤠ ᤌᤡᤰᤛᤡᤃᤣᤰᤐᤠ ᤋᤱᤒᤣᤀᤥ ᤂᤢᤏᤧ᤹ ᤔᤠᤱᤜᤡᤶᤔᤡᤴ ᤕᤠᤶᤔᤥ ᤆᤥᤃᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ॥

¹⁴ ᤏᤒᤢᤁᤍᤏᤣᤛᤖᤧᤸᤗᤧ ᤕᤖᤢᤛᤗᤧᤔ ᤔᤠᤱᤜᤡᤶᤔᤥᤗᤠᤶ ᤋᤣ᤹ᤖᤢᤀᤠᤱ ᤒᤣᤒᤡᤗᤥᤏᤒᤠ ᤂᤢᤏᤧ᤹ ᤁᤢᤔᤠᤱᤜᤡᤶᤔᤥ ᤕᤢᤰᤂᤢᤛᤡᤒᤠ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤂᤵᤐᤩᤠᤜᤠ᤹ ᤁᤥᤖᤣᤛ ᤜᤠᤱᤅᤡᤸᤗᤧ ᤏᤢ᤺ᤰᤋᤢ॥ ᤁᤥᤖᤣᤛ ᤜᤠᤱᤅᤡᤸᤗᤧ ᤕᤜᤢᤍᤠᤀᤥ ᤋᤢᤶ ᤜᤠᤱᤕᤢᤰᤐᤠ ᤔᤧᤈᤥᤃᤢᤒᤠ. ᤛᤣᤛᤒᤛ᤻ᤛᤖ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠᤴ. ᤂᤧᤴ ᤂᤵᤐᤩᤠᤜᤠ᤹ ᤜᤢᤰᤛᤢᤵᤋᤢ ᤑᤧᤴᤇᤢ॥

¹⁵ ᤜᤠᤱᤅᤡᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤕᤖᤢᤛᤗᤧᤔᤒᤠ ᤔᤠᤱᤜᤡᤶᤔᤥ ᤂᤧᤴ ᤛᤠᤔᤠᤜᤠ᤹ ᤏᤢ᤺ᤰᤋᤧᤶᤋᤣ᤹ᤖᤧᤶᤔᤧ᤹ ᤜᤧᤰᤁᤩᤠᤱ ᤋᤃᤡ ᤀᤠᤳᤋᤠᤴ ᤔᤠᤱᤜᤡᤶᤔᤡᤴ ᤕᤢᤅᤧ. ᤜᤠᤒᤠ ᤂᤧᤴ ᤋᤧᤴᤏᤥ ᤕᤠᤶᤔᤥ ᤔᤠᤱᤜᤡᤶᤔᤡᤴ ᤆᤥᤃᤧᤶᤔᤧ᤹॥”

¹⁶ “‘ᤂᤧᤸᤗᤧᤆᤥᤃᤢᤸᤗᤧ ᤛᤣᤛᤒᤛ᤻ᤛᤖᤧᤴ ᤑᤧᤖᤧᤀᤠᤱ ᤔᤠᤱᤜᤡᤶᤔᤡᤸᤗᤧ ᤁᤢᤒᤢᤱ ᤕᤢᤰᤂᤢ॥ ᤂᤧᤴ ᤕᤧᤶᤔᤠᤱᤎᤥ ᤀᤠᤀᤡᤴ ᤌᤠᤖᤡᤰ ᤔᤠᤱᤜᤡᤶ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤐᤥᤱᤗ ᤐᤳ. ᤁᤖ ᤔᤠᤱᤜᤡᤶᤔᤡᤴ ᤀᤠᤸᤗᤛᤠᤱ ᤆᤥ᤺ᤰᤔᤠ ᤔᤧᤴᤈᤢ᤺ᤳᤋᤣ ᤘᤠ᤹॥’”

¹⁷ ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤀᤠᤍᤠᤱᤒᤠ ᤜᤠᤱᤅᤣ᥄ ᤀᤠᤍᤠᤱᤒᤠᤖᤧ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤏᤧᤓᤃᤪ. ᤒᤣᤒᤡᤗᤥᤏᤀᤥ ᤁᤧᤏᤧᤒᤠ ᤜᤠᤱ ᤛᤠᤵᤗᤠᤔᤢᤎᤡᤱᤜᤠ᤹ ᤀᤥᤔᤧᤵᤔᤠ ᤐᤥᤱ᤹ ᤜᤧᤰᤁᤩᤠᤱ ᤁᤥᤖᤣᤛ ᤜᤠᤱᤅᤡᤸᤗᤧ ᤁᤴ ᤕᤖᤢᤛᤗᤧᤔᤒᤠ ᤔᤠᤱᤜᤡᤶᤔᤡᤴ ᤕᤠᤶᤔᤥ ᤆᤥ᤺ᤰᤔᤠ ᤀᤡᤱᤈᤠᤱ ᤐᤡᤖᤢᤛᤡᤒᤠᤒᤡ ᤔᤣ᤺ᤶᤒᤡ. ᤂᤧᤴ ᤁᤢᤛᤡᤱ ᤏᤡ᤺ᤵᤔᤠ ᤐᤥᤱ᤹॥ ᤂᤧᤴ ᤀᤣᤃᤠᤱ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤍᤠᤱᤒᤠᤖᤧ ᤀᤠᤰᤋᤱᤒᤠ ᤁᤧᤏᤡᤱᤘᤠ᤹ ᤐᤥᤱ᤹. ᤂᤧᤴ ᤀᤠᤏᤡᤃᤣ ᤕᤠᤵᤔᤡ ᤀᤠᤔᤧᤳᤋᤧ᤹ᤀᤥ॥