ᤀᤧᤈᤪᤠ 4 - LIFOTNTᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤶᤒᤡᤖᤢᤴᤇᤡᤴ 1 ᤕᤜᤢᤍᤠ ᤏᤢ ᤒᤣᤏᤩᤠᤔᤡᤏ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤔᤡᤜᤠ᤹ᤖᤧ ᤒᤣᤒᤡᤗᤥᤏ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤁᤧᤏᤢ᤺ᤱᤒᤠ ᤁᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤴ ᤕᤠᤶᤔᤥ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢᤀᤠᤱ ᤘᤠ᤹ ᤁᤧᤗ᤹ᤒᤠ ᤔᤧᤄᤧᤵᤛᤢ॥ 2 ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤕᤖᤢᤒᤠᤒᤣᤗᤧᤴ ᤏᤢ ᤜᤡᤶᤛᤕᤱᤜᤠ᤹ᤀᤥᤒᤠ ᤋᤢᤶᤓᤠᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤛᤧ ᤔᤧᤒᤣ ᤜᤧᤰᤁᤩᤠᤱ ᤀᤰᤂᤣ ᤔᤧᤔᤧᤳᤋᤢᤛᤡ. “ᤔᤠᤱᤜᤡᤶ ᤆᤥ᤺ᤰᤔᤠ ᤕᤠ᤺ᤶᤒᤰᤁᤥ ᤂᤡᤏᤡ᤹ ᤋᤣ᤺ᤱ ᤔᤧᤵᤔᤠᤏᤡᤱ ᤀᤠᤏᤡᤃᤣ ᤀᤠᤓᤠ᤺ᤰᤋᤧ᤹॥ ᤂᤡᤏᤡ᤹ ᤔᤠᤱᤛᤧᤘᤠ ᤁᤧᤔᤧᤳᤋᤢᤶᤒᤠ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤀᤠᤏᤡᤃᤧᤀᤠᤱ ᤛᤧᤘᤠ ᤔᤧᤳᤋᤢᤶᤒᤧ॥ ᤀᤛ᤻ᤛᤢᤖᤒᤠ ᤐᤕᤶ ᤜᤠᤱ ᤀᤣᤛᤖᤜᤍᤥᤏᤧᤸᤗᤧ ᤀᤠᤏᤡᤃᤣ ᤁ᤹ᤕᤥ ᤘᤠ᤹ᤔᤠ ᤕᤠᤵᤔᤡ ᤐᤠᤱᤄᤧᤒᤠ ᤕᤧᤶᤔᤠᤱᤎᤥᤀᤣ ᤀᤠᤏᤡᤃᤣ ᤂᤢᤏᤧ᤹ᤀᤥ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤶᤒᤧᤖ ᤘᤕᤡᤃᤧ॥” 3 ᤕᤖᤢᤒᤠᤒᤣᤗ. ᤕᤣᤛᤢᤀᤠ ᤏᤢ ᤜᤡᤶᤛᤕᤱᤜᤠ᤹ᤀᤥᤒᤠ ᤋᤢᤶᤓᤠᤰᤐᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤴ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤏᤡᤃᤣ ᤂᤡᤏᤡ᤹ ᤑᤠ᤹ᤔᤠ ᤆᤠᤜᤠ ᤔᤧᤈᤥᤃᤡᤃᤧᤴ॥ ᤂᤧᤴ ᤀᤠᤏᤡᤃᤣ ᤀᤠᤒᤠᤅᤣ ᤆᤥᤃᤢᤶᤒᤧ॥ ᤑᤠᤖᤛ ᤗᤠᤈᤣ᤹ᤒᤠ ᤐᤕᤶ ᤜᤠᤱ ᤁᤥᤖᤣᤛᤧᤸᤗᤧ ᤔᤢᤖᤠ ᤔᤧᤳᤋᤡᤃᤧᤒᤠ ᤜᤧᤰᤁᤣ ᤀᤠᤏᤡᤃᤣ ᤂᤧᤴ ᤕᤠ᤺ᤶᤒᤰᤁᤡᤴ ᤆᤥᤃᤢᤶᤒᤧ॥” 4 ᤜᤠᤒᤠ ᤂᤧᤴ ᤗᤠᤈᤣ᤹ᤀᤥ ᤁᤧᤕᤢᤱᤒᤠᤖ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤕᤜᤢᤍᤡᤜᤠ᤹ ᤂᤢᤴᤇᤡ᤹ ᤛᤰᤔᤠ ᤐᤢ᤹ᤖ ᤕᤠ᤺ᤶᤔᤠᤛᤡ. ᤕᤱᤔᤠ ᤛᤧᤵᤔᤠᤛᤡ ᤏᤢ ᤔᤠᤱᤜᤡᤶ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤆᤥᤰ ᤔᤧᤶᤓᤠ᤺ᤰᤔᤠᤛᤡ ᤋᤶᤛᤡᤱ ᤔᤧᤈᤥᤃᤢ॥ 5 ᤂᤧᤱᤜᤠ᤹ᤖᤧ ᤑᤠᤖᤛ ᤗᤠᤈᤣ᤹ᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤖ ᤑᤠ᤹ᤀᤠᤱ ᤛᤫᤠ᤺ᤳᤋᤠᤱ ᤛᤢᤖᤢᤋᤩᤠᤱ ᤔᤧᤒᤡᤖᤢᤛᤡ॥ ᤁᤥᤖᤣᤛᤧᤸᤗᤧ ᤁᤢᤜᤠᤱᤕᤢᤰ ᤆᤥ᤺ᤰᤆᤥ᤺ᤰ ᤏᤢ ᤍᤠᤖᤠ ᤜᤠᤱᤅᤡᤸᤗᤧ ᤁᤢᤜᤠᤱᤕᤢᤰ ᤕᤧᤶ ᤌᤠᤖᤡᤰ ᤂᤧᤱᤜᤠ᤹ᤖᤧ ᤜᤧᤰᤁᤣ ᤔᤧᤈᤥᤃᤢᤖ ᤔᤧᤘᤕᤧᤖᤥ॥ ᤕᤖᤢᤛᤗᤧᤔ ᤕᤧᤰᤕᤰ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤔᤧᤀᤳᤋᤢ 6 ᤀᤜᤠᤛᤢᤖᤛ ᤐᤕᤶ ᤜᤠᤱᤅᤡᤸᤗᤧ ᤁᤢᤜᤠᤱᤕᤢᤰᤁᤡᤸᤗᤧ ᤁᤢᤜᤣ᤺ᤰᤛᤡᤱᤔᤥ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤗᤳᤇᤠ ᤀᤠᤵᤋᤡᤰ ᤛᤰ ᤌᤡᤰ ᤔᤧᤛᤠᤵᤋᤢᤀᤠᤱ ᤔᤧᤍᤠᤖᤢ॥ 7 ᤕᤠᤶᤔᤥ ᤀᤷᤋᤠᤛᤠᤛ᤻ᤋ. ᤑᤠᤖᤛ ᤗᤠᤈᤣ᤹ᤒᤠ ᤐᤕᤶ ᤜᤠᤱᤅᤡᤸᤗᤧ ᤁᤢᤜᤠᤱᤕᤢᤰ ᤆᤥ᤺ᤰᤔᤠ ᤕᤧᤶᤔᤥ ᤘᤡᤛ᤻ᤗᤠᤔ. ᤔᤡᤋᤪᤣᤋᤠ. ᤋᤠᤒᤣᤗ ᤏᤢ ᤂᤧᤸᤗᤧ ᤁᤢᤴᤈᤢᤶᤜᤠ᤹ᤖᤧ ᤐᤕᤶ ᤜᤠᤱᤅᤡᤴ ᤗᤳᤇᤠ ᤛᤰᤀᤡᤱᤄᤱ ᤔᤧᤜᤠᤰᤋᤢ॥ ᤂᤧᤴ ᤛᤰᤀᤡᤱᤄᤱᤅᤡᤴ ᤀᤖᤠᤔᤡ ᤐᤠ᤺ᤴᤍᤠᤱᤅᤥ ᤔᤧᤛᤠᤵᤋᤢᤀᤠᤱ ᤘᤕᤧ ᤜᤧᤰᤁᤩᤠᤱ ᤔᤧᤏᤡᤖᤢᤸᤗᤧ ᤐᤠ᤺ᤴᤗᤧᤱᤔᤠ ᤁᤧᤒᤥᤱᤒᤠ ᤐᤥ᤺ᤰᤂᤧᤀᤠᤱ ᤘᤕᤧ॥ 8 ᤋᤢᤶ ᤜᤠᤱᤕᤢᤰᤐᤠ ᤖᤣᤜᤢᤔ ᤏᤢ ᤋᤧᤱᤃᤵᤐᤥᤒᤠ ᤛᤢᤜᤠᤱᤔᤡᤒᤠ ᤛᤡᤶᤛᤤᤖᤧ ᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤰᤋᤱᤒᤠ ᤛᤰᤀᤡᤱᤄᤱ ᤀᤷᤋᤠᤛᤠᤛ᤻ᤋᤧᤴ ᤜᤠᤰᤋᤧᤇᤢ— 9 “ᤋᤢᤶ ᤜᤠᤱᤕᤢᤰᤐᤠ ᤖᤣᤜᤢᤔ. ᤋᤧᤱᤃᤵᤐᤥᤒᤠ ᤛᤢᤜᤠᤱᤔᤡᤒᤠ ᤛᤡᤶᤛᤤ. ᤂᤧᤱᤜᤠ᤹ᤏᤢ ᤛᤥᤖᤡᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹. ᤂᤠᤛᤧᤴᤗᤥ᤺ᤶᤒᤠᤜᤠ᤹ ᤏᤢ ᤘᤣ᤹ ᤁᤧᤖᤧᤰ ᤛᤢᤜᤠᤱᤕᤢᤰᤐᤠᤜᤠ᤹. ᤂᤧᤱᤜᤠ᤹ᤃ ᤀᤣᤖᤣᤁ. ᤒᤣᤒᤡᤗᤥᤏ ᤏᤢ ᤛᤢᤛᤏᤒᤠ ᤀᤣᤗᤠᤔᤡ ᤔᤏᤠ ᤔᤧᤘᤕᤧᤖᤥ. 10 ᤂᤧᤴᤏᤢ ᤛᤥᤛᤥᤖᤡᤰ ᤘᤣ᤹ ᤛᤢᤘᤠᤱᤒᤠ ᤔᤏᤠᤜᤠ᤹. ᤂᤧᤴ ᤔᤢᤰᤁᤧᤃᤢᤒᤠ ᤀᤛᤢᤖᤘᤏᤡᤐᤗᤖᤧ ᤂᤧᤱᤜᤠ᤹ ᤂᤢᤴᤇᤡ᤹ ᤜᤡᤶᤔᤥᤗᤠᤶ ᤂᤧᤳᤋᤢᤛᤡᤀᤠᤱ ᤛᤠᤔᤖᤡᤕᤠ ᤕᤧᤰᤕᤰ ᤏᤢ ᤏᤠᤶᤎᤠ ᤐᤡᤛᤠᤱᤒᤠ ᤕᤢᤑᤪᤣᤋᤡᤛ ᤋᤧᤱᤃᤵᤐᤥᤒᤠ ᤘᤣ᤹ ᤋᤧᤴᤜᤠ᤹ᤀᤥ ᤕᤢᤰᤂᤢᤛᤡᤀᤠᤱ ᤘᤕᤧ॥” 11 ᤛᤰᤀᤡᤱᤄᤱᤅᤥ ᤁᤴ ᤐᤠ᤺ᤴᤏᤡᤴ ᤔᤧᤛᤠᤵᤋᤢᤀᤠᤱ ᤐᤳᤇᤧ— “ᤏᤠᤶᤎᤠ ᤐᤡᤛᤠᤱ ᤕᤢᤑᤪᤣᤋᤡᤛᤒᤠ ᤔᤏᤠᤜᤠ᤹. ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠᤜᤠ᤹ᤗᤠᤶ ᤐᤕᤶ ᤜᤠᤱ ᤀᤷᤋᤠᤛᤠᤛ᤻ᤋᤧ ᤛᤧᤘᤠᤖᤥ— 12 “ᤀᤠᤏᤡᤃᤣ ᤐᤕᤶ ᤜᤠᤱᤅᤡᤸᤗᤧ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤖ ᤁᤧᤗ᤹ᤒᤠ ᤀᤠᤏᤡᤃᤣ ᤀᤡ᤺ᤳᤋᤢᤶᤒᤧ. ᤀᤠᤍᤠᤱᤒᤠᤖᤧ ᤁᤧᤜᤠᤱᤈᤢᤶᤔᤥᤒᤠ ᤘᤣ᤹ ᤋᤧᤱᤃᤵᤜᤠ᤹ᤀᤥᤗᤠᤶ ᤁᤧᤍᤠᤒᤠ ᤕᤜᤢᤍᤡᤜᤠ᤹ ᤕᤖᤢᤛᤗᤧ᤺ᤶᤔᤥ ᤔᤧᤕᤢᤱ᤹ ᤜᤧᤰᤁᤩᤠᤱ ᤂᤧᤴ ᤋᤠᤰᤁᤧᤓᤧ᤹ᤒᤠ ᤏᤢ ᤐᤡᤑᤩᤢᤱᤒᤠ ᤕᤧᤰᤕᤰᤁᤡᤴ ᤕᤠᤶᤔᤥ ᤔᤧᤈᤥᤃᤢᤖ ᤔᤧᤕᤠᤰ॥ ᤂᤧᤱᤜᤠ᤹ᤖᤧ ᤗᤢᤱᤎᤠᤰᤁᤡᤴ ᤛᤧᤵᤔᤠ ᤔᤧᤜᤣ᤺ᤰᤋᤢᤀᤠᤱ ᤛᤢ᤺ᤵᤔᤠ ᤔᤧᤈᤥᤃᤢ᤹॥ 13 ᤀᤠᤍᤠᤱᤒᤠ ᤜᤠᤱᤅᤣ. ᤁᤴ ᤕᤧᤰᤕᤰᤁᤡᤴ ᤕᤠᤶᤔᤥ ᤆᤢᤰᤁᤠᤱ ᤁ᤹ᤕᤥᤒᤠ ᤗᤢᤱᤎᤠᤰᤜᤠ᤹ ᤆᤥ᤺ᤰᤔᤠ ᤔᤧᤛᤢᤖᤢᤏᤧᤓᤃᤪ ᤁᤴ ᤔᤏᤠᤜᤠ᤹ᤖᤧ ᤀᤣ᤺ᤱᤕᤠᤱ ᤜᤢᤱᤔᤠ ᤔᤧᤗᤧᤖᤢ᤹ ᤜᤧᤰᤁᤩᤠᤱ ᤐᤕᤶ ᤜᤠᤱᤅᤡᤸᤗᤧ ᤁᤧᤕᤠᤱ ᤕᤠᤱᤔᤥ ᤕᤠᤱᤛᤠᤜᤠ᤹ ᤛᤢ᤺ᤸᤗᤡᤰ ᤐᤥᤱ᤹॥ 14 ᤂᤧᤒᤩᤠᤱ ᤀᤠᤏᤡᤃᤣ ᤐᤕᤶ ᤜᤠᤱᤅᤡᤸᤗᤧ ᤁᤢᤕᤢᤰᤁᤥ ᤁᤧᤘᤠ᤹ᤒᤠ ᤐᤥ᤺ᤰᤂᤡᤃᤧᤒᤠᤸᤗᤧ ᤆᤥᤃᤢᤸᤗᤧ ᤀᤰᤂᤣ ᤐᤥᤱᤒᤠ ᤀᤠᤏᤡᤃᤣ ᤀᤥᤔᤧᤵᤔᤠ ᤔᤧᤛᤢᤰᤋᤢᤶᤒᤧᤴ ᤜᤧᤰᤁᤩᤠᤱ ᤜᤠᤱᤅᤡᤴ ᤀᤠᤏᤡᤃᤣ ᤁᤴ ᤛᤢᤈᤠ ᤐᤡᤀᤠᤛᤡᤃᤧ 15 ᤀᤠᤍᤠᤱᤒᤠᤖᤧ ᤁᤧᤶᤒᤠ ᤁᤧᤴᤎᤧᤒᤠᤛᤡᤖᤧ ᤔᤧᤛᤠᤵᤋᤢ ᤔᤧᤏᤧᤛ᤻ᤛᤢᤒᤠ ᤜᤠᤱᤈᤢᤶᤔᤥᤒᤠ ᤛᤠᤵᤗᤠᤔᤢᤴᤍᤣᤜᤠ᤹ᤀᤥ ᤁᤥ᤺ᤵᤔᤠ ᤐᤠᤱᤄᤧᤛᤧ᤹॥ ᤁᤴ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤀᤠᤓᤧᤸᤗᤧᤛᤠᤱ ᤐᤡᤑᤩᤢᤱ ᤁᤧᤈᤥ᤺ᤰᤐᤠ ᤕᤧᤰᤕᤰ ᤏᤢ ᤀᤢᤴᤇᤣ᤺ᤴᤒᤠ ᤕᤧᤶᤔᤠᤱᤎᤥᤀᤣ ᤜᤠᤱ ᤏᤢ ᤋᤧᤱᤃᤵᤐᤥᤒᤠ ᤕᤢᤰᤛᤠᤒᤠᤜᤠ᤹ ᤕᤧᤳᤋᤢᤰᤂᤣ ᤁᤧᤈᤠ᤺ᤵᤐᤠ ᤘᤕᤧᤒᤠ ᤐᤠ᤺ᤴᤏᤡᤴ ᤀᤠᤍᤠᤱᤒᤠᤖᤧ ᤏᤡᤱᤘᤠ᤹ ᤁᤧᤄᤥᤛᤢ᤹॥ ᤁᤴ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ ᤕᤢᤰᤁᤥ ᤁᤵᤔᤠᤛᤡ ᤀᤠᤓᤧᤸᤗᤧᤛᤠᤱ ᤁᤧᤛᤠᤰᤐᤠ ᤐᤥ᤺ᤰᤂᤧᤀᤠᤱ ᤘᤠ᤹॥ ᤂᤧᤸᤗᤧᤆᤥᤃᤢᤸᤗᤧ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤀᤠᤱ ᤘᤕᤧ॥ 16 ᤁᤴ ᤕᤧᤰᤕᤰᤁᤡᤴ ᤕᤠᤶᤔᤥ ᤔᤧᤈᤥᤃᤢ ᤔᤧᤛᤢᤖᤢ ᤜᤧᤰᤁᤩᤠᤱ ᤁ᤹ᤕᤥᤒᤠ ᤗᤢᤱᤎᤠᤰᤜᤠ᤹ ᤔᤧᤛᤧᤳᤋᤢ ᤔᤧᤛᤢᤖᤢᤏᤧᤓᤃᤪ ᤀᤠᤍᤠᤱᤒᤠᤖᤧ ᤕᤢᤑᤪᤣᤋᤡᤛ ᤘᤜ᤺ᤱᤅᤡᤸᤗᤧ ᤏᤠᤶᤎᤠ ᤐᤡᤛᤠᤱᤒᤠ ᤋᤧᤱᤃᤵᤐᤥ ᤕᤢᤰ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤜᤠᤱᤅᤡᤸᤗᤧ ᤏᤡᤱᤘᤠ᤹ ᤁᤧᤄᤥᤛᤢᤖ ᤁᤧᤗ᤹ᤒᤠ ᤀᤠᤏᤡᤃᤣ ᤏᤡᤱᤘᤠ᤹ ᤆᤥᤃᤢᤶᤒᤧ॥” 17 ᤜᤠᤱᤅᤡᤸᤗᤧ ᤀᤰᤋᤱᤒᤠ ᤏᤥᤃᤵ ᤜᤠᤰᤋᤢᤛᤡ— “ᤋᤢᤶ ᤜᤠᤱᤕᤢᤰᤐᤠ ᤖᤣᤜᤢᤔ. ᤋᤧᤱᤃᤵᤐᤥᤒᤠ ᤛᤢᤜᤠᤱᤔᤡᤒᤠ ᤛᤡᤶᤛᤤ ᤜᤧᤰᤁᤩᤠᤱ ᤛᤠᤔᤖᤡᤕᤠ ᤏᤢ ᤕᤢᤑᤪᤣᤋᤡᤛ ᤏᤠᤶᤎᤠ ᤐᤡᤛᤠᤱᤒᤠ ᤋᤧᤱᤃᤵᤐᤥ ᤁᤧᤕᤢᤱᤒᤠ ᤘᤣ᤹ ᤁᤧᤖᤧᤰ ᤑᤠ᤹ᤒᤠᤱ ᤋᤣ᤺ᤱᤈᤢᤶᤜᤠ᤹ ᤛᤧᤘᤠᤖᤥ— 18 “ᤂᤡᤏᤡ᤹ ᤕᤠᤵᤔᤡ ᤁᤧᤜᤠᤰᤋᤡᤒᤠ ᤛᤰᤀᤡᤱᤄᤱᤅᤡᤴ ᤐᤠᤴ ᤔᤧᤗᤧᤰᤂᤢᤀᤠᤱ ᤀᤠᤱᤃᤠ᤹ ᤂᤧᤵᤛᤢᤱᤗ ᤔᤧᤏᤡᤖᤢ ᤔᤧᤒᤡᤖᤠᤱ॥ 19 ᤗᤳᤇᤠ ᤛᤠ᤹ᤔᤠᤖᤧ ᤗᤠᤃᤡ ᤀᤡᤱᤈᤠᤱ ᤐᤡᤖᤢᤱᤛᤡᤱ ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱ ᤀᤢᤴᤇᤣ᤺ᤴᤒᤠ ᤕᤧᤶᤔᤠᤱᤎᤥᤀᤣ ᤕᤖᤢᤛᤗᤧ᤺ᤶᤔᤡᤸᤗᤧ ᤜᤠᤱ ᤕᤢᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤆᤥᤃᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤐᤡᤑᤩᤢᤱᤒᤠ ᤏᤢ ᤜᤕᤱᤁᤡᤸᤗᤡᤱ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤧᤎᤡᤶᤛᤢᤀᤠᤱ ᤘᤠ᤹॥ 20 ᤁᤧᤎᤢᤶᤒᤠ ᤜᤠᤱᤜᤠ᤹ᤖᤧ ᤕᤖᤢᤛᤗᤧ᤺ᤶᤔᤥ ᤁᤧᤖᤧᤰ ᤕᤢᤑᤪᤣᤋᤡᤛ ᤏᤠᤶᤎᤠ ᤐᤡᤛᤠᤱᤒᤠ ᤋᤧᤱᤃᤵᤐᤥ ᤜᤠᤱᤕᤢᤰ ᤔᤧᤈᤥᤃᤢᤀᤠᤱ ᤔᤧᤘᤠ᤹. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤜᤠᤱᤈᤢᤶᤒᤠ ᤀᤣ᤺ᤱᤕᤠᤱ ᤏᤢ ᤗᤠᤈᤣ᤹ᤒᤠ ᤀᤣ᤺ᤱᤕᤠᤱ ᤔᤧᤓᤥᤰᤂᤢᤀᤠᤱ ᤂᤧᤱᤜᤠ᤹ ᤔᤧᤒᤡᤖᤢᤛᤡᤀᤠᤱ ᤘᤠ᤹॥ 21 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤕᤠᤶᤔᤥ ᤘᤣ᤹ ᤀᤡᤱᤈᤠᤱ ᤔᤧᤴᤈᤥ᤺ᤰᤁᤣ ᤌᤠᤖᤡᤰ ᤂᤧᤴ ᤔᤏᤠᤜᤠ᤹ᤖᤧ ᤕᤧᤰᤕᤰ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤔᤧᤴᤈᤥᤃᤢᤴᤗ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤧᤶᤛᤡᤶᤔᤧ᤹॥ 22 ᤁᤴ ᤐᤠ᤺ᤴᤏᤥ ᤂᤡᤏᤡ᤹ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤁᤡᤴ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤧᤶᤔᤡᤴᤏᤧ᤹॥ ᤁᤴ ᤂᤡᤔᤥ ᤆᤥᤃᤧᤶᤍᤣᤛᤧᤶᤔᤧ᤹ ᤜᤧᤰᤁᤩᤠᤱ ᤜᤠᤱᤈᤢᤶᤔᤡᤸᤗᤧ ᤁᤢᤏᤢ᤹ᤔᤠ ᤁᤢᤍᤠᤔᤠᤖᤧ ᤗᤠᤃᤡ ᤌᤧᤔᤠᤀᤠᤱ ᤜᤠᤴᤋᤡ ᤔᤧᤒᤥᤱᤏᤧᤸᤗ॥” 23 ᤐᤕᤶ ᤜᤠᤱ ᤀᤷᤋᤠᤛᤠᤛ᤻ᤋᤖᤧ ᤂᤧᤴ ᤁᤢᤛᤰᤀᤡᤱᤄᤱᤅᤡᤴ ᤖᤣᤜᤢᤔ. ᤛᤡᤶᤛᤤ ᤏᤢ ᤂᤢᤴᤇᤡ᤹ ᤋᤣ᤺ᤱᤈᤢᤶᤜᤠ᤹ ᤔᤧᤏᤡᤖᤢᤀᤠᤱ ᤂᤧᤶᤔᤠ ᤔᤧᤒᤠᤱᤄᤢᤛᤡᤏᤢᤔᤧ᤺ᤴᤏᤣ ᤂᤧᤱᤜᤠ᤹ ᤐᤈᤠᤳ ᤔᤧᤈᤠᤳᤋᤧᤖ ᤕᤖᤢᤛᤗᤧ᤺ᤶᤔᤥ ᤔᤧᤒᤣ ᤜᤧᤰᤁᤩᤠᤱ ᤕᤠᤶᤔᤥ ᤕᤧᤰᤕᤰ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤕᤜᤢᤍᤡᤜᤠ᤹ ᤆᤥᤰ ᤔᤧᤶᤓᤠ᤺ᤰᤋᤢᤛᤡᤴᤗᤥ॥ 24 ᤁᤶᤓᤗ᤹ᤖᤡᤰ ᤕᤖᤢᤛᤗᤧ᤺ᤶᤔᤥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤜᤡᤶ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤆᤰ ᤗ᤹ᤖᤧ॥ ᤑᤠᤖᤛ ᤗᤠᤈᤣ᤹ᤒᤠ ᤐᤕᤶ ᤜᤠᤱ ᤍᤠᤖᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤋᤱᤒᤣ ᤏᤧᤴᤇᤡ ᤌᤠᤖᤡᤰ ᤁᤧᤖᤧᤰ ᤐᤖᤡᤰᤗᤧ ᤔᤠᤱᤜᤡᤶ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤔᤧᤗᤧᤖᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.